Hosea (Hoshea) Chapter 8

‎1 ‏אֶל־חִכְּךָ֣ שֹׁפָ֔ר כַּנֶּ֖שֶׁר עַל־בֵּ֣ית יְהוָ֑ה יַ֚עַן עָבְר֣וּ בְרִיתִ֔י וְעַל־תּוֹרָתִ֖י פָּשָֽׁעוּ׃

‎2 ‏לִ֖י יִזְעָ֑קוּ אֱלֹהַ֥י יְֽדַעֲנ֖וּךָ יִשְׂרָאֵֽל׃

‎3 ‏זָנַ֥ח יִשְׂרָאֵ֖ל ט֑וֹב אוֹיֵ֖ב יִרְדְּֽפוֹ׃¹

‎4 ‏הֵ֤ם הִמְלִיכוּ֙ וְלֹ֣א מִמֶּ֔נִּי הֵשִׂ֖ירוּ וְלֹ֣א יָדָ֑עְתִּי כַּסְפָּ֣ם וּזְהָבָ֗ם עָשׂ֤וּ לָהֶם֙ עֲצַבִּ֔ים לְמַ֖עַן יִכָּרֵֽת׃

‎5 ‏זָנַח֙ עֶגְלֵ֣ךְ שֹֽׁמְר֔וֹן חָרָ֥ה אַפִּ֖י בָּ֑ם עַד־מָתַ֕י לֹ֥א יוּכְל֖וּ נִקָּיֹֽן׃

‎6 ‏כִּ֤י מִיִּשְׂרָאֵל֙ וְה֔וּא חָרָ֣שׁ עָשָׂ֔הוּ וְלֹ֥א אֱלֹהִ֖ים ה֑וּא כִּֽי־שְׁבָבִ֣ים יִֽהְיֶ֔ה עֵ֖גֶל שֹׁמְרֽוֹן׃

‎7 ‏כִּ֛י ר֥וּחַ יִזְרָ֖עוּ וְסוּפָ֣תָה יִקְצֹ֑רוּ קָמָ֣ה אֵֽין־ל֗וֹ צֶ֚מַח בְּלִ֣י יַֽעֲשֶׂה־קֶּ֔מַח אוּלַ֣י יַֽעֲשֶׂ֔ה זָרִ֖ים יִבְלָעֻֽהוּ׃

‎8 ‏נִבְלַ֖ע יִשְׂרָאֵ֑ל עַתָּה֙ הָי֣וּ בַגּוֹיִ֔ם כִּכְלִ֖י אֵֽין־חֵ֥פֶץ בּֽוֹ׃

‎9 ‏כִּֽי־הֵ֙מָּה֙ עָל֣וּ אַשּׁ֔וּר פֶּ֖רֶא בּוֹדֵ֣ד ל֑וֹ אֶפְרַ֖יִם הִתְנ֥וּ אֲהָבִֽים׃

‎10 ‏גַּ֛ם כִּֽי־יִתְנ֥וּ בַגּוֹיִ֖ם עַתָּ֣ה אֲקַבְּצֵ֑ם וַיָּחֵ֣לּוּ מְּעָ֔ט מִמַּשָּׂ֖א מֶ֥לֶךְ שָׂרִֽים׃

‎11 ‏כִּֽי־הִרְבָּ֥ה אֶפְרַ֛יִם מִזְבְּחֹ֖ת לַחֲטֹ֑א הָיוּ־ל֥וֹ מִזְבְּח֖וֹת לַחֲטֹֽא׃

‎12 ‏אכתוב־ אֶ֨כְתָּב־ ל֔וֹ רבו רֻבֵּ֖י תּֽוֹרָתִ֑י כְּמוֹ־זָ֖ר נֶחְשָֽׁבוּ׃

‎13 ‏זִבְחֵ֣י הַבְהָבַ֗י יִזְבְּח֤וּ בָשָׂר֙ וַיֹּאכֵ֔לוּ יְהוָ֖ה לֹ֣א רָצָ֑ם עַתָּ֞ה יִזְכֹּ֤ר עֲוֹנָם֙ וְיִפְקֹ֣ד חַטֹּאותָ֔ם הֵ֖מָּה מִצְרַ֥יִם יָשֽׁוּבוּ׃

‎14 ‏וַיִּשְׁכַּ֨ח יִשְׂרָאֵ֜ל אֶת־עֹשֵׂ֗הוּ וַיִּ֙בֶן֙ הֵֽיכָל֔וֹת וִֽיהוּדָ֕ה הִרְבָּ֖ה עָרִ֣ים בְּצֻר֑וֹת וְשִׁלַּחְתִּי־אֵ֣שׁ בְּעָרָ֔יו וְאָכְלָ֖ה אַרְמְנֹתֶֽיהָ׃ ס

1 ’el-ḥikəḵā šōfār kannešer ‘al-bêṯ yəhwâ y^a‘an ‘āḇərû ḇərîṯî wə‘al-twōrāṯî pāšā‘û:

2 lî yizə‘āqû ’ĕlōhay yəḏ^a‘ănûḵā yiśərā’ēl:

3 zān^aḥ yiśərā’ēl ṭwōḇ ’wōyēḇ yirədəfwō:¹

4 hēm himəlîḵû wəlō’ mimmennî hēśîrû wəlō’ yāḏā‘ətî kasəpām ûzəhāḇām ‘āśû lâem ‘ăṣabîm ləm^a‘an yikārēṯ:

5 zān^aḥ ‘eḡəlēḵə šōmərwōn ḥārâ ’apî bām ‘aḏ-māṯay lō’ yûḵəlû niqqāyōn:

6 kî mîyiśərā’ēl wəhû’ ḥārāš ‘āśâû wəlō’ ’ĕlōhîm hû’ kî-šəḇāḇîm yihəyeh ‘ēḡel šōmərwōn:

7 kî rûḥa yizərā‘û wəsûfāṯâ yiqəṣōrû qāmâ ’ên-lwō ṣem^aḥ bəlî y^a‘ăśeh-qqem^aḥ ’ûlay y^a‘ăśeh zārîm yiḇəlā‘uhû:

8 niḇəl^a‘ yiśərā’ēl ‘atâ hāyû ḇagwōyim kiḵəlî ’ên-ḥēfeṣ bwō:

9 kî-hēmmâ ‘ālû ’aššûr pere’ bwōḏēḏ lwō ’efərayim hiṯənû ’ăhāḇîm:

10 gam kî-yiṯənû ḇagwōyim ‘atâ ’ăqabəṣēm wayyāḥēllû mmə‘āṭ mimmaśśā’ meleḵə śārîm:

11 kî-hirəbâ ’efərayim mizəbəḥōṯ l^aḥăṭō’ hāyû-lwō mizəbəḥwōṯ l^aḥăṭō’:

12 ’eḵətwōḇ- ’eḵətāḇ- lwō ribwō rubê twōrāṯî kəmwō-zār neḥəšāḇû:

13 ziḇəḥê haḇəhāḇay yizəbəḥû ḇāśār wayyō’ḵēlû yəhwâ lō’ rāṣām ‘atâ yizəkōr ‘ăwōnām wəyifəqōḏ ḥaṭṭō’wṯām hēmmâ miṣərayim yāšûḇû:

14 wayyišək^aḥ yiśərā’ēl ’eṯ-‘ōśēhû wayyiḇen hêḵālwōṯ wîhûḏâ hirəbâ ‘ārîm bəṣurwōṯ wəšill^aḥətî-’ēš bə‘ārāyw wə’āḵəlâ ’arəmənōṯeyhā: s