Ezekiel (Yechezqel) Chapter 37

‎1 ‏הָיְתָ֣ה עָלַי֮ יַד־יְהוָה֒ וַיּוֹצִאֵ֤נִי בְר֙וּחַ֙ יְהוָ֔ה וַיְנִיחֵ֖נִי בְּת֣וֹךְ הַבִּקְעָ֑ה וְהִ֖יא מְלֵאָ֥ה עֲצָמֽוֹת׃

‎2 ‏וְהֶעֱבִירַ֥נִי עֲלֵיהֶ֖ם סָבִ֣יב׀ סָבִ֑יב וְהִנֵּ֨ה רַבּ֤וֹת מְאֹד֙ עַל־פְּנֵ֣י הַבִּקְעָ֔ה וְהִנֵּ֖ה יְבֵשׁ֥וֹת מְאֹֽד׃

‎3 ‏וַיֹּ֣אמֶר אֵלַ֔י בֶּן־אָדָ֕ם הֲתִחְיֶ֖ינָה הָעֲצָמ֣וֹת הָאֵ֑לֶּה וָאֹמַ֕ר אֲדֹנָ֥י יְהוִ֖ה אַתָּ֥ה יָדָֽעְתָּ׃

‎4 ‏וַיֹּ֣אמֶר אֵלַ֔י הִנָּבֵ֖א עַל־הָעֲצָמ֣וֹת הָאֵ֑לֶּה וְאָמַרְתָּ֣ אֲלֵיהֶ֔ם הָעֲצָמוֹת֙ הַיְבֵשׁ֔וֹת שִׁמְע֖וּ דְּבַר־יְהוָֽה׃

‎5 ‏כֹּ֤ה אָמַר֙ אֲדֹנָ֣י יְהוִ֔ה לָעֲצָמ֖וֹת הָאֵ֑לֶּה הִנֵּ֨ה אֲנִ֜י מֵבִ֥יא בָכֶ֛ם ר֖וּחַ וִחְיִיתֶֽם׃

‎6 ‏וְנָתַתִּי֩ עֲלֵיכֶ֨ם גִּדִ֜ים וְֽהַעֲלֵתִ֧י עֲלֵיכֶ֣ם בָּשָׂ֗ר וְקָרַמְתִּ֤י עֲלֵיכֶם֙ ע֔וֹר וְנָתַתִּ֥י בָכֶ֛ם ר֖וּחַ וִחְיִיתֶ֑ם וִידַעְתֶּ֖ם כִּֽי־אֲנִ֥י יְהוָֽה׃

‎7 ‏וְנִבֵּ֖אתִי כַּאֲשֶׁ֣ר צֻוֵּ֑יתִי וַֽיְהִי־ק֤וֹל כְּהִנָּֽבְאִי֙ וְהִנֵּה־רַ֔עַשׁ וַתִּקְרְב֣וּ עֲצָמ֔וֹת עֶ֖צֶם אֶל־עַצְמֽוֹ׃

‎8 ‏וְרָאִ֜יתִי וְהִנֵּֽה־עֲלֵיהֶ֤ם גִּדִים֙ וּבָשָׂ֣ר עָלָ֔ה וַיִּקְרַ֧ם עֲלֵיהֶ֛ם ע֖וֹר מִלְמָ֑עְלָה וְר֖וּחַ אֵ֥ין בָּהֶֽם׃

‎9 ‏וַיֹּ֣אמֶר אֵלַ֔י הִנָּבֵ֖א אֶל־הָר֑וּחַ הִנָּבֵ֣א בֶן־אָ֠דָם וְאָמַרְתָּ֙ אֶל־הָר֜וּחַ כֹּֽה־אָמַ֣ר׀ אֲדֹנָ֣י יְהוִ֗ה מֵאַרְבַּ֤ע רוּחוֹת֙ בֹּ֣אִי הָר֔וּחַ וּפְחִ֛י בַּהֲרוּגִ֥ים הָאֵ֖לֶּה וְיִֽחְיֽוּ׃

‎10 ‏וְהִנַּבֵּ֖אתִי כַּאֲשֶׁ֣ר צִוָּ֑נִי וַתָּבוֹא֩ בָהֶ֨ם הָר֜וּחַ וַיִּֽחְי֗וּ וַיַּֽעַמְדוּ֙ עַל־רַגְלֵיהֶ֔ם חַ֖יִל גָּד֥וֹל מְאֹד־מְאֹֽד׃ ס

‎11 ‏וַיֹּאמֶר֮ אֵלַי֒ בֶּן־אָדָ֕ם הָעֲצָמ֣וֹת הָאֵ֔לֶּה כָּל־בֵּ֥ית יִשְׂרָאֵ֖ל הֵ֑מָּה הִנֵּ֣ה אֹמְרִ֗ים יָבְשׁ֧וּ עַצְמוֹתֵ֛ינוּ וְאָבְדָ֥ה תִקְוָתֵ֖נוּ נִגְזַ֥רְנוּ לָֽנוּ׃

‎12 ‏לָכֵן֩ הִנָּבֵ֨א וְאָמַרְתָּ֜ אֲלֵיהֶ֗ם כֹּֽה־אָמַר֮ אֲדֹנָ֣י יְהוִה֒ הִנֵּה֩ אֲנִ֨י פֹתֵ֜חַ אֶת־קִבְרֽוֹתֵיכֶ֗ם וְהַעֲלֵיתִ֥י אֶתְכֶ֛ם מִקִּבְרוֹתֵיכֶ֖ם עַמִּ֑י וְהֵבֵאתִ֥י אֶתְכֶ֖ם אֶל־אַדְמַ֥ת יִשְׂרָאֵֽל׃ ס

‎13 ‏וִֽידַעְתֶּ֖ם כִּֽי־אֲנִ֣י יְהוָ֑ה בְּפִתְחִ֣י אֶת־קִבְרֽוֹתֵיכֶ֗ם וּבְהַעֲלוֹתִ֥י אֶתְכֶ֛ם מִקִּבְרוֹתֵיכֶ֖ם עַמִּֽי׃

‎14 ‏וְנָתַתִּ֨י רוּחִ֤י בָכֶם֙ וִחְיִיתֶ֔ם וְהִנַּחְתִּ֥י אֶתְכֶ֖ם עַל־אַדְמַתְכֶ֑ם וִידַעְתֶּ֞ם כִּי־אֲנִ֧י יְהוָ֛ה דִּבַּ֥רְתִּי וְעָשִׂ֖יתִי נְאֻם־יְהוָֽה׃ פ

‎15 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎16 ‏וְאַתָּ֣ה בֶן־אָדָ֗ם קַח־לְךָ֙ עֵ֣ץ אֶחָ֔ד וּכְתֹ֤ב עָלָיו֙ לִֽיהוּדָ֔ה וְלִבְנֵ֥י יִשְׂרָאֵ֖ל חברו חֲבֵרָ֑יו וּלְקַח֙ עֵ֣ץ אֶחָ֔ד וּכְת֣וֹב עָלָ֗יו לְיוֹסֵף֙ עֵ֣ץ אֶפְרַ֔יִם וְכָל־בֵּ֥ית יִשְׂרָאֵ֖ל חברו חֲבֵרָֽיו׃

‎17 ‏וְקָרַ֨ב אֹתָ֜ם אֶחָ֧ד אֶל־אֶחָ֛ד לְךָ֖ לְעֵ֣ץ אֶחָ֑ד וְהָי֥וּ לַאֲחָדִ֖ים בְּיָדֶֽךָ׃

‎18 ‏וְכַֽאֲשֶׁר֙ יֹאמְר֣וּ אֵלֶ֔יךָ בְּנֵ֥י עַמְּךָ֖ לֵאמֹ֑ר הֲלֽוֹא־תַגִּ֥יד לָ֖נוּ מָה־אֵ֥לֶּה לָּֽךְ׃³

‎19 ‏דַּבֵּ֣ר אֲלֵהֶ֗ם כֹּֽה־אָמַר֮ אֲדֹנָ֣י יְהוִה֒ הִנֵּה֩ אֲנִ֨י לֹקֵ֜חַ אֶת־עֵ֤ץ יוֹסֵף֙ אֲשֶׁ֣ר בְּיַד־אֶפְרַ֔יִם וְשִׁבְטֵ֥י יִשְׂרָאֵ֖ל חברו חֲבֵרָ֑יו וְנָתַתִּי֩ אוֹתָ֨ם עָלָ֜יו אֶת־עֵ֣ץ יְהוּדָ֗ה וַֽעֲשִׂיתִם֙ לְעֵ֣ץ אֶחָ֔ד וְהָי֥וּ אֶחָ֖ד בְּיָדִֽי׃

‎20 ‏וְהָי֨וּ הָעֵצִ֜ים אֲ‍ֽשֶׁר־תִּכְתֹּ֧ב עֲלֵיהֶ֛ם בְּיָדְךָ֖ לְעֵינֵיהֶֽם׃

‎21 ‏וְדַבֵּ֣ר אֲלֵיהֶ֗ם כֹּֽה־אָמַר֮ אֲדֹנָ֣י יְהוִה֒ הִנֵּ֨ה אֲנִ֤י לֹקֵ֙חַ֙ אֶת־בְּנֵ֣י יִשְׂרָאֵ֔ל מִבֵּ֥ין הַגּוֹיִ֖ם אֲשֶׁ֣ר הָֽלְכוּ־שָׁ֑ם וְקִבַּצְתִּ֤י אֹתָם֙ מִסָּבִ֔יב וְהֵבֵאתִ֥י אוֹתָ֖ם אֶל־אַדְמָתָֽם׃

‎22 ‏וְעָשִׂ֣יתִי אֹ֠תָם לְג֨וֹי אֶחָ֤ד בָּאָ֙רֶץ֙ בְּהָרֵ֣י יִשְׂרָאֵ֔ל וּמֶ֧לֶךְ אֶחָ֛ד יִֽהְיֶ֥ה לְכֻלָּ֖ם לְמֶ֑לֶךְ וְלֹ֤א יהיה־ יִֽהְיוּ־ עוֹד֙ לִשְׁנֵ֣י גוֹיִ֔ם וְלֹ֨א יֵחָ֥צוּ ע֛וֹד לִשְׁתֵּ֥י מַמְלָכ֖וֹת עֽוֹד׃

‎23 ‏וְלֹ֧א יִֽטַמְּא֣וּ ע֗וֹד בְּגִלּֽוּלֵיהֶם֙ וּבְשִׁקּ֣וּצֵיהֶ֔ם וּבְכֹ֖ל פִּשְׁעֵיהֶ֑ם וְהוֹשַׁעְתִּ֣י אֹתָ֗ם מִכֹּ֤ל מוֹשְׁבֹֽתֵיהֶם֙ אֲשֶׁ֣ר חָטְא֣וּ בָהֶ֔ם וְטִהַרְתִּ֤י אוֹתָם֙ וְהָיוּ־לִ֣י לְעָ֔ם וַאֲנִ֕י אֶהְיֶ֥ה לָהֶ֖ם לֵאלֹהִֽים׃

‎24 ‏וְעַבְדִּ֤י דָוִד֙ מֶ֣לֶךְ עֲלֵיהֶ֔ם וְרוֹעֶ֥ה אֶחָ֖ד יִהְיֶ֣ה לְכֻלָּ֑ם וּבְמִשְׁפָּטַ֣י יֵלֵ֔כוּ וְחֻקֹּתַ֥י יִשְׁמְר֖וּ וְעָשׂ֥וּ אוֹתָֽם׃

‎25 ‏וְיָשְׁב֣וּ עַל־הָאָ֗רֶץ אֲשֶׁ֤ר נָתַ֙תִּי֙ לְעַבְדִּ֣י לְיַֽעֲקֹ֔ב אֲשֶׁ֥ר יָֽשְׁבוּ־בָ֖הּ אֲבֽוֹתֵיכֶ֑ם וְיָשְׁב֣וּ עָלֶ֡יהָ הֵ֠מָּה וּבְנֵיהֶ֞ם וּבְנֵ֤י בְנֵיהֶם֙ עַד־עוֹלָ֔ם וְדָוִ֣ד עַבְדִּ֔י נָשִׂ֥יא לָהֶ֖ם לְעוֹלָֽם׃

‎26 ‏וְכָרַתִּ֤י לָהֶם֙ בְּרִ֣ית שָׁל֔וֹם בְּרִ֥ית עוֹלָ֖ם יִהְיֶ֣ה אוֹתָ֑ם וּנְתַתִּים֙ וְהִרְבֵּיתִ֣י אוֹתָ֔ם וְנָתַתִּ֧י אֶת־מִקְדָּשִׁ֛י בְּתוֹכָ֖ם לְעוֹלָֽם׃

‎27 ‏וְהָיָ֤ה מִשְׁכָּנִי֙ עֲלֵיהֶ֔ם וְהָיִ֥יתִי לָהֶ֖ם לֵֽאלֹהִ֑ים וְהֵ֖מָּה יִֽהְיוּ־לִ֥י לְעָֽם׃

‎28 ‏וְיָֽדְעוּ֙ הַגּוֹיִ֔ם כִּ֚י אֲנִ֣י יְהוָ֔ה מְקַדֵּ֖שׁ אֶת־יִשְׂרָאֵ֑ל בִּהְי֧וֹת מִקְדָּשִׁ֛י בְּתוֹכָ֖ם לְעוֹלָֽם׃ ס

1 hāyəṯâ ‘ālay yaḏ-yəhwâ wayywōṣi’ēnî ḇərûḥa yəhwâ wayənîḥēnî bəṯwōḵə habiqə‘â wəhî’ məlē’â ‘ăṣāmwōṯ:

2 wəhe‘ĕḇîranî ‘ălêhem sāḇîḇ| sāḇîḇ wəhinnēh rabwōṯ mə’ōḏ ‘al-pənê habiqə‘â wəhinnēh yəḇēšwōṯ mə’ōḏ:

3 wayyō’mer ’ēlay ben-’āḏām hăṯiḥəyeynâ hā‘ăṣāmwōṯ hā’ēlleh wā’ōmar ’ăḏōnāy yəhwih ’atâ yāḏā‘ətā:

4 wayyō’mer ’ēlay hinnāḇē’ ‘al-hā‘ăṣāmwōṯ hā’ēlleh wə’āmarətā ’ălêhem hā‘ăṣāmwōṯ hayəḇēšwōṯ šimə‘û dəḇar-yəhwâ:

5 kōh ’āmar ’ăḏōnāy yəhwih lā‘ăṣāmwōṯ hā’ēlleh hinnēh ’ănî mēḇî’ ḇāḵem rûḥa wiḥəyîṯem:

6 wənāṯatî ‘ălêḵem giḏîm wəh^a‘ălēṯî ‘ălêḵem bāśār wəqāramətî ‘ălêḵem ‘wōr wənāṯatî ḇāḵem rûḥa wiḥəyîṯem wîḏ^a‘ətem kî-’ănî yəhwâ:

7 wənibē’ṯî ka’ăšer ṣuûêṯî wayəhî-qwōl kəhinnāḇə’î wəhinnēh-r^a‘aš watiqərəḇû ‘ăṣāmwōṯ ‘eṣem ’el-‘aṣəmwō:

8 wərā’îṯî wəhinnēh-‘ălêhem giḏîm ûḇāśār ‘ālâ wayyiqəram ‘ălêhem ‘wōr miləmā‘əlâ wərûḥa ’ên bâem:

9 wayyō’mer ’ēlay hinnāḇē’ ’el-hārûḥa hinnāḇē’ ḇen-’āḏām wə’āmarətā ’el-hārûḥa kōh-’āmar| ’ăḏōnāy yəhwih mē’arəb^a‘ rûḥwōṯ bō’î hārûḥa ûfəḥî bahărûḡîm hā’ēlleh wəyiḥəyû:

10 wəhinnabē’ṯî ka’ăšer ṣiûānî watāḇwō’ ḇâem hārûḥa wayyiḥəyû wayy^a‘aməḏû ‘al-raḡəlêhem ḥayil gāḏwōl mə’ōḏ-mə’ōḏ: s

11 wayyō’mer ’ēlay ben-’āḏām hā‘ăṣāmwōṯ hā’ēlleh kāl-bêṯ yiśərā’ēl hēmmâ hinnēh ’ōmərîm yāḇəšû ‘aṣəmwōṯênû wə’āḇəḏâ ṯiqəwāṯēnû niḡəzarənû lānû:

12 lāḵēn hinnāḇē’ wə’āmarətā ’ălêhem kōh-’āmar ’ăḏōnāy yəhwih hinnēh ’ănî fōṯēḥa ’eṯ-qiḇərwōṯêḵem wəh^a‘ălêṯî ’eṯəḵem miqqiḇərwōṯêḵem ‘ammî wəhēḇē’ṯî ’eṯəḵem ’el-’aḏəmaṯ yiśərā’ēl: s

13 wîḏ^a‘ətem kî-’ănî yəhwâ bəfiṯəḥî ’eṯ-qiḇərwōṯêḵem ûḇəh^a‘ălwōṯî ’eṯəḵem miqqiḇərwōṯêḵem ‘ammî:

14 wənāṯatî rûḥî ḇāḵem wiḥəyîṯem wəhinn^aḥətî ’eṯəḵem ‘al-’aḏəmaṯəḵem wîḏ^a‘ətem kî-’ănî yəhwâ dibarətî wə‘āśîṯî nə’um-yəhwâ: f

15 wayəhî ḏəḇar-yəhwâ ’ēlay lē’mōr:

16 wə’atâ ḇen-’āḏām q^aḥ-ləḵā ‘ēṣ ’eḥāḏ ûḵəṯōḇ ‘ālāyw lîhûḏâ wəliḇənê yiśərā’ēl ḥăḇērwō ḥăḇērāyw ûləq^aḥ ‘ēṣ ’eḥāḏ ûḵəṯwōḇ ‘ālāyw ləywōsēf ‘ēṣ ’efərayim wəḵāl-bêṯ yiśərā’ēl ḥăḇērwō ḥăḇērāyw:

17 wəqāraḇ ’ōṯām ’eḥāḏ ’el-’eḥāḏ ləḵā lə‘ēṣ ’eḥāḏ wəhāyû la’ăḥāḏîm bəyāḏeḵā:

18 wəḵa’ăšer yō’mərû ’ēleyḵā bənê ‘amməḵā lē’mōr hălwō’-ṯagîḏ lānû mâ-’ēlleh llāḵə:³

19 dabēr ’ălēhem kōh-’āmar ’ăḏōnāy yəhwih hinnēh ’ănî lōqēḥa ’eṯ-‘ēṣ ywōsēf ’ăšer bəyaḏ-’efərayim wəšiḇəṭê yiśərā’ēl ḥăḇērwō ḥăḇērāyw wənāṯatî ’wōṯām ‘ālāyw ’eṯ-‘ēṣ yəhûḏâ w^a‘ăśîṯim lə‘ēṣ ’eḥāḏ wəhāyû ’eḥāḏ bəyāḏî:

20 wəhāyû hā‘ēṣîm ’ă‍šer-tiḵətōḇ ‘ălêhem bəyāḏəḵā lə‘ênêhem:

21 wəḏabēr ’ălêhem kōh-’āmar ’ăḏōnāy yəhwih hinnēh ’ănî lōqēḥa ’eṯ-bənê yiśərā’ēl mibên hagwōyim ’ăšer hāləḵû-šām wəqibaṣətî ’ōṯām missāḇîḇ wəhēḇē’ṯî ’wōṯām ’el-’aḏəmāṯām:

22 wə‘āśîṯî ’ōṯām ləḡwōy ’eḥāḏ bā’āreṣ bəhārê yiśərā’ēl ûmeleḵə ’eḥāḏ yihəyeh ləḵullām ləmeleḵə wəlō’ yihəyeh- yihəyû- ‘wōḏ lišənê ḡwōyim wəlō’ yēḥāṣû ‘wōḏ lišətê maməlāḵwōṯ ‘wōḏ:

23 wəlō’ yiṭammə’û ‘wōḏ bəḡillûlêhem ûḇəšiqqûṣêhem ûḇəḵōl pišə‘êhem wəhwōš^a‘ətî ’ōṯām mikōl mwōšəḇōṯêhem ’ăšer ḥāṭə’û ḇâem wəṭiharətî ’wōṯām wəhāyû-lî lə‘ām wa’ănî ’ehəyeh lâem lē’lōhîm:

24 wə‘aḇədî ḏāwiḏ meleḵə ‘ălêhem wərwō‘eh ’eḥāḏ yihəyeh ləḵullām ûḇəmišəpāṭay yēlēḵû wəḥuqqōṯay yišəmərû wə‘āśû ’wōṯām:

25 wəyāšəḇû ‘al-hā’āreṣ ’ăšer nāṯatî lə‘aḇədî ləy^a‘ăqōḇ ’ăšer yāšəḇû-ḇāh ’ăḇwōṯêḵem wəyāšəḇû ‘āleyhā hēmmâ ûḇənêhem ûḇənê ḇənêhem ‘aḏ-‘wōlām wəḏāwiḏ ‘aḇədî nāśî’ lâem lə‘wōlām:

26 wəḵāratî lâem bərîṯ šālwōm bərîṯ ‘wōlām yihəyeh ’wōṯām ûnəṯatîm wəhirəbêṯî ’wōṯām wənāṯatî ’eṯ-miqədāšî bəṯwōḵām lə‘wōlām:

27 wəhāyâ mišəkānî ‘ălêhem wəhāyîṯî lâem lē’lōhîm wəhēmmâ yihəyû-lî lə‘ām:

28 wəyāḏə‘û hagwōyim kî ’ănî yəhwâ məqadēš ’eṯ-yiśərā’ēl bihəywōṯ miqədāšî bəṯwōḵām lə‘wōlām: s