1 Kings (1 Melakhim) Chapter 19

‎1 ‏וַיַּגֵּ֤ד אַחְאָב֙ לְאִיזֶ֔בֶל אֵ֛ת כָּל־אֲשֶׁ֥ר עָשָׂ֖ה אֵלִיָּ֑הוּ וְאֵ֨ת כָּל־אֲשֶׁ֥ר הָרַ֛ג אֶת־כָּל־הַנְּבִיאִ֖ים בֶּחָֽרֶב׃

‎2 ‏וַתִּשְׁלַ֤ח אִיזֶ֙בֶל֙ מַלְאָ֔ךְ אֶל־אֵלִיָּ֖הוּ לֵאמֹ֑ר כֹּֽה־יַעֲשׂ֤וּן אֱלֹהִים֙ וְכֹ֣ה יוֹסִפ֔וּן כִּֽי־כָעֵ֤ת מָחָר֙ אָשִׂ֣ים אֶֽת־נַפְשְׁךָ֔ כְּנֶ֖פֶשׁ אַחַ֥ד מֵהֶֽם׃

‎3 ‏וַיַּ֗רְא וַיָּ֙קָם֙ וַיֵּ֣לֶךְ אֶל־נַפְשׁ֔וֹ וַיָּבֹ֕א בְּאֵ֥ר שֶׁ֖בַע אֲשֶׁ֣ר לִֽיהוּדָ֑ה וַיַּנַּ֥ח אֶֽת־נַעֲר֖וֹ שָֽׁם׃

‎4 ‏וְהֽוּא־הָלַ֤ךְ בַּמִּדְבָּר֙ דֶּ֣רֶךְ י֔וֹם וַיָּבֹ֕א וַיֵּ֕שֶׁב תַּ֖חַת רֹ֣תֶם אחת אֶחָ֑ד וַיִּשְׁאַ֤ל אֶת־נַפְשׁוֹ֙ לָמ֔וּת וַיֹּ֣אמֶר׀ רַ֗ב עַתָּ֤ה יְהוָה֙ קַ֣ח נַפְשִׁ֔י כִּֽי־לֹא־ט֥וֹב אָנֹכִ֖י מֵאֲבֹתָֽי׃

‎5 ‏וַיִּשְׁכַּב֙ וַיִּישַׁ֔ן תַּ֖חַת רֹ֣תֶם אֶחָ֑ד וְהִנֵּֽה־זֶ֤ה מַלְאָךְ֙ נֹגֵ֣עַ בּ֔וֹ וַיֹּ֥אמֶר ל֖וֹ ק֥וּם אֱכֽוֹל׃

‎6 ‏וַיַּבֵּ֕ט וְהִנֵּ֧ה מְרַאֲשֹׁתָ֛יו עֻגַ֥ת רְצָפִ֖ים וְצַפַּ֣חַת מָ֑יִם וַיֹּ֣אכַל וַיֵּ֔שְׁתְּ וַיָּ֖שָׁב וַיִּשְׁכָּֽב׃

‎7 ‏וַיָּשָׁב֩ מַלְאַ֨ךְ יְהוָ֤ה׀ שֵׁנִית֙ וַיִּגַּע־בּ֔וֹ וַיֹּ֖אמֶר ק֣וּם אֱכֹ֑ל כִּ֛י רַ֥ב מִמְּךָ֖ הַדָּֽרֶךְ׃

‎8 ‏וַיָּ֖קָם וַיֹּ֣אכַל וַיִּשְׁתֶּ֑ה וַיֵּ֜לֶךְ בְּכֹ֣חַ׀ הָאֲכִילָ֣ה הַהִ֗יא אַרְבָּעִ֥ים יוֹם֙ וְאַרְבָּעִ֣ים לַ֔יְלָה עַ֛ד הַ֥ר הָאֱלֹהִ֖ים חֹרֵֽב׃

‎9 ‏וַיָּבֹא־שָׁ֥ם אֶל־הַמְּעָרָ֖ה וַיָּ֣לֶן שָׁ֑ם וְהִנֵּ֤ה דְבַר־יְהוָה֙ אֵלָ֔יו וַיֹּ֣אמֶר ל֔וֹ מַה־לְּךָ֥ פֹ֖ה אֵלִיָּֽהוּ׃

‎10 ‏וַיֹּאמֶר֩ קַנֹּ֨א קִנֵּ֜אתִי לַיהוָ֣ה׀ אֱלֹהֵ֣י צְבָא֗וֹת כִּֽי־עָזְב֤וּ בְרִֽיתְךָ֙ בְּנֵ֣י יִשְׂרָאֵ֔ל אֶת־מִזְבְּחֹתֶ֣יךָ הָרָ֔סוּ וְאֶת־נְבִיאֶ֖יךָ הָרְג֣וּ בֶחָ֑רֶב וָֽאִוָּתֵ֤ר אֲנִי֙ לְבַדִּ֔י וַיְבַקְשׁ֥וּ אֶת־נַפְשִׁ֖י לְקַחְתָּֽהּ׃

‎11 ‏וַיֹּ֗אמֶר צֵ֣א וְעָמַדְתָּ֣ בָהָר֮ לִפְנֵ֣י יְהוָה֒ וְהִנֵּ֧ה יְהוָ֣ה עֹבֵ֗ר וְר֣וּחַ גְּדוֹלָ֡ה וְחָזָ֞ק מְפָרֵק֩ הָרִ֨ים וּמְשַׁבֵּ֤ר סְלָעִים֙ לִפְנֵ֣י יְהוָ֔ה לֹ֥א בָר֖וּחַ יְהוָ֑ה וְאַחַ֤ר הָר֨וּחַ¹ רַ֔עַשׁ לֹ֥א בָרַ֖עַשׁ יְהוָֽה׃

‎12 ‏וְאַחַ֤ר הָרַ֙עַשׁ֙ אֵ֔שׁ לֹ֥א בָאֵ֖שׁ יְהוָ֑ה וְאַחַ֣ר הָאֵ֔שׁ ק֖וֹל דְּמָמָ֥ה דַקָּֽה׃

‎13 ‏וַיְהִ֣י׀ כִּשְׁמֹ֣עַ אֵלִיָּ֗הוּ וַיָּ֤לֶט פָּנָיו֙ בְּאַדַּרְתּ֔וֹ וַיֵּצֵ֕א וַֽיַּעֲמֹ֖ד פֶּ֣תַח הַמְּעָרָ֑ה וְהִנֵּ֤ה אֵלָיו֙ ק֔וֹל וַיֹּ֕אמֶר מַה־לְּךָ֥ פֹ֖ה אֵלִיָּֽהוּ׃

‎14 ‏וַיֹּאמֶר֩ קַנֹּ֨א קִנֵּ֜אתִי לַיהוָ֣ה׀ אֱלֹהֵ֣י צְבָא֗וֹת כִּֽי־עָזְב֤וּ בְרִֽיתְךָ֙ בְּנֵ֣י יִשְׂרָאֵ֔ל אֶת־מִזְבְּחֹתֶ֣יךָ הָרָ֔סוּ וְאֶת־נְבִיאֶ֖יךָ הָרְג֣וּ בֶחָ֑רֶב וָאִוָּתֵ֤ר אֲנִי֙ לְבַדִּ֔י וַיְבַקְשׁ֥וּ אֶת־נַפְשִׁ֖י לְקַחְתָּֽהּ׃ ס

‎15 ‏וַיֹּ֤אמֶר יְהוָה֙ אֵלָ֔יו לֵ֛ךְ שׁ֥וּב לְדַרְכְּךָ֖ מִדְבַּ֣רָה דַמָּ֑שֶׂק¹ וּבָ֗אתָ וּמָשַׁחְתָּ֧ אֶת־חֲזָאֵ֛ל לְמֶ֖לֶךְ עַל־אֲרָֽם׃

‎16 ‏וְאֵת֙ יֵה֣וּא בֶן־נִמְשִׁ֔י תִּמְשַׁ֥ח לְמֶ֖לֶךְ עַל־יִשְׂרָאֵ֑ל וְאֶת־אֱלִישָׁ֤ע בֶּן־שָׁפָט֙ מֵאָבֵ֣ל מְחוֹלָ֔ה תִּמְשַׁ֥ח לְנָבִ֖יא תַּחְתֶּֽיךָ׃

‎17 ‏וְהָיָ֗ה הַנִּמְלָ֛ט מֵחֶ֥רֶב חֲזָאֵ֖ל יָמִ֣ית יֵה֑וּא וְהַנִּמְלָ֛ט מֵחֶ֥רֶב יֵה֖וּא יָמִ֥ית אֱלִישָֽׁע׃

‎18 ‏וְהִשְׁאַרְתִּ֥י בְיִשְׂרָאֵ֖ל שִׁבְעַ֣ת אֲלָפִ֑ים כָּל־הַבִּרְכַּ֗יִם אֲשֶׁ֤ר לֹֽא־כָֽרְעוּ֙ לַבַּ֔עַל וְכָ֨ל־הַפֶּ֔ה אֲשֶׁ֥ר לֹֽא־נָשַׁ֖ק לֽוֹ׃

‎19 ‏וַיֵּ֣לֶךְ מִ֠שָּׁם וַיִּמְצָ֞א אֶת־אֱלִישָׁ֤ע בֶּן־שָׁפָט֙ וְה֣וּא חֹרֵ֔שׁ שְׁנֵים־עָשָׂ֤ר צְמָדִים֙ לְפָנָ֔יו וְה֖וּא בִּשְׁנֵ֣ים הֶעָשָׂ֑ר וַיַּעֲבֹ֤ר אֵלִיָּ֙הוּ֙ אֵלָ֔יו וַיַּשְׁלֵ֥ךְ אַדַּרְתּ֖וֹ אֵלָֽיו׃

‎20 ‏וַיַּעֲזֹ֣ב אֶת־הַבָּקָ֗ר וַיָּ֙רָץ֙ אַחֲרֵ֣י אֵֽלִיָּ֔הוּ וַיֹּ֗אמֶר אֶשְּׁקָה־נָּא֙ לְאָבִ֣י וּלְאִמִּ֔י וְאֵלְכָ֖ה אַחֲרֶ֑יךָ וַיֹּ֤אמֶר לוֹ֙ לֵ֣ךְ שׁ֔וּב כִּ֥י מֶה־עָשִׂ֖יתִי לָֽךְ׃

‎21 ‏וַיָּ֨שָׁב מֵאַחֲרָ֜יו וַיִּקַּ֣ח אֶת־צֶ֧מֶד הַבָּקָ֣ר וַיִּזְבָּחֵ֗הוּ וּבִכְלִ֤י הַבָּקָר֙ בִּשְּׁלָ֣ם הַבָּשָׂ֔ר וַיִּתֵּ֥ן לָעָ֖ם וַיֹּאכֵ֑לוּ וַיָּ֗קָם וַיֵּ֛לֶךְ אַחֲרֵ֥י אֵלִיָּ֖הוּ וַיְשָׁרְתֵֽהוּ׃ פ

1 wayyagēḏ ’^aḥə’āḇ lə’îzeḇel ’ēṯ kāl-’ăšer ‘āśâ ’ēlîyâû wə’ēṯ kāl-’ăšer hāraḡ ’eṯ-kāl-hannəḇî’îm beḥāreḇ:

2 watišəl^aḥ ’îzeḇel malə’āḵə ’el-’ēlîyâû lē’mōr kōh-y^a‘ăśûn ’ĕlōhîm wəḵōh ywōsifûn kî-ḵā‘ēṯ māḥār ’āśîm ’eṯ-nafəšəḵā kənefeš ’^aḥaḏ mēhem:

3 wayyarə’ wayyāqām wayyēleḵə ’el-nafəšwō wayyāḇō’ bə’ēr šeḇ^a‘ ’ăšer lîhûḏâ wayyann^aḥ ’eṯ-n^a‘ărwō šām:

4 wəhû’-hālaḵə bammiḏəbār dereḵə ywōm wayyāḇō’ wayyēšeḇ t^aḥaṯ rōṯem ’eḥāṯ ’eḥāḏ wayyišə’al ’eṯ-nafəšwō lāmûṯ wayyō’mer| raḇ ‘atâ yəhwâ q^aḥ nafəšî kî-lō’-ṭwōḇ ’ānōḵî mē’ăḇōṯāy:

5 wayyišəkaḇ wayyîšan t^aḥaṯ rōṯem ’eḥāḏ wəhinnēh-zeh malə’āḵə nōḡē‘a bwō wayyō’mer lwō qûm ’ĕḵwōl:

6 wayyabēṭ wəhinnēh məra’ăšōṯāyw ‘uḡaṯ rəṣāfîm wəṣap^aḥaṯ māyim wayyō’ḵal wayyēšətə wayyāšāḇ wayyišəkāḇ:

7 wayyāšāḇ malə’aḵə yəhwâ| šēnîṯ wayyig^a‘-bwō wayyō’mer qûm ’ĕḵōl kî raḇ mimməḵā hadāreḵə:

8 wayyāqām wayyō’ḵal wayyišəteh wayyēleḵə bəḵōḥa| hā’ăḵîlâ hahî’ ’arəbā‘îm ywōm wə’arəbā‘îm layəlâ ‘aḏ har hā’ĕlōhîm ḥōrēḇ:

9 wayyāḇō’-šām ’el-hammə‘ārâ wayyālen šām wəhinnēh ḏəḇar-yəhwâ ’ēlāyw wayyō’mer lwō mah-lləḵā fōh ’ēlîyâû:

10 wayyō’mer qannō’ qinnē’ṯî layhwâ| ’ĕlōhê ṣəḇā’wōṯ kî-‘āzəḇû ḇərîṯəḵā bənê yiśərā’ēl ’eṯ-mizəbəḥōṯeyḵā hārāsû wə’eṯ-nəḇî’eyḵā hārəḡû ḇeḥāreḇ wā’iûāṯēr ’ănî ləḇadî wayəḇaqəšû ’eṯ-nafəšî ləq^aḥətāh:

11 wayyō’mer ṣē’ wə‘āmaḏətā ḇâār lifənê yəhwâ wəhinnēh yəhwâ ‘ōḇēr wərûḥa gəḏwōlâ wəḥāzāq məfārēq hārîm ûməšabēr səlā‘îm lifənê yəhwâ lō’ ḇārûḥa yəhwâ wə’^aḥar hārûḥa¹ r^a‘aš lō’ ḇār^a‘aš yəhwâ:

12 wə’^aḥar hār^a‘aš ’ēš lō’ ḇā’ēš yəhwâ wə’^aḥar hā’ēš qwōl dəmāmâ ḏaqqâ:

13 wayəhî| kišəmō‘a ’ēlîyâû wayyāleṭ pānāyw bə’adarətwō wayyēṣē’ wayy^a‘ămōḏ peṯ^aḥ hammə‘ārâ wəhinnēh ’ēlāyw qwōl wayyō’mer mah-lləḵā fōh ’ēlîyâû:

14 wayyō’mer qannō’ qinnē’ṯî layhwâ| ’ĕlōhê ṣəḇā’wōṯ kî-‘āzəḇû ḇərîṯəḵā bənê yiśərā’ēl ’eṯ-mizəbəḥōṯeyḵā hārāsû wə’eṯ-nəḇî’eyḵā hārəḡû ḇeḥāreḇ wā’iûāṯēr ’ănî ləḇadî wayəḇaqəšû ’eṯ-nafəšî ləq^aḥətāh: s

15 wayyō’mer yəhwâ ’ēlāyw lēḵə šûḇ ləḏarəkəḵā miḏəbarâ ḏammāśeq¹ ûḇā’ṯā ûmāš^aḥətā ’eṯ-ḥăzā’ēl ləmeleḵə ‘al-’ărām:

16 wə’ēṯ yēhû’ ḇen-niməšî timəš^aḥ ləmeleḵə ‘al-yiśərā’ēl wə’eṯ-’ĕlîšā‘ ben-šāfāṭ mē’āḇēl məḥwōlâ timəš^aḥ lənāḇî’ t^aḥəteyḵā:

17 wəhāyâ hanniməlāṭ mēḥereḇ ḥăzā’ēl yāmîṯ yēhû’ wəhanniməlāṭ mēḥereḇ yēhû’ yāmîṯ ’ĕlîšā‘:

18 wəhišə’arətî ḇəyiśərā’ēl šiḇə‘aṯ ’ălāfîm kāl-habirəkayim ’ăšer lō’-ḵārə‘û lab^a‘al wəḵāl-hapeh ’ăšer lō’-nāšaq lwō:

19 wayyēleḵə miššām wayyiməṣā’ ’eṯ-’ĕlîšā‘ ben-šāfāṭ wəhû’ ḥōrēš šənêm-‘āśār ṣəmāḏîm ləfānāyw wəhû’ bišənêm he‘āśār wayy^a‘ăḇōr ’ēlîyâû ’ēlāyw wayyašəlēḵə ’adarətwō ’ēlāyw:

20 wayy^a‘ăzōḇ ’eṯ-habāqār wayyārāṣ ’^aḥărê ’ēlîyâû wayyō’mer ’eššəqâ-nnā’ lə’āḇî ûlə’immî wə’ēləḵâ ’^aḥăreyḵā wayyō’mer lwō lēḵə šûḇ kî meh-‘āśîṯî lāḵə:

21 wayyāšāḇ mē’^aḥărāyw wayyiqq^aḥ ’eṯ-ṣemeḏ habāqār wayyizəbāḥēhû ûḇiḵəlî habāqār biššəlām habāśār wayyitēn lā‘ām wayyō’ḵēlû wayyāqām wayyēleḵə ’^aḥărê ’ēlîyâû wayəšārəṯēhû: f