Jeremiah (Yermiyah) Chapter 7

‎1 ‏הַדָּבָר֙ אֲשֶׁ֣ר הָיָ֣ה אֶֽל־יִרְמְיָ֔הוּ מֵאֵ֥ת יְהוָ֖ה לֵאמֹֽר׃

‎2 ‏עֲמֹ֗ד בְּשַׁ֙עַר֙ בֵּ֣ית יְהוָ֔ה וְקָרָ֣אתָ שָּׁ֔ם אֶת־הַדָּבָ֖ר הַזֶּ֑ה וְאָמַרְתָּ֞ שִׁמְע֣וּ דְבַר־יְהוָ֗ה כָּל־יְהוּדָה֙ הַבָּאִים֙ בַּשְּׁעָרִ֣ים הָאֵ֔לֶּה לְהִֽשְׁתַּחֲוֹ֖ת לַיהוָֽה׃ ס

‎3 ‏כֹּֽה־אָמַ֞ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל הֵיטִ֥יבוּ דַרְכֵיכֶ֖ם וּמַֽעַלְלֵיכֶ֑ם וַאֲשַׁכְּנָ֣ה אֶתְכֶ֔ם בַּמָּק֥וֹם הַזֶּֽה׃

‎4 ‏אַל־תִּבְטְח֣וּ לָכֶ֔ם אֶל־דִּבְרֵ֥י הַשֶּׁ֖קֶר לֵאמֹ֑ר הֵיכַ֤ל יְהוָה֙ הֵיכַ֣ל יְהוָ֔ה הֵיכַ֥ל יְהוָ֖ה הֵֽמָּה׃

‎5 ‏כִּ֤י אִם־הֵיטֵיב֙ תֵּיטִ֔יבוּ אֶת־דַּרְכֵיכֶ֖ם וְאֶת־מַֽעַלְלֵיכֶ֑ם אִם־עָשׂ֤וֹ תַֽעֲשׂוּ֙ מִשְׁפָּ֔ט בֵּ֥ין אִ֖ישׁ וּבֵ֥ין רֵעֵֽהוּ׃

‎6 ‏גֵּ֣ר יָת֤וֹם וְאַלְמָנָה֙ לֹ֣א תַֽעֲשֹׁ֔קוּ וְדָ֣ם נָקִ֔י אַֽל־תִּשְׁפְּכ֖וּ בַּמָּק֣וֹם הַזֶּ֑ה וְאַחֲרֵ֨י אֱלֹהִ֧ים אֲחֵרִ֛ים לֹ֥א תֵלְכ֖וּ לְרַ֥ע לָכֶֽם׃

‎7 ‏וְשִׁכַּנְתִּ֤י אֶתְכֶם֙ בַּמָּק֣וֹם הַזֶּ֔ה בָּאָ֕רֶץ אֲשֶׁ֥ר נָתַ֖תִּי לַאֲבֽוֹתֵיכֶ֑ם לְמִן־עוֹלָ֖ם וְעַד־עוֹלָֽם׃

‎8 ‏הִנֵּ֤ה אַתֶּם֙ בֹּטְחִ֣ים לָכֶ֔ם עַל־דִּבְרֵ֖י הַשָּׁ֑קֶר לְבִלְתִּ֖י הוֹעִֽיל׃

‎9 ‏הֲגָנֹ֤ב׀ רָצֹ֙חַ֙ וְֽנָאֹ֗ף וְהִשָּׁבֵ֥עַ לַשֶּׁ֖קֶר וְקַטֵּ֣ר לַבָּ֑עַל וְהָלֹ֗ךְ אַחֲרֵ֛י אֱלֹהִ֥ים אֲחֵרִ֖ים אֲשֶׁ֥ר לֹֽא־יְדַעְתֶּֽם׃

‎10 ‏וּבָאתֶ֞ם וַעֲמַדְתֶּ֣ם לְפָנַ֗י בַּבַּ֤יִת הַזֶּה֙ אֲשֶׁ֣ר נִקְרָא־שְׁמִ֣י עָלָ֔יו וַאֲמַרְתֶּ֖ם נִצַּ֑לְנוּ לְמַ֣עַן עֲשׂ֔וֹת אֵ֥ת כָּל־הַתּוֹעֵב֖וֹת הָאֵֽלֶּה׃

‎11 ‏הַמְעָרַ֣ת פָּרִצִ֗ים הָיָ֨ה הַבַּ֧יִת הַזֶּ֛ה אֲשֶׁר־נִקְרָֽא־שְׁמִ֥י עָלָ֖יו בְּעֵינֵיכֶ֑ם גַּ֧ם אָנֹכִ֛י הִנֵּ֥ה רָאִ֖יתִי נְאֻם־יְהוָֽה׃ ס

‎12 ‏כִּ֣י לְכוּ־נָ֗א אֶל־מְקוֹמִי֙ אֲשֶׁ֣ר בְּשִׁיל֔וֹ אֲשֶׁ֨ר שִׁכַּ֧נְתִּֽי שְׁמִ֛י שָׁ֖ם בָּרִֽאשׁוֹנָ֑ה וּרְאוּ֙ אֵ֣ת אֲשֶׁר־עָשִׂ֣יתִי ל֔וֹ מִפְּנֵ֕י רָעַ֖ת עַמִּ֥י יִשְׂרָאֵֽל׃

‎13 ‏וְעַתָּ֗ה יַ֧עַן עֲשׂוֹתְכֶ֛ם אֶת־כָּל־הַמַּֽעֲשִׂ֥ים הָאֵ֖לֶּה נְאֻם־יְהוָ֑ה וָאֲדַבֵּ֨ר אֲלֵיכֶ֜ם הַשְׁכֵּ֤ם וְדַבֵּר֙ וְלֹ֣א שְׁמַעְתֶּ֔ם וָאֶקְרָ֥א אֶתְכֶ֖ם וְלֹ֥א עֲנִיתֶֽם׃

‎14 ‏וְעָשִׂ֜יתִי לַבַּ֣יִת׀ אֲשֶׁ֧ר נִֽקְרָא־שְׁמִ֣י עָלָ֗יו אֲשֶׁ֤ר אַתֶּם֙ בֹּטְחִ֣ים בּ֔וֹ וְלַ֨מָּק֔וֹם אֲשֶׁר־נָתַ֥תִּי לָכֶ֖ם וְלַאֲבֽוֹתֵיכֶ֑ם כַּאֲשֶׁ֥ר עָשִׂ֖יתִי לְשִׁלֽוֹ׃

‎15 ‏וְהִשְׁלַכְתִּ֥י אֶתְכֶ֖ם מֵעַ֣ל פָּנָ֑י כַּאֲשֶׁ֤ר הִשְׁלַ֙כְתִּי֙ אֶת־כָּל־אֲחֵיכֶ֔ם אֵ֖ת כָּל־זֶ֥רַע אֶפְרָֽיִם׃ ס

‎16 ‏וְאַתָּ֞ה אַל־תִּתְפַּלֵּ֣ל׀ בְּעַד־הָעָ֣ם הַזֶּ֗ה וְאַל־תִּשָּׂ֧א בַעֲדָ֛ם רִנָּ֥ה וּתְפִלָּ֖ה וְאַל־תִּפְגַּע־בִּ֑י כִּי־אֵינֶ֥נִּי שֹׁמֵ֖עַ אֹתָֽךְ׃

‎17 ‏הַֽאֵינְךָ֣ רֹאֶ֔ה מָ֛ה הֵ֥מָּה עֹשִׂ֖ים בְּעָרֵ֣י יְהוּדָ֑ה וּבְחֻצ֖וֹת יְרוּשָׁלִָֽם׃

‎18 ‏הַבָּנִ֞ים מְלַקְּטִ֣ים עֵצִ֗ים וְהָֽאָבוֹת֙ מְבַעֲרִ֣ים אֶת־הָאֵ֔שׁ וְהַנָּשִׁ֖ים לָשׁ֣וֹת בָּצֵ֑ק לַעֲשׂ֨וֹת כַּוָּנִ֜ים לִמְלֶ֣כֶת הַשָּׁמַ֗יִם וְהַסֵּ֤ךְ נְסָכִים֙ לֵאלֹהִ֣ים אֲחֵרִ֔ים לְמַ֖עַן הַכְעִסֵֽנִי׃

‎19 ‏הַאֹתִ֛י הֵ֥ם מַכְעִסִ֖ים נְאֻם־יְהוָ֑ה הֲל֣וֹא אֹתָ֔ם לְמַ֖עַן בֹּ֥שֶׁת פְּנֵיהֶֽם׃ ס

‎20 ‏לָכֵ֞ן כֹּה־אָמַ֣ר׀ אֲדֹנָ֣י יְהוִֹ֗ה הִנֵּ֨ה אַפִּ֤י וַֽחֲמָתִי֙ נִתֶּ֙כֶת֙ אֶל־הַמָּק֣וֹם הַזֶּ֔ה עַל־הָֽאָדָם֙ וְעַל־הַבְּהֵמָ֔ה וְעַל־עֵ֥ץ הַשָּׂדֶ֖ה וְעַל־פְּרִ֣י הָֽאֲדָמָ֑ה וּבָעֲרָ֖ה וְלֹ֥א תִכְבֶּֽה׃ ס

‎21 ‏כֹּ֥ה אָמַ֛ר יְהוָ֥ה צְבָא֖וֹת אֱלֹהֵ֣י יִשְׂרָאֵ֑ל עֹלוֹתֵיכֶ֛ם סְפ֥וּ עַל־זִבְחֵיכֶ֖ם וְאִכְל֥וּ בָשָֽׂר׃

‎22 ‏כִּ֠י לֹֽא־דִבַּ֤רְתִּי אֶת־אֲבֽוֹתֵיכֶם֙ וְלֹ֣א צִוִּיתִ֔ים בְּי֛וֹם הוציא הוֹצִיאִ֥י אוֹתָ֖ם מֵאֶ֣רֶץ מִצְרָ֑יִם עַל־דִּבְרֵ֥י עוֹלָ֖ה וָזָֽבַח׃

‎23 ‏כִּ֣י אִֽם־אֶת־הַדָּבָ֣ר הַ֠זֶּה צִוִּ֨יתִי אוֹתָ֤ם לֵאמֹר֙ שִׁמְע֣וּ בְקוֹלִ֔י וְהָיִ֤יתִי לָכֶם֙ לֵֽאלֹהִ֔ים וְאַתֶּ֖ם תִּֽהְיוּ־לִ֣י לְעָ֑ם וַהֲלַכְתֶּ֗ם בְּכָל־הַדֶּ֙רֶךְ֙ אֲשֶׁ֣ר אֲצַוֶּ֣ה אֶתְכֶ֔ם לְמַ֖עַן יִיטַ֥ב לָכֶֽם׃

‎24 ‏וְלֹ֤א שָֽׁמְעוּ֙ וְלֹֽא־הִטּ֣וּ אֶת־אָזְנָ֔ם וַיֵּֽלְכוּ֙ בְּמֹ֣עֵצ֔וֹת בִּשְׁרִר֖וּת לִבָּ֣ם הָרָ֑ע וַיִּהְי֥וּ לְאָח֖וֹר וְלֹ֥א לְפָנִֽים׃

‎25 ‏לְמִן־הַיּ֗וֹם אֲשֶׁ֨ר יָצְא֤וּ אֲבֽוֹתֵיכֶם֙ מֵאֶ֣רֶץ מִצְרַ֔יִם עַ֖ד הַיּ֣וֹם הַזֶּ֑ה וָאֶשְׁלַ֤ח אֲלֵיכֶם֙ אֶת־כָּל־עֲבָדַ֣י הַנְּבִיאִ֔ים י֖וֹם הַשְׁכֵּ֥ם וְשָׁלֹֽחַ׃

‎26 ‏וְל֤וֹא שָׁמְעוּ֙ אֵלַ֔י וְלֹ֥א הִטּ֖וּ אֶת־אָזְנָ֑ם וַיַּקְשׁוּ֙ אֶת־עָרְפָּ֔ם הֵרֵ֖עוּ מֵאֲבוֹתָֽם׃

‎27 ‏וְדִבַּרְתָּ֤ אֲלֵיהֶם֙ אֶת־כָּל־הַדְּבָרִ֣ים הָאֵ֔לֶּה וְלֹ֥א יִשְׁמְע֖וּ אֵלֶ֑יךָ וְקָרָ֥אתָ אֲלֵיהֶ֖ם וְלֹ֥א יַעֲנֽוּכָה׃

‎28 ‏וְאָמַרְתָּ֣ אֲלֵיהֶ֗ם זֶ֤ה הַגּוֹי֙ אֲשֶׁ֣ר לֽוֹא־שָׁמְע֗וּ בְּקוֹל֙ יְהוָ֣ה אֱלֹהָ֔יו וְלֹ֥א לָקְח֖וּ מוּסָ֑ר אָֽבְדָה֙ הָֽאֱמוּנָ֔ה וְנִכְרְתָ֖ה מִפִּיהֶֽם׃ ס

‎29 ‏גָּזִּ֤י נִזְרֵךְ֙ וְֽהַשְׁלִ֔יכִי וּשְׂאִ֥י עַל־שְׁפָיִ֖ם קִינָ֑ה כִּ֚י מָאַ֣ס יְהוָ֔ה וַיִּטֹּ֖שׁ אֶת־דּ֥וֹר עֶבְרָתֽוֹ׃

‎30 ‏כִּֽי־עָשׂ֨וּ בְנֵי־יְהוּדָ֥ה הָרַ֛ע בְּעֵינַ֖י נְאֻום־יְהוָ֑ה שָׂ֣מוּ שִׁקּֽוּצֵיהֶ֗ם בַּבַּ֛יִת אֲשֶׁר־נִקְרָא־שְׁמִ֥י עָלָ֖יו לְטַמְּאֽוֹ׃

‎31 ‏וּבָנ֞וּ בָּמ֣וֹת הַתֹּ֗פֶת אֲשֶׁר֙ בְּגֵ֣יא בֶן־הִנֹּ֔ם לִשְׂרֹ֛ף אֶת־בְּנֵיהֶ֥ם וְאֶת־בְּנֹתֵיהֶ֖ם בָּאֵ֑שׁ אֲשֶׁר֙ לֹ֣א צִוִּ֔יתִי וְלֹ֥א עָלְתָ֖ה עַל־לִבִּֽי׃ ס

‎32 ‏לָכֵ֞ן הִנֵּֽה־יָמִ֤ים בָּאִים֙ נְאֻם־יְהוָ֔ה וְלֹא־יֵאָמֵ֨ר ע֤וֹד הַתֹּ֙פֶת֙ וְגֵ֣יא בֶן־הִנֹּ֔ם כִּ֖י אִם־גֵּ֣יא הַהֲרֵגָ֑ה וְקָבְר֥וּ בְתֹ֖פֶת מֵאֵ֥ין מָקֽוֹם׃

‎33 ‏וְֽהָ֨יְתָ֜ה נִבְלַ֨ת הָעָ֤ם הַזֶּה֙ לְמַֽאֲכָ֔ל לְע֥וֹף הַשָּׁמַ֖יִם וּלְבֶהֱמַ֣ת הָאָ֑רֶץ וְאֵ֖ין מַחֲרִֽיד׃

‎34 ‏וְהִשְׁבַּתִּ֣י׀ מֵעָרֵ֣י יְהוּדָ֗ה וּמֵֽחֻצוֹת֙ יְר֣וּשָׁלִַ֔ם ק֤וֹל שָׂשׂוֹן֙ וְק֣וֹל שִׂמְחָ֔ה ק֥וֹל חָתָ֖ן וְק֣וֹל כַּלָּ֑ה כִּ֥י לְחָרְבָּ֖ה תִּהְיֶ֥ה הָאָֽרֶץ׃

1 hadāḇār ’ăšer hāyâ ’el-yirəməyâû mē’ēṯ yəhwâ lē’mōr:

2 ‘ămōḏ bəš^a‘ar bêṯ yəhwâ wəqārā’ṯā ššām ’eṯ-hadāḇār hazzeh wə’āmarətā šimə‘û ḏəḇar-yəhwâ kāl-yəhûḏâ habā’îm baššə‘ārîm hā’ēlleh ləhišət^aḥăwōṯ layhwâ: s

3 kōh-’āmar yəhwâ ṣəḇā’wōṯ ’ĕlōhê yiśərā’ēl hêṭîḇû ḏarəḵêḵem ûm^a‘aləlêḵem wa’ăšakənâ ’eṯəḵem bammāqwōm hazzeh:

4 ’al-tiḇəṭəḥû lāḵem ’el-diḇərê haššeqer lē’mōr hêḵal yəhwâ hêḵal yəhwâ hêḵal yəhwâ hēmmâ:

5 kî ’im-hêṭêḇ têṭîḇû ’eṯ-darəḵêḵem wə’eṯ-m^a‘aləlêḵem ’im-‘āśwō ṯ^a‘ăśû mišəpāṭ bên ’îš ûḇên rē‘ēhû:

6 gēr yāṯwōm wə’aləmānâ lō’ ṯ^a‘ăšōqû wəḏām nāqî ’al-tišəpəḵû bammāqwōm hazzeh wə’^aḥărê ’ĕlōhîm ’ăḥērîm lō’ ṯēləḵû lər^a‘ lāḵem:

7 wəšikanətî ’eṯəḵem bammāqwōm hazzeh bā’āreṣ ’ăšer nāṯatî la’ăḇwōṯêḵem ləmin-‘wōlām wə‘aḏ-‘wōlām:

8 hinnēh ’atem bōṭəḥîm lāḵem ‘al-diḇərê haššāqer ləḇilətî hwō‘îl:

9 hăḡānōḇ| rāṣōḥa wənā’ōf wəhiššāḇē‘a laššeqer wəqaṭṭēr labā‘al wəhālōḵə ’^aḥărê ’ĕlōhîm ’ăḥērîm ’ăšer lō’-yəḏ^a‘ətem:

10 ûḇā’ṯem w^a‘ămaḏətem ləfānay babayiṯ hazzeh ’ăšer niqərā’-šəmî ‘ālāyw wa’ămarətem niṣṣalənû ləm^a‘an ‘ăśwōṯ ’ēṯ kāl-hatwō‘ēḇwōṯ hā’ēlleh:

11 hamə‘āraṯ pāriṣîm hāyâ habayiṯ hazzeh ’ăšer-niqərā’-šəmî ‘ālāyw bə‘ênêḵem gam ’ānōḵî hinnēh rā’îṯî nə’um-yəhwâ: s

12 kî ləḵû-nā’ ’el-məqwōmî ’ăšer bəšîlwō ’ăšer šikanətî šəmî šām bāri’šwōnâ ûrə’û ’ēṯ ’ăšer-‘āśîṯî lwō mipənê rā‘aṯ ‘ammî yiśərā’ēl:

13 wə‘atâ y^a‘an ‘ăśwōṯəḵem ’eṯ-kāl-hamm^a‘ăśîm hā’ēlleh nə’um-yəhwâ wā’ăḏabēr ’ălêḵem hašəkēm wəḏabēr wəlō’ šəm^a‘ətem wā’eqərā’ ’eṯəḵem wəlō’ ‘ănîṯem:

14 wə‘āśîṯî labayiṯ| ’ăšer niqərā’-šəmî ‘ālāyw ’ăšer ’atem bōṭəḥîm bwō wəlammāqwōm ’ăšer-nāṯatî lāḵem wəla’ăḇwōṯêḵem ka’ăšer ‘āśîṯî ləšilwō:

15 wəhišəlaḵətî ’eṯəḵem mē‘al pānāy ka’ăšer hišəlaḵətî ’eṯ-kāl-’ăḥêḵem ’ēṯ kāl-zer^a‘ ’efərāyim: s

16 wə’atâ ’al-tiṯəpallēl| bə‘aḏ-hā‘ām hazzeh wə’al-tiśśā’ ḇ^a‘ăḏām rinnâ ûṯəfillâ wə’al-tifəg^a‘-bî kî-’ênennî šōmē‘a ’ōṯāḵə:

17 ha’ênəḵā rō’eh mâ hēmmâ ‘ōśîm bə‘ārê yəhûḏâ ûḇəḥuṣwōṯ yərûšālāim:

18 habānîm məlaqqəṭîm ‘ēṣîm wəhā’āḇwōṯ məḇ^a‘ărîm ’eṯ-hā’ēš wəhannāšîm lāšwōṯ bāṣēq l^a‘ăśwōṯ kaûānîm liməleḵeṯ haššāmayim wəhassēḵə nəsāḵîm lē’lōhîm ’ăḥērîm ləm^a‘an haḵə‘isēnî:

19 ha’ōṯî hēm maḵə‘isîm nə’um-yəhwâ hălwō’ ’ōṯām ləm^a‘an bōšeṯ pənêhem: s

20 lāḵēn kōh-’āmar| ’ăḏōnāy yəhwōih hinnēh ’apî w^aḥămāṯî niteḵeṯ ’el-hammāqwōm hazzeh ‘al-hā’āḏām wə‘al-habəhēmâ wə‘al-‘ēṣ haśśāḏeh wə‘al-pərî hā’ăḏāmâ ûḇā‘ărâ wəlō’ ṯiḵəbeh: s

21 kōh ’āmar yəhwâ ṣəḇā’wōṯ ’ĕlōhê yiśərā’ēl ‘ōlwōṯêḵem səfû ‘al-ziḇəḥêḵem wə’iḵəlû ḇāśār:

22 kî lō’-ḏibarətî ’eṯ-’ăḇwōṯêḵem wəlō’ ṣiûîṯîm bəywōm hwōṣî’ hwōṣî’î ’wōṯām mē’ereṣ miṣərāyim ‘al-diḇərê ‘wōlâ wāzāḇ^aḥ:

23 kî ’im-’eṯ-hadāḇār hazzeh ṣiûîṯî ’wōṯām lē’mōr šimə‘û ḇəqwōlî wəhāyîṯî lāḵem lē’lōhîm wə’atem tihəyû-lî lə‘ām wahălaḵətem bəḵāl-hadereḵə ’ăšer ’ăṣaûeh ’eṯəḵem ləm^a‘an yîṭaḇ lāḵem:

24 wəlō’ šāmə‘û wəlō’-hiṭṭû ’eṯ-’āzənām wayyēləḵû bəmō‘ēṣwōṯ bišərirûṯ libām hārā‘ wayyihəyû lə’āḥwōr wəlō’ ləfānîm:

25 ləmin-hayywōm ’ăšer yāṣə’û ’ăḇwōṯêḵem mē’ereṣ miṣərayim ‘aḏ hayywōm hazzeh wā’ešəl^aḥ ’ălêḵem ’eṯ-kāl-‘ăḇāḏay hannəḇî’îm ywōm hašəkēm wəšālōḥa:

26 wəlwō’ šāmə‘û ’ēlay wəlō’ hiṭṭû ’eṯ-’āzənām wayyaqəšû ’eṯ-‘ārəpām hērē‘û mē’ăḇwōṯām:

27 wəḏibarətā ’ălêhem ’eṯ-kāl-hadəḇārîm hā’ēlleh wəlō’ yišəmə‘û ’ēleyḵā wəqārā’ṯā ’ălêhem wəlō’ y^a‘ănûḵâ:

28 wə’āmarətā ’ălêhem zeh hagwōy ’ăšer lwō’-šāmə‘û bəqwōl yəhwâ ’ĕlōhāyw wəlō’ lāqəḥû mûsār ’āḇəḏâ hā’ĕmûnâ wəniḵərəṯâ mipîhem: s

29 gāzzî nizərēḵə wəhašəlîḵî ûśə’î ‘al-šəfāyim qînâ kî mā’as yəhwâ wayyiṭṭōš ’eṯ-dwōr ‘eḇərāṯwō:

30 kî-‘āśû ḇənê-yəhûḏâ hār^a‘ bə‘ênay nə’uwm-yəhwâ śāmû šiqqûṣêhem babayiṯ ’ăšer-niqərā’-šəmî ‘ālāyw ləṭammə’wō:

31 ûḇānû bāmwōṯ hatōfeṯ ’ăšer bəḡê’ ḇen-hinnōm liśərōf ’eṯ-bənêhem wə’eṯ-bənōṯêhem bā’ēš ’ăšer lō’ ṣiûîṯî wəlō’ ‘āləṯâ ‘al-libî: s

32 lāḵēn hinnēh-yāmîm bā’îm nə’um-yəhwâ wəlō’-yē’āmēr ‘wōḏ hatōfeṯ wəḡê’ ḇen-hinnōm kî ’im-gê’ hahărēḡâ wəqāḇərû ḇəṯōfeṯ mē’ên māqwōm:

33 wəhāyəṯâ niḇəlaṯ hā‘ām hazzeh ləma’ăḵāl lə‘wōf haššāmayim ûləḇehĕmaṯ hā’āreṣ wə’ên m^aḥărîḏ:

34 wəhišəbatî| mē‘ārê yəhûḏâ ûmēḥuṣwōṯ yərûšālaim qwōl śāśwōn wəqwōl śiməḥâ qwōl ḥāṯān wəqwōl kallâ kî ləḥārəbâ tihəyeh hā’āreṣ: