Malachi (Malakhi) Chapter 2

‎1 ‏וְעַתָּ֗ה אֲלֵיכֶ֛ם הַמִּצְוָ֥ה הַזֹּ֖את הַכֹּהֲנִֽים׃

‎2 ‏אִם־לֹ֣א תִשְׁמְע֡וּ וְאִם־לֹא֩ תָשִׂ֨ימוּ עַל־לֵ֜ב לָתֵ֧ת כָּב֣וֹד לִשְׁמִ֗י אָמַר֙ יְהוָ֣ה צְבָא֔וֹת וְשִׁלַּחְתִּ֤י בָכֶם֙ אֶת־הַמְּאֵרָ֔ה וְאָרוֹתִ֖י אֶת־בִּרְכֽוֹתֵיכֶ֑ם וְגַם֙ אָרוֹתִ֔יהָ כִּ֥י אֵינְכֶ֖ם שָׂמִ֥ים עַל־לֵֽב׃

‎3 ‏הִנְנִ֨י גֹעֵ֤ר לָכֶם֙ אֶת־הַזֶּ֔רַע וְזֵרִ֤יתִי פֶ֙רֶשׁ֙ עַל־פְּנֵיכֶ֔ם פֶּ֖רֶשׁ חַגֵּיכֶ֑ם וְנָשָׂ֥א אֶתְכֶ֖ם אֵלָֽיו׃

‎4 ‏וִֽידַעְתֶּ֕ם כִּ֚י שִׁלַּ֣חְתִּי אֲלֵיכֶ֔ם אֵ֖ת הַמִּצְוָ֣ה הַזֹּ֑את לִֽהְי֤וֹת בְּרִיתִי֙ אֶת־לֵוִ֔י אָמַ֖ר יְהוָ֥ה צְבָאֽוֹת׃

‎5 ‏בְּרִיתִ֣י׀ הָיְתָ֣ה אִתּ֗וֹ הַֽחַיִּים֙ וְהַ֨שָּׁל֔וֹם וָאֶתְּנֵֽם־ל֥וֹ מוֹרָ֖א וַיִּֽירָאֵ֑נִי וּמִפְּנֵ֥י שְׁמִ֖י נִחַ֥ת הֽוּא׃

‎6 ‏תּוֹרַ֤ת אֱמֶת֙ הָיְתָ֣ה בְּפִ֔יהוּ וְעַוְלָ֖ה לֹא־נִמְצָ֣א בִשְׂפָתָ֑יו בְּשָׁל֤וֹם וּבְמִישׁוֹר֙ הָלַ֣ךְ אִתִּ֔י וְרַבִּ֖ים הֵשִׁ֥יב מֵעָוֹֽן׃

‎7 ‏כִּֽי־שִׂפְתֵ֤י כֹהֵן֙ יִשְׁמְרוּ־דַ֔עַת וְתוֹרָ֖ה יְבַקְשׁ֣וּ מִפִּ֑יהוּ כִּ֛י מַלְאַ֥ךְ יְהוָֽה־צְבָא֖וֹת הֽוּא׃

‎8 ‏וְאַתֶּם֙ סַרְתֶּ֣ם מִן־הַדֶּ֔רֶךְ הִכְשַׁלְתֶּ֥ם רַבִּ֖ים בַּתּוֹרָ֑ה שִֽׁחַתֶּם֙ בְּרִ֣ית הַלֵּוִ֔י אָמַ֖ר יְהוָ֥ה צְבָאֽוֹת׃

‎9 ‏וְגַם־אֲנִ֞י נָתַ֧תִּי אֶתְכֶ֛ם נִבְזִ֥ים וּשְׁפָלִ֖ים לְכָל־הָעָ֑ם כְּפִ֗י אֲשֶׁ֤ר אֵֽינְכֶם֙ שֹׁמְרִ֣ים אֶת־דְּרָכַ֔י וְנֹשְׂאִ֥ים פָּנִ֖ים בַּתּוֹרָֽה׃ פ

‎10 ‏הֲל֨וֹא אָ֤ב אֶחָד֙ לְכֻלָּ֔נוּ הֲל֛וֹא אֵ֥ל אֶֽחָ֖ד בְּרָאָ֑נוּ מַדּ֗וּעַ נִבְגַּד֙ אִ֣ישׁ בְּאָחִ֔יו לְחַלֵּ֖ל בְּרִ֥ית אֲבֹתֵֽינוּ׃

‎11 ‏בָּגְדָ֣ה יְהוּדָ֔ה וְתוֹעֵבָ֛ה נֶעֶשְׂתָ֥ה בְיִשְׂרָאֵ֖ל וּבִירֽוּשָׁלִָ֑ם כִּ֣י׀ חִלֵּ֣ל יְהוּדָ֗ה קֹ֤דֶשׁ יְהוָה֙ אֲשֶׁ֣ר אָהֵ֔ב וּבָעַ֖ל בַּת־אֵ֥ל נֵכָֽר׃

‎12 ‏יַכְרֵ֨ת יְהוָ֜ה לָאִ֨ישׁ אֲשֶׁ֤ר יַעֲשֶׂ֙נָּה֙ עֵ֣ר וְעֹנֶ֔ה מֵאָהֳלֵ֖י יַֽעֲקֹ֑ב וּמַגִּ֣ישׁ מִנְחָ֔ה לַֽיהוָ֖ה צְבָאֽוֹת׃ פ

‎13 ‏וְזֹאת֙ שֵׁנִ֣ית תַּֽעֲשׂ֔וּ כַּסּ֤וֹת דִּמְעָה֙ אֶת־מִזְבַּ֣ח יְהוָ֔ה בְּכִ֖י וַֽאֲנָקָ֑ה מֵאֵ֣ין ע֗וֹד פְּנוֹת֙ אֶל־הַמִּנְחָ֔ה וְלָקַ֥חַת רָצ֖וֹן מִיֶּדְכֶֽם׃

‎14 ‏וַאֲמַרְתֶּ֖ם עַל־מָ֑ה עַ֡ל כִּי־יְהוָה֩ הֵעִ֨יד בֵּינְךָ֜ וּבֵ֣ין׀ אֵ֣שֶׁת נְעוּרֶ֗יךָ אֲשֶׁ֤ר אַתָּה֙ בָּגַ֣דְתָּה בָּ֔הּ וְהִ֥יא חֲבֶרְתְּךָ֖ וְאֵ֥שֶׁת בְּרִיתֶֽךָ׃

‎15 ‏וְלֹא־אֶחָ֣ד עָשָׂ֗ה וּשְׁאָ֥ר ר֙וּחַ֙ ל֔וֹ וּמָה֙ הָֽאֶחָ֔ד מְבַקֵּ֖שׁ זֶ֣רַע אֱלֹהִ֑ים וְנִשְׁמַרְתֶּם֙ בְּר֣וּחֲכֶ֔ם וּבְאֵ֥שֶׁת נְעוּרֶ֖יךָ אַל־יִבְגֹּֽד׃

‎16 ‏כִּֽי־שָׂנֵ֣א שַׁלַּ֗ח אָמַ֤ר יְהוָה֙ אֱלֹהֵ֣י יִשְׂרָאֵ֔ל וְכִסָּ֤ה חָמָס֙ עַל־לְבוּשׁ֔וֹ אָמַ֖ר יְהוָ֣ה צְבָא֑וֹת וְנִשְׁמַרְתֶּ֥ם בְּרוּחֲכֶ֖ם וְלֹ֥א תִבְגֹּֽדוּ׃ ס

‎17 ‏הוֹגַעְתֶּ֤ם יְהוָה֙ בְּדִבְרֵיכֶ֔ם וַאֲמַרְתֶּ֖ם בַּמָּ֣ה הוֹגָ֑עְנוּ בֶּאֱמָרְכֶ֗ם כָּל־עֹ֨שֵׂה רָ֜ע ט֣וֹב׀ בְּעֵינֵ֣י יְהוָ֗ה וּבָהֶם֙ ה֣וּא חָפֵ֔ץ א֥וֹ אַיֵּ֖ה אֱלֹהֵ֥י הַמִּשְׁפָּֽט׃

1 wə‘atâ ’ălêḵem hammiṣəwâ hazzō’ṯ hakōhănîm:

2 ’im-lō’ ṯišəmə‘û wə’im-lō’ ṯāśîmû ‘al-lēḇ lāṯēṯ kāḇwōḏ lišəmî ’āmar yəhwâ ṣəḇā’wōṯ wəšill^aḥətî ḇāḵem ’eṯ-hammə’ērâ wə’ārwōṯî ’eṯ-birəḵwōṯêḵem wəḡam ’ārwōṯîhā kî ’ênəḵem śāmîm ‘al-lēḇ:

3 hinənî ḡō‘ēr lāḵem ’eṯ-hazzer^a‘ wəzērîṯî fereš ‘al-pənêḵem pereš ḥagêḵem wənāśā’ ’eṯəḵem ’ēlāyw:

4 wîḏ^a‘ətem kî šill^aḥətî ’ălêḵem ’ēṯ hammiṣəwâ hazzō’ṯ lihəywōṯ bərîṯî ’eṯ-lēwî ’āmar yəhwâ ṣəḇā’wōṯ:

5 bərîṯî| hāyəṯâ ’itwō h^aḥayyîm wəhaššālwōm wā’etənēm-lwō mwōrā’ wayyîrā’ēnî ûmipənê šəmî niḥaṯ hû’:

6 twōraṯ ’ĕmeṯ hāyəṯâ bəfîhû wə‘awəlâ lō’-niməṣā’ ḇiśəfāṯāyw bəšālwōm ûḇəmîšwōr hālaḵə ’itî wərabîm hēšîḇ mē‘āwōn:

7 kî-śifəṯê ḵōhēn yišəmərû-ḏ^a‘aṯ wəṯwōrâ yəḇaqəšû mipîhû kî malə’aḵə yəhwâ-ṣəḇā’wōṯ hû’:

8 wə’atem sarətem min-hadereḵə hiḵəšalətem rabîm batwōrâ šiḥatem bərîṯ hallēwî ’āmar yəhwâ ṣəḇā’wōṯ:

9 wəḡam-’ănî nāṯatî ’eṯəḵem niḇəzîm ûšəfālîm ləḵāl-hā‘ām kəfî ’ăšer ’ênəḵem šōmərîm ’eṯ-dərāḵay wənōśə’îm pānîm batwōrâ: f

10 hălwō’ ’āḇ ’eḥāḏ ləḵullānû hălwō’ ’ēl ’eḥāḏ bərā’ānû madû‘a niḇəgaḏ ’îš bə’āḥîw ləḥallēl bərîṯ ’ăḇōṯênû:

11 bāḡəḏâ yəhûḏâ wəṯwō‘ēḇâ ne‘eśəṯâ ḇəyiśərā’ēl ûḇîrûšālāim kî| ḥillēl yəhûḏâ qōḏeš yəhwâ ’ăšer ’âēḇ ûḇā‘al baṯ-’ēl nēḵār:

12 yaḵərēṯ yəhwâ lā’îš ’ăšer y^a‘ăśennâ ‘ēr wə‘ōneh mē’âŏlê y^a‘ăqōḇ ûmagîš minəḥâ layhwâ ṣəḇā’wōṯ: f

13 wəzō’ṯ šēnîṯ t^a‘ăśû kasswōṯ dimə‘â ’eṯ-mizəb^aḥ yəhwâ bəḵî wa’ănāqâ mē’ên ‘wōḏ pənwōṯ ’el-hamminəḥâ wəlāq^aḥaṯ rāṣwōn mîyeḏəḵem:

14 wa’ămarətem ‘al-mâ ‘al kî-yəhwâ hē‘îḏ bênəḵā ûḇên| ’ēšeṯ nə‘ûreyḵā ’ăšer ’atâ bāḡaḏətâ bāh wəhî’ ḥăḇerətəḵā wə’ēšeṯ bərîṯeḵā:

15 wəlō’-’eḥāḏ ‘āśâ ûšə’ār rûḥa lwō ûmâ hā’eḥāḏ məḇaqqēš zer^a‘ ’ĕlōhîm wənišəmarətem bərûḥăḵem ûḇə’ēšeṯ nə‘ûreyḵā ’al-yiḇəgōḏ:

16 kî-śānē’ šall^aḥ ’āmar yəhwâ ’ĕlōhê yiśərā’ēl wəḵissâ ḥāmās ‘al-ləḇûšwō ’āmar yəhwâ ṣəḇā’wōṯ wənišəmarətem bərûḥăḵem wəlō’ ṯiḇəgōḏû: s

17 hwōḡ^a‘ətem yəhwâ bəḏiḇərêḵem wa’ămarətem bammâ hwōḡā‘ənû be’ĕmārəḵem kāl-‘ōśēh rā‘ ṭwōḇ| bə‘ênê yəhwâ ûḇâem hû’ ḥāfēṣ ’wō ’ayyēh ’ĕlōhê hammišəpāṭ: