Genesis (Bereshit) Chapter 8

‎1 ‏וַיִּזְכֹּ֤ר אֱלֹהִים֙ אֶת־נֹ֔חַ וְאֵ֤ת כָּל־הַֽחַיָּה֙ וְאֶת־כָּל־הַבְּהֵמָ֔ה אֲשֶׁ֥ר אִתּ֖וֹ בַּתֵּבָ֑ה וַיַּעֲבֵ֨ר אֱלֹהִ֥ים ר֙וּחַ֙ עַל־הָאָ֔רֶץ וַיָּשֹׁ֖כּוּ הַמָּֽיִם׃

‎2 ‏וַיִּסָּֽכְרוּ֙ מַעְיְנֹ֣ת תְּה֔וֹם וַֽאֲרֻבֹּ֖ת הַשָּׁמָ֑יִם וַיִּכָּלֵ֥א הַגֶּ֖שֶׁם מִן־הַשָּׁמָֽיִם׃

‎3 ‏וַיָּשֻׁ֧בוּ הַמַּ֛יִם מֵעַ֥ל הָאָ֖רֶץ הָל֣וֹךְ וָשׁ֑וֹב וַיַּחְסְר֣וּ הַמַּ֔יִם מִקְצֵ֕ה חֲמִשִּׁ֥ים וּמְאַ֖ת יֽוֹם׃

‎4 ‏וַתָּ֤נַח הַתֵּבָה֙ בַּחֹ֣דֶשׁ הַשְּׁבִיעִ֔י בְּשִׁבְעָה־עָשָׂ֥ר י֖וֹם לַחֹ֑דֶשׁ עַ֖ל הָרֵ֥י אֲרָרָֽט׃

‎5 ‏וְהַמַּ֗יִם הָיוּ֙ הָל֣וֹךְ וְחָס֔וֹר עַ֖ד הַחֹ֣דֶשׁ הָֽעֲשִׂירִ֑י בָּֽעֲשִׂירִי֙ בְּאֶחָ֣ד לַחֹ֔דֶשׁ נִרְא֖וּ רָאשֵׁ֥י הֶֽהָרִֽים׃

‎6 ‏וַֽיְהִ֕י מִקֵּ֖ץ אַרְבָּעִ֣ים י֑וֹם וַיִּפְתַּ֣ח נֹ֔חַ אֶת־חַלּ֥וֹן הַתֵּבָ֖ה אֲשֶׁ֥ר עָשָֽׂה׃

‎7 ‏וַיְשַׁלַּ֖ח אֶת־הָֽעֹרֵ֑ב וַיֵּצֵ֤א יָצוֹא֙ וָשׁ֔וֹב עַד־יְבֹ֥שֶׁת הַמַּ֖יִם מֵעַ֥ל הָאָֽרֶץ׃

‎8 ‏וַיְשַׁלַּ֥ח אֶת־הַיּוֹנָ֖ה מֵאִתּ֑וֹ לִרְאוֹת֙ הֲקַ֣לּוּ הַמַּ֔יִם מֵעַ֖ל פְּנֵ֥י הָֽאֲדָמָֽה׃

‎9 ‏וְלֹֽא־מָצְאָה֩ הַיּוֹנָ֨ה מָנ֜וֹחַ לְכַף־רַגְלָ֗הּ וַתָּ֤שָׁב אֵלָיו֙ אֶל־הַתֵּבָ֔ה כִּי־מַ֖יִם עַל־פְּנֵ֣י כָל־הָאָ֑רֶץ וַיִּשְׁלַ֤ח יָדוֹ֙ וַיִּקָּחֶ֔הָ וַיָּבֵ֥א אֹתָ֛הּ אֵלָ֖יו אֶל־הַתֵּבָֽה׃

‎10 ‏וַיָּ֣חֶל ע֔וֹד שִׁבְעַ֥ת יָמִ֖ים אֲחֵרִ֑ים וַיֹּ֛סֶף שַׁלַּ֥ח אֶת־הַיּוֹנָ֖ה מִן־הַתֵּבָֽה׃

‎11 ‏וַתָּבֹ֨א אֵלָ֤יו הַיּוֹנָה֙ לְעֵ֣ת עֶ֔רֶב וְהִנֵּ֥ה עֲלֵה־זַ֖יִת טָרָ֣ף בְּפִ֑יהָ וַיֵּ֣דַע נֹ֔חַ כִּי־קַ֥לּוּ הַמַּ֖יִם מֵעַ֥ל הָאָֽרֶץ׃

‎12 ‏וַיִּיָּ֣חֶל ע֔וֹד שִׁבְעַ֥ת יָמִ֖ים אֲחֵרִ֑ים וַיְשַׁלַּח֙ אֶת־הַיּוֹנָ֔ה וְלֹֽא־יָסְפָ֥ה שׁוּב־אֵלָ֖יו עֽוֹד׃

‎13 ‏וַֽ֠יְהִי בְּאַחַ֨ת וְשֵׁשׁ־מֵא֜וֹת שָׁנָ֗ה בָּֽרִאשׁוֹן֙ בְּאֶחָ֣ד לַחֹ֔דֶשׁ חָֽרְב֥וּ הַמַּ֖יִם מֵעַ֣ל הָאָ֑רֶץ וַיָּ֤סַר נֹ֙חַ֙ אֶת־מִכְסֵ֣ה הַתֵּבָ֔ה וַיַּ֕רְא וְהִנֵּ֥ה חָֽרְב֖וּ פְּנֵ֥י הָֽאֲדָמָֽה׃

‎14 ‏וּבַחֹ֙דֶשׁ֙ הַשֵּׁנִ֔י בְּשִׁבְעָ֧ה וְעֶשְׂרִ֛ים י֖וֹם לַחֹ֑דֶשׁ יָבְשָׁ֖ה הָאָֽרֶץ׃ ס

‎15 ‏וַיְדַבֵּ֥ר אֱלֹהִ֖ים אֶל־נֹ֥חַ לֵאמֹֽר׃

‎16 ‏צֵ֖א מִן־הַתֵּבָ֑ה אַתָּ֕ה וְאִשְׁתְּךָ֛ וּבָנֶ֥יךָ וּנְשֵֽׁי־בָנֶ֖יךָ אִתָּֽךְ׃

‎17 ‏כָּל־הַחַיָּ֨ה אֲשֶֽׁר־אִתְּךָ֜ מִכָּל־בָּשָׂ֗ר בָּע֧וֹף וּבַבְּהֵמָ֛ה וּבְכָל־הָרֶ֛מֶשׂ הָרֹמֵ֥שׂ עַל־הָאָ֖רֶץ הוצא הַיְצֵ֣א אִתָּ֑ךְ וְשָֽׁרְצ֣וּ בָאָ֔רֶץ וּפָר֥וּ וְרָב֖וּ עַל־הָאָֽרֶץ׃

‎18 ‏וַיֵּ֖צֵא־נֹ֑חַ וּבָנָ֛יו וְאִשְׁתּ֥וֹ וּנְשֵֽׁי־בָנָ֖יו אִתּֽוֹ׃

‎19 ‏כָּל־הַֽחַיָּ֗ה כָּל־הָרֶ֙מֶשׂ֙ וְכָל־הָע֔וֹף כֹּ֖ל רוֹמֵ֣שׂ עַל־הָאָ֑רֶץ לְמִשְׁפְּחֹ֣תֵיהֶ֔ם יָצְא֖וּ מִן־הַתֵּבָֽה׃

‎20 ‏וַיִּ֥בֶן נֹ֛חַ מִזְבֵּ֖חַ לַֽיהוָ֑ה וַיִּקַּ֞ח מִכֹּ֣ל׀ הַבְּהֵמָ֣ה הַטְּהוֹרָ֗ה וּמִכֹּל֙ הָע֣וֹף הַטָּהֹ֔ר וַיַּ֥עַל עֹלֹ֖ת בַּמִּזְבֵּֽחַ׃

‎21 ‏וַיָּ֣רַח יְהוָה֮ אֶת־רֵ֣יחַ הַנִּיחֹחַ֒ וַיֹּ֨אמֶר יְהוָ֜ה אֶל־לִבּ֗וֹ לֹֽא־אֹ֠סִף לְקַלֵּ֨ל ע֤וֹד אֶת־הָֽאֲדָמָה֙ בַּעֲב֣וּר הָֽאָדָ֔ם כִּ֠י יֵ֣צֶר לֵ֧ב הָאָדָ֛ם רַ֖ע מִנְּעֻרָ֑יו וְלֹֽא־אֹסִ֥ף ע֛וֹד לְהַכּ֥וֹת אֶת־כָּל־חַ֖י כַּֽאֲשֶׁ֥ר עָשִֽׂיתִי׃

‎22 ‏עֹ֖ד כָּל־יְמֵ֣י הָאָ֑רֶץ זֶ֡רַע וְ֠קָצִיר וְקֹ֨ר וָחֹ֜ם וְקַ֧יִץ וָחֹ֛רֶף וְי֥וֹם וָלַ֖יְלָה לֹ֥א יִשְׁבֹּֽתוּ׃

1 wayyizəkōr ’ĕlōhîm ’eṯ-nōḥa wə’ēṯ kāl-h^aḥayyâ wə’eṯ-kāl-habəhēmâ ’ăšer ’itwō batēḇâ wayy^a‘ăḇēr ’ĕlōhîm rûḥa ‘al-hā’āreṣ wayyāšōkû hammāyim:

2 wayyissāḵərû m^a‘əyənōṯ təhwōm wa’ărubōṯ haššāmāyim wayyikālē’ hagešem min-haššāmāyim:

3 wayyāšuḇû hammayim mē‘al hā’āreṣ hālwōḵə wāšwōḇ wayy^aḥəsərû hammayim miqəṣēh ḥămiššîm ûmə’aṯ ywōm:

4 watān^aḥ hatēḇâ b^aḥōḏeš haššəḇî‘î bəšiḇə‘â-‘āśār ywōm l^aḥōḏeš ‘al hārê ’ărārāṭ:

5 wəhammayim hāyû hālwōḵə wəḥāswōr ‘aḏ h^aḥōḏeš hā‘ăśîrî bā‘ăśîrî bə’eḥāḏ l^aḥōḏeš nirə’û rā’šê hehārîm:

6 wayəhî miqqēṣ ’arəbā‘îm ywōm wayyifət^aḥ nōḥa ’eṯ-ḥallwōn hatēḇâ ’ăšer ‘āśâ:

7 wayəšall^aḥ ’eṯ-hā‘ōrēḇ wayyēṣē’ yāṣwō’ wāšwōḇ ‘aḏ-yəḇōšeṯ hammayim mē‘al hā’āreṣ:

8 wayəšall^aḥ ’eṯ-hayywōnâ mē’itwō lirə’wōṯ hăqallû hammayim mē‘al pənê hā’ăḏāmâ:

9 wəlō’-māṣə’â hayywōnâ mānwōḥa ləḵaf-raḡəlāh watāšāḇ ’ēlāyw ’el-hatēḇâ kî-mayim ‘al-pənê ḵāl-hā’āreṣ wayyišəl^aḥ yāḏwō wayyiqqāḥehā wayyāḇē’ ’ōṯāh ’ēlāyw ’el-hatēḇâ:

10 wayyāḥel ‘wōḏ šiḇə‘aṯ yāmîm ’ăḥērîm wayyōsef šall^aḥ ’eṯ-hayywōnâ min-hatēḇâ:

11 watāḇō’ ’ēlāyw hayywōnâ lə‘ēṯ ‘ereḇ wəhinnēh ‘ălēh-zayiṯ ṭārāf bəfîhā wayyēḏ^a‘ nōḥa kî-qallû hammayim mē‘al hā’āreṣ:

12 wayyîyāḥel ‘wōḏ šiḇə‘aṯ yāmîm ’ăḥērîm wayəšall^aḥ ’eṯ-hayywōnâ wəlō’-yāsəfâ šûḇ-’ēlāyw ‘wōḏ:

13 wayəhî bə’^aḥaṯ wəšēš-mē’wōṯ šānâ bāri’šwōn bə’eḥāḏ l^aḥōḏeš ḥārəḇû hammayim mē‘al hā’āreṣ wayyāsar nōḥa ’eṯ-miḵəsēh hatēḇâ wayyarə’ wəhinnēh ḥārəḇû pənê hā’ăḏāmâ:

14 ûḇ^aḥōḏeš haššēnî bəšiḇə‘â wə‘eśərîm ywōm l^aḥōḏeš yāḇəšâ hā’āreṣ: s

15 wayəḏabēr ’ĕlōhîm ’el-nōḥa lē’mōr:

16 ṣē’ min-hatēḇâ ’atâ wə’išətəḵā ûḇāneyḵā ûnəšê-ḇāneyḵā ’itāḵə:

17 kāl-h^aḥayyâ ’ăšer-’itəḵā mikāl-bāśār bā‘wōf ûḇabəhēmâ ûḇəḵāl-hāremeś hārōmēś ‘al-hā’āreṣ hwōṣē’ hayəṣē’ ’itāḵə wəšārəṣû ḇā’āreṣ ûfārû wərāḇû ‘al-hā’āreṣ:

18 wayyēṣē’-nōḥa ûḇānāyw wə’išətwō ûnəšê-ḇānāyw ’itwō:

19 kāl-h^aḥayyâ kāl-hāremeś wəḵāl-hā‘wōf kōl rwōmēś ‘al-hā’āreṣ ləmišəpəḥōṯêhem yāṣə’û min-hatēḇâ:

20 wayyiḇen nōḥa mizəbēḥa layhwâ wayyiqq^aḥ mikōl| habəhēmâ haṭṭəhwōrâ ûmikōl hā‘wōf haṭṭâōr wayy^a‘al ‘ōlōṯ bammizəbēḥa:

21 wayyār^aḥ yəhwâ ’eṯ-rêḥa hannîḥōḥa wayyō’mer yəhwâ ’el-libwō lō’-’ōsif ləqallēl ‘wōḏ ’eṯ-hā’ăḏāmâ b^a‘ăḇûr hā’āḏām kî yēṣer lēḇ hā’āḏām r^a‘ minnə‘urāyw wəlō’-’ōsif ‘wōḏ ləhakwōṯ ’eṯ-kāl-ḥay ka’ăšer ‘āśîṯî:

22 ‘ōḏ kāl-yəmê hā’āreṣ zer^a‘ wəqāṣîr wəqōr wāḥōm wəqayiṣ wāḥōref wəywōm wālayəlâ lō’ yišəbōṯû: