Isaiah (Yisheyah) Chapter 24

‎1 ‏הִנֵּ֧ה יְהוָ֛ה בּוֹקֵ֥ק הָאָ֖רֶץ וּבֽוֹלְקָ֑הּ וְעִוָּ֣ה פָנֶ֔יהָ וְהֵפִ֖יץ יֹשְׁבֶֽיהָ׃

‎2 ‏וְהָיָ֤ה כָעָם֙ כַּכֹּהֵ֔ן כַּעֶ֙בֶד֙ כַּֽאדֹנָ֔יו כַּשִּׁפְחָ֖ה כַּגְּבִרְתָּ֑הּ כַּקּוֹנֶה֙ כַּמּוֹכֵ֔ר כַּמַּלְוֶה֙ כַּלּוֶֹ֔ה כַּנֹּשֶׁ֕ה כַּאֲשֶׁ֖ר נֹשֶׁ֥א בֽוֹ׃

‎3 ‏הִבּ֧וֹק׀ תִּבּ֛וֹק הָאָ֖רֶץ וְהִבּ֣וֹז׀ תִּבּ֑וֹז כִּ֣י יְהוָ֔ה דִּבֶּ֖ר אֶת־הַדָּבָ֥ר הַזֶּֽה׃

‎4 ‏אָבְלָ֤ה נָֽבְלָה֙ הָאָ֔רֶץ אֻמְלְלָ֥ה נָבְלָ֖ה תֵּבֵ֑ל אֻמְלָ֖לוּ מְר֥וֹם עַם־הָאָֽרֶץ׃

‎5 ‏וְהָאָ֥רֶץ חָנְפָ֖ה תַּ֣חַת יֹשְׁבֶ֑יהָ כִּֽי־עָבְר֤וּ תוֹרֹת֙ חָ֣לְפוּ חֹ֔ק הֵפֵ֖רוּ בְּרִ֥ית עוֹלָֽם׃

‎6 ‏עַל־כֵּ֗ן אָלָה֙ אָ֣כְלָה אֶ֔רֶץ וַֽיֶּאְשְׁמ֖וּ יֹ֣שְׁבֵי בָ֑הּ עַל־כֵּ֗ן חָרוּ֙ יֹ֣שְׁבֵי אֶ֔רֶץ וְנִשְׁאַ֥ר אֱנ֖וֹשׁ מִזְעָֽר׃

‎7 ‏אָבַ֥ל תִּיר֖וֹשׁ אֻמְלְלָה־גָ֑פֶן נֶאֶנְח֖וּ כָּל־שִׂמְחֵי־לֵֽב׃

‎8 ‏שָׁבַת֙ מְשׂ֣וֹשׂ תֻּפִּ֔ים חָדַ֖ל שְׁא֣וֹן עַלִּיזִ֑ים שָׁבַ֖ת מְשׂ֥וֹשׂ כִּנּֽוֹר׃

‎9 ‏בַּשִּׁ֖יר לֹ֣א יִשְׁתּוּ־יָ֑יִן יֵמַ֥ר שֵׁכָ֖ר לְשֹׁתָֽיו׃

‎10 ‏נִשְׁבְּרָ֖ה קִרְיַת־תֹּ֑הוּ סֻגַּ֥ר כָּל־בַּ֖יִת מִבּֽוֹא׃

‎11 ‏צְוָחָ֥ה עַל־הַיַּ֖יִן בַּֽחוּצ֑וֹת עָֽרְבָה֙ כָּל־שִׂמְחָ֔ה גָּלָ֖ה מְשׂ֥וֹשׂ הָאָֽרֶץ׃

‎12 ‏נִשְׁאַ֥ר בָּעִ֖יר שַׁמָּ֑ה וּשְׁאִיָּ֖ה יֻכַּת־שָֽׁעַר׃

‎13 ‏כִּ֣י כֹ֥ה יִהְיֶ֛ה בְּקֶ֥רֶב הָאָ֖רֶץ בְּת֣וֹךְ הָֽעַמִּ֑ים כְּנֹ֣קֶף זַ֔יִת כְּעוֹלֵלֹ֖ת אִם־כָּלָ֥ה בָצִֽיר׃

‎14 ‏הֵ֛מָּה יִשְׂא֥וּ קוֹלָ֖ם יָרֹ֑נּוּ בִּגְא֣וֹן יְהוָ֔ה צָהֲל֖וּ מִיָּֽם׃

‎15 ‏עַל־כֵּ֥ן בָּאֻרִ֖ים כַּבְּד֣וּ יְהוָ֑ה בְּאִיֵּ֣י הַיָּ֔ם שֵׁ֥ם יְהוָ֖ה אֱלֹהֵ֥י יִשְׂרָאֵֽל׃ ס

‎16 ‏מִכְּנַ֨ף הָאָ֜רֶץ זְמִרֹ֤ת שָׁמַ֙עְנוּ֙ צְבִ֣י לַצַּדִּ֔יק וָאֹמַ֛ר רָזִי־לִ֥י רָֽזִי־לִ֖י א֣וֹי לִ֑י בֹּגְדִ֣ים בָּגָ֔דוּ וּבֶ֥גֶד בּוֹגְדִ֖ים בָּגָֽדוּ׃

‎17 ‏פַּ֥חַד וָפַ֖חַת וָפָ֑ח עָלֶ֖יךָ יוֹשֵׁ֥ב הָאָֽרֶץ׃

‎18 ‏וְֽ֠הָיָה הַנָּ֞ס מִקּ֤וֹל הַפַּ֙חַד֙ יִפֹּ֣ל אֶל־הַפַּ֔חַת וְהָֽעוֹלֶה֙ מִתּ֣וֹךְ הַפַּ֔חַת יִלָּכֵ֖ד בַּפָּ֑ח כִּֽי־אֲרֻבּ֤וֹת מִמָּרוֹם֙ נִפְתָּ֔חוּ וַֽיִּרְעֲשׁ֖וּ מ֥וֹסְדֵי אָֽרֶץ׃

‎19 ‏רֹ֥עָה הִֽתְרֹעֲעָ֖ה הָאָ֑רֶץ פּ֤וֹר הִֽתְפּוֹרְרָה֙ אֶ֔רֶץ מ֥וֹט הִֽתְמוֹטְטָ֖ה אָֽרֶץ׃

‎20 ‏נ֣וֹעַ תָּנ֤וּעַ אֶ֙רֶץ֙ כַּשִּׁכּ֔וֹר וְהִֽתְנוֹדְדָ֖ה כַּמְּלוּנָ֑ה וְכָבַ֤ד עָלֶ֙יהָ֙ פִּשְׁעָ֔הּ וְנָפְלָ֖ה וְלֹא־תֹסִ֥יף קֽוּם׃ ס

‎21 ‏וְהָיָה֙ בַּיּ֣וֹם הַה֔וּא יִפְקֹ֧ד יְהוָ֛ה עַל־צְבָ֥א הַמָּר֖וֹם בַּמָּר֑וֹם וְעַל־מַלְכֵ֥י הָאֲדָמָ֖ה עַל־הָאֲדָמָֽה׃

‎22 ‏וְאֻסְּפ֨וּ אֲסֵפָ֤ה אַסִּיר֙ עַל־בּ֔וֹר וְסֻגְּר֖וּ עַל־מַסְגֵּ֑ר וּמֵרֹ֥ב יָמִ֖ים יִפָּקֵֽדוּ׃

‎23 ‏וְחָֽפְרָה֙ הַלְּבָנָ֔ה וּבוֹשָׁ֖ה הַֽחַמָּ֑ה כִּֽי־מָלַ֞ךְ יְהוָ֣ה צְבָא֗וֹת בְּהַ֤ר צִיּוֹן֙ וּבִיר֣וּשָׁלִַ֔ם וְנֶ֥גֶד זְקֵנָ֖יו כָּבֽוֹד׃ פ

1 hinnēh yəhwâ bwōqēq hā’āreṣ ûḇwōləqāh wə‘iûâ fāneyhā wəhēfîṣ yōšəḇeyhā:

2 wəhāyâ ḵā‘ām kakōhēn k^a‘eḇeḏ ka’ḏōnāyw kaššifəḥâ kagəḇirətāh kaqqwōneh kammwōḵēr kammaləweh kallwōeh kannōšeh ka’ăšer nōše’ ḇwō:

3 hibwōq| tibwōq hā’āreṣ wəhibwōz| tibwōz kî yəhwâ diber ’eṯ-hadāḇār hazzeh:

4 ’āḇəlâ nāḇəlâ hā’āreṣ ’umələlâ nāḇəlâ tēḇēl ’uməlālû mərwōm ‘am-hā’āreṣ:

5 wəhā’āreṣ ḥānəfâ t^aḥaṯ yōšəḇeyhā kî-‘āḇərû ṯwōrōṯ ḥāləfû ḥōq hēfērû bərîṯ ‘wōlām:

6 ‘al-kēn ’ālâ ’āḵəlâ ’ereṣ wayye’əšəmû yōšəḇê ḇāh ‘al-kēn ḥārû yōšəḇê ’ereṣ wənišə’ar ’ĕnwōš mizə‘ār:

7 ’āḇal tîrwōš ’umələlâ-ḡāfen ne’enəḥû kāl-śiməḥê-lēḇ:

8 šāḇaṯ məśwōś tupîm ḥāḏal šə’wōn ‘allîzîm šāḇaṯ məśwōś kinnwōr:

9 baššîr lō’ yišətû-yāyin yēmar šēḵār ləšōṯāyw:

10 nišəbərâ qirəyaṯ-tōhû sugar kāl-bayiṯ mibwō’:

11 ṣəwāḥâ ‘al-hayyayin b^aḥûṣwōṯ ‘ārəḇâ kāl-śiməḥâ gālâ məśwōś hā’āreṣ:

12 nišə’ar bā‘îr šammâ ûšə’îyâ yukaṯ-šā‘ar:

13 kî ḵōh yihəyeh bəqereḇ hā’āreṣ bəṯwōḵə hā‘ammîm kənōqef zayiṯ kə‘wōlēlōṯ ’im-kālâ ḇāṣîr:

14 hēmmâ yiśə’û qwōlām yārōnnû biḡə’wōn yəhwâ ṣâălû mîyām:

15 ‘al-kēn bā’urîm kabəḏû yəhwâ bə’îyê hayyām šēm yəhwâ ’ĕlōhê yiśərā’ēl: s

16 mikənaf hā’āreṣ zəmirōṯ šām^a‘ənû ṣəḇî laṣṣadîq wā’ōmar rāzî-lî rāzî-lî ’wōy lî bōḡəḏîm bāḡāḏû ûḇeḡeḏ bwōḡəḏîm bāḡāḏû:

17 p^aḥaḏ wāf^aḥaṯ wāfāḥ ‘āleyḵā ywōšēḇ hā’āreṣ:

18 wəhāyâ hannās miqqwōl hap^aḥaḏ yipōl ’el-hap^aḥaṯ wəhā‘wōleh mitwōḵə hap^aḥaṯ yillāḵēḏ bapāḥ kî-’ărubwōṯ mimmārwōm nifətāḥû wayyirə‘ăšû mwōsəḏê ’āreṣ:

19 rō‘â hiṯərō‘ă‘â hā’āreṣ pwōr hiṯəpwōrərâ ’ereṣ mwōṭ hiṯəmwōṭəṭâ ’āreṣ:

20 nwō‘a tānû‘a ’ereṣ kaššikwōr wəhiṯənwōḏəḏâ kamməlûnâ wəḵāḇaḏ ‘āleyhā pišə‘āh wənāfəlâ wəlō’-ṯōsîf qûm: s

21 wəhāyâ bayywōm hahû’ yifəqōḏ yəhwâ ‘al-ṣəḇā’ hammārwōm bammārwōm wə‘al-maləḵê hā’ăḏāmâ ‘al-hā’ăḏāmâ:

22 wə’ussəfû ’ăsēfâ ’assîr ‘al-bwōr wəsugərû ‘al-masəgēr ûmērōḇ yāmîm yipāqēḏû:

23 wəḥāfərâ halləḇānâ ûḇwōšâ h^aḥammâ kî-mālaḵə yəhwâ ṣəḇā’wōṯ bəhar ṣîywōn ûḇîrûšālaim wəneḡeḏ zəqēnāyw kāḇwōḏ: f