Isaiah (Yisheyah) Chapter 23

‎1 ‏מַשָּׂ֖א צֹ֑ר הֵילִ֣ילוּ׀ אֳנִיּ֣וֹת תַּרְשִׁ֗ישׁ כִּֽי־שֻׁדַּ֤ד מִבַּ֙יִת֙ מִבּ֔וֹא מֵאֶ֥רֶץ כִּתִּ֖ים נִגְלָה־לָֽמוֹ׃

‎2 ‏דֹּ֖מּוּ יֹ֣שְׁבֵי אִ֑י סֹחֵ֥ר צִיד֛וֹן עֹבֵ֥ר יָ֖ם מִלְאֽוּךְ׃

‎3 ‏וּבְמַ֤יִם רַבִּים֙ זֶ֣רַע שִׁחֹ֔ר קְצִ֥יר יְא֖וֹר תְּבֽוּאָתָ֑הּ וַתְּהִ֖י סְחַ֥ר גּוֹיִֽם׃

‎4 ‏בּ֣וֹשִׁי צִיד֔וֹן כִּֽי־אָמַ֣ר יָ֔ם מָע֥וֹז הַיָּ֖ם לֵאמֹ֑ר לֹֽא־חַ֣לְתִּי וְלֹֽא־יָלַ֗דְתִּי וְלֹ֥א גִדַּ֛לְתִּי בַּחוּרִ֖ים רוֹמַ֥מְתִּי בְתוּלֽוֹת׃

‎5 ‏כַּֽאֲשֶׁר־שֵׁ֖מַע לְמִצְרָ֑יִם יָחִ֖ילוּ כְּשֵׁ֥מַע צֹֽר׃

‎6 ‏עִבְר֖וּ תַּרְשִׁ֑ישָׁה הֵילִ֖ילוּ יֹ֥שְׁבֵי אִֽי׃

‎7 ‏הֲזֹ֥את לָכֶ֖ם עַלִּיזָ֑ה מִֽימֵי־קֶ֤דֶם קַדְמָתָהּ֙ יֹבִל֣וּהָ רַגְלֶ֔יהָ מֵֽרָח֖וֹק לָגֽוּר׃

‎8 ‏מִ֚י יָעַ֣ץ זֹ֔את עַל־צֹ֖ר הַמַּֽעֲטִירָ֑ה אֲשֶׁ֤ר סֹחֲרֶ֙יה֙ שָׂרִ֔ים כִּנְעָנֶ֖יהָ נִכְבַּדֵּי־אָֽרֶץ׃

‎9 ‏יְהוָ֥ה צְבָא֖וֹת יְעָצָ֑הּ לְחַלֵּל֙ גְּא֣וֹן כָּל־צְבִ֔י לְהָקֵ֖ל כָּל־נִכְבַּדֵּי־אָֽרֶץ׃

‎10 ‏עִבְרִ֥י אַרְצֵ֖ךְ כַּיְאֹ֑ר בַּת־תַּרְשִׁ֕ישׁ אֵ֖ין מֵ֥זַח עֽוֹד׃

‎11 ‏יָדוֹ֙ נָטָ֣ה עַל־הַיָּ֔ם הִרְגִּ֖יז מַמְלָכ֑וֹת יְהוָה֙ צִוָּ֣ה אֶל־כְּנַ֔עַן לַשְׁמִ֖ד מָעֻזְנֶֽיהָ׃

‎12 ‏וַיֹּ֕אמֶר לֹֽא־תוֹסִ֥יפִי ע֖וֹד לַעְל֑וֹז הַֽמְעֻשָּׁקָ֞ה בְּתוּלַ֣ת בַּת־צִיד֗וֹן כתיים כִּתִּים֙ ק֣וּמִי עֲבֹ֔רִי גַּם־שָׁ֖ם לֹא־יָנ֥וּחַֽ לָֽךְ׃

‎13 ‏הֵ֣ן׀ אֶ֣רֶץ כַּשְׂדִּ֗ים זֶ֤ה הָעָם֙ לֹ֣א הָיָ֔ה אַשּׁ֖וּר יְסָדָ֣הּ לְצִיִּ֑ים הֵקִ֣ימוּ בחיניו בַחוּנָ֗יו עֹרְרוּ֙ אַרְמְנוֹתֶ֔יהָ שָׂמָ֖הּ לְמַפֵּלָֽה׃

‎14 ‏הֵילִ֖ילוּ אֳנִיּ֣וֹת תַּרְשִׁ֑ישׁ כִּ֥י שֻׁדַּ֖ד מָעֻזְּכֶֽן׃ ס

‎15 ‏וְהָיָה֙ בַּיּ֣וֹם הַה֔וּא וְנִשְׁכַּ֤חַת צֹר֙ שִׁבְעִ֣ים שָׁנָ֔ה כִּימֵ֖י מֶ֣לֶךְ אֶחָ֑ד מִקֵּ֞ץ שִׁבְעִ֤ים שָׁנָה֙ יִהְיֶ֣ה לְצֹ֔ר כְּשִׁירַ֖ת הַזּוֹנָֽה׃

‎16 ‏קְחִ֥י כִנּ֛וֹר סֹ֥בִּי עִ֖יר זוֹנָ֣ה נִשְׁכָּחָ֑ה הֵיטִ֤יבִי נַגֵּן֙ הַרְבִּי־שִׁ֔יר לְמַ֖עַן תִּזָּכֵֽרִי׃

‎17 ‏וְהָיָ֞ה מִקֵּ֣ץ׀ שִׁבְעִ֣ים שָׁנָ֗ה יִפְקֹ֤ד יְהוָה֙ אֶת־צֹ֔ר וְשָׁבָ֖ה לְאֶתְנַנָּ֑ה וְזָֽנְתָ֛ה אֶת־כָּל־מַמְלְכ֥וֹת הָאָ֖רֶץ עַל־פְּנֵ֥י הָאֲדָמָֽה׃

‎18 ‏וְהָיָ֨ה סַחְרָ֜הּ וְאֶתְנַנָּ֗הּ קֹ֚דֶשׁ לַֽיהוָ֔ה לֹ֥א יֵֽאָצֵ֖ר וְלֹ֣א יֵֽחָסֵ֑ן כִּ֣י לַיֹּשְׁבִ֞ים לִפְנֵ֤י יְהוָה֙ יִֽהְיֶ֣ה סַחְרָ֔הּ לֶאֱכֹ֥ל לְשָׂבְעָ֖ה וְלִמְכַסֶּ֥ה עָתִֽיק׃ פ

1 maśśā’ ṣōr hêlîlû| ’ŏnîywōṯ tarəšîš kî-šudaḏ mibayiṯ mibwō’ mē’ereṣ kitîm niḡəlâ-lāmwō:

2 dōmmû yōšəḇê ’î sōḥēr ṣîḏwōn ‘ōḇēr yām milə’ûḵə:

3 ûḇəmayim rabîm zer^a‘ šiḥōr qəṣîr yə’wōr təḇû’āṯāh watəhî səḥar gwōyim:

4 bwōšî ṣîḏwōn kî-’āmar yām mā‘wōz hayyām lē’mōr lō’-ḥalətî wəlō’-yālaḏətî wəlō’ ḡidalətî b^aḥûrîm rwōmamətî ḇəṯûlwōṯ:

5 ka’ăšer-šēm^a‘ ləmiṣərāyim yāḥîlû kəšēm^a‘ ṣōr:

6 ‘iḇərû tarəšîšâ hêlîlû yōšəḇê ’î:

7 hăzō’ṯ lāḵem ‘allîzâ mîmê-qeḏem qaḏəmāṯāh yōḇilûhā raḡəleyhā mērāḥwōq lāḡûr:

8 mî yā‘aṣ zō’ṯ ‘al-ṣōr hamm^a‘ăṭîrâ ’ăšer sōḥăreyh śārîm kinə‘āneyhā niḵəbadê-’āreṣ:

9 yəhwâ ṣəḇā’wōṯ yə‘āṣāh ləḥallēl gə’wōn kāl-ṣəḇî ləhāqēl kāl-niḵəbadê-’āreṣ:

10 ‘iḇərî ’arəṣēḵə kayə’ōr baṯ-tarəšîš ’ên mēz^aḥ ‘wōḏ:

11 yāḏwō nāṭâ ‘al-hayyām hirəgîz maməlāḵwōṯ yəhwâ ṣiûâ ’el-kən^a‘an lašəmiḏ mā‘uzəneyhā:

12 wayyō’mer lō’-ṯwōsîfî ‘wōḏ l^a‘əlwōz hamə‘uššāqâ bəṯûlaṯ baṯ-ṣîḏwōn kitîyîm kitîm qûmî ‘ăḇōrî gam-šām lō’-yānûḥa lāḵə:

13 hēn| ’ereṣ kaśədîm zeh hā‘ām lō’ hāyâ ’aššûr yəsāḏāh ləṣîyîm hēqîmû ḇəḥînāyw ḇ^aḥûnāyw ‘ōrərû ’arəmənwōṯeyhā śāmāh ləmapēlâ:

14 hêlîlû ’ŏnîywōṯ tarəšîš kî šudaḏ mā‘uzzəḵen: s

15 wəhāyâ bayywōm hahû’ wənišək^aḥaṯ ṣōr šiḇə‘îm šānâ kîmê meleḵə ’eḥāḏ miqqēṣ šiḇə‘îm šānâ yihəyeh ləṣōr kəšîraṯ hazzwōnâ:

16 qəḥî ḵinnwōr sōbî ‘îr zwōnâ nišəkāḥâ hêṭîḇî nagēn harəbî-šîr ləm^a‘an tizzāḵērî:

17 wəhāyâ miqqēṣ| šiḇə‘îm šānâ yifəqōḏ yəhwâ ’eṯ-ṣōr wəšāḇâ lə’eṯənannâ wəzānəṯâ ’eṯ-kāl-mamələḵwōṯ hā’āreṣ ‘al-pənê hā’ăḏāmâ:

18 wəhāyâ s^aḥərāh wə’eṯənannāh qōḏeš layhwâ lō’ yē’āṣēr wəlō’ yēḥāsēn kî layyōšəḇîm lifənê yəhwâ yihəyeh s^aḥərāh le’ĕḵōl ləśāḇə‘â wəliməḵasseh ‘āṯîq: f