Malachi (Malakhi) Chapter 3

‎1 ‏הִנְנִ֤י שֹׁלֵחַ֙ מַלְאָכִ֔י וּפִנָּה־דֶ֖רֶךְ לְפָנָ֑י וּפִתְאֹם֩ יָב֨וֹא אֶל־הֵיכָל֜וֹ הָאָד֣וֹן׀ אֲשֶׁר־אַתֶּ֣ם מְבַקְשִׁ֗ים וּמַלְאַ֨ךְ הַבְּרִ֜ית אֲשֶׁר־אַתֶּ֤ם חֲפֵצִים֙ הִנֵּה־בָ֔א אָמַ֖ר יְהוָ֥ה צְבָאֽוֹת׃

‎2 ‏וּמִ֤י מְכַלְכֵּל֙ אֶת־י֣וֹם בּוֹא֔וֹ וּמִ֥י הָעֹמֵ֖ד בְּהֵרָֽאוֹת֑וֹ כִּֽי־הוּא֙ כְּאֵ֣שׁ מְצָרֵ֔ף וּכְבֹרִ֖ית מְכַבְּסִֽים׃

‎3 ‏וְיָשַׁ֨ב מְצָרֵ֤ף וּמְטַהֵר֙ כֶּ֔סֶף וְטִהַ֤ר אֶת־בְּנֵֽי־לֵוִי֙ וְזִקַּ֣ק אֹתָ֔ם כַּזָּהָ֖ב וְכַכָּ֑סֶף וְהָיוּ֙ לַֽיהוָ֔ה מַגִּישֵׁ֥י מִנְחָ֖ה בִּצְדָקָֽה׃

‎4 ‏וְעָֽרְבָה֙ לַֽיהוָ֔ה מִנְחַ֥ת יְהוּדָ֖ה וִירֽוּשָׁלִָ֑ם כִּימֵ֣י עוֹלָ֔ם וּכְשָׁנִ֖ים קַדְמֹנִיּֽוֹת׃

‎5 ‏וְקָרַבְתִּ֣י אֲלֵיכֶם֮ לַמִּשְׁפָּט֒ וְהָיִ֣יתִי׀ עֵ֣ד מְמַהֵ֗ר בַּֽמְכַשְּׁפִים֙ וּבַמְנָ֣אֲפִ֔ים וּבַנִּשְׁבָּעִ֖ים לַשָּׁ֑קֶר וּבְעֹשְׁקֵ֣י שְׂכַר־שָׂ֠כִיר אַלְמָנָ֨ה וְיָת֤וֹם וּמַטֵּי־גֵר֙ וְלֹ֣א יְרֵא֔וּנִי אָמַ֖ר יְהוָ֥ה צְבָאֽוֹת׃

‎6 ‏כִּ֛י אֲנִ֥י יְהוָ֖ה לֹ֣א שָׁנִ֑יתִי וְאַתֶּ֥ם בְּנֵֽי־יַעֲקֹ֖ב לֹ֥א כְלִיתֶֽם׃

‎7 ‏לְמִימֵ֨י אֲבֹתֵיכֶ֜ם סַרְתֶּ֤ם מֵֽחֻקַּי֙ וְלֹ֣א שְׁמַרְתֶּ֔ם שׁ֤וּבוּ אֵלַי֙ וְאָשׁ֣וּבָה אֲלֵיכֶ֔ם אָמַ֖ר יְהוָ֣ה צְבָא֑וֹת וַאֲמַרְתֶּ֖ם בַּמֶּ֥ה נָשֽׁוּב׃

‎8 ‏הֲיִקְבַּ֨ע אָדָ֜ם אֱלֹהִ֗ים כִּ֤י אַתֶּם֙ קֹבְעִ֣ים אֹתִ֔י וַאֲמַרְתֶּ֖ם בַּמֶּ֣ה קְבַעֲנ֑וּךָ הַֽמַּעֲשֵׂ֖ר וְהַתְּרוּמָֽה׃

‎9 ‏בַּמְּאֵרָה֙ אַתֶּ֣ם נֵֽאָרִ֔ים וְאֹתִ֖י אַתֶּ֣ם קֹבְעִ֑ים הַגּ֖וֹי כֻּלּֽוֹ׃

‎10 ‏הָבִ֨יאוּ אֶת־כָּל־הַֽמַּעֲשֵׂ֜ר אֶל־בֵּ֣ית הָאוֹצָ֗ר וִיהִ֥י טֶ֙רֶף֙ בְּבֵיתִ֔י וּבְחָנ֤וּנִי נָא֙ בָּזֹ֔את אָמַ֖ר יְהוָ֣ה צְבָא֑וֹת אִם־לֹ֧א אֶפְתַּ֣ח לָכֶ֗ם אֵ֚ת אֲרֻבּ֣וֹת הַשָּׁמַ֔יִם וַהֲרִיקֹתִ֥י לָכֶ֛ם בְּרָכָ֖ה עַד־בְּלִי־דָֽי׃

‎11 ‏וְגָעַרְתִּ֤י לָכֶם֙ בָּֽאֹכֵ֔ל וְלֹֽא־יַשְׁחִ֥ת לָכֶ֖ם אֶת־פְּרִ֣י הָאֲדָמָ֑ה וְלֹא־תְשַׁכֵּ֨ל לָכֶ֤ם הַגֶּ֙פֶן֙ בַּשָּׂדֶ֔ה אָמַ֖ר יְהוָ֥ה צְבָאֽוֹת׃

‎12 ‏וְאִשְּׁר֥וּ אֶתְכֶ֖ם כָּל־הַגּוֹיִ֑ם כִּֽי־תִהְי֤וּ אַתֶּם֙ אֶ֣רֶץ חֵ֔פֶץ אָמַ֖ר יְהוָ֥ה צְבָאֽוֹת׃ ס

‎13 ‏חָזְק֥וּ עָלַ֛י דִּבְרֵיכֶ֖ם אָמַ֣ר יְהוָ֑ה וַאֲמַרְתֶּ֕ם מַה־נִּדְבַּ֖רְנוּ עָלֶֽיךָ׃

‎14 ‏אֲמַרְתֶּ֕ם שָׁ֖וְא עֲבֹ֣ד אֱלֹהִ֑ים וּמַה־בֶּ֗צַע כִּ֤י שָׁמַ֙רְנוּ֙ מִשְׁמַרְתּ֔וֹ וְכִ֤י הָלַ֙כְנוּ֙ קְדֹ֣רַנִּ֔ית מִפְּנֵ֖י יְהוָ֥ה צְבָאֽוֹת׃

‎15 ‏וְעַתָּ֕ה אֲנַ֖חְנוּ מְאַשְּׁרִ֣ים זֵדִ֑ים גַּם־נִבְנוּ֙ עֹשֵׂ֣י רִשְׁעָ֔ה גַּ֧ם בָּחֲנ֛וּ אֱלֹהִ֖ים וַיִּמָּלֵֽטוּ׃

‎16 ‏אָ֧ז נִדְבְּר֛וּ יִרְאֵ֥י יְהוָ֖ה אִ֣ישׁ אֶת־רֵעֵ֑הוּ וַיַּקְשֵׁ֤ב יְהוָה֙ וַיִּשְׁמָ֔ע וַ֠יִּכָּתֵב סֵ֣פֶר זִכָּר֤וֹן לְפָנָיו֙ לְיִרְאֵ֣י יְהוָ֔ה וּלְחֹשְׁבֵ֖י שְׁמֽוֹ׃

‎17 ‏וְהָ֣יוּ לִ֗י אָמַר֙ יְהוָ֣ה צְבָא֔וֹת לַיּ֕וֹם אֲשֶׁ֥ר אֲנִ֖י עֹשֶׂ֣ה סְגֻלָּ֑ה וְחָמַלְתִּ֣י עֲלֵיהֶ֔ם כַּֽאֲשֶׁר֙ יַחְמֹ֣ל אִ֔ישׁ עַל־בְּנ֖וֹ הָעֹבֵ֥ד³ אֹתֽוֹ׃

‎18 ‏וְשַׁבְתֶּם֙ וּרְאִיתֶ֔ם בֵּ֥ין צַדִּ֖יק לְרָשָׁ֑ע בֵּ֚ין עֹבֵ֣ד אֱלֹהִ֔ים לַאֲשֶׁ֖ר לֹ֥א עֲבָדֽוֹ׃ ס

‎19 ‏כִּֽי־הִנֵּ֤ה הַיּוֹם֙ בָּ֔א בֹּעֵ֖ר כַּתַּנּ֑וּר וְהָי֨וּ כָל־זֵדִ֜ים וְכָל־עֹשֵׂ֤ה רִשְׁעָה֙ קַ֔שׁ וְלִהַ֨ט אֹתָ֜ם הַיּ֣וֹם הַבָּ֗א אָמַר֙ יְהוָ֣ה צְבָא֔וֹת אֲשֶׁ֛ר לֹא־יַעֲזֹ֥ב לָהֶ֖ם שֹׁ֥רֶשׁ וְעָנָֽף׃

‎20 ‏וְזָרְחָ֨ה לָכֶ֜ם יִרְאֵ֤י שְׁמִי֙ שֶׁ֣מֶשׁ צְדָקָ֔ה וּמַרְפֵּ֖א בִּכְנָפֶ֑יהָ וִֽיצָאתֶ֥ם וּפִשְׁתֶּ֖ם כְּעֶגְלֵ֥י מַרְבֵּֽק׃

‎21 ‏וְעַסּוֹתֶ֣ם רְשָׁעִ֔ים כִּֽי־יִהְי֣וּ אֵ֔פֶר תַּ֖חַת כַּפּ֣וֹת רַגְלֵיכֶ֑ם בַּיּוֹם֙ אֲשֶׁ֣ר אֲנִ֣י עֹשֶׂ֔ה אָמַ֖ר יְהוָ֥ה צְבָאֽוֹת׃ פ

‎22 ‏זִכְר֕וּ תּוֹרַ֖ת מֹשֶׁ֣ה עַבְדִּ֑י אֲשֶׁר֩ צִוִּ֨יתִי אוֹת֤וֹ בְחֹרֵב֙ עַל־כָּל־יִשְׂרָאֵ֔ל חֻקִּ֖ים וּמִשְׁפָּטִֽים׃

‎23 ‏הִנֵּ֤ה אָֽנֹכִי֙ שֹׁלֵ֣חַ לָכֶ֔ם אֵ֖ת אֵלִיָּ֣ה הַנָּבִ֑יא לִפְנֵ֗י בּ֚וֹא י֣וֹם יְהוָ֔ה הַגָּד֖וֹל וְהַנּוֹרָֽא׃

‎24 ‏וְהֵשִׁ֤יב לֵב־אָבוֹת֙ עַל־בָּנִ֔ים וְלֵ֥ב בָּנִ֖ים עַל־אֲבוֹתָ֑ם פֶּן־אָב֕וֹא וְהִכֵּיתִ֥י אֶת־הָאָ֖רֶץ חֵֽרֶם׃

1 hinənî šōlēḥa malə’āḵî ûfinnâ-ḏereḵə ləfānāy ûfiṯə’ōm yāḇwō’ ’el-hêḵālwō hā’āḏwōn| ’ăšer-’atem məḇaqəšîm ûmalə’aḵə habərîṯ ’ăšer-’atem ḥăfēṣîm hinnēh-ḇā’ ’āmar yəhwâ ṣəḇā’wōṯ:

2 ûmî məḵaləkēl ’eṯ-ywōm bwō’wō ûmî hā‘ōmēḏ bəhērā’wōṯwō kî-hû’ kə’ēš məṣārēf ûḵəḇōrîṯ məḵabəsîm:

3 wəyāšaḇ məṣārēf ûməṭahēr kesef wəṭihar ’eṯ-bənê-lēwî wəziqqaq ’ōṯām kazzâāḇ wəḵakāsef wəhāyû layhwâ magîšê minəḥâ biṣəḏāqâ:

4 wə‘ārəḇâ layhwâ minəḥaṯ yəhûḏâ wîrûšālāim kîmê ‘wōlām ûḵəšānîm qaḏəmōnîywōṯ:

5 wəqāraḇətî ’ălêḵem lammišəpāṭ wəhāyîṯî| ‘ēḏ məmahēr baməḵaššəfîm ûḇamənā’ăfîm ûḇannišəbā‘îm laššāqer ûḇə‘ōšəqê śəḵar-śāḵîr ’aləmānâ wəyāṯwōm ûmaṭṭê-ḡēr wəlō’ yərē’ûnî ’āmar yəhwâ ṣəḇā’wōṯ:

6 kî ’ănî yəhwâ lō’ šānîṯî wə’atem bənê-y^a‘ăqōḇ lō’ ḵəlîṯem:

7 ləmîmê ’ăḇōṯêḵem sarətem mēḥuqqay wəlō’ šəmarətem šûḇû ’ēlay wə’āšûḇâ ’ălêḵem ’āmar yəhwâ ṣəḇā’wōṯ wa’ămarətem bammeh nāšûḇ:

8 hăyiqəb^a‘ ’āḏām ’ĕlōhîm kî ’atem qōḇə‘îm ’ōṯî wa’ămarətem bammeh qəḇ^a‘ănûḵā hamm^a‘ăśēr wəhatərûmâ:

9 bammə’ērâ ’atem nē’ārîm wə’ōṯî ’atem qōḇə‘îm hagwōy kullwō:

10 hāḇî’û ’eṯ-kāl-hamm^a‘ăśēr ’el-bêṯ hā’wōṣār wîhî ṭeref bəḇêṯî ûḇəḥānûnî nā’ bāzō’ṯ ’āmar yəhwâ ṣəḇā’wōṯ ’im-lō’ ’efət^aḥ lāḵem ’ēṯ ’ărubwōṯ haššāmayim wahărîqōṯî lāḵem bərāḵâ ‘aḏ-bəlî-ḏāy:

11 wəḡā‘arətî lāḵem bā’ōḵēl wəlō’-yašəḥiṯ lāḵem ’eṯ-pərî hā’ăḏāmâ wəlō’-ṯəšakēl lāḵem hagefen baśśāḏeh ’āmar yəhwâ ṣəḇā’wōṯ:

12 wə’iššərû ’eṯəḵem kāl-hagwōyim kî-ṯihəyû ’atem ’ereṣ ḥēfeṣ ’āmar yəhwâ ṣəḇā’wōṯ: s

13 ḥāzəqû ‘ālay diḇərêḵem ’āmar yəhwâ wa’ămarətem mah-nniḏəbarənû ‘āleyḵā:

14 ’ămarətem šāwə’ ‘ăḇōḏ ’ĕlōhîm ûmah-beṣ^a‘ kî šāmarənû mišəmarətwō wəḵî hālaḵənû qəḏōrannîṯ mipənê yəhwâ ṣəḇā’wōṯ:

15 wə‘atâ ’ăn^aḥənû mə’aššərîm zēḏîm gam-niḇənû ‘ōśê rišə‘â gam bāḥănû ’ĕlōhîm wayyimmālēṭû:

16 ’āz niḏəbərû yirə’ê yəhwâ ’îš ’eṯ-rē‘ēhû wayyaqəšēḇ yəhwâ wayyišəmā‘ wayyikāṯēḇ sēfer zikārwōn ləfānāyw ləyirə’ê yəhwâ ûləḥōšəḇê šəmwō:

17 wəhāyû lî ’āmar yəhwâ ṣəḇā’wōṯ layywōm ’ăšer ’ănî ‘ōśeh səḡullâ wəḥāmalətî ‘ălêhem ka’ăšer y^aḥəmōl ’îš ‘al-bənwō hā‘ōḇēḏ³ ’ōṯwō:

18 wəšaḇətem ûrə’îṯem bên ṣadîq lərāšā‘ bên ‘ōḇēḏ ’ĕlōhîm la’ăšer lō’ ‘ăḇāḏwō: s

19 kî-hinnēh hayywōm bā’ bō‘ēr katannûr wəhāyû ḵāl-zēḏîm wəḵāl-‘ōśēh rišə‘â qaš wəlihaṭ ’ōṯām hayywōm habā’ ’āmar yəhwâ ṣəḇā’wōṯ ’ăšer lō’-y^a‘ăzōḇ lâem šōreš wə‘ānāf:

20 wəzārəḥâ lāḵem yirə’ê šəmî šemeš ṣəḏāqâ ûmarəpē’ biḵənāfeyhā wîṣā’ṯem ûfišətem kə‘eḡəlê marəbēq:

21 wə‘asswōṯem rəšā‘îm kî-yihəyû ’ēfer t^aḥaṯ kapwōṯ raḡəlêḵem bayywōm ’ăšer ’ănî ‘ōśeh ’āmar yəhwâ ṣəḇā’wōṯ: f

22 ziḵərû twōraṯ mōšeh ‘aḇədî ’ăšer ṣiûîṯî ’wōṯwō ḇəḥōrēḇ ‘al-kāl-yiśərā’ēl ḥuqqîm ûmišəpāṭîm:

23 hinnēh ’ānōḵî šōlēḥa lāḵem ’ēṯ ’ēlîyâ hannāḇî’ lifənê bwō’ ywōm yəhwâ hagāḏwōl wəhannwōrā’:

24 wəhēšîḇ lēḇ-’āḇwōṯ ‘al-bānîm wəlēḇ bānîm ‘al-’ăḇwōṯām pen-’āḇwō’ wəhikêṯî ’eṯ-hā’āreṣ ḥērem: