Ezekiel (Yechezqel) Chapter 22

‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏וְאַתָּ֣ה בֶן־אָדָ֔ם הֲתִשְׁפֹּ֥ט הֲתִשְׁפֹּ֖ט אֶת־עִ֣יר הַדָּמִ֑ים וְה֣וֹדַעְתָּ֔הּ אֵ֖ת כָּל־תּוֹעֲבוֹתֶֽיהָ׃

‎3 ‏וְאָמַרְתָּ֗ כֹּ֤ה אָמַר֙ אֲדֹנָ֣י יְהוִ֔ה עִ֣יר שֹׁפֶ֥כֶת דָּ֛ם בְּתוֹכָ֖הּ לָב֣וֹא עִתָּ֑הּ וְעָשְׂתָ֧ה גִלּוּלִ֛ים עָלֶ֖יהָ לְטָמְאָֽה׃

‎4 ‏בְּדָמֵ֨ךְ אֲשֶׁר־שָׁפַ֜כְתְּ אָשַׁ֗מְתְּ וּבְגִלּוּלַ֤יִךְ אֲשֶׁר־עָשִׂית֙ טָמֵ֔את וַתַּקְרִ֣יבִי יָמַ֔יִךְ וַתָּב֖וֹא עַד־שְׁנוֹתָ֑יִךְ עַל־כֵּ֗ן נְתַתִּ֤יךְ חֶרְפָּה֙ לַגּוֹיִ֔ם וְקַלָּסָ֖ה לְכָל־הָאֲרָצֽוֹת׃

‎5 ‏הַקְּרֹב֛וֹת וְהָרְחֹק֥וֹת מִמֵּ֖ךְ יִתְקַלְּסוּ־בָ֑ךְ טְמֵאַ֣ת הַשֵּׁ֔ם רַבַּ֖ת הַמְּהוּמָֽה׃

‎6 ‏הִנֵּה֙ נְשִׂיאֵ֣י יִשְׂרָאֵ֔ל אִ֥ישׁ לִזְרֹע֖וֹ הָ֣יוּ בָ֑ךְ לְמַ֖עַן שְׁפָךְ־דָּֽם׃

‎7 ‏אָ֤ב וָאֵם֙ הֵקַ֣לּוּ בָ֔ךְ לַגֵּ֛ר עָשׂ֥וּ בַעֹ֖שֶׁק בְּתוֹכֵ֑ךְ יָת֥וֹם וְאַלְמָנָ֖ה ה֥וֹנוּ בָֽךְ׃

‎8 ‏קָדָשַׁ֖י בָּזִ֑ית וְאֶת־שַׁבְּתֹתַ֖י חִלָּֽלְתְּ׃

‎9 ‏אַנְשֵׁ֥י רָכִ֛יל הָ֥יוּ בָ֖ךְ לְמַ֣עַן שְׁפָךְ־דָּ֑ם וְאֶל־הֶֽהָרִים֙ אָ֣כְלוּ בָ֔ךְ זִמָּ֖ה עָשׂ֥וּ בְתוֹכֵֽךְ׃

‎10 ‏עֶרְוַת־אָ֖ב גִּלָּה־בָ֑ךְ טְמֵאַ֥ת הַנִּדָּ֖ה עִנּוּ־בָֽךְ׃

‎11 ‏וְאִ֣ישׁ׀ אֶת־אֵ֣שֶׁת רֵעֵ֗הוּ עָשָׂה֙ תּֽוֹעֵבָ֔ה וְאִ֥ישׁ אֶת־כַּלָּת֖וֹ טִמֵּ֣א בְזִמָּ֑ה וְאִ֛ישׁ אֶת־אֲחֹת֥וֹ בַת־אָבִ֖יו עִנָּה־בָֽךְ׃

‎12 ‏שֹׁ֥חַד לָֽקְחוּ־בָ֖ךְ לְמַ֣עַן שְׁפָךְ־דָּ֑ם נֶ֧שֶׁךְ וְתַרְבִּ֣ית לָקַ֗חַתְּ וַתְּבַצְּעִ֤י רֵעַ֙יִךְ֙ בַּעֹ֔שֶׁק וְאֹתִ֣י שָׁכַ֔חַתְּ נְאֻ֖ם אֲדֹנָ֥י יְהוִֽה׃

‎13 ‏וְהִנֵּה֙ הִכֵּ֣יתִי כַפִּ֔י אֶל־בִּצְעֵ֖ךְ אֲשֶׁ֣ר עָשִׂ֑ית וְעַ֨ל־דָּמֵ֔ךְ אֲשֶׁ֥ר הָי֖וּ בְּתוֹכֵֽךְ׃

‎14 ‏הֲיַעֲמֹ֤ד לִבֵּךְ֙ אִם־תֶּחֱזַ֣קְנָה יָדַ֔יִךְ לַיָּמִ֕ים אֲשֶׁ֥ר אֲנִ֖י עֹשֶׂ֣ה אוֹתָ֑ךְ אֲנִ֥י יְהוָ֖ה דִּבַּ֥רְתִּי וְעָשִֽׂיתִי׃

‎15 ‏וַהֲפִיצוֹתִ֤י אוֹתָךְ֙ בַּגּוֹיִ֔ם וְזֵרִיתִ֖יךְ בָּאֲרָצ֑וֹת וַהֲתִמֹּתִ֥י טֻמְאָתֵ֖ךְ מִמֵּֽךְ׃

‎16 ‏וְנִחַ֥לְתְּ בָּ֖ךְ לְעֵינֵ֣י גוֹיִ֑ם וְיָדַ֖עַתְּ כִּֽי־אֲנִ֥י יְהוָֽה׃ פ

‎17 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎18 ‏בֶּן־אָדָ֕ם הָיוּ־לִ֥י בֵֽית־יִשְׂרָאֵ֖ל לסוג לְסִ֑יג כֻּלָּ֡ם נְ֠חֹשֶׁת וּבְדִ֨יל וּבַרְזֶ֤ל וְעוֹפֶ֙רֶת֙ בְּת֣וֹךְ כּ֔וּר סִגִ֥ים כֶּ֖סֶף הָיֽוּ׃ ס

‎19 ‏לָכֵ֗ן כֹּ֤ה אָמַר֙ אֲדֹנָ֣י יְהוִ֔ה יַ֛עַן הֱי֥וֹת כֻּלְּכֶ֖ם לְסִגִ֑ים לָכֵן֙ הִנְנִ֣י קֹבֵ֣ץ אֶתְכֶ֔ם אֶל־תּ֖וֹךְ יְרוּשָׁלִָֽם׃

‎20 ‏קְבֻ֣צַת כֶּ֡סֶף וּ֠נְחֹשֶׁת וּבַרְזֶ֨ל וְעוֹפֶ֤רֶת וּבְדִיל֙ אֶל־תּ֣וֹךְ כּ֔וּר לָפַֽחַת־עָלָ֥יו אֵ֖שׁ לְהַנְתִּ֑יךְ כֵּ֤ן אֶקְבֹּץ֙ בְּאַפִּ֣י וּבַחֲמָתִ֔י וְהִנַּחְתִּ֥י וְהִתַּכְתִּ֖י אֶתְכֶֽם׃

‎21 ‏וְכִנַּסְתִּ֣י אֶתְכֶ֔ם וְנָפַחְתִּ֥י עֲלֵיכֶ֖ם בְּאֵ֣שׁ עֶבְרָתִ֑י וְנִתַּכְתֶּ֖ם בְּתוֹכָֽהּ׃

‎22 ‏כְּהִתּ֥וּךְ כֶּ֙סֶף֙ בְּת֣וֹךְ כּ֔וּר כֵּ֖ן תֻּתְּכ֣וּ בְתוֹכָ֑הּ וִֽידַעְתֶּם֙ כִּֽי־אֲנִ֣י יְהוָ֔ה שָׁפַ֥כְתִּי חֲמָתִ֖י עֲלֵיכֶֽם׃ פ

‎23 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎24 ‏בֶּן־אָדָ֕ם אֱמָר־לָ֕הּ אַ֣תְּ אֶ֔רֶץ לֹ֥א מְטֹהָרָ֖ה הִ֑יא לֹ֥א גֻשְׁמָ֖הּ בְּי֥וֹם זָֽעַם׃

‎25 ‏קֶ֤שֶׁר נְבִיאֶ֙יהָ֙ בְּתוֹכָ֔הּ כַּאֲרִ֥י שׁוֹאֵ֖ג טֹ֣רֵֽף טָ֑רֶף נֶ֣פֶשׁ אָכָ֗לוּ חֹ֤סֶן וִיקָר֙ יִקָּ֔חוּ אַלְמְנוֹתֶ֖יהָ הִרְבּ֥וּ בְתוֹכָֽהּ׃

‎26 ‏כֹּהֲנֶ֜יהָ חָמְס֣וּ תוֹרָתִי֮ וַיְחַלְּל֣וּ קָדָשַׁי֒ בֵּֽין־קֹ֤דֶשׁ לְחֹל֙ לֹ֣א הִבְדִּ֔ילוּ וּבֵין־הַטָּמֵ֥א לְטָה֖וֹר לֹ֣א הוֹדִ֑יעוּ וּמִשַׁבְּתוֹתַי֙ הֶעְלִ֣ימוּ עֵֽינֵיהֶ֔ם וָאֵחַ֖ל בְּתוֹכָֽם׃

‎27 ‏שָׂרֶ֣יהָ בְקִרְבָּ֔הּ כִּזְאֵבִ֖ים טֹ֣רְפֵי טָ֑רֶף לִשְׁפָּךְ־דָּם֙ לְאַבֵּ֣ד נְפָשׁ֔וֹת לְמַ֖עַן בְּצֹ֥עַ בָּֽצַע׃

‎28 ‏וּנְבִיאֶ֗יהָ טָח֤וּ לָהֶם֙ תָּפֵ֔ל חֹזִ֣ים שָׁ֔וְא וְקֹסְמִ֥ים לָהֶ֖ם כָּזָ֑ב אֹמְרִ֗ים כֹּ֤ה אָמַר֙ אֲדֹנָ֣י יְהוִ֔ה וַֽיהוָ֖ה לֹ֥א דִבֵּֽר׃

‎29 ‏עַ֤ם הָאָ֙רֶץ֙ עָ֣שְׁקוּ עֹ֔שֶׁק וְגָזְל֖וּ גָּזֵ֑ל וְעָנִ֤י וְאֶבְיוֹן֙ הוֹנ֔וּ וְאֶת־הַגֵּ֥ר עָשְׁק֖וּ בְּלֹ֥א מִשְׁפָּֽט׃

‎30 ‏וָאֲבַקֵּ֣שׁ מֵהֶ֡ם אִ֣ישׁ גֹּֽדֵר־גָּדֵר֩ וְעֹמֵ֨ד בַּפֶּ֧רֶץ לְפָנַ֛י בְּעַ֥ד הָאָ֖רֶץ לְבִלְתִּ֣י שַׁחֲתָ֑הּ וְלֹ֖א מָצָֽאתִי׃

‎31 ‏וָאֶשְׁפֹּ֤ךְ עֲלֵיהֶם֙ זַעְמִ֔י בְּאֵ֥שׁ עֶבְרָתִ֖י כִּלִּיתִ֑ים דַּרְכָּם֙ בְּרֹאשָׁ֣ם נָתַ֔תִּי נְאֻ֖ם אֲדֹנָ֥י יְהוִֹֽה׃ פ

1 wayəhî ḏəḇar-yəhwâ ’ēlay lē’mōr:

2 wə’atâ ḇen-’āḏām hăṯišəpōṭ hăṯišəpōṭ ’eṯ-‘îr hadāmîm wəhwōḏ^a‘ətāh ’ēṯ kāl-twō‘ăḇwōṯeyhā:

3 wə’āmarətā kōh ’āmar ’ăḏōnāy yəhwih ‘îr šōfeḵeṯ dām bəṯwōḵāh lāḇwō’ ‘itāh wə‘āśəṯâ ḡillûlîm ‘āleyhā ləṭāmə’â:

4 bəḏāmēḵə ’ăšer-šāfaḵətə ’āšamətə ûḇəḡillûlayiḵə ’ăšer-‘āśîṯ ṭāmē’ṯ wataqərîḇî yāmayiḵə watāḇwō’ ‘aḏ-šənwōṯāyiḵə ‘al-kēn nəṯatîḵə ḥerəpâ lagwōyim wəqallāsâ ləḵāl-hā’ărāṣwōṯ:

5 haqqərōḇwōṯ wəhārəḥōqwōṯ mimmēḵə yiṯəqalləsû-ḇāḵə ṭəmē’aṯ haššēm rabaṯ hamməhûmâ:

6 hinnēh nəśî’ê yiśərā’ēl ’îš lizərō‘wō hāyû ḇāḵə ləm^a‘an šəfāḵə-dām:

7 ’āḇ wā’ēm hēqallû ḇāḵə lagēr ‘āśû ḇ^a‘ōšeq bəṯwōḵēḵə yāṯwōm wə’aləmānâ hwōnû ḇāḵə:

8 qāḏāšay bāzîṯ wə’eṯ-šabəṯōṯay ḥillālətə:

9 ’anəšê rāḵîl hāyû ḇāḵə ləm^a‘an šəfāḵə-dām wə’el-hehārîm ’āḵəlû ḇāḵə zimmâ ‘āśû ḇəṯwōḵēḵə:

10 ‘erəwaṯ-’āḇ gillâ-ḇāḵə ṭəmē’aṯ hannidâ ‘innû-ḇāḵə:

11 wə’îš| ’eṯ-’ēšeṯ rē‘ēhû ‘āśâ twō‘ēḇâ wə’îš ’eṯ-kallāṯwō ṭimmē’ ḇəzimmâ wə’îš ’eṯ-’ăḥōṯwō ḇaṯ-’āḇîw ‘innâ-ḇāḵə:

12 šōḥaḏ lāqəḥû-ḇāḵə ləm^a‘an šəfāḵə-dām nešeḵə wəṯarəbîṯ lāq^aḥatə watəḇaṣṣə‘î rē‘ayiḵə b^a‘ōšeq wə’ōṯî šāḵ^aḥatə nə’um ’ăḏōnāy yəhwih:

13 wəhinnēh hikêṯî ḵapî ’el-biṣə‘ēḵə ’ăšer ‘āśîṯ wə‘al-dāmēḵə ’ăšer hāyû bəṯwōḵēḵə:

14 hăy^a‘ămōḏ libēḵə ’im-teḥĕzaqənâ yāḏayiḵə layyāmîm ’ăšer ’ănî ‘ōśeh ’wōṯāḵə ’ănî yəhwâ dibarətî wə‘āśîṯî:

15 wahăfîṣwōṯî ’wōṯāḵə bagwōyim wəzērîṯîḵə bā’ărāṣwōṯ wahăṯimmōṯî ṭumə’āṯēḵə mimmēḵə:

16 wəniḥalətə bāḵə lə‘ênê ḡwōyim wəyāḏ^a‘atə kî-’ănî yəhwâ: f

17 wayəhî ḏəḇar-yəhwâ ’ēlay lē’mōr:

18 ben-’āḏām hāyû-lî ḇêṯ-yiśərā’ēl ləsûḡ ləsîḡ kullām nəḥōšeṯ ûḇəḏîl ûḇarəzel wə‘wōfereṯ bəṯwōḵə kûr siḡîm kesef hāyû: s

19 lāḵēn kōh ’āmar ’ăḏōnāy yəhwih y^a‘an hĕywōṯ kulləḵem ləsiḡîm lāḵēn hinənî qōḇēṣ ’eṯəḵem ’el-twōḵə yərûšālāim:

20 qəḇuṣaṯ kesef ûnəḥōšeṯ ûḇarəzel wə‘wōfereṯ ûḇəḏîl ’el-twōḵə kûr lāf^aḥaṯ-‘ālāyw ’ēš ləhanətîḵə kēn ’eqəbōṣ bə’apî ûḇ^aḥămāṯî wəhinn^aḥətî wəhitaḵətî ’eṯəḵem:

21 wəḵinnasətî ’eṯəḵem wənāf^aḥətî ‘ălêḵem bə’ēš ‘eḇərāṯî wənitaḵətem bəṯwōḵāh:

22 kəhitûḵə kesef bəṯwōḵə kûr kēn tutəḵû ḇəṯwōḵāh wîḏ^a‘ətem kî-’ănî yəhwâ šāfaḵətî ḥămāṯî ‘ălêḵem: f

23 wayəhî ḏəḇar-yəhwâ ’ēlay lē’mōr:

24 ben-’āḏām ’ĕmār-lāh ’atə ’ereṣ lō’ məṭōhārâ hî’ lō’ ḡušəmāh bəywōm zā‘am:

25 qešer nəḇî’eyhā bəṯwōḵāh ka’ărî šwō’ēḡ ṭōrēf ṭāref nefeš ’āḵālû ḥōsen wîqār yiqqāḥû ’aləmənwōṯeyhā hirəbû ḇəṯwōḵāh:

26 kōhăneyhā ḥāməsû ṯwōrāṯî wayəḥalləlû qāḏāšay bên-qōḏeš ləḥōl lō’ hiḇədîlû ûḇên-haṭṭāmē’ ləṭâwōr lō’ hwōḏî‘û ûmišabəṯwōṯay he‘əlîmû ‘ênêhem wā’ēḥal bəṯwōḵām:

27 śāreyhā ḇəqirəbāh kizə’ēḇîm ṭōrəfê ṭāref lišəpāḵə-dām lə’abēḏ nəfāšwōṯ ləm^a‘an bəṣō‘a bāṣ^a‘:

28 ûnəḇî’eyhā ṭāḥû lâem tāfēl ḥōzîm šāwə’ wəqōsəmîm lâem kāzāḇ ’ōmərîm kōh ’āmar ’ăḏōnāy yəhwih wayhwâ lō’ ḏibēr:

29 ‘am hā’āreṣ ‘āšəqû ‘ōšeq wəḡāzəlû gāzēl wə‘ānî wə’eḇəywōn hwōnû wə’eṯ-hagēr ‘āšəqû bəlō’ mišəpāṭ:

30 wā’ăḇaqqēš mēhem ’îš gōḏēr-gāḏēr wə‘ōmēḏ bapereṣ ləfānay bə‘aḏ hā’āreṣ ləḇilətî š^aḥăṯāh wəlō’ māṣā’ṯî:

31 wā’ešəpōḵə ‘ălêhem z^a‘əmî bə’ēš ‘eḇərāṯî killîṯîm darəkām bərō’šām nāṯatî nə’um ’ăḏōnāy yəhwōih: f