Judges (Shoftim) Chapter 2

‎1 ‏וַיַּ֧עַל מַלְאַךְ־יְהוָ֛ה מִן־הַגִּלְגָּ֖ל אֶל־הַבֹּכִ֑ים ³פוַיֹּאמֶר֩ אַעֲלֶ֨ה אֶתְכֶ֜ם מִמִּצְרַ֗יִם וָאָבִ֤יא אֶתְכֶם֙ אֶל־הָאָ֗רֶץ אֲשֶׁ֤ר נִשְׁבַּ֙עְתִּי֙ לַאֲבֹ֣תֵיכֶ֔ם וָאֹמַ֕ר לֹֽא־אָפֵ֧ר בְּרִיתִ֛י אִתְּכֶ֖ם לְעוֹלָֽם׃

‎2 ‏וְאַתֶּ֗ם לֹֽא־תִכְרְת֤וּ בְרִית֙ לְיֽוֹשְׁבֵי֙ הָאָ֣רֶץ הַזֹּ֔את מִזְבְּחוֹתֵיהֶ֖ם תִּתֹּצ֑וּן וְלֹֽא־שְׁמַעְתֶּ֥ם בְּקֹלִ֖י מַה־זֹּ֥את עֲשִׂיתֶֽם׃

‎3 ‏וְגַ֣ם אָמַ֔רְתִּי לֹֽא־אֲגָרֵ֥שׁ אוֹתָ֖ם מִפְּנֵיכֶ֑ם וְהָי֤וּ לָכֶם֙ לְצִדִּ֔ים וֵאלֹ֣הֵיהֶ֔ם יִהְי֥וּ לָכֶ֖ם לְמוֹקֵֽשׁ׃

‎4 ‏וַיְהִ֗י כְּדַבֵּ֞ר מַלְאַ֤ךְ יְהוָה֙ אֶת־הַדְּבָרִ֣ים הָאֵ֔לֶּה אֶֽל־כָּל־בְּנֵ֖י יִשְׂרָאֵ֑ל וַיִּשְׂא֥וּ הָעָ֛ם אֶת־קוֹלָ֖ם וַיִּבְכּֽוּ׃

‎5 ‏וַֽיִּקְרְא֛וּ שֵֽׁם־הַמָּק֥וֹם הַה֖וּא בֹּכִ֑ים וַיִּזְבְּחוּ־שָׁ֖ם לַֽיהוָֽה׃ פ

‎6 ‏וַיְשַׁלַּ֥ח יְהוֹשֻׁ֖עַ אֶת־הָעָ֑ם וַיֵּלְכ֧וּ בְנֵֽי־יִשְׂרָאֵ֛ל אִ֥ישׁ לְנַחֲלָת֖וֹ לָרֶ֥שֶׁת אֶת־הָאָֽרֶץ׃

‎7 ‏וַיַּעַבְד֤וּ הָעָם֙ אֶת־יְהוָ֔ה כֹּ֖ל יְמֵ֣י יְהוֹשֻׁ֑עַ וְכֹ֣ל׀ יְמֵ֣י הַזְּקֵנִ֗ים אֲשֶׁ֨ר הֶאֱרִ֤יכוּ יָמִים֙ אַחֲרֵ֣י יְהוֹשׁ֔וּעַ אֲשֶׁ֣ר רָא֗וּ אֵ֣ת כָּל־מַעֲשֵׂ֤ה יְהוָה֙ הַגָּד֔וֹל אֲשֶׁ֥ר עָשָׂ֖ה לְיִשְׂרָאֵֽל׃

‎8 ‏וַיָּ֛מָת יְהוֹשֻׁ֥עַ בִּן־נ֖וּן עֶ֣בֶד יְהוָ֑ה בֶּן־מֵאָ֥ה וָעֶ֖שֶׂר שָׁנִֽים׃

‎9 ‏וַיִּקְבְּר֤וּ אוֹתוֹ֙ בִּגְב֣וּל נַחֲלָת֔וֹ בְּתִמְנַת־חֶ֖רֶס בְּהַ֣ר אֶפְרָ֑יִם מִצְּפ֖וֹן לְהַר־גָּֽעַשׁ׃

‎10 ‏וְגַם֙ כָּל־הַדּ֣וֹר הַה֔וּא נֶאֶסְפ֖וּ אֶל־אֲבוֹתָ֑יו וַיָּקָם֩ דּ֨וֹר אַחֵ֜ר אַחֲרֵיהֶ֗ם אֲשֶׁ֤ר לֹא־יָֽדְעוּ֙ אֶת־יְהוָ֔ה וְגַם֙ אֶת־הַֽמַּעֲשֶׂ֔ה אֲשֶׁ֥ר עָשָׂ֖ה לְיִשְׂרָאֵֽל׃ ס

‎11 ‏וַיַּעֲשׂ֧וּ בְנֵֽי־יִשְׂרָאֵ֛ל אֶת־הָרַ֖ע בְּעֵינֵ֣י יְהוָ֑ה וַיַּעַבְד֖וּ אֶת־הַבְּעָלִֽים׃

‎12 ‏וַיַּעַזְב֞וּ אֶת־יְהוָ֣ה׀ אֱלֹהֵ֣י אֲבוֹתָ֗ם הַמּוֹצִ֣יא אוֹתָם֮ מֵאֶ֣רֶץ מִצְרַיִם֒ וַיֵּלְכ֞וּ אַחֲרֵ֣י׀ אֱלֹהִ֣ים אֲחֵרִ֗ים מֵאֱלֹהֵ֤י הָֽעַמִּים֙ אֲשֶׁר֙ סְבִיב֣וֹתֵיהֶ֔ם וַיִּֽשְׁתַּחֲו֖וּ לָהֶ֑ם וַיַּכְעִ֖סוּ אֶת־יְהוָֽה׃³

‎13 ‏וַיַּעַזְב֖וּ אֶת־יְהוָ֑ה וַיַּעַבְד֥וּ לַבַּ֖עַל וְלָעַשְׁתָּרֽוֹת׃

‎14 ‏וַיִּֽחַר־אַ֤ף יְהוָה֙ בְּיִשְׂרָאֵ֔ל וַֽיִּתְּנֵם֙ בְּיַד־שֹׁסִ֔ים וַיָּשֹׁ֖סּוּ אוֹתָ֑ם וַֽיִּמְכְּרֵ֞ם בְּיַ֤ד אֽוֹיְבֵיהֶם֙ מִסָּבִ֔יב וְלֹֽא־יָכְל֣וּ ע֔וֹד לַעֲמֹ֖ד לִפְנֵ֥י אוֹיְבֵיהֶֽם׃

‎15 ‏בְּכֹ֣ל׀ אֲשֶׁ֣ר יָצְא֗וּ יַד־יְהוָה֙ הָיְתָה־בָּ֣ם לְרָעָ֔ה כַּֽאֲשֶׁר֙ דִּבֶּ֣ר יְהוָ֔ה וְכַאֲשֶׁ֛ר נִשְׁבַּ֥ע יְהוָ֖ה לָהֶ֑ם וַיֵּ֥צֶר לָהֶ֖ם מְאֹֽד׃

‎16 ‏וַיָּ֥קֶם יְהוָ֖ה שֹֽׁפְטִ֑ים וַיּ֣וֹשִׁיע֔וּם מִיַּ֖ד שֹׁסֵיהֶֽם׃

‎17 ‏וְגַ֤ם אֶל־שֹֽׁפְטֵיהֶם֙ לֹ֣א שָׁמֵ֔עוּ כִּ֣י זָנ֗וּ אַֽחֲרֵי֙ אֱלֹהִ֣ים אֲחֵרִ֔ים וַיִּֽשְׁתַּחֲו֖וּ לָהֶ֑ם סָ֣רוּ מַהֵ֗ר מִן־הַדֶּ֜רֶךְ אֲשֶׁ֨ר הָלְכ֧וּ אֲבוֹתָ֛ם לִשְׁמֹ֥עַ מִצְוֹת־יְהוָ֖ה לֹא־עָ֥שׂוּ כֵֽן׃

‎18 ‏וְכִֽי־הֵקִ֨ים יְהוָ֥ה׀ לָהֶם֮ שֹֽׁפְטִים֒ וְהָיָ֤ה יְהוָה֙ עִם־הַשֹּׁפֵ֔ט וְהֽוֹשִׁיעָם֙ מִיַּ֣ד אֹֽיְבֵיהֶ֔ם כֹּ֖ל יְמֵ֣י הַשּׁוֹפֵ֑ט כִּֽי־יִנָּחֵ֤ם יְהוָה֙ מִנַּֽאֲקָתָ֔ם מִפְּנֵ֥י לֹחֲצֵיהֶ֖ם וְדֹחֲקֵיהֶֽם׃

‎19 ‏וְהָיָ֣ה׀ בְּמ֣וֹת הַשּׁוֹפֵ֗ט יָשֻׁ֙בוּ֙ וְהִשְׁחִ֣יתוּ מֵֽאֲבוֹתָ֔ם לָלֶ֗כֶת אַֽחֲרֵי֙ אֱלֹהִ֣ים אֲחֵרִ֔ים לְעָבְדָ֖ם וּלְהִשְׁתַּחֲוֹ֣ת לָהֶ֑ם לֹ֤א הִפִּ֙ילוּ֙ מִמַּ֣עַלְלֵיהֶ֔ם וּמִדַּרְכָּ֖ם הַקָּשָֽׁה׃

‎20 ‏וַיִּֽחַר־אַ֥ף יְהוָ֖ה בְּיִשְׂרָאֵ֑ל וַיֹּ֗אמֶר יַעַן֩ אֲשֶׁ֨ר עָבְר֜וּ הַגּ֣וֹי הַזֶּ֗ה אֶת־בְּרִיתִי֙ אֲשֶׁ֣ר צִוִּ֣יתִי אֶת־אֲבוֹתָ֔ם וְלֹ֥א שָׁמְע֖וּ לְקוֹלִֽי׃

‎21 ‏גַּם־אֲנִי֙ לֹ֣א אוֹסִ֔יף לְהוֹרִ֥ישׁ אִ֖ישׁ מִפְּנֵיהֶ֑ם מִן־הַגּוֹיִ֛ם אֲשֶׁר־עָזַ֥ב יְהוֹשֻׁ֖עַ וַיָּמֹֽת׃

‎22 ‏לְמַ֛עַן נַסּ֥וֹת בָּ֖ם אֶת־יִשְׂרָאֵ֑ל הֲשֹׁמְרִ֣ים הֵם֩ אֶת־דֶּ֨רֶךְ יְהוָ֜ה לָלֶ֣כֶת בָּ֗ם כַּאֲשֶׁ֛ר שָׁמְר֥וּ אֲבוֹתָ֖ם אִם־לֹֽא׃

‎23 ‏וַיַּנַּ֤ח יְהוָה֙ אֶת־הַגּוֹיִ֣ם הָאֵ֔לֶּה לְבִלְתִּ֥י הוֹרִישָׁ֖ם מַהֵ֑ר וְלֹ֥א נְתָנָ֖ם בְּיַד־יְהוֹשֻֽׁעַ׃ פ

1 wayy^a‘al malə’aḵə-yəhwâ min-hagiləgāl ’el-habōḵîm ³fwayyō’mer ’^a‘ăleh ’eṯəḵem mimmiṣərayim wā’āḇî’ ’eṯəḵem ’el-hā’āreṣ ’ăšer nišəb^a‘ətî la’ăḇōṯêḵem wā’ōmar lō’-’āfēr bərîṯî ’itəḵem lə‘wōlām:

2 wə’atem lō’-ṯiḵərəṯû ḇərîṯ ləywōšəḇê hā’āreṣ hazzō’ṯ mizəbəḥwōṯêhem titōṣûn wəlō’-šəm^a‘ətem bəqōlî mah-zzō’ṯ ‘ăśîṯem:

3 wəḡam ’āmarətî lō’-’ăḡārēš ’wōṯām mipənêḵem wəhāyû lāḵem ləṣidîm wē’lōhêhem yihəyû lāḵem ləmwōqēš:

4 wayəhî kəḏabēr malə’aḵə yəhwâ ’eṯ-hadəḇārîm hā’ēlleh ’el-kāl-bənê yiśərā’ēl wayyiśə’û hā‘ām ’eṯ-qwōlām wayyiḇəkû:

5 wayyiqərə’û šēm-hammāqwōm hahû’ bōḵîm wayyizəbəḥû-šām layhwâ: f

6 wayəšall^aḥ yəhwōšu‘a ’eṯ-hā‘ām wayyēləḵû ḇənê-yiśərā’ēl ’îš lən^aḥălāṯwō lārešeṯ ’eṯ-hā’āreṣ:

7 wayy^a‘aḇəḏû hā‘ām ’eṯ-yəhwâ kōl yəmê yəhwōšu‘a wəḵōl| yəmê hazzəqēnîm ’ăšer he’ĕrîḵû yāmîm ’^aḥărê yəhwōšû‘a ’ăšer rā’û ’ēṯ kāl-m^a‘ăśēh yəhwâ hagāḏwōl ’ăšer ‘āśâ ləyiśərā’ēl:

8 wayyāmāṯ yəhwōšu‘a bin-nûn ‘eḇeḏ yəhwâ ben-mē’â wā‘eśer šānîm:

9 wayyiqəbərû ’wōṯwō biḡəḇûl n^aḥălāṯwō bəṯimənaṯ-ḥeres bəhar ’efərāyim miṣṣəfwōn ləhar-gā‘aš:

10 wəḡam kāl-hadwōr hahû’ ne’esəfû ’el-’ăḇwōṯāyw wayyāqām dwōr ’^aḥēr ’^aḥărêhem ’ăšer lō’-yāḏə‘û ’eṯ-yəhwâ wəḡam ’eṯ-hamm^a‘ăśeh ’ăšer ‘āśâ ləyiśərā’ēl: s

11 wayy^a‘ăśû ḇənê-yiśərā’ēl ’eṯ-hār^a‘ bə‘ênê yəhwâ wayy^a‘aḇəḏû ’eṯ-habə‘ālîm:

12 wayy^a‘azəḇû ’eṯ-yəhwâ| ’ĕlōhê ’ăḇwōṯām hammwōṣî’ ’wōṯām mē’ereṣ miṣərayim wayyēləḵû ’^aḥărê| ’ĕlōhîm ’ăḥērîm mē’ĕlōhê hā‘ammîm ’ăšer səḇîḇwōṯêhem wayyišət^aḥăwû lâem wayyaḵə‘isû ’eṯ-yəhwâ:³

13 wayy^a‘azəḇû ’eṯ-yəhwâ wayy^a‘aḇəḏû lab^a‘al wəlā‘ašətārwōṯ:

14 wayyiḥar-’af yəhwâ bəyiśərā’ēl wayyitənēm bəyaḏ-šōsîm wayyāšōssû ’wōṯām wayyiməkərēm bəyaḏ ’wōyəḇêhem missāḇîḇ wəlō’-yāḵəlû ‘wōḏ l^a‘ămōḏ lifənê ’wōyəḇêhem:

15 bəḵōl| ’ăšer yāṣə’û yaḏ-yəhwâ hāyəṯâ-bām lərā‘â ka’ăšer diber yəhwâ wəḵa’ăšer nišəb^a‘ yəhwâ lâem wayyēṣer lâem mə’ōḏ:

16 wayyāqem yəhwâ šōfəṭîm wayywōšî‘ûm mîyaḏ šōsêhem:

17 wəḡam ’el-šōfəṭêhem lō’ šāmē‘û kî zānû ’^aḥărê ’ĕlōhîm ’ăḥērîm wayyišət^aḥăwû lâem sārû mahēr min-hadereḵə ’ăšer hāləḵû ’ăḇwōṯām lišəmō‘a miṣəwōṯ-yəhwâ lō’-‘āśû ḵēn:

18 wəḵî-hēqîm yəhwâ| lâem šōfəṭîm wəhāyâ yəhwâ ‘im-haššōfēṭ wəhwōšî‘ām mîyaḏ ’ōyəḇêhem kōl yəmê haššwōfēṭ kî-yinnāḥēm yəhwâ minna’ăqāṯām mipənê lōḥăṣêhem wəḏōḥăqêhem:

19 wəhāyâ| bəmwōṯ haššwōfēṭ yāšuḇû wəhišəḥîṯû mē’ăḇwōṯām lāleḵeṯ ’^aḥărê ’ĕlōhîm ’ăḥērîm lə‘āḇəḏām ûləhišət^aḥăwōṯ lâem lō’ hipîlû mimm^a‘aləlêhem ûmidarəkām haqqāšâ:

20 wayyiḥar-’af yəhwâ bəyiśərā’ēl wayyō’mer y^a‘an ’ăšer ‘āḇərû hagwōy hazzeh ’eṯ-bərîṯî ’ăšer ṣiûîṯî ’eṯ-’ăḇwōṯām wəlō’ šāmə‘û ləqwōlî:

21 gam-’ănî lō’ ’wōsîf ləhwōrîš ’îš mipənêhem min-hagwōyim ’ăšer-‘āzaḇ yəhwōšu‘a wayyāmōṯ:

22 ləm^a‘an nasswōṯ bām ’eṯ-yiśərā’ēl hăšōmərîm hēm ’eṯ-dereḵə yəhwâ lāleḵeṯ bām ka’ăšer šāmərû ’ăḇwōṯām ’im-lō’:

23 wayyann^aḥ yəhwâ ’eṯ-hagwōyim hā’ēlleh ləḇilətî hwōrîšām mahēr wəlō’ nəṯānām bəyaḏ-yəhwōšu‘a: f