Isaiah (Yisheyah) Chapter 14

‎1 ‏כִּי֩ יְרַחֵ֨ם יְהוָ֜ה אֶֽת־יַעֲקֹ֗ב וּבָחַ֥ר עוֹד֙ בְּיִשְׂרָאֵ֔ל וְהִנִּיחָ֖ם עַל־אַדְמָתָ֑ם וְנִלְוָ֤ה הַגֵּר֙ עֲלֵיהֶ֔ם וְנִסְפְּח֖וּ עַל־בֵּ֥ית יַעֲקֹֽב׃

‎2 ‏וּלְקָח֣וּם עַמִּים֮ וֶהֱבִיא֣וּם אֶל־מְקוֹמָם֒ וְהִֽתְנַחֲל֣וּם בֵּֽית־יִשְׂרָאֵ֗ל עַ֚ל אַדְמַ֣ת יְהוָ֔ה לַעֲבָדִ֖ים וְלִשְׁפָח֑וֹת וְהָיוּ֙ שֹׁבִ֣ים לְשֹֽׁבֵיהֶ֔ם וְרָד֖וּ בְּנֹגְשֵׂיהֶֽם׃ ס

‎3 ‏וְהָיָ֗ה בְּי֨וֹם הָנִ֤יחַ יְהוָה֙ לְךָ֔ מֵֽעָצְבְּךָ֖ וּמֵרָגְזֶ֑ךָ וּמִן־הָעֲבֹדָ֥ה הַקָּשָׁ֖ה אֲשֶׁ֥ר עֻבַּד־בָּֽךְ׃

‎4 ‏וְנָשָׂ֜אתָ הַמָּשָׁ֥ל הַזֶּ֛ה עַל־מֶ֥לֶךְ בָּבֶ֖ל וְאָמָ֑רְתָּ אֵ֚יךְ שָׁבַ֣ת נֹגֵ֔שׂ שָׁבְתָ֖ה מַדְהֵבָֽה׃

‎5 ‏שָׁבַ֥ר יְהוָ֖ה מַטֵּ֣ה רְשָׁעִ֑ים שֵׁ֖בֶט מֹשְׁלִֽים׃

‎6 ‏מַכֶּ֤ה עַמִּים֙ בְּעֶבְרָ֔ה מַכַּ֖ת בִּלְתִּ֣י סָרָ֑ה רֹדֶ֤ה בָאַף֙ גּוֹיִ֔ם מֻרְדָּ֖ף בְּלִ֥י חָשָֽׂךְ׃

‎7 ‏נָ֥חָה שָׁקְטָ֖ה כָּל־הָאָ֑רֶץ פָּצְח֖וּ רִנָּֽה׃

‎8 ‏גַּם־בְּרוֹשִׁ֛ים שָׂמְח֥וּ לְךָ֖ אַרְזֵ֣י לְבָנ֑וֹן³ מֵאָ֣ז שָׁכַ֔בְתָּ לֹֽא־יַעֲלֶ֥ה הַכֹּרֵ֖ת עָלֵֽינוּ׃

‎9 ‏שְׁא֗וֹל מִתַּ֛חַת רָגְזָ֥ה לְךָ֖ לִקְרַ֣את בּוֹאֶ֑ךָ עוֹרֵ֨ר לְךָ֤ רְפָאִים֙ כָּל־עַתּ֣וּדֵי אָ֔רֶץ הֵקִים֙ מִכִּסְאוֹתָ֔ם כֹּ֖ל מַלְכֵ֥י גוֹיִֽם׃

‎10 ‏כֻּלָּ֣ם יַֽעֲנ֔וּ וְיֹאמְר֖וּ אֵלֶ֑יךָ גַּם־אַתָּ֛ה חֻלֵּ֥יתָ כָמ֖וֹנוּ אֵלֵ֥ינוּ נִמְשָֽׁלְתָּ׃

‎11 ‏הוּרַ֥ד שְׁא֛וֹל גְּאוֹנֶ֖ךָ הֶמְיַ֣ת נְבָלֶ֑יךָ תַּחְתֶּ֙יךָ֙ יֻצַּ֣ע רִמָּ֔ה וּמְכַסֶּ֖יךָ תּוֹלֵעָֽה׃

‎12 ‏אֵ֛יךְ נָפַ֥לְתָּ מִשָּׁמַ֖יִם הֵילֵ֣ל בֶּן־שָׁ֑חַר נִגְדַּ֣עְתָּ לָאָ֔רֶץ חוֹלֵ֖שׁ עַל־גּוֹיִֽם׃

‎13 ‏וְאַתָּ֞ה אָמַ֤רְתָּ בִֽלְבָבְךָ֙ הַשָּׁמַ֣יִם אֶֽעֱלֶ֔ה מִמַּ֥עַל לְכֽוֹכְבֵי־אֵ֖ל אָרִ֣ים כִּסְאִ֑י וְאֵשֵׁ֥ב בְּהַר־מוֹעֵ֖ד בְּיַרְכְּתֵ֥י צָפֽוֹן׃

‎14 ‏אֶעֱלֶ֖ה עַל־בָּ֣מֳתֵי עָ֑ב אֶדַּמֶּ֖ה לְעֶלְיֽוֹן׃

‎15 ‏אַ֧ךְ אֶל־שְׁא֛וֹל תּוּרָ֖ד אֶל־יַרְכְּתֵי־בֽוֹר׃

‎16 ‏רֹאֶ֙יךָ֙ אֵלֶ֣יךָ יַשְׁגִּ֔יחוּ אֵלֶ֖יךָ יִתְבּוֹנָ֑נוּ הֲזֶ֤ה הָאִישׁ֙ מַרְגִּ֣יז הָאָ֔רֶץ מַרְעִ֖ישׁ מַמְלָכֽוֹת׃

‎17 ‏שָׂ֥ם תֵּבֵ֛ל כַּמִּדְבָּ֖ר וְעָרָ֣יו הָרָ֑ס אֲסִירָ֖יו לֹא־פָ֥תַח בָּֽיְתָה׃

‎18 ‏כָּל־מַלְכֵ֥י גוֹיִ֖ם כֻּלָּ֑ם שָׁכְב֥וּ בְכָב֖וֹד אִ֥ישׁ בְּבֵיתֽוֹ׃

‎19 ‏וְאַתָּ֞ה הָשְׁלַ֤כְתָּ מִֽקִּבְרְךָ֙ כְּנֵ֣צֶר נִתְעָ֔ב לְב֥וּשׁ הֲרֻגִ֖ים מְטֹ֣עֲנֵי חָ֑רֶב יוֹרְדֵ֥י אֶל־אַבְנֵי־ב֖וֹר כְּפֶ֥גֶר מוּבָֽס׃

‎20 ‏לֹֽא־תֵחַ֤ד אִתָּם֙ בִּקְבוּרָ֔ה כִּֽי־אַרְצְךָ֥ שִׁחַ֖תָּ עַמְּךָ֣ הָרָ֑גְתָּ לֹֽא־יִקָּרֵ֥א לְעוֹלָ֖ם זֶ֥רַע מְרֵעִֽים׃

‎21 ‏הָכִ֧ינוּ לְבָנָ֛יו מַטְבֵּ֖חַ בַּעֲוֹ֣ן אֲבוֹתָ֑ם בַּל־יָקֻ֙מוּ֙ וְיָ֣רְשׁוּ אָ֔רֶץ וּמָלְא֥וּ פְנֵֽי־תֵבֵ֖ל עָרִֽים׃

‎22 ‏וְקַמְתִּ֣י עֲלֵיהֶ֔ם נְאֻ֖ם יְהוָ֣ה צְבָא֑וֹת וְהִכְרַתִּ֨י לְבָבֶ֜ל שֵׁ֥ם וּשְׁאָ֛ר וְנִ֥ין וָנֶ֖כֶד נְאֻם־יְהוָֽה׃

‎23 ‏וְשַׂמְתִּ֛יהָ לְמוֹרַ֥שׁ קִפֹּ֖ד וְאַגְמֵי־מָ֑יִם וְטֵֽאטֵאתִ֙יהָ֙ בְּמַטְאֲטֵ֣א הַשְׁמֵ֔ד נְאֻ֖ם יְהוָ֥ה צְבָאֽוֹת׃ פ

‎24 ‏נִשְׁבַּ֛ע יְהוָ֥ה צְבָא֖וֹת לֵאמֹ֑ר אִם־לֹ֞א כַּאֲשֶׁ֤ר דִּמִּ֙יתִי֙ כֵּ֣ן הָיָ֔תָה וְכַאֲשֶׁ֥ר יָעַ֖צְתִּי הִ֥יא תָקֽוּם׃

‎25 ‏לִשְׁבֹּ֤ר אַשּׁוּר֙ בְּאַרְצִ֔י וְעַל־הָרַ֖י אֲבוּסֶ֑נּוּ וְסָ֤ר מֵֽעֲלֵיהֶם֙ עֻלּ֔וֹ וְסֻ֨בֳּל֔וֹ מֵעַ֥ל שִׁכְמ֖וֹ יָסֽוּר׃

‎26 ‏זֹ֛את הָעֵצָ֥ה הַיְּעוּצָ֖ה עַל־כָּל־הָאָ֑רֶץ וְזֹ֛את הַיָּ֥ד הַנְּטוּיָ֖ה עַל־כָּל־הַגּוֹיִֽם׃

‎27 ‏כִּֽי־יְהוָ֧ה צְבָא֛וֹת יָעָ֖ץ וּמִ֣י יָפֵ֑ר וְיָד֥וֹ הַנְּטוּיָ֖ה וּמִ֥י³ יְשִׁיבֶֽנָּה׃ פ

‎28 ‏בִּשְׁנַת־מ֖וֹת הַמֶּ֣לֶךְ אָחָ֑ז הָיָ֖ה הַמַּשָּׂ֥א הַזֶּֽה׃

‎29 ‏אַֽל־תִּשְׂמְחִ֤י פְלֶ֙שֶׁת֙ כֻּלֵּ֔ךְ כִּ֥י נִשְׁבַּ֖ר שֵׁ֣בֶט מַכֵּ֑ךְ כִּֽי־מִשֹּׁ֤רֶשׁ נָחָשׁ֙ יֵ֣צֵא צֶ֔פַע וּפִרְי֖וֹ שָׂרָ֥ף מְעוֹפֵֽף׃

‎30 ‏וְרָעוּ֙ בְּכוֹרֵ֣י דַלִּ֔ים וְאֶבְיוֹנִ֖ים לָבֶ֣טַח יִרְבָּ֑צוּ וְהֵמַתִּ֤י בָֽרָעָב֙ שָׁרְשֵׁ֔ךְ וּשְׁאֵרִיתֵ֖ךְ יַהֲרֹֽג׃

‎31 ‏הֵילִ֤ילִֽי שַׁ֙עַר֙ זַֽעֲקִי־עִ֔יר נָמ֖וֹג פְּלֶ֣שֶׁת כֻּלֵּ֑ךְ כִּ֤י מִצָּפוֹן֙ עָשָׁ֣ן בָּ֔א וְאֵ֥ין בּוֹדֵ֖ד בְּמוֹעָדָֽיו׃

‎32 ‏וּמַֽה־יַּעֲנֶ֖ה מַלְאֲכֵי־ג֑וֹי כִּ֤י יְהוָה֙ יִסַּ֣ד צִיּ֔וֹן וּבָ֥הּ יֶחֱס֖וּ עֲנִיֵּ֥י עַמּֽוֹ׃ ס

1 kî yər^aḥēm yəhwâ ’eṯ-y^a‘ăqōḇ ûḇāḥar ‘wōḏ bəyiśərā’ēl wəhinnîḥām ‘al-’aḏəmāṯām wəniləwâ hagēr ‘ălêhem wənisəpəḥû ‘al-bêṯ y^a‘ăqōḇ:

2 ûləqāḥûm ‘ammîm wehĕḇî’ûm ’el-məqwōmām wəhiṯən^aḥălûm bêṯ-yiśərā’ēl ‘al ’aḏəmaṯ yəhwâ l^a‘ăḇāḏîm wəlišəfāḥwōṯ wəhāyû šōḇîm ləšōḇêhem wərāḏû bənōḡəśêhem: s

3 wəhāyâ bəywōm hānîḥa yəhwâ ləḵā mē‘āṣəbəḵā ûmērāḡəzeḵā ûmin-hā‘ăḇōḏâ haqqāšâ ’ăšer ‘ubaḏ-bāḵə:

4 wənāśā’ṯā hammāšāl hazzeh ‘al-meleḵə bāḇel wə’āmārətā ’êḵə šāḇaṯ nōḡēś šāḇəṯâ maḏəhēḇâ:

5 šāḇar yəhwâ maṭṭēh rəšā‘îm šēḇeṭ mōšəlîm:

6 makeh ‘ammîm bə‘eḇərâ makaṯ bilətî sārâ rōḏeh ḇā’af gwōyim murədāf bəlî ḥāśāḵə:

7 nāḥâ šāqəṭâ kāl-hā’āreṣ pāṣəḥû rinnâ:

8 gam-bərwōšîm śāməḥû ləḵā ’arəzê ləḇānwōn³ mē’āz šāḵaḇətā lō’-y^a‘ăleh hakōrēṯ ‘ālênû:

9 šə’wōl mit^aḥaṯ rāḡəzâ ləḵā liqəra’ṯ bwō’eḵā ‘wōrēr ləḵā rəfā’îm kāl-‘atûḏê ’āreṣ hēqîm mikisə’wōṯām kōl maləḵê ḡwōyim:

10 kullām y^a‘ănû wəyō’mərû ’ēleyḵā gam-’atâ ḥullêṯā ḵāmwōnû ’ēlênû niməšālətā:

11 hûraḏ šə’wōl gə’wōneḵā heməyaṯ nəḇāleyḵā t^aḥəteyḵā yuṣṣ^a‘ rimmâ ûməḵasseyḵā twōlē‘â:

12 ’êḵə nāfalətā miššāmayim hêlēl ben-šāḥar niḡəd^a‘ətā lā’āreṣ ḥwōlēš ‘al-gwōyim:

13 wə’atâ ’āmarətā ḇiləḇāḇəḵā haššāmayim ’e‘ĕleh mimm^a‘al ləḵwōḵəḇê-’ēl ’ārîm kisə’î wə’ēšēḇ bəhar-mwō‘ēḏ bəyarəkəṯê ṣāfwōn:

14 ’e‘ĕleh ‘al-bāmŏṯê ‘āḇ ’edammeh lə‘eləywōn:

15 ’aḵə ’el-šə’wōl tûrāḏ ’el-yarəkəṯê-ḇwōr:

16 rō’eyḵā ’ēleyḵā yašəgîḥû ’ēleyḵā yiṯəbwōnānû hăzeh hā’îš marəgîz hā’āreṣ marə‘îš maməlāḵwōṯ:

17 śām tēḇēl kammiḏəbār wə‘ārāyw hārās ’ăsîrāyw lō’-fāṯ^aḥ bāyəṯâ:

18 kāl-maləḵê ḡwōyim kullām šāḵəḇû ḇəḵāḇwōḏ ’îš bəḇêṯwō:

19 wə’atâ hāšəlaḵətā miqqiḇərəḵā kənēṣer niṯə‘āḇ ləḇûš hăruḡîm məṭō‘ănê ḥāreḇ ywōrəḏê ’el-’aḇənê-ḇwōr kəfeḡer mûḇās:

20 lō’-ṯēḥaḏ ’itām biqəḇûrâ kî-’arəṣəḵā šiḥatā ‘amməḵā hārāḡətā lō’-yiqqārē’ lə‘wōlām zer^a‘ mərē‘îm:

21 hāḵînû ləḇānāyw maṭəbēḥa b^a‘ăwōn ’ăḇwōṯām bal-yāqumû wəyārəšû ’āreṣ ûmālə’û fənê-ṯēḇēl ‘ārîm:

22 wəqamətî ‘ălêhem nə’um yəhwâ ṣəḇā’wōṯ wəhiḵəratî ləḇāḇel šēm ûšə’ār wənîn wāneḵeḏ nə’um-yəhwâ:

23 wəśamətîhā ləmwōraš qipōḏ wə’aḡəmê-māyim wəṭē’ṭē’ṯîhā bəmaṭə’ăṭē’ hašəmēḏ nə’um yəhwâ ṣəḇā’wōṯ: f

24 nišəb^a‘ yəhwâ ṣəḇā’wōṯ lē’mōr ’im-lō’ ka’ăšer dimmîṯî kēn hāyāṯâ wəḵa’ăšer yā‘aṣətî hî’ ṯāqûm:

25 lišəbōr ’aššûr bə’arəṣî wə‘al-hāray ’ăḇûsennû wəsār mē‘ălêhem ‘ullwō wəsubŏlwō mē‘al šiḵəmwō yāsûr:

26 zō’ṯ hā‘ēṣâ hayyə‘ûṣâ ‘al-kāl-hā’āreṣ wəzō’ṯ hayyāḏ hannəṭûyâ ‘al-kāl-hagwōyim:

27 kî-yəhwâ ṣəḇā’wōṯ yā‘āṣ ûmî yāfēr wəyāḏwō hannəṭûyâ ûmî³ yəšîḇennâ: f

28 bišənaṯ-mwōṯ hammeleḵə ’āḥāz hāyâ hammaśśā’ hazzeh:

29 ’al-tiśəməḥî fəlešeṯ kullēḵə kî nišəbar šēḇeṭ makēḵə kî-miššōreš nāḥāš yēṣē’ ṣef^a‘ ûfirəywō śārāf mə‘wōfēf:

30 wərā‘û bəḵwōrê ḏallîm wə’eḇəywōnîm lāḇeṭ^aḥ yirəbāṣû wəhēmatî ḇārā‘āḇ šārəšēḵə ûšə’ērîṯēḵə yahărōḡ:

31 hêlîlî š^a‘ar z^a‘ăqî-‘îr nāmwōḡ pəlešeṯ kullēḵə kî miṣṣāfwōn ‘āšān bā’ wə’ên bwōḏēḏ bəmwō‘āḏāyw:

32 ûmah-yy^a‘ăneh malə’ăḵê-ḡwōy kî yəhwâ yissaḏ ṣîywōn ûḇāh yeḥĕsû ‘ănîyê ‘ammwō: s