1 Kings (1 Melakhim) Chapter 20

‎1 ‏וּבֶן־הֲדַ֣ד מֶֽלֶךְ־אֲרָ֗ם קָבַץ֙ אֶת־כָּל־חֵיל֔וֹ וּשְׁלֹשִׁ֨ים וּשְׁנַ֥יִם מֶ֛לֶךְ אִתּ֖וֹ וְס֣וּס וָרָ֑כֶב וַיַּ֗עַל וַיָּ֙צַר֙ עַל־שֹׁ֣מְר֔וֹן וַיִּלָּ֖חֶם בָּֽהּ׃

‎2 ‏וַיִּשְׁלַ֧ח מַלְאָכִ֛ים אֶל־אַחְאָ֥ב מֶֽלֶךְ־יִשְׂרָאֵ֖ל הָעִֽירָה׃

‎3 ‏וַיֹּ֣אמֶר ל֗וֹ כֹּ֚ה אָמַ֣ר בֶּן־הֲדַ֔ד כַּסְפְּךָ֥ וּֽזְהָבְךָ֖ לִֽי־ה֑וּא וְנָשֶׁ֧יךָ וּבָנֶ֛יךָ הַטּוֹבִ֖ים לִי־הֵֽם׃

‎4 ‏וַיַּ֤עַן מֶֽלֶךְ־יִשְׂרָאֵל֙ וַיֹּ֔אמֶר כִּדְבָרְךָ֖ אֲדֹנִ֣י הַמֶּ֑לֶךְ לְךָ֥ אֲנִ֖י וְכָל־אֲשֶׁר־לִֽי׃

‎5 ‏וַיָּשֻׁ֙בוּ֙ הַמַּלְאָכִ֔ים וַיֹּ֣אמְר֔וּ כֹּֽה־אָמַ֥ר בֶּן־הֲדַ֖ד לֵאמֹ֑ר כִּֽי־שָׁלַ֤חְתִּי אֵלֶ֙יךָ֙ לֵאמֹ֔ר כַּסְפְּךָ֧ וּזְהָבְךָ֛ וְנָשֶׁ֧יךָ וּבָנֶ֖יךָ לִ֥י תִתֵּֽן׃

‎6 ‏כִּ֣י׀ אִם־כָּעֵ֣ת מָחָ֗ר אֶשְׁלַ֤ח אֶת־עֲבָדַי֙ אֵלֶ֔יךָ וְחִפְּשׂוּ֙ אֶת־בֵּ֣יתְךָ֔ וְאֵ֖ת בָּתֵּ֣י עֲבָדֶ֑יךָ וְהָיָה֙ כָּל־מַחְמַ֣ד עֵינֶ֔יךָ יָשִׂ֥ימוּ בְיָדָ֖ם וְלָקָֽחוּ׃

‎7 ‏וַיִּקְרָ֤א מֶֽלֶךְ־יִשְׂרָאֵל֙ לְכָל־זִקְנֵ֣י הָאָ֔רֶץ וַיֹּ֙אמֶר֙ דְּעֽוּ־נָ֣א וּרְא֔וּ כִּ֥י רָעָ֖ה זֶ֣ה מְבַקֵּ֑שׁ כִּֽי־שָׁלַ֨ח אֵלַ֜י לְנָשַׁ֤י וּלְבָנַי֙ וּלְכַסְפִּ֣י וְלִזְהָבִ֔י וְלֹ֥א מָנַ֖עְתִּי מִמֶּֽנּוּ׃

‎8 ‏וַיֹּאמְר֥וּ אֵלָ֛יו כָּל־הַזְּקֵנִ֖ים וְכָל־הָעָ֑ם אַל־תִּשְׁמַ֖ע וְל֥וֹא תֹאבֶֽה׃

‎9 ‏וַיֹּ֜אמֶר לְמַלְאֲכֵ֣י בֶן־הֲדַ֗ד אִמְר֞וּ לַֽאדֹנִ֤י הַמֶּ֙לֶךְ֙ כֹּל֩ אֲשֶׁר־שָׁלַ֨חְתָּ אֶל־עַבְדְּךָ֤ בָרִֽאשֹׁנָה֙ אֶעֱשֶׂ֔ה וְהַדָּבָ֣ר הַזֶּ֔ה לֹ֥א אוּכַ֖ל לַעֲשׂ֑וֹת וַיֵּֽלְכוּ֙ הַמַּלְאָכִ֔ים וַיְשִׁבֻ֖הוּ דָּבָֽר׃

‎10 ‏וַיִּשְׁלַ֤ח אֵלָיו֙ בֶּן־הֲדַ֔ד וַיֹּ֕אמֶר כֹּֽה־יַעֲשׂ֥וּן לִ֛י אֱלֹהִ֖ים וְכֹ֣ה יוֹסִ֑פוּ אִם־יִשְׂפֹּק֙ עֲפַ֣ר שֹׁמְר֔וֹן לִשְׁעָלִ֕ים לְכָל־הָעָ֖ם אֲשֶׁ֥ר בְּרַגְלָֽי׃

‎11 ‏וַיַּ֤עַן מֶֽלֶךְ־יִשְׂרָאֵל֙ וַיֹּ֣אמֶר דַּבְּר֔וּ אַל־יִתְהַלֵּ֥ל חֹגֵ֖ר כִּמְפַתֵּֽחַ׃

‎12 ‏וַיְהִ֗י כִּשְׁמֹ֙עַ֙ אֶת־הַדָּבָ֣ר הַזֶּ֔ה וְה֥וּא שֹׁתֶ֛ה ה֥וּא וְהַמְּלָכִ֖ים בַּסֻּכּ֑וֹת וַיֹּ֤אמֶר אֶל־עֲבָדָיו֙ שִׂ֔ימוּ וַיָּשִׂ֖ימוּ עַל־הָעִֽיר׃

‎13 ‏וְהִנֵּ֣ה׀ נָבִ֣יא אֶחָ֗ד נִגַּשׁ֮ אֶל־אַחְאָ֣ב מֶֽלֶךְ־יִשְׂרָאֵל֒ וַיֹּ֗אמֶר כֹּ֚ה אָמַ֣ר יְהוָ֔ה הְֽרָאִ֔יתָ אֵ֛ת כָּל־הֶהָמ֥וֹן הַגָּד֖וֹל הַזֶּ֑ה הִנְנִ֨י נֹתְנ֤וֹ בְיָֽדְךָ֙ הַיּ֔וֹם וְיָדַעְתָּ֖ כִּֽי־אֲנִ֥י יְהוָֽה׃

‎14 ‏וַיֹּ֤אמֶר אַחְאָב֙ בְּמִ֔י וַיֹּ֙אמֶר֙ כֹּֽה־אָמַ֣ר יְהוָ֔ה בְּנַעֲרֵ֖י שָׂרֵ֣י הַמְּדִינ֑וֹת וַיֹּ֛אמֶר מִֽי־יֶאְסֹ֥ר הַמִּלְחָמָ֖ה וַיֹּ֥אמֶר אָֽתָּה׃

‎15 ‏וַיִּפְקֹ֗ד אֶֽת־נַעֲרֵי֙ שָׂרֵ֣י הַמְּדִינ֔וֹת וַיִּהְי֕וּ מָאתַ֖יִם שְׁנַ֣יִם וּשְׁלֹשִׁ֑ים וְאַחֲרֵיהֶ֗ם פָּקַ֧ד אֶת־כָּל־הָעָ֛ם כָּל־בְּנֵ֥י יִשְׂרָאֵ֖ל שִׁבְעַ֥ת אֲלָפִֽים׃

‎16 ‏וַיֵּצְא֖וּ בַּֽצָּהֳרָ֑יִם וּבֶן־הֲדַד֩ שֹׁתֶ֨ה שִׁכּ֜וֹר בַּסֻּכּ֗וֹת ה֧וּא וְהַמְּלָכִ֛ים שְׁלֹשִֽׁים־וּשְׁנַ֥יִם מֶ֖לֶךְ עֹזֵ֥ר אֹתֽוֹ׃

‎17 ‏וַיֵּצְא֗וּ נַעֲרֵ֛י שָׂרֵ֥י הַמְּדִינ֖וֹת בָּרִֽאשֹׁנָ֑ה וַיִּשְׁלַ֣ח בֶּן־הֲדַ֗ד וַיַּגִּ֤ידוּ לוֹ֙ לֵאמֹ֔ר אֲנָשִׁ֕ים יָצְא֖וּ מִשֹּׁמְרֽוֹן׃

‎18 ‏וַיֹּ֛אמֶר אִם־לְשָׁל֥וֹם יָצָ֖אוּ תִּפְשׂ֣וּם חַיִּ֑ים וְאִ֧ם לְמִלְחָמָ֛ה יָצָ֖אוּ חַיִּ֥ים תִּפְשֽׂוּם׃

‎19 ‏וְאֵ֙לֶּה֙ יָצְא֣וּ מִן־הָעִ֔יר נַעֲרֵ֖י שָׂרֵ֣י הַמְּדִינ֑וֹת וְהַחַ֖יִל אֲשֶׁ֥ר אַחֲרֵיהֶֽם׃

‎20 ‏וַיַּכּוּ֙ אִ֣ישׁ אִישׁ֔וֹ וַיָּנֻ֣סוּ אֲרָ֔ם וַֽיִּרְדְּפֵ֖ם יִשְׂרָאֵ֑ל וַיִּמָּלֵ֗ט בֶּן־הֲדַד֙ מֶ֣לֶךְ אֲרָ֔ם עַל־ס֖וּס וּפָרָשִֽׁים׃

‎21 ‏וַיֵּצֵא֙ מֶ֣לֶךְ יִשְׂרָאֵ֔ל וַיַּ֥ךְ אֶת־הַסּ֖וּס וְאֶת־הָרָ֑כֶב וְהִכָּ֥ה בַאֲרָ֖ם מַכָּ֥ה גְדוֹלָֽה׃

‎22 ‏וַיִּגַּ֤שׁ הַנָּבִיא֙ אֶל־מֶ֣לֶךְ יִשְׂרָאֵ֔ל וַיֹּ֤אמֶר לוֹ֙ לֵ֣ךְ הִתְחַזַּ֔ק וְדַ֥ע וּרְאֵ֖ה אֵ֣ת אֲשֶֽׁר־תַּעֲשֶׂ֑ה כִּ֚י לִתְשׁוּבַ֣ת הַשָּׁנָ֔ה מֶ֥לֶךְ אֲרָ֖ם עֹלֶ֥ה עָלֶֽיךָ׃ ס

‎23 ‏וְעַבְדֵ֨י מֶֽלֶךְ־אֲרָ֜ם אָמְר֣וּ אֵלָ֗יו אֱלֹהֵ֤י הָרִים֙ אֱלֹ֣הֵיהֶ֔ם עַל־כֵּ֖ן חָזְק֣וּ מִמֶּ֑נּוּ וְאוּלָ֗ם נִלָּחֵ֤ם אִתָּם֙ בַּמִּישׁ֔וֹר אִם־לֹ֥א נֶחֱזַ֖ק מֵהֶֽם׃

‎24 ‏וְאֶת־הַדָּבָ֥ר הַזֶּ֖ה עֲשֵׂ֑ה הָסֵ֤ר הַמְּלָכִים֙ אִ֣ישׁ מִמְּקֹמ֔וֹ וְשִׂ֥ים פַּח֖וֹת תַּחְתֵּיהֶֽם׃

‎25 ‏וְאַתָּ֣ה תִֽמְנֶה־לְךָ֣׀ חַ֡יִל כַּחַיִל֩ הַנֹּפֵ֨ל מֵאוֹתָ֜ךְ וְס֣וּס כַּסּ֣וּס׀ וְרֶ֣כֶב כָּרֶ֗כֶב וְנִֽלָּחֲמָ֤ה אוֹתָם֙ בַּמִּישׁ֔וֹר אִם־לֹ֥א נֶחֱזַ֖ק מֵהֶ֑ם וַיִּשְׁמַ֥ע לְקֹלָ֖ם וַיַּ֥עַשׂ כֵּֽן׃ פ

‎26 ‏וַֽיְהִי֙ לִתְשׁוּבַ֣ת הַשָּׁנָ֔ה וַיִּפְקֹ֥ד בֶּן־הֲדַ֖ד אֶת־אֲרָ֑ם וַיַּ֣עַל אֲפֵ֔קָה לַמִּלְחָמָ֖ה עִם־יִשְׂרָאֵֽל׃

‎27 ‏וּבְנֵ֣י יִשְׂרָאֵ֗ל הָתְפָּקְדוּ֙ וְכָלְכְּל֔וּ וַיֵּלְכ֖וּ לִקְרָאתָ֑ם וַיַּחֲנ֨וּ בְנֵֽי־יִשְׂרָאֵ֜ל נֶגְדָּ֗ם כִּשְׁנֵי֙ חֲשִׂפֵ֣י עִזִּ֔ים וַאֲרָ֖ם מִלְא֥וּ אֶת־הָאָֽרֶץ׃

‎28 ‏וַיִּגַּ֞שׁ אִ֣ישׁ הָאֱלֹהִ֗ים וַיֹּאמֶר֮ אֶל־מֶ֣לֶךְ יִשְׂרָאֵל֒ וַיֹּ֜אמֶר כֹּֽה־אָמַ֣ר יְהוָ֗ה יַ֠עַן אֲשֶׁ֨ר אָמְר֤וּ אֲרָם֙ אֱלֹהֵ֤י הָרִים֙ יְהוָ֔ה וְלֹֽא־אֱלֹהֵ֥י עֲמָקִ֖ים ה֑וּא וְ֠נָתַתִּי אֶת־כָּל־הֶהָמ֨וֹן הַגָּ֤דוֹל הַזֶּה֙ בְּיָדֶ֔ךָ וִֽידַעְתֶּ֖ם כִּֽי־אֲנִ֥י יְהוָֽה׃

‎29 ‏וַֽיַּחֲנ֧וּ אֵ֦לֶּה נֹ֥כַח אֵ֖לֶּה שִׁבְעַ֣ת יָמִ֑ים וַיְהִ֣י׀ בַּיּ֣וֹם הַשְּׁבִיעִ֗י וַתִּקְרַב֙ הַמִּלְחָמָ֔ה וַיַּכּ֨וּ בְנֵֽי־יִשְׂרָאֵ֧ל אֶת־אֲרָ֛ם מֵאָה־אֶ֥לֶף רַגְלִ֖י בְּי֥וֹם אֶחָֽד׃

‎30 ‏וַיָּנֻ֨סוּ הַנּוֹתָרִ֥ים׀ אֲפֵקָה֮ אֶל־הָעִיר֒ וַתִּפֹּל֙ הַחוֹמָ֔ה עַל־עֶשְׂרִ֨ים וְשִׁבְעָ֥ה אֶ֛לֶף אִ֖ישׁ הַנּוֹתָרִ֑ים וּבֶן־הֲדַ֣ד נָ֔ס וַיָּבֹ֥א אֶל־הָעִ֖יר חֶ֥דֶר בְּחָֽדֶר׃ ס

‎31 ‏וַיֹּאמְר֣וּ אֵלָיו֮ עֲבָדָיו֒ הִנֵּֽה־נָ֣א שָׁמַ֔עְנוּ כִּ֗י מַלְכֵי֙ בֵּ֣ית יִשְׂרָאֵ֔ל כִּֽי־מַלְכֵ֥י חֶ֖סֶד הֵ֑ם נָשִׂ֣ימָה נָּא֩ שַׂקִּ֨ים בְּמָתְנֵ֜ינוּ וַחֲבָלִ֣ים בְּרֹאשֵׁ֗נוּ וְנֵצֵא֙ אֶל־מֶ֣לֶךְ יִשְׂרָאֵ֔ל אוּלַ֖י יְחַיֶּ֥ה אֶת־נַפְשֶֽׁךָ׃

‎32 ‏וַיַּחְגְּרוּ֩ שַׂקִּ֨ים בְּמָתְנֵיהֶ֜ם וַחֲבָלִ֣ים בְּרָאשֵׁיהֶ֗ם וַיָּבֹ֙אוּ֙ אֶל־מֶ֣לֶךְ יִשְׂרָאֵ֔ל וַיֹּ֣אמְר֔וּ עַבְדְּךָ֧ בֶן־הֲדַ֛ד אָמַ֖ר תְּחִֽי־נָ֣א נַפְשִׁ֑י וַיֹּ֛אמֶר הַעוֹדֶ֥נּוּ חַ֖י אָחִ֥י הֽוּא׃

‎33 ‏וְהָאֲנָשִׁים֩ יְנַחֲשׁ֨וּ וַֽיְמַהֲר֜וּ וַיַּחְלְט֣וּ הֲמִמֶּ֗נּוּ וַיֹּֽאמְרוּ֙ אָחִ֣יךָ בֶן־הֲדַ֔ד וַיֹּ֖אמֶר בֹּ֣אוּ קָחֻ֑הוּ וַיֵּצֵ֤א אֵלָיו֙ בֶּן־הֲדַ֔ד וַֽיַּעֲלֵ֖הוּ עַל־הַמֶּרְכָּבָֽה׃

‎34 ‏וַיֹּ֣אמֶר אֵלָ֡יו הֶעָרִ֣ים אֲשֶׁר־לָֽקַח־אָבִי֩ מֵאֵ֨ת אָבִ֜יךָ אָשִׁ֗יב וְ֠חוּצוֹת תָּשִׂ֨ים לְךָ֤ בְדַמֶּ֙שֶׂק֙ כַּאֲשֶׁר־שָׂ֤ם אָבִי֙ בְּשֹׁ֣מְר֔וֹן וַאֲנִ֖י בַּבְּרִ֣ית אֲשַׁלְּחֶ֑ךָּ וַיִּכְרָת־ל֥וֹ בְרִ֖ית וַֽיְשַׁלְּחֵֽהוּ׃ ס

‎35 ‏וְאִ֨ישׁ אֶחָ֜ד מִבְּנֵ֣י הַנְּבִיאִ֗ים אָמַ֧ר אֶל־רֵעֵ֛הוּ בִּדְבַ֥ר יְהוָ֖ה הַכֵּ֣ינִי נָ֑א וַיְמָאֵ֥ן הָאִ֖ישׁ לְהַכֹּתֽוֹ׃

‎36 ‏וַיֹּ֣אמֶר ל֗וֹ יַ֚עַן אֲשֶׁ֤ר לֹֽא־שָׁמַ֙עְתָּ֙ בְּק֣וֹל יְהוָ֔ה הִנְּךָ֤ הוֹלֵךְ֙ מֵֽאִתִּ֔י וְהִכְּךָ֖ הָאַרְיֵ֑ה וַיֵּ֙לֶךְ֙ מֵֽאֶצְל֔וֹ וַיִּמְצָאֵ֥הוּ הָאַרְיֵ֖ה וַיַּכֵּֽהוּ׃

‎37 ‏וַיִּמְצָא֙ אִ֣ישׁ אַחֵ֔ר וַיֹּ֖אמֶר הַכֵּ֣ינִי נָ֑א וַיַּכֵּ֥הוּ הָאִ֖ישׁ הַכֵּ֥ה וּפָצֹֽעַ׃

‎38 ‏וַיֵּ֙לֶךְ֙ הַנָּבִ֔יא וַיַּעֲמֹ֥ד לַמֶּ֖לֶךְ עַל־הַדָּ֑רֶךְ וַיִּתְחַפֵּ֥שׂ בָּאֲפֵ֖ר עַל־עֵינָֽיו׃

‎39 ‏וַיְהִ֤י הַמֶּ֙לֶךְ֙ עֹבֵ֔ר וְה֖וּא צָעַ֣ק אֶל־הַמֶּ֑לֶךְ וַיֹּ֜אמֶר עַבְדְּךָ֣׀ יָצָ֣א בְקֶֽרֶב־הַמִּלְחָמָ֗ה וְהִנֵּֽה־אִ֨ישׁ סָ֜ר וַיָּבֵ֧א אֵלַ֣י אִ֗ישׁ וַיֹּ֙אמֶר֙ שְׁמֹר֙ אֶת־הָאִ֣ישׁ הַזֶּ֔ה אִם־הִפָּקֵד֙ יִפָּקֵ֔ד וְהָיְתָ֤ה נַפְשְׁךָ֙ תַּ֣חַת נַפְשׁ֔וֹ א֥וֹ כִכַּר־כֶּ֖סֶף תִּשְׁקֽוֹל׃

‎40 ‏וַיְהִ֣י עַבְדְּךָ֗ עֹשֵׂ֥ה הֵ֛נָּה וָהֵ֖נָּה וְה֣וּא אֵינֶ֑נּוּ וַיֹּ֨אמֶר אֵלָ֧יו מֶֽלֶךְ־יִשְׂרָאֵ֛ל כֵּ֥ן מִשְׁפָּטֶ֖ךָ אַתָּ֥ה חָרָֽצְתָּ׃

‎41 ‏וַיְמַהֵ֕ר וַיָּ֙סַר֙ אֶת־הָ֣אֲפֵ֔ר מעל מֵעֲלֵ֖י עֵינָ֑יו וַיַּכֵּ֤ר אֹתוֹ֙ מֶ֣לֶךְ יִשְׂרָאֵ֔ל כִּ֥י מֵֽהַנְּבִאִ֖ים הֽוּא׃

‎42 ‏וַיֹּ֣אמֶר אֵלָ֗יו כֹּ֚ה אָמַ֣ר יְהוָ֔ה יַ֛עַן שִׁלַּ֥חְתָּ אֶת־אִישׁ־חֶרְמִ֖י מִיָּ֑ד וְהָיְתָ֤ה נַפְשְׁךָ֙ תַּ֣חַת נַפְשׁ֔וֹ וְעַמְּךָ֖ תַּ֥חַת עַמּֽוֹ׃

‎43 ‏וַיֵּ֧לֶךְ מֶֽלֶךְ־יִשְׂרָאֵ֛ל עַל־בֵּית֖וֹ סַ֣ר וְזָעֵ֑ף וַיָּבֹ֖א שֹׁמְרֽוֹנָה׃ פ

1 ûḇen-hăḏaḏ meleḵə-’ărām qāḇaṣ ’eṯ-kāl-ḥêlwō ûšəlōšîm ûšənayim meleḵə ’itwō wəsûs wārāḵeḇ wayy^a‘al wayyāṣar ‘al-šōmərwōn wayyillāḥem bāh:

2 wayyišəl^aḥ malə’āḵîm ’el-’^aḥə’āḇ meleḵə-yiśərā’ēl hā‘îrâ:

3 wayyō’mer lwō kōh ’āmar ben-hăḏaḏ kasəpəḵā ûzəhāḇəḵā lî-hû’ wənāšeyḵā ûḇāneyḵā haṭṭwōḇîm lî-hēm:

4 wayy^a‘an meleḵə-yiśərā’ēl wayyō’mer kiḏəḇārəḵā ’ăḏōnî hammeleḵə ləḵā ’ănî wəḵāl-’ăšer-lî:

5 wayyāšuḇû hammalə’āḵîm wayyō’mərû kōh-’āmar ben-hăḏaḏ lē’mōr kî-šāl^aḥətî ’ēleyḵā lē’mōr kasəpəḵā ûzəhāḇəḵā wənāšeyḵā ûḇāneyḵā lî ṯitēn:

6 kî| ’im-kā‘ēṯ māḥār ’ešəl^aḥ ’eṯ-‘ăḇāḏay ’ēleyḵā wəḥipəśû ’eṯ-bêṯəḵā wə’ēṯ bātê ‘ăḇāḏeyḵā wəhāyâ kāl-m^aḥəmaḏ ‘êneyḵā yāśîmû ḇəyāḏām wəlāqāḥû:

7 wayyiqərā’ meleḵə-yiśərā’ēl ləḵāl-ziqənê hā’āreṣ wayyō’mer də‘û-nā’ ûrə’û kî rā‘â zeh məḇaqqēš kî-šāl^aḥ ’ēlay lənāšay ûləḇānay ûləḵasəpî wəlizəhāḇî wəlō’ mān^a‘ətî mimmennû:

8 wayyō’mərû ’ēlāyw kāl-hazzəqēnîm wəḵāl-hā‘ām ’al-tišəm^a‘ wəlwō’ ṯō’ḇeh:

9 wayyō’mer ləmalə’ăḵê ḇen-hăḏaḏ ’imərû la’ḏōnî hammeleḵə kōl ’ăšer-šāl^aḥətā ’el-‘aḇədəḵā ḇāri’šōnâ ’e‘ĕśeh wəhadāḇār hazzeh lō’ ’ûḵal l^a‘ăśwōṯ wayyēləḵû hammalə’āḵîm wayəšiḇuhû dāḇār:

10 wayyišəl^aḥ ’ēlāyw ben-hăḏaḏ wayyō’mer kōh-y^a‘ăśûn lî ’ĕlōhîm wəḵōh ywōsifû ’im-yiśəpōq ‘ăfar šōmərwōn lišə‘ālîm ləḵāl-hā‘ām ’ăšer bəraḡəlāy:

11 wayy^a‘an meleḵə-yiśərā’ēl wayyō’mer dabərû ’al-yiṯəhallēl ḥōḡēr kiməfatēḥa:

12 wayəhî kišəmō‘a ’eṯ-hadāḇār hazzeh wəhû’ šōṯeh hû’ wəhamməlāḵîm bassukwōṯ wayyō’mer ’el-‘ăḇāḏāyw śîmû wayyāśîmû ‘al-hā‘îr:

13 wəhinnēh| nāḇî’ ’eḥāḏ nigaš ’el-’^aḥə’āḇ meleḵə-yiśərā’ēl wayyō’mer kōh ’āmar yəhwâ hərā’îṯā ’ēṯ kāl-hehāmwōn hagāḏwōl hazzeh hinənî nōṯənwō ḇəyāḏəḵā hayywōm wəyāḏ^a‘ətā kî-’ănî yəhwâ:

14 wayyō’mer ’^aḥə’āḇ bəmî wayyō’mer kōh-’āmar yəhwâ bən^a‘ărê śārê hamməḏînwōṯ wayyō’mer mî-ye’əsōr hammiləḥāmâ wayyō’mer ’ātâ:

15 wayyifəqōḏ ’eṯ-n^a‘ărê śārê hamməḏînwōṯ wayyihəyû mā’ṯayim šənayim ûšəlōšîm wə’^aḥărêhem pāqaḏ ’eṯ-kāl-hā‘ām kāl-bənê yiśərā’ēl šiḇə‘aṯ ’ălāfîm:

16 wayyēṣə’û baṣṣâŏrāyim ûḇen-hăḏaḏ šōṯeh šikwōr bassukwōṯ hû’ wəhamməlāḵîm šəlōšîm-ûšənayim meleḵə ‘ōzēr ’ōṯwō:

17 wayyēṣə’û n^a‘ărê śārê hamməḏînwōṯ bāri’šōnâ wayyišəl^aḥ ben-hăḏaḏ wayyagîḏû lwō lē’mōr ’ănāšîm yāṣə’û miššōmərwōn:

18 wayyō’mer ’im-ləšālwōm yāṣā’û tifəśûm ḥayyîm wə’im ləmiləḥāmâ yāṣā’û ḥayyîm tifəśûm:

19 wə’ēlleh yāṣə’û min-hā‘îr n^a‘ărê śārê hamməḏînwōṯ wəh^aḥayil ’ăšer ’^aḥărêhem:

20 wayyakû ’îš ’îšwō wayyānusû ’ărām wayyirədəfēm yiśərā’ēl wayyimmālēṭ ben-hăḏaḏ meleḵə ’ărām ‘al-sûs ûfārāšîm:

21 wayyēṣē’ meleḵə yiśərā’ēl wayyaḵə ’eṯ-hassûs wə’eṯ-hārāḵeḇ wəhikâ ḇa’ărām makâ ḡəḏwōlâ:

22 wayyigaš hannāḇî’ ’el-meleḵə yiśərā’ēl wayyō’mer lwō lēḵə hiṯəḥazzaq wəḏ^a‘ ûrə’ēh ’ēṯ ’ăšer-t^a‘ăśeh kî liṯəšûḇaṯ haššānâ meleḵə ’ărām ‘ōleh ‘āleyḵā: s

23 wə‘aḇəḏê meleḵə-’ărām ’āmərû ’ēlāyw ’ĕlōhê hārîm ’ĕlōhêhem ‘al-kēn ḥāzəqû mimmennû wə’ûlām nillāḥēm ’itām bammîšwōr ’im-lō’ neḥĕzaq mēhem:

24 wə’eṯ-hadāḇār hazzeh ‘ăśēh hāsēr hamməlāḵîm ’îš mimməqōmwō wəśîm p^aḥwōṯ t^aḥətêhem:

25 wə’atâ ṯiməneh-ləḵā| ḥayil k^aḥayil hannōfēl mē’wōṯāḵə wəsûs kassûs| wəreḵeḇ kāreḵeḇ wənillāḥămâ ’wōṯām bammîšwōr ’im-lō’ neḥĕzaq mēhem wayyišəm^a‘ ləqōlām wayy^a‘aś kēn: f

26 wayəhî liṯəšûḇaṯ haššānâ wayyifəqōḏ ben-hăḏaḏ ’eṯ-’ărām wayy^a‘al ’ăfēqâ lammiləḥāmâ ‘im-yiśərā’ēl:

27 ûḇənê yiśərā’ēl hāṯəpāqəḏû wəḵāləkəlû wayyēləḵû liqərā’ṯām wayy^aḥănû ḇənê-yiśərā’ēl neḡədām kišənê ḥăśifê ‘izzîm wa’ărām milə’û ’eṯ-hā’āreṣ:

28 wayyigaš ’îš hā’ĕlōhîm wayyō’mer ’el-meleḵə yiśərā’ēl wayyō’mer kōh-’āmar yəhwâ y^a‘an ’ăšer ’āmərû ’ărām ’ĕlōhê hārîm yəhwâ wəlō’-’ĕlōhê ‘ămāqîm hû’ wənāṯatî ’eṯ-kāl-hehāmwōn hagāḏwōl hazzeh bəyāḏeḵā wîḏ^a‘ətem kî-’ănî yəhwâ:

29 wayy^aḥănû ’ēlleh nōḵ^aḥ ’ēlleh šiḇə‘aṯ yāmîm wayəhî| bayywōm haššəḇî‘î watiqəraḇ hammiləḥāmâ wayyakû ḇənê-yiśərā’ēl ’eṯ-’ărām mē’â-’elef raḡəlî bəywōm ’eḥāḏ:

30 wayyānusû hannwōṯārîm| ’ăfēqâ ’el-hā‘îr watipōl h^aḥwōmâ ‘al-‘eśərîm wəšiḇə‘â ’elef ’îš hannwōṯārîm ûḇen-hăḏaḏ nās wayyāḇō’ ’el-hā‘îr ḥeḏer bəḥāḏer: s

31 wayyō’mərû ’ēlāyw ‘ăḇāḏāyw hinnēh-nā’ šām^a‘ənû kî maləḵê bêṯ yiśərā’ēl kî-maləḵê ḥeseḏ hēm nāśîmâ nnā’ śaqqîm bəmāṯənênû w^aḥăḇālîm bərō’šēnû wənēṣē’ ’el-meleḵə yiśərā’ēl ’ûlay yəḥayyeh ’eṯ-nafəšeḵā:

32 wayy^aḥəgərû śaqqîm bəmāṯənêhem w^aḥăḇālîm bərā’šêhem wayyāḇō’û ’el-meleḵə yiśərā’ēl wayyō’mərû ‘aḇədəḵā ḇen-hăḏaḏ ’āmar təḥî-nā’ nafəšî wayyō’mer h^a‘wōḏennû ḥay ’āḥî hû’:

33 wəhā’ănāšîm yən^aḥăšû wayəmahărû wayy^aḥələṭû hămimmennû wayyō’mərû ’āḥîḵā ḇen-hăḏaḏ wayyō’mer bō’û qāḥuhû wayyēṣē’ ’ēlāyw ben-hăḏaḏ wayy^a‘ălēhû ‘al-hammerəkāḇâ:

34 wayyō’mer ’ēlāyw he‘ārîm ’ăšer-lāq^aḥ-’āḇî mē’ēṯ ’āḇîḵā ’āšîḇ wəḥûṣwōṯ tāśîm ləḵā ḇəḏammeśeq ka’ăšer-śām ’āḇî bəšōmərwōn wa’ănî babərîṯ ’ăšalləḥeḵḵā wayyiḵərāṯ-lwō ḇərîṯ wayəšalləḥēhû: s

35 wə’îš ’eḥāḏ mibənê hannəḇî’îm ’āmar ’el-rē‘ēhû biḏəḇar yəhwâ hakênî nā’ wayəmā’ēn hā’îš ləhakōṯwō:

36 wayyō’mer lwō y^a‘an ’ăšer lō’-šām^a‘ətā bəqwōl yəhwâ hinnəḵā hwōlēḵə mē’itî wəhikəḵā hā’arəyēh wayyēleḵə mē’eṣəlwō wayyiməṣā’ēhû hā’arəyēh wayyakēhû:

37 wayyiməṣā’ ’îš ’^aḥēr wayyō’mer hakênî nā’ wayyakēhû hā’îš hakēh ûfāṣō‘a:

38 wayyēleḵə hannāḇî’ wayy^a‘ămōḏ lammeleḵə ‘al-hadāreḵə wayyiṯəḥapēś bā’ăfēr ‘al-‘ênāyw:

39 wayəhî hammeleḵə ‘ōḇēr wəhû’ ṣā‘aq ’el-hammeleḵə wayyō’mer ‘aḇədəḵā| yāṣā’ ḇəqereḇ-hammiləḥāmâ wəhinnēh-’îš sār wayyāḇē’ ’ēlay ’îš wayyō’mer šəmōr ’eṯ-hā’îš hazzeh ’im-hipāqēḏ yipāqēḏ wəhāyəṯâ nafəšəḵā t^aḥaṯ nafəšwō ’wō ḵikar-kesef tišəqwōl:

40 wayəhî ‘aḇədəḵā ‘ōśēh hēnnâ wâēnnâ wəhû’ ’ênennû wayyō’mer ’ēlāyw meleḵə-yiśərā’ēl kēn mišəpāṭeḵā ’atâ ḥārāṣətā:

41 wayəmahēr wayyāsar ’eṯ-hā’ăfēr mē‘al mē‘ălê ‘ênāyw wayyakēr ’ōṯwō meleḵə yiśərā’ēl kî mēhannəḇi’îm hû’:

42 wayyō’mer ’ēlāyw kōh ’āmar yəhwâ y^a‘an šill^aḥətā ’eṯ-’îš-ḥerəmî mîyāḏ wəhāyəṯâ nafəšəḵā t^aḥaṯ nafəšwō wə‘amməḵā t^aḥaṯ ‘ammwō:

43 wayyēleḵə meleḵə-yiśərā’ēl ‘al-bêṯwō sar wəzā‘ēf wayyāḇō’ šōmərwōnâ: f