2 Kings (2 Melakhim) Chapter 19

‎1 ‏וַיְהִ֗י כִּשְׁמֹ֙עַ֙ הַמֶּ֣לֶךְ חִזְקִיָּ֔הוּ וַיִּקְרַ֖ע אֶת־בְּגָדָ֑יו וַיִּתְכַּ֣ס בַּשָּׂ֔ק וַיָּבֹ֖א בֵּ֥ית יְהוָֽה׃

‎2 ‏וַ֠יִּשְׁלַח אֶת־אֶלְיָקִ֨ים אֲשֶׁר־עַל־הַבַּ֜יִת וְשֶׁבְנָ֣א הַסֹּפֵ֗ר וְאֵת֙ זִקְנֵ֣י הַכֹּֽהֲנִ֔ים מִתְכַּסִּ֖ים בַּשַּׂקִּ֑ים אֶל־יְשַֽׁעְיָ֥הוּ הַנָּבִ֖יא בֶּן־אָמֽוֹץ׃

‎3 ‏וַיֹּאמְר֣וּ אֵלָ֗יו כֹּ֚ה אָמַ֣ר חִזְקִיָּ֔הוּ יוֹם־צָרָ֧ה וְתוֹכֵחָ֛ה וּנְאָצָ֖ה הַיּ֣וֹם הַזֶּ֑ה כִּ֣י בָ֤אוּ בָנִים֙ עַד־מַשְׁבֵּ֔ר וְכֹ֥חַ אַ֖יִן לְלֵדָֽה׃

‎4 ‏אוּלַ֡י יִשְׁמַע֩ יְהוָ֨ה אֱלֹהֶ֜יךָ אֵ֣ת׀ כָּל־דִּבְרֵ֣י רַב־שָׁקֵ֗ה אֲשֶׁר֩ שְׁלָח֨וֹ מֶֽלֶךְ־אַשּׁ֤וּר׀ אֲדֹנָיו֙ לְחָרֵף֙ אֱלֹהִ֣ים חַ֔י וְהוֹכִ֙יחַ֙ בַּדְּבָרִ֔ים אֲשֶׁ֥ר שָׁמַ֖ע יְהוָ֣ה אֱלֹהֶ֑יךָ וְנָשָׂ֣אתָ תְפִלָּ֔ה בְּעַ֥ד הַשְּׁאֵרִ֖ית הַנִּמְצָאָֽה׃

‎5 ‏וַיָּבֹ֗אוּ עַבְדֵ֛י הַמֶּ֥לֶךְ חִזְקִיָּ֖הוּ אֶל־יְשַֽׁעַיָֽהוּ׃

‎6 ‏וַיֹּ֤אמֶר לָהֶם֙ יְשַֽׁעְיָ֔הוּ כֹּ֥ה תֹאמְר֖וּן אֶל־אֲדֹֽנֵיכֶ֑ם כֹּ֣ה׀ אָמַ֣ר יְהוָ֗ה אַל־תִּירָא֙ מִפְּנֵ֤י הַדְּבָרִים֙ אֲשֶׁ֣ר שָׁמַ֗עְתָּ אֲשֶׁ֧ר גִּדְּפ֛וּ נַעֲרֵ֥י מֶֽלֶךְ־אַשּׁ֖וּר אֹתִֽי׃

‎7 ‏הִנְנִ֨י נֹתֵ֥ן בּוֹ֙ ר֔וּחַ וְשָׁמַ֥ע שְׁמוּעָ֖ה וְשָׁ֣ב לְאַרְצ֑וֹ וְהִפַּלְתִּ֥יו בַּחֶ֖רֶב בְּאַרְצֽוֹ׃

‎8 ‏וַיָּ֙שָׁב֙ רַב־שָׁקֵ֔ה וַיִּמְצָא֙ אֶת־מֶ֣לֶךְ אַשּׁ֔וּר נִלְחָ֖ם עַל־לִבְנָ֑ה כִּ֣י שָׁמַ֔ע כִּ֥י נָסַ֖ע מִלָּכִֽישׁ׃

‎9 ‏וַיִּשְׁמַ֗ע אֶל־תִּרְהָ֤קָה מֶֽלֶך־כּוּשׁ֙¹ לֵאמֹ֔ר הִנֵּ֥ה יָצָ֖א לְהִלָּחֵ֣ם אִתָּ֑ךְ וַיָּ֙שָׁב֙ וַיִּשְׁלַ֣ח מַלְאָכִ֔ים אֶל־חִזְקִיָּ֖הוּ לֵאמֹֽר׃

‎10 ‏כֹּ֣ה תֹאמְר֗וּן אֶל־חִזְקִיָּ֤הוּ מֶֽלֶךְ־יְהוּדָה֙ לֵאמֹ֔ר אַל־יַשִּׁאֲךָ֣ אֱלֹהֶ֔יךָ אֲשֶׁ֥ר אַתָּ֛ה בֹּטֵ֥חַ בּ֖וֹ לֵאמֹ֑ר לֹ֤א תִנָּתֵן֙ יְר֣וּשָׁלִַ֔ם בְּיַ֖ד מֶ֥לֶךְ אַשּֽׁוּר׃

‎11 ‏הִנֵּ֣ה׀ אַתָּ֣ה שָׁמַ֗עְתָּ אֵת֩ אֲשֶׁ֨ר עָשׂ֜וּ מַלְכֵ֥י אַשּׁ֛וּר לְכָל־הָאֲרָצ֖וֹת לְהַֽחֲרִימָ֑ם וְאַתָּ֖ה תִּנָּצֵֽל׃

‎12 ‏הַהִצִּ֨ילוּ אֹתָ֜ם אֱלֹהֵ֤י הַגּוֹיִם֙ אֲשֶׁ֣ר שִׁחֲת֣וּ אֲבוֹתַ֔י אֶת־גּוֹזָ֖ן וְאֶת־חָרָ֑ן וְרֶ֥צֶף וּבְנֵי־עֶ֖דֶן אֲשֶׁ֥ר בִּתְלַאשָּֽׂר׃

‎13 ‏אַיּ֤וֹ מֶֽלֶךְ־חֲמָת֙ וּמֶ֣לֶךְ אַרְפָּ֔ד וּמֶ֖לֶךְ לָעִ֣יר סְפַרְוָ֑יִם הֵנַ֖ע וְעִוָּֽה׃

‎14 ‏וַיִּקַּ֨ח חִזְקִיָּ֧הוּ אֶת־הַסְּפָרִ֛ים מִיַּ֥ד הַמַּלְאָכִ֖ים וַיִּקְרָאֵ֑ם וַיַּ֙עַל֙ בֵּ֣ית יְהוָ֔ה וַיִּפְרְשֵׂ֥הוּ חִזְקִיָּ֖הוּ לִפְנֵ֥י יְהוָֽה׃ פ

‎15 ‏וַיִּתְפַּלֵּ֨ל חִזְקִיָּ֜הוּ לִפְנֵ֣י יְהוָה֮ וַיֹּאמַר֒ יְהוָ֞ה אֱלֹהֵ֤י יִשְׂרָאֵל֙ יֹשֵׁ֣ב הַכְּרֻבִ֔ים אַתָּה־ה֤וּא הָֽאֱלֹהִים֙ לְבַדְּךָ֔ לְכֹ֖ל מַמְלְכ֣וֹת הָאָ֑רֶץ אַתָּ֣ה עָשִׂ֔יתָ אֶת־הַשָּׁמַ֖יִם וְאֶת־הָאָֽרֶץ׃

‎16 ‏הַטֵּ֨ה יְהוָ֤ה׀ אָזְנְךָ֙ וּֽשֲׁמָ֔ע פְּקַ֧ח יְהוָ֛ה עֵינֶ֖יךָ וּרְאֵ֑ה וּשְׁמַ֗ע אֵ֚ת דִּבְרֵ֣י סַנְחֵרִ֔יב אֲשֶׁ֣ר שְׁלָח֔וֹ לְחָרֵ֖ף אֱלֹהִ֥ים חָֽי׃

‎17 ‏אָמְנָ֖ם יְהוָ֑ה הֶחֱרִ֜יבוּ מַלְכֵ֥י אַשּׁ֛וּר אֶת־הַגּוֹיִ֖ם וְאֶת־אַרְצָֽם׃

‎18 ‏וְנָתְנ֥וּ אֶת־אֱלֹהֵיהֶ֖ם בָּאֵ֑שׁ כִּי֩ לֹ֨א אֱלֹהִ֜ים הֵ֗מָּה כִּ֣י אִם־מַעֲשֵׂ֧ה יְדֵֽי־אָדָ֛ם עֵ֥ץ וָאֶ֖בֶן וַֽיְאַבְּדֽוּם׃

‎19 ‏וְעַתָּה֙ יְהוָ֣ה אֱלֹהֵ֔ינוּ הוֹשִׁיעֵ֥נוּ נָ֖א מִיָּד֑וֹ וְיֵֽדְעוּ֙ כָּל־מַמְלְכ֣וֹת הָאָ֔רֶץ כִּ֥י אַתָּ֛ה יְהוָ֥ה אֱלֹהִ֖ים לְבַדֶּֽךָ׃ ס

‎20 ‏וַיִּשְׁלַח֙ יְשַֽׁעְיָ֣הוּ בֶן־אָמ֔וֹץ אֶל־חִזְקִיָּ֖הוּ לֵאמֹ֑ר כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל אֲשֶׁ֨ר הִתְפַּלַּ֧לְתָּ אֵלַ֛י אֶל־סַנְחֵרִ֥ב מֶֽלֶךְ־אַשּׁ֖וּר שָׁמָֽעְתִּי׃

‎21 ‏זֶ֣ה הַדָּבָ֔ר אֲשֶׁר־דִּבֶּ֥ר יְהוָ֖ה עָלָ֑יו בָּזָ֨ה לְךָ֜ לָעֲגָ֣ה לְךָ֗ בְּתוּלַת֙ בַּת־צִיּ֔וֹן אַחֲרֶ֙יךָ֙ רֹ֣אשׁ הֵנִ֔יעָה בַּ֖ת יְרוּשָׁלִָֽם׃

‎22 ‏אֶת־מִ֤י חֵרַ֙פְתָּ֙ וְגִדַּ֔פְתָּ וְעַל־מִ֖י הֲרִימ֣וֹתָ קּ֑וֹל וַתִּשָּׂ֥א מָר֛וֹם עֵינֶ֖יךָ עַל־קְד֥וֹשׁ יִשְׂרָאֵֽל׃

‎23 ‏בְּיַ֣ד מַלְאָכֶיךָ֮ חֵרַ֣פְתָּ׀ אֲדֹנָי֒ וַתֹּ֗אמֶר ברכב בְּרֹ֥ב רִכְבִּ֛י אֲנִ֥י עָלִ֛יתִי מְר֥וֹם הָרִ֖ים יַרְכְּתֵ֣י לְבָנ֑וֹן וְאֶכְרֹ֞ת קוֹמַ֤ת אֲרָזָיו֙ מִבְח֣וֹר בְּרֹשָׁ֔יו וְאָב֙וֹאָה֙ מְל֣וֹן קִצֹּ֔ה^q יַ֖עַר כַּרְמִלּֽוֹ׃

‎24 ‏אֲנִ֣י קַ֔רְתִּי וְשָׁתִ֖יתִי מַ֣יִם זָרִ֑ים וְאַחְרִב֙ בְּכַף־פְּעָמַ֔י כֹּ֖ל יְאֹרֵ֥י מָצֽוֹר׃

‎25 ‏הֲלֹֽא־שָׁמַ֤עְתָּ לְמֵֽרָחוֹק֙ אֹתָ֣הּ עָשִׂ֔יתִי לְמִ֥ימֵי קֶ֖דֶם וִֽיצַרְתִּ֑יהָ עַתָּ֣ה הֲבֵיאתִ֗יהָ וּתְהִ֗י לַהְשׁ֛וֹת גַּלִּ֥ים נִצִּ֖ים עָרִ֥ים בְּצֻרֽוֹת׃

‎26 ‏וְיֹֽשְׁבֵיהֶן֙ קִצְרֵי־יָ֔ד חַ֖תּוּ וַיֵּבֹ֑שׁוּ הָי֞וּ עֵ֤שֶׂב שָׂדֶה֙ וִ֣ירַק דֶּ֔שֶׁא חֲצִ֣יר גַּגּ֔וֹת וּשְׁדֵפָ֖ה לִפְנֵ֥י קָמָֽה׃

‎27 ‏וְשִׁבְתְּךָ֛ וְצֵאתְךָ֥ וּבֹאֲךָ֖ יָדָ֑עְתִּי וְאֵ֖ת הִֽתְרַגֶּזְךָ֥ אֵלָֽי׃

‎28 ‏יַ֚עַן הִתְרַגֶּזְךָ֣ אֵלַ֔י וְשַׁאֲנַנְךָ֖ עָלָ֣ה בְאָזְנָ֑י וְשַׂמְתִּ֨י חַחִ֜י בְּאַפֶּ֗ךָ וּמִתְגִּי֙ בִּשְׂפָתֶ֔יךָ וַהֲשִׁ֣בֹתִ֔יךָ בַּדֶּ֖רֶךְ אֲשֶׁר־בָּ֥אתָ בָּֽהּ׃

‎29 ‏וְזֶה־לְּךָ֣ הָא֔וֹת אָכ֤וֹל הַשָּׁנָה֙ סָפִ֔יחַ וּבַשָּׁנָ֥ה הַשֵּׁנִ֖ית סָחִ֑ישׁ וּבַשָּׁנָ֣ה הַשְּׁלִישִׁ֗ית זִרְע֧וּ וְקִצְר֛וּ³ וְנִטְע֥וּ כְרָמִ֖ים וְאִכְל֥וּ פִרְיָֽם׃

‎30 ‏וְיָ֨סְפָ֜ה פְּלֵיטַ֧ת בֵּית־יְהוּדָ֛ה הַנִּשְׁאָרָ֖ה שֹׁ֣רֶשׁ לְמָ֑טָּה וְעָשָׂ֥ה פְרִ֖י לְמָֽעְלָה׃

‎31 ‏כִּ֤י מִירוּשָׁלִַ֙ם֙ תֵּצֵ֣א שְׁאֵרִ֔ית וּפְלֵיטָ֖ה מֵהַ֣ר צִיּ֑וֹן קִנְאַ֛ת יְהוָ֥ה צְבָ֖אוֹת^a תַּֽעֲשֶׂה־זֹּֽאת׃ ס

‎32 ‏לָכֵ֗ן כֹּֽה־אָמַ֤ר יְהוָה֙ אֶל־מֶ֣לֶךְ אַשּׁ֔וּר לֹ֤א יָבֹא֙ אֶל־הָעִ֣יר הַזֹּ֔את וְלֹֽא־יוֹרֶ֥ה שָׁ֖ם חֵ֑ץ וְלֹֽא־יְקַדְּמֶ֣נָּה מָגֵ֔ן וְלֹֽא־יִשְׁפֹּ֥ךְ עָלֶ֖יהָ סֹלְלָֽה׃

‎33 ‏בַּדֶּ֥רֶךְ אֲשֶׁר־יָבֹ֖א בָּ֣הּ יָשׁ֑וּב וְאֶל־הָעִ֥יר הַזֹּ֛את לֹ֥א יָבֹ֖א נְאֻם־יְהוָֽה׃

‎34 ‏וְגַנּוֹתִ֛י אֶל־הָעִ֥יר הַזֹּ֖את לְהֽוֹשִׁיעָ֑הּ לְמַֽעֲנִ֔י וּלְמַ֖עַן דָּוִ֥ד עַבְדִּֽי׃

‎35 ‏וַיְהִי֮ בַּלַּ֣יְלָה הַהוּא֒ וַיֵּצֵ֣א׀ מַלְאַ֣ךְ יְהוָ֗ה וַיַּךְ֙ בְּמַחֲנֵ֣ה אַשּׁ֔וּר מֵאָ֛ה שְׁמוֹנִ֥ים וַחֲמִשָּׁ֖ה אָ֑לֶף וַיַּשְׁכִּ֣ימוּ בַבֹּ֔קֶר וְהִנֵּ֥ה כֻלָּ֖ם פְּגָרִ֥ים מֵתִֽים׃

‎36 ‏וַיִּסַּ֣ע וַיֵּ֔לֶךְ וַיָּ֖שָׁב סַנְחֵרִ֣יב מֶֽלֶךְ־אַשּׁ֑וּר וַיֵּ֖שֶׁב בְּנִֽינְוֵֽה׃

‎37 ‏וַיְהִי֩ ה֨וּא מִֽשְׁתַּחֲוֶ֜ה בֵּ֣ית׀ נִסְרֹ֣ךְ אֱלֹהָ֗יו וְֽאַדְרַמֶּ֨לֶךְ וְשַׂרְאֶ֤צֶר בָּנָיו֙^a הִכֻּ֣הוּ בַחֶ֔רֶב וְהֵ֥מָּה נִמְלְט֖וּ אֶ֣רֶץ אֲרָרָ֑ט וַיִּמְלֹ֛ךְ אֵֽסַר־חַדֹּ֥ן בְּנ֖וֹ תַּחְתָּֽיו׃ פ

1 wayəhî kišəmō‘a hammeleḵə ḥizəqîyâû wayyiqər^a‘ ’eṯ-bəḡāḏāyw wayyiṯəkas baśśāq wayyāḇō’ bêṯ yəhwâ:

2 wayyišəl^aḥ ’eṯ-’eləyāqîm ’ăšer-‘al-habayiṯ wəšeḇənā’ hassōfēr wə’ēṯ ziqənê hakōhănîm miṯəkassîm baśśaqqîm ’el-yəš^a‘əyâû hannāḇî’ ben-’āmwōṣ:

3 wayyō’mərû ’ēlāyw kōh ’āmar ḥizəqîyâû ywōm-ṣārâ wəṯwōḵēḥâ ûnə’āṣâ hayywōm hazzeh kî ḇā’û ḇānîm ‘aḏ-mašəbēr wəḵōḥa ’ayin ləlēḏâ:

4 ’ûlay yišəm^a‘ yəhwâ ’ĕlōheyḵā ’ēṯ| kāl-diḇərê raḇ-šāqēh ’ăšer šəlāḥwō meleḵə-’aššûr| ’ăḏōnāyw ləḥārēf ’ĕlōhîm ḥay wəhwōḵîḥa badəḇārîm ’ăšer šām^a‘ yəhwâ ’ĕlōheyḵā wənāśā’ṯā ṯəfillâ bə‘aḏ haššə’ērîṯ hanniməṣā’â:

5 wayyāḇō’û ‘aḇəḏê hammeleḵə ḥizəqîyâû ’el-yəš^a‘ayâû:

6 wayyō’mer lâem yəš^a‘əyâû kōh ṯō’mərûn ’el-’ăḏōnêḵem kōh| ’āmar yəhwâ ’al-tîrā’ mipənê hadəḇārîm ’ăšer šām^a‘ətā ’ăšer gidəfû n^a‘ărê meleḵə-’aššûr ’ōṯî:

7 hinənî nōṯēn bwō rûḥa wəšām^a‘ šəmû‘â wəšāḇ lə’arəṣwō wəhipalətîw b^aḥereḇ bə’arəṣwō:

8 wayyāšāḇ raḇ-šāqēh wayyiməṣā’ ’eṯ-meleḵə ’aššûr niləḥām ‘al-liḇənâ kî šām^a‘ kî nās^a‘ millāḵîš:

9 wayyišəm^a‘ ’el-tirəhāqâ meleḵ-kûš¹ lē’mōr hinnēh yāṣā’ ləhillāḥēm ’itāḵə wayyāšāḇ wayyišəl^aḥ malə’āḵîm ’el-ḥizəqîyâû lē’mōr:

10 kōh ṯō’mərûn ’el-ḥizəqîyâû meleḵə-yəhûḏâ lē’mōr ’al-yašši’ăḵā ’ĕlōheyḵā ’ăšer ’atâ bōṭēḥa bwō lē’mōr lō’ ṯinnāṯēn yərûšālaim bəyaḏ meleḵə ’aššûr:

11 hinnēh| ’atâ šām^a‘ətā ’ēṯ ’ăšer ‘āśû maləḵê ’aššûr ləḵāl-hā’ărāṣwōṯ ləh^aḥărîmām wə’atâ tinnāṣēl:

12 hahiṣṣîlû ’ōṯām ’ĕlōhê hagwōyim ’ăšer šiḥăṯû ’ăḇwōṯay ’eṯ-gwōzān wə’eṯ-ḥārān wəreṣef ûḇənê-‘eḏen ’ăšer biṯəla’śśār:

13 ’ayywō meleḵə-ḥămāṯ ûmeleḵə ’arəpāḏ ûmeleḵə lā‘îr səfarəwāyim hēn^a‘ wə‘iûâ:

14 wayyiqq^aḥ ḥizəqîyâû ’eṯ-hassəfārîm mîyaḏ hammalə’āḵîm wayyiqərā’ēm wayy^a‘al bêṯ yəhwâ wayyifərəśēhû ḥizəqîyâû lifənê yəhwâ: f

15 wayyiṯəpallēl ḥizəqîyâû lifənê yəhwâ wayyō’mar yəhwâ ’ĕlōhê yiśərā’ēl yōšēḇ hakəruḇîm ’atâ-hû’ hā’ĕlōhîm ləḇadəḵā ləḵōl mamələḵwōṯ hā’āreṣ ’atâ ‘āśîṯā ’eṯ-haššāmayim wə’eṯ-hā’āreṣ:

16 haṭṭēh yəhwâ| ’āzənəḵā ûšămā‘ pəq^aḥ yəhwâ ‘êneyḵā ûrə’ēh ûšəm^a‘ ’ēṯ diḇərê sanəḥērîḇ ’ăšer šəlāḥwō ləḥārēf ’ĕlōhîm ḥāy:

17 ’āmənām yəhwâ heḥĕrîḇû maləḵê ’aššûr ’eṯ-hagwōyim wə’eṯ-’arəṣām:

18 wənāṯənû ’eṯ-’ĕlōhêhem bā’ēš kî lō’ ’ĕlōhîm hēmmâ kî ’im-m^a‘ăśēh yəḏê-’āḏām ‘ēṣ wā’eḇen wayə’abəḏûm:

19 wə‘atâ yəhwâ ’ĕlōhênû hwōšî‘ēnû nā’ mîyāḏwō wəyēḏə‘û kāl-mamələḵwōṯ hā’āreṣ kî ’atâ yəhwâ ’ĕlōhîm ləḇadeḵā: s

20 wayyišəl^aḥ yəš^a‘əyâû ḇen-’āmwōṣ ’el-ḥizəqîyâû lē’mōr kōh-’āmar yəhwâ ’ĕlōhê yiśərā’ēl ’ăšer hiṯəpallalətā ’ēlay ’el-sanəḥēriḇ meleḵə-’aššûr šāmā‘ətî:

21 zeh hadāḇār ’ăšer-diber yəhwâ ‘ālāyw bāzâ ləḵā lā‘ăḡâ ləḵā bəṯûlaṯ baṯ-ṣîywōn ’^aḥăreyḵā rō’š hēnî‘â baṯ yərûšālāim:

22 ’eṯ-mî ḥērafətā wəḡidafətā wə‘al-mî hărîmwōṯā qqwōl watiśśā’ mārwōm ‘êneyḵā ‘al-qəḏwōš yiśərā’ēl:

23 bəyaḏ malə’āḵeyḵā ḥērafətā| ’ăḏōnāy watō’mer bəreḵeḇ bərōḇ riḵəbî ’ănî ‘ālîṯî mərwōm hārîm yarəkəṯê ləḇānwōn wə’eḵərōṯ qwōmaṯ ’ărāzāyw miḇəḥwōr bərōšāyw wə’āḇwō’â məlwōn qiṣṣōh^q y^a‘ar karəmillwō:

24 ’ănî qarətî wəšāṯîṯî mayim zārîm wə’^aḥəriḇ bəḵaf-pə‘āmay kōl yə’ōrê māṣwōr:

25 hălō’-šām^a‘ətā ləmērāḥwōq ’ōṯāh ‘āśîṯî ləmîmê qeḏem wîṣarətîhā ‘atâ hăḇê’ṯîhā ûṯəhî lahəšwōṯ gallîm niṣṣîm ‘ārîm bəṣurwōṯ:

26 wəyōšəḇêhen qiṣərê-yāḏ ḥatû wayyēḇōšû hāyû ‘ēśeḇ śāḏeh wîraq deše’ ḥăṣîr gagwōṯ ûšəḏēfâ lifənê qāmâ:

27 wəšiḇətəḵā wəṣē’ṯəḵā ûḇō’ăḵā yāḏā‘ətî wə’ēṯ hiṯəragezəḵā ’ēlāy:

28 y^a‘an hiṯəragezəḵā ’ēlay wəša’ănanəḵā ‘ālâ ḇə’āzənāy wəśamətî ḥ^aḥî bə’apeḵā ûmiṯəgî biśəfāṯeyḵā wahăšiḇōṯîḵā badereḵə ’ăšer-bā’ṯā bāh:

29 wəzeh-lləḵā hā’wōṯ ’āḵwōl haššānâ sāfîḥa ûḇaššānâ haššēnîṯ sāḥîš ûḇaššānâ haššəlîšîṯ zirə‘û wəqiṣərû³ wəniṭə‘û ḵərāmîm wə’iḵəlû firəyām:

30 wəyāsəfâ pəlêṭaṯ bêṯ-yəhûḏâ hannišə’ārâ šōreš ləmāṭṭâ wə‘āśâ fərî ləmā‘əlâ:

31 kî mîrûšālaim tēṣē’ šə’ērîṯ ûfəlêṭâ mēhar ṣîywōn qinə’aṯ yəhwâ ṣəḇā’wōṯ^a t^a‘ăśeh-zzō’ṯ: s

32 lāḵēn kōh-’āmar yəhwâ ’el-meleḵə ’aššûr lō’ yāḇō’ ’el-hā‘îr hazzō’ṯ wəlō’-ywōreh šām ḥēṣ wəlō’-yəqadəmennâ māḡēn wəlō’-yišəpōḵə ‘āleyhā sōləlâ:

33 badereḵə ’ăšer-yāḇō’ bāh yāšûḇ wə’el-hā‘îr hazzō’ṯ lō’ yāḇō’ nə’um-yəhwâ:

34 wəḡannwōṯî ’el-hā‘îr hazzō’ṯ ləhwōšî‘āh ləm^a‘ănî ûləm^a‘an dāwiḏ ‘aḇədî:

35 wayəhî ballayəlâ hahû’ wayyēṣē’| malə’aḵə yəhwâ wayyaḵə bəm^aḥănēh ’aššûr mē’â šəmwōnîm w^aḥămiššâ ’ālef wayyašəkîmû ḇabōqer wəhinnēh ḵullām pəḡārîm mēṯîm:

36 wayyiss^a‘ wayyēleḵə wayyāšāḇ sanəḥērîḇ meleḵə-’aššûr wayyēšeḇ bənînəwēh:

37 wayəhî hû’ mišət^aḥăweh bêṯ| nisərōḵə ’ĕlōhāyw wə’aḏərammeleḵə wəśarə’eṣer bānāyw^a hikuhû ḇ^aḥereḇ wəhēmmâ nimələṭû ’ereṣ ’ărārāṭ wayyiməlōḵə ’ēsar-ḥadōn bənwō t^aḥətāyw: f