2 Kings (2 Melakhim) Chapter 20

‎1 ‏בַּיָּמִ֣ים הָהֵ֔ם חָלָ֥ה חִזְקִיָּ֖הוּ לָמ֑וּת וַיָּבֹ֣א אֵ֠לָיו יְשַׁעְיָ֨הוּ בֶן־אָמ֜וֹץ הַנָּבִ֗יא וַיֹּ֨אמֶר אֵלָ֜יו כֹּֽה־אָמַ֤ר יְהוָה֙ צַ֣ו לְבֵיתֶ֔ךָ כִּ֛י מֵ֥ת אַתָּ֖ה וְלֹ֥א תִֽחְיֶֽה׃

‎2 ‏וַיַּסֵּ֥ב אֶת־פָּנָ֖יו אֶל־הַקִּ֑יר וַיִּ֨תְפַּלֵּ֔ל אֶל־יְהוָ֖ה לֵאמֹֽר׃

‎3 ‏אָנָּ֣ה יְהוָ֗ה זְכָר־נָ֞א אֵ֣ת אֲשֶׁ֧ר הִתְהַלַּ֣כְתִּי לְפָנֶ֗יךָ בֶּֽאֱמֶת֙ וּבְלֵבָ֣ב שָׁלֵ֔ם וְהַטּ֥וֹב בְּעֵינֶ֖יךָ עָשִׂ֑יתִי וַיֵּ֥בְךְּ חִזְקִיָּ֖הוּ בְּכִ֥י גָדֽוֹל׃ ס

‎4 ‏וַיְהִ֣י יְשַׁעְיָ֔הוּ לֹ֣א יָצָ֔א העיר חָצֵ֖ר הַתִּֽיכֹנָ֑ה וּדְבַר־יְהוָ֔ה הָיָ֥ה אֵלָ֖יו לֵאמֹֽר׃

‎5 ‏שׁ֣וּב וְאָמַרְתָּ֞ אֶל־חִזְקִיָּ֣הוּ נְגִיד־עַמִּ֗י כֹּֽה־אָמַ֤ר יְהוָה֙ אֱלֹהֵי֙ דָּוִ֣ד אָבִ֔יךָ שָׁמַ֙עְתִּי֙ אֶת־תְּפִלָּתֶ֔ךָ רָאִ֖יתִי אֶת־דִּמְעָתֶ֑ךָ הִנְנִי֙ רֹ֣פֶא לָ֔ךְ בַּיּוֹם֙ הַשְּׁלִישִׁ֔י תַּעֲלֶ֖ה בֵּ֥ית יְהוָֽה׃

‎6 ‏וְהֹסַפְתִּ֣י עַל־יָמֶ֗יךָ חֲמֵ֤שׁ עֶשְׂרֵה֙ שָׁנָ֔ה וּמִכַּ֤ף מֶֽלֶךְ־אַשּׁוּר֙ אַצִּ֣ילְךָ֔ וְאֵ֖ת הָעִ֣יר הַזֹּ֑את וְגַנּוֹתִי֙ עַל־הָעִ֣יר הַזֹּ֔את לְמַֽעֲנִ֔י וּלְמַ֖עַן דָּוִ֥ד עַבְדִּֽי׃

‎7 ‏וַיֹּ֣אמֶר יְשַֽׁעְיָ֔הוּ קְח֖וּ דְּבֶ֣לֶת תְּאֵנִ֑ים וַיִּקְח֛וּ וַיָּשִׂ֥ימוּ עַֽל־הַשְּׁחִ֖ין וַיֶּֽחִי׃

‎8 ‏וַיֹּ֤אמֶר חִזְקִיָּ֙הוּ֙ אֶֽל־יְשַׁעְיָ֔הוּ מָ֣ה א֔וֹת כִּֽי־יִרְפָּ֥א יְהוָ֖ה לִ֑י וְעָלִ֛יתִי בַּיּ֥וֹם הַשְּׁלִישִׁ֖י בֵּ֥ית יְהוָֽה׃

‎9 ‏וַיֹּ֣אמֶר יְשַׁעְיָ֗הוּ זֶה־לְּךָ֤ הָאוֹת֙ מֵאֵ֣ת יְהוָ֔ה כִּ֚י יַעֲשֶׂ֣ה יְהוָ֔ה אֶת־הַדָּבָ֖ר אֲשֶׁ֣ר דִּבֵּ֑ר הָלַ֤ךְ הַצֵּל֙ עֶ֣שֶׂר מַֽעֲל֔וֹת אִם־יָשׁ֖וּב עֶ֥שֶׂר מַעֲלֽוֹת׃

‎10 ‏וַיֹּ֙אמֶר֙ יְחִזְקִיָּ֔הוּ נָקֵ֣ל לַצֵּ֔ל לִנְט֖וֹת עֶ֣שֶׂר מַעֲל֑וֹת לֹ֣א כִ֔י יָשׁ֥וּב הַצֵּ֛ל אֲחֹרַנִּ֖ית עֶ֥שֶׂר מַעֲלֽוֹת׃

‎11 ‏וַיִּקְרָ֛א יְשַׁעְיָ֥הוּ הַנָּבִ֖יא אֶל־יְהוָ֑ה וַיָּ֣שֶׁב אֶת־הַצֵּ֗ל בַּֽ֠מַּעֲלוֹת אֲשֶׁ֨ר יָרְדָ֜ה בְּמַעֲל֥וֹת אָחָ֛ז אֲחֹֽרַנִּ֖ית עֶ֥שֶׂר מַעֲלֽוֹת׃ פ

‎12 ‏בָּעֵ֣ת הַהִ֡יא שָׁלַ֡ח בְּרֹאדַ֣ךְ בַּ֠לְאֲדָן בֶּֽן־בַּלְאֲדָ֧ן מֶֽלֶךְ־בָּבֶ֛ל סְפָרִ֥ים וּמִנְחָ֖ה אֶל־חִזְקִיָּ֑הוּ כִּ֣י שָׁמַ֔ע כִּ֥י חָלָ֖ה חִזְקִיָּֽהוּ׃

‎13 ‏וַיִּשְׁמַ֣ע עֲלֵיהֶם֮ חִזְקִיָּהוּ֒ וַיַּרְאֵ֣ם אֶת־כָּל־בֵּ֣ית נְכֹתֹ֡ה^q אֶת־הַכֶּסֶף֩ וְאֶת־הַזָּהָ֨ב וְאֶת־הַבְּשָׂמִ֜ים וְאֵ֣ת׀ שֶׁ֣מֶן הַטּ֗וֹב וְאֵת֙ בֵּ֣ית כֵּלָ֔יו וְאֵ֛ת כָּל־אֲשֶׁ֥ר נִמְצָ֖א בְּאֽוֹצְרֹתָ֑יו לֹֽא־הָיָ֣ה דָבָ֗ר אֲ֠שֶׁר לֹֽא־הֶרְאָ֧ם חִזְקִיָּ֛הוּ בְּבֵית֖וֹ וּבְכָל־מֶמְשַׁלְתּֽוֹ׃

‎14 ‏וַיָּבֹא֙ יְשַֽׁעְיָ֣הוּ הַנָּבִ֔יא אֶל־הַמֶּ֖לֶךְ חִזְקִיָּ֑הוּ וַיֹּ֨אמֶר אֵלָ֜יו מָ֥ה אָמְר֣וּ׀ הָאֲנָשִׁ֣ים הָאֵ֗לֶּה וּמֵאַ֙יִן֙ יָבֹ֣אוּ אֵלֶ֔יךָ וַיֹּ֙אמֶר֙ חִזְקִיָּ֔הוּ מֵאֶ֧רֶץ רְחוֹקָ֛ה בָּ֖אוּ מִבָּבֶֽל׃

‎15 ‏וַיֹּ֕אמֶר מָ֥ה רָא֖וּ בְּבֵיתֶ֑ךָ וַיֹּ֣אמֶר חִזְקִיָּ֗הוּ אֵ֣ת כָּל־אֲשֶׁ֤ר בְּבֵיתִי֙ רָא֔וּ לֹא־הָיָ֥ה דָבָ֛ר אֲשֶׁ֥ר לֹֽא־הִרְאִיתִ֖ם בְּאֹצְרֹתָֽי׃

‎16 ‏וַיֹּ֥אמֶר יְשַׁעְיָ֖הוּ אֶל־חִזְקִיָּ֑הוּ שְׁמַ֖ע דְּבַר־יְהוָֽה׃

‎17 ‏הִנֵּה֮ יָמִ֣ים בָּאִים֒ וְנִשָּׂ֣א׀ כָּל־אֲשֶׁ֣ר בְּבֵיתֶ֗ךָ וַאֲשֶׁ֨ר אָצְר֧וּ אֲבֹתֶ֛יךָ עַד־הַיּ֥וֹם הַזֶּ֖ה בָּבֶ֑לָה לֹֽא־יִוָּתֵ֥ר דָּבָ֖ר אָמַ֥ר יְהוָֽה׃

‎18 ‏וּמִבָּנֶ֜יךָ אֲשֶׁ֨ר יֵצְא֧וּ מִמְּךָ֛ אֲשֶׁ֥ר תּוֹלִ֖יד יקח יִקָּ֑חוּ וְהָיוּ֙ סָֽרִיסִ֔ים בְּהֵיכַ֖ל מֶ֥לֶךְ בָּבֶֽל׃

‎19 ‏וַיֹּ֤אמֶר חִזְקִיָּ֙הוּ֙ אֶֽל־יְשַֽׁעְיָ֔הוּ ט֥וֹב דְּבַר־יְהוָ֖ה אֲשֶׁ֣ר דִּבַּ֑רְתָּ וַיֹּ֕אמֶר הֲל֛וֹא אִם־שָׁל֥וֹם וֶאֱמֶ֖ת יִהְיֶ֥ה בְיָמָֽי׃

‎20 ‏וְיֶ֨תֶר דִּבְרֵ֤י חִזְקִיָּ֙הוּ֙ וְכָל־גְּב֣וּרָת֔וֹ וַאֲשֶׁ֣ר עָשָׂ֗ה אֶת־הַבְּרֵכָה֙ וְאֶת־הַתְּעָלָ֔ה וַיָּבֵ֥א אֶת־הַמַּ֖יִם הָעִ֑ירָה הֲלֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יְהוּדָֽה׃

‎21 ‏וַיִּשְׁכַּ֥ב חִזְקִיָּ֖הוּ עִם־אֲבֹתָ֑יו וַיִּמְלֹ֛ךְ מְנַשֶּׁ֥ה בְנ֖וֹ תַּחְתָּֽיו׃ פ

1 bayyāmîm hâēm ḥālâ ḥizəqîyâû lāmûṯ wayyāḇō’ ’ēlāyw yəš^a‘əyâû ḇen-’āmwōṣ hannāḇî’ wayyō’mer ’ēlāyw kōh-’āmar yəhwâ ṣaw ləḇêṯeḵā kî mēṯ ’atâ wəlō’ ṯiḥəyeh:

2 wayyassēḇ ’eṯ-pānāyw ’el-haqqîr wayyiṯəpallēl ’el-yəhwâ lē’mōr:

3 ’ānnâ yəhwâ zəḵār-nā’ ’ēṯ ’ăšer hiṯəhallaḵətî ləfāneyḵā be’ĕmeṯ ûḇəlēḇāḇ šālēm wəhaṭṭwōḇ bə‘êneyḵā ‘āśîṯî wayyēḇəḵḵə ḥizəqîyâû bəḵî ḡāḏwōl: s

4 wayəhî yəš^a‘əyâû lō’ yāṣā’ hā‘îr ḥāṣēr hatîḵōnâ ûḏəḇar-yəhwâ hāyâ ’ēlāyw lē’mōr:

5 šûḇ wə’āmarətā ’el-ḥizəqîyâû nəḡîḏ-‘ammî kōh-’āmar yəhwâ ’ĕlōhê dāwiḏ ’āḇîḵā šām^a‘ətî ’eṯ-təfillāṯeḵā rā’îṯî ’eṯ-dimə‘āṯeḵā hinənî rōfe’ lāḵə bayywōm haššəlîšî t^a‘ăleh bêṯ yəhwâ:

6 wəhōsafətî ‘al-yāmeyḵā ḥămēš ‘eśərēh šānâ ûmikaf meleḵə-’aššûr ’aṣṣîləḵā wə’ēṯ hā‘îr hazzō’ṯ wəḡannwōṯî ‘al-hā‘îr hazzō’ṯ ləm^a‘ănî ûləm^a‘an dāwiḏ ‘aḇədî:

7 wayyō’mer yəš^a‘əyâû qəḥû dəḇeleṯ tə’ēnîm wayyiqəḥû wayyāśîmû ‘al-haššəḥîn wayyeḥî:

8 wayyō’mer ḥizəqîyâû ’el-yəš^a‘əyâû mâ ’wōṯ kî-yirəpā’ yəhwâ lî wə‘ālîṯî bayywōm haššəlîšî bêṯ yəhwâ:

9 wayyō’mer yəš^a‘əyâû zeh-lləḵā hā’wōṯ mē’ēṯ yəhwâ kî y^a‘ăśeh yəhwâ ’eṯ-hadāḇār ’ăšer dibēr hālaḵə haṣṣēl ‘eśer m^a‘ălwōṯ ’im-yāšûḇ ‘eśer m^a‘ălwōṯ:

10 wayyō’mer yəḥizəqîyâû nāqēl laṣṣēl linəṭwōṯ ‘eśer m^a‘ălwōṯ lō’ ḵî yāšûḇ haṣṣēl ’ăḥōrannîṯ ‘eśer m^a‘ălwōṯ:

11 wayyiqərā’ yəš^a‘əyâû hannāḇî’ ’el-yəhwâ wayyāšeḇ ’eṯ-haṣṣēl bamm^a‘ălwōṯ ’ăšer yārəḏâ bəm^a‘ălwōṯ ’āḥāz ’ăḥōrannîṯ ‘eśer m^a‘ălwōṯ: f

12 bā‘ēṯ hahî’ šāl^aḥ bərō’ḏaḵə balə’ăḏān ben-balə’ăḏān meleḵə-bāḇel səfārîm ûminəḥâ ’el-ḥizəqîyâû kî šām^a‘ kî ḥālâ ḥizəqîyâû:

13 wayyišəm^a‘ ‘ălêhem ḥizəqîyâû wayyarə’ēm ’eṯ-kāl-bêṯ nəḵōṯōh^q ’eṯ-hakesef wə’eṯ-hazzâāḇ wə’eṯ-habəśāmîm wə’ēṯ| šemen haṭṭwōḇ wə’ēṯ bêṯ kēlāyw wə’ēṯ kāl-’ăšer niməṣā’ bə’wōṣərōṯāyw lō’-hāyâ ḏāḇār ’ăšer lō’-herə’ām ḥizəqîyâû bəḇêṯwō ûḇəḵāl-meməšalətwō:

14 wayyāḇō’ yəš^a‘əyâû hannāḇî’ ’el-hammeleḵə ḥizəqîyâû wayyō’mer ’ēlāyw mâ ’āmərû| hā’ănāšîm hā’ēlleh ûmē’ayin yāḇō’û ’ēleyḵā wayyō’mer ḥizəqîyâû mē’ereṣ rəḥwōqâ bā’û mibāḇel:

15 wayyō’mer mâ rā’û bəḇêṯeḵā wayyō’mer ḥizəqîyâû ’ēṯ kāl-’ăšer bəḇêṯî rā’û lō’-hāyâ ḏāḇār ’ăšer lō’-hirə’îṯim bə’ōṣərōṯāy:

16 wayyō’mer yəš^a‘əyâû ’el-ḥizəqîyâû šəm^a‘ dəḇar-yəhwâ:

17 hinnēh yāmîm bā’îm wəniśśā’| kāl-’ăšer bəḇêṯeḵā wa’ăšer ’āṣərû ’ăḇōṯeyḵā ‘aḏ-hayywōm hazzeh bāḇelâ lō’-yiûāṯēr dāḇār ’āmar yəhwâ:

18 ûmibāneyḵā ’ăšer yēṣə’û mimməḵā ’ăšer twōlîḏ yiqqāḥ yiqqāḥû wəhāyû sārîsîm bəhêḵal meleḵə bāḇel:

19 wayyō’mer ḥizəqîyâû ’el-yəš^a‘əyâû ṭwōḇ dəḇar-yəhwâ ’ăšer dibarətā wayyō’mer hălwō’ ’im-šālwōm we’ĕmeṯ yihəyeh ḇəyāmāy:

20 wəyeṯer diḇərê ḥizəqîyâû wəḵāl-gəḇûrāṯwō wa’ăšer ‘āśâ ’eṯ-habərēḵâ wə’eṯ-hatə‘ālâ wayyāḇē’ ’eṯ-hammayim hā‘îrâ hălō’-hēm kəṯûḇîm ‘al-sēfer diḇərê hayyāmîm ləmaləḵê yəhûḏâ:

21 wayyišəkaḇ ḥizəqîyâû ‘im-’ăḇōṯāyw wayyiməlōḵə mənaššeh ḇənwō t^aḥətāyw: f