1 Kings (1 Melakhim) Chapter 22

‎1 ‏וַיֵּשְׁב֖וּ שָׁלֹ֣שׁ שָׁנִ֑ים אֵ֚ין מִלְחָמָ֔ה בֵּ֥ין אֲרָ֖ם וּבֵ֥ין יִשְׂרָאֵֽל׃ פ

‎2 ‏וַיְהִ֖י בַּשָּׁנָ֣ה הַשְּׁלִישִׁ֑ית וַיֵּ֛רֶד יְהוֹשָׁפָ֥ט מֶֽלֶךְ־יְהוּדָ֖ה אֶל־מֶ֥לֶךְ יִשְׂרָאֵֽל׃

‎3 ‏וַיֹּ֤אמֶר מֶֽלֶךְ־יִשְׂרָאֵל֙ אֶל־עֲבָדָ֔יו הַיְדַעְתֶּ֕ם כִּֽי־לָ֖נוּ רָמֹ֣ת גִּלְעָ֑ד וַאֲנַ֣חְנוּ מַחְשִׁ֔ים מִקַּ֣חַת אֹתָ֔הּ מִיַּ֖ד מֶ֥לֶךְ אֲרָֽם׃

‎4 ‏וַיֹּ֙אמֶר֙ אֶל־יְה֣וֹשָׁפָ֔ט הֲתֵלֵ֥ךְ אִתִּ֛י לַמִּלְחָמָ֖ה רָמֹ֣ת גִּלְעָ֑ד וַיֹּ֤אמֶר יְהֽוֹשָׁפָט֙ אֶל־מֶ֣לֶךְ יִשְׂרָאֵ֔ל כָּמ֧וֹנִי כָמ֛וֹךָ כְּעַמִּ֥י כְעַמֶּ֖ךָ כְּסוּסַ֥י כְּסוּסֶֽיךָ׃

‎5 ‏וַיֹּ֥אמֶר יְהוֹשָׁפָ֖ט אֶל־מֶ֣לֶךְ יִשְׂרָאֵ֑ל דְּרָשׁ־נָ֥א כַיּ֖וֹם אֶת־דְּבַ֥ר יְהוָֽה׃

‎6 ‏וַיִּקְבֹּ֨ץ מֶֽלֶךְ־יִשְׂרָאֵ֥ל אֶֽת־הַנְּבִיאִים֮ כְּאַרְבַּ֣ע מֵא֣וֹת אִישׁ֒ וַיֹּ֣אמֶר אֲלֵהֶ֗ם הַאֵלֵ֞ךְ עַל־רָמֹ֥ת גִּלְעָ֛ד לַמִּלְחָמָ֖ה אִם־אֶחְדָּ֑ל וַיֹּאמְר֣וּ עֲלֵ֔ה וְיִתֵּ֥ן אֲדֹנָ֖י בְּיַ֥ד הַמֶּֽלֶךְ׃

‎7 ‏וַיֹּ֙אמֶר֙ יְה֣וֹשָׁפָ֔ט הַאֵ֨ין פֹּ֥ה נָבִ֛יא לַיהוָ֖ה ע֑וֹד וְנִדְרְשָׁ֖ה מֵאוֹתֽוֹ׃

‎8 ‏וַיֹּ֣אמֶר מֶֽלֶךְ־יִשְׂרָאֵ֣ל׀ אֶֽל־יְהוֹשָׁפָ֡ט ע֣וֹד אִישׁ־אֶחָ֡ד לִדְרֹשׁ֩ אֶת־יְהוָ֨ה מֵאֹת֜וֹ וַאֲנִ֣י שְׂנֵאתִ֗יו כִּ֠י לֹֽא־יִתְנַבֵּ֨א עָלַ֥י טוֹב֙ כִּ֣י אִם־רָ֔ע מִיכָ֖יְהוּ בֶּן־יִמְלָ֑ה וַיֹּ֙אמֶר֙ יְה֣וֹשָׁפָ֔ט אַל־יֹאמַ֥ר הַמֶּ֖לֶךְ כֵּֽן׃

‎9 ‏וַיִּקְרָא֙ מֶ֣לֶךְ יִשְׂרָאֵ֔ל אֶל־סָרִ֖יס אֶחָ֑ד וַיֹּ֕אמֶר מַהֲרָ֖ה מִיכָ֥יְהוּ בֶן־יִמְלָֽה׃

‎10 ‏וּמֶ֣לֶךְ יִשְׂרָאֵ֡ל וִֽיהוֹשָׁפָ֣ט מֶֽלֶךְ־יְהוּדָ֡ה יֹשְׁבִים֩ אִ֨ישׁ עַל־כִּסְא֜וֹ מְלֻבָּשִׁ֤ים בְּגָדִים֙ בְּגֹ֔רֶן פֶּ֖תַח שַׁ֣עַר שֹׁמְר֑וֹן וְכָ֨ל־הַנְּבִיאִ֔ים מִֽתְנַבְּאִ֖ים לִפְנֵיהֶֽם׃

‎11 ‏וַיַּ֥עַשׂ ל֛וֹ צִדְקִיָּ֥ה בֶֽן־כְּנַעֲנָ֖ה קַרְנֵ֣י בַרְזֶ֑ל וַיֹּ֙אמֶר֙ כֹּֽה־אָמַ֣ר יְהוָ֔ה בְּאֵ֛לֶּה תְּנַגַּ֥ח אֶת־אֲרָ֖ם עַד־כַּלֹּתָֽם׃

‎12 ‏וְכָל־הַנְּבִאִ֔ים נִבְּאִ֥ים כֵּ֖ן לֵאמֹ֑ר עֲלֵ֞ה רָמֹ֤ת גִּלְעָד֙ וְהַצְלַ֔ח וְנָתַ֥ן יְהוָ֖ה בְּיַ֥ד הַמֶּֽלֶךְ׃

‎13 ‏וְהַמַּלְאָ֞ךְ אֲשֶׁר־הָלַ֣ךְ׀ לִקְרֹ֣א מִיכָ֗יְהוּ דִּבֶּ֤ר אֵלָיו֙ לֵאמֹ֔ר הִנֵּה־נָ֞א דִּבְרֵ֧י הַנְּבִיאִ֛ים פֶּֽה־אֶחָ֥ד ט֖וֹב אֶל־הַמֶּ֑לֶךְ יְהִֽי־נָ֣א דבריך דְבָרְךָ֗ כִּדְבַ֛ר אַחַ֥ד מֵהֶ֖ם וְדִבַּ֥רְתָּ טּֽוֹב׃

‎14 ‏וַיֹּ֖אמֶר מִיכָ֑יְהוּ חַי־יְהוָ֕ה כִּ֠י אֶת־אֲשֶׁ֨ר יֹאמַ֧ר יְהוָ֛ה אֵלַ֖י אֹת֥וֹ אֲדַבֵּֽר׃

‎15 ‏וַיָּבוֹא֮ אֶל־הַמֶּלֶךְ֒ וַיֹּ֨אמֶר הַמֶּ֜לֶךְ אֵלָ֗יו מִיכָ֙יְהוּ֙ הֲנֵלֵ֞ךְ אֶל־רָמֹ֥ת גִּלְעָ֛ד לַמִּלְחָמָ֖ה אִם־נֶחְדָּ֑ל וַיֹּ֤אמֶר אֵלָיו֙ עֲלֵ֣ה וְהַצְלַ֔ח וְנָתַ֥ן יְהוָ֖ה בְּיַ֥ד הַמֶּֽלֶךְ׃

‎16 ‏וַיֹּ֤אמֶר אֵלָיו֙ הַמֶּ֔לֶךְ עַד־כַּמֶּ֥ה פְעָמִ֖ים אֲנִ֣י מַשְׁבִּעֶ֑ךָ אֲ֠שֶׁר לֹֽא־תְדַבֵּ֥ר אֵלַ֛י רַק־אֱמֶ֖ת בְּשֵׁ֥ם יְהוָֽה׃

‎17 ‏וַיֹּ֗אמֶר רָאִ֤יתִי אֶת־כָּל־יִשְׂרָאֵל֙ נְפֹצִ֣ים אֶל־הֶהָרִ֔ים כַּצֹּ֕אן אֲשֶׁ֥ר אֵין־לָהֶ֖ם רֹעֶ֑ה וַיֹּ֤אמֶר יְהוָה֙ לֹֽא־אֲדֹנִ֣ים לָאֵ֔לֶּה יָשׁ֥וּבוּ אִישׁ־לְבֵית֖וֹ בְּשָׁלֽוֹם׃

‎18 ‏וַיֹּ֥אמֶר מֶֽלֶךְ־יִשְׂרָאֵ֖ל אֶל־יְהוֹשָׁפָ֑ט הֲלוֹא֙ אָמַ֣רְתִּי אֵלֶ֔יךָ לֽוֹא־יִתְנַבֵּ֥א עָלַ֛י ט֖וֹב כִּ֥י אִם־רָֽע׃

‎19 ‏וַיֹּ֕אמֶר לָכֵ֖ן שְׁמַ֣ע דְּבַר־יְהוָ֑ה רָאִ֤יתִי אֶת־יְהוָה֙ יֹשֵׁ֣ב עַל־כִּסְא֔וֹ וְכָל־צְבָ֤א הַשָּׁמַ֙יִם֙ עֹמֵ֣ד עָלָ֔יו מִימִינ֖וֹ וּמִשְּׂמֹאלֽוֹ׃

‎20 ‏וַיֹּ֣אמֶר יְהוָ֗ה מִ֤י יְפַתֶּה֙ אֶת־אַחְאָ֔ב וְיַ֕עַל וְיִפֹּ֖ל בְּרָמֹ֣ת גִּלְעָ֑ד וַיֹּ֤אמֶר זֶה֙ בְּכֹ֔ה וְזֶ֥ה אֹמֵ֖ר בְּכֹֽה׃

‎21 ‏וַיֵּצֵ֣א הָר֗וּחַ וַֽיַּעֲמֹד֙ לִפְנֵ֣י יְהוָ֔ה וַיֹּ֖אמֶר אֲנִ֣י אֲפַתֶּ֑נּוּ וַיֹּ֧אמֶר יְהוָ֛ה אֵלָ֖יו בַּמָּֽה׃

‎22 ‏וַיֹּ֗אמֶר אֵצֵא֙ וְהָיִ֙יתִי֙ ר֣וּחַ שֶׁ֔קֶר בְּפִ֖י כָּל־נְבִיאָ֑יו וַיֹּ֗אמֶר תְּפַתֶּה֙ וְגַם־תּוּכָ֔ל צֵ֖א וַעֲשֵׂה־כֵֽן׃

‎23 ‏וְעַתָּ֗ה הִנֵּ֨ה נָתַ֤ן יְהוָה֙ ר֣וּחַ שֶׁ֔קֶר בְּפִ֖י כָּל־נְבִיאֶ֣יךָ אֵ֑לֶּה וַֽיהוָ֔ה דִּבֶּ֥ר עָלֶ֖יךָ רָעָֽה׃

‎24 ‏וַיִּגַּשׁ֙ צִדְקִיָּ֣הוּ בֶֽן־כְּנַעֲנָ֔ה וַיַּכֶּ֥ה אֶת־מִיכָ֖יְהוּ עַל־הַלֶּ֑חִי וַיֹּ֕אמֶר אֵי־זֶ֨ה עָבַ֧ר רֽוּחַ־יְהוָ֛ה מֵאִתִּ֖י לְדַבֵּ֥ר אוֹתָֽךְ׃

‎25 ‏וַיֹּ֣אמֶר מִיכָ֔יְהוּ הִנְּךָ֥ רֹאֶ֖ה בַּיּ֣וֹם הַה֑וּא אֲשֶׁ֥ר תָּבֹ֛א חֶ֥דֶר בְּחֶ֖דֶר לְהֵחָבֵֽה׃

‎26 ‏וַיֹּ֙אמֶר֙ מֶ֣לֶךְ יִשְׂרָאֵ֔ל קַ֚ח אֶת־מִיכָ֔יְהוּ וַהֲשִׁיבֵ֖הוּ אֶל־אָמֹ֣ן שַׂר־הָעִ֑יר וְאֶל־יוֹאָ֖שׁ בֶּן־הַמֶּֽלֶךְ׃

‎27 ‏וְאָמַרְתָּ֗ כֹּ֚ה אָמַ֣ר הַמֶּ֔לֶךְ שִׂ֥ימוּ אֶת־זֶ֖ה בֵּ֣ית הַכֶּ֑לֶא וְהַאֲכִילֻ֨הוּ לֶ֤חֶם לַ֙חַץ֙ וּמַ֣יִם לַ֔חַץ עַ֖ד בֹּאִ֥י בְשָׁלֽוֹם׃

‎28 ‏וַיֹּ֣אמֶר מִיכָ֔יְהוּ אִם־שׁ֤וֹב תָּשׁוּב֙ בְּשָׁל֔וֹם לֹֽא־דִבֶּ֥ר יְהוָ֖ה בִּ֑י וַיֹּ֕אמֶר שִׁמְע֖וּ עַמִּ֥ים כֻּלָּֽם׃

‎29 ‏וַיַּ֧עַל מֶֽלֶךְ־יִשְׂרָאֵ֛ל וְיהוֹשָׁפָ֥ט¹ מֶֽלֶךְ־יְהוּדָ֖ה רָמֹ֥ת גִּלְעָֽד׃

‎30 ‏וַיֹּאמֶר֩ מֶ֨לֶךְ יִשְׂרָאֵ֜ל אֶל־יְהוֹשָׁפָ֗ט הִתְחַפֵּשׂ֙ וָבֹ֣א בַמִּלְחָמָ֔ה וְאַתָּ֖ה לְבַ֣שׁ בְּגָדֶ֑יךָ וַיִּתְחַפֵּשׂ֙ מֶ֣לֶךְ יִשְׂרָאֵ֔ל וַיָּב֖וֹא בַּמִּלְחָמָֽה׃

‎31 ‏וּמֶ֣לֶךְ אֲרָ֡ם צִוָּ֣ה אֶת־שָׂרֵי֩ הָרֶ֨כֶב אֲשֶׁר־ל֜וֹ שְׁלֹשִׁ֤ים וּשְׁנַ֙יִם֙ לֵאמֹ֔ר לֹ֚א תִּלָּ֣חֲמ֔וּ אֶת־קָטֹ֖ן וְאֶת־גָּד֑וֹל כִּ֛י אִֽם־אֶת־מֶ֥לֶךְ יִשְׂרָאֵ֖ל לְבַדּֽוֹ׃

‎32 ‏וַיְהִ֡י כִּרְאוֹת֩ שָׂרֵ֨י הָרֶ֜כֶב אֶת־יְהוֹשָׁפָ֗ט וְהֵ֤מָּה אָֽמְרוּ֙ אַ֣ךְ מֶֽלֶךְ־יִשְׂרָאֵ֣ל ה֔וּא וַיָּסֻ֥רוּ עָלָ֖יו לְהִלָּחֵ֑ם וַיִּזְעַ֖ק יְהוֹשָׁפָֽט׃

‎33 ‏וַיְהִ֗י כִּרְאוֹת֙ שָׂרֵ֣י הָרֶ֔כֶב כִּֽי־לֹא־מֶ֥לֶךְ יִשְׂרָאֵ֖ל ה֑וּא וַיָּשׁ֖וּבוּ מֵאַחֲרָֽיו׃

‎34 ‏וְאִ֗ישׁ מָשַׁ֤ךְ בַּקֶּ֙שֶׁת֙ לְתֻמּ֔וֹ וַיַּכֶּה֙ אֶת־מֶ֣לֶךְ יִשְׂרָאֵ֔ל בֵּ֥ין הַדְּבָקִ֖ים וּבֵ֣ין הַשִּׁרְיָ֑ן וַיֹּ֣אמֶר לְרַכָּב֗וֹ הֲפֹ֥ךְ יָדְךָ֛ וְהוֹצִיאֵ֥נִי מִן־הַֽמַּחֲנֶ֖ה כִּ֥י הָחֳלֵֽיתִי׃

‎35 ‏וַתַּעֲלֶ֤ה הַמִּלְחָמָה֙ בַּיּ֣וֹם הַה֔וּא וְהַמֶּ֗לֶךְ הָיָ֧ה מָעֳמָ֛ד בַּמֶּרְכָּבָ֖ה נֹ֣כַח אֲרָ֑ם וַיָּ֣מָת בָּעֶ֔רֶב וַיִּ֥צֶק דַּֽם־הַמַּכָּ֖ה אֶל־חֵ֥יק הָרָֽכֶב׃

‎36 ‏וַיַּעֲבֹ֤ר הָרִנָּה֙ בַּֽמַּחֲנֶ֔ה כְּבֹ֥א הַשֶּׁ֖מֶשׁ לֵאמֹ֑ר אִ֥ישׁ אֶל־עִיר֖וֹ וְאִ֥ישׁ אֶל־אַרְצֽוֹ׃

‎37 ‏וַיָּ֣מָת הַמֶּ֔לֶךְ וַיָּב֖וֹא שֹׁמְר֑וֹן וַיִּקְבְּר֥וּ אֶת־הַמֶּ֖לֶךְ בְּשֹׁמְרֽוֹן׃

‎38 ‏וַיִּשְׁטֹ֨ף אֶת־הָרֶ֜כֶב עַ֣ל׀ בְּרֵכַ֣ת שֹׁמְר֗וֹן וַיָּלֹ֤קּוּ הַכְּלָבִים֙ אֶת־דָּמ֔וֹ וְהַזֹּנ֖וֹת רָחָ֑צוּ כִּדְבַ֥ר יְהוָ֖ה אֲשֶׁ֥ר דִּבֵּֽר׃

‎39 ‏וְיֶתֶר֩ דִּבְרֵ֨י אַחְאָ֜ב וְכָל־אֲשֶׁ֣ר עָשָׂ֗ה וּבֵ֤ית הַשֵּׁן֙ אֲשֶׁ֣ר בָּנָ֔ה וְכָל־הֶעָרִ֖ים אֲשֶׁ֣ר בָּנָ֑ה הֲלֽוֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

‎40 ‏וַיִּשְׁכַּ֥ב אַחְאָ֖ב עִם־אֲבֹתָ֑יו וַיִּמְלֹ֛ךְ אֲחַזְיָ֥הוּ בְנ֖וֹ תַּחְתָּֽיו׃ פ

‎41 ‏וִיהֽוֹשָׁפָט֙ בֶּן־אָסָ֔א מָלַ֖ךְ עַל־יְהוּדָ֑ה בִּשְׁנַ֣ת אַרְבַּ֔ע לְאַחְאָ֖ב מֶ֥לֶךְ יִשְׂרָאֵֽל׃

‎42 ‏יְהוֹשָׁפָ֗ט בֶּן־שְׁלֹשִׁ֨ים וְחָמֵ֤שׁ שָׁנָה֙ בְּמָלְכ֔וֹ וְעֶשְׂרִ֤ים וְחָמֵשׁ֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמּ֔וֹ עֲזוּבָ֖ה בַּת־שִׁלְחִֽי׃

‎43 ‏וַיֵּ֗לֶךְ בְּכָל־דֶּ֛רֶךְ אָסָ֥א אָבִ֖יו לֹא־סָ֣ר מִמֶּ֑נּוּ לַעֲשׂ֥וֹת הַיָּשָׁ֖ר בְּעֵינֵ֥י יְהוָֽה׃

‎44 ‏אַ֥ךְ הַבָּמ֖וֹת לֹֽא־סָ֑רוּ ע֥וֹד הָעָ֛ם מְזַבְּחִ֥ים וּֽמְקַטְּרִ֖ים בַּבָּמֽוֹת׃

‎45 ‏וַיַּשְׁלֵ֥ם יְהוֹשָׁפָ֖ט עִם־מֶ֥לֶךְ יִשְׂרָאֵֽל׃

‎46 ‏וְיֶ֨תֶר דִּבְרֵ֧י יְהוֹשָׁפָ֛ט וּגְבוּרָת֥וֹ אֲשֶׁר־עָשָׂ֖ה וַאֲשֶׁ֣ר נִלְחָ֑ם הֲלֹֽא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יְהוּדָֽה׃

‎47 ‏וְיֶ֙תֶר֙ הַקָּדֵ֔שׁ אֲשֶׁ֣ר נִשְׁאַ֔ר בִּימֵ֖י אָסָ֣א אָבִ֑יו בִּעֵ֖ר מִן־הָאָֽרֶץ׃

‎48 ‏וּמֶ֥לֶךְ אֵ֛ין בֶּאֱד֖וֹם נִצָּ֥ב מֶֽלֶךְ׃

‎49 ‏יְהוֹשָׁפָ֡ט עשר עָשָׂה֩ אֳנִיּ֨וֹת תַּרְשִׁ֜ישׁ לָלֶ֧כֶת אוֹפִ֛ירָה לַזָּהָ֖ב וְלֹ֣א הָלָ֑ךְ כִּֽי־נשברה נִשְׁבְּר֥וּ אֳנִיּ֖וֹת בְּעֶצְי֥וֹן גָּֽבֶר׃

‎50 ‏אָ֠ז אָמַ֞ר אֲחַזְיָ֤הוּ בֶן־אַחְאָב֙ אֶל־יְה֣וֹשָׁפָ֔ט יֵלְכ֧וּ עֲבָדַ֛י עִם־עֲבָדֶ֖יךָ בָּאֳנִיּ֑וֹת וְלֹ֥א אָבָ֖ה יְהוֹשָׁפָֽט׃

‎51 ‏וַיִּשְׁכַּ֤ב יְהֽוֹשָׁפָט֙ עִם־אֲבֹתָ֔יו וַיִּקָּבֵר֙ עִם־אֲבֹתָ֔יו בְּעִ֖יר דָּוִ֣ד אָבִ֑יו וַיִּמְלֹ֛ךְ יְהוֹרָ֥ם בְּנ֖וֹ תַּחְתָּֽיו׃ ס

‎52 ‏אֲחַזְיָ֣הוּ בֶן־אַחְאָ֗ב מָלַ֤ךְ עַל־יִשְׂרָאֵל֙ בְּשֹׁ֣מְר֔וֹן בִּשְׁנַת֙ שְׁבַ֣ע עֶשְׂרֵ֔ה לִיהוֹשָׁפָ֖ט מֶ֣לֶךְ יְהוּדָ֑ה וַיִּמְלֹ֥ךְ עַל־יִשְׂרָאֵ֖ל שְׁנָתָֽיִם׃

‎53 ‏וַיַּ֥עַשׂ הָרַ֖ע בְּעֵינֵ֣י יְהוָ֑ה וַיֵּ֗לֶךְ בְּדֶ֤רֶךְ³ אָבִיו֙ וּבְדֶ֣רֶךְ אִמּ֔וֹ וּבְדֶ֙רֶךְ֙ יָרָבְעָ֣ם בֶּן־נְבָ֔ט אֲשֶׁ֥ר הֶחֱטִ֖יא אֶת־יִשְׂרָאֵֽל׃

‎54 ‏וַֽיַּעֲבֹד֙ אֶת־הַבַּ֔עַל וַיִּֽשְׁתַּחֲוֶ֖ה ל֑וֹ וַיַּכְעֵ֗ס אֶת־יְהוָה֙ אֱלֹהֵ֣י יִשְׂרָאֵ֔ל כְּכֹ֥ל אֲשֶׁר־עָשָׂ֖ה אָבִֽיו׃

1 wayyēšəḇû šālōš šānîm ’ên miləḥāmâ bên ’ărām ûḇên yiśərā’ēl: f

2 wayəhî baššānâ haššəlîšîṯ wayyēreḏ yəhwōšāfāṭ meleḵə-yəhûḏâ ’el-meleḵə yiśərā’ēl:

3 wayyō’mer meleḵə-yiśərā’ēl ’el-‘ăḇāḏāyw hayəḏ^a‘ətem kî-lānû rāmōṯ gilə‘āḏ wa’ăn^aḥənû m^aḥəšîm miqq^aḥaṯ ’ōṯāh mîyaḏ meleḵə ’ărām:

4 wayyō’mer ’el-yəhwōšāfāṭ hăṯēlēḵə ’itî lammiləḥāmâ rāmōṯ gilə‘āḏ wayyō’mer yəhwōšāfāṭ ’el-meleḵə yiśərā’ēl kāmwōnî ḵāmwōḵā kə‘ammî ḵə‘ammeḵā kəsûsay kəsûseyḵā:

5 wayyō’mer yəhwōšāfāṭ ’el-meleḵə yiśərā’ēl dərāš-nā’ ḵayywōm ’eṯ-dəḇar yəhwâ:

6 wayyiqəbōṣ meleḵə-yiśərā’ēl ’eṯ-hannəḇî’îm kə’arəb^a‘ mē’wōṯ ’îš wayyō’mer ’ălēhem ha’ēlēḵə ‘al-rāmōṯ gilə‘āḏ lammiləḥāmâ ’im-’eḥədāl wayyō’mərû ‘ălēh wəyitēn ’ăḏōnāy bəyaḏ hammeleḵə:

7 wayyō’mer yəhwōšāfāṭ ha’ên pōh nāḇî’ layhwâ ‘wōḏ wəniḏərəšâ mē’wōṯwō:

8 wayyō’mer meleḵə-yiśərā’ēl| ’el-yəhwōšāfāṭ ‘wōḏ ’îš-’eḥāḏ liḏərōš ’eṯ-yəhwâ mē’ōṯwō wa’ănî śənē’ṯîw kî lō’-yiṯənabē’ ‘ālay ṭwōḇ kî ’im-rā‘ mîḵāyəhû ben-yiməlâ wayyō’mer yəhwōšāfāṭ ’al-yō’mar hammeleḵə kēn:

9 wayyiqərā’ meleḵə yiśərā’ēl ’el-sārîs ’eḥāḏ wayyō’mer mahărâ mîḵāyəhû ḇen-yiməlâ:

10 ûmeleḵə yiśərā’ēl wîhwōšāfāṭ meleḵə-yəhûḏâ yōšəḇîm ’îš ‘al-kisə’wō məlubāšîm bəḡāḏîm bəḡōren peṯ^aḥ š^a‘ar šōmərwōn wəḵāl-hannəḇî’îm miṯənabə’îm lifənêhem:

11 wayy^a‘aś lwō ṣiḏəqîyâ ḇen-kən^a‘ănâ qarənê ḇarəzel wayyō’mer kōh-’āmar yəhwâ bə’ēlleh tənag^aḥ ’eṯ-’ărām ‘aḏ-kallōṯām:

12 wəḵāl-hannəḇi’îm nibə’îm kēn lē’mōr ‘ălēh rāmōṯ gilə‘āḏ wəhaṣəl^aḥ wənāṯan yəhwâ bəyaḏ hammeleḵə:

13 wəhammalə’āḵə ’ăšer-hālaḵə| liqərō’ mîḵāyəhû diber ’ēlāyw lē’mōr hinnēh-nā’ diḇərê hannəḇî’îm peh-’eḥāḏ ṭwōḇ ’el-hammeleḵə yəhî-nā’ ḏəḇāreyḵā ḏəḇārəḵā kiḏəḇar ’^aḥaḏ mēhem wəḏibarətā ṭṭwōḇ:

14 wayyō’mer mîḵāyəhû ḥay-yəhwâ kî ’eṯ-’ăšer yō’mar yəhwâ ’ēlay ’ōṯwō ’ăḏabēr:

15 wayyāḇwō’ ’el-hammeleḵə wayyō’mer hammeleḵə ’ēlāyw mîḵāyəhû hănēlēḵə ’el-rāmōṯ gilə‘āḏ lammiləḥāmâ ’im-neḥədāl wayyō’mer ’ēlāyw ‘ălēh wəhaṣəl^aḥ wənāṯan yəhwâ bəyaḏ hammeleḵə:

16 wayyō’mer ’ēlāyw hammeleḵə ‘aḏ-kammeh fə‘āmîm ’ănî mašəbi‘eḵā ’ăšer lō’-ṯəḏabēr ’ēlay raq-’ĕmeṯ bəšēm yəhwâ:

17 wayyō’mer rā’îṯî ’eṯ-kāl-yiśərā’ēl nəfōṣîm ’el-hehārîm kaṣṣō’n ’ăšer ’ên-lâem rō‘eh wayyō’mer yəhwâ lō’-’ăḏōnîm lā’ēlleh yāšûḇû ’îš-ləḇêṯwō bəšālwōm:

18 wayyō’mer meleḵə-yiśərā’ēl ’el-yəhwōšāfāṭ hălwō’ ’āmarətî ’ēleyḵā lwō’-yiṯənabē’ ‘ālay ṭwōḇ kî ’im-rā‘:

19 wayyō’mer lāḵēn šəm^a‘ dəḇar-yəhwâ rā’îṯî ’eṯ-yəhwâ yōšēḇ ‘al-kisə’wō wəḵāl-ṣəḇā’ haššāmayim ‘ōmēḏ ‘ālāyw mîmînwō ûmiśśəmō’lwō:

20 wayyō’mer yəhwâ mî yəfateh ’eṯ-’^aḥə’āḇ wəy^a‘al wəyipōl bərāmōṯ gilə‘āḏ wayyō’mer zeh bəḵōh wəzeh ’ōmēr bəḵōh:

21 wayyēṣē’ hārûḥa wayy^a‘ămōḏ lifənê yəhwâ wayyō’mer ’ănî ’ăfatennû wayyō’mer yəhwâ ’ēlāyw bammâ:

22 wayyō’mer ’ēṣē’ wəhāyîṯî rûḥa šeqer bəfî kāl-nəḇî’āyw wayyō’mer təfateh wəḡam-tûḵāl ṣē’ w^a‘ăśēh-ḵēn:

23 wə‘atâ hinnēh nāṯan yəhwâ rûḥa šeqer bəfî kāl-nəḇî’eyḵā ’ēlleh wayhwâ diber ‘āleyḵā rā‘â:

24 wayyigaš ṣiḏəqîyâû ḇen-kən^a‘ănâ wayyakeh ’eṯ-mîḵāyəhû ‘al-halleḥî wayyō’mer ’ê-zeh ‘āḇar rûḥa-yəhwâ mē’itî ləḏabēr ’wōṯāḵə:

25 wayyō’mer mîḵāyəhû hinnəḵā rō’eh bayywōm hahû’ ’ăšer tāḇō’ ḥeḏer bəḥeḏer ləhēḥāḇēh:

26 wayyō’mer meleḵə yiśərā’ēl q^aḥ ’eṯ-mîḵāyəhû wahăšîḇēhû ’el-’āmōn śar-hā‘îr wə’el-ywō’āš ben-hammeleḵə:

27 wə’āmarətā kōh ’āmar hammeleḵə śîmû ’eṯ-zeh bêṯ hakele’ wəha’ăḵîluhû leḥem l^aḥaṣ ûmayim l^aḥaṣ ‘aḏ bō’î ḇəšālwōm:

28 wayyō’mer mîḵāyəhû ’im-šwōḇ tāšûḇ bəšālwōm lō’-ḏiber yəhwâ bî wayyō’mer šimə‘û ‘ammîm kullām:

29 wayy^a‘al meleḵə-yiśərā’ēl wəyhwōšāfāṭ¹ meleḵə-yəhûḏâ rāmōṯ gilə‘āḏ:

30 wayyō’mer meleḵə yiśərā’ēl ’el-yəhwōšāfāṭ hiṯəḥapēś wāḇō’ ḇammiləḥāmâ wə’atâ ləḇaš bəḡāḏeyḵā wayyiṯəḥapēś meleḵə yiśərā’ēl wayyāḇwō’ bammiləḥāmâ:

31 ûmeleḵə ’ărām ṣiûâ ’eṯ-śārê hāreḵeḇ ’ăšer-lwō šəlōšîm ûšənayim lē’mōr lō’ tillāḥămû ’eṯ-qāṭōn wə’eṯ-gāḏwōl kî ’im-’eṯ-meleḵə yiśərā’ēl ləḇadwō:

32 wayəhî kirə’wōṯ śārê hāreḵeḇ ’eṯ-yəhwōšāfāṭ wəhēmmâ ’āmərû ’aḵə meleḵə-yiśərā’ēl hû’ wayyāsurû ‘ālāyw ləhillāḥēm wayyizə‘aq yəhwōšāfāṭ:

33 wayəhî kirə’wōṯ śārê hāreḵeḇ kî-lō’-meleḵə yiśərā’ēl hû’ wayyāšûḇû mē’^aḥărāyw:

34 wə’îš māšaḵə baqqešeṯ ləṯummwō wayyakeh ’eṯ-meleḵə yiśərā’ēl bên hadəḇāqîm ûḇên hašširəyān wayyō’mer lərakāḇwō hăfōḵə yāḏəḵā wəhwōṣî’ēnî min-hamm^aḥăneh kî hāḥŏlêṯî:

