1 Kings (1 Melakhim) Chapter 21

‎1 ‏וַיְהִ֗י אַחַר֙ הַדְּבָרִ֣ים הָאֵ֔לֶּה כֶּ֧רֶם הָיָ֛ה לְנָב֥וֹת הַיִּזְרְעֵאלִ֖י אֲשֶׁ֣ר בְּיִזְרְעֶ֑אל אֵ֚צֶל הֵיכַ֣ל אַחְאָ֔ב מֶ֖לֶךְ שֹׁמְרֽוֹן׃

‎2 ‏וַיְדַבֵּ֣ר אַחְאָ֣ב אֶל־נָב֣וֹת׀ לֵאמֹר֩׀ תְּנָה־לִּ֨י אֶֽת־כַּרְמְךָ֜ וִֽיהִי־לִ֣י לְגַן־יָרָ֗ק כִּ֣י ה֤וּא קָרוֹב֙ אֵ֣צֶל בֵּיתִ֔י וְאֶתְּנָ֤ה לְךָ֙ תַּחְתָּ֔יו כֶּ֖רֶם ט֣וֹב מִמֶּ֑נּוּ אִ֚ם ט֣וֹב בְּעֵינֶ֔יךָ אֶתְּנָה־לְךָ֥ כֶ֖סֶף מְחִ֥יר זֶֽה׃

‎3 ‏וַיֹּ֥אמֶר נָב֖וֹת אֶל־אַחְאָ֑ב חָלִ֤ילָה לִּי֙ מֵֽיהוָ֔ה מִתִּתִּ֛י אֶת־נַחֲלַ֥ת אֲבֹתַ֖י לָֽךְ׃

‎4 ‏וַיָּבֹא֩ אַחְאָ֨ב אֶל־בֵּית֜וֹ סַ֣ר וְזָעֵ֗ף עַל־הַדָּבָר֙ אֲשֶׁר־דִּבֶּ֣ר אֵלָ֗יו נָבוֹת֙ הַיִּזְרְעֵאלִ֔י וַיֹּ֕אמֶר לֹֽא־אֶתֵּ֥ן לְךָ֖ אֶת־נַחֲלַ֣ת אֲבוֹתָ֑י וַיִּשְׁכַּב֙ עַל־מִטָּת֔וֹ וַיַּסֵּ֥ב אֶת־פָּנָ֖יו וְלֹֽא־אָ֥כַל לָֽחֶם׃

‎5 ‏וַתָּבֹ֥א אֵלָ֖יו אִיזֶ֣בֶל אִשְׁתּ֑וֹ וַתְּדַבֵּ֣ר אֵלָ֗יו מַה־זֶּה֙ רוּחֲךָ֣ סָרָ֔ה וְאֵינְךָ֖ אֹכֵ֥ל לָֽחֶם׃

‎6 ‏וַיְדַבֵּ֣ר אֵלֶ֗יהָ כִּֽי־אֲ֠דַבֵּר אֶל־נָב֨וֹת הַיִּזְרְעֵאלִ֜י וָאֹ֣מַר ל֗וֹ תְּנָה־לִּ֤י אֶֽת־כַּרְמְךָ֙ בְּכֶ֔סֶף א֚וֹ אִם־חָפֵ֣ץ אַתָּ֔ה אֶתְּנָה־לְךָ֥ כֶ֖רֶם תַּחְתָּ֑יו וַיֹּ֕אמֶר לֹֽא־אֶתֵּ֥ן לְךָ֖ אֶת־כַּרְמִֽי׃

‎7 ‏וַתֹּ֤אמֶר אֵלָיו֙ אִיזֶ֣בֶל אִשְׁתּ֔וֹ אַתָּ֕ה עַתָּ֛ה תַּעֲשֶׂ֥ה מְלוּכָ֖ה עַל־יִשְׂרָאֵ֑ל ק֤וּם אֱכָל־לֶ֙חֶם֙ וְיִטַ֣ב לִבֶּ֔ךָ אֲנִי֙ אֶתֵּ֣ן לְךָ֔ אֶת־כֶּ֖רֶם נָב֥וֹת הַיִּזְרְעֵאלִֽי׃

‎8 ‏וַתִּכְתֹּ֤ב סְפָרִים֙ בְּשֵׁ֣ם אַחְאָ֔ב וַתַּחְתֹּ֖ם בְּחֹתָמ֑וֹ וַתִּשְׁלַ֣ח הספרים סְפָרִ֗ים אֶל־הַזְקֵנִ֤ים¹ וְאֶל־הַֽחֹרִים֙ אֲשֶׁ֣ר בְּעִיר֔וֹ הַיֹּשְׁבִ֖ים אֶת־נָבֽוֹת׃

‎9 ‏וַתִּכְתֹּ֥ב בַּסְּפָרִ֖ים לֵאמֹ֑ר קִֽרְאוּ־צ֔וֹם וְהוֹשִׁ֥יבוּ אֶת־נָב֖וֹת בְּרֹ֥אשׁ הָעָֽם׃

‎10 ‏וְ֠הוֹשִׁיבוּ שְׁנַ֨יִם אֲנָשִׁ֥ים בְּנֵֽי־בְלִיַּעַל֮ נֶגְדּוֹ֒ וִיעִדֻ֣הוּ לֵאמֹ֔ר בֵּרַ֥כְתָּ אֱלֹהִ֖ים וָמֶ֑לֶךְ וְהוֹצִיאֻ֥הוּ וְסִקְלֻ֖הוּ וְיָמֹֽת׃

‎11 ‏וַיַּעֲשׂוּ֩ אַנְשֵׁ֨י עִיר֜וֹ הַזְּקֵנִ֣ים וְהַחֹרִ֗ים אֲשֶׁ֤ר הַיֹּֽשְׁבִים֙ בְּעִיר֔וֹ כַּאֲשֶׁ֛ר שָׁלְחָ֥ה אֲלֵיהֶ֖ם אִיזָ֑בֶל כַּאֲשֶׁ֤ר כָּתוּב֙ בַּסְּפָרִ֔ים אֲשֶׁ֥ר שָׁלְחָ֖ה אֲלֵיהֶֽם׃

‎12 ‏קָרְא֖וּ צ֑וֹם וְהֹשִׁ֥יבוּ אֶת־נָב֖וֹת בְּרֹ֥אשׁ הָעָֽם׃

‎13 ‏וַ֠יָּבֹאוּ שְׁנֵ֨י הָאֲנָשִׁ֥ים בְּנֵֽי־בְלִיַּעַל֮ וַיֵּשְׁב֣וּ נֶגְדּוֹ֒ וַיְעִדֻהוּ֩ אַנְשֵׁ֨י הַבְּלִיַּ֜עַל אֶת־נָב֗וֹת נֶ֤גֶד הָעָם֙ לֵאמֹ֔ר בֵּרַ֥ךְ נָב֛וֹת אֱלֹהִ֖ים וָמֶ֑לֶךְ וַיֹּצִאֻ֙הוּ֙ מִח֣וּץ לָעִ֔יר וַיִּסְקְלֻ֥הוּ בָאֲבָנִ֖ים וַיָּמֹֽת׃

‎14 ‏וַֽיִּשְׁלְח֖וּ אֶל־אִיזֶ֣בֶל לֵאמֹ֑ר סֻקַּ֥ל נָב֖וֹת וַיָּמֹֽת׃

‎15 ‏וַֽיְהִי֙ כִּשְׁמֹ֣עַ אִיזֶ֔בֶל כִּֽי־סֻקַּ֥ל נָב֖וֹת וַיָּמֹ֑ת וַתֹּ֨אמֶר אִיזֶ֜בֶל אֶל־אַחְאָ֗ב ק֣וּם רֵ֞שׁ אֶת־כֶּ֣רֶם׀ נָב֣וֹת הַיִּזְרְעֵאלִ֗י אֲשֶׁ֤ר מֵאֵן֙ לָתֶת־לְךָ֣ בְכֶ֔סֶף כִּ֣י אֵ֥ין נָב֛וֹת חַ֖י כִּי־מֵֽת׃

‎16 ‏וַיְהִ֛י כִּשְׁמֹ֥עַ אַחְאָ֖ב כִּ֣י מֵ֣ת נָב֑וֹת וַיָּ֣קָם אַחְאָ֗ב לָרֶ֛דֶת אֶל־כֶּ֛רֶם נָב֥וֹת הַיִּזְרְעֵאלִ֖י לְרִשְׁתּֽוֹ׃ ס

‎17 ‏וַיְהִי֙ דְּבַר־יְהוָ֔ה אֶל־אֵלִיָּ֥הוּ הַתִּשְׁבִּ֖י לֵאמֹֽר׃

‎18 ‏ק֣וּם רֵ֗ד לִקְרַ֛את אַחְאָ֥ב מֶֽלֶךְ־יִשְׂרָאֵ֖ל אֲשֶׁ֣ר בְּשֹׁמְר֑וֹן הִנֵּה֙ בְּכֶ֣רֶם נָב֔וֹת אֲשֶׁר־יָ֥רַד שָׁ֖ם לְרִשְׁתּֽוֹ׃

‎19 ‏וְדִבַּרְתָּ֨ אֵלָ֜יו לֵאמֹ֗ר כֹּ֚ה אָמַ֣ר יְהוָ֔ה הֲרָצַ֖חְתָּ וְגַם־יָרָ֑שְׁתָּ וְדִבַּרְתָּ֨ אֵלָ֜יו לֵאמֹ֗ר כֹּ֚ה אָמַ֣ר יְהוָ֔ה בִּמְק֗וֹם אֲשֶׁ֨ר לָקְק֤וּ הַכְּלָבִים֙ אֶת־דַּ֣ם נָב֔וֹת יָלֹ֧קּוּ הַכְּלָבִ֛ים אֶת־דָּמְךָ֖ גַּם־אָֽתָּה׃

‎20 ‏וַיֹּ֤אמֶר אַחְאָב֙ אֶל־אֵ֣לִיָּ֔הוּ הַֽמְצָאתַ֖נִי אֹיְבִ֑י וַיֹּ֣אמֶר מָצָ֔אתִי יַ֚עַן הִתְמַכֶּרְךָ֔ לַעֲשׂ֥וֹת הָרַ֖ע בְּעֵינֵ֥י יְהוָֽה׃

‎21 ‏הִנְנִ֨י מבי מֵבִ֤יא אֵלֶ֙יךָ֙ רָעָ֔ה וּבִעַרְתִּ֖י אַחֲרֶ֑יךָ וְהִכְרַתִּ֤י לְאַחְאָב֙ מַשְׁתִּ֣ין בְּקִ֔יר וְעָצ֥וּר וְעָז֖וּב בְּיִשְׂרָאֵֽל׃

‎22 ‏וְנָתַתִּ֣י אֶת־בֵּיתְךָ֗ כְּבֵית֙ יָרָבְעָ֣ם בֶּן־נְבָ֔ט וּכְבֵ֖ית בַּעְשָׁ֣א בֶן־אֲחִיָּ֑ה אֶל־הַכַּ֙עַס֙ אֲשֶׁ֣ר הִכְעַ֔סְתָּ וַֽתַּחֲטִ֖א אֶת־יִשְׂרָאֵֽל׃

‎23 ‏וְגַ֨ם־לְאִיזֶ֔בֶל דִּבֶּ֥ר יְהוָ֖ה לֵאמֹ֑ר הַכְּלָבִ֛ים יֹאכְל֥וּ אֶת־אִיזֶ֖בֶל בְּחֵ֥ל יִזְרְעֶֽאל׃

‎24 ‏הַמֵּ֤ת לְאַחְאָב֙ בָּעִ֔יר יֹאכְל֖וּ הַכְּלָבִ֑ים וְהַמֵּת֙ בַּשָּׂדֶ֔ה יֹאכְל֖וּ ע֥וֹף הַשָּׁמָֽיִם׃

‎25 ‏רַ֚ק לֹֽא־הָיָ֣ה כְאַחְאָ֔ב אֲשֶׁ֣ר הִתְמַכֵּ֔ר לַעֲשׂ֥וֹת הָרַ֖ע בְּעֵינֵ֣י יְהוָ֑ה אֲשֶׁר־הֵסַ֥תָּה אֹת֖וֹ אִיזֶ֥בֶל אִשְׁתּֽוֹ׃

‎26 ‏וַיַּתְעֵ֣ב מְאֹ֔ד לָלֶ֖כֶת אַחֲרֵ֣י הַגִּלֻּלִ֑ים כְּכֹל֙ אֲשֶׁ֣ר עָשׂ֣וּ הָאֱמֹרִ֔י אֲשֶׁר֙ הוֹרִ֣ישׁ יְהוָ֔ה מִפְּנֵ֖י בְּנֵ֥י יִשְׂרָאֵֽל׃ ס

‎27 ‏וַיְהִי֩ כִשְׁמֹ֨עַ אַחְאָ֜ב אֶת־הַדְּבָרִ֤ים הָאֵ֙לֶּה֙ וַיִּקְרַ֣ע בְּגָדָ֔יו וַיָּֽשֶׂם־שַׂ֥ק עַל־בְּשָׂר֖וֹ וַיָּצ֑וֹם וַיִּשְׁכַּ֣ב בַּשָּׂ֔ק וַיְהַלֵּ֖ךְ אַֽט׃ ס

‎28 ‏וַֽיְהִי֙ דְּבַר־יְהוָ֔ה אֶל־אֵלִיָּ֥הוּ הַתִּשְׁבִּ֖י לֵאמֹֽר׃

‎29 ‏הֲ‍ֽרָאִ֔יתָ כִּֽי־נִכְנַ֥ע אַחְאָ֖ב מִלְּפָנָ֑י יַ֜עַן כִּֽי־נִכְנַ֣ע מִפָּנַ֗י לֹֽא־אבי אָבִ֤יא הָֽרָעָה֙ בְּיָמָ֔יו בִּימֵ֣י בְנ֔וֹ אָבִ֥יא הָרָעָ֖ה עַל־בֵּיתֽוֹ׃

1 wayəhî ’^aḥar hadəḇārîm hā’ēlleh kerem hāyâ lənāḇwōṯ hayyizərə‘ē’lî ’ăšer bəyizərə‘e’l ’ēṣel hêḵal ’^aḥə’āḇ meleḵə šōmərwōn:

2 wayəḏabēr ’^aḥə’āḇ ’el-nāḇwōṯ| lē’mōr| tənâ-llî ’eṯ-karəməḵā wîhî-lî ləḡan-yārāq kî hû’ qārwōḇ ’ēṣel bêṯî wə’etənâ ləḵā t^aḥətāyw kerem ṭwōḇ mimmennû ’im ṭwōḇ bə‘êneyḵā ’etənâ-ləḵā ḵesef məḥîr zeh:

3 wayyō’mer nāḇwōṯ ’el-’^aḥə’āḇ ḥālîlâ llî mêhwâ mititî ’eṯ-n^aḥălaṯ ’ăḇōṯay lāḵə:

4 wayyāḇō’ ’^aḥə’āḇ ’el-bêṯwō sar wəzā‘ēf ‘al-hadāḇār ’ăšer-diber ’ēlāyw nāḇwōṯ hayyizərə‘ē’lî wayyō’mer lō’-’etēn ləḵā ’eṯ-n^aḥălaṯ ’ăḇwōṯāy wayyišəkaḇ ‘al-miṭṭāṯwō wayyassēḇ ’eṯ-pānāyw wəlō’-’āḵal lāḥem:

5 watāḇō’ ’ēlāyw ’îzeḇel ’išətwō watəḏabēr ’ēlāyw mah-zzeh rûḥăḵā sārâ wə’ênəḵā ’ōḵēl lāḥem:

6 wayəḏabēr ’ēleyhā kî-’ăḏabēr ’el-nāḇwōṯ hayyizərə‘ē’lî wā’ōmar lwō tənâ-llî ’eṯ-karəməḵā bəḵesef ’wō ’im-ḥāfēṣ ’atâ ’etənâ-ləḵā ḵerem t^aḥətāyw wayyō’mer lō’-’etēn ləḵā ’eṯ-karəmî:

7 watō’mer ’ēlāyw ’îzeḇel ’išətwō ’atâ ‘atâ t^a‘ăśeh məlûḵâ ‘al-yiśərā’ēl qûm ’ĕḵāl-leḥem wəyiṭaḇ libeḵā ’ănî ’etēn ləḵā ’eṯ-kerem nāḇwōṯ hayyizərə‘ē’lî:

8 watiḵətōḇ səfārîm bəšēm ’^aḥə’āḇ wat^aḥətōm bəḥōṯāmwō watišəl^aḥ hasəfārîm səfārîm ’el-hazəqēnîm¹ wə’el-h^aḥōrîm ’ăšer bə‘îrwō hayyōšəḇîm ’eṯ-nāḇwōṯ:

9 watiḵətōḇ bassəfārîm lē’mōr qirə’û-ṣwōm wəhwōšîḇû ’eṯ-nāḇwōṯ bərō’š hā‘ām:

10 wəhwōšîḇû šənayim ’ănāšîm bənê-ḇəlîy^a‘al neḡədwō wî‘iḏuhû lē’mōr bēraḵətā ’ĕlōhîm wāmeleḵə wəhwōṣî’uhû wəsiqəluhû wəyāmōṯ:

11 wayy^a‘ăśû ’anəšê ‘îrwō hazzəqēnîm wəh^aḥōrîm ’ăšer hayyōšəḇîm bə‘îrwō ka’ăšer šāləḥâ ’ălêhem ’îzāḇel ka’ăšer kāṯûḇ bassəfārîm ’ăšer šāləḥâ ’ălêhem:

12 qārə’û ṣwōm wəhōšîḇû ’eṯ-nāḇwōṯ bərō’š hā‘ām:

13 wayyāḇō’û šənê hā’ănāšîm bənê-ḇəlîy^a‘al wayyēšəḇû neḡədwō wayə‘iḏuhû ’anəšê habəlîy^a‘al ’eṯ-nāḇwōṯ neḡeḏ hā‘ām lē’mōr bēraḵə nāḇwōṯ ’ĕlōhîm wāmeleḵə wayyōṣi’uhû miḥûṣ lā‘îr wayyisəqəluhû ḇā’ăḇānîm wayyāmōṯ:

14 wayyišələḥû ’el-’îzeḇel lē’mōr suqqal nāḇwōṯ wayyāmōṯ:

15 wayəhî kišəmō‘a ’îzeḇel kî-suqqal nāḇwōṯ wayyāmōṯ watō’mer ’îzeḇel ’el-’^aḥə’āḇ qûm rēš ’eṯ-kerem| nāḇwōṯ hayyizərə‘ē’lî ’ăšer mē’ēn lāṯeṯ-ləḵā ḇəḵesef kî ’ên nāḇwōṯ ḥay kî-mēṯ:

16 wayəhî kišəmō‘a ’^aḥə’āḇ kî mēṯ nāḇwōṯ wayyāqām ’^aḥə’āḇ lāreḏeṯ ’el-kerem nāḇwōṯ hayyizərə‘ē’lî lərišətwō: s

17 wayəhî dəḇar-yəhwâ ’el-’ēlîyâû hatišəbî lē’mōr:

18 qûm rēḏ liqəra’ṯ ’^aḥə’āḇ meleḵə-yiśərā’ēl ’ăšer bəšōmərwōn hinnēh bəḵerem nāḇwōṯ ’ăšer-yāraḏ šām lərišətwō:

19 wəḏibarətā ’ēlāyw lē’mōr kōh ’āmar yəhwâ hărāṣ^aḥətā wəḡam-yārāšətā wəḏibarətā ’ēlāyw lē’mōr kōh ’āmar yəhwâ biməqwōm ’ăšer lāqəqû hakəlāḇîm ’eṯ-dam nāḇwōṯ yālōqqû hakəlāḇîm ’eṯ-dāməḵā gam-’ātâ:

20 wayyō’mer ’^aḥə’āḇ ’el-’ēlîyâû haməṣā’ṯanî ’ōyəḇî wayyō’mer māṣā’ṯî y^a‘an hiṯəmakerəḵā l^a‘ăśwōṯ hār^a‘ bə‘ênê yəhwâ:

21 hinənî mēḇî mēḇî’ ’ēleyḵā rā‘â ûḇi‘arətî ’^aḥăreyḵā wəhiḵəratî lə’^aḥə’āḇ mašətîn bəqîr wə‘āṣûr wə‘āzûḇ bəyiśərā’ēl:

22 wənāṯatî ’eṯ-bêṯəḵā kəḇêṯ yārāḇə‘ām ben-nəḇāṭ ûḵəḇêṯ b^a‘əšā’ ḇen-’ăḥîyâ ’el-hak^a‘as ’ăšer hiḵə‘asətā wat^aḥăṭi’ ’eṯ-yiśərā’ēl:

23 wəḡam-lə’îzeḇel diber yəhwâ lē’mōr hakəlāḇîm yō’ḵəlû ’eṯ-’îzeḇel bəḥēl yizərə‘e’l:

24 hammēṯ lə’^aḥə’āḇ bā‘îr yō’ḵəlû hakəlāḇîm wəhammēṯ baśśāḏeh yō’ḵəlû ‘wōf haššāmāyim:

25 raq lō’-hāyâ ḵə’^aḥə’āḇ ’ăšer hiṯəmakēr l^a‘ăśwōṯ hār^a‘ bə‘ênê yəhwâ ’ăšer-hēsatâ ’ōṯwō ’îzeḇel ’išətwō:

26 wayyaṯə‘ēḇ mə’ōḏ lāleḵeṯ ’^aḥărê hagillulîm kəḵōl ’ăšer ‘āśû hā’ĕmōrî ’ăšer hwōrîš yəhwâ mipənê bənê yiśərā’ēl: s

27 wayəhî ḵišəmō‘a ’^aḥə’āḇ ’eṯ-hadəḇārîm hā’ēlleh wayyiqər^a‘ bəḡāḏāyw wayyāśem-śaq ‘al-bəśārwō wayyāṣwōm wayyišəkaḇ baśśāq wayəhallēḵə ’aṭ: s

28 wayəhî dəḇar-yəhwâ ’el-’ēlîyâû hatišəbî lē’mōr:

29 hă‍rā’îṯā kî-niḵən^a‘ ’^aḥə’āḇ milləfānāy y^a‘an kî-niḵən^a‘ mipānay lō’-’āḇî ’āḇî’ hārā‘â bəyāmāyw bîmê ḇənwō ’āḇî’ hārā‘â ‘al-bêṯwō: