Jeremiah (Yermiyah) Chapter 1

‎1 ‏דִּבְרֵ֥י יִרְמְיָ֖הוּ בֶּן־חִלְקִיָּ֑הוּ מִן־הַכֹּֽהֲנִים֙ אֲשֶׁ֣ר בַּעֲנָת֔וֹת בְּאֶ֖רֶץ בִּנְיָמִֽן׃

‎2 ‏אֲשֶׁ֨ר הָיָ֤ה דְבַר־יְהוָה֙ אֵלָ֔יו בִּימֵ֛י יֹאשִׁיָּ֥הוּ בֶן־אָמ֖וֹן מֶ֣לֶךְ יְהוּדָ֑ה בִּשְׁלֹשׁ־עֶשְׂרֵ֥ה שָׁנָ֖ה לְמָלְכֽוֹ׃

‎3 ‏וַיְהִ֗י בִּימֵ֨י יְהוֹיָקִ֤ים בֶּן־יֹאשִׁיָּ֙הוּ֙ מֶ֣לֶךְ יְהוּדָ֔ה עַד־תֹּם֙ עַשְׁתֵּ֣י עֶשְׂרֵ֣ה שָׁנָ֔ה לְצִדְקִיָּ֥הוּ בֶן־יֹאשִׁיָּ֖הוּ מֶ֣לֶךְ יְהוּדָ֑ה עַד־גְּל֥וֹת יְרוּשָׁלִַ֖ם בַּחֹ֥דֶשׁ הַחֲמִישִֽׁי׃ ס

‎4 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎5 ‏בְּטֶ֨רֶם אצורך אֶצָּרְךָ֤ בַבֶּ֙טֶן֙ יְדַעְתִּ֔יךָ וּבְטֶ֛רֶם תֵּצֵ֥א מֵרֶ֖חֶם הִקְדַּשְׁתִּ֑יךָ נָבִ֥יא לַגּוֹיִ֖ם נְתַתִּֽיךָ׃

‎6 ‏וָאֹמַ֗ר אֲהָהּ֙ אֲדֹנָ֣י יְהוִֹ֔ה הִנֵּ֥ה לֹא־יָדַ֖עְתִּי דַּבֵּ֑ר¹ כִּי־נַ֖עַר אָנֹֽכִי׃ פ

‎7 ‏וַיֹּ֤אמֶר יְהוָה֙ אֵלַ֔י אַל־תֹּאמַ֖ר נַ֣עַר אָנֹ֑כִי כִּ֠י עַֽל־כָּל־אֲשֶׁ֤ר אֶֽשְׁלָחֲךָ֙ תֵּלֵ֔ךְ וְאֵ֛ת כָּל־אֲשֶׁ֥ר אֲצַוְּךָ֖ תְּדַבֵּֽר׃

‎8 ‏אַל־תִּירָ֖א מִפְּנֵיהֶ֑ם כִּֽי־אִתְּךָ֥ אֲנִ֛י לְהַצִּלֶ֖ךָ נְאֻם־יְהוָֽה׃

‎9 ‏וַיִּשְׁלַ֤ח יְהוָה֙ אֶת־יָד֔וֹ וַיַּגַּ֖ע עַל־פִּ֑י וַיֹּ֤אמֶר יְהוָה֙ אֵלַ֔י הִנֵּ֛ה נָתַ֥תִּי דְבָרַ֖י בְּפִֽיךָ׃

‎10 ‏רְאֵ֞ה הִפְקַדְתִּ֣יךָ׀ הַיּ֣וֹם הַזֶּ֗ה עַל־הַגּוֹיִם֙ וְעַל־הַמַּמְלָכ֔וֹת לִנְת֥וֹשׁ וְלִנְת֖וֹץ וּלְהַאֲבִ֣יד וְלַהֲר֑וֹס לִבְנ֖וֹת וְלִנְטֽוֹעַ׃ פ

‎11 ‏וַיְהִ֤י דְבַר־יְהוָה֙ אֵלַ֣י לֵאמֹ֔ר מָה־אַתָּ֥ה רֹאֶ֖ה יִרְמְיָ֑הוּ וָאֹמַ֕ר מַקֵּ֥ל שָׁקֵ֖ד אֲנִ֥י רֹאֶֽה׃

‎12 ‏וַיֹּ֧אמֶר יְהוָ֛ה אֵלַ֖י הֵיטַ֣בְתָּ לִרְא֑וֹת כִּֽי־שֹׁקֵ֥ד אֲנִ֛י עַל־דְּבָרִ֖י לַעֲשֹׂתֽוֹ׃ פ

‎13 ‏וַיְהִ֨י דְבַר־יְהוָ֤ה׀ אֵלַי֙ שֵׁנִ֣ית לֵאמֹ֔ר מָ֥ה אַתָּ֖ה רֹאֶ֑ה וָאֹמַ֗ר סִ֤יר נָפ֙וּחַ֙ אֲנִ֣י רֹאֶ֔ה וּפָנָ֖יו מִפְּנֵ֥י צָפֽוֹנָה׃

‎14 ‏וַיֹּ֥אמֶר יְהוָ֖ה אֵלָ֑י מִצָּפוֹן֙ תִּפָּתַ֣ח הָרָעָ֔ה עַ֥ל כָּל־יֹשְׁבֵ֖י הָאָֽרֶץ׃

‎15 ‏כִּ֣י׀ הִנְנִ֣י קֹרֵ֗א לְכָֽל־מִשְׁפְּח֛וֹת מַמְלְכ֥וֹת צָפ֖וֹנָה נְאֻם־יְהוָ֑ה וּבָ֡אוּ וְֽנָתְנוּ֩ אִ֨ישׁ כִּסְא֜וֹ פֶּ֣תַח׀ שַׁעֲרֵ֣י יְרוּשָׁלִַ֗ם וְעַ֤ל כָּל־חוֹמֹתֶ֙יהָ֙ סָבִ֔יב וְעַ֖ל כָּל־עָרֵ֥י יְהוּדָֽה׃

‎16 ‏וְדִבַּרְתִּ֤י מִשְׁפָּטַי֙ אוֹתָ֔ם עַ֖ל כָּל־רָעָתָ֑ם אֲשֶׁ֣ר עֲזָב֗וּנִי וַֽיְקַטְּרוּ֙ לֵאלֹהִ֣ים אֲחֵרִ֔ים וַיִּֽשְׁתַּחֲו֖וּ לְמַעֲשֵׂ֥י יְדֵיהֶֽם׃

‎17 ‏וְאַתָּה֙ תֶּאְזֹ֣ר מָתְנֶ֔יךָ וְקַמְתָּ֙ וְדִבַּרְתָּ֣ אֲלֵיהֶ֔ם אֵ֛ת כָּל־אֲשֶׁ֥ר אָנֹכִ֖י אֲצַוֶּ֑ךָּ אַל־תֵּחַת֙ מִפְּנֵיהֶ֔ם פֶּֽן־אֲחִתְּךָ֖ לִפְנֵיהֶֽם׃

‎18 ‏וַאֲנִ֞י הִנֵּ֧ה נְתַתִּ֣יךָ הַיּ֗וֹם לְעִ֨יר מִבְצָ֜ר וּלְעַמּ֥וּד בַּרְזֶ֛ל וּלְחֹמ֥וֹת נְחֹ֖שֶׁת עַל־כָּל־הָאָ֑רֶץ לְמַלְכֵ֤י יְהוּדָה֙ לְשָׂרֶ֔יהָ לְכֹהֲנֶ֖יהָ וּלְעַ֥ם הָאָֽרֶץ׃

‎19 ‏וְנִלְחֲמ֥וּ אֵלֶ֖יךָ וְלֹא־י֣וּכְלוּ לָ֑ךְ כִּֽי־אִתְּךָ֥ אֲנִ֛י נְאֻם־יְהוָ֖ה לְהַצִּילֶֽךָ׃ פ

1 diḇərê yirəməyâû ben-ḥiləqîyâû min-hakōhănîm ’ăšer b^a‘ănāṯwōṯ bə’ereṣ binəyāmin:

2 ’ăšer hāyâ ḏəḇar-yəhwâ ’ēlāyw bîmê yō’šîyâû ḇen-’āmwōn meleḵə yəhûḏâ bišəlōš-‘eśərēh šānâ ləmāləḵwō:

3 wayəhî bîmê yəhwōyāqîm ben-yō’šîyâû meleḵə yəhûḏâ ‘aḏ-tōm ‘ašətê ‘eśərēh šānâ ləṣiḏəqîyâû ḇen-yō’šîyâû meleḵə yəhûḏâ ‘aḏ-gəlwōṯ yərûšālaim b^aḥōḏeš h^aḥămîšî: s

4 wayəhî ḏəḇar-yəhwâ ’ēlay lē’mōr:

5 bəṭerem ’eṣṣwōrəḵā ’eṣṣārəḵā ḇabeṭen yəḏ^a‘ətîḵā ûḇəṭerem tēṣē’ mēreḥem hiqədašətîḵā nāḇî’ lagwōyim nəṯatîḵā:

6 wā’ōmar ’ăhāh ’ăḏōnāy yəhwōih hinnēh lō’-yāḏ^a‘ətî dabēr¹ kî-n^a‘ar ’ānōḵî: f

7 wayyō’mer yəhwâ ’ēlay ’al-tō’mar n^a‘ar ’ānōḵî kî ‘al-kāl-’ăšer ’ešəlāḥăḵā tēlēḵə wə’ēṯ kāl-’ăšer ’ăṣaûəḵā təḏabēr:

8 ’al-tîrā’ mipənêhem kî-’itəḵā ’ănî ləhaṣṣileḵā nə’um-yəhwâ:

9 wayyišəl^aḥ yəhwâ ’eṯ-yāḏwō wayyag^a‘ ‘al-pî wayyō’mer yəhwâ ’ēlay hinnēh nāṯatî ḏəḇāray bəfîḵā:

10 rə’ēh hifəqaḏətîḵā| hayywōm hazzeh ‘al-hagwōyim wə‘al-hammaməlāḵwōṯ linəṯwōš wəlinəṯwōṣ ûləha’ăḇîḏ wəlahărwōs liḇənwōṯ wəlinəṭwō‘a: f

11 wayəhî ḏəḇar-yəhwâ ’ēlay lē’mōr mâ-’atâ rō’eh yirəməyâû wā’ōmar maqqēl šāqēḏ ’ănî rō’eh:

12 wayyō’mer yəhwâ ’ēlay hêṭaḇətā lirə’wōṯ kî-šōqēḏ ’ănî ‘al-dəḇārî l^a‘ăśōṯwō: f

13 wayəhî ḏəḇar-yəhwâ| ’ēlay šēnîṯ lē’mōr mâ ’atâ rō’eh wā’ōmar sîr nāfûḥa ’ănî rō’eh ûfānāyw mipənê ṣāfwōnâ:

14 wayyō’mer yəhwâ ’ēlāy miṣṣāfwōn tipāṯ^aḥ hārā‘â ‘al kāl-yōšəḇê hā’āreṣ:

15 kî| hinənî qōrē’ ləḵāl-mišəpəḥwōṯ mamələḵwōṯ ṣāfwōnâ nə’um-yəhwâ ûḇā’û wənāṯənû ’îš kisə’wō peṯ^aḥ| š^a‘ărê yərûšālaim wə‘al kāl-ḥwōmōṯeyhā sāḇîḇ wə‘al kāl-‘ārê yəhûḏâ:

16 wəḏibarətî mišəpāṭay ’wōṯām ‘al kāl-rā‘āṯām ’ăšer ‘ăzāḇûnî wayəqaṭṭərû lē’lōhîm ’ăḥērîm wayyišət^aḥăwû ləm^a‘ăśê yəḏêhem:

17 wə’atâ te’əzōr māṯəneyḵā wəqamətā wəḏibarətā ’ălêhem ’ēṯ kāl-’ăšer ’ānōḵî ’ăṣaûeḵḵā ’al-tēḥaṯ mipənêhem pen-’ăḥitəḵā lifənêhem:

18 wa’ănî hinnēh nəṯatîḵā hayywōm lə‘îr miḇəṣār ûlə‘ammûḏ barəzel ûləḥōmwōṯ nəḥōšeṯ ‘al-kāl-hā’āreṣ ləmaləḵê yəhûḏâ ləśāreyhā ləḵōhăneyhā ûlə‘am hā’āreṣ:

19 wəniləḥămû ’ēleyḵā wəlō’-yûḵəlû lāḵə kî-’itəḵā ’ănî nə’um-yəhwâ ləhaṣṣîleḵā: f