35 wat^a‘ăleh hammiləḥāmâ bayywōm hahû’ wəhammeleḵə hāyâ mā‘ŏmāḏ bammerəkāḇâ nōḵ^aḥ ’ărām wayyāmāṯ bā‘ereḇ wayyiṣeq dam-hammakâ ’el-ḥêq hārāḵeḇ:

36 wayy^a‘ăḇōr hārinnâ bamm^aḥăneh kəḇō’ haššemeš lē’mōr ’îš ’el-‘îrwō wə’îš ’el-’arəṣwō:

37 wayyāmāṯ hammeleḵə wayyāḇwō’ šōmərwōn wayyiqəbərû ’eṯ-hammeleḵə bəšōmərwōn:

38 wayyišəṭōf ’eṯ-hāreḵeḇ ‘al| bərēḵaṯ šōmərwōn wayyālōqqû hakəlāḇîm ’eṯ-dāmwō wəhazzōnwōṯ rāḥāṣû kiḏəḇar yəhwâ ’ăšer dibēr:

39 wəyeṯer diḇərê ’^aḥə’āḇ wəḵāl-’ăšer ‘āśâ ûḇêṯ haššēn ’ăšer bānâ wəḵāl-he‘ārîm ’ăšer bānâ hălwō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl:

40 wayyišəkaḇ ’^aḥə’āḇ ‘im-’ăḇōṯāyw wayyiməlōḵə ’ăḥazəyâû ḇənwō t^aḥətāyw: f

41 wîhwōšāfāṭ ben-’āsā’ mālaḵə ‘al-yəhûḏâ bišənaṯ ’arəb^a‘ lə’^aḥə’āḇ meleḵə yiśərā’ēl:

42 yəhwōšāfāṭ ben-šəlōšîm wəḥāmēš šānâ bəmāləḵwō wə‘eśərîm wəḥāmēš šānâ mālaḵə bîrûšālāim wəšēm ’immwō ‘ăzûḇâ baṯ-šiləḥî:

43 wayyēleḵə bəḵāl-dereḵə ’āsā’ ’āḇîw lō’-sār mimmennû l^a‘ăśwōṯ hayyāšār bə‘ênê yəhwâ:

44 ’aḵə habāmwōṯ lō’-sārû ‘wōḏ hā‘ām məzabəḥîm ûməqaṭṭərîm babāmwōṯ:

45 wayyašəlēm yəhwōšāfāṭ ‘im-meleḵə yiśərā’ēl:

46 wəyeṯer diḇərê yəhwōšāfāṭ ûḡəḇûrāṯwō ’ăšer-‘āśâ wa’ăšer niləḥām hălō’-hēm kəṯûḇîm ‘al-sēfer diḇərê hayyāmîm ləmaləḵê yəhûḏâ:

47 wəyeṯer haqqāḏēš ’ăšer nišə’ar bîmê ’āsā’ ’āḇîw bi‘ēr min-hā’āreṣ:

48 ûmeleḵə ’ên be’ĕḏwōm niṣṣāḇ meleḵə:

49 yəhwōšāfāṭ ‘āśār ‘āśâ ’ŏnîywōṯ tarəšîš lāleḵeṯ ’wōfîrâ lazzâāḇ wəlō’ hālāḵə kî-nišəbərâ nišəbərû ’ŏnîywōṯ bə‘eṣəywōn gāḇer:

50 ’āz ’āmar ’ăḥazəyâû ḇen-’^aḥə’āḇ ’el-yəhwōšāfāṭ yēləḵû ‘ăḇāḏay ‘im-‘ăḇāḏeyḵā bā’ŏnîywōṯ wəlō’ ’āḇâ yəhwōšāfāṭ:

51 wayyišəkaḇ yəhwōšāfāṭ ‘im-’ăḇōṯāyw wayyiqqāḇēr ‘im-’ăḇōṯāyw bə‘îr dāwiḏ ’āḇîw wayyiməlōḵə yəhwōrām bənwō t^aḥətāyw: s

52 ’ăḥazəyâû ḇen-’^aḥə’āḇ mālaḵə ‘al-yiśərā’ēl bəšōmərwōn bišənaṯ šəḇ^a‘ ‘eśərēh lîhwōšāfāṭ meleḵə yəhûḏâ wayyiməlōḵə ‘al-yiśərā’ēl šənāṯāyim:

53 wayy^a‘aś hār^a‘ bə‘ênê yəhwâ wayyēleḵə bəḏereḵə³ ’āḇîw ûḇəḏereḵə ’immwō ûḇəḏereḵə yārāḇə‘ām ben-nəḇāṭ ’ăšer heḥĕṭî’ ’eṯ-yiśərā’ēl:

54 wayy^a‘ăḇōḏ ’eṯ-hab^a‘al wayyišət^aḥăweh lwō wayyaḵə‘ēs ’eṯ-yəhwâ ’ĕlōhê yiśərā’ēl kəḵōl ’ăšer-‘āśâ ’āḇîw: