Leviticus (Vayikra) Chapter 16

‎1 ‏וַיְדַבֵּ֤ר יְהוָה֙ אֶל־מֹשֶׁ֔ה אַחֲרֵ֣י מ֔וֹת שְׁנֵ֖י בְּנֵ֣י אַהֲרֹ֑ן בְּקָרְבָתָ֥ם לִפְנֵי־יְהוָ֖ה וַיָּמֻֽתוּ׃

‎2 ‏וַיֹּ֨אמֶר יְהוָ֜ה אֶל־מֹשֶׁ֗ה דַּבֵּר֮ אֶל־אַהֲרֹ֣ן אָחִיךָ֒ וְאַל־יָבֹ֤א בְכָל־עֵת֙ אֶל־הַקֹּ֔דֶשׁ מִבֵּ֖ית לַפָּרֹ֑כֶת אֶל־פְּנֵ֨י הַכַּפֹּ֜רֶת אֲשֶׁ֤ר עַל־הָאָרֹן֙ וְלֹ֣א יָמ֔וּת כִּ֚י בֶּֽעָנָ֔ן אֵרָאֶ֖ה עַל־הַכַּפֹּֽרֶת׃

‎3 ‏בְּזֹ֛את יָבֹ֥א אַהֲרֹ֖ן אֶל־הַקֹּ֑דֶשׁ בְּפַ֧ר בֶּן־בָּקָ֛ר לְחַטָּ֖את וְאַ֥יִל לְעֹלָֽה׃

‎4 ‏כְּתֹֽנֶת־בַּ֨ד קֹ֜דֶשׁ יִלְבָּ֗שׁ וּמִֽכְנְסֵי־בַד֮ יִהְי֣וּ עַל־בְּשָׂרוֹ֒ וּבְאַבְנֵ֥ט בַּד֙ יַחְגֹּ֔ר וּבְמִצְנֶ֥פֶת בַּ֖ד יִצְנֹ֑ף בִּגְדֵי־קֹ֣דֶשׁ הֵ֔ם וְרָחַ֥ץ בַּמַּ֛יִם אֶת־בְּשָׂר֖וֹ וּלְבֵשָֽׁם׃

‎5 ‏וּמֵאֵ֗ת עֲדַת֙ בְּנֵ֣י יִשְׂרָאֵ֔ל יִקַּ֛ח שְׁנֵֽי־שְׂעִירֵ֥י עִזִּ֖ים לְחַטָּ֑את וְאַ֥יִל אֶחָ֖ד לְעֹלָֽה׃

‎6 ‏וְהִקְרִ֧יב אַהֲרֹ֛ן אֶת־פַּ֥ר הַחַטָּ֖את אֲשֶׁר־ל֑וֹ וְכִפֶּ֥ר בַּעֲד֖וֹ וּבְעַ֥ד בֵּיתֽוֹ׃

‎7 ‏וְלָקַ֖ח אֶת־שְׁנֵ֣י הַשְּׂעִירִ֑ם וְהֶעֱמִ֤יד אֹתָם֙ לִפְנֵ֣י יְהוָ֔ה פֶּ֖תַח אֹ֥הֶל מוֹעֵֽד׃

‎8 ‏וְנָתַ֧ן אַהֲרֹ֛ן עַל־שְׁנֵ֥י הַשְּׂעִירִ֖ם גּוֹרָל֑וֹת גּוֹרָ֤ל אֶחָד֙ לַיהוָ֔ה וְגוֹרָ֥ל אֶחָ֖ד לַעֲזָאזֵֽל׃

‎9 ‏וְהִקְרִ֤יב אַהֲרֹן֙ אֶת־הַשָּׂעִ֔יר אֲשֶׁ֨ר עָלָ֥ה עָלָ֛יו הַגּוֹרָ֖ל לַיהוָ֑ה וְעָשָׂ֖הוּ חַטָּֽאת׃

‎10 ‏וְהַשָּׂעִ֗יר אֲשֶׁר֩ עָלָ֨ה עָלָ֤יו הַגּוֹרָל֙ לַעֲזָאזֵ֔ל יָֽעֳמַד־חַ֛י לִפְנֵ֥י יְהוָ֖ה לְכַפֵּ֣ר עָלָ֑יו לְשַׁלַּ֥ח אֹת֛וֹ לַעֲזָאזֵ֖ל הַמִּדְבָּֽרָה׃

‎11 ‏וְהִקְרִ֨יב אַהֲרֹ֜ן אֶת־פַּ֤ר הַֽחַטָּאת֙ אֲשֶׁר־ל֔וֹ וְכִפֶּ֥ר בַּֽעֲד֖וֹ וּבְעַ֣ד בֵּית֑וֹ וְשָׁחַ֛ט אֶת־פַּ֥ר הַֽחַטָּ֖את אֲשֶׁר־לֽוֹ׃

‎12 ‏וְלָקַ֣ח מְלֹֽא־הַ֠מַּחְתָּה גַּֽחֲלֵי־אֵ֞שׁ מֵעַ֤ל הַמִּזְבֵּ֙חַ֙ מִלִּפְנֵ֣י יְהוָ֔ה וּמְלֹ֣א חָפְנָ֔יו קְטֹ֥רֶת סַמִּ֖ים דַּקָּ֑ה וְהֵבִ֖יא מִבֵּ֥ית לַפָּרֹֽכֶת׃

‎13 ‏וְנָתַ֧ן אֶֽת־הַקְּטֹ֛רֶת עַל־הָאֵ֖שׁ לִפְנֵ֣י יְהוָ֑ה וְכִסָּ֣ה׀ עֲנַ֣ן הַקְּטֹ֗רֶת אֶת־הַכַּפֹּ֛רֶת אֲשֶׁ֥ר עַל־הָעֵד֖וּת וְלֹ֥א יָמֽוּת׃

‎14 ‏וְלָקַח֙ מִדַּ֣ם הַפָּ֔ר וְהִזָּ֧ה בְאֶצְבָּע֛וֹ עַל־פְּנֵ֥י הַכַּפֹּ֖רֶת קֵ֑דְמָה וְלִפְנֵ֣י הַכַּפֹּ֗רֶת יַזֶּ֧ה שֶֽׁבַע־פְּעָמִ֛ים מִן־הַדָּ֖ם בְּאֶצְבָּעֽוֹ׃

‎15 ‏וְשָׁחַ֞ט אֶת־שְׂעִ֤יר הַֽחַטָּאת֙ אֲשֶׁ֣ר לָעָ֔ם וְהֵבִיא֙ אֶת־דָּמ֔וֹ אֶל־מִבֵּ֖ית לַפָּרֹ֑כֶת וְעָשָׂ֣ה אֶת־דָּמ֗וֹ כַּאֲשֶׁ֤ר עָשָׂה֙ לְדַ֣ם הַפָּ֔ר וְהִזָּ֥ה אֹת֛וֹ עַל־הַכַּפֹּ֖רֶת וְלִפְנֵ֥י הַכַּפֹּֽרֶת׃

‎16 ‏וְכִפֶּ֣ר עַל־הַקֹּ֗דֶשׁ מִטֻּמְאֹת֙ בְּנֵ֣י יִשְׂרָאֵ֔ל וּמִפִּשְׁעֵיהֶ֖ם לְכָל־חַטֹּאתָ֑ם וְכֵ֤ן יַעֲשֶׂה֙ לְאֹ֣הֶל מוֹעֵ֔ד הַשֹּׁכֵ֣ן אִתָּ֔ם בְּת֖וֹךְ טֻמְאֹתָֽם׃

‎17 ‏וְכָל־אָדָ֞ם לֹא־יִהְיֶ֣ה׀ בְּאֹ֣הֶל מוֹעֵ֗ד בְּבֹא֛וֹ לְכַפֵּ֥ר בַּקֹּ֖דֶשׁ עַד־צֵאת֑וֹ וְכִפֶּ֤ר בַּעֲדוֹ֙ וּבְעַ֣ד בֵּית֔וֹ וּבְעַ֖ד כָּל־קְהַ֥ל יִשְׂרָאֵֽל׃

‎18 ‏וְיָצָ֗א אֶל־הַמִּזְבֵּ֛חַ אֲשֶׁ֥ר לִפְנֵֽי־יְהוָ֖ה וְכִפֶּ֣ר עָלָ֑יו וְלָקַ֞ח מִדַּ֤ם הַפָּר֙ וּמִדַּ֣ם הַשָּׂעִ֔יר וְנָתַ֛ן עַל־קַרְנ֥וֹת הַמִּזְבֵּ֖חַ סָבִֽיב׃

‎19 ‏וְהִזָּ֨ה עָלָ֧יו מִן־הַדָּ֛ם בְּאֶצְבָּע֖וֹ שֶׁ֣בַע פְּעָמִ֑ים וְטִהֲר֣וֹ וְקִדְּשׁ֔וֹ מִטֻּמְאֹ֖ת בְּנֵ֥י יִשְׂרָאֵֽל׃

‎20 ‏וְכִלָּה֙ מִכַּפֵּ֣ר אֶת־הַקֹּ֔דֶשׁ וְאֶת־אֹ֥הֶל מוֹעֵ֖ד וְאֶת־הַמִּזְבֵּ֑חַ וְהִקְרִ֖יב אֶת־הַשָּׂעִ֥יר הֶחָֽי׃

‎21 ‏וְסָמַ֨ךְ אַהֲרֹ֜ן אֶת־שְׁתֵּ֣י ידו יָדָ֗יו עַ֨ל רֹ֣אשׁ הַשָּׂעִיר֮ הַחַי֒ וְהִתְוַדָּ֣ה עָלָ֗יו אֶת־כָּל־עֲוֹנֹת֙ בְּנֵ֣י יִשְׂרָאֵ֔ל וְאֶת־כָּל־פִּשְׁעֵיהֶ֖ם לְכָל־חַטֹּאתָ֑ם וְנָתַ֤ן אֹתָם֙ עַל־רֹ֣אשׁ הַשָּׂעִ֔יר וְשִׁלַּ֛ח בְּיַד־אִ֥ישׁ עִתִּ֖י הַמִּדְבָּֽרָה׃

‎22 ‏וְנָשָׂ֨א הַשָּׂעִ֥יר עָלָ֛יו אֶת־כָּל־עֲוֹנֹתָ֖ם אֶל־אֶ֣רֶץ גְּזֵרָ֑ה וְשִׁלַּ֥ח אֶת־הַשָּׂעִ֖יר בַּמִּדְבָּֽר׃

‎23 ‏וּבָ֤א אַהֲרֹן֙ אֶל־אֹ֣הֶל מוֹעֵ֔ד וּפָשַׁט֙ אֶת־בִּגְדֵ֣י הַבָּ֔ד אֲשֶׁ֥ר לָבַ֖שׁ בְּבֹא֣וֹ אֶל־הַקֹּ֑דֶשׁ וְהִנִּיחָ֖ם שָֽׁם׃

‎24 ‏וְרָחַ֨ץ אֶת־בְּשָׂר֤וֹ בַמַּ֙יִם֙ בְּמָק֣וֹם קָד֔וֹשׁ וְלָבַ֖שׁ אֶת־בְּגָדָ֑יו וְיָצָ֗א וְעָשָׂ֤ה אֶת־עֹֽלָתוֹ֙ וְאֶת־עֹלַ֣ת הָעָ֔ם וְכִפֶּ֥ר בַּעֲד֖וֹ וּבְעַ֥ד הָעָֽם׃

‎25 ‏וְאֵ֛ת חֵ֥לֶב הַֽחַטָּ֖את יַקְטִ֥יר הַמִּזְבֵּֽחָה׃

‎26 ‏וְהַֽמְשַׁלֵּ֤חַ אֶת־הַשָּׂעִיר֙ לַֽעֲזָאזֵ֔ל יְכַבֵּ֣ס בְּגָדָ֔יו וְרָחַ֥ץ אֶת־בְּשָׂר֖וֹ בַּמָּ֑יִם וְאַחֲרֵי־כֵ֖ן יָב֥וֹא אֶל־הַֽמַּחֲנֶֽה׃

‎27 ‏וְאֵת֩ פַּ֨ר הַֽחַטָּ֜את וְאֵ֣ת׀ שְׂעִ֣יר הַֽחַטָּ֗את אֲשֶׁ֨ר הוּבָ֤א אֶת־דָּמָם֙ לְכַפֵּ֣ר בַּקֹּ֔דֶשׁ יוֹצִ֖יא אֶל־מִח֣וּץ לַֽמַּחֲנֶ֑ה וְשָׂרְפ֣וּ בָאֵ֔שׁ אֶת־עֹרֹתָ֥ם וְאֶת־בְּשָׂרָ֖ם וְאֶת־פִּרְשָֽׁם׃

‎28 ‏וְהַשֹּׂרֵ֣ף אֹתָ֔ם יְכַבֵּ֣ס בְּגָדָ֔יו וְרָחַ֥ץ אֶת־בְּשָׂר֖וֹ בַּמָּ֑יִם וְאַחֲרֵי־כֵ֖ן יָב֥וֹא אֶל־הַֽמַּחֲנֶֽה׃

‎29 ‏וְהָיְתָ֥ה לָכֶ֖ם לְחֻקַּ֣ת עוֹלָ֑ם בַּחֹ֣דֶשׁ הַ֠שְּׁבִיעִי בֶּֽעָשׂ֨וֹר לַחֹ֜דֶשׁ תְּעַנּ֣וּ אֶת־נַפְשֹֽׁתֵיכֶ֗ם וְכָל־מְלָאכָה֙ לֹ֣א תַעֲשׂ֔וּ הָֽאֶזְרָ֔ח וְהַגֵּ֖ר הַגָּ֥ר בְּתוֹכְכֶֽם׃

‎30 ‏כִּֽי־בַיּ֥וֹם הַזֶּ֛ה יְכַפֵּ֥ר עֲלֵיכֶ֖ם לְטַהֵ֣ר אֶתְכֶ֑ם מִכֹּל֙ חַטֹּ֣אתֵיכֶ֔ם לִפְנֵ֥י יְהוָ֖ה תִּטְהָֽרוּ׃

‎31 ‏שַׁבַּ֨ת שַׁבָּת֥וֹן הִיא֙ לָכֶ֔ם וְעִנִּיתֶ֖ם אֶת־נַפְשֹׁתֵיכֶ֑ם חֻקַּ֖ת עוֹלָֽם׃

‎32 ‏וְכִפֶּ֨ר הַכֹּהֵ֜ן אֲשֶׁר־יִמְשַׁ֣ח אֹת֗וֹ וַאֲשֶׁ֤ר יְמַלֵּא֙ אֶת־יָד֔וֹ לְכַהֵ֖ן תַּ֣חַת אָבִ֑יו וְלָבַ֛שׁ אֶת־בִּגְדֵ֥י הַבָּ֖ד בִּגְדֵ֥י הַקֹּֽדֶשׁ׃

‎33 ‏וְכִפֶּר֙ אֶת־מִקְדַּ֣שׁ הַקֹּ֔דֶשׁ וְאֶת־אֹ֧הֶל מוֹעֵ֛ד וְאֶת־הַמִּזְבֵּ֖חַ יְכַפֵּ֑ר וְעַ֧ל הַכֹּהֲנִ֛ים וְעַל־כָּל־עַ֥ם הַקָּהָ֖ל יְכַפֵּֽר׃

‎34 ‏וְהָֽיְתָה־זֹּ֨את לָכֶ֜ם לְחֻקַּ֣ת עוֹלָ֗ם לְכַפֵּ֞ר עַל־בְּנֵ֤י יִשְׂרָאֵל֙ מִכָּל־חַטֹּאתָ֔ם אַחַ֖ת בַּשָּׁנָ֑ה וַיַּ֕עַשׂ כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ פ

1 wayəḏabēr yəhwâ ’el-mōšeh ’^aḥărê mwōṯ šənê bənê ’ahărōn bəqārəḇāṯām lifənê-yəhwâ wayyāmuṯû:

2 wayyō’mer yəhwâ ’el-mōšeh dabēr ’el-’ahărōn ’āḥîḵā wə’al-yāḇō’ ḇəḵāl-‘ēṯ ’el-haqqōḏeš mibêṯ lapārōḵeṯ ’el-pənê hakapōreṯ ’ăšer ‘al-hā’ārōn wəlō’ yāmûṯ kî be‘ānān ’ērā’eh ‘al-hakapōreṯ:

3 bəzō’ṯ yāḇō’ ’ahărōn ’el-haqqōḏeš bəfar ben-bāqār ləḥaṭṭā’ṯ wə’ayil lə‘ōlâ:

4 kəṯōneṯ-baḏ qōḏeš yiləbāš ûmiḵənəsê-ḇaḏ yihəyû ‘al-bəśārwō ûḇə’aḇənēṭ baḏ y^aḥəgōr ûḇəmiṣənefeṯ baḏ yiṣənōf biḡəḏê-qōḏeš hēm wərāḥaṣ bammayim ’eṯ-bəśārwō ûləḇēšām:

5 ûmē’ēṯ ‘ăḏaṯ bənê yiśərā’ēl yiqq^aḥ šənê-śə‘îrê ‘izzîm ləḥaṭṭā’ṯ wə’ayil ’eḥāḏ lə‘ōlâ:

6 wəhiqərîḇ ’ahărōn ’eṯ-par h^aḥaṭṭā’ṯ ’ăšer-lwō wəḵiper b^a‘ăḏwō ûḇə‘aḏ bêṯwō:

7 wəlāq^aḥ ’eṯ-šənê haśśə‘îrim wəhe‘ĕmîḏ ’ōṯām lifənê yəhwâ peṯ^aḥ ’ōhel mwō‘ēḏ:

8 wənāṯan ’ahărōn ‘al-šənê haśśə‘îrim gwōrālwōṯ gwōrāl ’eḥāḏ layhwâ wəḡwōrāl ’eḥāḏ l^a‘ăzā’zēl:

9 wəhiqərîḇ ’ahărōn ’eṯ-haśśā‘îr ’ăšer ‘ālâ ‘ālāyw hagwōrāl layhwâ wə‘āśâû ḥaṭṭā’ṯ:

10 wəhaśśā‘îr ’ăšer ‘ālâ ‘ālāyw hagwōrāl l^a‘ăzā’zēl yā‘ŏmaḏ-ḥay lifənê yəhwâ ləḵapēr ‘ālāyw ləšall^aḥ ’ōṯwō l^a‘ăzā’zēl hammiḏəbārâ:

11 wəhiqərîḇ ’ahărōn ’eṯ-par h^aḥaṭṭā’ṯ ’ăšer-lwō wəḵiper b^a‘ăḏwō ûḇə‘aḏ bêṯwō wəšāḥaṭ ’eṯ-par h^aḥaṭṭā’ṯ ’ăšer-lwō:

12 wəlāq^aḥ məlō’-hamm^aḥətâ g^aḥălê-’ēš mē‘al hammizəbēḥa millifənê yəhwâ ûməlō’ ḥāfənāyw qəṭōreṯ sammîm daqqâ wəhēḇî’ mibêṯ lapārōḵeṯ:

13 wənāṯan ’eṯ-haqqəṭōreṯ ‘al-hā’ēš lifənê yəhwâ wəḵissâ| ‘ănan haqqəṭōreṯ ’eṯ-hakapōreṯ ’ăšer ‘al-hā‘ēḏûṯ wəlō’ yāmûṯ:

14 wəlāq^aḥ midam hapār wəhizzâ ḇə’eṣəbā‘wō ‘al-pənê hakapōreṯ qēḏəmâ wəlifənê hakapōreṯ yazzeh šeḇ^a‘-pə‘āmîm min-hadām bə’eṣəbā‘wō:

15 wəšāḥaṭ ’eṯ-śə‘îr h^aḥaṭṭā’ṯ ’ăšer lā‘ām wəhēḇî’ ’eṯ-dāmwō ’el-mibêṯ lapārōḵeṯ wə‘āśâ ’eṯ-dāmwō ka’ăšer ‘āśâ ləḏam hapār wəhizzâ ’ōṯwō ‘al-hakapōreṯ wəlifənê hakapōreṯ:

16 wəḵiper ‘al-haqqōḏeš miṭṭumə’ōṯ bənê yiśərā’ēl ûmipišə‘êhem ləḵāl-ḥaṭṭō’ṯām wəḵēn y^a‘ăśeh lə’ōhel mwō‘ēḏ haššōḵēn ’itām bəṯwōḵə ṭumə’ōṯām:

17 wəḵāl-’āḏām lō’-yihəyeh| bə’ōhel mwō‘ēḏ bəḇō’wō ləḵapēr baqqōḏeš ‘aḏ-ṣē’ṯwō wəḵiper b^a‘ăḏwō ûḇə‘aḏ bêṯwō ûḇə‘aḏ kāl-qəhal yiśərā’ēl:

18 wəyāṣā’ ’el-hammizəbēḥa ’ăšer lifənê-yəhwâ wəḵiper ‘ālāyw wəlāq^aḥ midam hapār ûmidam haśśā‘îr wənāṯan ‘al-qarənwōṯ hammizəbēḥa sāḇîḇ:

19 wəhizzâ ‘ālāyw min-hadām bə’eṣəbā‘wō šeḇ^a‘ pə‘āmîm wəṭihărwō wəqidəšwō miṭṭumə’ōṯ bənê yiśərā’ēl:

20 wəḵillâ mikapēr ’eṯ-haqqōḏeš wə’eṯ-’ōhel mwō‘ēḏ wə’eṯ-hammizəbēḥa wəhiqərîḇ ’eṯ-haśśā‘îr heḥāy:

21 wəsāmaḵə ’ahărōn ’eṯ-šətê yāḏwō yāḏāyw ‘al rō’š haśśā‘îr h^aḥay wəhiṯəwadâ ‘ālāyw ’eṯ-kāl-‘ăwōnōṯ bənê yiśərā’ēl wə’eṯ-kāl-pišə‘êhem ləḵāl-ḥaṭṭō’ṯām wənāṯan ’ōṯām ‘al-rō’š haśśā‘îr wəšill^aḥ bəyaḏ-’îš ‘itî hammiḏəbārâ:

22 wənāśā’ haśśā‘îr ‘ālāyw ’eṯ-kāl-‘ăwōnōṯām ’el-’ereṣ gəzērâ wəšill^aḥ ’eṯ-haśśā‘îr bammiḏəbār:

23 ûḇā’ ’ahărōn ’el-’ōhel mwō‘ēḏ ûfāšaṭ ’eṯ-biḡəḏê habāḏ ’ăšer lāḇaš bəḇō’wō ’el-haqqōḏeš wəhinnîḥām šām:

24 wərāḥaṣ ’eṯ-bəśārwō ḇammayim bəmāqwōm qāḏwōš wəlāḇaš ’eṯ-bəḡāḏāyw wəyāṣā’ wə‘āśâ ’eṯ-‘ōlāṯwō wə’eṯ-‘ōlaṯ hā‘ām wəḵiper b^a‘ăḏwō ûḇə‘aḏ hā‘ām:

25 wə’ēṯ ḥēleḇ h^aḥaṭṭā’ṯ yaqəṭîr hammizəbēḥâ:

26 wəhaməšallēḥa ’eṯ-haśśā‘îr l^a‘ăzā’zēl yəḵabēs bəḡāḏāyw wərāḥaṣ ’eṯ-bəśārwō bammāyim wə’^aḥărê-ḵēn yāḇwō’ ’el-hamm^aḥăneh:

27 wə’ēṯ par h^aḥaṭṭā’ṯ wə’ēṯ| śə‘îr h^aḥaṭṭā’ṯ ’ăšer hûḇā’ ’eṯ-dāmām ləḵapēr baqqōḏeš ywōṣî’ ’el-miḥûṣ lamm^aḥăneh wəśārəfû ḇā’ēš ’eṯ-‘ōrōṯām wə’eṯ-bəśārām wə’eṯ-pirəšām:

28 wəhaśśōrēf ’ōṯām yəḵabēs bəḡāḏāyw wərāḥaṣ ’eṯ-bəśārwō bammāyim wə’^aḥărê-ḵēn yāḇwō’ ’el-hamm^aḥăneh:

29 wəhāyəṯâ lāḵem ləḥuqqaṯ ‘wōlām b^aḥōḏeš haššəḇî‘î be‘āśwōr l^aḥōḏeš tə‘annû ’eṯ-nafəšōṯêḵem wəḵāl-məlā’ḵâ lō’ ṯ^a‘ăśû hā’ezərāḥ wəhagēr hagār bəṯwōḵəḵem:

30 kî-ḇayywōm hazzeh yəḵapēr ‘ălêḵem ləṭahēr ’eṯəḵem mikōl ḥaṭṭō’ṯêḵem lifənê yəhwâ tiṭəhārû:

31 šabaṯ šabāṯwōn hî’ lāḵem wə‘innîṯem ’eṯ-nafəšōṯêḵem ḥuqqaṯ ‘wōlām:

32 wəḵiper hakōhēn ’ăšer-yiməš^aḥ ’ōṯwō wa’ăšer yəmallē’ ’eṯ-yāḏwō ləḵahēn t^aḥaṯ ’āḇîw wəlāḇaš ’eṯ-biḡəḏê habāḏ biḡəḏê haqqōḏeš:

33 wəḵiper ’eṯ-miqədaš haqqōḏeš wə’eṯ-’ōhel mwō‘ēḏ wə’eṯ-hammizəbēḥa yəḵapēr wə‘al hakōhănîm wə‘al-kāl-‘am haqqâāl yəḵapēr:

34 wəhāyəṯâ-zzō’ṯ lāḵem ləḥuqqaṯ ‘wōlām ləḵapēr ‘al-bənê yiśərā’ēl mikāl-ḥaṭṭō’ṯām ’^aḥaṯ baššānâ wayy^a‘aś ka’ăšer ṣiûâ yəhwâ ’eṯ-mōšeh: f