Jeremiah (Yermiyah) Chapter 6

‎1 ‏הָעִ֣זוּ׀ בְּנֵ֣י בִניָמִ֗ן¹ מִקֶּ֙רֶב֙ יְר֣וּשָׁלִַ֔ם וּבִתְק֙וֹעַ֙ תִּקְע֣וּ שׁוֹפָ֔ר וְעַל־בֵּ֥ית הַכֶּ֖רֶם שְׂא֣וּ מַשְׂאֵ֑ת כִּ֥י רָעָ֛ה נִשְׁקְפָ֥ה מִצָּפ֖וֹן וְשֶׁ֥בֶר גָּדֽוֹל׃

‎2 ‏הַנָּוָה֙ וְהַמְּעֻנָּגָ֔ה דָּמִ֖יתִי בַּת־צִיּֽוֹן׃

‎3 ‏אֵלֶ֛יהָ יָבֹ֥אוּ רֹעִ֖ים וְעֶדְרֵיהֶ֑ם תָּקְע֨וּ עָלֶ֤יהָ אֹהָלִים֙ סָבִ֔יב רָע֖וּ אִ֥ישׁ אֶת־יָדֽוֹ׃

‎4 ‏קַדְּשׁ֤וּ עָלֶ֙יהָ֙ מִלְחָמָ֔ה ק֖וּמוּ וְנַעֲלֶ֣ה בַֽצָּהֳרָ֑יִם א֥וֹי לָ֙נוּ֙ כִּי־פָנָ֣ה הַיּ֔וֹם כִּ֥י יִנָּט֖וּ צִלְלֵי־עָֽרֶב׃

‎5 ‏ק֚וּמוּ וְנַעֲלֶ֣ה בַלָּ֔יְלָה וְנַשְׁחִ֖יתָה אַרְמְנוֹתֶֽיהָ׃ ס

‎6 ‏כִּ֣י כֹ֤ה אָמַר֙ יְהוָ֣ה צְבָא֔וֹת כִּרְת֣וּ עֵצָ֔ה וְשִׁפְכ֥וּ עַל־יְרוּשָׁלִַ֖ם סֹלְלָ֑ה הִ֚יא הָעִ֣יר הָפְקַ֔ד כֻּלָּ֖הּ עֹ֥שֶׁק בְּקִרְבָּֽהּ׃

‎7 ‏כְּהָקִ֥יר בור בַּ֙יִר֙ מֵימֶ֔יהָ כֵּ֖ן הֵקֵ֣רָה רָעָתָ֑הּ חָמָ֣ס וָ֠שֹׁד יִשָּׁ֨מַע בָּ֧הּ עַל־פָּנַ֛י תָּמִ֖יד חֳלִ֥י וּמַכָּֽה׃

‎8 ‏הִוָּסְרִי֙ יְר֣וּשָׁלִַ֔ם פֶּן־תֵּקַ֥ע נַפְשִׁ֖י מִמֵּ֑ךְ פֶּן־אֲשִׂימֵ֣ךְ שְׁמָמָ֔ה אֶ֖רֶץ ל֥וֹא נוֹשָֽׁבָה׃ פ

‎9 ‏כֹּ֤ה אָמַר֙ יְהוָֹ֣ה צְבָא֔וֹת עוֹלֵ֛ל יְעוֹלְל֥וּ כַגֶּ֖פֶן שְׁאֵרִ֣ית יִשְׂרָאֵ֑ל הָשֵׁב֙ יָדְךָ֔ כְּבוֹצֵ֖ר עַל־סַלְסִלּֽוֹת׃

‎10 ‏עַל־מִ֨י אֲדַבְּרָ֤ה וְאָעִ֙ידָה֙ וְיִשְׁמָ֔עוּ הִנֵּה֙ עֲרֵלָ֣ה אָזְנָ֔ם וְלֹ֥א יוּכְל֖וּ לְהַקְשִׁ֑יב הִנֵּ֣ה דְבַר־יְהוָ֗ה הָיָ֥ה לָהֶ֛ם לְחֶרְפָּ֖ה לֹ֥א יַחְפְּצוּ־בֽוֹ׃

‎11 ‏וְאֵת֩ חֲמַ֨ת יְהוָ֤ה׀ מָלֵ֙אתִי֙ נִלְאֵ֣יתִי הָכִ֔יל שְׁפֹ֤ךְ עַל־עוֹלָל֙ בַּח֔וּץ וְעַ֛ל ס֥וֹד בַּחוּרִ֖ים יַחְדָּ֑ו כִּֽי־גַם־אִ֤ישׁ עִם־אִשָּׁה֙ יִלָּכֵ֔דוּ זָקֵ֖ן עִם־מְלֵ֥א יָמִֽים׃

‎12 ‏וְנָסַ֤בּוּ בָֽתֵּיהֶם֙ לַאֲחֵרִ֔ים שָׂד֥וֹת וְנָשִׁ֖ים יַחְדָּ֑ו כִּֽי־אַטֶּ֧ה אֶת־יָדִ֛י עַל־יֹשְׁבֵ֥י הָאָ֖רֶץ נְאֻם־יְהוָֽה׃

‎13 ‏כִּ֤י מִקְּטַנָּם֙ וְעַד־גְּדוֹלָ֔ם כֻּלּ֖וֹ בּוֹצֵ֣עַ בָּ֑צַע וּמִנָּבִיא֙ וְעַד־כֹּהֵ֔ן כֻּלּ֖וֹ עֹ֥שֶׂה שָּֽׁקֶר׃

‎14 ‏וַֽיְרַפְּא֞וּ אֶת־שֶׁ֤בֶר עַמִּי֙ עַל־נְקַלָּ֔ה לֵאמֹ֖ר שָׁל֣וֹם׀ שָׁל֑וֹם וְאֵ֖ין שָׁלֽוֹם׃

‎15 ‏הֹבִ֕ישׁוּ כִּ֥י תוֹעֵבָ֖ה עָשׂ֑וּ גַּם־בּ֣וֹשׁ לֹֽא־יֵב֗וֹשׁוּ גַּם־הַכְלִים֙ לֹ֣א יָדָ֔עוּ לָכֵ֞ן יִפְּל֧וּ בַנֹּפְלִ֛ים בְּעֵת־פְּקַדְתִּ֥ים יִכָּשְׁל֖וּ אָמַ֥ר יְהוָֽה׃ ס

‎16 ‏כֹּ֣ה אָמַ֣ר יְהוָ֡ה עִמְדוּ֩ עַל־דְּרָכִ֨ים וּרְא֜וּ וְשַׁאֲל֣וּ׀ לִנְתִב֣וֹת עוֹלָ֗ם אֵי־זֶ֨ה דֶ֤רֶךְ הַטּוֹב֙ וּלְכוּ־בָ֔הּ וּמִצְא֥וּ מַרְגּ֖וֹעַ לְנַפְשְׁכֶ֑ם וַיֹּאמְר֖וּ לֹ֥א נֵלֵֽךְ׃

‎17 ‏וַהֲקִמֹתִ֤י עֲלֵיכֶם֙ צֹפִ֔ים הַקְשִׁ֖יבוּ לְק֣וֹל שׁוֹפָ֑ר וַיֹּאמְר֖וּ לֹ֥א נַקְשִֽׁיב׃

‎18 ‏לָכֵ֖ן שִׁמְע֣וּ הַגּוֹיִ֑ם וּדְעִ֥י עֵדָ֖ה אֶת־אֲשֶׁר־בָּֽם׃

‎19 ‏שִׁמְעִ֣י הָאָ֔רֶץ הִנֵּ֨ה אָנֹכִ֜י מֵבִ֥יא רָעָ֛ה אֶל־הָעָ֥ם הַזֶּ֖ה פְּרִ֣י מַחְשְׁבוֹתָ֑ם כִּ֤י עַל־דְּבָרַי֙ לֹ֣א הִקְשִׁ֔יבוּ וְתוֹרָתִ֖י וַיִּמְאֲסוּ־בָֽהּ׃

‎20 ‏לָמָּה־זֶּ֨ה לִ֤י לְבוֹנָה֙ מִשְּׁבָ֣א תָב֔וֹא וְקָנֶ֥ה הַטּ֖וֹב מֵאֶ֣רֶץ מֶרְחָ֑ק עֹלֽוֹתֵיכֶם֙ לֹ֣א לְרָצ֔וֹן וְזִבְחֵיכֶ֖ם לֹא־עָ֥רְבוּ לִֽי׃ ס

‎21 ‏לָכֵ֗ן כֹּ֚ה אָמַ֣ר יְהוָ֔ה הִנְנִ֥י נֹתֵ֛ן אֶל־הָעָ֥ם הַזֶּ֖ה מִכְשֹׁלִ֑ים וְכָ֣שְׁלוּ בָ֠ם אָב֨וֹת וּבָנִ֥ים יַחְדָּ֛ו שָׁכֵ֥ן וְרֵע֖וֹ יאבדו וְאָבָֽדוּ׃ פ

‎22 ‏כֹּ֚ה אָמַ֣ר יְהוָ֔ה הִנֵּ֛ה עַ֥ם בָּ֖א מֵאֶ֣רֶץ צָפ֑וֹן וְג֣וֹי גָּד֔וֹל יֵע֖וֹר מִיַּרְכְּתֵי־אָֽרֶץ׃

‎23 ‏קֶ֣שֶׁת וְכִיד֞וֹן יַחֲזִ֗יקוּ אַכְזָרִ֥י הוּא֙ וְלֹ֣א יְרַחֵ֔מוּ קוֹלָם֙ כַּיָּ֣ם יֶהֱמֶ֔ה וְעַל־סוּסִ֖ים יִרְכָּ֑בוּ עָר֗וּךְ כְּאִישׁ֙ לַמִּלְחָמָ֔ה עָלַ֖יִךְ בַּת־צִיּֽוֹן׃

‎24 ‏שָׁמַ֥עְנוּ אֶת־שָׁמְע֖וֹ רָפ֣וּ יָדֵ֑ינוּ צָרָה֙ הֶחֱזִיקַ֔תְנוּ חִ֖יל כַּיּוֹלֵדָֽה׃

‎25 ‏אַל־תצאי תֵּֽצְאוּ֙ הַשָּׂדֶ֔ה וּבַדֶּ֖רֶךְ אַל־תלכי תֵּלֵ֑כוּ כִּ֚י חֶ֣רֶב לְאֹיֵ֔ב מָג֖וֹר מִסָּבִֽיב׃

‎26 ‏בַּת־עַמִּ֤י חִגְרִי־שָׂק֙ וְהִתְפַּלְּשִׁ֣י בָאֵ֔פֶר אֵ֤בֶל יָחִיד֙ עֲשִׂ֣י לָ֔ךְ מִסְפַּ֖ד תַּמְרוּרִ֑ים כִּ֣י פִתְאֹ֔ם יָבֹ֥א הַשֹּׁדֵ֖ד עָלֵֽינוּ׃

‎27 ‏בָּח֛וֹן נְתַתִּ֥יךָ בְעַמִּ֖י מִבְצָ֑ר וְתֵדַ֕ע וּבָחַנְתָּ֖ אֶת־דַּרְכָּֽם׃

‎28 ‏כֻּלָּם֙ סָרֵ֣י סֽוֹרְרִ֔ים הֹלְכֵ֥י רָכִ֖יל נְחֹ֣שֶׁת וּבַרְזֶ֑ל כֻּלָּ֥ם מַשְׁחִיתִ֖ים הֵֽמָּה׃

‎29 ‏נָחַ֣ר מַפֻּ֔חַ מאשתם מֵאֵ֖שׁ תַּ֣ם עֹפָ֑רֶת לַשָּׁוְא֙ צָרַ֣ף צָר֔וֹף וְרָעִ֖ים לֹ֥א נִתָּֽקוּ׃

‎30 ‏כֶּ֣סֶף נִמְאָ֔ס קָרְא֖וּ לָהֶ֑ם כִּֽי־מָאַ֥ס יְהוָ֖ה בָּהֶֽם׃ פ

1 hā‘izû| bənê ḇinyāmin¹ miqqereḇ yərûšālaim ûḇiṯəqwō‘a tiqə‘û šwōfār wə‘al-bêṯ hakerem śə’û maśə’ēṯ kî rā‘â nišəqəfâ miṣṣāfwōn wəšeḇer gāḏwōl:

2 hannāwâ wəhammə‘unnāḡâ dāmîṯî baṯ-ṣîywōn:

3 ’ēleyhā yāḇō’û rō‘îm wə‘eḏərêhem tāqə‘û ‘āleyhā ’ōhālîm sāḇîḇ rā‘û ’îš ’eṯ-yāḏwō:

4 qadəšû ‘āleyhā miləḥāmâ qûmû wən^a‘ăleh ḇaṣṣâŏrāyim ’wōy lānû kî-fānâ hayywōm kî yinnāṭû ṣiləlê-‘āreḇ:

5 qûmû wən^a‘ăleh ḇallāyəlâ wənašəḥîṯâ ’arəmənwōṯeyhā: s

6 kî ḵōh ’āmar yəhwâ ṣəḇā’wōṯ kirəṯû ‘ēṣâ wəšifəḵû ‘al-yərûšālaim sōləlâ hî’ hā‘îr hāfəqaḏ kullāh ‘ōšeq bəqirəbāh:

7 kəhāqîr bəwēr bayir mêmeyhā kēn hēqērâ rā‘āṯāh ḥāmās wāšōḏ yiššām^a‘ bāh ‘al-pānay tāmîḏ ḥŏlî ûmakâ:

8 hiûāsərî yərûšālaim pen-tēq^a‘ nafəšî mimmēḵə pen-’ăśîmēḵə šəmāmâ ’ereṣ lwō’ nwōšāḇâ: f

9 kōh ’āmar yəhwōâ ṣəḇā’wōṯ ‘wōlēl yə‘wōləlû ḵagefen šə’ērîṯ yiśərā’ēl hāšēḇ yāḏəḵā kəḇwōṣēr ‘al-saləsillwōṯ:

10 ‘al-mî ’ăḏabərâ wə’ā‘îḏâ wəyišəmā‘û hinnēh ‘ărēlâ ’āzənām wəlō’ yûḵəlû ləhaqəšîḇ hinnēh ḏəḇar-yəhwâ hāyâ lâem ləḥerəpâ lō’ y^aḥəpəṣû-ḇwō:

11 wə’ēṯ ḥămaṯ yəhwâ| mālē’ṯî nilə’êṯî hāḵîl šəfōḵə ‘al-‘wōlāl b^aḥûṣ wə‘al swōḏ b^aḥûrîm y^aḥədāw kî-ḡam-’îš ‘im-’iššâ yillāḵēḏû zāqēn ‘im-məlē’ yāmîm:

12 wənāsabû ḇātêhem la’ăḥērîm śāḏwōṯ wənāšîm y^aḥədāw kî-’aṭṭeh ’eṯ-yāḏî ‘al-yōšəḇê hā’āreṣ nə’um-yəhwâ:

13 kî miqqəṭannām wə‘aḏ-gəḏwōlām kullwō bwōṣē‘a bāṣ^a‘ ûminnāḇî’ wə‘aḏ-kōhēn kullwō ‘ōśeh ššāqer:

14 wayərapə’û ’eṯ-šeḇer ‘ammî ‘al-nəqallâ lē’mōr šālwōm| šālwōm wə’ên šālwōm:

15 hōḇîšû kî ṯwō‘ēḇâ ‘āśû gam-bwōš lō’-yēḇwōšû gam-haḵəlîm lō’ yāḏā‘û lāḵēn yipəlû ḇannōfəlîm bə‘ēṯ-pəqaḏətîm yikāšəlû ’āmar yəhwâ: s

16 kōh ’āmar yəhwâ ‘iməḏû ‘al-dərāḵîm ûrə’û wəša’ălû| linəṯiḇwōṯ ‘wōlām ’ê-zeh ḏereḵə haṭṭwōḇ ûləḵû-ḇāh ûmiṣə’û marəgwō‘a lənafəšəḵem wayyō’mərû lō’ nēlēḵə:

17 wahăqimōṯî ‘ălêḵem ṣōfîm haqəšîḇû ləqwōl šwōfār wayyō’mərû lō’ naqəšîḇ:

18 lāḵēn šimə‘û hagwōyim ûḏə‘î ‘ēḏâ ’eṯ-’ăšer-bām:

19 šimə‘î hā’āreṣ hinnēh ’ānōḵî mēḇî’ rā‘â ’el-hā‘ām hazzeh pərî m^aḥəšəḇwōṯām kî ‘al-dəḇāray lō’ hiqəšîḇû wəṯwōrāṯî wayyimə’ăsû-ḇāh:

20 lāmmâ-zzeh lî ləḇwōnâ miššəḇā’ ṯāḇwō’ wəqāneh haṭṭwōḇ mē’ereṣ merəḥāq ‘ōlwōṯêḵem lō’ lərāṣwōn wəziḇəḥêḵem lō’-‘ārəḇû lî: s

21 lāḵēn kōh ’āmar yəhwâ hinənî nōṯēn ’el-hā‘ām hazzeh miḵəšōlîm wəḵāšəlû ḇām ’āḇwōṯ ûḇānîm y^aḥədāw šāḵēn wərē‘wō yō’ḇēḏû wə’āḇāḏû: f

22 kōh ’āmar yəhwâ hinnēh ‘am bā’ mē’ereṣ ṣāfwōn wəḡwōy gāḏwōl yē‘wōr mîyarəkəṯê-’āreṣ:

23 qešeṯ wəḵîḏwōn y^aḥăzîqû ’aḵəzārî hû’ wəlō’ yər^aḥēmû qwōlām kayyām yehĕmeh wə‘al-sûsîm yirəkāḇû ‘ārûḵə kə’îš lammiləḥāmâ ‘ālayiḵə baṯ-ṣîywōn:

24 šām^a‘ənû ’eṯ-šāmə‘wō rāfû yāḏênû ṣārâ heḥĕzîqaṯənû ḥîl kayywōlēḏâ:

25 ’al-tēṣə’î tēṣə’û haśśāḏeh ûḇadereḵə ’al-tēlēḵî tēlēḵû kî ḥereḇ lə’ōyēḇ māḡwōr missāḇîḇ:

26 baṯ-‘ammî ḥiḡərî-śāq wəhiṯəpalləšî ḇā’ēfer ’ēḇel yāḥîḏ ‘ăśî lāḵə misəpaḏ tamərûrîm kî fiṯə’ōm yāḇō’ haššōḏēḏ ‘ālênû:

27 bāḥwōn nəṯatîḵā ḇə‘ammî miḇəṣār wəṯēḏ^a‘ ûḇāḥanətā ’eṯ-darəkām:

28 kullām sārê swōrərîm hōləḵê rāḵîl nəḥōšeṯ ûḇarəzel kullām mašəḥîṯîm hēmmâ:

29 nāḥar mapuḥa mē’išətam mē’ēš tam ‘ōfāreṯ laššāwə’ ṣāraf ṣārwōf wərā‘îm lō’ nitāqû:

30 kesef nimə’ās qārə’û lâem kî-mā’as yəhwâ bâem: f