Ezekiel (Yechezqel) Chapter 20

‎1 ‏וַיְהִ֣י׀ בַּשָּׁנָ֣ה הַשְּׁבִיעִ֗ית בַּֽחֲמִשִׁי֙ בֶּעָשׂ֣וֹר לַחֹ֔דֶשׁ בָּ֧אוּ אֲנָשִׁ֛ים מִזִּקְנֵ֥י יִשְׂרָאֵ֖ל לִדְרֹ֣שׁ אֶת־יְהוָ֑ה וַיֵּשְׁב֖וּ לְפָנָֽי׃ ס

‎2 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎3 ‏בֶּן־אָדָ֗ם דַּבֵּ֞ר אֶת־זִקְנֵ֤י יִשְׂרָאֵל֙ וְאָמַרְתָּ֣ אֲלֵהֶ֔ם כֹּ֤ה אָמַר֙ אֲדֹנָ֣י יְהוִ֔ה הֲלִדְרֹ֥שׁ אֹתִ֖י אַתֶּ֣ם בָּאִ֑ים חַי־אָ֙נִי֙ אִם־אִדָּרֵ֣שׁ לָכֶ֔ם נְאֻ֖ם אֲדֹנָ֥י יְהוִֽה׃

‎4 ‏הֲתִשְׁפֹּ֣ט אֹתָ֔ם הֲתִשְׁפּ֖וֹט בֶּן־אָדָ֑ם אֶת־תּוֹעֲבֹ֥ת אֲבוֹתָ֖ם הוֹדִיעֵֽם׃

‎5 ‏וְאָמַרְתָּ֣ אֲלֵיהֶ֗ם כֹּֽה־אָמַר֮ אֲדֹנָ֣י יְהוִה֒ בְּיוֹם֙ בָּחֳרִ֣י בְיִשְׂרָאֵ֔ל וָאֶשָּׂ֣א יָדִ֗י לְזֶ֙רַע֙ בֵּ֣ית יַֽעֲקֹ֔ב וָאִוָּדַ֥ע לָהֶ֖ם בְּאֶ֣רֶץ מִצְרָ֑יִם וָאֶשָּׂ֨א יָדִ֤י לָהֶם֙ לֵאמֹ֔ר אֲנִ֖י יְהוָ֥ה אֱלֹהֵיכֶֽם׃

‎6 ‏בַּיּ֣וֹם הַה֗וּא נָשָׂ֤אתִי יָדִי֙ לָהֶ֔ם לְהֽוֹצִיאָ֖ם מֵאֶ֣רֶץ מִצְרָ֑יִם אֶל־אֶ֜רֶץ אֲשֶׁר־תַּ֣רְתִּי לָהֶ֗ם זָבַ֤ת חָלָב֙ וּדְבַ֔שׁ צְבִ֥י הִ֖יא לְכָל־הָאֲרָצֽוֹת׃

‎7 ‏וָאֹמַ֣ר אֲלֵהֶ֗ם אִ֣ישׁ שִׁקּוּצֵ֤י עֵינָיו֙ הַשְׁלִ֔יכוּ וּבְגִלּוּלֵ֥י מִצְרַ֖יִם אַל־תִּטַּמָּ֑אוּ אֲנִ֖י יְהוָ֥ה אֱלֹהֵיכֶֽם׃

‎8 ‏וַיַּמְרוּ־בִ֗י וְלֹ֤א אָבוּ֙ לִּשְׁמֹ֣עַ אֵלַ֔י אִ֣ישׁ אֶת־שִׁקּוּצֵ֤י עֵֽינֵיהֶם֙ לֹ֣א הִשְׁלִ֔יכוּ וְאֶת־גִּלּוּלֵ֥י מִצְרַ֖יִם לֹ֣א עָזָ֑בוּ וָאֹמַ֞ר לִשְׁפֹּ֧ךְ חֲמָתִ֣י עֲלֵיהֶ֗ם לְכַלּ֤וֹת אַפִּי֙ בָּהֶ֔ם בְּת֖וֹךְ אֶ֥רֶץ מִצְרָֽיִם׃

‎9 ‏וָאַ֙עַשׂ֙ לְמַ֣עַן שְׁמִ֔י לְבִלְתִּ֥י הֵחֵ֛ל לְעֵינֵ֥י הַגּוֹיִ֖ם אֲשֶׁר־הֵ֣מָּה בְתוֹכָ֑ם אֲשֶׁ֨ר נוֹדַ֤עְתִּי אֲלֵיהֶם֙ לְעֵ֣ינֵיהֶ֔ם לְהוֹצִיאָ֖ם מֵאֶ֥רֶץ מִצְרָֽיִם׃

‎10 ‏וָאֽוֹצִיאֵ֖ם מֵאֶ֣רֶץ מִצְרָ֑יִם וָאֲבִאֵ֖ם אֶל־הַמִּדְבָּֽר׃

‎11 ‏וָאֶתֵּ֤ן לָהֶם֙ אֶת־חֻקּוֹתַ֔י וְאֶת־מִשְׁפָּטַ֖י הוֹדַ֣עְתִּי אוֹתָ֑ם אֲשֶׁ֨ר יַעֲשֶׂ֥ה אוֹתָ֛ם הָאָדָ֖ם וָחַ֥י בָּהֶֽם׃

‎12 ‏וְגַ֤ם אֶת־שַׁבְּתוֹתַי֙ נָתַ֣תִּי לָהֶ֔ם לִהְי֣וֹת לְא֔וֹת בֵּינִ֖י וּבֵֽינֵיהֶ֑ם לָדַ֕עַת כִּ֛י אֲנִ֥י יְהוָ֖ה מְקַדְּשָֽׁם׃

‎13 ‏וַיַּמְרוּ־בִ֨י בֵֽית־יִשְׂרָאֵ֜ל בַּמִּדְבָּ֗ר בְּחֻקּוֹתַ֨י לֹא־הָלָ֜כוּ וְאֶת־מִשְׁפָּטַ֣י מָאָ֗סוּ אֲשֶׁר֩ יַעֲשֶׂ֨ה אֹתָ֤ם הָֽאָדָם֙ וָחַ֣י בָּהֶ֔ם וְאֶת־שַׁבְּתֹתַ֖י חִלְּל֣וּ מְאֹ֑ד וָאֹמַ֞ר לִשְׁפֹּ֨ךְ חֲמָתִ֧י עֲלֵיהֶ֛ם בַּמִּדְבָּ֖ר לְכַלּוֹתָֽם׃

‎14 ‏וָאֶעֱשֶׂ֖ה לְמַ֣עַן שְׁמִ֑י לְבִלְתִּ֤י הֵחֵל֙ לְעֵינֵ֣י הַגּוֹיִ֔ם אֲשֶׁ֥ר הוֹצֵאתִ֖ים לְעֵינֵיהֶֽם׃

‎15 ‏וְגַם־אֲנִ֗י נָשָׂ֧אתִי יָדִ֛י לָהֶ֖ם בַּמִּדְבָּ֑ר לְבִלְתִּי֩ הָבִ֨יא אוֹתָ֜ם אֶל־הָאָ֣רֶץ אֲשֶׁר־נָתַ֗תִּי זָבַ֤ת חָלָב֙ וּדְבַ֔שׁ צְבִ֥י הִ֖יא לְכָל־הָאֲרָצֽוֹת׃

‎16 ‏יַ֜עַן בְּמִשְׁפָּטַ֣י מָאָ֗סוּ וְאֶת־חֻקּוֹתַי֙ לֹא־הָלְכ֣וּ בָהֶ֔ם וְאֶת־שַׁבְּתוֹתַ֖י חִלֵּ֑לוּ כִּ֛י אַחֲרֵ֥י גִלּוּלֵיהֶ֖ם לִבָּ֥ם הֹלֵֽךְ׃

‎17 ‏וַתָּ֧חָס עֵינִ֛י עֲלֵיהֶ֖ם מִֽשַּׁחֲתָ֑ם וְלֹֽא־עָשִׂ֧יתִי אוֹתָ֛ם כָּלָ֖ה בַּמִּדְבָּֽר׃

‎18 ‏וָאֹמַ֤ר אֶל־בְּנֵיהֶם֙ בַּמִּדְבָּ֔ר בְּחוּקֵּ֤י אֲבֽוֹתֵיכֶם֙ אַל־תֵּלֵ֔כוּ וְאֶת־מִשְׁפְּטֵיהֶ֖ם אַל־תִּשְׁמֹ֑רוּ וּבְגִלּוּלֵיהֶ֖ם אַל־תִּטַּמָּֽאוּ׃

‎19 ‏אֲנִי֙ יְהוָ֣ה אֱלֹהֵיכֶ֔ם בְּחֻקּוֹתַ֖י לֵ֑כוּ וְאֶת־מִשְׁפָּטַ֥י שִׁמְר֖וּ וַעֲשׂ֥וּ אוֹתָֽם׃

‎20 ‏וְאֶת־שַׁבְּתוֹתַ֖י קַדֵּ֑שׁוּ וְהָי֤וּ לְאוֹת֙ בֵּינִ֣י וּבֵֽינֵיכֶ֔ם לָדַ֕עַת כִּ֛י אֲנִ֥י יְהוָ֖ה אֱלֹהֵיכֶֽם׃

‎21 ‏וַיַּמְרוּ־בִ֣י הַבָּנִ֗ים בְּחֻקּוֹתַ֣י לֹֽא־הָ֠לָכוּ וְאֶת־מִשְׁפָּטַ֨י לֹא־שָׁמְר֜וּ לַעֲשׂ֣וֹת אוֹתָ֗ם אֲשֶׁר֩ יַעֲשֶׂ֨ה אוֹתָ֤ם הָֽאָדָם֙ וָחַ֣י בָּהֶ֔ם אֶת־שַׁבְּתוֹתַ֖י חִלֵּ֑לוּ וָאֹמַ֞ר לִשְׁפֹּ֧ךְ חֲמָתִ֣י עֲלֵיהֶ֗ם לְכַלּ֥וֹת אַפִּ֛י בָּ֖ם בַּמִּדְבָּֽר׃

‎22 ‏וַהֲשִׁבֹ֙תִי֙ אֶת־יָדִ֔י וָאַ֖עַשׂ לְמַ֣עַן שְׁמִ֑י לְבִלְתִּ֤י הֵחֵל֙ לְעֵינֵ֣י הַגּוֹיִ֔ם אֲשֶׁר־הוֹצֵ֥אתִי אוֹתָ֖ם לְעֵינֵיהֶֽם׃

‎23 ‏גַּם־אֲנִ֗י נָשָׂ֧אתִי אֶת־יָדִ֛י לָהֶ֖ם בַּמִּדְבָּ֑ר לְהָפִ֤יץ אֹתָם֙ בַּגּוֹיִ֔ם וּלְזָר֥וֹת אוֹתָ֖ם בָּאֲרָצֽוֹת׃

‎24 ‏יַ֜עַן מִשְׁפָּטַ֤י לֹֽא־עָשׂוּ֙ וְחֻקּוֹתַ֣י מָאָ֔סוּ וְאֶת־שַׁבְּתוֹתַ֖י חִלֵּ֑לוּ וְאַחֲרֵי֙ גִּלּוּלֵ֣י אֲבוֹתָ֔ם הָי֖וּ עֵינֵיהֶֽם׃

‎25 ‏וְגַם־אֲנִי֙ נָתַ֣תִּי לָהֶ֔ם חֻקִּ֖ים לֹ֣א טוֹבִ֑ים וּמִ֨שְׁפָּטִ֔ים לֹ֥א יִֽחְי֖וּ בָּהֶֽם׃

‎26 ‏וָאֲטַמֵּ֤א אוֹתָם֙ בְּמַתְּנוֹתָ֔ם בְּהַעֲבִ֖יר כָּל־פֶּ֣טֶר רָ֑חַם לְמַ֣עַן אֲשִׁמֵּ֔ם לְמַ֙עַן֙ אֲשֶׁ֣ר יֵֽדְע֔וּ אֲשֶׁ֖ר אֲנִ֥י יְהוָֽה׃ ס

‎27 ‏לָכֵ֞ן דַּבֵּ֨ר אֶל־בֵּ֤ית יִשְׂרָאֵל֙ בֶּן־אָדָ֔ם וְאָמַרְתָּ֣ אֲלֵיהֶ֔ם כֹּ֥ה אָמַ֖ר אֲדֹנָ֣י יְהוִ֑ה ע֗וֹד זֹ֚את³ גִּדְּפ֤וּ אוֹתִי֙ אֲב֣וֹתֵיכֶ֔ם בְּמַעֲלָ֥ם בִּ֖י מָֽעַל׃

‎28 ‏וָאֲבִיאֵם֙ אֶל־הָאָ֔רֶץ אֲשֶׁ֤ר נָשָׂ֙אתִי֙ אֶת־יָדִ֔י לָתֵ֥ת אוֹתָ֖הּ לָהֶ֑ם וַיִּרְאוּ֩ כָל־גִּבְעָ֨ה רָמָ֜ה וְכָל־עֵ֣ץ עָבֹ֗ת וַיִּזְבְּחוּ־שָׁ֤ם אֶת־זִבְחֵיהֶם֙ וַיִּתְּנוּ־שָׁם֙ כַּ֣עַס קָרְבָּנָ֔ם וַיָּשִׂ֣ימוּ שָׁ֗ם רֵ֚יחַ נִיח֣וֹחֵיהֶ֔ם וַיַּסִּ֥יכוּ שָׁ֖ם אֶת־נִסְכֵּיהֶֽם׃

‎29 ‏וָאֹמַ֣ר אֲלֵהֶ֔ם מָ֣ה הַבָּמָ֔ה אֲשֶׁר־אַתֶּ֥ם הַבָּאִ֖ים שָׁ֑ם וַיִּקָּרֵ֤א שְׁמָהּ֙ בָּמָ֔ה עַ֖ד הַיּ֥וֹם הַזֶּֽה׃

‎30 ‏לָכֵ֞ן אֱמֹ֣ר׀ אֶל־בֵּ֣ית יִשְׂרָאֵ֗ל כֹּ֤ה אָמַר֙ אֲדֹנָ֣י יְהוִ֔ה הַבְּדֶ֥רֶךְ אֲבֽוֹתֵיכֶ֖ם אַתֶּ֣ם נִטְמְאִ֑ים וְאַחֲרֵ֥י שִׁקּוּצֵיהֶ֖ם אַתֶּ֥ם זֹנִֽים׃

‎31 ‏וּבִשְׂאֵ֣ת מַתְּנֹֽתֵיכֶ֡ם בְּֽהַעֲבִיר֩ בְּנֵיכֶ֨ם בָּאֵ֜שׁ אַתֶּם֩ נִטְמְאִ֤֨ים לְכָל־גִּלּֽוּלֵיכֶם֙ עַד־הַיּ֔וֹם וַאֲנִ֛י אִדָּרֵ֥שׁ לָכֶ֖ם בֵּ֣ית יִשְׂרָאֵ֑ל חַי־אָ֗נִי נְאֻם֙ אֲדֹנָ֣י יְהוִ֔ה אִם־אִדָּרֵ֖שׁ לָכֶֽם׃

‎32 ‏וְהָֽעֹלָה֙ עַל־ר֣וּחֲכֶ֔ם הָי֖וֹ לֹ֣א תִֽהְיֶ֑ה אֲשֶׁ֣ר׀ אַתֶּ֣ם אֹמְרִ֗ים נִֽהְיֶ֤ה כַגּוֹיִם֙ כְּמִשְׁפְּח֣וֹת הָאֲרָצ֔וֹת לְשָׁרֵ֖ת עֵ֥ץ וָאָֽבֶן׃

‎33 ‏חַי־אָ֕נִי נְאֻ֖ם אֲדֹנָ֣י יְהוִ֑ה אִם־לֹ֠א בְּיָ֨ד חֲזָקָ֜ה וּבִזְר֧וֹעַ נְטוּיָ֛ה וּבְחֵמָ֥ה שְׁפוּכָ֖ה אֶמְל֥וֹךְ עֲלֵיכֶֽם׃

‎34 ‏וְהוֹצֵאתִ֤י אֶתְכֶם֙ מִן־הָ֣עַמִּ֔ים וְקִבַּצְתִּ֣י אֶתְכֶ֔ם מִן־הָ֣אֲרָצ֔וֹת אֲשֶׁ֥ר נְפוֹצֹתֶ֖ם בָּ֑ם בְּיָ֤ד חֲזָקָה֙ וּבִזְר֣וֹעַ נְטוּיָ֔ה וּבְחֵמָ֖ה שְׁפוּכָֽה׃

‎35 ‏וְהֵבֵאתִ֣י אֶתְכֶ֔ם אֶל־מִדְבַּ֖ר הָֽעַמִּ֑ים וְנִשְׁפַּטְתִּ֤י אִתְּכֶם֙ שָׁ֔ם פָּנִ֖ים אֶל־פָּנִֽים׃

‎36 ‏כַּאֲשֶׁ֤ר נִשְׁפַּ֙טְתִּי֙ אֶת־אֲב֣וֹתֵיכֶ֔ם בְּמִדְבַּ֖ר אֶ֣רֶץ מִצְרָ֑יִם כֵּ֚ן אִשָּׁפֵ֣ט אִתְּכֶ֔ם נְאֻ֖ם אֲדֹנָ֥י יְהוִֽה׃

‎37 ‏וְהַעֲבַרְתִּ֥י אֶתְכֶ֖ם תַּ֣חַת הַשָּׁ֑בֶט וְהֵבֵאתִ֥י אֶתְכֶ֖ם בְּמָסֹ֥רֶת הַבְּרִֽית׃

‎38 ‏וּבָרוֹתִ֣י מִכֶּ֗ם הַמֹּרְדִ֤ים וְהַפּֽוֹשְׁעִים֙ בִּ֔י מֵאֶ֤רֶץ מְגֽוּרֵיהֶם֙ אוֹצִ֣יא אוֹתָ֔ם וְאֶל־אַדְמַ֥ת יִשְׂרָאֵ֖ל לֹ֣א יָב֑וֹא וִֽידַעְתֶּ֖ם כִּי־אֲנִ֥י יְהוָֽה׃

‎39 ‏וְאַתֶּ֨ם בֵּֽית־יִשְׂרָאֵ֜ל כֹּֽה־אָמַ֣ר׀ אֲדֹנָ֣י יְהוִֹ֗ה אִ֤ישׁ גִּלּוּלָיו֙ לְכ֣וּ עֲבֹ֔דוּ וְאַחַ֕ר אִם־אֵינְכֶ֖ם שֹׁמְעִ֣ים אֵלָ֑י וְאֶת־שֵׁ֤ם קָדְשִׁי֙ לֹ֣א תְחַלְּלוּ־ע֔וֹד בְּמַתְּנֽוֹתֵיכֶ֖ם וּבְגִלּוּלֵיכֶֽם׃

‎40 ‏כִּ֣י בְהַר־קָדְשִׁ֞י בְּהַ֣ר׀ מְר֣וֹם יִשְׂרָאֵ֗ל נְאֻם֙ אֲדֹנָ֣י יְהוִ֔ה שָׁ֣ם יַעַבְדֻ֜נִי כָּל־בֵּ֧ית יִשְׂרָאֵ֛ל כֻּלֹּ֖ה בָּאָ֑רֶץ שָׁ֣ם אֶרְצֵ֔ם וְשָׁ֞ם אֶדְר֣וֹשׁ אֶת־תְּרוּמֹֽתֵיכֶ֗ם וְאֶת־רֵאשִׁ֛ית מַשְׂאוֹתֵיכֶ֖ם בְּכָל־קָדְשֵׁיכֶֽם׃

‎41 ‏בְּרֵ֣יחַ נִיחֹחַ֮ אֶרְצֶ֣ה אֶתְכֶם֒ בְּהוֹצִיאִ֤י אֶתְכֶם֙ מִן־הָ֣עַמִּ֔ים וְקִבַּצְתִּ֣י אֶתְכֶ֔ם מִן־הָ֣אֲרָצ֔וֹת אֲשֶׁ֥ר נְפֹצֹתֶ֖ם בָּ֑ם וְנִקְדַּשְׁתִּ֥י בָכֶ֖ם לְעֵינֵ֥י הַגּוֹיִֽם׃

‎42 ‏וִֽידַעְתֶּם֙ כִּֽי־אֲנִ֣י יְהוָ֔ה בַּהֲבִיאִ֥י אֶתְכֶ֖ם אֶל־אַדְמַ֣ת יִשְׂרָאֵ֑ל אֶל־הָאָ֗רֶץ אֲשֶׁ֤ר נָשָׂ֙אתִי֙ אֶת־יָדִ֔י לָתֵ֥ת אוֹתָ֖הּ לַאֲבֽוֹתֵיכֶֽם׃

‎43 ‏וּזְכַרְתֶּם־שָׁ֗ם אֶת־דַּרְכֵיכֶם֙ וְאֵת֙ כָּל־עֲלִיל֣וֹתֵיכֶ֔ם אֲשֶׁ֥ר נִטְמֵאתֶ֖ם בָּ֑ם וּנְקֹֽטֹתֶם֙ בִּפְנֵיכֶ֔ם בְּכָל־רָעוֹתֵיכֶ֖ם אֲשֶׁ֥ר עֲשִׂיתֶֽם׃

‎44 ‏וִֽידַעְתֶּם֙ כִּֽי־אֲנִ֣י יְהוָ֔ה בַּעֲשׂוֹתִ֥י אִתְּכֶ֖ם לְמַ֣עַן שְׁמִ֑י לֹא֩ כְדַרְכֵיכֶ֨ם הָרָעִ֜ים וְכַעֲלִילֽוֹתֵיכֶ֤ם הַנִּשְׁחָתוֹת֙ בֵּ֣ית יִשְׂרָאֵ֔ל נְאֻ֖ם אֲדֹנָ֥י יְהוִֽה׃ פ

1 wayəhî| baššānâ haššəḇî‘îṯ b^aḥămišî be‘āśwōr l^aḥōḏeš bā’û ’ănāšîm mizziqənê yiśərā’ēl liḏərōš ’eṯ-yəhwâ wayyēšəḇû ləfānāy: s

2 wayəhî ḏəḇar-yəhwâ ’ēlay lē’mōr:

3 ben-’āḏām dabēr ’eṯ-ziqənê yiśərā’ēl wə’āmarətā ’ălēhem kōh ’āmar ’ăḏōnāy yəhwih hăliḏərōš ’ōṯî ’atem bā’îm ḥay-’ānî ’im-’idārēš lāḵem nə’um ’ăḏōnāy yəhwih:

4 hăṯišəpōṭ ’ōṯām hăṯišəpwōṭ ben-’āḏām ’eṯ-twō‘ăḇōṯ ’ăḇwōṯām hwōḏî‘ēm:

5 wə’āmarətā ’ălêhem kōh-’āmar ’ăḏōnāy yəhwih bəywōm bāḥŏrî ḇəyiśərā’ēl wā’eśśā’ yāḏî ləzer^a‘ bêṯ y^a‘ăqōḇ wā’iûāḏ^a‘ lâem bə’ereṣ miṣərāyim wā’eśśā’ yāḏî lâem lē’mōr ’ănî yəhwâ ’ĕlōhêḵem:

6 bayywōm hahû’ nāśā’ṯî yāḏî lâem ləhwōṣî’ām mē’ereṣ miṣərāyim ’el-’ereṣ ’ăšer-tarətî lâem zāḇaṯ ḥālāḇ ûḏəḇaš ṣəḇî hî’ ləḵāl-hā’ărāṣwōṯ:

7 wā’ōmar ’ălēhem ’îš šiqqûṣê ‘ênāyw hašəlîḵû ûḇəḡillûlê miṣərayim ’al-tiṭṭammā’û ’ănî yəhwâ ’ĕlōhêḵem:

8 wayyamərû-ḇî wəlō’ ’āḇû llišəmō‘a ’ēlay ’îš ’eṯ-šiqqûṣê ‘ênêhem lō’ hišəlîḵû wə’eṯ-gillûlê miṣərayim lō’ ‘āzāḇû wā’ōmar lišəpōḵə ḥămāṯî ‘ălêhem ləḵallwōṯ ’apî bâem bəṯwōḵə ’ereṣ miṣərāyim:

9 wā’^a‘aś ləm^a‘an šəmî ləḇilətî hēḥēl lə‘ênê hagwōyim ’ăšer-hēmmâ ḇəṯwōḵām ’ăšer nwōḏ^a‘ətî ’ălêhem lə‘ênêhem ləhwōṣî’ām mē’ereṣ miṣərāyim:

10 wā’wōṣî’ēm mē’ereṣ miṣərāyim wā’ăḇi’ēm ’el-hammiḏəbār:

11 wā’etēn lâem ’eṯ-ḥuqqwōṯay wə’eṯ-mišəpāṭay hwōḏ^a‘ətî ’wōṯām ’ăšer y^a‘ăśeh ’wōṯām hā’āḏām wāḥay bâem:

12 wəḡam ’eṯ-šabəṯwōṯay nāṯatî lâem lihəywōṯ lə’wōṯ bênî ûḇênêhem lāḏ^a‘aṯ kî ’ănî yəhwâ məqadəšām:

13 wayyamərû-ḇî ḇêṯ-yiśərā’ēl bammiḏəbār bəḥuqqwōṯay lō’-hālāḵû wə’eṯ-mišəpāṭay mā’āsû ’ăšer y^a‘ăśeh ’ōṯām hā’āḏām wāḥay bâem wə’eṯ-šabəṯōṯay ḥilləlû mə’ōḏ wā’ōmar lišəpōḵə ḥămāṯî ‘ălêhem bammiḏəbār ləḵallwōṯām:

14 wā’e‘ĕśeh ləm^a‘an šəmî ləḇilətî hēḥēl lə‘ênê hagwōyim ’ăšer hwōṣē’ṯîm lə‘ênêhem:

15 wəḡam-’ănî nāśā’ṯî yāḏî lâem bammiḏəbār ləḇilətî hāḇî’ ’wōṯām ’el-hā’āreṣ ’ăšer-nāṯatî zāḇaṯ ḥālāḇ ûḏəḇaš ṣəḇî hî’ ləḵāl-hā’ărāṣwōṯ:

16 y^a‘an bəmišəpāṭay mā’āsû wə’eṯ-ḥuqqwōṯay lō’-hāləḵû ḇâem wə’eṯ-šabəṯwōṯay ḥillēlû kî ’^aḥărê ḡillûlêhem libām hōlēḵə:

17 watāḥās ‘ênî ‘ălêhem mišš^aḥăṯām wəlō’-‘āśîṯî ’wōṯām kālâ bammiḏəbār:

18 wā’ōmar ’el-bənêhem bammiḏəbār bəḥûqqê ’ăḇwōṯêḵem ’al-tēlēḵû wə’eṯ-mišəpəṭêhem ’al-tišəmōrû ûḇəḡillûlêhem ’al-tiṭṭammā’û:

19 ’ănî yəhwâ ’ĕlōhêḵem bəḥuqqwōṯay lēḵû wə’eṯ-mišəpāṭay šimərû w^a‘ăśû ’wōṯām:

20 wə’eṯ-šabəṯwōṯay qadēšû wəhāyû lə’wōṯ bênî ûḇênêḵem lāḏ^a‘aṯ kî ’ănî yəhwâ ’ĕlōhêḵem:

21 wayyamərû-ḇî habānîm bəḥuqqwōṯay lō’-hālāḵû wə’eṯ-mišəpāṭay lō’-šāmərû l^a‘ăśwōṯ ’wōṯām ’ăšer y^a‘ăśeh ’wōṯām hā’āḏām wāḥay bâem ’eṯ-šabəṯwōṯay ḥillēlû wā’ōmar lišəpōḵə ḥămāṯî ‘ălêhem ləḵallwōṯ ’apî bām bammiḏəbār:

22 wahăšiḇōṯî ’eṯ-yāḏî wā’^a‘aś ləm^a‘an šəmî ləḇilətî hēḥēl lə‘ênê hagwōyim ’ăšer-hwōṣē’ṯî ’wōṯām lə‘ênêhem:

23 gam-’ănî nāśā’ṯî ’eṯ-yāḏî lâem bammiḏəbār ləhāfîṣ ’ōṯām bagwōyim ûləzārwōṯ ’wōṯām bā’ărāṣwōṯ:

24 y^a‘an mišəpāṭay lō’-‘āśû wəḥuqqwōṯay mā’āsû wə’eṯ-šabəṯwōṯay ḥillēlû wə’^aḥărê gillûlê ’ăḇwōṯām hāyû ‘ênêhem:

25 wəḡam-’ănî nāṯatî lâem ḥuqqîm lō’ ṭwōḇîm ûmišəpāṭîm lō’ yiḥəyû bâem:

26 wā’ăṭammē’ ’wōṯām bəmatənwōṯām bəh^a‘ăḇîr kāl-peṭer rāḥam ləm^a‘an ’ăšimmēm ləm^a‘an ’ăšer yēḏə‘û ’ăšer ’ănî yəhwâ: s

27 lāḵēn dabēr ’el-bêṯ yiśərā’ēl ben-’āḏām wə’āmarətā ’ălêhem kōh ’āmar ’ăḏōnāy yəhwih ‘wōḏ zō’ṯ³ gidəfû ’wōṯî ’ăḇwōṯêḵem bəm^a‘ălām bî mā‘al:

28 wā’ăḇî’ēm ’el-hā’āreṣ ’ăšer nāśā’ṯî ’eṯ-yāḏî lāṯēṯ ’wōṯāh lâem wayyirə’û ḵāl-giḇə‘â rāmâ wəḵāl-‘ēṣ ‘āḇōṯ wayyizəbəḥû-šām ’eṯ-ziḇəḥêhem wayyitənû-šām k^a‘as qārəbānām wayyāśîmû šām rêḥa nîḥwōḥêhem wayyassîḵû šām ’eṯ-nisəkêhem:

29 wā’ōmar ’ălēhem mâ habāmâ ’ăšer-’atem habā’îm šām wayyiqqārē’ šəmāh bāmâ ‘aḏ hayywōm hazzeh:

30 lāḵēn ’ĕmōr| ’el-bêṯ yiśərā’ēl kōh ’āmar ’ăḏōnāy yəhwih habəḏereḵə ’ăḇwōṯêḵem ’atem niṭəmə’îm wə’^aḥărê šiqqûṣêhem ’atem zōnîm:

31 ûḇiśə’ēṯ matənōṯêḵem bəh^a‘ăḇîr bənêḵem bā’ēš ’atem niṭəmə’îm ləḵāl-gillûlêḵem ‘aḏ-hayywōm wa’ănî ’idārēš lāḵem bêṯ yiśərā’ēl ḥay-’ānî nə’um ’ăḏōnāy yəhwih ’im-’idārēš lāḵem:

32 wəhā‘ōlâ ‘al-rûḥăḵem hāywō lō’ ṯihəyeh ’ăšer| ’atem ’ōmərîm nihəyeh ḵagwōyim kəmišəpəḥwōṯ hā’ărāṣwōṯ ləšārēṯ ‘ēṣ wā’āḇen:

33 ḥay-’ānî nə’um ’ăḏōnāy yəhwih ’im-lō’ bəyāḏ ḥăzāqâ ûḇizərwō‘a nəṭûyâ ûḇəḥēmâ šəfûḵâ ’eməlwōḵə ‘ălêḵem:

34 wəhwōṣē’ṯî ’eṯəḵem min-hā‘ammîm wəqibaṣətî ’eṯəḵem min-hā’ărāṣwōṯ ’ăšer nəfwōṣōṯem bām bəyāḏ ḥăzāqâ ûḇizərwō‘a nəṭûyâ ûḇəḥēmâ šəfûḵâ:

35 wəhēḇē’ṯî ’eṯəḵem ’el-miḏəbar hā‘ammîm wənišəpaṭətî ’itəḵem šām pānîm ’el-pānîm:

36 ka’ăšer nišəpaṭətî ’eṯ-’ăḇwōṯêḵem bəmiḏəbar ’ereṣ miṣərāyim kēn ’iššāfēṭ ’itəḵem nə’um ’ăḏōnāy yəhwih:

37 wəh^a‘ăḇarətî ’eṯəḵem t^aḥaṯ haššāḇeṭ wəhēḇē’ṯî ’eṯəḵem bəmāsōreṯ habərîṯ:

38 ûḇārwōṯî mikem hammōrəḏîm wəhapwōšə‘îm bî mē’ereṣ məḡûrêhem ’wōṣî’ ’wōṯām wə’el-’aḏəmaṯ yiśərā’ēl lō’ yāḇwō’ wîḏ^a‘ətem kî-’ănî yəhwâ:

39 wə’atem bêṯ-yiśərā’ēl kōh-’āmar| ’ăḏōnāy yəhwōih ’îš gillûlāyw ləḵû ‘ăḇōḏû wə’^aḥar ’im-’ênəḵem šōmə‘îm ’ēlāy wə’eṯ-šēm qāḏəšî lō’ ṯəḥalləlû-‘wōḏ bəmatənwōṯêḵem ûḇəḡillûlêḵem:

40 kî ḇəhar-qāḏəšî bəhar| mərwōm yiśərā’ēl nə’um ’ăḏōnāy yəhwih šām y^a‘aḇəḏunî kāl-bêṯ yiśərā’ēl kullōh bā’āreṣ šām ’erəṣēm wəšām ’eḏərwōš ’eṯ-tərûmōṯêḵem wə’eṯ-rē’šîṯ maśə’wōṯêḵem bəḵāl-qāḏəšêḵem:

41 bərêḥa nîḥōḥa ’erəṣeh ’eṯəḵem bəhwōṣî’î ’eṯəḵem min-hā‘ammîm wəqibaṣətî ’eṯəḵem min-hā’ărāṣwōṯ ’ăšer nəfōṣōṯem bām wəniqədašətî ḇāḵem lə‘ênê hagwōyim:

42 wîḏ^a‘ətem kî-’ănî yəhwâ bahăḇî’î ’eṯəḵem ’el-’aḏəmaṯ yiśərā’ēl ’el-hā’āreṣ ’ăšer nāśā’ṯî ’eṯ-yāḏî lāṯēṯ ’wōṯāh la’ăḇwōṯêḵem:

43 ûzəḵarətem-šām ’eṯ-darəḵêḵem wə’ēṯ kāl-‘ălîlwōṯêḵem ’ăšer niṭəmē’ṯem bām ûnəqōṭōṯem bifənêḵem bəḵāl-rā‘wōṯêḵem ’ăšer ‘ăśîṯem:

44 wîḏ^a‘ətem kî-’ănî yəhwâ b^a‘ăśwōṯî ’itəḵem ləm^a‘an šəmî lō’ ḵəḏarəḵêḵem hārā‘îm wəḵ^a‘ălîlwōṯêḵem hannišəḥāṯwōṯ bêṯ yiśərā’ēl nə’um ’ăḏōnāy yəhwih: f