Nehemiah (Nechemiyah) Chapter 6

‎1 ‏וַיְהִ֣י כַאֲשֶׁ֣ר נִשְׁמַ֣ע לְסַנְבַלַּ֣ט וְ֠טוֹבִיָּה וּלְגֶ֨שֶׁם הָֽעַרְבִ֜י וּלְיֶ֣תֶר אֹֽיְבֵ֗ינוּ כִּ֤י בָנִ֙יתִי֙ אֶת־הַ֣חוֹמָ֔ה וְלֹא־נ֥וֹתַר בָּ֖הּ פָּ֑רֶץ גַּ֚ם עַד־הָעֵ֣ת הַהִ֔יא דְּלָת֖וֹת לֹא־הֶעֱמַ֥דְתִּי בַשְּׁעָרִֽים׃

‎2 ‏וַיִּשְׁלַ֨ח סַנְבַלַּ֤ט וְגֶ֙שֶׁם֙ אֵלַ֣י לֵאמֹ֔ר לְכָ֞ה וְנִֽוָּעֲדָ֥ה יַחְדָּ֛ו בַּכְּפִירִ֖ים בְּבִקְעַ֣ת אוֹנ֑וֹ וְהֵ֙מָּה֙ חֹֽשְׁבִ֔ים לַעֲשׂ֥וֹת לִ֖י רָעָֽה׃

‎3 ‏וָאֶשְׁלְחָ֨ה עֲלֵיהֶ֤ם מַלְאָכִים֙ לֵאמֹ֔ר מְלָאכָ֤ה גְדוֹלָה֙ אֲנִ֣י עֹשֶׂ֔ה וְלֹ֥א אוּכַ֖ל לָרֶ֑דֶת לָ֣מָּה תִשְׁבַּ֤ת הַמְּלָאכָה֙ כַּאֲשֶׁ֣ר אַרְפֶּ֔הָ וְיָרַדְתִּ֖י אֲלֵיכֶֽם׃

‎4 ‏וַיִּשְׁלְח֥וּ אֵלַ֛י כַּדָּבָ֥ר הַזֶּ֖ה אַרְבַּ֣ע פְּעָמִ֑ים וָאָשִׁ֥יב אוֹתָ֖ם כַּדָּבָ֥ר הַזֶּֽה׃ ס

‎5 ‏וַיִּשְׁלַח֩ אֵלַ֨י סַנְבַלַּ֜ט כַּדָּבָ֥ר הַזֶּ֛ה פַּ֥עַם חֲמִישִׁ֖ית אֶֽת־נַעֲר֑וֹ וְאִגֶּ֥רֶת פְּתוּחָ֖ה בְּיָדֽוֹ׃

‎6 ‏כָּת֣וּב בָּ֗הּ בַּגּוֹיִ֤ם נִשְׁמָע֙ וְגַשְׁמ֣וּ אֹמֵ֔ר אַתָּ֤ה וְהַיְּהוּדִים֙ חֹשְׁבִ֣ים לִמְר֔וֹד עַל־כֵּ֛ן אַתָּ֥ה בוֹנֶ֖ה הַחוֹמָ֑ה וְאַתָּ֗ה הוֶֹ֤ה לָהֶם֙ לְמֶ֔לֶךְ כַּדְּבָרִ֖ים הָאֵֽלֶּה׃

‎7 ‏וְגַם־נְבִיאִ֡ים הֶעֱמַ֣דְתָּ לִקְרֹא֩ עָלֶ֨יךָ בִֽירוּשָׁלִַ֜ם לֵאמֹ֗ר מֶ֚לֶךְ בִּֽיהוּדָ֔ה וְעַתָּה֙ יִשָּׁמַ֣ע לַמֶּ֔לֶךְ כַּדְּבָרִ֣ים הָאֵ֑לֶּה וְעַתָּ֣ה לְכָ֔ה וְנִֽוָּעֲצָ֖ה יַחְדָּֽו׃ ס

‎8 ‏וָאֶשְׁלְחָ֤ה אֵלָיו֙ לֵאמֹ֔ר לֹ֤א נִֽהְיָה֙ כַּדְּבָרִ֣ים הָאֵ֔לֶּה אֲשֶׁ֖ר אַתָּ֣ה אוֹמֵ֑ר כִּ֥י מִֽלִּבְּךָ֖ אַתָּ֥ה בוֹדָֽאם׃¹

‎9 ‏כִּ֣י כֻלָּ֗ם מְיָֽרְאִ֤ים אוֹתָ֙נוּ֙ לֵאמֹ֔ר יִרְפּ֧וּ יְדֵיהֶ֛ם מִן־הַמְּלָאכָ֖ה וְלֹ֣א תֵעָשֶׂ֑ה וְעַתָּ֖ה חַזֵּ֥ק אֶת־יָדָֽי׃

‎10 ‏וַאֲנִי־בָ֗אתִי בֵּ֣ית שְֽׁמַֽעְיָ֧ה בֶן־דְּלָיָ֛ה בֶּן־מְהֵֽיטַבְאֵ֖ל וְה֣וּא עָצ֑וּר וַיֹּ֡אמֶר נִוָּעֵד֩ אֶל־בֵּ֨ית הָאֱלֹהִ֜ים אֶל־תּ֣וֹךְ הַֽהֵיכָ֗ל וְנִסְגְּרָה֙ דַּלְת֣וֹת הַהֵיכָ֔ל כִּ֚י בָּאִ֣ים לְהָרְגֶ֔ךָ וְלַ֖יְלָה בָּאִ֥ים לְהָרְגֶֽךָ׃

‎11 ‏וָאֹמְרָ֗ה הַאִ֤ישׁ כָּמ֙וֹנִי֙ יִבְרָ֔ח וּמִ֥י כָמ֛וֹנִי אֲשֶׁר־יָב֥וֹא אֶל־הַהֵיכָ֖ל וָחָ֑י לֹ֖א אָבֽוֹא׃

‎12 ‏וָאַכִּ֕ירָה וְהִנֵּ֥ה לֹֽא־אֱלֹהִ֖ים שְׁלָח֑וֹ כִּ֤י הַנְּבוּאָה֙ דִּבֶּ֣ר עָלַ֔י וְטוֹבִיָּ֥ה וְסַנְבַלַּ֖ט שְׂכָרֽוֹ׃

‎13 ‏לְמַ֤עַן שָׂכוּר֙ ה֔וּא לְמַֽעַן־אִירָ֥א וְאֶֽעֱשֶׂה־כֵּ֖ן וְחָטָ֑אתִי וְהָיָ֤ה לָהֶם֙ לְשֵׁ֣ם רָ֔ע לְמַ֖עַן יְחָֽרְפֽוּנִי׃ פ

‎14 ‏זָכְרָ֧ה אֱלֹהַ֛י לְטוֹבִיָּ֥ה וּלְסַנְבַלַּ֖ט כְּמַעֲשָׂ֣יו אֵ֑לֶּה וְגַ֨ם לְנוֹעַדְיָ֤ה הַנְּבִיאָה֙ וּלְיֶ֣תֶר הַנְּבִיאִ֔ים אֲשֶׁ֥ר הָי֖וּ מְיָֽרְאִ֥ים אוֹתִֽי׃

‎15 ‏וַתִּשְׁלַם֙ הַֽחוֹמָ֔ה בְּעֶשְׂרִ֥ים וַחֲמִשָּׁ֖ה לֶאֱל֑וּל לַחֲמִשִּׁ֥ים וּשְׁנַ֖יִם יֽוֹם׃ פ

‎16 ‏וַיְהִ֗י כַּאֲשֶׁ֤ר שָֽׁמְעוּ֙ כָּל־א֣וֹיְבֵ֔ינוּ וַיִּֽרְא֗וּ כָּל־הַגּוֹיִם֙ אֲשֶׁ֣ר סְבִֽיבֹתֵ֔ינוּ וַיִּפְּל֥וּ מְאֹ֖ד בְּעֵינֵיהֶ֑ם וַיֵּ֣דְע֔וּ כִּ֚י מֵאֵ֣ת אֱלֹהֵ֔ינוּ נֶעֶשְׂתָ֖ה הַמְּלָאכָ֥ה הַזֹּֽאת׃

‎17 ‏גַּ֣ם׀ בַּיָּמִ֣ים הָהֵ֗ם מַרְבִּ֞ים חֹרֵ֤י יְהוּדָה֙ אִגְּרֹ֣תֵיהֶ֔ם הוֹלְכ֖וֹת עַל־טוֹבִיָּ֑ה וַאֲשֶׁ֥ר לְטוֹבִיָּ֖ה בָּא֥וֹת אֲלֵיהֶֽם׃

‎18 ‏כִּי־רַבִּ֣ים בִּֽיהוּדָ֗ה בַּעֲלֵ֤י שְׁבוּעָה֙ ל֔וֹ כִּי־חָתָ֥ן ה֖וּא לִשְׁכַנְיָ֣ה בֶן־אָרַ֑ח וִֽיהוֹחָנָ֣ן בְּנ֔וֹ לָקַ֕ח אֶת־בַּת־מְשֻׁלָּ֖ם בֶּ֥ן בֶּֽרֶכְיָֽה׃

‎19 ‏גַּ֣ם טוֹבֹתָ֗יו הָי֤וּ אֹמְרִים֙ לְפָנַ֔י וּדְבָרַ֕י הָי֥וּ מוֹצִיאִ֖ים ל֑וֹ אִגְּר֛וֹת שָׁלַ֥ח טוֹבִיָּ֖ה לְיָֽרְאֵֽנִי׃

1 wayəhî ḵa’ăšer nišəm^a‘ ləsanəḇallaṭ wəṭwōḇîyâ ûləḡešem hā‘arəḇî ûləyeṯer ’ōyəḇênû kî ḇānîṯî ’eṯ-h^aḥwōmâ wəlō’-nwōṯar bāh pāreṣ gam ‘aḏ-hā‘ēṯ hahî’ dəlāṯwōṯ lō’-he‘ĕmaḏətî ḇaššə‘ārîm:

2 wayyišəl^aḥ sanəḇallaṭ wəḡešem ’ēlay lē’mōr ləḵâ wəniûā‘ăḏâ y^aḥədāw bakəfîrîm bəḇiqə‘aṯ ’wōnwō wəhēmmâ ḥōšəḇîm l^a‘ăśwōṯ lî rā‘â:

3 wā’ešələḥâ ‘ălêhem malə’āḵîm lē’mōr məlā’ḵâ ḡəḏwōlâ ’ănî ‘ōśeh wəlō’ ’ûḵal lāreḏeṯ lāmmâ ṯišəbaṯ hamməlā’ḵâ ka’ăšer ’arəpehā wəyāraḏətî ’ălêḵem:

4 wayyišələḥû ’ēlay kadāḇār hazzeh ’arəb^a‘ pə‘āmîm wā’āšîḇ ’wōṯām kadāḇār hazzeh: s

5 wayyišəl^aḥ ’ēlay sanəḇallaṭ kadāḇār hazzeh p^a‘am ḥămîšîṯ ’eṯ-n^a‘ărwō wə’igereṯ pəṯûḥâ bəyāḏwō:

6 kāṯûḇ bāh bagwōyim nišəmā‘ wəḡašəmû ’ōmēr ’atâ wəhayyəhûḏîm ḥōšəḇîm limərwōḏ ‘al-kēn ’atâ ḇwōneh h^aḥwōmâ wə’atâ hwōeh lâem ləmeleḵə kadəḇārîm hā’ēlleh:

7 wəḡam-nəḇî’îm he‘ĕmaḏətā liqərō’ ‘āleyḵā ḇîrûšālaim lē’mōr meleḵə bîhûḏâ wə‘atâ yiššām^a‘ lammeleḵə kadəḇārîm hā’ēlleh wə‘atâ ləḵâ wəniûā‘ăṣâ y^aḥədāw: s

8 wā’ešələḥâ ’ēlāyw lē’mōr lō’ nihəyâ kadəḇārîm hā’ēlleh ’ăšer ’atâ ’wōmēr kî millibəḵā ’atâ ḇwōḏā’m:¹

9 kî ḵullām məyārə’îm ’wōṯānû lē’mōr yirəpû yəḏêhem min-hamməlā’ḵâ wəlō’ ṯē‘āśeh wə‘atâ ḥazzēq ’eṯ-yāḏāy:

10 wa’ănî-ḇā’ṯî bêṯ šəm^a‘əyâ ḇen-dəlāyâ ben-məhêṭaḇə’ēl wəhû’ ‘āṣûr wayyō’mer niûā‘ēḏ ’el-bêṯ hā’ĕlōhîm ’el-twōḵə hahêḵāl wənisəgərâ daləṯwōṯ hahêḵāl kî bā’îm ləhārəḡeḵā wəlayəlâ bā’îm ləhārəḡeḵā:

11 wā’ōmərâ ha’îš kāmwōnî yiḇərāḥ ûmî ḵāmwōnî ’ăšer-yāḇwō’ ’el-hahêḵāl wāḥāy lō’ ’āḇwō’:

12 wā’akîrâ wəhinnēh lō’-’ĕlōhîm šəlāḥwō kî hannəḇû’â diber ‘ālay wəṭwōḇîyâ wəsanəḇallaṭ śəḵārwō:

13 ləm^a‘an śāḵûr hû’ ləm^a‘an-’îrā’ wə’e‘ĕśeh-kēn wəḥāṭā’ṯî wəhāyâ lâem ləšēm rā‘ ləm^a‘an yəḥārəfûnî: f

14 zāḵərâ ’ĕlōhay ləṭwōḇîyâ ûləsanəḇallaṭ kəm^a‘ăśāyw ’ēlleh wəḡam lənwō‘aḏəyâ hannəḇî’â ûləyeṯer hannəḇî’îm ’ăšer hāyû məyārə’îm ’wōṯî:

15 watišəlam h^aḥwōmâ bə‘eśərîm w^aḥămiššâ le’ĕlûl l^aḥămiššîm ûšənayim ywōm: f

16 wayəhî ka’ăšer šāmə‘û kāl-’wōyəḇênû wayyirə’û kāl-hagwōyim ’ăšer səḇîḇōṯênû wayyipəlû mə’ōḏ bə‘ênêhem wayyēḏə‘û kî mē’ēṯ ’ĕlōhênû ne‘eśəṯâ hamməlā’ḵâ hazzō’ṯ:

17 gam| bayyāmîm hâēm marəbîm ḥōrê yəhûḏâ ’igərōṯêhem hwōləḵwōṯ ‘al-ṭwōḇîyâ wa’ăšer ləṭwōḇîyâ bā’wōṯ ’ălêhem:

18 kî-rabîm bîhûḏâ b^a‘ălê šəḇû‘â lwō kî-ḥāṯān hû’ lišəḵanəyâ ḇen-’ār^aḥ wîhwōḥānān bənwō lāq^aḥ ’eṯ-baṯ-məšullām ben bereḵəyâ:

19 gam ṭwōḇōṯāyw hāyû ’ōmərîm ləfānay ûḏəḇāray hāyû mwōṣî’îm lwō ’igərwōṯ šāl^aḥ ṭwōḇîyâ ləyārə’ēnî: