Leviticus (Vayikra) Chapter 14

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏זֹ֤את תִּֽהְיֶה֙ תּוֹרַ֣ת הַמְּצֹרָ֔ע בְּי֖וֹם טָהֳרָת֑וֹ וְהוּבָ֖א אֶל־הַכֹּהֵֽן׃

‎3 ‏וְיָצָא֙ הַכֹּהֵ֔ן אֶל־מִח֖וּץ לַֽמַּחֲנֶ֑ה וְרָאָה֙ הַכֹּהֵ֔ן וְהִנֵּ֛ה נִרְפָּ֥א נֶֽגַע־הַצָּרַ֖עַת מִן־הַצָּרֽוּעַ׃

‎4 ‏וְצִוָּה֙ הַכֹּהֵ֔ן וְלָקַ֧ח לַמִּטַּהֵ֛ר שְׁתֵּֽי־צִפֳּרִ֥ים חַיּ֖וֹת טְהֹר֑וֹת וְעֵ֣ץ אֶ֔רֶז וּשְׁנִ֥י תוֹלַ֖עַת וְאֵזֹֽב׃

‎5 ‏וְצִוָּה֙ הַכֹּהֵ֔ן וְשָׁחַ֖ט אֶת־הַצִּפּ֣וֹר הָאֶחָ֑ת אֶל־כְּלִי־חֶ֖רֶשׂ עַל־מַ֥יִם חַיִּֽים׃

‎6 ‏אֶת־הַצִּפֹּ֤ר הַֽחַיָּה֙ יִקַּ֣ח אֹתָ֔הּ וְאֶת־עֵ֥ץ הָאֶ֛רֶז וְאֶת־שְׁנִ֥י הַתּוֹלַ֖עַת וְאֶת־הָאֵזֹ֑ב וְטָבַ֨ל אוֹתָ֜ם וְאֵ֣ת׀ הַצִּפֹּ֣ר הַֽחַיָּ֗ה בְּדַם֙ הַצִּפֹּ֣ר הַשְּׁחֻטָ֔ה עַ֖ל הַמַּ֥יִם הַֽחַיִּֽים׃

‎7 ‏וְהִזָּ֗ה עַ֧ל הַמִּטַּהֵ֛ר מִן־הַצָּרַ֖עַת שֶׁ֣בַע פְּעָמִ֑ים וְטִ֣הֲר֔וֹ וְשִׁלַּ֛ח אֶת־הַצִּפֹּ֥ר הַֽחַיָּ֖ה עַל־פְּנֵ֥י הַשָּׂדֶֽה׃

‎8 ‏וְכִבֶּס֩ הַמִּטַּהֵ֨ר אֶת־בְּגָדָ֜יו וְגִלַּ֣ח אֶת־כָּל־שְׂעָר֗וֹ וְרָחַ֤ץ בַּמַּ֙יִם֙ וְטָהֵ֔ר וְאַחַ֖ר יָב֣וֹא אֶל־הַֽמַּחֲנֶ֑ה וְיָשַׁ֛ב מִח֥וּץ לְאָהֳל֖וֹ שִׁבְעַ֥ת יָמִֽים׃

‎9 ‏וְהָיָה֩ בַיּ֨וֹם הַשְּׁבִיעִ֜י יְגַלַּ֣ח אֶת־כָּל־שְׂעָר֗וֹ אֶת־רֹאשׁ֤וֹ וְאֶת־זְקָנוֹ֙ וְאֵת֙ גַּבֹּ֣ת עֵינָ֔יו וְאֶת־כָּל־שְׂעָר֖וֹ יְגַלֵּ֑חַ וְכִבֶּ֣ס אֶת־בְּגָדָ֗יו וְרָחַ֧ץ אֶת־בְּשָׂר֛וֹ בַּמַּ֖יִם וְטָהֵֽר׃

‎10 ‏וּבַיּ֣וֹם הַשְּׁמִינִ֗י יִקַּ֤ח שְׁנֵֽי־כְבָשִׂים֙ תְּמִימִ֔ים וְכַבְשָׂ֥ה אַחַ֛ת בַּת־שְׁנָתָ֖הּ תְּמִימָ֑ה וּשְׁלֹשָׁ֣ה עֶשְׂרֹנִ֗ים סֹ֤לֶת מִנְחָה֙ בְּלוּלָ֣ה בַשֶּׁ֔מֶן וְלֹ֥ג אֶחָ֖ד שָֽׁמֶן׃

‎11 ‏וְהֶעֱמִ֞יד הַכֹּהֵ֣ן הַֽמְטַהֵ֗ר אֵ֛ת הָאִ֥ישׁ הַמִּטַּהֵ֖ר וְאֹתָ֑ם לִפְנֵ֣י יְהוָ֔ה פֶּ֖תַח אֹ֥הֶל מוֹעֵֽד׃

‎12 ‏וְלָקַ֨ח הַכֹּהֵ֜ן אֶת־הַכֶּ֣בֶשׂ הָאֶחָ֗ד וְהִקְרִ֥יב אֹת֛וֹ לְאָשָׁ֖ם וְאֶת־לֹ֣ג הַשָּׁ֑מֶן וְהֵנִ֥יף אֹתָ֛ם תְּנוּפָ֖ה לִפְנֵ֥י יְהוָֽה׃

‎13 ‏וְשָׁחַ֣ט אֶת־הַכֶּ֗בֶשׂ בִּ֠מְקוֹם אֲשֶׁ֨ר יִשְׁחַ֧ט אֶת־הַֽחַטָּ֛את וְאֶת־הָעֹלָ֖ה בִּמְק֣וֹם הַקֹּ֑דֶשׁ כִּ֡י כַּ֠חַטָּאת הָאָשָׁ֥ם הוּא֙ לַכֹּהֵ֔ן קֹ֥דֶשׁ קָֽדָשִׁ֖ים הֽוּא׃

‎14 ‏וְלָקַ֣ח הַכֹּהֵן֮ מִדַּ֣ם הָאָשָׁם֒ וְנָתַן֙ הַכֹּהֵ֔ן עַל־תְּנ֛וּךְ אֹ֥זֶן הַמִּטַּהֵ֖ר הַיְמָנִ֑ית וְעַל־בֹּ֤הֶן יָדוֹ֙ הַיְמָנִ֔ית וְעַל־בֹּ֥הֶן רַגְל֖וֹ הַיְמָנִֽית׃

‎15 ‏וְלָקַ֥ח הַכֹּהֵ֖ן מִלֹּ֣ג הַשָּׁ֑מֶן וְיָצַ֛ק עַל־כַּ֥ף הַכֹּהֵ֖ן הַשְּׂמָאלִֽית׃

‎16 ‏וְטָבַ֤ל הַכֹּהֵן֙ אֶת־אֶצְבָּע֣וֹ הַיְמָנִ֔ית מִן־הַשֶּׁ֕מֶן אֲשֶׁ֥ר עַל־כַּפּ֖וֹ הַשְּׂמָאלִ֑ית וְהִזָּ֨ה מִן־הַשֶּׁ֧מֶן בְּאֶצְבָּע֛וֹ שֶׁ֥בַע פְּעָמִ֖ים לִפְנֵ֥י יְהוָֽה׃

‎17 ‏וּמִיֶּ֨תֶר הַשֶּׁ֜מֶן אֲשֶׁ֣ר עַל־כַּפּ֗וֹ יִתֵּ֤ן הַכֹּהֵן֙ עַל־תְּנ֞וּךְ אֹ֤זֶן הַמִּטַּהֵר֙ הַיְמָנִ֔ית וְעַל־בֹּ֤הֶן יָדוֹ֙ הַיְמָנִ֔ית וְעַל־בֹּ֥הֶן רַגְל֖וֹ הַיְמָנִ֑ית עַ֖ל דַּ֥ם הָאָשָֽׁם׃

‎18 ‏וְהַנּוֹתָ֗ר בַּשֶּׁ֙מֶן֙ אֲשֶׁר֙ עַל־כַּ֣ף הַכֹּהֵ֔ן יִתֵּ֖ן עַל־רֹ֣אשׁ הַמִּטַּהֵ֑ר וְכִפֶּ֥ר עָלָ֛יו הַכֹּהֵ֖ן לִפְנֵ֥י יְהוָֽה׃

‎19 ‏וְעָשָׂ֤ה הַכֹּהֵן֙ אֶת־הַ֣חַטָּ֔את וְכִפֶּ֕ר עַל־הַמִּטַּהֵ֖ר מִטֻּמְאָת֑וֹ וְאַחַ֖ר יִשְׁחַ֥ט אֶת־הָעֹלָֽה׃

‎20 ‏וְהֶעֱלָ֧ה הַכֹּהֵ֛ן אֶת־הָעֹלָ֥ה וְאֶת־הַמִּנְחָ֖ה הַמִּזְבֵּ֑חָה וְכִפֶּ֥ר עָלָ֛יו הַכֹּהֵ֖ן וְטָהֵֽר׃ ס

‎21 ‏וְאִם־דַּ֣ל ה֗וּא וְאֵ֣ין יָדוֹ֮ מַשֶּׂגֶת֒ וְ֠לָקַח כֶּ֣בֶשׂ אֶחָ֥ד אָשָׁ֛ם לִתְנוּפָ֖ה לְכַפֵּ֣ר עָלָ֑יו וְעִשָּׂר֨וֹן סֹ֜לֶת אֶחָ֨ד בָּל֥וּל בַּשֶּׁ֛מֶן לְמִנְחָ֖ה וְלֹ֥ג שָֽׁמֶן׃

‎22 ‏וּשְׁתֵּ֣י תֹרִ֗ים א֤וֹ שְׁנֵי֙ בְּנֵ֣י יוֹנָ֔ה אֲשֶׁ֥ר תַּשִּׂ֖יג יָד֑וֹ וְהָיָ֤ה אֶחָד֙ חַטָּ֔את וְהָאֶחָ֖ד עֹלָֽה׃

‎23 ‏וְהֵבִ֨יא אֹתָ֜ם בַּיּ֧וֹם הַשְּׁמִינִ֛י לְטָהֳרָת֖וֹ אֶל־הַכֹּהֵ֑ן אֶל־פֶּ֥תַח אֹֽהֶל־מוֹעֵ֖ד לִפְנֵ֥י יְהוָֽה׃

‎24 ‏וְלָקַ֧ח הַכֹּהֵ֛ן אֶת־כֶּ֥בֶשׂ הָאָשָׁ֖ם וְאֶת־לֹ֣ג הַשָּׁ֑מֶן וְהֵנִ֨יף אֹתָ֧ם הַכֹּהֵ֛ן תְּנוּפָ֖ה לִפְנֵ֥י יְהוָֽה׃

‎25 ‏וְשָׁחַט֮ אֶת־כֶּ֣בֶשׂ הָֽאָשָׁם֒ וְלָקַ֤ח הַכֹּהֵן֙ מִדַּ֣ם הָֽאָשָׁ֔ם וְנָתַ֛ן עַל־תְּנ֥וּךְ אֹֽזֶן־הַמִּטַּהֵ֖ר הַיְמָנִ֑ית וְעַל־בֹּ֤הֶן יָדוֹ֙ הַיְמָנִ֔ית וְעַל־בֹּ֥הֶן רַגְל֖וֹ הַיְמָנִֽית׃

‎26 ‏וּמִן־הַשֶּׁ֖מֶן יִצֹ֣ק הַכֹּהֵ֑ן עַל־כַּ֥ף הַכֹּהֵ֖ן הַשְּׂמָאלִֽית׃

‎27 ‏וְהִזָּ֤ה הַכֹּהֵן֙ בְּאֶצְבָּע֣וֹ הַיְמָנִ֔ית מִן־הַשֶּׁ֕מֶן אֲשֶׁ֥ר עַל־כַּפּ֖וֹ הַשְּׂמָאלִ֑ית שֶׁ֥בַע פְּעָמִ֖ים לִפְנֵ֥י יְהוָֽה׃

‎28 ‏וְנָתַ֨ן הַכֹּהֵ֜ן מִן־הַשֶּׁ֣מֶן׀ אֲשֶׁ֣ר עַל־כַּפּ֗וֹ עַל־תְּנ֞וּךְ אֹ֤זֶן הַמִּטַּהֵר֙ הַיְמָנִ֔ית וְעַל־בֹּ֤הֶן יָדוֹ֙ הַיְמָנִ֔ית וְעַל־בֹּ֥הֶן רַגְל֖וֹ הַיְמָנִ֑ית עַל־מְק֖וֹם דַּ֥ם הָאָשָֽׁם׃

‎29 ‏וְהַנּוֹתָ֗ר מִן־הַשֶּׁ֙מֶן֙ אֲשֶׁר֙ עַל־כַּ֣ף הַכֹּהֵ֔ן³ יִתֵּ֖ן עַל־רֹ֣אשׁ הַמִּטַּהֵ֑ר לְכַפֵּ֥ר עָלָ֖יו לִפְנֵ֥י יְהוָֽה׃

‎30 ‏וְעָשָׂ֤ה אֶת־הָֽאֶחָד֙ מִן־הַתֹּרִ֔ים א֖וֹ מִן־בְּנֵ֣י הַיּוֹנָ֑ה מֵאֲשֶׁ֥ר תַּשִּׂ֖יג יָדֽוֹ׃

‎31 ‏אֵ֣ת אֲשֶׁר־תַּשִּׂ֞יג יָד֗וֹ אֶת־הָאֶחָ֥ד חַטָּ֛את וְאֶת־הָאֶחָ֥ד עֹלָ֖ה עַל־הַמִּנְחָ֑ה וְכִפֶּ֧ר הַכֹּהֵ֛ן עַ֥ל הַמִּטַּהֵ֖ר לִפְנֵ֥י יְהוָֽה׃

‎32 ‏זֹ֣את תּוֹרַ֔ת אֲשֶׁר־בּ֖וֹ נֶ֣גַע צָרָ֑עַת אֲשֶׁ֛ר לֹֽא־תַשִּׂ֥יג יָד֖וֹ בְּטָהֳרָתֽוֹ׃ פ

‎33 ‏וַיְדַבֵּ֣ר יְהוָ֔ה אֶל־מֹשֶׁ֥ה וְאֶֽל־אַהֲרֹ֖ן לֵאמֹֽר׃

‎34 ‏כִּ֤י תָבֹ֙אוּ֙ אֶל־אֶ֣רֶץ כְּנַ֔עַן אֲשֶׁ֥ר אֲנִ֛י נֹתֵ֥ן לָכֶ֖ם לַאֲחֻזָּ֑ה וְנָתַתִּי֙ נֶ֣גַע צָרַ֔עַת בְּבֵ֖ית אֶ֥רֶץ אֲחֻזַּתְכֶֽם׃

‎35 ‏וּבָא֙ אֲשֶׁר־ל֣וֹ הַבַּ֔יִת וְהִגִּ֥יד לַכֹּהֵ֖ן לֵאמֹ֑ר כְּנֶ֕גַע נִרְאָ֥ה לִ֖י בַּבָּֽיִת׃

‎36 ‏וְצִוָּ֨ה הַכֹּהֵ֜ן וּפִנּ֣וּ אֶת־הַבַּ֗יִת בְּטֶ֨רֶם יָבֹ֤א הַכֹּהֵן֙ לִרְא֣וֹת אֶת־הַנֶּ֔גַע וְלֹ֥א יִטְמָ֖א כָּל־אֲשֶׁ֣ר בַּבָּ֑יִת וְאַ֥חַר כֵּ֛ן יָבֹ֥א הַכֹּהֵ֖ן לִרְא֥וֹת אֶת־הַבָּֽיִת׃

‎37 ‏וְרָאָ֣ה אֶת־הַנֶּ֗גַע וְהִנֵּ֤ה הַנֶּ֙גַע֙ בְּקִירֹ֣ת הַבַּ֔יִת שְׁקַֽעֲרוּרֹת֙ יְרַקְרַקֹּ֔ת א֖וֹ אֲדַמְדַּמֹּ֑ת וּמַרְאֵיהֶ֥ן שָׁפָ֖ל מִן־הַקִּֽיר׃

‎38 ‏וְיָצָ֧א הַכֹּהֵ֛ן מִן־הַבַּ֖יִת אֶל־פֶּ֣תַח הַבָּ֑יִת וְהִסְגִּ֥יר אֶת־הַבַּ֖יִת שִׁבְעַ֥ת יָמִֽים׃

‎39 ‏וְשָׁ֥ב הַכֹּהֵ֖ן בַּיּ֣וֹם הַשְּׁבִיעִ֑י וְרָאָ֕ה וְהִנֵּ֛ה פָּשָׂ֥ה הַנֶּ֖גַע בְּקִירֹ֥ת הַבָּֽיִת׃

‎40 ‏וְצִוָּה֙ הַכֹּהֵ֔ן וְחִלְּצוּ֙ אֶת־הָ֣אֲבָנִ֔ים אֲשֶׁ֥ר בָּהֵ֖ן הַנָּ֑גַע וְהִשְׁלִ֤יכוּ אֶתְהֶן֙ אֶל־מִח֣וּץ לָעִ֔יר אֶל־מָק֖וֹם טָמֵֽא׃

‎41 ‏וְאֶת־הַבַּ֛יִת יַקְצִ֥עַ מִבַּ֖יִת סָבִ֑יב וְשָׁפְכ֗וּ אֶת־הֶֽעָפָר֙ אֲשֶׁ֣ר הִקְצ֔וּ אֶל־מִח֣וּץ לָעִ֔יר אֶל־מָק֖וֹם טָמֵֽא׃

‎42 ‏וְלָקְחוּ֙ אֲבָנִ֣ים אֲחֵר֔וֹת וְהֵבִ֖יאוּ אֶל־תַּ֣חַת הָאֲבָנִ֑ים וְעָפָ֥ר אַחֵ֛ר יִקַּ֖ח וְטָ֥ח אֶת־הַבָּֽיִת׃

‎43 ‏וְאִם־יָשׁ֤וּב הַנֶּ֙גַע֙ וּפָרַ֣ח בַּבַּ֔יִת אַחַ֖ר חִלֵּ֣ץ אֶת־הָאֲבָנִ֑ים וְאַחֲרֵ֛י הִקְצ֥וֹת אֶת־הַבַּ֖יִת וְאַחֲרֵ֥י הִטּֽוֹחַ׃

‎44 ‏וּבָא֙ הַכֹּהֵ֔ן וְרָאָ֕ה וְהִנֵּ֛ה פָּשָׂ֥ה הַנֶּ֖גַע בַּבָּ֑יִת צָרַ֨עַת מַמְאֶ֥רֶת הִ֛וא בַּבַּ֖יִת טָמֵ֥א הֽוּא׃

‎45 ‏וְנָתַ֣ץ אֶת־הַבַּ֗יִת אֶת־אֲבָנָיו֙ וְאֶת־עֵצָ֔יו וְאֵ֖ת כָּל־עֲפַ֣ר הַבָּ֑יִת וְהוֹצִיא֙ אֶל־מִח֣וּץ לָעִ֔יר אֶל־מָק֖וֹם טָמֵֽא׃

‎46 ‏וְהַבָּא֙ אֶל־הַבַּ֔יִת כָּל־יְמֵ֖י הִסְגִּ֣יר אֹת֑וֹ יִטְמָ֖א עַד־הָעָֽרֶב׃

‎47 ‏וְהַשֹּׁכֵ֣ב בַּבַּ֔יִת יְכַבֵּ֖ס אֶת־בְּגָדָ֑יו וְהָאֹכֵ֣ל בַּבַּ֔יִת יְכַבֵּ֖ס אֶת־בְּגָדָֽיו׃

‎48 ‏וְאִם־בֹּ֨א יָבֹ֜א הַכֹּהֵ֗ן וְרָאָה֙ וְ֠הִנֵּה לֹא־פָשָׂ֤ה הַנֶּ֙גַע֙ בַּבַּ֔יִת אַחֲרֵ֖י הִטֹּ֣חַ אֶת־הַבָּ֑יִת וְטִהַ֤ר הַכֹּהֵן֙ אֶת־הַבַּ֔יִת כִּ֥י נִרְפָּ֖א הַנָּֽגַע׃

‎49 ‏וְלָקַ֛ח לְחַטֵּ֥א אֶת־הַבַּ֖יִת שְׁתֵּ֣י צִפֳּרִ֑ים וְעֵ֣ץ אֶ֔רֶז וּשְׁנִ֥י תוֹלַ֖עַת וְאֵזֹֽב׃

‎50 ‏וְשָׁחַ֖ט אֶת־הַצִּפֹּ֣ר הָאֶחָ֑ת אֶל־כְּלִי־חֶ֖רֶשׂ עַל־מַ֥יִם חַיִּֽים׃

‎51 ‏וְלָקַ֣ח אֶת־עֵֽץ־הָ֠אֶרֶז וְאֶת־הָ֨אֵזֹ֜ב וְאֵ֣ת׀ שְׁנִ֣י הַתּוֹלַ֗עַת וְאֵת֮ הַצִּפֹּ֣ר הַֽחַיָּה֒ וְטָבַ֣ל אֹתָ֗ם בְּדַם֙ הַצִּפֹּ֣ר הַשְּׁחוּטָ֔ה וּבַמַּ֖יִם הַֽחַיִּ֑ים וְהִזָּ֥ה אֶל־הַבַּ֖יִת שֶׁ֥בַע פְּעָמִֽים׃

‎52 ‏וְחִטֵּ֣א אֶת־הַבַּ֔יִת בְּדַם֙ הַצִּפּ֔וֹר וּבַמַּ֖יִם הַֽחַיִּ֑ים וּבַצִּפֹּ֣ר הַחַיָּ֗ה וּבְעֵ֥ץ הָאֶ֛רֶז וּבָאֵזֹ֖ב וּבִשְׁנִ֥י הַתּוֹלָֽעַת׃

‎53 ‏וְשִׁלַּ֞ח אֶת־הַצִּפֹּ֧ר הַֽחַיָּ֛ה אֶל־מִח֥וּץ לָעִ֖יר אֶל־פְּנֵ֣י הַשָּׂדֶ֑ה וְכִפֶּ֥ר עַל־הַבַּ֖יִת וְטָהֵֽר׃

‎54 ‏זֹ֖את הַתּוֹרָ֑ה לְכָל־נֶ֥גַע הַצָּרַ֖עַת וְלַנָּֽתֶק׃

‎55 ‏וּלְצָרַ֥עַת הַבֶּ֖גֶד וְלַבָּֽיִת׃

‎56 ‏וְלַשְׂאֵ֥ת וְלַסַּפַּ֖חַת וְלַבֶּהָֽרֶת׃

‎57 ‏לְהוֹרֹ֕ת בְּי֥וֹם הַטָּמֵ֖א וּבְי֣וֹם הַטָּהֹ֑ר זֹ֥את תּוֹרַ֖ת הַצָּרָֽעַת׃ ס

1 wayəḏabēr yəhwâ ’el-mōšeh llē’mōr:

2 zō’ṯ tihəyeh twōraṯ hamməṣōrā‘ bəywōm ṭâŏrāṯwō wəhûḇā’ ’el-hakōhēn:

3 wəyāṣā’ hakōhēn ’el-miḥûṣ lamm^aḥăneh wərā’â hakōhēn wəhinnēh nirəpā’ neḡ^a‘-haṣṣār^a‘aṯ min-haṣṣārû‘a:

4 wəṣiûâ hakōhēn wəlāq^aḥ lammiṭṭahēr šətê-ṣipŏrîm ḥayywōṯ ṭəhōrwōṯ wə‘ēṣ ’erez ûšənî ṯwōl^a‘aṯ wə’ēzōḇ:

5 wəṣiûâ hakōhēn wəšāḥaṭ ’eṯ-haṣṣipwōr hā’eḥāṯ ’el-kəlî-ḥereś ‘al-mayim ḥayyîm:

6 ’eṯ-haṣṣipōr h^aḥayyâ yiqq^aḥ ’ōṯāh wə’eṯ-‘ēṣ hā’erez wə’eṯ-šənî hatwōl^a‘aṯ wə’eṯ-hā’ēzōḇ wəṭāḇal ’wōṯām wə’ēṯ| haṣṣipōr h^aḥayyâ bəḏam haṣṣipōr haššəḥuṭâ ‘al hammayim h^aḥayyîm:

7 wəhizzâ ‘al hammiṭṭahēr min-haṣṣār^a‘aṯ šeḇ^a‘ pə‘āmîm wəṭihărwō wəšill^aḥ ’eṯ-haṣṣipōr h^aḥayyâ ‘al-pənê haśśāḏeh:

8 wəḵibes hammiṭṭahēr ’eṯ-bəḡāḏāyw wəḡill^aḥ ’eṯ-kāl-śə‘ārwō wərāḥaṣ bammayim wəṭâēr wə’^aḥar yāḇwō’ ’el-hamm^aḥăneh wəyāšaḇ miḥûṣ lə’âŏlwō šiḇə‘aṯ yāmîm:

9 wəhāyâ ḇayywōm haššəḇî‘î yəḡall^aḥ ’eṯ-kāl-śə‘ārwō ’eṯ-rō’šwō wə’eṯ-zəqānwō wə’ēṯ gabōṯ ‘ênāyw wə’eṯ-kāl-śə‘ārwō yəḡallēḥa wəḵibes ’eṯ-bəḡāḏāyw wərāḥaṣ ’eṯ-bəśārwō bammayim wəṭâēr:

10 ûḇayywōm haššəmînî yiqq^aḥ šənê-ḵəḇāśîm təmîmîm wəḵaḇəśâ ’^aḥaṯ baṯ-šənāṯāh təmîmâ ûšəlōšâ ‘eśərōnîm sōleṯ minəḥâ bəlûlâ ḇaššemen wəlōḡ ’eḥāḏ šāmen:

11 wəhe‘ĕmîḏ hakōhēn haməṭahēr ’ēṯ hā’îš hammiṭṭahēr wə’ōṯām lifənê yəhwâ peṯ^aḥ ’ōhel mwō‘ēḏ:

12 wəlāq^aḥ hakōhēn ’eṯ-hakeḇeś hā’eḥāḏ wəhiqərîḇ ’ōṯwō lə’āšām wə’eṯ-lōḡ haššāmen wəhēnîf ’ōṯām tənûfâ lifənê yəhwâ:

13 wəšāḥaṭ ’eṯ-hakeḇeś biməqwōm ’ăšer yišəḥaṭ ’eṯ-h^aḥaṭṭā’ṯ wə’eṯ-hā‘ōlâ biməqwōm haqqōḏeš kî k^aḥaṭṭā’ṯ hā’āšām hû’ lakōhēn qōḏeš qāḏāšîm hû’:

14 wəlāq^aḥ hakōhēn midam hā’āšām wənāṯan hakōhēn ‘al-tənûḵə ’ōzen hammiṭṭahēr hayəmānîṯ wə‘al-bōhen yāḏwō hayəmānîṯ wə‘al-bōhen raḡəlwō hayəmānîṯ:

15 wəlāq^aḥ hakōhēn millōḡ haššāmen wəyāṣaq ‘al-kaf hakōhēn haśśəmā’lîṯ:

16 wəṭāḇal hakōhēn ’eṯ-’eṣəbā‘wō hayəmānîṯ min-haššemen ’ăšer ‘al-kapwō haśśəmā’lîṯ wəhizzâ min-haššemen bə’eṣəbā‘wō šeḇ^a‘ pə‘āmîm lifənê yəhwâ:

17 ûmîyeṯer haššemen ’ăšer ‘al-kapwō yitēn hakōhēn ‘al-tənûḵə ’ōzen hammiṭṭahēr hayəmānîṯ wə‘al-bōhen yāḏwō hayəmānîṯ wə‘al-bōhen raḡəlwō hayəmānîṯ ‘al dam hā’āšām:

18 wəhannwōṯār baššemen ’ăšer ‘al-kaf hakōhēn yitēn ‘al-rō’š hammiṭṭahēr wəḵiper ‘ālāyw hakōhēn lifənê yəhwâ:

19 wə‘āśâ hakōhēn ’eṯ-h^aḥaṭṭā’ṯ wəḵiper ‘al-hammiṭṭahēr miṭṭumə’āṯwō wə’^aḥar yišəḥaṭ ’eṯ-hā‘ōlâ:

20 wəhe‘ĕlâ hakōhēn ’eṯ-hā‘ōlâ wə’eṯ-hamminəḥâ hammizəbēḥâ wəḵiper ‘ālāyw hakōhēn wəṭâēr: s

21 wə’im-dal hû’ wə’ên yāḏwō maśśeḡeṯ wəlāq^aḥ keḇeś ’eḥāḏ ’āšām liṯənûfâ ləḵapēr ‘ālāyw wə‘iśśārwōn sōleṯ ’eḥāḏ bālûl baššemen ləminəḥâ wəlōḡ šāmen:

22 ûšətê ṯōrîm ’wō šənê bənê ywōnâ ’ăšer taśśîḡ yāḏwō wəhāyâ ’eḥāḏ ḥaṭṭā’ṯ wəhā’eḥāḏ ‘ōlâ:

23 wəhēḇî’ ’ōṯām bayywōm haššəmînî ləṭâŏrāṯwō ’el-hakōhēn ’el-peṯ^aḥ ’ōhel-mwō‘ēḏ lifənê yəhwâ:

24 wəlāq^aḥ hakōhēn ’eṯ-keḇeś hā’āšām wə’eṯ-lōḡ haššāmen wəhēnîf ’ōṯām hakōhēn tənûfâ lifənê yəhwâ:

25 wəšāḥaṭ ’eṯ-keḇeś hā’āšām wəlāq^aḥ hakōhēn midam hā’āšām wənāṯan ‘al-tənûḵə ’ōzen-hammiṭṭahēr hayəmānîṯ wə‘al-bōhen yāḏwō hayəmānîṯ wə‘al-bōhen raḡəlwō hayəmānîṯ:

26 ûmin-haššemen yiṣōq hakōhēn ‘al-kaf hakōhēn haśśəmā’lîṯ:

27 wəhizzâ hakōhēn bə’eṣəbā‘wō hayəmānîṯ min-haššemen ’ăšer ‘al-kapwō haśśəmā’lîṯ šeḇ^a‘ pə‘āmîm lifənê yəhwâ:

28 wənāṯan hakōhēn min-haššemen| ’ăšer ‘al-kapwō ‘al-tənûḵə ’ōzen hammiṭṭahēr hayəmānîṯ wə‘al-bōhen yāḏwō hayəmānîṯ wə‘al-bōhen raḡəlwō hayəmānîṯ ‘al-məqwōm dam hā’āšām:

29 wəhannwōṯār min-haššemen ’ăšer ‘al-kaf hakōhēn³ yitēn ‘al-rō’š hammiṭṭahēr ləḵapēr ‘ālāyw lifənê yəhwâ:

30 wə‘āśâ ’eṯ-hā’eḥāḏ min-hatōrîm ’wō min-bənê hayywōnâ mē’ăšer taśśîḡ yāḏwō:

31 ’ēṯ ’ăšer-taśśîḡ yāḏwō ’eṯ-hā’eḥāḏ ḥaṭṭā’ṯ wə’eṯ-hā’eḥāḏ ‘ōlâ ‘al-hamminəḥâ wəḵiper hakōhēn ‘al hammiṭṭahēr lifənê yəhwâ:

32 zō’ṯ twōraṯ ’ăšer-bwō neḡ^a‘ ṣārā‘aṯ ’ăšer lō’-ṯaśśîḡ yāḏwō bəṭâŏrāṯwō: f

33 wayəḏabēr yəhwâ ’el-mōšeh wə’el-’ahărōn lē’mōr:

34 kî ṯāḇō’û ’el-’ereṣ kən^a‘an ’ăšer ’ănî nōṯēn lāḵem la’ăḥuzzâ wənāṯatî neḡ^a‘ ṣār^a‘aṯ bəḇêṯ ’ereṣ ’ăḥuzzaṯəḵem:

35 ûḇā’ ’ăšer-lwō habayiṯ wəhigîḏ lakōhēn lē’mōr kəneḡ^a‘ nirə’â lî babāyiṯ:

36 wəṣiûâ hakōhēn ûfinnû ’eṯ-habayiṯ bəṭerem yāḇō’ hakōhēn lirə’wōṯ ’eṯ-hanneḡ^a‘ wəlō’ yiṭəmā’ kāl-’ăšer babāyiṯ wə’^aḥar kēn yāḇō’ hakōhēn lirə’wōṯ ’eṯ-habāyiṯ:

37 wərā’â ’eṯ-hanneḡ^a‘ wəhinnēh hanneḡ^a‘ bəqîrōṯ habayiṯ šəq^a‘ărûrōṯ yəraqəraqqōṯ ’wō ’ăḏamədammōṯ ûmarə’êhen šāfāl min-haqqîr:

38 wəyāṣā’ hakōhēn min-habayiṯ ’el-peṯ^aḥ habāyiṯ wəhisəgîr ’eṯ-habayiṯ šiḇə‘aṯ yāmîm:

39 wəšāḇ hakōhēn bayywōm haššəḇî‘î wərā’â wəhinnēh pāśâ hanneḡ^a‘ bəqîrōṯ habāyiṯ:

40 wəṣiûâ hakōhēn wəḥilləṣû ’eṯ-hā’ăḇānîm ’ăšer bâēn hannāḡ^a‘ wəhišəlîḵû ’eṯəhen ’el-miḥûṣ lā‘îr ’el-māqwōm ṭāmē’:

41 wə’eṯ-habayiṯ yaqəṣi‘a mibayiṯ sāḇîḇ wəšāfəḵû ’eṯ-he‘āfār ’ăšer hiqəṣû ’el-miḥûṣ lā‘îr ’el-māqwōm ṭāmē’:

42 wəlāqəḥû ’ăḇānîm ’ăḥērwōṯ wəhēḇî’û ’el-t^aḥaṯ hā’ăḇānîm wə‘āfār ’^aḥēr yiqq^aḥ wəṭāḥ ’eṯ-habāyiṯ:

43 wə’im-yāšûḇ hanneḡ^a‘ ûfār^aḥ babayiṯ ’^aḥar ḥillēṣ ’eṯ-hā’ăḇānîm wə’^aḥărê hiqəṣwōṯ ’eṯ-habayiṯ wə’^aḥărê hiṭṭwōḥa:

44 ûḇā’ hakōhēn wərā’â wəhinnēh pāśâ hanneḡ^a‘ babāyiṯ ṣār^a‘aṯ mamə’ereṯ hiw’ babayiṯ ṭāmē’ hû’:

45 wənāṯaṣ ’eṯ-habayiṯ ’eṯ-’ăḇānāyw wə’eṯ-‘ēṣāyw wə’ēṯ kāl-‘ăfar habāyiṯ wəhwōṣî’ ’el-miḥûṣ lā‘îr ’el-māqwōm ṭāmē’:

46 wəhabā’ ’el-habayiṯ kāl-yəmê hisəgîr ’ōṯwō yiṭəmā’ ‘aḏ-hā‘āreḇ:

47 wəhaššōḵēḇ babayiṯ yəḵabēs ’eṯ-bəḡāḏāyw wəhā’ōḵēl babayiṯ yəḵabēs ’eṯ-bəḡāḏāyw:

48 wə’im-bō’ yāḇō’ hakōhēn wərā’â wəhinnēh lō’-fāśâ hanneḡ^a‘ babayiṯ ’^aḥărê hiṭṭōḥa ’eṯ-habāyiṯ wəṭihar hakōhēn ’eṯ-habayiṯ kî nirəpā’ hannāḡ^a‘:

49 wəlāq^aḥ ləḥaṭṭē’ ’eṯ-habayiṯ šətê ṣipŏrîm wə‘ēṣ ’erez ûšənî ṯwōl^a‘aṯ wə’ēzōḇ:

50 wəšāḥaṭ ’eṯ-haṣṣipōr hā’eḥāṯ ’el-kəlî-ḥereś ‘al-mayim ḥayyîm:

51 wəlāq^aḥ ’eṯ-‘ēṣ-hā’erez wə’eṯ-hā’ēzōḇ wə’ēṯ| šənî hatwōl^a‘aṯ wə’ēṯ haṣṣipōr h^aḥayyâ wəṭāḇal ’ōṯām bəḏam haṣṣipōr haššəḥûṭâ ûḇammayim h^aḥayyîm wəhizzâ ’el-habayiṯ šeḇ^a‘ pə‘āmîm:

52 wəḥiṭṭē’ ’eṯ-habayiṯ bəḏam haṣṣipwōr ûḇammayim h^aḥayyîm ûḇaṣṣipōr h^aḥayyâ ûḇə‘ēṣ hā’erez ûḇā’ēzōḇ ûḇišənî hatwōlā‘aṯ:

53 wəšill^aḥ ’eṯ-haṣṣipōr h^aḥayyâ ’el-miḥûṣ lā‘îr ’el-pənê haśśāḏeh wəḵiper ‘al-habayiṯ wəṭâēr:

54 zō’ṯ hatwōrâ ləḵāl-neḡ^a‘ haṣṣār^a‘aṯ wəlannāṯeq:

55 ûləṣār^a‘aṯ habeḡeḏ wəlabāyiṯ:

56 wəlaśə’ēṯ wəlassap^aḥaṯ wəlabehāreṯ:

57 ləhwōrōṯ bəywōm haṭṭāmē’ ûḇəywōm haṭṭâōr zō’ṯ twōraṯ haṣṣārā‘aṯ: s