Genesis (Bereshit) Chapter 9

‎1 ‏וַיְבָ֣רֶךְ אֱלֹהִ֔ים אֶת־נֹ֖חַ וְאֶת־בָּנָ֑יו וַיֹּ֧אמֶר לָהֶ֛ם פְּר֥וּ וּרְב֖וּ וּמִלְא֥וּ אֶת־הָאָֽרֶץ׃

‎2 ‏וּמוֹרַאֲכֶ֤ם וְחִתְּכֶם֙ יִֽהְיֶ֔ה עַ֚ל כָּל־חַיַּ֣ת הָאָ֔רֶץ וְעַ֖ל כָּל־ע֣וֹף הַשָּׁמָ֑יִם בְּכֹל֩ אֲשֶׁ֨ר תִּרְמֹ֧שׂ הָֽאֲדָמָ֛ה וּֽבְכָל־דְּגֵ֥י הַיָּ֖ם בְּיֶדְכֶ֥ם נִתָּֽנוּ׃

‎3 ‏כָּל־רֶ֙מֶשׂ֙ אֲשֶׁ֣ר הוּא־חַ֔י לָכֶ֥ם יִהְיֶ֖ה לְאָכְלָ֑ה כְּיֶ֣רֶק עֵ֔שֶׂב נָתַ֥תִּי לָכֶ֖ם אֶת־כֹּֽל׃

‎4 ‏אַךְ־בָּשָׂ֕ר בְּנַפְשׁ֥וֹ דָמ֖וֹ לֹ֥א תֹאכֵֽלוּ׃

‎5 ‏וְאַ֨ךְ אֶת־דִּמְכֶ֤ם לְנַפְשֹֽׁתֵיכֶם֙ אֶדְרֹ֔שׁ מִיַּ֥ד כָּל־חַיָּ֖ה אֶדְרְשֶׁ֑נּוּ וּמִיַּ֣ד הָֽאָדָ֗ם מִיַּד֙ אִ֣ישׁ אָחִ֔יו אֶדְרֹ֖שׁ אֶת־נֶ֥פֶשׁ הָֽאָדָֽם׃

‎6 ‏שֹׁפֵךְ֙ דַּ֣ם הָֽאָדָ֔ם בָּֽאָדָ֖ם דָּמ֣וֹ יִשָּׁפֵ֑ךְ כִּ֚י בְּצֶ֣לֶם אֱלֹהִ֔ים עָשָׂ֖ה אֶת־הָאָדָֽם׃

‎7 ‏וְאַתֶּ֖ם פְּר֣וּ וּרְב֑וּ שִׁרְצ֥וּ בָאָ֖רֶץ וּרְבוּ־בָֽהּ׃ ס

‎8 ‏וַיֹּ֤אמֶר אֱלֹהִים֙ אֶל־נֹ֔חַ וְאֶל־בָּנָ֥יו אִתּ֖וֹ לֵאמֹֽר׃

‎9 ‏וַאֲנִ֕י הִנְנִ֥י מֵקִ֛ים אֶת־בְּרִיתִ֖י אִתְּכֶ֑ם וְאֶֽת־זַרְעֲכֶ֖ם אַֽחֲרֵיכֶֽם׃

‎10 ‏וְאֵ֨ת כָּל־נֶ֤פֶשׁ הַֽחַיָּה֙ אֲשֶׁ֣ר אִתְּכֶ֔ם בָּע֧וֹף בַּבְּהֵמָ֛ה וּֽבְכָל־חַיַּ֥ת הָאָ֖רֶץ אִתְּכֶ֑ם מִכֹּל֙ יֹצְאֵ֣י הַתֵּבָ֔ה לְכֹ֖ל חַיַּ֥ת הָאָֽרֶץ׃

‎11 ‏וַהֲקִמֹתִ֤י אֶת־בְּרִיתִי֙ אִתְּכֶ֔ם וְלֹֽא־יִכָּרֵ֧ת כָּל־בָּשָׂ֛ר ע֖וֹד מִמֵּ֣י הַמַּבּ֑וּל וְלֹֽא־יִהְיֶ֥ה ע֛וֹד מַבּ֖וּל לְשַׁחֵ֥ת הָאָֽרֶץ׃

‎12 ‏וַיֹּ֣אמֶר אֱלֹהִ֗ים זֹ֤את אֽוֹת־הַבְּרִית֙ אֲשֶׁר־אֲנִ֣י נֹתֵ֗ן בֵּינִי֙ וּבֵ֣ינֵיכֶ֔ם וּבֵ֛ין כָּל־נֶ֥פֶשׁ חַיָּ֖ה אֲשֶׁ֣ר אִתְּכֶ֑ם לְדֹרֹ֖ת עוֹלָֽם׃

‎13 ‏אֶת־קַשְׁתִּ֕י נָתַ֖תִּי בֶּֽעָנָ֑ן וְהָֽיְתָה֙ לְא֣וֹת בְּרִ֔ית בֵּינִ֖י וּבֵ֥ין הָאָֽרֶץ׃

‎14 ‏וְהָיָ֕ה בְּעַֽנְנִ֥י עָנָ֖ן עַל־הָאָ֑רֶץ וְנִרְאֲתָ֥ה הַקֶּ֖שֶׁת בֶּעָנָֽן׃

‎15 ‏וְזָכַרְתִּ֣י אֶת־בְּרִיתִ֗י אֲשֶׁ֤ר בֵּינִי֙ וּבֵ֣ינֵיכֶ֔ם וּבֵ֛ין כָּל־נֶ֥פֶשׁ חַיָּ֖ה בְּכָל־בָּשָׂ֑ר וְלֹֽא־יִֽהְיֶ֨ה ע֤וֹד הַמַּ֙יִם֙ לְמַבּ֔וּל לְשַׁחֵ֖ת כָּל־בָּשָֽׂר׃

‎16 ‏וְהָיְתָ֥ה הַקֶּ֖שֶׁת בֶּֽעָנָ֑ן וּרְאִיתִ֗יהָ לִזְכֹּר֙ בְּרִ֣ית עוֹלָ֔ם בֵּ֣ין אֱלֹהִ֔ים וּבֵין֙ כָּל־נֶ֣פֶשׁ חַיָּ֔ה בְּכָל־בָּשָׂ֖ר אֲשֶׁ֥ר עַל־הָאָֽרֶץ׃

‎17 ‏וַיֹּ֥אמֶר אֱלֹהִ֖ים אֶל־נֹ֑חַ זֹ֤את אֽוֹת־הַבְּרִית֙ אֲשֶׁ֣ר הֲקִמֹ֔תִי בֵּינִ֕י וּבֵ֥ין כָּל־בָּשָׂ֖ר אֲשֶׁ֥ר עַל־הָאָֽרֶץ׃ פ

‎18 ‏וַיִּֽהְי֣וּ בְנֵי־נֹ֗חַ הַיֹּֽצְאִים֙ מִן־הַתֵּבָ֔ה שֵׁ֖ם וְחָ֣ם וָיָ֑פֶת וְחָ֕ם ה֖וּא אֲבִ֥י כְנָֽעַן׃

‎19 ‏שְׁלֹשָׁ֥ה אֵ֖לֶּה בְּנֵי־נֹ֑חַ וּמֵאֵ֖לֶּה נָֽפְצָ֥ה כָל־הָאָֽרֶץ׃

‎20 ‏וַיָּ֥חֶל נֹ֖חַ אִ֣ישׁ הָֽאֲדָמָ֑ה וַיִּטַּ֖ע כָּֽרֶם׃

‎21 ‏וַיֵּ֥שְׁתְּ מִן־הַיַּ֖יִן וַיִּשְׁכָּ֑ר וַיִּתְגַּ֖ל בְּת֥וֹךְ אָהֳלֹֽה׃^q

‎22 ‏וַיַּ֗רְא חָ֚ם אֲבִ֣י כְנַ֔עַן אֵ֖ת עֶרְוַ֣ת אָבִ֑יו וַיַּגֵּ֥ד לִשְׁנֵֽי־אֶחָ֖יו בַּחֽוּץ׃

‎23 ‏וַיִּקַּח֩ שֵׁ֨ם וָיֶ֜פֶת אֶת־הַשִּׂמְלָ֗ה וַיָּשִׂ֙ימוּ֙³ עַל־שְׁכֶ֣ם שְׁנֵיהֶ֔ם וַיֵּֽלְכוּ֙ אֲחֹ֣רַנִּ֔ית וַיְכַסּ֕וּ אֵ֖ת עֶרְוַ֣ת אֲבִיהֶ֑ם וּפְנֵיהֶם֙ אֲחֹ֣רַנִּ֔ית וְעֶרְוַ֥ת אֲבִיהֶ֖ם לֹ֥א רָאֽוּ׃

‎24 ‏וַיִּ֥יקֶץ נֹ֖חַ מִיֵּינ֑וֹ וַיֵּ֕דַע אֵ֛ת אֲשֶׁר־עָ֥שָׂה־ל֖וֹ בְּנ֥וֹ הַקָּטָֽן׃

‎25 ‏וַיֹּ֖אמֶר אָר֣וּר כְּנָ֑עַן עֶ֥בֶד עֲבָדִ֖ים יִֽהְיֶ֥ה לְאֶחָֽיו׃

‎26 ‏וַיֹּ֕אמֶר בָּר֥וּךְ יְהוָֹ֖ה אֱלֹ֣הֵי שֵׁ֑ם וִיהִ֥י כְנַ֖עַן עֶ֥בֶד לָֽמוֹ׃

‎27 ‏יַ֤פְתְּ אֱלֹהִים֙ לְיֶ֔פֶת וְיִשְׁכֹּ֖ן בְּאָֽהֳלֵי־שֵׁ֑ם וִיהִ֥י כְנַ֖עַן עֶ֥בֶד לָֽמוֹ׃

‎28 ‏וַֽיְחִי־נֹ֖חַ אַחַ֣ר הַמַּבּ֑וּל שְׁלֹ֤שׁ מֵאוֹת֙ שָׁנָ֔ה וַֽחֲמִשִּׁ֖ים שָׁנָֽה׃

‎29 ‏וַיִּֽהְיוּ֙ כָּל־יְמֵי־נֹ֔חַ תְּשַׁ֤ע מֵאוֹת֙ שָׁנָ֔ה וַחֲמִשִּׁ֖ים שָׁנָ֑ה וַיָּמֹֽת׃ פ

1 wayəḇāreḵə ’ĕlōhîm ’eṯ-nōḥa wə’eṯ-bānāyw wayyō’mer lâem pərû ûrəḇû ûmilə’û ’eṯ-hā’āreṣ:

2 ûmwōra’ăḵem wəḥitəḵem yihəyeh ‘al kāl-ḥayyaṯ hā’āreṣ wə‘al kāl-‘wōf haššāmāyim bəḵōl ’ăšer tirəmōś hā’ăḏāmâ ûḇəḵāl-dəḡê hayyām bəyeḏəḵem nitānû:

3 kāl-remeś ’ăšer hû’-ḥay lāḵem yihəyeh lə’āḵəlâ kəyereq ‘ēśeḇ nāṯatî lāḵem ’eṯ-kōl:

4 ’aḵə-bāśār bənafəšwō ḏāmwō lō’ ṯō’ḵēlû:

5 wə’aḵə ’eṯ-diməḵem lənafəšōṯêḵem ’eḏərōš mîyaḏ kāl-ḥayyâ ’eḏərəšennû ûmîyaḏ hā’āḏām mîyaḏ ’îš ’āḥîw ’eḏərōš ’eṯ-nefeš hā’āḏām:

6 šōfēḵə dam hā’āḏām bā’āḏām dāmwō yiššāfēḵə kî bəṣelem ’ĕlōhîm ‘āśâ ’eṯ-hā’āḏām:

7 wə’atem pərû ûrəḇû širəṣû ḇā’āreṣ ûrəḇû-ḇāh: s

8 wayyō’mer ’ĕlōhîm ’el-nōḥa wə’el-bānāyw ’itwō lē’mōr:

9 wa’ănî hinənî mēqîm ’eṯ-bərîṯî ’itəḵem wə’eṯ-zarə‘ăḵem ’^aḥărêḵem:

10 wə’ēṯ kāl-nefeš h^aḥayyâ ’ăšer ’itəḵem bā‘wōf babəhēmâ ûḇəḵāl-ḥayyaṯ hā’āreṣ ’itəḵem mikōl yōṣə’ê hatēḇâ ləḵōl ḥayyaṯ hā’āreṣ:

11 wahăqimōṯî ’eṯ-bərîṯî ’itəḵem wəlō’-yikārēṯ kāl-bāśār ‘wōḏ mimmê hammabûl wəlō’-yihəyeh ‘wōḏ mabûl ləš^aḥēṯ hā’āreṣ:

12 wayyō’mer ’ĕlōhîm zō’ṯ ’wōṯ-habərîṯ ’ăšer-’ănî nōṯēn bênî ûḇênêḵem ûḇên kāl-nefeš ḥayyâ ’ăšer ’itəḵem ləḏōrōṯ ‘wōlām:

13 ’eṯ-qašətî nāṯatî be‘ānān wəhāyəṯâ lə’wōṯ bərîṯ bênî ûḇên hā’āreṣ:

14 wəhāyâ bə‘anənî ‘ānān ‘al-hā’āreṣ wənirə’ăṯâ haqqešeṯ be‘ānān:

15 wəzāḵarətî ’eṯ-bərîṯî ’ăšer bênî ûḇênêḵem ûḇên kāl-nefeš ḥayyâ bəḵāl-bāśār wəlō’-yihəyeh ‘wōḏ hammayim ləmabûl ləš^aḥēṯ kāl-bāśār:

16 wəhāyəṯâ haqqešeṯ be‘ānān ûrə’îṯîhā lizəkōr bərîṯ ‘wōlām bên ’ĕlōhîm ûḇên kāl-nefeš ḥayyâ bəḵāl-bāśār ’ăšer ‘al-hā’āreṣ:

17 wayyō’mer ’ĕlōhîm ’el-nōḥa zō’ṯ ’wōṯ-habərîṯ ’ăšer hăqimōṯî bênî ûḇên kāl-bāśār ’ăšer ‘al-hā’āreṣ: f

18 wayyihəyû ḇənê-nōḥa hayyōṣə’îm min-hatēḇâ šēm wəḥām wāyāfeṯ wəḥām hû’ ’ăḇî ḵənā‘an:

19 šəlōšâ ’ēlleh bənê-nōḥa ûmē’ēlleh nāfəṣâ ḵāl-hā’āreṣ:

20 wayyāḥel nōḥa ’îš hā’ăḏāmâ wayyiṭṭ^a‘ kārem:

21 wayyēšətə min-hayyayin wayyišəkār wayyiṯəgal bəṯwōḵə ’âŏlōh:^q

22 wayyarə’ ḥām ’ăḇî ḵən^a‘an ’ēṯ ‘erəwaṯ ’āḇîw wayyagēḏ lišənê-’eḥāyw b^aḥûṣ:

23 wayyiqq^aḥ šēm wāyefeṯ ’eṯ-haśśiməlâ wayyāśîmû³ ‘al-šəḵem šənêhem wayyēləḵû ’ăḥōrannîṯ wayəḵassû ’ēṯ ‘erəwaṯ ’ăḇîhem ûfənêhem ’ăḥōrannîṯ wə‘erəwaṯ ’ăḇîhem lō’ rā’û:

24 wayyîqeṣ nōḥa mîyênwō wayyēḏ^a‘ ’ēṯ ’ăšer-‘āśâ-lwō bənwō haqqāṭān:

25 wayyō’mer ’ārûr kənā‘an ‘eḇeḏ ‘ăḇāḏîm yihəyeh lə’eḥāyw:

26 wayyō’mer bārûḵə yəhwōâ ’ĕlōhê šēm wîhî ḵən^a‘an ‘eḇeḏ lāmwō:

27 yafətə ’ĕlōhîm ləyefeṯ wəyišəkōn bə’âŏlê-šēm wîhî ḵən^a‘an ‘eḇeḏ lāmwō:

28 wayəḥî-nōḥa ’^aḥar hammabûl šəlōš mē’wōṯ šānâ w^aḥămiššîm šānâ:

29 wayyihəyû kāl-yəmê-nōḥa təš^a‘ mē’wōṯ šānâ w^aḥămiššîm šānâ wayyāmōṯ: f