Ezekiel (Yechezqel) Chapter 38

‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֗ם שִׂ֤ים פָּנֶ֙יךָ֙ אֶל־גּוֹג֙ אֶ֣רֶץ הַמָּג֔וֹג נְשִׂ֕יא רֹ֖אשׁ מֶ֣שֶׁךְ וְתֻבָ֑ל וְהִנָּבֵ֖א עָלָֽיו׃

‎3 ‏וְאָ֣מַרְתָּ֔ כֹּ֥ה אָמַ֖ר אֲדֹנָ֣י יְהוִ֑ה הִנְנִ֤י אֵלֶ֙יךָ֙ גּ֔וֹג נְשִׂ֕יא רֹ֖אשׁ מֶ֥שֶׁךְ וְתֻבָֽל׃

‎4 ‏וְשׁ֣וֹבַבְתִּ֔יךָ וְנָתַתִּ֥י חַחִ֖ים בִּלְחָיֶ֑יךָ וְהוֹצֵאתִי֩ אוֹתְךָ֙ וְאֶת־כָּל־חֵילֶ֜ךָ סוּסִ֣ים וּפָרָשִׁ֗ים לְבֻשֵׁ֤י מִכְלוֹל֙ כֻּלָּ֔ם קָהָ֥ל רָב֙ צִנָּ֣ה וּמָגֵ֔ן תֹּפְשֵׂ֥י חֲרָב֖וֹת כֻּלָּֽם׃

‎5 ‏פָּרַ֛ס כּ֥וּשׁ וּפ֖וּט אִתָּ֑ם כֻּלָּ֖ם מָגֵ֥ן וְכוֹבָֽע׃

‎6 ‏גֹּ֚מֶר וְכָל־אֲגַפֶּ֔יהָ בֵּ֚ית תּֽוֹגַרְמָ֔ה יַרְכְּתֵ֥י צָפ֖וֹן וְאֶת־כָּל־אֲגַפָּ֑יו עַמִּ֥ים רַבִּ֖ים אִתָּֽךְ׃

‎7 ‏הִכֹּן֙ וְהָכֵ֣ן לְךָ֔ אַתָּ֕ה וְכָל־קְהָלֶ֖ךָ הַנִּקְהָלִ֣ים עָלֶ֑יךָ וְהָיִ֥יתָ לָהֶ֖ם לְמִשְׁמָֽר׃

‎8 ‏מִיָּמִ֣ים רַבִּים֮ תִּפָּקֵד֒ בְּאַחֲרִ֨ית הַשָּׁנִ֜ים תָּב֣וֹא׀ אֶל־אֶ֣רֶץ׀ מְשׁוֹבֶ֣בֶת מֵחֶ֗רֶב מְקֻבֶּ֙צֶת֙ מֵעַמִּ֣ים רַבִּ֔ים עַ֚ל הָרֵ֣י יִשְׂרָאֵ֔ל אֲשֶׁר־הָי֥וּ לְחָרְבָּ֖ה תָּמִ֑יד וְהִיא֙ מֵעַמִּ֣ים הוּצָ֔אָה וְיָשְׁב֥וּ לָבֶ֖טַח כֻּלָּֽם׃

‎9 ‏וְעָלִ֙יתָ֙ כַּשֹּׁאָ֣ה תָב֔וֹא כֶּעָנָ֛ן לְכַסּ֥וֹת הָאָ֖רֶץ תִּֽהְיֶ֑ה אַתָּה֙ וְכָל־אֲגַפֶּ֔יךָ וְעַמִּ֥ים רַבִּ֖ים אוֹתָֽךְ׃ ס

‎10 ‏כֹּ֥ה אָמַ֖ר אֲדֹנָ֣י יְהוִ֑ה וְהָיָ֣ה׀ בַּיּ֣וֹם הַה֗וּא יַעֲל֤וּ דְבָרִים֙ עַל־לְבָבֶ֔ךָ וְחָשַׁבְתָּ֖ מַחֲשֶׁ֥בֶת רָעָֽה׃

‎11 ‏וְאָמַרְתָּ֗ אֶֽעֱלֶה֙ עַל־אֶ֣רֶץ פְּרָז֔וֹת אָבוֹא֙ הַשֹּׁ֣קְטִ֔ים יֹשְׁבֵ֖י לָבֶ֑טַח כֻּלָּ֗ם יֹֽשְׁבִים֙ בְּאֵ֣ין חוֹמָ֔ה וּבְרִ֥יחַ וּדְלָתַ֖יִם אֵ֥ין לָהֶֽם׃

‎12 ‏לִשְׁלֹ֥ל שָׁלָ֖ל וְלָבֹ֣ז בַּ֑ז לְהָשִׁ֨יב יָדְךָ֜ עַל־חֳרָב֣וֹת נוֹשָׁבֹ֗ת וְאֶל־עַם֙ מְאֻסָּ֣ף מִגּוֹיִ֔ם עֹשֶׂה֙ מִקְנֶ֣ה וְקִנְיָ֔ן יֹשְׁבֵ֖י עַל־טַבּ֥וּר הָאָֽרֶץ׃

‎13 ‏שְׁבָ֡א וּ֠דְדָן וְסֹחֲרֵ֨י תַרְשִׁ֤ישׁ וְכָל־כְּפִרֶ֙יהָ֙ יֹאמְר֣וּ לְךָ֔ הֲלִשְׁלֹ֤ל שָׁלָל֙ אַתָּ֣ה בָ֔א הֲלָבֹ֥ז בַּ֖ז הִקְהַ֣לְתָּ קְהָלֶ֑ךָ לָשֵׂ֣את׀ כֶּ֣סֶף וְזָהָ֗ב לָקַ֙חַת֙ מִקְנֶ֣ה וְקִנְיָ֔ן לִשְׁלֹ֖ל שָׁלָ֥ל גָּדֽוֹל׃ ס

‎14 ‏לָכֵן֙ הִנָּבֵ֣א בֶן־אָדָ֔ם וְאָמַרְתָּ֣ לְג֔וֹג כֹּ֥ה אָמַ֖ר אֲדֹנָ֣י יְהוִ֑ה הֲל֣וֹא׀ בַּיּ֣וֹם הַה֗וּא בְּשֶׁ֨בֶת עַמִּ֧י יִשְׂרָאֵ֛ל לָבֶ֖טַח תֵּדָֽע׃

‎15 ‏וּבָ֤אתָ מִמְּקֽוֹמְךָ֙ מִיַּרְכְּתֵ֣י צָפ֔וֹן אַתָּ֕ה וְעַמִּ֥ים רַבִּ֖ים אִתָּ֑ךְ רֹכְבֵ֤י סוּסִים֙ כֻּלָּ֔ם קָהָ֥ל גָּד֖וֹל וְחַ֥יִל רָֽב׃

‎16 ‏וְעָלִ֙יתָ֙ עַל־עַמִּ֣י יִשְׂרָאֵ֔ל כֶּֽעָנָ֖ן לְכַסּ֣וֹת הָאָ֑רֶץ בְּאַחֲרִ֨ית הַיָּמִ֜ים תִּֽהְיֶ֗ה וַהֲבִאוֹתִ֙יךָ֙ עַל־אַרְצִ֔י לְמַעַן֩ דַּ֨עַת הַגּוֹיִ֜ם אֹתִ֗י בְּהִקָּדְשִׁ֥י בְךָ֛ לְעֵינֵיהֶ֖ם גּֽוֹג׃ ס

‎17 ‏כֹּֽה־אָמַ֞ר אֲדֹנָ֣י יְהוִ֗ה הַֽאַתָּה־ה֨וּא אֲשֶׁר־דִּבַּ֜רְתִּי בְּיָמִ֣ים קַדְמוֹנִ֗ים בְּיַד֙ עֲבָדַי֙ נְבִיאֵ֣י יִשְׂרָאֵ֔ל הַֽנִּבְּאִ֛ים בַּיָּמִ֥ים הָהֵ֖ם שָׁנִ֑ים לְהָבִ֥יא אֹתְךָ֖ עֲלֵיהֶֽם׃ ס

‎18 ‏וְהָיָ֣ה׀ בַּיּ֣וֹם הַה֗וּא בְּי֨וֹם בּ֥וֹא גוֹג֙ עַל־אַדְמַ֣ת יִשְׂרָאֵ֔ל נְאֻ֖ם אֲדֹנָ֣י יְהוִ֑ה תַּעֲלֶ֥ה חֲמָתִ֖י בְּאַפִּֽי׃

‎19 ‏וּבְקִנְאָתִ֥י בְאֵשׁ־עֶבְרָתִ֖י דִּבַּ֑רְתִּי אִם־לֹ֣א׀ בַּיּ֣וֹם הַה֗וּא יִֽהְיֶה֙ רַ֣עַשׁ גָּד֔וֹל עַ֖ל אַדְמַ֥ת יִשְׂרָאֵֽל׃

‎20 ‏וְרָעֲשׁ֣וּ מִפָּנַ֡י דְּגֵ֣י הַיָּם֩ וְע֨וֹף הַשָּׁמַ֜יִם וְחַיַּ֣ת הַשָּׂדֶ֗ה וְכָל־הָרֶ֙מֶשׂ֙ הָרֹמֵ֣שׂ עַל־הָֽאֲדָמָ֔ה וְכֹל֙ הָֽאָדָ֔ם אֲשֶׁ֖ר עַל־פְּנֵ֣י הָאֲדָמָ֑ה וְנֶהֶרְס֣וּ הֶהָרִ֗ים וְנָֽפְלוּ֙ הַמַּדְרֵג֔וֹת וְכָל־חוֹמָ֖ה לָאָ֥רֶץ תִּפּֽוֹל׃

‎21 ‏וְקָרָ֨אתִי עָלָ֤יו לְכָל־הָרַי֙ חֶ֔רֶב נְאֻ֖ם אֲדֹנָ֣י יְהוִ֑ה חֶ֥רֶב אִ֖ישׁ בְּאָחִ֥יו תִּֽהְיֶֽה׃

‎22 ‏וְנִשְׁפַּטְתִּ֥י אִתּ֖וֹ בְּדֶ֣בֶר וּבְדָ֑ם וְגֶ֣שֶׁם שׁוֹטֵף֩ וְאַבְנֵ֨י אֶלְגָּבִ֜ישׁ אֵ֣שׁ וְגָפְרִ֗ית אַמְטִ֤יר עָלָיו֙ וְעַל־אֲגַפָּ֔יו וְעַל־עַמִּ֥ים רַבִּ֖ים אֲשֶׁ֥ר אִתּֽוֹ׃

‎23 ‏וְהִתְגַּדִּלְתִּי֙ וְהִתְקַדִּשְׁתִּ֔י וְנ֣וֹדַעְתִּ֔י לְעֵינֵ֖י גּוֹיִ֣ם רַבִּ֑ים וְיָדְע֖וּ כִּֽי־אֲנִ֥י יְהוָֽה׃ ס

1 wayəhî ḏəḇar-yəhwâ ’ēlay lē’mōr:

2 ben-’āḏām śîm pāneyḵā ’el-gwōḡ ’ereṣ hammāḡwōḡ nəśî’ rō’š mešeḵə wəṯuḇāl wəhinnāḇē’ ‘ālāyw:

3 wə’āmarətā kōh ’āmar ’ăḏōnāy yəhwih hinənî ’ēleyḵā gwōḡ nəśî’ rō’š mešeḵə wəṯuḇāl:

4 wəšwōḇaḇətîḵā wənāṯatî ḥ^aḥîm biləḥāyeyḵā wəhwōṣē’ṯî ’wōṯəḵā wə’eṯ-kāl-ḥêleḵā sûsîm ûfārāšîm ləḇušê miḵəlwōl kullām qâāl rāḇ ṣinnâ ûmāḡēn tōfəśê ḥărāḇwōṯ kullām:

5 pāras kûš ûfûṭ ’itām kullām māḡēn wəḵwōḇā‘:

6 gōmer wəḵāl-’ăḡapeyhā bêṯ twōḡarəmâ yarəkəṯê ṣāfwōn wə’eṯ-kāl-’ăḡapāyw ‘ammîm rabîm ’itāḵə:

7 hikōn wəhāḵēn ləḵā ’atâ wəḵāl-qəhāleḵā hanniqəhālîm ‘āleyḵā wəhāyîṯā lâem ləmišəmār:

8 mîyāmîm rabîm tipāqēḏ bə’^aḥărîṯ haššānîm tāḇwō’| ’el-’ereṣ| məšwōḇeḇeṯ mēḥereḇ məqubeṣeṯ mē‘ammîm rabîm ‘al hārê yiśərā’ēl ’ăšer-hāyû ləḥārəbâ tāmîḏ wəhî’ mē‘ammîm hûṣā’â wəyāšəḇû lāḇeṭ^aḥ kullām:

9 wə‘ālîṯā kaššō’â ṯāḇwō’ ke‘ānān ləḵasswōṯ hā’āreṣ tihəyeh ’atâ wəḵāl-’ăḡapeyḵā wə‘ammîm rabîm ’wōṯāḵə: s

10 kōh ’āmar ’ăḏōnāy yəhwih wəhāyâ| bayywōm hahû’ y^a‘ălû ḏəḇārîm ‘al-ləḇāḇeḵā wəḥāšaḇətā m^aḥăšeḇeṯ rā‘â:

11 wə’āmarətā ’e‘ĕleh ‘al-’ereṣ pərāzwōṯ ’āḇwō’ haššōqəṭîm yōšəḇê lāḇeṭ^aḥ kullām yōšəḇîm bə’ên ḥwōmâ ûḇərîḥa ûḏəlāṯayim ’ên lâem:

12 lišəlōl šālāl wəlāḇōz baz ləhāšîḇ yāḏəḵā ‘al-ḥŏrāḇwōṯ nwōšāḇōṯ wə’el-‘am mə’ussāf migwōyim ‘ōśeh miqəneh wəqinəyān yōšəḇê ‘al-ṭabûr hā’āreṣ:

13 šəḇā’ ûḏəḏān wəsōḥărê ṯarəšîš wəḵāl-kəfireyhā yō’mərû ləḵā hălišəlōl šālāl ’atâ ḇā’ hălāḇōz baz hiqəhalətā qəhāleḵā lāśē’ṯ| kesef wəzâāḇ lāq^aḥaṯ miqəneh wəqinəyān lišəlōl šālāl gāḏwōl: s

14 lāḵēn hinnāḇē’ ḇen-’āḏām wə’āmarətā ləḡwōḡ kōh ’āmar ’ăḏōnāy yəhwih hălwō’| bayywōm hahû’ bəšeḇeṯ ‘ammî yiśərā’ēl lāḇeṭ^aḥ tēḏā‘:

15 ûḇā’ṯā mimməqwōməḵā mîyarəkəṯê ṣāfwōn ’atâ wə‘ammîm rabîm ’itāḵə rōḵəḇê sûsîm kullām qâāl gāḏwōl wəḥayil rāḇ:

16 wə‘ālîṯā ‘al-‘ammî yiśərā’ēl ke‘ānān ləḵasswōṯ hā’āreṣ bə’^aḥărîṯ hayyāmîm tihəyeh wahăḇi’wōṯîḵā ‘al-’arəṣî ləm^a‘an d^a‘aṯ hagwōyim ’ōṯî bəhiqqāḏəšî ḇəḵā lə‘ênêhem gwōḡ: s

17 kōh-’āmar ’ăḏōnāy yəhwih ha’atâ-hû’ ’ăšer-dibarətî bəyāmîm qaḏəmwōnîm bəyaḏ ‘ăḇāḏay nəḇî’ê yiśərā’ēl hannibə’îm bayyāmîm hâēm šānîm ləhāḇî’ ’ōṯəḵā ‘ălêhem: s

18 wəhāyâ| bayywōm hahû’ bəywōm bwō’ ḡwōḡ ‘al-’aḏəmaṯ yiśərā’ēl nə’um ’ăḏōnāy yəhwih t^a‘ăleh ḥămāṯî bə’apî:

19 ûḇəqinə’āṯî ḇə’ēš-‘eḇərāṯî dibarətî ’im-lō’| bayywōm hahû’ yihəyeh r^a‘aš gāḏwōl ‘al ’aḏəmaṯ yiśərā’ēl:

20 wərā‘ăšû mipānay dəḡê hayyām wə‘wōf haššāmayim wəḥayyaṯ haśśāḏeh wəḵāl-hāremeś hārōmēś ‘al-hā’ăḏāmâ wəḵōl hā’āḏām ’ăšer ‘al-pənê hā’ăḏāmâ wəneherəsû hehārîm wənāfəlû hammaḏərēḡwōṯ wəḵāl-ḥwōmâ lā’āreṣ tipwōl:

21 wəqārā’ṯî ‘ālāyw ləḵāl-hāray ḥereḇ nə’um ’ăḏōnāy yəhwih ḥereḇ ’îš bə’āḥîw tihəyeh:

22 wənišəpaṭətî ’itwō bəḏeḇer ûḇəḏām wəḡešem šwōṭēf wə’aḇənê ’eləgāḇîš ’ēš wəḡāfərîṯ ’aməṭîr ‘ālāyw wə‘al-’ăḡapāyw wə‘al-‘ammîm rabîm ’ăšer ’itwō:

23 wəhiṯəgadilətî wəhiṯəqadišətî wənwōḏ^a‘ətî lə‘ênê gwōyim rabîm wəyāḏə‘û kî-’ănî yəhwâ: s