Isaiah (Yisheyah) Chapter 22

‎1 ‏מַשָּׂ֖א גֵּ֣יא חִזָּי֑וֹן מַה־לָּ֣ךְ אֵפ֔וֹא כִּֽי־עָלִ֥ית כֻּלָּ֖ךְ לַגַּגּֽוֹת׃

‎2 ‏תְּשֻׁא֣וֹת׀ מְלֵאָ֗ה עִ֚יר הֽוֹמִיָּ֔ה קִרְיָ֖ה עַלִּיזָ֑ה חֲלָלַ֙יִךְ֙ לֹ֣א חַלְלֵי־חֶ֔רֶב וְלֹ֖א מֵתֵ֥י מִלְחָמָֽה׃

‎3 ‏כָּל־קְצִינַ֥יִךְ נָֽדְדוּ־יַ֖חַד מִקֶּ֣שֶׁת אֻסָּ֑רוּ כָּל־נִמְצָאַ֙יִךְ֙ אֻסְּר֣וּ יַחְדָּ֔ו מֵרָח֖וֹק בָּרָֽחוּ׃

‎4 ‏עַל־כֵּ֥ן אָמַ֛רְתִּי שְׁע֥וּ מִנִּ֖י אֲמָרֵ֣ר בַּבֶּ֑כִי אַל־תָּאִ֣יצוּ לְנַֽחֲמֵ֔נִי עַל־שֹׁ֖ד בַּת־עַמִּֽי׃

‎5 ‏כִּ֣י יוֹם֩ מְהוּמָ֨ה וּמְבוּסָ֜ה וּמְבוּכָ֗ה לַֽאדֹנָ֧י יְהוִ֛ה צְבָא֖וֹת בְּגֵ֣יא חִזָּי֑וֹן מְקַרְקַ֥ר קִ֖ר וְשׁ֥וֹעַ אֶל־הָהָֽר׃

‎6 ‏וְעֵילָם֙ נָשָׂ֣א אַשְׁפָּ֔ה בְּרֶ֥כֶב אָדָ֖ם פָּֽרָשִׁ֑ים וְקִ֥יר עֵרָ֖ה מָגֵֽן׃

‎7 ‏וַיְהִ֥י מִבְחַר־עֲמָקַ֖יִךְ מָ֣לְאוּ רָ֑כֶב וְהַפָּ֣רָשִׁ֔ים שֹׁ֖ת שָׁ֥תוּ הַשָּֽׁעְרָה׃

‎8 ‏וַיְגַ֕ל אֵ֖ת מָסַ֣ךְ יְהוּדָ֑ה וַתַּבֵּט֙ בַּיּ֣וֹם הַה֔וּא אֶל־נֶ֖שֶׁק בֵּ֥ית הַיָּֽעַר׃

‎9 ‏וְאֵ֨ת בְּקִיעֵ֧י עִיר־דָּוִ֛ד רְאִיתֶ֖ם כִּי־רָ֑בּוּ וַֽתְּקַבְּצ֔וּ אֶת־מֵ֥י הַבְּרֵכָ֖ה הַתַּחְתּוֹנָֽה׃

‎10 ‏וְאֶת־בָּתֵּ֥י יְרוּשָׁלִַ֖ם סְפַרְתֶּ֑ם וַתִּתְֿצוּ֙ הַבָּ֣תִּ֔ים לְבַצֵּ֖ר הַחוֹמָֽה׃

‎11 ‏וּמִקְוָ֣ה׀ עֲשִׂיתֶ֗ם בֵּ֚ין הַחֹ֣מֹתַ֔יִם לְמֵ֖י הַבְּרֵכָ֣ה הַיְשָׁנָ֑ה וְלֹ֤א הִבַּטְתֶּם֙ אֶל־עֹשֶׂ֔יהָ וְיֹצְרָ֥הּ מֵֽרָח֖וֹק לֹ֥א רְאִיתֶֽם׃

‎12 ‏וַיִּקְרָ֗א אֲדֹנָ֧י יְהוִ֛ה צְבָא֖וֹת בַּיּ֣וֹם הַה֑וּא לִבְכִי֙ וּלְמִסְפֵּ֔ד וּלְקָרְחָ֖ה וְלַחֲגֹ֥ר שָֽׂק׃

‎13 ‏וְהִנֵּ֣ה׀ שָׂשׂ֣וֹן וְשִׂמְחָ֗ה הָרֹ֤ג׀ בָּקָר֙ וְשָׁחֹ֣ט צֹ֔אן אָכֹ֥ל בָּשָׂ֖ר וְשָׁת֣וֹת יָ֑יִן אָכ֣וֹל וְשָׁת֔וֹ כִּ֥י מָחָ֖ר נָמֽוּת׃

‎14 ‏וְנִגְלָ֥ה בְאָזְנָ֖י יְהוָ֣ה צְבָא֑וֹת אִם־יְ֠כֻפַּר הֶעָוֹן֙ הַזֶּ֤ה לָכֶם֙ עַד־תְּמֻת֔וּן אָמַ֛ר אֲדֹנָ֥י יְהוִ֖ה צְבָאֽוֹת׃ פ

‎15 ‏כֹּ֥ה אָמַ֛ר אֲדֹנָ֥י יְהוִ֖ה צְבָא֑וֹת לֶךְ־בֹּא֙ אֶל־הַסֹּכֵ֣ן הַזֶּ֔ה עַל־שֶׁבְנָ֖א אֲשֶׁ֥ר עַל־הַבָּֽיִת׃

‎16 ‏מַה־לְּךָ֥ פֹה֙ וּמִ֣י לְךָ֣ פֹ֔ה כִּֽי־חָצַ֧בְתָּ לְּךָ֛ פֹּ֖ה קָ֑בֶר חֹצְבִ֤י מָרוֹם֙ קִבְר֔וֹ חֹקְקִ֥י בַסֶּ֖לַע מִשְׁכָּ֥ן לֽוֹ׃

‎17 ‏הִנֵּ֤ה יְהוָה֙ מְטַלְטֶלְךָ֔ טַלְטֵלָ֖ה גָּ֑בֶר וְעֹטְךָ֖ עָטֹֽה׃

‎18 ‏צָנ֤וֹף יִצְנָפְךָ֙ צְנֵפָ֔ה כַּדּ֕וּר אֶל־אֶ֖רֶץ רַחֲבַ֣ת יָדָ֑יִם שָׁ֣מָּה תָמ֗וּת וְשָׁ֙מָּה֙ מַרְכְּב֣וֹת כְּבוֹדֶ֔ךָ קְל֖וֹן בֵּ֥ית אֲדֹנֶֽיךָ׃

‎19 ‏וַהֲדַפְתִּ֖יךָ מִמַּצָּבֶ֑ךָ וּמִמַּעֲמָֽדְךָ֖ יֶהֶרְסֶֽךָ׃

‎20 ‏וְהָיָ֖ה בַּיּ֣וֹם הַה֑וּא וְקָרָ֣אתִי לְעַבְדִּ֔י לְאֶלְיָקִ֖ים בֶּן־חִלְקִיָּֽהוּ׃

‎21 ‏וְהִלְבַּשְׁתִּ֣יו כֻּתָּנְתֶּ֗ךָ וְאַבְנֵֽטְךָ֙ אֲחַזְּקֶ֔נּוּ וּמֶֽמְשֶׁלְתְּךָ֖¹ אֶתֵּ֣ן בְּיָד֑וֹ וְהָיָ֥ה לְאָ֛ב לְיוֹשֵׁ֥ב יְרוּשָׁלִַ֖ם וּלְבֵ֥ית יְהוּדָֽה׃

‎22 ‏וְנָתַתִּ֛י מַפְתֵּ֥חַ בֵּית־דָּוִ֖ד עַל־שִׁכְמ֑וֹ וּפָתַח֙ וְאֵ֣ין סֹגֵ֔ר וְסָגַ֖ר וְאֵ֥ין פֹּתֵֽחַ׃

‎23 ‏וּתְקַעְתִּ֥יו יָתֵ֖ד בְּמָק֣וֹם נֶאֱמָ֑ן וְהָיָ֛ה לְכִסֵּ֥א כָב֖וֹד לְבֵ֥ית אָבִֽיו׃

‎24 ‏וְתָל֨וּ עָלָ֜יו כֹּ֣ל׀ כְּב֣וֹד בֵּית־אָבִ֗יו הַצֶּֽאֱצָאִים֙ וְהַצְּפִע֔וֹת כֹּ֖ל כְּלֵ֣י הַקָּטָ֑ן מִכְּלֵי֙ הָֽאַגָּנ֔וֹת וְעַ֖ד כָּל־כְּלֵ֥י הַנְּבָלִֽים׃

‎25 ‏בַּיּ֣וֹם הַה֗וּא נְאֻם֙ יְהוָ֣ה צְבָא֔וֹת תָּמוּשׁ֙ הַיָּתֵ֔ד הַתְּקוּעָ֖ה בְּמָק֣וֹם נֶאֱמָ֑ן וְנִגְדְּעָ֣ה וְנָפְלָ֗ה וְנִכְרַת֙ הַמַּשָּׂ֣א אֲשֶׁר־עָלֶ֔יהָ כִּ֥י יְהוָ֖ה דִּבֵּֽר׃ ס

1 maśśā’ gê’ ḥizzāywōn mah-llāḵə ’ēfwō’ kî-‘ālîṯ kullāḵə lagagwōṯ:

2 təšu’wōṯ| məlē’â ‘îr hwōmîyâ qirəyâ ‘allîzâ ḥălālayiḵə lō’ ḥaləlê-ḥereḇ wəlō’ mēṯê miləḥāmâ:

3 kāl-qəṣînayiḵə nāḏəḏû-y^aḥaḏ miqqešeṯ ’ussārû kāl-niməṣā’ayiḵə ’ussərû y^aḥədāw mērāḥwōq bārāḥû:

4 ‘al-kēn ’āmarətî šə‘û minnî ’ămārēr babeḵî ’al-tā’îṣû lən^aḥămēnî ‘al-šōḏ baṯ-‘ammî:

5 kî ywōm məhûmâ ûməḇûsâ ûməḇûḵâ la’ḏōnāy yəhwih ṣəḇā’wōṯ bəḡê’ ḥizzāywōn məqarəqar qir wəšwō‘a ’el-hâār:

6 wə‘êlām nāśā’ ’ašəpâ bəreḵeḇ ’āḏām pārāšîm wəqîr ‘ērâ māḡēn:

7 wayəhî miḇəḥar-‘ămāqayiḵə mālə’û rāḵeḇ wəhapārāšîm šōṯ šāṯû haššā‘ərâ:

8 wayəḡal ’ēṯ māsaḵə yəhûḏâ watabēṭ bayywōm hahû’ ’el-nešeq bêṯ hayyā‘ar:

9 wə’ēṯ bəqî‘ê ‘îr-dāwiḏ rə’îṯem kî-rābû watəqabəṣû ’eṯ-mê habərēḵâ hat^aḥətwōnâ:

10 wə’eṯ-bātê yərûšālaim səfarətem watiṯəṣû habātîm ləḇaṣṣēr h^aḥwōmâ:

11 ûmiqəwâ| ‘ăśîṯem bên h^aḥōmōṯayim ləmê habərēḵâ hayəšānâ wəlō’ hibaṭətem ’el-‘ōśeyhā wəyōṣərāh mērāḥwōq lō’ rə’îṯem:

12 wayyiqərā’ ’ăḏōnāy yəhwih ṣəḇā’wōṯ bayywōm hahû’ liḇəḵî ûləmisəpēḏ ûləqārəḥâ wəl^aḥăḡōr śāq:

13 wəhinnēh| śāśwōn wəśiməḥâ hārōḡ| bāqār wəšāḥōṭ ṣō’n ’āḵōl bāśār wəšāṯwōṯ yāyin ’āḵwōl wəšāṯwō kî māḥār nāmûṯ:

14 wəniḡəlâ ḇə’āzənāy yəhwâ ṣəḇā’wōṯ ’im-yəḵupar he‘āwōn hazzeh lāḵem ‘aḏ-təmuṯûn ’āmar ’ăḏōnāy yəhwih ṣəḇā’wōṯ: f

15 kōh ’āmar ’ăḏōnāy yəhwih ṣəḇā’wōṯ leḵə-bō’ ’el-hassōḵēn hazzeh ‘al-šeḇənā’ ’ăšer ‘al-habāyiṯ:

16 mah-lləḵā fōh ûmî ləḵā fōh kî-ḥāṣaḇətā lləḵā pōh qāḇer ḥōṣəḇî mārwōm qiḇərwō ḥōqəqî ḇassel^a‘ mišəkān lwō:

17 hinnēh yəhwâ məṭaləṭeləḵā ṭaləṭēlâ gāḇer wə‘ōṭəḵā ‘āṭōh:

18 ṣānwōf yiṣənāfəḵā ṣənēfâ kadûr ’el-’ereṣ r^aḥăḇaṯ yāḏāyim šāmmâ ṯāmûṯ wəšāmmâ marəkəḇwōṯ kəḇwōḏeḵā qəlwōn bêṯ ’ăḏōneyḵā:

19 wahăḏafətîḵā mimmaṣṣāḇeḵā ûmimm^a‘ămāḏəḵā yeherəseḵā:

20 wəhāyâ bayywōm hahû’ wəqārā’ṯî lə‘aḇədî lə’eləyāqîm ben-ḥiləqîyâû:

21 wəhiləbašətîw kutānəteḵā wə’aḇənēṭəḵā ’ăḥazzəqennû ûmeməšelətəḵā¹ ’etēn bəyāḏwō wəhāyâ lə’āḇ ləywōšēḇ yərûšālaim ûləḇêṯ yəhûḏâ:

22 wənāṯatî mafətēḥa bêṯ-dāwiḏ ‘al-šiḵəmwō ûfāṯ^aḥ wə’ên sōḡēr wəsāḡar wə’ên pōṯēḥa:

23 ûṯəq^a‘ətîw yāṯēḏ bəmāqwōm ne’ĕmān wəhāyâ ləḵissē’ ḵāḇwōḏ ləḇêṯ ’āḇîw:

24 wəṯālû ‘ālāyw kōl| kəḇwōḏ bêṯ-’āḇîw haṣṣe’ĕṣā’îm wəhaṣṣəfi‘wōṯ kōl kəlê haqqāṭān mikəlê hā’agānwōṯ wə‘aḏ kāl-kəlê hannəḇālîm:

25 bayywōm hahû’ nə’um yəhwâ ṣəḇā’wōṯ tāmûš hayyāṯēḏ hatəqû‘â bəmāqwōm ne’ĕmān wəniḡədə‘â wənāfəlâ wəniḵəraṯ hammaśśā’ ’ăšer-‘āleyhā kî yəhwâ dibēr: s