Malachi (Malakhi) Chapter 1

‎1 ‏מַשָּׂ֥א דְבַר־יְהוָ֖ה אֶל־יִשְׂרָאֵ֑ל בְּיַ֖ד מַלְאָכִֽי׃

‎2 ‏אָהַ֤בְתִּי אֶתְכֶם֙ אָמַ֣ר יְהוָ֔ה וַאֲמַרְתֶּ֖ם בַּמָּ֣ה אֲהַבְתָּ֑נוּ הֲלוֹא־אָ֨ח עֵשָׂ֤ו לְיַֽעֲקֹב֙ נְאֻם־יְהוָ֔ה וָאֹהַ֖ב אֶֽת־יַעֲקֹֽב׃

‎3 ‏וְאֶת־עֵשָׂ֖ו שָׂנֵ֑אתִי וָאָשִׂ֤ים אֶת־הָרָיו֙ שְׁמָמָ֔ה וְאֶת־נַחֲלָת֖וֹ לְתַנּ֥וֹת מִדְבָּֽר׃

‎4 ‏כִּֽי־תֹאמַ֨ר אֱד֜וֹם רֻשַּׁ֗שְׁנוּ וְנָשׁוּב֙ וְנִבְנֶ֣ה חֳרָב֔וֹת כֹּ֤ה אָמַר֙ יְהוָ֣ה צְבָא֔וֹת הֵ֥מָּה יִבְנ֖וּ וַאֲנִ֣י אֶהֱר֑וֹס וְקָרְא֤וּ לָהֶם֙ גְּב֣וּל רִשְׁעָ֔ה וְהָעָ֛ם אֲשֶׁר־זָעַ֥ם יְהוָ֖ה עַד־עוֹלָֽם׃

‎5 ‏וְעֵינֵיכֶ֖ם תִּרְאֶ֑ינָה וְאַתֶּ֤ם תֹּֽאמְרוּ֙ יִגְדַּ֣ל יְהוָ֔ה מֵעַ֖ל לִגְב֥וּל יִשְׂרָאֵֽל׃

‎6 ‏בֵּ֛ן יְכַבֵּ֥ד אָ֖ב וְעֶ֣בֶד אֲדֹנָ֑יו וְאִם־אָ֣ב אָ֣נִי אַיֵּ֣ה כְבוֹדִ֡י וְאִם־אֲדוֹנִ֣ים אָנִי֩ אַיֵּ֨ה מוֹרָאִ֜י אָמַ֣ר׀ יְהוָ֣ה צְבָא֗וֹת לָכֶם֙ הַכֹּֽהֲנִים֙ בּוֹזֵ֣י שְׁמִ֔י וַאֲמַרְתֶּ֕ם בַּמֶּ֥ה בָזִ֖ינוּ אֶת־שְׁמֶֽךָ׃

‎7 ‏מַגִּישִׁ֤ים עַֽל־מִזְבְּחִי֙ לֶ֣חֶם מְגֹאָ֔ל וַאֲמַרְתֶּ֖ם בַּמֶּ֣ה גֵֽאַלְנ֑וּךָ בֶּאֱמָרְכֶ֕ם שֻׁלְחַ֥ן יְהוָ֖ה נִבְזֶ֥ה הֽוּא׃

‎8 ‏וְכִֽי־תַגִּשׁ֨וּן עִוֵּ֤ר לִזְבֹּ֙חַ֙ אֵ֣ין רָ֔ע וְכִ֥י תַגִּ֛ישׁוּ פִּסֵּ֥חַ וְחֹלֶ֖ה אֵ֣ין רָ֑ע הַקְרִיבֵ֨הוּ נָ֜א לְפֶחָתֶ֗ךָ הֲיִרְצְךָ֙ א֚וֹ הֲיִשָּׂ֣א פָנֶ֔יךָ אָמַ֖ר יְהוָ֥ה צְבָאֽוֹת׃

‎9 ‏וְעַתָּ֛ה חַלּוּ־נָ֥א פְנֵי־אֵ֖ל וִֽיחָנֵ֑נוּ מִיֶּדְכֶם֙ הָ֣יְתָה זֹּ֔את הֲיִשָּׂ֤א מִכֶּם֙ פָּנִ֔ים אָמַ֖ר יְהוָ֥ה צְבָאֽוֹת׃

‎10 ‏מִ֤י גַם־בָּכֶם֙ וְיִסְגֹּ֣ר דְּלָתַ֔יִם וְלֹֽא־תָאִ֥ירוּ מִזְבְּחִ֖י חִנָּ֑ם אֵֽין־לִ֨י חֵ֜פֶץ בָּכֶ֗ם אָמַר֙ יְהוָ֣ה צְבָא֔וֹת וּמִנְחָ֖ה לֹֽא־אֶרְצֶ֥ה מִיֶּדְכֶֽם׃

‎11 ‏כִּ֣י מִמִּזְרַח־שֶׁ֜מֶשׁ וְעַד־מְבוֹא֗וֹ גָּד֤וֹל שְׁמִי֙ בַּגּוֹיִ֔ם וּבְכָל־מָק֗וֹם מֻקְטָ֥ר מֻגָּ֛שׁ לִשְׁמִ֖י וּמִנְחָ֣ה טְהוֹרָ֑ה כִּֽי־גָד֤וֹל שְׁמִי֙ בַּגּוֹיִ֔ם אָמַ֖ר יְהוָ֥ה צְבָאֽוֹת׃

‎12 ‏וְאַתֶּ֖ם מְחַלְּלִ֣ים אוֹת֑וֹ בֶּאֱמָרְכֶ֗ם שֻׁלְחַ֤ן אֲדֹנָי֙ מְגֹאָ֣ל ה֔וּא וְנִיב֖וֹ נִבְזֶ֥ה אָכְלֽוֹ׃

‎13 ‏וַאֲמַרְתֶּם֩ הִנֵּ֨ה מַתְּלָאָ֜ה וְהִפַּחְתֶּ֣ם אוֹת֗וֹ אָמַר֙ יְהוָ֣ה צְבָא֔וֹת וַהֲבֵאתֶ֣ם גָּז֗וּל וְאֶת־הַפִּסֵּ֙חַ֙ וְאֶת־הַ֣חוֹלֶ֔ה וַהֲבֵאתֶ֖ם אֶת־הַמִּנְחָ֑ה הַאֶרְצֶ֥ה אוֹתָ֛הּ מִיֶּדְכֶ֖ם אָמַ֥ר יְהוָֽה׃ ס

‎14 ‏וְאָר֣וּר נוֹכֵ֗ל וְיֵ֤שׁ בְּעֶדְרוֹ֙ זָכָ֔ר וְנֹדֵ֛ר וְזֹבֵ֥חַ מָשְׁחָ֖ת לַֽאדֹנָ֑י כִּי֩ מֶ֨לֶךְ גָּד֜וֹל אָ֗נִי אָמַר֙ יְהוָ֣ה צְבָא֔וֹת וּשְׁמִ֖י נוֹרָ֥א בַגּוֹיִֽם׃

1 maśśā’ ḏəḇar-yəhwâ ’el-yiśərā’ēl bəyaḏ malə’āḵî:

2 ’âaḇətî ’eṯəḵem ’āmar yəhwâ wa’ămarətem bammâ ’ăhaḇətānû hălwō’-’āḥ ‘ēśāw ləy^a‘ăqōḇ nə’um-yəhwâ wā’ōhaḇ ’eṯ-y^a‘ăqōḇ:

3 wə’eṯ-‘ēśāw śānē’ṯî wā’āśîm ’eṯ-hārāyw šəmāmâ wə’eṯ-n^aḥălāṯwō ləṯannwōṯ miḏəbār:

4 kî-ṯō’mar ’ĕḏwōm ruššašənû wənāšûḇ wəniḇəneh ḥŏrāḇwōṯ kōh ’āmar yəhwâ ṣəḇā’wōṯ hēmmâ yiḇənû wa’ănî ’ehĕrwōs wəqārə’û lâem gəḇûl rišə‘â wəhā‘ām ’ăšer-zā‘am yəhwâ ‘aḏ-‘wōlām:

5 wə‘ênêḵem tirə’eynâ wə’atem tō’mərû yiḡədal yəhwâ mē‘al liḡəḇûl yiśərā’ēl:

6 bēn yəḵabēḏ ’āḇ wə‘eḇeḏ ’ăḏōnāyw wə’im-’āḇ ’ānî ’ayyēh ḵəḇwōḏî wə’im-’ăḏwōnîm ’ānî ’ayyēh mwōrā’î ’āmar| yəhwâ ṣəḇā’wōṯ lāḵem hakōhănîm bwōzê šəmî wa’ămarətem bammeh ḇāzînû ’eṯ-šəmeḵā:

7 magîšîm ‘al-mizəbəḥî leḥem məḡō’āl wa’ămarətem bammeh ḡē’alənûḵā be’ĕmārəḵem šuləḥan yəhwâ niḇəzeh hû’:

8 wəḵî-ṯagišûn ‘iûēr lizəbōḥa ’ên rā‘ wəḵî ṯagîšû pissēḥa wəḥōleh ’ên rā‘ haqərîḇēhû nā’ ləfeḥāṯeḵā hăyirəṣəḵā ’wō hăyiśśā’ fāneyḵā ’āmar yəhwâ ṣəḇā’wōṯ:

9 wə‘atâ ḥallû-nā’ fənê-’ēl wîḥānēnû mîyeḏəḵem hāyəṯâ zzō’ṯ hăyiśśā’ mikem pānîm ’āmar yəhwâ ṣəḇā’wōṯ:

10 mî ḡam-bāḵem wəyisəgōr dəlāṯayim wəlō’-ṯā’îrû mizəbəḥî ḥinnām ’ên-lî ḥēfeṣ bāḵem ’āmar yəhwâ ṣəḇā’wōṯ ûminəḥâ lō’-’erəṣeh mîyeḏəḵem:

11 kî mimmizər^aḥ-šemeš wə‘aḏ-məḇwō’wō gāḏwōl šəmî bagwōyim ûḇəḵāl-māqwōm muqəṭār mugāš lišəmî ûminəḥâ ṭəhwōrâ kî-ḡāḏwōl šəmî bagwōyim ’āmar yəhwâ ṣəḇā’wōṯ:

12 wə’atem məḥalləlîm ’wōṯwō be’ĕmārəḵem šuləḥan ’ăḏōnāy məḡō’āl hû’ wənîḇwō niḇəzeh ’āḵəlwō:

13 wa’ămarətem hinnēh matəlā’â wəhip^aḥətem ’wōṯwō ’āmar yəhwâ ṣəḇā’wōṯ wahăḇē’ṯem gāzûl wə’eṯ-hapissēḥa wə’eṯ-h^aḥwōleh wahăḇē’ṯem ’eṯ-hamminəḥâ ha’erəṣeh ’wōṯāh mîyeḏəḵem ’āmar yəhwâ: s

14 wə’ārûr nwōḵēl wəyēš bə‘eḏərwō zāḵār wənōḏēr wəzōḇēḥa māšəḥāṯ la’ḏōnāy kî meleḵə gāḏwōl ’ānî ’āmar yəhwâ ṣəḇā’wōṯ ûšəmî nwōrā’ ḇagwōyim: