Genesis (Bereshit) Chapter 3

‎1 ‏וְהַנָּחָשׁ֙ הָיָ֣ה עָר֔וּם מִכֹּל֙ חַיַּ֣ת הַשָּׂדֶ֔ה אֲשֶׁ֥ר עָשָׂ֖ה יְהוָ֣ה אֱלֹהִ֑ים וַיֹּ֙אמֶר֙ אֶל־הָ֣אִשָּׁ֔ה אַ֚ף כִּֽי־אָמַ֣ר אֱלֹהִ֔ים לֹ֣א תֹֽאכְל֔וּ מִכֹּ֖ל עֵ֥ץ הַגָּֽן׃

‎2 ‏וַתֹּ֥אמֶר הָֽאִשָּׁ֖ה אֶל־הַנָּחָ֑שׁ מִפְּרִ֥י עֵֽץ־הַגָּ֖ן נֹאכֵֽל׃

‎3 ‏וּמִפְּרִ֣י הָעֵץ֮ אֲשֶׁ֣ר בְּתוֹךְ־הַגָּן֒ אָמַ֣ר אֱלֹהִ֗ים לֹ֤א תֹֽאכְלוּ֙ מִמֶּ֔נּוּ וְלֹ֥א תִגְּע֖וּ בּ֑וֹ פֶּן־תְּמֻתֽוּן׃

‎4 ‏וַיֹּ֥אמֶר הַנָּחָ֖שׁ אֶל־הָֽאִשָּׁ֑ה לֹֽא־מ֖וֹת תְּמֻתֽוּן׃

‎5 ‏כִּ֚י יֹדֵ֣עַ אֱלֹהִ֔ים כִּ֗י בְּיוֹם֙ אֲכָלְכֶ֣ם מִמֶּ֔נּוּ וְנִפְקְח֖וּ עֵֽינֵיכֶ֑ם וִהְיִיתֶם֙ כֵּֽאלֹהִ֔ים יֹדְעֵ֖י ט֥וֹב וָרָֽע׃

‎6 ‏וַתֵּ֣רֶא הָֽאִשָּׁ֡ה כִּ֣י טוֹב֩ הָעֵ֨ץ לְמַאֲכָ֜ל וְכִ֧י תַֽאֲוָה־ה֣וּא לָעֵינַ֗יִם וְנֶחְמָ֤ד הָעֵץ֙ לְהַשְׂכִּ֔יל וַתִּקַּ֥ח מִפִּרְי֖וֹ וַתֹּאכַ֑ל וַתִּתֵּ֧ן גַּם־לְאִישָׁ֛הּ עִמָּ֖הּ וַיֹּאכַֽל׃

‎7 ‏וַתִּפָּקַ֙חְנָה֙ עֵינֵ֣י שְׁנֵיהֶ֔ם וַיֵּ֣דְע֔וּ כִּ֥י עֵֽירֻמִּ֖ם הֵ֑ם וַֽיִּתְפְּרוּ֙ עֲלֵ֣ה תְאֵנָ֔ה וַיַּעֲשׂ֥וּ לָהֶ֖ם חֲגֹרֹֽת׃

‎8 ‏וַֽיִּשְׁמְע֞וּ אֶת־ק֨וֹל יְהוָ֧ה אֱלֹהִ֛ים מִתְהַלֵּ֥ךְ בַּגָּ֖ן לְר֣וּחַ הַיּ֑וֹם וַיִּתְחַבֵּ֨א הָֽאָדָ֜ם וְאִשְׁתּ֗וֹ מִפְּנֵי֙ יְהוָ֣ה אֱלֹהִ֔ים בְּת֖וֹךְ עֵ֥ץ הַגָּֽן׃

‎9 ‏וַיִּקְרָ֛א יְהוָ֥ה אֱלֹהִ֖ים אֶל־הָֽאָדָ֑ם וַיֹּ֥אמֶר ל֖וֹ אַיֶּֽכָּה׃

‎10 ‏וַיֹּ֕אמֶר אֶת־קֹלְךָ֥ שָׁמַ֖עְתִּי בַּגָּ֑ן וָאִירָ֛א כִּֽי־עֵירֹ֥ם אָנֹ֖כִי וָאֵחָבֵֽא׃

‎11 ‏וַיֹּ֕אמֶר מִ֚י הִגִּ֣יד לְךָ֔ כִּ֥י עֵירֹ֖ם אָ֑תָּה הֲמִן־הָעֵ֗ץ אֲשֶׁ֧ר צִוִּיתִ֛יךָ לְבִלְתִּ֥י אֲכָל־מִמֶּ֖נּוּ אָכָֽלְתָּ׃

‎12 ‏וַיֹּ֖אמֶר הָֽאָדָ֑ם הָֽאִשָּׁה֙ אֲשֶׁ֣ר נָתַ֣תָּה עִמָּדִ֔י הִ֛וא נָֽתְנָה־לִּ֥י מִן־הָעֵ֖ץ וָאֹכֵֽל׃

‎13 ‏וַיֹּ֨אמֶר יְהוָ֧ה אֱלֹהִ֛ים לָאִשָּׁ֖ה מַה־זֹּ֣את עָשִׂ֑ית וַתֹּ֙אמֶר֙ הָֽאִשָּׁ֔ה הַנָּחָ֥שׁ הִשִּׁיאַ֖נִי וָאֹכֵֽל׃

‎14 ‏וַיֹּאמֶר֩ יְהוָֹ֨ה אֱלֹהִ֥ים׀ אֶֽל־הַנָּחָשׁ֮ כִּ֣י עָשִׂ֣יתָ זֹּאת֒ אָר֤וּר אַתָּה֙ מִכָּל־הַבְּהֵמָ֔ה וּמִכֹּ֖ל חַיַּ֣ת הַשָּׂדֶ֑ה עַל־גְּחֹנְךָ֣ תֵלֵ֔ךְ וְעָפָ֥ר תֹּאכַ֖ל כָּל־יְמֵ֥י חַיֶּֽיךָ׃

‎15 ‏וְאֵיבָ֣ה׀ אָשִׁ֗ית בֵּֽינְךָ֙ וּבֵ֣ין הָֽאִשָּׁ֔ה וּבֵ֥ין זַרְעֲךָ֖ וּבֵ֣ין זַרְעָ֑הּ ה֚וּא יְשׁוּפְךָ֣ רֹ֔אשׁ וְאַתָּ֖ה תְּשׁוּפֶ֥נּוּ עָקֵֽב׃ ס

‎16 ‏אֶֽל־הָאִשָּׁ֣ה אָמַ֗ר הַרְבָּ֤ה אַרְבֶּה֙ עִצְּבוֹנֵ֣ךְ וְהֵֽרֹנֵ֔ךְ בְּעֶ֖צֶב תֵּֽלְדִ֣י בָנִ֑ים וְאֶל־אִישֵׁךְ֙ תְּשׁ֣וּקָתֵ֔ךְ וְה֖וּא יִמְשָׁל־בָּֽךְ׃ ס

‎17 ‏וּלְאָדָ֣ם אָמַ֗ר כִּֽי־שָׁמַעְתָּ֮³ לְק֣וֹל אִשְׁתֶּךָ֒ וַתֹּ֙אכַל֙ מִן־הָעֵ֔ץ אֲשֶׁ֤ר צִוִּיתִ֙יךָ֙ לֵאמֹ֔ר לֹ֥א תֹאכַ֖ל מִמֶּ֑נּוּ אֲרוּרָ֤ה הָֽאֲדָמָה֙ בַּֽעֲבוּרֶ֔ךָ בְּעִצָּבוֹן֙ תֹּֽאכֲלֶ֔נָּה כֹּ֖ל יְמֵ֥י חַיֶּֽיךָ׃

‎18 ‏וְק֥וֹץ וְדַרְדַּ֖ר תַּצְמִ֣יחַֽ לָ֑ךְ וְאָכַלְתָּ֖ אֶת־עֵ֥שֶׂב הַשָּׂדֶֽה׃

‎19 ‏בְּזֵעַ֤ת אַפֶּ֙יךָ֙ תֹּ֣אכַל לֶ֔חֶם עַ֤ד שֽׁוּבְךָ֙ אֶל־הָ֣אֲדָמָ֔ה כִּ֥י מִמֶּ֖נָּה לֻקָּ֑חְתָּ כִּֽי־עָפָ֣ר אַ֔תָּה וְאֶל־עָפָ֖ר תָּשֽׁוּב׃

‎20 ‏וַיִּקְרָ֧א הָֽאָדָ֛ם שֵׁ֥ם אִשְׁתּ֖וֹ חַוָּ֑ה כִּ֛י הִ֥וא הָֽיְתָ֖ה אֵ֥ם כָּל־חָֽי׃

‎21 ‏וַיַּעַשׂ֩ יְהוָ֨ה אֱלֹהִ֜ים לְאָדָ֧ם וּלְאִשְׁתּ֛וֹ כָּתְנ֥וֹת ע֖וֹר וַיַּלְבִּשֵֽׁם׃ פ

‎22 ‏וַיֹּ֣אמֶר׀ יְהוָ֣ה אֱלֹהִ֗ים הֵ֤ן הָֽאָדָם֙ הָיָה֙ כְּאַחַ֣ד מִמֶּ֔נּוּ לָדַ֖עַת ט֣וֹב וָרָ֑ע וְעַתָּ֣ה׀ פֶּן־יִשְׁלַ֣ח יָד֗וֹ וְלָקַח֙ גַּ֚ם מֵעֵ֣ץ הַֽחַיִּ֔ים וְאָכַ֖ל וָחַ֥י לְעֹלָֽם׃

‎23 ‏וַֽיְשַׁלְּחֵ֛הוּ יְהוָ֥ה אֱלֹהִ֖ים מִגַּן־עֵ֑דֶן לַֽעֲבֹד֙ אֶת־הָ֣אֲדָמָ֔ה אֲשֶׁ֥ר לֻקַּ֖ח מִשָּֽׁם׃

‎24 ‏וַיְגָ֖רֶשׁ אֶת־הָֽאָדָ֑ם וַיַּשְׁכֵּן֩ מִקֶּ֨דֶם לְגַן־עֵ֜דֶן אֶת־הַכְּרֻבִ֗ים וְאֵ֨ת לַ֤הַט הַחֶ֙רֶב֙ הַמִּתְהַפֶּ֔כֶת לִשְׁמֹ֕ר אֶת־דֶּ֖רֶךְ עֵ֥ץ הַֽחַיִּֽים׃ ס

1 wəhannāḥāš hāyâ ‘ārûm mikōl ḥayyaṯ haśśāḏeh ’ăšer ‘āśâ yəhwâ ’ĕlōhîm wayyō’mer ’el-hā’iššâ ’af kî-’āmar ’ĕlōhîm lō’ ṯō’ḵəlû mikōl ‘ēṣ hagān:

2 watō’mer hā’iššâ ’el-hannāḥāš mipərî ‘ēṣ-hagān nō’ḵēl:

3 ûmipərî hā‘ēṣ ’ăšer bəṯwōḵə-hagān ’āmar ’ĕlōhîm lō’ ṯō’ḵəlû mimmennû wəlō’ ṯigə‘û bwō pen-təmuṯûn:

4 wayyō’mer hannāḥāš ’el-hā’iššâ lō’-mwōṯ təmuṯûn:

5 kî yōḏē‘a ’ĕlōhîm kî bəywōm ’ăḵāləḵem mimmennû wənifəqəḥû ‘ênêḵem wihəyîṯem kē’lōhîm yōḏə‘ê ṭwōḇ wārā‘:

6 watēre’ hā’iššâ kî ṭwōḇ hā‘ēṣ ləma’ăḵāl wəḵî ṯa’ăwâ-hû’ lā‘ênayim wəneḥəmāḏ hā‘ēṣ ləhaśəkîl watiqq^aḥ mipirəywō watō’ḵal watitēn gam-lə’îšāh ‘immāh wayyō’ḵal:

7 watipāq^aḥənâ ‘ênê šənêhem wayyēḏə‘û kî ‘êrummim hēm wayyiṯəpərû ‘ălēh ṯə’ēnâ wayy^a‘ăśû lâem ḥăḡōrōṯ:

8 wayyišəmə‘û ’eṯ-qwōl yəhwâ ’ĕlōhîm miṯəhallēḵə bagān lərûḥa hayywōm wayyiṯəḥabē’ hā’āḏām wə’išətwō mipənê yəhwâ ’ĕlōhîm bəṯwōḵə ‘ēṣ hagān:

9 wayyiqərā’ yəhwâ ’ĕlōhîm ’el-hā’āḏām wayyō’mer lwō ’ayyekâ:

10 wayyō’mer ’eṯ-qōləḵā šām^a‘ətî bagān wā’îrā’ kî-‘êrōm ’ānōḵî wā’ēḥāḇē’:

11 wayyō’mer mî higîḏ ləḵā kî ‘êrōm ’ātâ hămin-hā‘ēṣ ’ăšer ṣiûîṯîḵā ləḇilətî ’ăḵāl-mimmennû ’āḵālətā:

12 wayyō’mer hā’āḏām hā’iššâ ’ăšer nāṯatâ ‘immāḏî hiw’ nāṯənâ-llî min-hā‘ēṣ wā’ōḵēl:

13 wayyō’mer yəhwâ ’ĕlōhîm lā’iššâ mah-zzō’ṯ ‘āśîṯ watō’mer hā’iššâ hannāḥāš hiššî’anî wā’ōḵēl:

14 wayyō’mer yəhwōâ ’ĕlōhîm| ’el-hannāḥāš kî ‘āśîṯā zzō’ṯ ’ārûr ’atâ mikāl-habəhēmâ ûmikōl ḥayyaṯ haśśāḏeh ‘al-gəḥōnəḵā ṯēlēḵə wə‘āfār tō’ḵal kāl-yəmê ḥayyeyḵā:

15 wə’êḇâ| ’āšîṯ bênəḵā ûḇên hā’iššâ ûḇên zarə‘ăḵā ûḇên zarə‘āh hû’ yəšûfəḵā rō’š wə’atâ təšûfennû ‘āqēḇ: s

16 ’el-hā’iššâ ’āmar harəbâ ’arəbeh ‘iṣṣəḇwōnēḵə wəhērōnēḵə bə‘eṣeḇ tēləḏî ḇānîm wə’el-’îšēḵə təšûqāṯēḵə wəhû’ yiməšāl-bāḵə: s

17 ûlə’āḏām ’āmar kî-šām^a‘ətā³ ləqwōl ’išəteḵā watō’ḵal min-hā‘ēṣ ’ăšer ṣiûîṯîḵā lē’mōr lō’ ṯō’ḵal mimmennû ’ărûrâ hā’ăḏāmâ b^a‘ăḇûreḵā bə‘iṣṣāḇwōn tō’ḵălennâ kōl yəmê ḥayyeyḵā:

18 wəqwōṣ wəḏarədar taṣəmîḥa lāḵə wə’āḵalətā ’eṯ-‘ēśeḇ haśśāḏeh:

19 bəzē‘aṯ ’apeyḵā tō’ḵal leḥem ‘aḏ šûḇəḵā ’el-hā’ăḏāmâ kî mimmennâ luqqāḥətā kî-‘āfār ’atâ wə’el-‘āfār tāšûḇ:

20 wayyiqərā’ hā’āḏām šēm ’išətwō ḥaûâ kî hiw’ hāyəṯâ ’ēm kāl-ḥāy:

21 wayy^a‘aś yəhwâ ’ĕlōhîm lə’āḏām ûlə’išətwō kāṯənwōṯ ‘wōr wayyaləbišēm: f

22 wayyō’mer| yəhwâ ’ĕlōhîm hēn hā’āḏām hāyâ kə’^aḥaḏ mimmennû lāḏ^a‘aṯ ṭwōḇ wārā‘ wə‘atâ| pen-yišəl^aḥ yāḏwō wəlāq^aḥ gam mē‘ēṣ h^aḥayyîm wə’āḵal wāḥay lə‘ōlām:

23 wayəšalləḥēhû yəhwâ ’ĕlōhîm migan-‘ēḏen l^a‘ăḇōḏ ’eṯ-hā’ăḏāmâ ’ăšer luqq^aḥ miššām:

24 wayəḡāreš ’eṯ-hā’āḏām wayyašəkēn miqqeḏem ləḡan-‘ēḏen ’eṯ-hakəruḇîm wə’ēṯ lahaṭ h^aḥereḇ hammiṯəhapeḵeṯ lišəmōr ’eṯ-dereḵə ‘ēṣ h^aḥayyîm: s