Ezekiel (Yechezqel) Chapter 10

‎1 ‏וָאֶרְאֶ֗ה וְהִנֵּ֤ה אֶל־הָרָקִ֙יעַ֙ אֲשֶׁר֙ עַל־רֹ֣אשׁ הַכְּרֻבִ֔ים כְּאֶ֣בֶן סַפִּ֔יר כְּמַרְאֵ֖ה דְּמ֣וּת כִּסֵּ֑א נִרְאָ֖ה עֲלֵיהֶֽם׃

‎2 ‏וַיֹּ֜אמֶר אֶל־הָאִ֣ישׁ׀ לְבֻ֣שׁ הַבַּדִּ֗ים וַיֹּ֡אמֶר בֹּא֩ אֶל־בֵּינ֨וֹת לַגַּלְגַּ֜ל אֶל־תַּ֣חַת לַכְּר֗וּב וּמַלֵּ֨א חָפְנֶ֤יךָ גַֽחֲלֵי־אֵשׁ֙ מִבֵּינ֣וֹת לַכְּרֻבִ֔ים וּזְרֹ֖ק עַל־הָעִ֑יר וַיָּבֹ֖א לְעֵינָֽי׃

‎3 ‏וְהַכְּרֻבִ֗ים עֹֽמְדִ֛ים מִימִ֥ין לַבַּ֖יִת בְּבֹא֣וֹ הָאִ֑ישׁ וְהֶעָנָ֣ן מָלֵ֔א אֶת־הֶחָצֵ֖ר הַפְּנִימִֽית׃

‎4 ‏וַיָּ֤רָם כְּבוֹד־יְהוָה֙ מֵעַ֣ל הַכְּר֔וּב עַ֖ל מִפְתַּ֣ן הַבָּ֑יִת וַיִּמָּלֵ֤א הַבַּ֙יִת֙ אֶת־הֶ֣עָנָ֔ן וְהֶֽחָצֵר֙ מָֽלְאָ֔ה אֶת־נֹ֖גַהּ כְּב֥וֹד יְהוָֽה׃

‎5 ‏וְקוֹל֙ כַּנְפֵ֣י הַכְּרוּבִ֔ים נִשְׁמַ֕ע עַד־הֶחָצֵ֖ר הַחִיצֹנָ֑ה כְּק֥וֹל אֵל־שַׁדַּ֖י בְּדַבְּרֽוֹ׃

‎6 ‏וַיְהִ֗י בְּצַוֹּתוֹ֙ אֶת־הָאִ֤ישׁ לְבֻֽשׁ־הַבַּדִּים֙ לֵאמֹ֔ר קַ֥ח אֵשׁ֙ מִבֵּינ֣וֹת לַגַּלְגַּ֔ל מִבֵּינ֖וֹת לַכְּרוּבִ֑ים וַיָּבֹא֙ וַֽיַּעֲמֹ֔ד אֵ֖צֶל הָאוֹפָֽן׃

‎7 ‏וַיִּשְׁלַח֩ הַכְּר֨וּב אֶת־יָד֜וֹ מִבֵּינ֣וֹת לַכְּרוּבִ֗ים אֶל־הָאֵשׁ֙ אֲשֶׁר֙ בֵּינ֣וֹת הַכְּרֻבִ֔ים וַיִּשָּׂא֙ וַיִּתֵּ֔ן אֶל־חָפְנֵ֖י לְבֻ֣שׁ הַבַּדִּ֑ים וַיִּקַּ֖ח וַיֵּצֵֽא׃

‎8 ‏וַיֵּרָ֖א לַכְּרֻבִ֑ים תַּבְנִית֙ יַד־אָדָ֔ם תַּ֖חַת כַּנְפֵיהֶֽם׃

‎9 ‏וָאֶרְאֶ֗ה וְהִנֵּ֨ה אַרְבָּעָ֣ה אוֹפַנִּים֮ אֵ֣צֶל הַכְּרוּבִים֒ אוֹפַ֣ן אֶחָ֗ד אֵ֚צֶל הַכְּר֣וּב אֶחָ֔ד וְאוֹפַ֣ן אֶחָ֔ד אֵ֖צֶל הַכְּר֣וּב אֶחָ֑ד וּמַרְאֵה֙ הָא֣וֹפַנִּ֔ים כְּעֵ֖ין אֶ֥בֶן תַּרְשִֽׁישׁ׃

‎10 ‏וּמַ֨רְאֵיהֶ֔ם דְּמ֥וּת אֶחָ֖ד לְאַרְבַּעְתָּ֑ם כַּאֲשֶׁ֛ר יִהְיֶ֥ה הָאוֹפַ֖ן בְּת֥וֹךְ הָאוֹפָֽן׃

‎11 ‏בְּלֶכְתָּ֗ם אֶל־אַרְבַּ֤עַת רִבְעֵיהֶם֙ יֵלֵ֔כוּ לֹ֥א יִסַּ֖בּוּ בְּלֶכְתָּ֑ם כִּ֣י הַמָּק֞וֹם אֲשֶׁר־יִפְנֶ֤ה הָרֹאשׁ֙ אַחֲרָ֣יו יֵלֵ֔כוּ לֹ֥א יִסַּ֖בּוּ בְּלֶכְתָּֽם׃

‎12 ‏וְכָל־בְּשָׂרָם֙ וְגַבֵּהֶ֔ם וִֽידֵיהֶ֖ם וְכַנְפֵיהֶ֑ם וְהָאֽוֹפַנִּ֗ים מְלֵאִ֤ים עֵינַ֙יִם֙ סָבִ֔יב לְאַרְבַּעְתָּ֖ם אוֹפַנֵּיהֶֽם׃

‎13 ‏לָא֖וֹפַנִּ֑ים לָהֶ֛ם קוֹרָ֥א הַגַּלְגַּ֖ל בְּאָזְנָֽי׃

‎14 ‏וְאַרְבָּעָ֥ה פָנִ֖ים לְאֶחָ֑ד פְּנֵ֨י הָאֶחָ֜ד פְּנֵ֣י הַכְּר֗וּב וּפְנֵ֤י הַשֵּׁנִי֙ פְּנֵ֣י אָדָ֔ם וְהַשְּׁלִישִׁי֙ פְּנֵ֣י אַרְיֵ֔ה וְהָרְבִיעִ֖י פְּנֵי־נָֽשֶׁר׃

‎15 ‏וַיֵּרֹ֖מּוּ הַכְּרוּבִ֑ים הִ֣יא הַחַיָּ֔ה אֲשֶׁ֥ר רָאִ֖יתִי בִּֽנְהַר־כְּבָֽר׃

‎16 ‏וּבְלֶ֙כֶת֙ הַכְּרוּבִ֔ים יֵלְכ֥וּ הָאוֹפַנִּ֖ים אֶצְלָ֑ם וּבִשְׂאֵ֨ת הַכְּרוּבִ֜ים אֶת־כַּנְפֵיהֶ֗ם לָרוּם֙ מֵעַ֣ל הָאָ֔רֶץ לֹא־יִסַּ֧בּוּ הָאוֹפַנִּ֛ים גַּם־הֵ֖ם מֵאֶצְלָֽם׃

‎17 ‏בְּעָמְדָ֣ם יַעֲמֹ֔דוּ וּבְרוֹמָ֖ם יֵר֣וֹמּוּ אוֹתָ֑ם כִּ֛י ר֥וּחַ הַחַיָּ֖ה בָּהֶֽם׃

‎18 ‏וַיֵּצֵא֙ כְּב֣וֹד יְהוָ֔ה מֵעַ֖ל מִפְתַּ֣ן הַבָּ֑יִת וַֽיַּעֲמֹ֖ד עַל־הַכְּרוּבִֽים׃

‎19 ‏וַיִּשְׂא֣וּ הַכְּרוּבִ֣ים אֶת־כַּ֠נְפֵיהֶם וַיֵּר֨וֹמּוּ מִן־הָאָ֤רֶץ לְעֵינַי֙ בְּצֵאתָ֔ם וְהָאֽוֹפַנִּ֖ים לְעֻמָּתָ֑ם וַֽיַּעֲמֹ֗ד פֶּ֣תַח שַׁ֤עַר בֵּית־יְהוָה֙ הַקַּדְמוֹנִ֔י וּכְב֧וֹד אֱלֹהֵֽי־יִשְׂרָאֵ֛ל עֲלֵיהֶ֖ם מִלְמָֽעְלָה׃

‎20 ‏הִ֣יא הַחַיָּ֗ה אֲשֶׁ֥ר רָאִ֛יתִי תַּ֥חַת אֱלֹהֵֽי־יִשְׂרָאֵ֖ל בִּֽנְהַר־כְּבָ֑ר וָאֵדַ֕ע כִּ֥י כְרוּבִ֖ים הֵֽמָּה׃

‎21 ‏אַרְבָּעָ֨ה אַרְבָּעָ֤ה פָנִים֙ לְאֶחָ֔ד וְאַרְבַּ֥ע כְּנָפַ֖יִם לְאֶחָ֑ד וּדְמוּת֙ יְדֵ֣י אָדָ֔ם תַּ֖חַת כַּנְפֵיהֶֽם׃

‎22 ‏וּדְמ֣וּת פְּנֵיהֶ֔ם הֵ֣מָּה הַפָּנִ֗ים אֲשֶׁ֤ר רָאִ֙יתִי֙ עַל־נְהַר־כְּבָ֔ר מַרְאֵיהֶ֖ם וְאוֹתָ֑ם אִ֛ישׁ אֶל־עֵ֥בֶר פָּנָ֖יו יֵלֵֽכוּ׃

1 wā’erə’eh wəhinnēh ’el-hārāqî‘a ’ăšer ‘al-rō’š hakəruḇîm kə’eḇen sapîr kəmarə’ēh dəmûṯ kissē’ nirə’â ‘ălêhem:

2 wayyō’mer ’el-hā’îš| ləḇuš habadîm wayyō’mer bō’ ’el-bênwōṯ lagaləgal ’el-t^aḥaṯ lakərûḇ ûmallē’ ḥāfəneyḵā ḡ^aḥălê-’ēš mibênwōṯ lakəruḇîm ûzərōq ‘al-hā‘îr wayyāḇō’ lə‘ênāy:

3 wəhakəruḇîm ‘ōməḏîm mîmîn labayiṯ bəḇō’wō hā’îš wəhe‘ānān mālē’ ’eṯ-heḥāṣēr hapənîmîṯ:

4 wayyārām kəḇwōḏ-yəhwâ mē‘al hakərûḇ ‘al mifətan habāyiṯ wayyimmālē’ habayiṯ ’eṯ-he‘ānān wəheḥāṣēr mālə’â ’eṯ-nōḡ^ah kəḇwōḏ yəhwâ:

5 wəqwōl kanəfê hakərûḇîm nišəm^a‘ ‘aḏ-heḥāṣēr h^aḥîṣōnâ kəqwōl ’ēl-šaday bəḏabərwō:

6 wayəhî bəṣaûōṯwō ’eṯ-hā’îš ləḇuš-habadîm lē’mōr q^aḥ ’ēš mibênwōṯ lagaləgal mibênwōṯ lakərûḇîm wayyāḇō’ wayy^a‘ămōḏ ’ēṣel hā’wōfān:

7 wayyišəl^aḥ hakərûḇ ’eṯ-yāḏwō mibênwōṯ lakərûḇîm ’el-hā’ēš ’ăšer bênwōṯ hakəruḇîm wayyiśśā’ wayyitēn ’el-ḥāfənê ləḇuš habadîm wayyiqq^aḥ wayyēṣē’:

8 wayyērā’ lakəruḇîm taḇənîṯ yaḏ-’āḏām t^aḥaṯ kanəfêhem:

9 wā’erə’eh wəhinnēh ’arəbā‘â ’wōfannîm ’ēṣel hakərûḇîm ’wōfan ’eḥāḏ ’ēṣel hakərûḇ ’eḥāḏ wə’wōfan ’eḥāḏ ’ēṣel hakərûḇ ’eḥāḏ ûmarə’ēh hā’wōfannîm kə‘ên ’eḇen tarəšîš:

10 ûmarə’êhem dəmûṯ ’eḥāḏ lə’arəb^a‘ətām ka’ăšer yihəyeh hā’wōfan bəṯwōḵə hā’wōfān:

11 bəleḵətām ’el-’arəb^a‘aṯ riḇə‘êhem yēlēḵû lō’ yissabû bəleḵətām kî hammāqwōm ’ăšer-yifəneh hārō’š ’^aḥărāyw yēlēḵû lō’ yissabû bəleḵətām:

12 wəḵāl-bəśārām wəḡabēhem wîḏêhem wəḵanəfêhem wəhā’wōfannîm məlē’îm ‘ênayim sāḇîḇ lə’arəb^a‘ətām ’wōfannêhem:

13 lā’wōfannîm lâem qwōrā’ hagaləgal bə’āzənāy:

14 wə’arəbā‘â fānîm lə’eḥāḏ pənê hā’eḥāḏ pənê hakərûḇ ûfənê haššēnî pənê ’āḏām wəhaššəlîšî pənê ’arəyēh wəhārəḇî‘î pənê-nāšer:

15 wayyērōmmû hakərûḇîm hî’ h^aḥayyâ ’ăšer rā’îṯî binəhar-kəḇār:

16 ûḇəleḵeṯ hakərûḇîm yēləḵû hā’wōfannîm ’eṣəlām ûḇiśə’ēṯ hakərûḇîm ’eṯ-kanəfêhem lārûm mē‘al hā’āreṣ lō’-yissabû hā’wōfannîm gam-hēm mē’eṣəlām:

17 bə‘āməḏām y^a‘ămōḏû ûḇərwōmām yērwōmmû ’wōṯām kî rûḥa h^aḥayyâ bâem:

18 wayyēṣē’ kəḇwōḏ yəhwâ mē‘al mifətan habāyiṯ wayy^a‘ămōḏ ‘al-hakərûḇîm:

19 wayyiśə’û hakərûḇîm ’eṯ-kanəfêhem wayyērwōmmû min-hā’āreṣ lə‘ênay bəṣē’ṯām wəhā’wōfannîm lə‘ummāṯām wayy^a‘ămōḏ peṯ^aḥ š^a‘ar bêṯ-yəhwâ haqqaḏəmwōnî ûḵəḇwōḏ ’ĕlōhê-yiśərā’ēl ‘ălêhem miləmā‘əlâ:

20 hî’ h^aḥayyâ ’ăšer rā’îṯî t^aḥaṯ ’ĕlōhê-yiśərā’ēl binəhar-kəḇār wā’ēḏ^a‘ kî ḵərûḇîm hēmmâ:

21 ’arəbā‘â ’arəbā‘â fānîm lə’eḥāḏ wə’arəb^a‘ kənāfayim lə’eḥāḏ ûḏəmûṯ yəḏê ’āḏām t^aḥaṯ kanəfêhem:

22 ûḏəmûṯ pənêhem hēmmâ hapānîm ’ăšer rā’îṯî ‘al-nəhar-kəḇār marə’êhem wə’wōṯām ’îš ’el-‘ēḇer pānāyw yēlēḵû: