Ezekiel (Yechezqel) Chapter 21

‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֗ם שִׂ֤ים פָּנֶ֙יךָ֙ דֶּ֣רֶךְ תֵּימָ֔נָה וְהַטֵּ֖ף אֶל־דָּר֑וֹם וְהִנָּבֵ֛א אֶל־יַ֥עַר הַשָּׂדֶ֖ה נֶֽגֶב׃

‎3 ‏וְאָֽמַרְתָּ֙ לְיַ֣עַר הַנֶּ֔גֶב שְׁמַ֖ע דְּבַר־יְהוָ֑ה כֹּֽה־אָמַ֣ר אֲדֹנָ֣י יְהוִ֡ה הִנְנִ֣י מַֽצִּית־בְּךָ֣׀ אֵ֡שׁ וְאָכְלָ֣ה בְךָ֣ כָל־עֵֽץ־לַח֩ וְכָל־עֵ֨ץ יָבֵ֤שׁ לֹֽא־תִכְבֶּה֙ לַהֶ֣בֶת שַׁלְהֶ֔בֶת וְנִצְרְבוּ־בָ֥הּ כָּל־פָּנִ֖ים מִנֶּ֥גֶב צָפֽוֹנָה׃

‎4 ‏וְרָאוּ֙ כָּל־בָּשָׂ֔ר כִּ֛י אֲנִ֥י יְהוָ֖ה בִּֽעַרְתִּ֑יהָ לֹ֖א תִּכְבֶּֽה׃

‎5 ‏וָאֹמַ֕ר אֲהָ֖הּ אֲדֹנָ֣י יְהוִ֑ה הֵ֚מָּה אֹמְרִ֣ים לִ֔י הֲלֹ֛א מְמַשֵּׁ֥ל מְשָׁלִ֖ים הֽוּא׃ פ

‎6 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎7 ‏בֶּן־אָדָ֗ם שִׂ֤ים פָּנֶ֙יךָ֙ אֶל־יְר֣וּשָׁלִַ֔ם וְהַטֵּ֖ף אֶל־מִקְדָּשִׁ֑ים וְהִנָּבֵ֖א אֶל־אַדְמַ֥ת יִשְׂרָאֵֽל׃

‎8 ‏וְאָמַרְתָּ֞ לְאַדְמַ֣ת יִשְׂרָאֵ֗ל כֹּ֚ה אָמַ֣ר יְהוָ֔ה הִנְנִ֣י אֵלַ֔יִךְ וְהוֹצֵאתִ֥י חַרְבִּ֖י מִתַּעְרָ֑הּ וְהִכְרַתִּ֥י מִמֵּ֖ךְ צַדִּ֥יק וְרָשָֽׁע׃

‎9 ‏יַ֛עַן אֲשֶׁר־הִכְרַ֥תִּי מִמֵּ֖ךְ צַדִּ֣יק וְרָשָׁ֑ע לָ֠כֵן תֵּצֵ֨א חַרְבִּ֧י מִתַּעְרָ֛הּ אֶל־כָּל־בָּשָׂ֖ר מִנֶּ֥גֶב צָפֽוֹן׃

‎10 ‏וְיָֽדְעוּ֙ כָּל־בָּשָׂ֔ר כִּ֚י אֲנִ֣י יְהוָ֔ה הוֹצֵ֥אתִי חַרְבִּ֖י מִתַּעְרָ֑הּ לֹ֥א תָשׁ֖וּב עֽוֹד׃ ס

‎11 ‏וְאַתָּ֥ה בֶן־אָדָ֖ם הֵֽאָנַ֑ח בְּשִׁבְר֤וֹן מָתְנַ֙יִם֙ וּבִמְרִיר֔וּת תֵּֽאָנַ֖ח לְעֵינֵיהֶֽם׃

‎12 ‏וְהָיָה֙ כִּֽי־יֹאמְר֣וּ אֵלֶ֔יךָ עַל־מָ֖ה אַתָּ֣ה נֶאֱנָ֑ח וְאָמַרְתָּ֡ אֶל־שְׁמוּעָ֣ה כִֽי־בָאָ֡ה וְנָמֵ֣ס כָּל־לֵב֩ וְרָפ֨וּ כָל־יָדַ֜יִם וְכִהֲתָ֣ה כָל־ר֗וּחַ וְכָל־בִּרְכַּ֙יִם֙ תֵּלַ֣כְנָה מַּ֔יִם הִנֵּ֤ה בָאָה֙ וְנִֽהְיָ֔תָה נְאֻ֖ם אֲדֹנָ֥י יְהוִֽה׃ פ

‎13 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎14 ‏בֶּן־אָדָ֕ם הִנָּבֵא֙ וְאָ֣מַרְתָּ֔ כֹּ֖ה אָמַ֣ר אֲדֹנָ֑י אֱמֹ֕ר חֶ֥רֶב חֶ֛רֶב הוּחַ֖דָּה וְגַם־מְרוּטָֽה׃

‎15 ‏לְמַ֨עַן טְבֹ֤חַ טֶ֙בַח֙ הוּחַ֔דָּה לְמַעַן־הֱיֵה־לָ֥הּ בָּ֖רָק מֹרָ֑טָּה א֣וֹ נָשִׂ֔ישׂ שֵׁ֥בֶט בְּנִ֖י מֹאֶ֥סֶת כָּל־עֵֽץ׃

‎16 ‏וַיִּתֵּ֥ן אֹתָ֛הּ לְמָרְטָ֖ה לִתְפֹּ֣שׂ בַּכָּ֑ף הִֽיא־הוּחַ֤דָּה חֶ֙רֶב֙ וְהִ֣יא מֹרָ֔טָּה לָתֵ֥ת אוֹתָ֖הּ בְּיַד־הוֹרֵֽג׃

‎17 ‏זְעַ֤ק וְהֵילֵל֙ בֶּן־אָדָ֔ם כִּי־הִיא֙ הָיתָ֣ה¹ בְעַמִּ֔י הִ֖יא בְּכָל־נְשִׂיאֵ֣י יִשְׂרָאֵ֑ל מְגוּרֵ֤י אֶל־חֶ֙רֶב֙ הָי֣וּ אֶת־עַמִּ֔י לָכֵ֖ן סְפֹ֥ק אֶל־יָרֵֽךְ׃

‎18 ‏כִּ֣י בֹ֔חַן וּמָ֕ה אִם־גַּם־שֵׁ֥בֶט מֹאֶ֖סֶת לֹ֣א יִֽהְיֶ֑ה נְאֻ֖ם אֲדֹנָ֥י יְהוִֽה׃ פ

‎19 ‏וְאַתָּ֣ה בֶן־אָדָ֔ם הִנָּבֵ֕א וְהַ֖ךְ כַּ֣ף אֶל־כָּ֑ף וְתִכָּפֵ֞ל חֶ֤רֶב שְׁלִישִׁ֙תָה֙ חֶ֣רֶב חֲלָלִ֔ים הִ֗יא חֶ֚רֶב חָלָ֣ל הַגָּד֔וֹל הַחֹדֶ֖רֶת לָהֶֽם׃

‎20 ‏לְמַ֣עַן׀ לָמ֣וּג לֵ֗ב וְהַרְבֵּה֙ הַמִּכְשֹׁלִ֔ים עַ֚ל כָּל־שַׁ֣עֲרֵיהֶ֔ם נָתַ֖תִּי אִבְחַת־חָ֑רֶב אָ֛ח עֲשׂוּיָ֥ה לְבָרָ֖ק מְעֻטָּ֥ה לְטָֽבַח׃

‎21 ‏הִתְאַחֲדִ֥י הֵימִ֖נִי הָשִׂ֣ימִי הַשְׂמִ֑ילִי אָ֖נָה פָּנַ֥יִךְ מֻעָדֽוֹת׃

‎22 ‏וְגַם־אֲנִ֗י אַכֶּ֤ה כַפִּי֙ אֶל־כַּפִּ֔י וַהֲנִחֹתִ֖י חֲמָתִ֑י אֲנִ֥י יְהוָ֖ה דִּבַּֽרְתִּי׃ פ

‎23 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎24 ‏וְאַתָּ֨ה בֶן־אָדָ֜ם שִׂים־לְךָ֣׀ שְׁנַ֣יִם דְּרָכִ֗ים לָבוֹא֙ חֶ֣רֶב מֶֽלֶךְ־בָּבֶ֔ל מֵאֶ֥רֶץ אֶחָ֖ד יֵצְא֣וּ שְׁנֵיהֶ֑ם וְיָ֣ד בָּרֵ֔א בְּרֹ֥אשׁ דֶּֽרֶךְ־עִ֖יר בָּרֵֽא׃

‎25 ‏דֶּ֣רֶךְ תָּשִׂ֔ים לָב֣וֹא חֶ֔רֶב אֵ֖ת רַבַּ֣ת בְּנֵֽי־עַמּ֑וֹן וְאֶת־יְהוּדָ֥ה בִירוּשָׁלִַ֖ם בְּצוּרָֽה׃

‎26 ‏כִּֽי־עָמַ֨ד מֶלֶךְ־בָּבֶ֜ל אֶל־אֵ֣ם הַדֶּ֗רֶךְ בְּרֹ֛אשׁ שְׁנֵ֥י הַדְּרָכִ֖ים לִקְסָם־קָ֑סֶם קִלְקַ֤ל בַּֽחִצִּים֙ שָׁאַ֣ל בַּתְּרָפִ֔ים רָאָ֖ה בַּכָּבֵֽד׃

‎27 ‏בִּֽימִינ֞וֹ הָיָ֣ה׀ הַקֶּ֣סֶם יְרוּשָׁלִַ֗ם לָשׂ֤וּם כָּרִים֙ לִפְתֹּ֤חַ פֶּה֙ בְּרֶ֔צַח לְהָרִ֥ים ק֖וֹל בִּתְרוּעָ֑ה לָשׂ֤וּם כָּרִים֙ עַל־שְׁעָרִ֔ים לִשְׁפֹּ֥ךְ סֹלְלָ֖ה לִבְנ֥וֹת דָּיֵֽק׃

‎28 ‏וְהָיָ֨ה לָהֶ֤ם כקסום־ כִּקְסָם־ שָׁוְא֙ בְּעֵ֣ינֵיהֶ֔ם שְׁבֻעֵ֥י שְׁבֻע֖וֹת לָהֶ֑ם וְהֽוּא־מַזְכִּ֥יר עָוֹ֖ן לְהִתָּפֵֽשׂ׃ פ

‎29 ‏לָכֵ֗ן כֹּֽה־אָמַר֮ אֲדֹנָ֣י יְהוִה֒ יַ֗עַן הַזְכַּרְכֶם֙ עֲוֹ֣נְכֶ֔ם בְּהִגָּל֣וֹת פִּשְׁעֵיכֶ֗ם לְהֵֽרָאוֹת֙ חַטֹּ֣אותֵיכֶ֔ם בְּכֹ֖ל עֲלִילֽוֹתֵיכֶ֑ם יַ֚עַן הִזָּ֣כֶרְכֶ֔ם בַּכַּ֖ף תִּתָּפֵֽשׂוּ׃ פ

‎30 ‏וְאַתָּה֙ חָלָ֣ל רָשָׁ֔ע נְשִׂ֖יא יִשְׂרָאֵ֑ל אֲשֶׁר־בָּ֣א יוֹמ֔וֹ בְּעֵ֖ת עֲוֹ֥ן קֵֽץ׃ ס

‎31 ‏כֹּ֤ה אָמַר֙ אֲדֹנָ֣י יְהוִ֔ה הָסִיר֙ הַמִּצְנֶ֔פֶת וְהָרִ֖ים הָֽעֲטָרָ֑ה זֹ֣את לֹא־זֹ֔את הַשָּׁפָ֣לָה הַגְבֵּ֔הַ¹ וְהַגָּבֹ֖הַ¹ הַשְׁפִּֽיל׃

‎32 ‏עַוָּ֥ה עַוָּ֖ה עַוָּ֣ה אֲשִׂימֶ֑נָּה גַּם־זֹאת֙ לֹ֣א הָיָ֔ה עַד־בֹּ֛א אֲשֶׁר־ל֥וֹ הַמִּשְׁפָּ֖ט וּנְתַתִּֽיו׃ פ

‎33 ‏וְאַתָּ֣ה בֶן־אָדָ֗ם הִנָּבֵ֤א וְאָֽמַרְתָּ֙ כֹּ֤ה אָמַר֙ אֲדֹנָ֣י יְהוִֹ֔ה אֶל־בְּנֵ֥י עַמּ֖וֹן וְאֶל־חֶרְפָּתָ֑ם וְאָמַרְתָּ֗ חֶ֣רֶב חֶ֤רֶב פְּתוּחָה֙ לְטֶ֣בַח מְרוּטָ֔ה לְהָכִ֖יל לְמַ֥עַן בָּרָֽק׃

‎34 ‏בַּחֲז֥וֹת לָךְ֙ שָׁ֔וְא בִּקְסָם־לָ֖ךְ כָּזָ֑ב לָתֵ֣ת אוֹתָ֗ךְ אֶֽל־צַוְּארֵי֙ חַֽלְלֵ֣י רְשָׁעִ֔ים אֲשֶׁר־בָּ֣א יוֹמָ֔ם בְּעֵ֖ת עֲוֹ֥ן קֵֽץ׃

‎35 ‏הָשַׁ֖ב אֶל־תַּעְרָ֑הּ בִּמְק֧וֹם אֲשֶׁר־נִבְרֵ֛את בְּאֶ֥רֶץ מְכֻרוֹתַ֖יִךְ אֶשְׁפֹּ֥ט אֹתָֽךְ׃

‎36 ‏וְשָׁפַכְתִּ֤י עָלַ֙יִךְ֙ זַעְמִ֔י בְּאֵ֥שׁ עֶבְרָתִ֖י אָפִ֣יחַ עָלָ֑יִךְ וּנְתַתִּ֗יךְ בְּיַד֙ אֲנָשִׁ֣ים בֹּֽעֲרִ֔ים חָרָשֵׁ֖י מַשְׁחִֽית׃

‎37 ‏לָאֵ֤שׁ תִּֽהְיֶה֙ לְאָכְלָ֔ה דָּמֵ֥ךְ יִהְיֶ֖ה בְּת֣וֹךְ הָאָ֑רֶץ לֹ֣א תִזָּכֵ֔רִי כִּ֛י אֲנִ֥י יְהוָ֖ה דִּבַּֽרְתִּי׃ פ

1 wayəhî ḏəḇar-yəhwâ ’ēlay lē’mōr:

2 ben-’āḏām śîm pāneyḵā dereḵə têmānâ wəhaṭṭēf ’el-dārwōm wəhinnāḇē’ ’el-y^a‘ar haśśāḏeh neḡeḇ:

3 wə’āmarətā ləy^a‘ar hanneḡeḇ šəm^a‘ dəḇar-yəhwâ kōh-’āmar ’ăḏōnāy yəhwih hinənî maṣṣîṯ-bəḵā| ’ēš wə’āḵəlâ ḇəḵā ḵāl-‘ēṣ-l^aḥ wəḵāl-‘ēṣ yāḇēš lō’-ṯiḵəbeh laheḇeṯ šaləheḇeṯ wəniṣərəḇû-ḇāh kāl-pānîm minneḡeḇ ṣāfwōnâ:

4 wərā’û kāl-bāśār kî ’ănî yəhwâ bi‘arətîhā lō’ tiḵəbeh:

5 wā’ōmar ’ăhāh ’ăḏōnāy yəhwih hēmmâ ’ōmərîm lî hălō’ məmaššēl məšālîm hû’: f

6 wayəhî ḏəḇar-yəhwâ ’ēlay lē’mōr:

7 ben-’āḏām śîm pāneyḵā ’el-yərûšālaim wəhaṭṭēf ’el-miqədāšîm wəhinnāḇē’ ’el-’aḏəmaṯ yiśərā’ēl:

8 wə’āmarətā lə’aḏəmaṯ yiśərā’ēl kōh ’āmar yəhwâ hinənî ’ēlayiḵə wəhwōṣē’ṯî ḥarəbî mit^a‘ərāh wəhiḵəratî mimmēḵə ṣadîq wərāšā‘:

9 y^a‘an ’ăšer-hiḵəratî mimmēḵə ṣadîq wərāšā‘ lāḵēn tēṣē’ ḥarəbî mit^a‘ərāh ’el-kāl-bāśār minneḡeḇ ṣāfwōn:

10 wəyāḏə‘û kāl-bāśār kî ’ănî yəhwâ hwōṣē’ṯî ḥarəbî mit^a‘ərāh lō’ ṯāšûḇ ‘wōḏ: s

11 wə’atâ ḇen-’āḏām hē’ān^aḥ bəšiḇərwōn māṯənayim ûḇimərîrûṯ tē’ān^aḥ lə‘ênêhem:

12 wəhāyâ kî-yō’mərû ’ēleyḵā ‘al-mâ ’atâ ne’ĕnāḥ wə’āmarətā ’el-šəmû‘â ḵî-ḇā’â wənāmēs kāl-lēḇ wərāfû ḵāl-yāḏayim wəḵihăṯâ ḵāl-rûḥa wəḵāl-birəkayim tēlaḵənâ mmayim hinnēh ḇā’â wənihəyāṯâ nə’um ’ăḏōnāy yəhwih: f

13 wayəhî ḏəḇar-yəhwâ ’ēlay lē’mōr:

14 ben-’āḏām hinnāḇē’ wə’āmarətā kōh ’āmar ’ăḏōnāy ’ĕmōr ḥereḇ ḥereḇ hûḥadâ wəḡam-mərûṭâ:

15 ləm^a‘an ṭəḇōḥa ṭeḇ^aḥ hûḥadâ ləm^a‘an-hĕyēh-lāh bārāq mōrāṭṭâ ’wō nāśîś šēḇeṭ bənî mō’eseṯ kāl-‘ēṣ:

16 wayyitēn ’ōṯāh ləmārəṭâ liṯəpōś bakāf hî’-hûḥadâ ḥereḇ wəhî’ mōrāṭṭâ lāṯēṯ ’wōṯāh bəyaḏ-hwōrēḡ:

17 zə‘aq wəhêlēl ben-’āḏām kî-hî’ hāyṯâ¹ ḇə‘ammî hî’ bəḵāl-nəśî’ê yiśərā’ēl məḡûrê ’el-ḥereḇ hāyû ’eṯ-‘ammî lāḵēn səfōq ’el-yārēḵə:

18 kî ḇōḥan ûmâ ’im-gam-šēḇeṭ mō’eseṯ lō’ yihəyeh nə’um ’ăḏōnāy yəhwih: f

19 wə’atâ ḇen-’āḏām hinnāḇē’ wəhaḵə kaf ’el-kāf wəṯikāfēl ḥereḇ šəlîšiṯâ ḥereḇ ḥălālîm hî’ ḥereḇ ḥālāl hagāḏwōl h^aḥōḏereṯ lâem:

20 ləm^a‘an| lāmûḡ lēḇ wəharəbēh hammiḵəšōlîm ‘al kāl-š^a‘ărêhem nāṯatî ’iḇəḥaṯ-ḥāreḇ ’āḥ ‘ăśûyâ ləḇārāq mə‘uṭṭâ ləṭāḇ^aḥ:

21 hiṯə’^aḥăḏî hêminî hāśîmî haśəmîlî ’ānâ pānayiḵə mu‘āḏwōṯ:

22 wəḡam-’ănî ’akeh ḵapî ’el-kapî wahăniḥōṯî ḥămāṯî ’ănî yəhwâ dibarətî: f

23 wayəhî ḏəḇar-yəhwâ ’ēlay lē’mōr:

24 wə’atâ ḇen-’āḏām śîm-ləḵā| šənayim dərāḵîm lāḇwō’ ḥereḇ meleḵə-bāḇel mē’ereṣ ’eḥāḏ yēṣə’û šənêhem wəyāḏ bārē’ bərō’š dereḵə-‘îr bārē’:

25 dereḵə tāśîm lāḇwō’ ḥereḇ ’ēṯ rabaṯ bənê-‘ammwōn wə’eṯ-yəhûḏâ ḇîrûšālaim bəṣûrâ:

26 kî-‘āmaḏ meleḵə-bāḇel ’el-’ēm hadereḵə bərō’š šənê hadərāḵîm liqəsām-qāsem qiləqal b^aḥiṣṣîm šā’al batərāfîm rā’â bakāḇēḏ:

27 bîmînwō hāyâ| haqqesem yərûšālaim lāśûm kārîm lifətōḥa peh bəreṣ^aḥ ləhārîm qwōl biṯərû‘â lāśûm kārîm ‘al-šə‘ārîm lišəpōḵə sōləlâ liḇənwōṯ dāyēq:

28 wəhāyâ lâem kiqəswōm- kiqəsām- šāwə’ bə‘ênêhem šəḇu‘ê šəḇu‘wōṯ lâem wəhû’-mazəkîr ‘āwōn ləhitāfēś: f

29 lāḵēn kōh-’āmar ’ăḏōnāy yəhwih y^a‘an hazəkarəḵem ‘ăwōnəḵem bəhigālwōṯ pišə‘êḵem ləhērā’wōṯ ḥaṭṭō’wṯêḵem bəḵōl ‘ălîlwōṯêḵem y^a‘an hizzāḵerəḵem bakaf titāfēśû: f

30 wə’atâ ḥālāl rāšā‘ nəśî’ yiśərā’ēl ’ăšer-bā’ ywōmwō bə‘ēṯ ‘ăwōn qēṣ: s

31 kōh ’āmar ’ăḏōnāy yəhwih hāsîr hammiṣənefeṯ wəhārîm hā‘ăṭārâ zō’ṯ lō’-zō’ṯ haššāfālâ haḡəbēha¹ wəhagāḇōha¹ hašəpîl:

32 ‘aûâ ‘aûâ ‘aûâ ’ăśîmennâ gam-zō’ṯ lō’ hāyâ ‘aḏ-bō’ ’ăšer-lwō hammišəpāṭ ûnəṯatîw: f

33 wə’atâ ḇen-’āḏām hinnāḇē’ wə’āmarətā kōh ’āmar ’ăḏōnāy yəhwōih ’el-bənê ‘ammwōn wə’el-ḥerəpāṯām wə’āmarətā ḥereḇ ḥereḇ pəṯûḥâ ləṭeḇ^aḥ mərûṭâ ləhāḵîl ləm^a‘an bārāq:

34 b^aḥăzwōṯ lāḵə šāwə’ biqəsām-lāḵə kāzāḇ lāṯēṯ ’wōṯāḵə ’el-ṣaûə’rê ḥaləlê rəšā‘îm ’ăšer-bā’ ywōmām bə‘ēṯ ‘ăwōn qēṣ:

35 hāšaḇ ’el-t^a‘ərāh biməqwōm ’ăšer-niḇərē’ṯ bə’ereṣ məḵurwōṯayiḵə ’ešəpōṭ ’ōṯāḵə:

36 wəšāfaḵətî ‘ālayiḵə z^a‘əmî bə’ēš ‘eḇərāṯî ’āfîḥa ‘ālāyiḵə ûnəṯatîḵə bəyaḏ ’ănāšîm bō‘ărîm ḥārāšê mašəḥîṯ:

37 lā’ēš tihəyeh lə’āḵəlâ dāmēḵə yihəyeh bəṯwōḵə hā’āreṣ lō’ ṯizzāḵērî kî ’ănî yəhwâ dibarətî: f