Leviticus (Vayikra) Chapter 15

‎1 ‏וַיְדַבֵּ֣ר יְהוָ֔ה אֶל־מֹשֶׁ֥ה וְאֶֽל־אַהֲרֹ֖ן לֵאמֹֽר׃

‎2 ‏דַּבְּרוּ֙ אֶל־בְּנֵ֣י יִשְׂרָאֵ֔ל וַאֲמַרְתֶּ֖ם אֲלֵהֶ֑ם אִ֣ישׁ אִ֗ישׁ כִּ֤י יִהְיֶה֙ זָ֣ב מִבְּשָׂר֔וֹ זוֹב֖וֹ טָמֵ֥א הֽוּא׃

‎3 ‏וְזֹ֛את תִּהְיֶ֥ה טֻמְאָת֖וֹ בְּזוֹב֑וֹ רָ֣ר בְּשָׂר֞וֹ אֶת־זוֹב֗וֹ אֽוֹ־הֶחְתִּ֤ים³ בְּשָׂרוֹ֙ מִזּוֹב֔וֹ טֻמְאָת֖וֹ הִֽוא׃

‎4 ‏כָּל־הַמִּשְׁכָּ֗ב אֲשֶׁ֨ר יִשְׁכַּ֥ב עָלָ֛יו הַזָּ֖ב יִטְמָ֑א וְכָֽל־הַכְּלִ֛י אֲשֶׁר־יֵשֵׁ֥ב עָלָ֖יו יִטְמָֽא׃

‎5 ‏וְאִ֕ישׁ אֲשֶׁ֥ר יִגַּ֖ע בְּמִשְׁכָּב֑וֹ יְכַבֵּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎6 ‏וְהַיֹּשֵׁב֙ עַֽל־הַכְּלִ֔י אֲשֶׁר־יֵשֵׁ֥ב עָלָ֖יו הַזָּ֑ב יְכַבֵּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎7 ‏וְהַנֹּגֵ֖עַ בִּבְשַׂ֣ר הַזָּ֑ב יְכַבֵּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎8 ‏וְכִֽי־יָרֹ֛ק הַזָּ֖ב בַּטָּה֑וֹר וְכִבֶּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎9 ‏וְכָל־הַמֶּרְכָּ֗ב אֲשֶׁ֨ר יִרְכַּ֥ב עָלָ֛יו הַזָּ֖ב יִטְמָֽא׃

‎10 ‏וְכָל־הַנֹּגֵ֗עַ בְּכֹל֙ אֲשֶׁ֣ר יִהְיֶ֣ה תַחְתָּ֔יו יִטְמָ֖א עַד־הָעָ֑רֶב וְהַנּוֹשֵׂ֣א אוֹתָ֔ם יְכַבֵּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎11 ‏וְכֹ֨ל אֲשֶׁ֤ר יִגַּע־בּוֹ֙ הַזָּ֔ב וְיָדָ֖יו לֹא־שָׁטַ֣ף בַּמָּ֑יִם וְכִבֶּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎12 ‏וּכְלִי־חֶ֛רֶשׂ אֲשֶׁר־יִגַּע־בּ֥וֹ הַזָּ֖ב יִשָּׁבֵ֑ר וְכָל־כְּלִי־עֵ֔ץ יִשָּׁטֵ֖ף בַּמָּֽיִם׃

‎13 ‏וְכִֽי־יִטְהַ֤ר הַזָּב֙ מִזּוֹב֔וֹ וְסָ֨פַר ל֜וֹ שִׁבְעַ֥ת יָמִ֛ים לְטָהֳרָת֖וֹ וְכִבֶּ֣ס בְּגָדָ֑יו וְרָחַ֧ץ בְּשָׂר֛וֹ בְּמַ֥יִם חַיִּ֖ים וְטָהֵֽר׃

‎14 ‏וּבַיּ֣וֹם הַשְּׁמִינִ֗י יִֽקַּֽח־לוֹ֙ שְׁתֵּ֣י תֹרִ֔ים א֥וֹ שְׁנֵ֖י בְּנֵ֣י יוֹנָ֑ה וּבָ֣א׀ לִפְנֵ֣י יְהוָ֗ה אֶל־פֶּ֙תַח֙ אֹ֣הֶל מוֹעֵ֔ד וּנְתָנָ֖ם אֶל־הַכֹּהֵֽן׃

‎15 ‏וְעָשָׂ֤ה אֹתָם֙ הַכֹּהֵ֔ן אֶחָ֣ד חַטָּ֔את וְהָאֶחָ֖ד עֹלָ֑ה וְכִפֶּ֨ר עָלָ֧יו הַכֹּהֵ֛ן לִפְנֵ֥י יְהוָ֖ה מִזּוֹבֽוֹ׃ ס

‎16 ‏וְאִ֕ישׁ כִּֽי־תֵצֵ֥א מִמֶּ֖נּוּ שִׁכְבַת־זָ֑רַע וְרָחַ֥ץ בַּמַּ֛יִם אֶת־כָּל־בְּשָׂר֖וֹ וְטָמֵ֥א עַד־הָעָֽרֶב׃

‎17 ‏וְכָל־בֶּ֣גֶד וְכָל־ע֔וֹר אֲשֶׁר־יִהְיֶ֥ה עָלָ֖יו שִׁכְבַת־זָ֑רַע וְכֻבַּ֥ס בַּמַּ֖יִם וְטָמֵ֥א עַד־הָעָֽרֶב׃ פ

‎18 ‏וְאִשָּׁ֕ה אֲשֶׁ֨ר יִשְׁכַּ֥ב אִ֛ישׁ אֹתָ֖הּ שִׁכְבַת־זָ֑רַע וְרָחֲצ֣וּ בַמַּ֔יִם וְטָמְא֖וּ עַד־הָעָֽרֶב׃

‎19 ‏וְאִשָּׁה֙ כִּֽי־תִהְיֶ֣ה זָבָ֔ה דָּ֛ם יִהְיֶ֥ה זֹבָ֖הּ בִּבְשָׂרָ֑הּ שִׁבְעַ֤ת יָמִים֙ תִּהְיֶ֣ה בְנִדָּתָ֔הּ וְכָל־הַנֹּגֵ֥עַ בָּ֖הּ יִטְמָ֥א עַד־הָעָֽרֶב׃

‎20 ‏וְכֹל֩ אֲשֶׁ֨ר תִּשְׁכַּ֥ב עָלָ֛יו בְּנִדָּתָ֖הּ יִטְמָ֑א וְכֹ֛ל אֲשֶׁר־תֵּשֵׁ֥ב עָלָ֖יו יִטְמָֽא׃

‎21 ‏וְכָל־הַנֹּגֵ֖עַ בְּמִשְׁכָּבָ֑הּ יְכַבֵּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎22 ‏וְכָל־הַנֹּגֵ֔עַ בְּכָל־כְּלִ֖י אֲשֶׁר־תֵּשֵׁ֣ב עָלָ֑יו יְכַבֵּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎23 ‏וְאִ֨ם עַֽל־הַמִּשְׁכָּ֜ב ה֗וּא א֧וֹ עַֽל־הַכְּלִ֛י אֲשֶׁר־הִ֥וא יֹשֶֽׁבֶת־עָלָ֖יו בְּנָגְעוֹ־ב֑וֹ יִטְמָ֖א עַד־הָעָֽרֶב׃

‎24 ‏וְאִ֡ם שָׁכֹב֩ יִשְׁכַּ֨ב אִ֜ישׁ אֹתָ֗הּ וּתְהִ֤י נִדָּתָהּ֙ עָלָ֔יו וְטָמֵ֖א שִׁבְעַ֣ת יָמִ֑ים וְכָל־הַמִּשְׁכָּ֛ב אֲשֶׁר־יִשְׁכַּ֥ב עָלָ֖יו יִטְמָֽא׃ פ

‎25 ‏וְאִשָּׁ֡ה כִּֽי־יָזוּב֩ ז֨וֹב דָּמָ֜הּ יָמִ֣ים רַבִּ֗ים בְּלֹא֙ עֶת־נִדָּתָ֔הּ א֥וֹ כִֽי־תָז֖וּב עַל־נִדָּתָ֑הּ כָּל־יְמֵ֞י ז֣וֹב טֻמְאָתָ֗הּ כִּימֵ֧י נִדָּתָ֛הּ תִּהְיֶ֖ה טְמֵאָ֥ה הִֽוא׃

‎26 ‏כָּל־הַמִּשְׁכָּ֞ב אֲשֶׁר־תִּשְׁכַּ֤ב עָלָיו֙ כָּל־יְמֵ֣י זוֹבָ֔הּ כְּמִשְׁכַּ֥ב נִדָּתָ֖הּ יִֽהְיֶה־לָּ֑הּ וְכָֽל־הַכְּלִי֙ אֲשֶׁ֣ר תֵּשֵׁ֣ב עָלָ֔יו טָמֵ֣א יִהְיֶ֔ה כְּטֻמְאַ֖ת נִדָּתָֽהּ׃

‎27 ‏וְכָל־הַנּוֹגֵ֥עַ בָּ֖ם יִטְמָ֑א וְכִבֶּ֧ס בְּגָדָ֛יו וְרָחַ֥ץ בַּמַּ֖יִם וְטָמֵ֥א עַד־הָעָֽרֶב׃

‎28 ‏וְאִֽם־טָהֲרָ֖ה מִזּוֹבָ֑הּ וְסָ֥פְרָה לָּ֛הּ שִׁבְעַ֥ת יָמִ֖ים וְאַחַ֥ר תִּטְהָֽר׃

‎29 ‏וּבַיּ֣וֹם הַשְּׁמִינִ֗י תִּֽקַּֽח־לָהּ֙ שְׁתֵּ֣י תֹרִ֔ים א֥וֹ שְׁנֵ֖י בְּנֵ֣י יוֹנָ֑ה וְהֵבִיאָ֤ה אוֹתָם֙ אֶל־הַכֹּהֵ֔ן אֶל־פֶּ֖תַח אֹ֥הֶל מוֹעֵֽד׃

‎30 ‏וְעָשָׂ֤ה הַכֹּהֵן֙ אֶת־הָאֶחָ֣ד חַטָּ֔את וְאֶת־הָאֶחָ֖ד עֹלָ֑ה וְכִפֶּ֨ר עָלֶ֤יהָ הַכֹּהֵן֙ לִפְנֵ֣י יְהוָ֔ה מִזּ֖וֹב טֻמְאָתָֽהּ׃

‎31 ‏וְהִזַּרְתֶּ֥ם אֶת־בְּנֵי־יִשְׂרָאֵ֖ל מִטֻּמְאָתָ֑ם וְלֹ֤א יָמֻ֙תוּ֙ בְּטֻמְאָתָ֔ם בְּטַמְּאָ֥ם אֶת־מִשְׁכָּנִ֖י אֲשֶׁ֥ר בְּתוֹכָֽם׃

‎32 ‏זֹ֥את תּוֹרַ֖ת³ הַזָּ֑ב וַאֲשֶׁ֨ר תֵּצֵ֥א מִמֶּ֛נּוּ שִׁכְבַת־זֶ֖רַע לְטָמְאָה־בָֽהּ׃

‎33 ‏וְהַדָּוָה֙ בְּנִדָּתָ֔הּ וְהַזָּב֙ אֶת־זוֹב֔וֹ לַזָּכָ֖ר וְלַנְּקֵבָ֑ה וּלְאִ֕ישׁ אֲשֶׁ֥ר יִשְׁכַּ֖ב עִם־טְמֵאָֽה׃ פ

1 wayəḏabēr yəhwâ ’el-mōšeh wə’el-’ahărōn lē’mōr:

2 dabərû ’el-bənê yiśərā’ēl wa’ămarətem ’ălēhem ’îš ’îš kî yihəyeh zāḇ mibəśārwō zwōḇwō ṭāmē’ hû’:

3 wəzō’ṯ tihəyeh ṭumə’āṯwō bəzwōḇwō rār bəśārwō ’eṯ-zwōḇwō ’wō-heḥətîm³ bəśārwō mizzwōḇwō ṭumə’āṯwō hiw’:

4 kāl-hammišəkāḇ ’ăšer yišəkaḇ ‘ālāyw hazzāḇ yiṭəmā’ wəḵāl-hakəlî ’ăšer-yēšēḇ ‘ālāyw yiṭəmā’:

5 wə’îš ’ăšer yig^a‘ bəmišəkāḇwō yəḵabēs bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

6 wəhayyōšēḇ ‘al-hakəlî ’ăšer-yēšēḇ ‘ālāyw hazzāḇ yəḵabēs bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

7 wəhannōḡē‘a biḇəśar hazzāḇ yəḵabēs bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

8 wəḵî-yārōq hazzāḇ baṭṭâwōr wəḵibes bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

9 wəḵāl-hammerəkāḇ ’ăšer yirəkaḇ ‘ālāyw hazzāḇ yiṭəmā’:

10 wəḵāl-hannōḡē‘a bəḵōl ’ăšer yihəyeh ṯ^aḥətāyw yiṭəmā’ ‘aḏ-hā‘āreḇ wəhannwōśē’ ’wōṯām yəḵabēs bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

11 wəḵōl ’ăšer yig^a‘-bwō hazzāḇ wəyāḏāyw lō’-šāṭaf bammāyim wəḵibes bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

12 ûḵəlî-ḥereś ’ăšer-yig^a‘-bwō hazzāḇ yiššāḇēr wəḵāl-kəlî-‘ēṣ yiššāṭēf bammāyim:

13 wəḵî-yiṭəhar hazzāḇ mizzwōḇwō wəsāfar lwō šiḇə‘aṯ yāmîm ləṭâŏrāṯwō wəḵibes bəḡāḏāyw wərāḥaṣ bəśārwō bəmayim ḥayyîm wəṭâēr:

14 ûḇayywōm haššəmînî yiqq^aḥ-lwō šətê ṯōrîm ’wō šənê bənê ywōnâ ûḇā’| lifənê yəhwâ ’el-peṯ^aḥ ’ōhel mwō‘ēḏ ûnəṯānām ’el-hakōhēn:

15 wə‘āśâ ’ōṯām hakōhēn ’eḥāḏ ḥaṭṭā’ṯ wəhā’eḥāḏ ‘ōlâ wəḵiper ‘ālāyw hakōhēn lifənê yəhwâ mizzwōḇwō: s

16 wə’îš kî-ṯēṣē’ mimmennû šiḵəḇaṯ-zār^a‘ wərāḥaṣ bammayim ’eṯ-kāl-bəśārwō wəṭāmē’ ‘aḏ-hā‘āreḇ:

17 wəḵāl-beḡeḏ wəḵāl-‘wōr ’ăšer-yihəyeh ‘ālāyw šiḵəḇaṯ-zār^a‘ wəḵubas bammayim wəṭāmē’ ‘aḏ-hā‘āreḇ: f

18 wə’iššâ ’ăšer yišəkaḇ ’îš ’ōṯāh šiḵəḇaṯ-zār^a‘ wərāḥăṣû ḇammayim wəṭāmə’û ‘aḏ-hā‘āreḇ:

19 wə’iššâ kî-ṯihəyeh zāḇâ dām yihəyeh zōḇāh biḇəśārāh šiḇə‘aṯ yāmîm tihəyeh ḇənidāṯāh wəḵāl-hannōḡē‘a bāh yiṭəmā’ ‘aḏ-hā‘āreḇ:

20 wəḵōl ’ăšer tišəkaḇ ‘ālāyw bənidāṯāh yiṭəmā’ wəḵōl ’ăšer-tēšēḇ ‘ālāyw yiṭəmā’:

21 wəḵāl-hannōḡē‘a bəmišəkāḇāh yəḵabēs bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

22 wəḵāl-hannōḡē‘a bəḵāl-kəlî ’ăšer-tēšēḇ ‘ālāyw yəḵabēs bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

23 wə’im ‘al-hammišəkāḇ hû’ ’wō ‘al-hakəlî ’ăšer-hiw’ yōšeḇeṯ-‘ālāyw bənāḡə‘wō-ḇwō yiṭəmā’ ‘aḏ-hā‘āreḇ:

24 wə’im šāḵōḇ yišəkaḇ ’îš ’ōṯāh ûṯəhî nidāṯāh ‘ālāyw wəṭāmē’ šiḇə‘aṯ yāmîm wəḵāl-hammišəkāḇ ’ăšer-yišəkaḇ ‘ālāyw yiṭəmā’: f

25 wə’iššâ kî-yāzûḇ zwōḇ dāmāh yāmîm rabîm bəlō’ ‘eṯ-nidāṯāh ’wō ḵî-ṯāzûḇ ‘al-nidāṯāh kāl-yəmê zwōḇ ṭumə’āṯāh kîmê nidāṯāh tihəyeh ṭəmē’â hiw’:

26 kāl-hammišəkāḇ ’ăšer-tišəkaḇ ‘ālāyw kāl-yəmê zwōḇāh kəmišəkaḇ nidāṯāh yihəyeh-llāh wəḵāl-hakəlî ’ăšer tēšēḇ ‘ālāyw ṭāmē’ yihəyeh kəṭumə’aṯ nidāṯāh:

27 wəḵāl-hannwōḡē‘a bām yiṭəmā’ wəḵibes bəḡāḏāyw wərāḥaṣ bammayim wəṭāmē’ ‘aḏ-hā‘āreḇ:

28 wə’im-ṭâărâ mizzwōḇāh wəsāfərâ llāh šiḇə‘aṯ yāmîm wə’^aḥar tiṭəhār:

29 ûḇayywōm haššəmînî tiqq^aḥ-lāh šətê ṯōrîm ’wō šənê bənê ywōnâ wəhēḇî’â ’wōṯām ’el-hakōhēn ’el-peṯ^aḥ ’ōhel mwō‘ēḏ:

30 wə‘āśâ hakōhēn ’eṯ-hā’eḥāḏ ḥaṭṭā’ṯ wə’eṯ-hā’eḥāḏ ‘ōlâ wəḵiper ‘āleyhā hakōhēn lifənê yəhwâ mizzwōḇ ṭumə’āṯāh:

31 wəhizzarətem ’eṯ-bənê-yiśərā’ēl miṭṭumə’āṯām wəlō’ yāmuṯû bəṭumə’āṯām bəṭammə’ām ’eṯ-mišəkānî ’ăšer bəṯwōḵām:

32 zō’ṯ twōraṯ³ hazzāḇ wa’ăšer tēṣē’ mimmennû šiḵəḇaṯ-zer^a‘ ləṭāmə’â-ḇāh:

33 wəhadāwâ bənidāṯāh wəhazzāḇ ’eṯ-zwōḇwō lazzāḵār wəlannəqēḇâ ûlə’îš ’ăšer yišəkaḇ ‘im-ṭəmē’â: f