Genesis (Bereshit) Chapter 2

‎1 ‏וַיְכֻלּ֛וּ הַשָּׁמַ֥יִם וְהָאָ֖רֶץ וְכָל־צְבָאָֽם׃

‎2 ‏וַיְכַ֤ל אֱלֹהִים֙ בַּיּ֣וֹם הַשְּׁבִיעִ֔י מְלַאכְתּ֖וֹ אֲשֶׁ֣ר עָשָׂ֑ה וַיִּשְׁבֹּת֙ בַּיּ֣וֹם הַשְּׁבִיעִ֔י מִכָּל־מְלַאכְתּ֖וֹ אֲשֶׁ֥ר עָשָֽׂה׃

‎3 ‏וַיְבָ֤רֶךְ אֱלֹהִים֙ אֶת־י֣וֹם הַשְּׁבִיעִ֔י וַיְקַדֵּ֖שׁ אֹת֑וֹ כִּ֣י ב֤וֹ שָׁבַת֙ מִכָּל־מְלַאכְתּ֔וֹ אֲשֶׁר־בָּרָ֥א אֱלֹהִ֖ים לַעֲשֽׂוֹת׃ פ

‎4 ‏אֵ֣לֶּה תוֹלְד֧וֹת הַשָּׁמַ֛יִם וְהָאָ֖רֶץ בְּהִבָּֽרְאָ֑ם בְּי֗וֹם עֲשׂ֛וֹת יְהוָ֥ה אֱלֹהִ֖ים אֶ֥רֶץ וְשָׁמָֽיִם׃

‎5 ‏וְכֹ֣ל׀ שִׂ֣יחַ הַשָּׂדֶ֗ה טֶ֚רֶם יִֽהְיֶ֣ה בָאָ֔רֶץ וְכָל־עֵ֥שֶׂב הַשָּׂדֶ֖ה טֶ֣רֶם יִצְמָ֑ח כִּי֩ לֹ֨א הִמְטִ֜יר יְהוָ֤ה אֱלֹהִים֙ עַל־הָאָ֔רֶץ וְאָדָ֣ם אַ֔יִן לַֽעֲבֹ֖ד אֶת־הָֽאֲדָמָֽה׃

‎6 ‏וְאֵ֖ד יַֽעֲלֶ֣ה מִן־הָאָ֑רֶץ וְהִשְׁקָ֖ה אֶֽת־כָּל־פְּנֵֽי־הָֽאֲדָמָֽה׃

‎7 ‏וַיִּיצֶר֩ יְהוָ֨ה אֱלֹהִ֜ים אֶת־הָֽאָדָ֗ם עָפָר֙ מִן־הָ֣אֲדָמָ֔ה וַיִּפַּ֥ח בְּאַפָּ֖יו נִשְׁמַ֣ת חַיִּ֑ים וַֽיְהִ֥י הָֽאָדָ֖ם לְנֶ֥פֶשׁ חַיָּֽה׃

‎8 ‏וַיִּטַּ֞ע יְהוָ֧ה אֱלֹהִ֛ים גַּן־בְעֵ֖דֶן מִקֶּ֑דֶם וַיָּ֣שֶׂם שָׁ֔ם אֶת־הָֽאָדָ֖ם אֲשֶׁ֥ר יָצָֽר׃

‎9 ‏וַיַּצְמַ֞ח יְהוָ֤ה אֱלֹהִים֙ מִן־הָ֣אֲדָמָ֔ה כָּל־עֵ֛ץ נֶחְמָ֥ד לְמַרְאֶ֖ה וְט֣וֹב לְמַאֲכָ֑ל וְעֵ֤ץ הַֽחַיִּים֙ בְּת֣וֹךְ הַגָּ֔ן וְעֵ֕ץ הַדַּ֖עַת ט֥וֹב וָרָֽע׃

‎10 ‏וְנָהָרּ֙ יֹצֵ֣א מֵעֵ֔דֶן לְהַשְׁק֖וֹת אֶת־הַגָּ֑ן וּמִשָּׁם֙ יִפָּרֵ֔ד וְהָיָ֖ה לְאַרְבָּעָ֥ה רָאשִֽׁים׃

‎11 ‏שֵׁ֥ם הָֽאֶחָ֖ד פִּישׁ֑וֹן ה֣וּא הַסֹּבֵ֗ב אֵ֚ת כָּל־אֶ֣רֶץ הַֽחֲוִילָ֔ה אֲשֶׁר־שָׁ֖ם הַזָּהָֽב׃

‎12 ‏וּֽזֲהַ֛ב הָאָ֥רֶץ הַהִ֖וא ט֑וֹב שָׁ֥ם הַבְּדֹ֖לַח וְאֶ֥בֶן הַשֹּֽׁהַם׃

‎13 ‏וְשֵֽׁם־הַנָּהָ֥ר הַשֵּׁנִ֖י גִּיח֑וֹן ה֣וּא הַסּוֹבֵ֔ב אֵ֖ת כָּל־אֶ֥רֶץ כּֽוּשׁ׃

‎14 ‏וְשֵׁ֨ם הַנָּהָ֤ר הַשְּׁלִישִׁי֙ חִדֶּ֔קֶל ה֥וּא הַֽהֹלֵ֖ךְ קִדְמַ֣ת אַשּׁ֑וּר וְהַנָּהָ֥ר הָֽרְבִיעִ֖י ה֥וּא פְרָֽת׃

‎15 ‏וַיִּקַּ֛ח יְהוָ֥ה אֱלֹהִ֖ים אֶת־הָֽאָדָ֑ם וַיַּנִּחֵ֣הוּ בְגַן־עֵ֔דֶן לְעָבְדָ֖הּ וּלְשָׁמְרָֽהּ׃

‎16 ‏וַיְצַו֙ יְהוָ֣ה אֱלֹהִ֔ים עַל־הָֽאָדָ֖ם לֵאמֹ֑ר מִכֹּ֥ל עֵֽץ־הַגָּ֖ן אָכֹ֥ל תֹּאכֵֽל׃

‎17 ‏וּמֵעֵ֗ץ הַדַּ֙עַת֙ ט֣וֹב וָרָ֔ע לֹ֥א תֹאכַ֖ל מִמֶּ֑נּוּ כִּ֗י בְּי֛וֹם אֲכָלְךָ֥ מִמֶּ֖נּוּ מ֥וֹת תָּמֽוּת׃

‎18 ‏וַיֹּ֙אמֶר֙ יְהוָ֣ה אֱלֹהִ֔ים לֹא־ט֛וֹב הֱי֥וֹת הָֽאָדָ֖ם לְבַדּ֑וֹ אֶֽעֱשֶׂהּ־לּ֥וֹ¹ עֵ֖זֶר כְּנֶגְדּֽוֹ׃

‎19 ‏וַיִּצֶר֩ יְהוָ֨ה אֱלֹהִ֜ים מִן־הָֽאֲדָמָ֗ה כָּל־חַיַּ֤ת הַשָּׂדֶה֙ וְאֵת֙ כָּל־ע֣וֹף הַשָּׁמַ֔יִם וַיָּבֵא֙ אֶל־הָ֣אָדָ֔ם לִרְא֖וֹת מַה־יִּקְרָא־ל֑וֹ וְכֹל֩ אֲשֶׁ֨ר יִקְרָא־ל֧וֹ הָֽאָדָ֛ם נֶ֥פֶשׁ חַיָּ֖ה ה֥וּא שְׁמֽוֹ׃

‎20 ‏וַיִּקְרָ֨א הָֽאָדָ֜ם שֵׁמ֗וֹת לְכָל־הַבְּהֵמָה֙ וּלְע֣וֹף הַשָּׁמַ֔יִם וּלְכֹ֖ל חַיַּ֣ת הַשָּׂדֶ֑ה וּלְאָדָ֕ם לֹֽא־מָצָ֥א עֵ֖זֶר כְּנֶגְדּֽוֹ׃

‎21 ‏וַיַּפֵּל֩ יְהוָ֨ה אֱלֹהִ֧ים׀ תַּרְדֵּמָ֛ה עַל־הָאָדָ֖ם וַיִּישָׁ֑ן וַיִּקַּ֗ח אַחַת֙ מִצַּלְעֹתָ֔יו וַיִּסְגֹּ֥ר בָּשָׂ֖ר תַּחְתֶּֽנָּה׃

‎22 ‏וַיִּבֶן֩ יְהוָ֨ה אֱלֹהִ֧ים׀ אֶֽת־הַצֵּלָ֛ע אֲשֶׁר־לָקַ֥ח מִן־הָֽאָדָ֖ם לְאִשָּׁ֑ה וַיְבִאֶ֖הָ אֶל־הָֽאָדָֽם׃

‎23 ‏וַיֹּאמֶר֮ הָֽאָדָם֒ זֹ֣את הַפַּ֗עַם עֶ֚צֶם מֵֽעֲצָמַ֔י וּבָשָׂ֖ר מִבְּשָׂרִ֑י לְזֹאת֙ יִקָּרֵ֣א אִשָּׁ֔ה כִּ֥י מֵאִ֖ישׁ לֻֽקֳחָה־זֹּֽאת׃

‎24 ‏עַל־כֵּן֙ יַֽעֲזָב־אִ֔ישׁ אֶת־אָבִ֖יו וְאֶת־אִמּ֑וֹ וְדָבַ֣ק בְּאִשְׁתּ֔וֹ וְהָי֖וּ לְבָשָׂ֥ר אֶחָֽד׃

‎25 ‏וַיִּֽהְי֤וּ שְׁנֵיהֶם֙ עֲרוּמִּ֔ים הָֽאָדָ֖ם וְאִשְׁתּ֑וֹ וְלֹ֖א יִתְבֹּשָֽׁשׁוּ׃

1 wayəḵullû haššāmayim wəhā’āreṣ wəḵāl-ṣəḇā’ām:

2 wayəḵal ’ĕlōhîm bayywōm haššəḇî‘î məla’ḵətwō ’ăšer ‘āśâ wayyišəbōṯ bayywōm haššəḇî‘î mikāl-məla’ḵətwō ’ăšer ‘āśâ:

3 wayəḇāreḵə ’ĕlōhîm ’eṯ-ywōm haššəḇî‘î wayəqadēš ’ōṯwō kî ḇwō šāḇaṯ mikāl-məla’ḵətwō ’ăšer-bārā’ ’ĕlōhîm l^a‘ăśwōṯ: f

4 ’ēlleh ṯwōləḏwōṯ haššāmayim wəhā’āreṣ bəhibārə’ām bəywōm ‘ăśwōṯ yəhwâ ’ĕlōhîm ’ereṣ wəšāmāyim:

5 wəḵōl| śîḥa haśśāḏeh ṭerem yihəyeh ḇā’āreṣ wəḵāl-‘ēśeḇ haśśāḏeh ṭerem yiṣəmāḥ kî lō’ himəṭîr yəhwâ ’ĕlōhîm ‘al-hā’āreṣ wə’āḏām ’ayin l^a‘ăḇōḏ ’eṯ-hā’ăḏāmâ:

6 wə’ēḏ y^a‘ăleh min-hā’āreṣ wəhišəqâ ’eṯ-kāl-pənê-hā’ăḏāmâ:

7 wayyîṣer yəhwâ ’ĕlōhîm ’eṯ-hā’āḏām ‘āfār min-hā’ăḏāmâ wayyip^aḥ bə’apāyw nišəmaṯ ḥayyîm wayəhî hā’āḏām lənefeš ḥayyâ:

8 wayyiṭṭ^a‘ yəhwâ ’ĕlōhîm gan-ḇə‘ēḏen miqqeḏem wayyāśem šām ’eṯ-hā’āḏām ’ăšer yāṣār:

9 wayyaṣəm^aḥ yəhwâ ’ĕlōhîm min-hā’ăḏāmâ kāl-‘ēṣ neḥəmāḏ ləmarə’eh wəṭwōḇ ləma’ăḵāl wə‘ēṣ h^aḥayyîm bəṯwōḵə hagān wə‘ēṣ had^a‘aṯ ṭwōḇ wārā‘:

10 wənâārr yōṣē’ mē‘ēḏen ləhašəqwōṯ ’eṯ-hagān ûmiššām yipārēḏ wəhāyâ lə’arəbā‘â rā’šîm:

11 šēm hā’eḥāḏ pîšwōn hû’ hassōḇēḇ ’ēṯ kāl-’ereṣ h^aḥăwîlâ ’ăšer-šām hazzâāḇ:

12 ûzăhaḇ hā’āreṣ hahiw’ ṭwōḇ šām habəḏōl^aḥ wə’eḇen haššōham:

13 wəšēm-hannâār haššēnî gîḥwōn hû’ hasswōḇēḇ ’ēṯ kāl-’ereṣ kûš:

14 wəšēm hannâār haššəlîšî ḥideqel hû’ hahōlēḵə qiḏəmaṯ ’aššûr wəhannâār hārəḇî‘î hû’ fərāṯ:

15 wayyiqq^aḥ yəhwâ ’ĕlōhîm ’eṯ-hā’āḏām wayyanniḥēhû ḇəḡan-‘ēḏen lə‘āḇəḏāh ûləšāmərāh:

16 wayəṣaw yəhwâ ’ĕlōhîm ‘al-hā’āḏām lē’mōr mikōl ‘ēṣ-hagān ’āḵōl tō’ḵēl:

17 ûmē‘ēṣ had^a‘aṯ ṭwōḇ wārā‘ lō’ ṯō’ḵal mimmennû kî bəywōm ’ăḵāləḵā mimmennû mwōṯ tāmûṯ:

18 wayyō’mer yəhwâ ’ĕlōhîm lō’-ṭwōḇ hĕywōṯ hā’āḏām ləḇadwō ’e‘ĕśehh-llwō¹ ‘ēzer kəneḡədwō:

19 wayyiṣer yəhwâ ’ĕlōhîm min-hā’ăḏāmâ kāl-ḥayyaṯ haśśāḏeh wə’ēṯ kāl-‘wōf haššāmayim wayyāḇē’ ’el-hā’āḏām lirə’wōṯ mah-yyiqərā’-lwō wəḵōl ’ăšer yiqərā’-lwō hā’āḏām nefeš ḥayyâ hû’ šəmwō:

20 wayyiqərā’ hā’āḏām šēmwōṯ ləḵāl-habəhēmâ ûlə‘wōf haššāmayim ûləḵōl ḥayyaṯ haśśāḏeh ûlə’āḏām lō’-māṣā’ ‘ēzer kəneḡədwō:

21 wayyapēl yəhwâ ’ĕlōhîm| tarədēmâ ‘al-hā’āḏām wayyîšān wayyiqq^aḥ ’^aḥaṯ miṣṣalə‘ōṯāyw wayyisəgōr bāśār t^aḥətennâ:

22 wayyiḇen yəhwâ ’ĕlōhîm| ’eṯ-haṣṣēlā‘ ’ăšer-lāq^aḥ min-hā’āḏām lə’iššâ wayəḇi’ehā ’el-hā’āḏām:

23 wayyō’mer hā’āḏām zō’ṯ hap^a‘am ‘eṣem mē‘ăṣāmay ûḇāśār mibəśārî ləzō’ṯ yiqqārē’ ’iššâ kî mē’îš luqŏḥâ-zzō’ṯ:

24 ‘al-kēn y^a‘ăzāḇ-’îš ’eṯ-’āḇîw wə’eṯ-’immwō wəḏāḇaq bə’išətwō wəhāyû ləḇāśār ’eḥāḏ:

25 wayyihəyû šənêhem ‘ărûmmîm hā’āḏām wə’išətwō wəlō’ yiṯəbōšāšû: