Jeremiah (Yermiyah) Chapter 8

‎1 ‏בָּעֵ֣ת הַהִ֣יא נְאֻם־יְהוָ֡ה ויציאו יוֹצִ֣יאוּ אֶת־עַצְמ֣וֹת מַלְכֵֽי־יְהוּדָ֣ה וְאֶת־עַצְמוֹת־שָׂרָיו֩ וְאֶת־עַצְמ֨וֹת הַכֹּהֲנִ֜ים וְאֵ֣ת׀ עַצְמ֣וֹת הַנְּבִיאִ֗ים וְאֵ֛ת עַצְמ֥וֹת יוֹשְׁבֵֽי־יְרוּשָׁלִָ֖ם מִקִּבְרֵיהֶֽם׃

‎2 ‏וּשְׁטָחוּם֩ לַשֶּׁ֨מֶשׁ וְלַיָּרֵ֜חַ וּלְכֹ֣ל׀ צְבָ֣א הַשָּׁמַ֗יִם אֲשֶׁ֨ר אֲהֵב֜וּם וַאֲשֶׁ֤ר עֲבָדוּם֙ וַֽאֲשֶׁר֙ הָלְכ֣וּ אַֽחֲרֵיהֶ֔ם וַאֲשֶׁ֣ר דְּרָשׁ֔וּם וַאֲשֶׁ֥ר הִֽשְׁתַּחֲו֖וּ לָהֶ֑ם לֹ֤א יֵאָֽסְפוּ֙ וְלֹ֣א יִקָּבֵ֔רוּ לְדֹ֛מֶן עַל־פְּנֵ֥י הָאֲדָמָ֖ה יִֽהְיֽוּ׃

‎3 ‏וְנִבְחַ֥ר מָ֙וֶת֙ מֵֽחַיִּי֔ם לְכֹ֗ל הַשְּׁאֵרִית֙ הַנִּשְׁאָרִ֔ים מִן־הַמִּשְׁפָּחָ֥ה הָֽרָעָ֖ה הַזֹּ֑את בְּכָל־הַמְּקֹמ֤וֹת הַנִּשְׁאָרִים֙ אֲשֶׁ֣ר הִדַּחְתִּ֣ים שָׁ֔ם נְאֻ֖ם יְהוָ֥ה צְבָאֽוֹת׃ ס

‎4 ‏וְאָמַרְתָּ֣ אֲלֵיהֶ֗ם כֹּ֚ה אָמַ֣ר יְהוָ֔ה הֲיִפְּל֖וּ וְלֹ֣א יָק֑וּמוּ אִם־יָשׁ֖וּב וְלֹ֥א יָשֽׁוּב׃

‎5 ‏מַדּ֨וּעַ שׁוֹבְבָ֜ה הָעָ֥ם הַזֶּ֛ה יְרוּשָׁלִַ֖ם מְשֻׁבָ֣ה נִצַּ֑חַת הֶחֱזִ֙יקוּ֙ בַּתַּרְמִ֔ית מֵאֲנ֖וּ לָשֽׁוּב׃

‎6 ‏הִקְשַׁ֤בְתִּי וָֽאֶשְׁמָע֙ לוֹא־כֵ֣ן יְדַבֵּ֔רוּ אֵ֣ין אִ֗ישׁ נִחָם֙ עַל־רָ֣עָת֔וֹ לֵאמֹ֖ר מֶ֣ה עָשִׂ֑יתִי כֻּלֹּ֗ה שָׁ֚ב במרצותם בִּמְר֣וּצָתָ֔ם כְּס֥וּס שׁוֹטֵ֖ף בַּמִּלְחָמָֽה׃

‎7 ‏גַּם־חֲסִידָ֣ה בַשָּׁמַ֗יִם יָֽדְעָה֙ מֽוֹעֲדֶ֔יהָ וְתֹ֤ר וסוס וְסִיס֙ וְעָג֗וּר שָׁמְר֖וּ אֶת־עֵ֣ת בֹּאָ֑נָה וְעַמִּ֕י לֹ֣א יָֽדְע֔וּ אֵ֖ת מִשְׁפַּ֥ט יְהוָֽה׃

‎8 ‏אֵיכָ֤ה תֹֽאמְרוּ֙ חֲכָמִ֣ים אֲנַ֔חְנוּ וְתוֹרַ֥ת יְהוָ֖ה אִתָּ֑נוּ אָכֵן֙ הִנֵּ֣ה לַשֶּׁ֣קֶר עָשָׂ֔ה עֵ֖ט שֶׁ֥קֶר סֹפְרִֽים׃

‎9 ‏הֹבִ֣ישׁוּ חֲכָמִ֔ים חַ֖תּוּ וַיִּלָּכֵ֑דוּ הִנֵּ֤ה בִדְבַר־יְהוָה֙ מָאָ֔סוּ וְחָכְמַֽת־מֶ֖ה לָהֶֽם׃ ס

‎10 ‏לָכֵן֩ אֶתֵּ֨ן אֶת־נְשֵׁיהֶ֜ם לַאֲחֵרִ֗ים שְׂדֽוֹתֵיהֶם֙ לְי֣וֹרְשִׁ֔ים כִּ֤י מִקָּטֹן֙ וְעַד־גָּד֔וֹל כֻּלֹּ֖ה בֹּצֵ֣עַ בָּ֑צַע מִנָּבִיא֙ וְעַד־כֹּהֵ֔ן כֻּלֹּ֖ה עֹ֥שֶׂה שָּֽׁקֶר׃

‎11 ‏וַיְרַפּ֞וּ אֶת־שֶׁ֤בֶר בַּת־עַמִּי֙ עַל־נְקַלָּ֔ה לֵאמֹ֖ר שָׁל֣וֹם׀ שָׁל֑וֹם וְאֵ֖ין שָׁלֽוֹם׃

‎12 ‏הֹבִ֕שׁוּ כִּ֥י תוֹעֵבָ֖ה עָשׂ֑וּ גַּם־בּ֣וֹשׁ לֹֽא־יֵבֹ֗שׁוּ וְהִכָּלֵם֙ לֹ֣א יָדָ֔עוּ לָכֵ֞ן יִפְּל֣וּ בַנֹּפְלִ֗ים בְּעֵ֧ת פְּקֻדָּתָ֛ם יִכָּשְׁל֖וּ אָמַ֥ר יְהוָֽה׃ ס

‎13 ‏אָסֹ֥ף אֲסִיפֵ֖ם נְאֻם־יְהוָֹ֑ה אֵין֩ עֲנָבִ֨ים בַּגֶּ֜פֶן וְאֵ֧ין תְּאֵנִ֣ים בַּתְּאֵנָ֗ה וְהֶֽעָלֶה֙ נָבֵ֔ל וָאֶתֵּ֥ן לָהֶ֖ם יַעַבְרֽוּם׃

‎14 ‏עַל־מָה֙ אֲנַ֣חְנוּ יֹֽשְׁבִ֔ים הֵֽאָסְפ֗וּ וְנָב֛וֹא אֶל־עָרֵ֥י הַמִּבְצָ֖ר וְנִדְּמָה־שָּׁ֑ם כִּי֩ יְהוָ֨ה אֱלֹהֵ֤ינוּ הֲדִמָּ֙נוּ֙ וַיַּשְׁקֵ֣נוּ מֵי־רֹ֔אשׁ כִּ֥י חָטָ֖אנוּ לַיהוָֽה׃

‎15 ‏קַוֵּ֥ה לְשָׁל֖וֹם וְאֵ֣ין ט֑וֹב לְעֵ֥ת מַרְפֵּ֖ה וְהִנֵּ֥ה בְעָתָֽה׃

‎16 ‏מִדָּ֤ן נִשְׁמַע֙ נַחְרַ֣ת סוּסָ֗יו מִקּוֹל֙ מִצְהֲל֣וֹת אַבִּירָ֔יו רָעֲשָׁ֖ה כָּל־הָאָ֑רֶץ וַיָּב֗וֹאוּ וַיֹּֽאכְלוּ֙ אֶ֣רֶץ וּמְלוֹאָ֔הּ עִ֖יר וְיֹ֥שְׁבֵי בָֽהּ׃ ס

‎17 ‏כִּי֩ הִנְנִ֨י מְשַׁלֵּ֜חַ בָּכֶ֗ם נְחָשִׁים֙ צִפְעֹנִ֔ים אֲשֶׁ֥ר אֵין־לָהֶ֖ם לָ֑חַשׁ וְנִשְּׁכ֥וּ אֶתְכֶ֖ם נְאֻם־יְהוָֽה׃ ס

‎18 ‏מַבְלִ֥יגִיתִ֖י עֲלֵ֣י יָג֑וֹן עָלַ֖י לִבִּ֥י דַוָּֽי׃

‎19 ‏הִנֵּה־ק֞וֹל שַֽׁוְעַ֣ת בַּת־עַמִּ֗י מֵאֶ֙רֶץ֙ מַרְחַקִּ֔ים הַֽיהוָה֙ אֵ֣ין בְּצִיּ֔וֹן אִם־מַלְכָּ֖הּ אֵ֣ין בָּ֑הּ מַדּ֗וּעַ הִכְעִס֛וּנִי בִּפְסִלֵיהֶ֖ם בְּהַבְלֵ֥י נֵכָֽר׃

‎20 ‏עָבַ֥ר קָצִ֖יר כָּ֣לָה קָ֑יִץ וַאֲנַ֖חְנוּ ל֥וֹא נוֹשָֽׁעְנוּ׃

‎21 ‏עַל־שֶׁ֥בֶר בַּת־עַמִּ֖י הָשְׁבָּ֑רְתִּי קָדַ֕רְתִּי שַׁמָּ֖ה הֶחֱזִקָֽתְנִי׃

‎22 ‏הַצֳרִי֙ אֵ֣ין בְּגִלְעָ֔ד אִם־רֹפֵ֖א אֵ֣ין שָׁ֑ם כִּ֗י מַדּ֙וּעַ֙ לֹ֣א עָֽלְתָ֔ה אֲרֻכַ֖ת בַּת־עַמִּֽי׃

‎23 ‏מִֽי־יִתֵּ֤ן רֹאשִׁי֙ מַ֔יִם וְעֵינִ֖י מְק֣וֹר דִּמְעָ֑ה וְאֶבְכֶּה֙ יוֹמָ֣ם וָלַ֔יְלָה אֵ֖ת חַֽלְלֵ֥י בַת־עַמִּֽי׃

1 bā‘ēṯ hahî’ nə’um-yəhwâ wəyōṣî’û ywōṣî’û ’eṯ-‘aṣəmwōṯ maləḵê-yəhûḏâ wə’eṯ-‘aṣəmwōṯ-śārāyw wə’eṯ-‘aṣəmwōṯ hakōhănîm wə’ēṯ| ‘aṣəmwōṯ hannəḇî’îm wə’ēṯ ‘aṣəmwōṯ ywōšəḇê-yərûšālāim miqqiḇərêhem:

2 ûšəṭāḥûm laššemeš wəlayyārēḥa ûləḵōl| ṣəḇā’ haššāmayim ’ăšer ’ăhēḇûm wa’ăšer ‘ăḇāḏûm wa’ăšer hāləḵû ’^aḥărêhem wa’ăšer dərāšûm wa’ăšer hišət^aḥăwû lâem lō’ yē’āsəfû wəlō’ yiqqāḇērû ləḏōmen ‘al-pənê hā’ăḏāmâ yihəyû:

3 wəniḇəḥar māweṯ mēḥayyîm ləḵōl haššə’ērîṯ hannišə’ārîm min-hammišəpāḥâ hārā‘â hazzō’ṯ bəḵāl-hamməqōmwōṯ hannišə’ārîm ’ăšer hid^aḥətîm šām nə’um yəhwâ ṣəḇā’wōṯ: s

4 wə’āmarətā ’ălêhem kōh ’āmar yəhwâ hăyipəlû wəlō’ yāqûmû ’im-yāšûḇ wəlō’ yāšûḇ:

5 madû‘a šwōḇəḇâ hā‘ām hazzeh yərûšālaim məšuḇâ niṣṣ^aḥaṯ heḥĕzîqû batarəmîṯ mē’ănû lāšûḇ:

6 hiqəšaḇətî wā’ešəmā‘ lwō’-ḵēn yəḏabērû ’ên ’îš niḥām ‘al-rā‘āṯwō lē’mōr meh ‘āśîṯî kullōh šāḇ biməruṣwōṯām bimərûṣāṯām kəsûs šwōṭēf bammiləḥāmâ:

7 gam-ḥăsîḏâ ḇaššāmayim yāḏə‘â mwō‘ăḏeyhā wəṯōr wəsûs wəsîs wə‘āḡûr šāmərû ’eṯ-‘ēṯ bō’ānâ wə‘ammî lō’ yāḏə‘û ’ēṯ mišəpaṭ yəhwâ:

8 ’êḵâ ṯō’mərû ḥăḵāmîm ’ăn^aḥənû wəṯwōraṯ yəhwâ ’itānû ’āḵēn hinnēh laššeqer ‘āśâ ‘ēṭ šeqer sōfərîm:

9 hōḇîšû ḥăḵāmîm ḥatû wayyillāḵēḏû hinnēh ḇiḏəḇar-yəhwâ mā’āsû wəḥāḵəmaṯ-meh lâem: s

10 lāḵēn ’etēn ’eṯ-nəšêhem la’ăḥērîm śəḏwōṯêhem ləywōrəšîm kî miqqāṭōn wə‘aḏ-gāḏwōl kullōh bōṣē‘a bāṣ^a‘ minnāḇî’ wə‘aḏ-kōhēn kullōh ‘ōśeh ššāqer:

11 wayərapû ’eṯ-šeḇer baṯ-‘ammî ‘al-nəqallâ lē’mōr šālwōm| šālwōm wə’ên šālwōm:

12 hōḇišû kî ṯwō‘ēḇâ ‘āśû gam-bwōš lō’-yēḇōšû wəhikālēm lō’ yāḏā‘û lāḵēn yipəlû ḇannōfəlîm bə‘ēṯ pəqudāṯām yikāšəlû ’āmar yəhwâ: s

13 ’āsōf ’ăsîfēm nə’um-yəhwōâ ’ên ‘ănāḇîm bagefen wə’ên tə’ēnîm batə’ēnâ wəhe‘āleh nāḇēl wā’etēn lâem y^a‘aḇərûm:

14 ‘al-mâ ’ăn^aḥənû yōšəḇîm hē’āsəfû wənāḇwō’ ’el-‘ārê hammiḇəṣār wənidəmâ-ššām kî yəhwâ ’ĕlōhênû hăḏimmānû wayyašəqēnû mê-rō’š kî ḥāṭā’nû layhwâ:

15 qaûēh ləšālwōm wə’ên ṭwōḇ lə‘ēṯ marəpēh wəhinnēh ḇə‘āṯâ:

16 midān nišəm^a‘ n^aḥəraṯ sûsāyw miqqwōl miṣəhălwōṯ ’abîrāyw rā‘ăšâ kāl-hā’āreṣ wayyāḇwō’û wayyō’ḵəlû ’ereṣ ûməlwō’āh ‘îr wəyōšəḇê ḇāh: s

17 kî hinənî məšallēḥa bāḵem nəḥāšîm ṣifə‘ōnîm ’ăšer ’ên-lâem lāḥaš wəniššəḵû ’eṯəḵem nə’um-yəhwâ: s

18 maḇəlîḡîṯî ‘ălê yāḡwōn ‘ālay libî ḏaûāy:

19 hinnēh-qwōl šawə‘aṯ baṯ-‘ammî mē’ereṣ marəḥaqqîm hayhwâ ’ên bəṣîywōn ’im-maləkāh ’ên bāh madû‘a hiḵə‘isûnî bifəsilêhem bəhaḇəlê nēḵār:

20 ‘āḇar qāṣîr kālâ qāyiṣ wa’ăn^aḥənû lwō’ nwōšā‘ənû:

21 ‘al-šeḇer baṯ-‘ammî hāšəbārətî qāḏarətî šammâ heḥĕziqāṯənî:

22 haṣŏrî ’ên bəḡilə‘āḏ ’im-rōfē’ ’ên šām kî madû‘a lō’ ‘āləṯâ ’ăruḵaṯ baṯ-‘ammî:

23 mî-yitēn rō’šî mayim wə‘ênî məqwōr dimə‘â wə’eḇəkeh ywōmām wālayəlâ ’ēṯ ḥaləlê ḇaṯ-‘ammî: