Isaiah (Yisheyah) Chapter 13

‎1 ‏מַשָּׂ֖א בָּבֶ֑ל אֲשֶׁ֣ר חָזָ֔ה יְשַׁעְיָ֖הוּ בֶּן־אָמֽוֹץ׃

‎2 ‏עַ֤ל הַר־נִשְׁפֶּה֙ שְֽׂאוּ־נֵ֔ס הָרִ֥ימוּ ק֖וֹל לָהֶ֑ם הָנִ֣יפוּ יָ֔ד וְיָבֹ֖אוּ פִּתְחֵ֥י נְדִיבִֽים׃

‎3 ‏אֲנִ֥י צִוֵּ֖יתִי לִמְקֻדָּשָׁ֑י גַּ֣ם קָרָ֤אתִי גִבּוֹרַי֙ לְאַפִּ֔י עַלִּיזֵ֖י גַּאֲוָתִֽי׃

‎4 ‏ק֥וֹל הָמ֛וֹן בֶּֽהָרִ֖ים דְּמ֣וּת עַם־רָ֑ב ק֠וֹל שְׁא֞וֹן מַמְלְכ֤וֹת גּוֹיִם֙ נֶֽאֱסָפִ֔ים יְהוָ֣ה צְבָא֔וֹת מְפַקֵּ֖ד צְבָ֥א מִלְחָמָֽה׃

‎5 ‏בָּאִ֛ים מֵאֶ֥רֶץ מֶרְחָ֖ק מִקְצֵ֣ה הַשָּׁמָ֑יִם יְהוָה֙ וּכְלֵ֣י זַעְמ֔וֹ לְחַבֵּ֖ל כָּל־הָאָֽרֶץ׃

‎6 ‏הֵילִ֕ילוּ כִּ֥י קָר֖וֹב י֣וֹם יְהוָ֑ה כְּשֹׁ֖ד מִשַּׁדַּ֥י יָבֽוֹא׃

‎7 ‏עַל־כֵּ֖ן כָּל־יָדַ֣יִם תִּרְפֶּ֑ינָה וְכָל־לְבַ֥ב אֱנ֖וֹשׁ יִמָּֽס׃³

‎8 ‏וְֽנִבְהָ֓לוּ׀ צִירִ֤ים וַֽחֲבָלִים֙ יֹֽאחֵז֔וּן כַּיּוֹלֵדָ֖ה יְחִיל֑וּן אִ֤ישׁ אֶל־רֵעֵ֙הוּ֙ יִתְמָ֔הוּ פְּנֵ֥י לְהָבִ֖ים פְּנֵיהֶֽם׃

‎9 ‏הִנֵּ֤ה יוֹם־יְהוָה֙ בָּ֔א אַכְזָרִ֥י וְעֶבְרָ֖ה וַחֲר֣וֹן אָ֑ף לָשׂ֤וּם הָאָ֙רֶץ֙ לְשַׁמָּ֔ה וְחַטָּאֶ֖יהָ יַשְׁמִ֥יד מִמֶּֽנָּה׃

‎10 ‏כִּֽי־כוֹכְבֵ֤י הַשָּׁמַ֙יִם֙ וּכְסִ֣ילֵיהֶ֔ם לֹ֥א יָהֵ֖לּוּ אוֹרָ֑ם חָשַׁ֤ךְ הַשֶּׁ֙מֶשׁ֙ בְּצֵאת֔וֹ וְיָרֵ֖חַ לֹֽא־יַגִּ֥יהַ אוֹרֽוֹ׃

‎11 ‏וּפָקַדְתִּ֤י עַל־תֵּבֵל֙ רָעָ֔ה וְעַל־רְשָׁעִ֖ים עֲוֹנָ֑ם וְהִשְׁבַּתִּי֙ גְּא֣וֹן זֵדִ֔ים וְגַאֲוַ֥ת עָרִיצִ֖ים אַשְׁפִּֽיל׃

‎12 ‏אוֹקִ֥יר אֱנ֖וֹשׁ מִפָּ֑ז וְאָדָ֖ם מִכֶּ֥תֶם אוֹפִֽיר׃

‎13 ‏עַל־כֵּן֙ שָׁמַ֣יִם אַרְגִּ֔יז וְתִרְעַ֥שׁ הָאָ֖רֶץ מִמְּקוֹמָ֑הּ בְּעֶבְרַת֙ יְהוָ֣ה צְבָא֔וֹת וּבְי֖וֹם חֲר֥וֹן אַפּֽוֹ׃

‎14 ‏וְהָיָה֙ כִּצְבִ֣י מֻדָּ֔ח וּכְצֹ֖אן וְאֵ֣ין מְקַבֵּ֑ץ אִ֤ישׁ אֶל־עַמּוֹ֙ יִפְנ֔וּ וְאִ֥ישׁ אֶל־אַרְצ֖וֹ יָנֽוּסוּ׃

‎15 ‏כָּל־הַנִּמְצָ֖א יִדָּקֵ֑ר וְכָל־הַנִּסְפֶּ֖ה יִפּ֥וֹל בֶּחָֽרֶב׃

‎16 ‏וְעֹלְלֵיהֶ֥ם יְרֻטְּשׁ֖וּ לְעֵֽינֵיהֶ֑ם יִשַּׁ֙סּוּ֙ בָּֽתֵּיהֶ֔ם וּנְשֵׁיהֶ֖ם תשגלנה תִּשָּׁכַֽבְנָה׃

‎17 ‏הִנְנִ֛י מֵעִ֥יר עֲלֵיהֶ֖ם אֶת־מָדָ֑י אֲשֶׁר־כֶּ֙סֶף֙ לֹ֣א יַחְשֹׁ֔בוּ וְזָהָ֖ב לֹ֥א יַחְפְּצוּ־בֽוֹ׃

‎18 ‏וּקְשָׁת֖וֹת נְעָרִ֣ים תְּרַטַּ֑שְׁנָה וּפְרִי־בֶ֙טֶן֙ לֹ֣א יְרַחֵ֔מוּ עַל־בָּנִ֖ים לֹֽא־תָח֥וּס עֵינָֽם׃

‎19 ‏וְהָיְתָ֤ה בָבֶל֙ צְבִ֣י מַמְלָכ֔וֹת תִּפְאֶ֖רֶת גְּא֣וֹן כַּשְׂדִּ֑ים כְּמַהְפֵּכַ֣ת אֱלֹהִ֔ים אֶת־סְדֹ֖ם וְאֶת־עֲמֹרָֽה׃

‎20 ‏לֹֽא־תֵשֵׁ֣ב לָנֶ֔צַח וְלֹ֥א תִשְׁכֹּ֖ן עַד־דּ֣וֹר וָד֑וֹר וְלֹֽא־יַהֵ֥ל שָׁם֙ עֲרָבִ֔י וְרֹעִ֖ים לֹא־יַרְבִּ֥צוּ שָֽׁם׃

‎21 ‏וְרָבְצוּ־שָׁ֣ם צִיִּ֔ים וּמָלְא֥וּ בָתֵּיהֶ֖ם אֹחִ֑ים וְשָׁ֤כְנוּ שָׁם֙ בְּנ֣וֹת יַֽעֲנָ֔ה וּשְׂעִירִ֖ים יְרַקְּדוּ־שָֽׁם׃

‎22 ‏וְעָנָ֤ה אִיִּים֙ בְּאַלְמנוֹתָ֔יו¹ וְתַנִּ֖ים בְּהֵ֣יכְלֵי עֹ֑נֶג וְקָר֤וֹב לָבוֹא֙ עִתָּ֔הּ וְיָמֶ֖יהָ לֹ֥א יִמָּשֵֽׁכוּ׃

1 maśśā’ bāḇel ’ăšer ḥāzâ yəš^a‘əyâû ben-’āmwōṣ:

2 ‘al har-nišəpeh śə’û-nēs hārîmû qwōl lâem hānîfû yāḏ wəyāḇō’û piṯəḥê nəḏîḇîm:

3 ’ănî ṣiûêṯî liməqudāšāy gam qārā’ṯî ḡibwōray lə’apî ‘allîzê ga’ăwāṯî:

4 qwōl hāmwōn behārîm dəmûṯ ‘am-rāḇ qwōl šə’wōn mamələḵwōṯ gwōyim ne’ĕsāfîm yəhwâ ṣəḇā’wōṯ məfaqqēḏ ṣəḇā’ miləḥāmâ:

5 bā’îm mē’ereṣ merəḥāq miqəṣēh haššāmāyim yəhwâ ûḵəlê z^a‘əmwō ləḥabēl kāl-hā’āreṣ:

6 hêlîlû kî qārwōḇ ywōm yəhwâ kəšōḏ miššaday yāḇwō’:

7 ‘al-kēn kāl-yāḏayim tirəpeynâ wəḵāl-ləḇaḇ ’ĕnwōš yimmās:³

8 wəniḇəhālû| ṣîrîm w^aḥăḇālîm yō’ḥēzûn kayywōlēḏâ yəḥîlûn ’îš ’el-rē‘ēhû yiṯəmâû pənê ləhāḇîm pənêhem:

9 hinnēh ywōm-yəhwâ bā’ ’aḵəzārî wə‘eḇərâ w^aḥărwōn ’āf lāśûm hā’āreṣ ləšammâ wəḥaṭṭā’eyhā yašəmîḏ mimmennâ:

10 kî-ḵwōḵəḇê haššāmayim ûḵəsîlêhem lō’ yâēllû ’wōrām ḥāšaḵə haššemeš bəṣē’ṯwō wəyārēḥa lō’-yagîha ’wōrwō:

11 ûfāqaḏətî ‘al-tēḇēl rā‘â wə‘al-rəšā‘îm ‘ăwōnām wəhišəbatî gə’wōn zēḏîm wəḡa’ăwaṯ ‘ārîṣîm ’ašəpîl:

12 ’wōqîr ’ĕnwōš mipāz wə’āḏām mikeṯem ’wōfîr:

13 ‘al-kēn šāmayim ’arəgîz wəṯirə‘aš hā’āreṣ mimməqwōmāh bə‘eḇəraṯ yəhwâ ṣəḇā’wōṯ ûḇəywōm ḥărwōn ’apwō:

14 wəhāyâ kiṣəḇî mudāḥ ûḵəṣō’n wə’ên məqabēṣ ’îš ’el-‘ammwō yifənû wə’îš ’el-’arəṣwō yānûsû:

15 kāl-hanniməṣā’ yidāqēr wəḵāl-hannisəpeh yipwōl beḥāreḇ:

16 wə‘ōləlêhem yəruṭṭəšû lə‘ênêhem yiššassû bātêhem ûnəšêhem tiššāḡalənâ tiššāḵaḇənâ:

17 hinənî mē‘îr ‘ălêhem ’eṯ-māḏāy ’ăšer-kesef lō’ y^aḥəšōḇû wəzâāḇ lō’ y^aḥəpəṣû-ḇwō:

18 ûqəšāṯwōṯ nə‘ārîm təraṭṭašənâ ûfərî-ḇeṭen lō’ yər^aḥēmû ‘al-bānîm lō’-ṯāḥûs ‘ênām:

19 wəhāyəṯâ ḇāḇel ṣəḇî maməlāḵwōṯ tifə’ereṯ gə’wōn kaśədîm kəmahəpēḵaṯ ’ĕlōhîm ’eṯ-səḏōm wə’eṯ-‘ămōrâ:

20 lō’-ṯēšēḇ lāneṣ^aḥ wəlō’ ṯišəkōn ‘aḏ-dwōr wāḏwōr wəlō’-yahēl šām ‘ărāḇî wərō‘îm lō’-yarəbiṣû šām:

21 wərāḇəṣû-šām ṣîyîm ûmālə’û ḇātêhem ’ōḥîm wəšāḵənû šām bənwōṯ y^a‘ănâ ûśə‘îrîm yəraqqəḏû-šām:

22 wə‘ānâ ’îyîm bə’aləmnwōṯāyw¹ wəṯannîm bəhêḵəlê ‘ōneḡ wəqārwōḇ lāḇwō’ ‘itāh wəyāmeyhā lō’ yimmāšēḵû: