Numbers (Bemidbar) Chapter 12

‎1 ‏וַתְּדַבֵּ֨ר מִרְיָ֤ם וְאַהֲרֹן֙ בְּמֹשֶׁ֔ה עַל־אֹד֛וֹת הָאִשָּׁ֥ה הַכֻּשִׁ֖ית אֲשֶׁ֣ר לָקָ֑ח כִּֽי־אִשָּׁ֥ה כֻשִׁ֖ית לָקָֽח׃

‎2 ‏וַיֹּאמְר֗וּ הֲרַ֤ק אַךְ־בְּמֹשֶׁה֙ דִּבֶּ֣ר יְהוָ֔ה הֲלֹ֖א גַּם־בָּ֣נוּ דִבֵּ֑ר וַיִּשְׁמַ֖ע יְהוָֽה׃

‎3 ‏וְהָאִ֥ישׁ מֹשֶׁ֖ה ענו עָנָ֣יו מְאֹ֑ד מִכֹּל֙ הָֽאָדָ֔ם אֲשֶׁ֖ר עַל־פְּנֵ֥י הָאֲדָמָֽה׃ ס

‎4 ‏וַיֹּ֨אמֶר יְהוָ֜ה פִּתְאֹ֗ם אֶל־מֹשֶׁ֤ה וְאֶֽל־אַהֲרֹן֙ וְאֶל־מִרְיָ֔ם צְא֥וּ שְׁלָשְׁתְּכֶ֖ם אֶל־אֹ֣הֶל מוֹעֵ֑ד וַיֵּצְא֖וּ שְׁלָשְׁתָּֽם׃

‎5 ‏וַיֵּ֤רֶד יְהוָה֙ בְּעַמּ֣וּד עָנָ֔ן וַֽיַּעֲמֹ֖ד פֶּ֣תַח הָאֹ֑הֶל וַיִּקְרָא֙ אַהֲרֹ֣ן וּמִרְיָ֔ם וַיֵּצְא֖וּ שְׁנֵיהֶֽם׃

‎6 ‏וַיֹּ֖אמֶר שִׁמְעוּ־נָ֣א דְבָרָ֑י אִם־יִֽהְיֶה֙ נְבִ֣יאֲכֶ֔ם יְהוָ֗ה בַּמַּרְאָה֙ אֵלָ֣יו אֶתְוַדָּ֔ע בַּחֲל֖וֹם אֲדַבֶּר־בּֽוֹ׃

‎7 ‏לֹא־כֵ֖ן עַבְדִּ֣י מֹשֶׁ֑ה בְּכָל־בֵּיתִ֖י נֶאֱמָ֥ן הֽוּא׃

‎8 ‏פֶּ֣ה אֶל־פֶּ֞ה אֲדַבֶּר־בּ֗וֹ וּמַרְאֶה֙ וְלֹ֣א בְחִידֹ֔ת וּתְמֻנַ֥ת יְהוָ֖ה יַבִּ֑יט וּמַדּ֙וּעַ֙ לֹ֣א יְרֵאתֶ֔ם לְדַבֵּ֖ר בְּעַבְדִּ֥י בְמֹשֶֽׁה׃

‎9 ‏וַיִּֽחַר¹ אַ֧ף יְהוָ֛ה בָּ֖ם וַיֵּלַֽךְ׃

‎10 ‏וְהֶעָנָ֗ן סָ֚ר מֵעַ֣ל הָאֹ֔הֶל וְהִנֵּ֥ה מִרְיָ֖ם מְצֹרַ֣עַת כַּשָּׁ֑לֶג וַיִּ֧פֶן אַהֲרֹ֛ן אֶל־מִרְיָ֖ם וְהִנֵּ֥ה מְצֹרָֽעַת׃

‎11 ‏וַיֹּ֥אמֶר אַהֲרֹ֖ן אֶל־מֹשֶׁ֑ה בִּ֣י אֲדֹנִ֔י אַל־נָ֨א תָשֵׁ֤ת עָלֵ֙ינוּ֙ חַטָּ֔את אֲשֶׁ֥ר נוֹאַ֖לְנוּ וַאֲשֶׁ֥ר חָטָֽאנוּ׃

‎12 ‏אַל־נָ֥א תְהִ֖י כַּמֵּ֑ת אֲשֶׁ֤ר בְּצֵאתוֹ֙ מֵרֶ֣חֶם אִמּ֔וֹ וַיֵּאָכֵ֖ל חֲצִ֥י בְשָׂרֽוֹ׃

‎13 ‏וַיִּצְעַ֣ק מֹשֶׁ֔ה אֶל־יְהוָ֖ה לֵאמֹ֑ר אֵ֕ל נָ֛א רְפָ֥א נָ֖א לָֽהּ׃ פ

‎14 ‏וַיֹּ֨אמֶר יְהוָ֜ה אֶל־מֹשֶׁ֗ה וְאָבִ֙יהָ֙ יָרֹ֤ק יָרַק֙ בְּפָנֶ֔יהָ הֲלֹ֥א תִכָּלֵ֖ם שִׁבְעַ֣ת יָמִ֑ים תִּסָּגֵ֞ר שִׁבְעַ֤ת יָמִים֙ מִח֣וּץ לַֽמַּחֲנֶ֔ה וְאַחַ֖ר תֵּאָסֵֽף׃

‎15 ‏וַתִּסָּגֵ֥ר מִרְיָ֛ם מִח֥וּץ לַֽמַּחֲנֶ֖ה שִׁבְעַ֣ת יָמִ֑ים וְהָעָם֙ לֹ֣א נָסַ֔ע עַד־הֵאָסֵ֖ף מִרְיָֽם׃

‎16 ‏וְאַחַ֛ר נָסְע֥וּ הָעָ֖ם מֵחֲצֵר֑וֹת וַֽיַּחֲנ֖וּ בְּמִדְבַּ֥ר פָּארָֽן׃ פ

1 watəḏabēr mirəyām wə’ahărōn bəmōšeh ‘al-’ōḏwōṯ hā’iššâ hakušîṯ ’ăšer lāqāḥ kî-’iššâ ḵušîṯ lāqāḥ:

2 wayyō’mərû hăraq ’aḵə-bəmōšeh diber yəhwâ hălō’ gam-bānû ḏibēr wayyišəm^a‘ yəhwâ:

3 wəhā’îš mōšeh ‘ānāw ‘ānāyw mə’ōḏ mikōl hā’āḏām ’ăšer ‘al-pənê hā’ăḏāmâ: s

4 wayyō’mer yəhwâ piṯə’ōm ’el-mōšeh wə’el-’ahărōn wə’el-mirəyām ṣə’û šəlāšətəḵem ’el-’ōhel mwō‘ēḏ wayyēṣə’û šəlāšətām:

5 wayyēreḏ yəhwâ bə‘ammûḏ ‘ānān wayy^a‘ămōḏ peṯ^aḥ hā’ōhel wayyiqərā’ ’ahărōn ûmirəyām wayyēṣə’û šənêhem:

6 wayyō’mer šimə‘û-nā’ ḏəḇārāy ’im-yihəyeh nəḇî’ăḵem yəhwâ bammarə’â ’ēlāyw ’eṯəwadā‘ b^aḥălwōm ’ăḏaber-bwō:

7 lō’-ḵēn ‘aḇədî mōšeh bəḵāl-bêṯî ne’ĕmān hû’:

8 peh ’el-peh ’ăḏaber-bwō ûmarə’eh wəlō’ ḇəḥîḏōṯ ûṯəmunaṯ yəhwâ yabîṭ ûmadû‘a lō’ yərē’ṯem ləḏabēr bə‘aḇədî ḇəmōšeh:

9 wayyiḥar¹ ’af yəhwâ bām wayyēlaḵə:

10 wəhe‘ānān sār mē‘al hā’ōhel wəhinnēh mirəyām məṣōr^a‘aṯ kaššāleḡ wayyifen ’ahărōn ’el-mirəyām wəhinnēh məṣōrā‘aṯ:

11 wayyō’mer ’ahărōn ’el-mōšeh bî ’ăḏōnî ’al-nā’ ṯāšēṯ ‘ālênû ḥaṭṭā’ṯ ’ăšer nwō’alənû wa’ăšer ḥāṭā’nû:

12 ’al-nā’ ṯəhî kammēṯ ’ăšer bəṣē’ṯwō mēreḥem ’immwō wayyē’āḵēl ḥăṣî ḇəśārwō:

13 wayyiṣə‘aq mōšeh ’el-yəhwâ lē’mōr ’ēl nā’ rəfā’ nā’ lāh: f

14 wayyō’mer yəhwâ ’el-mōšeh wə’āḇîhā yārōq yāraq bəfāneyhā hălō’ ṯikālēm šiḇə‘aṯ yāmîm tissāḡēr šiḇə‘aṯ yāmîm miḥûṣ lamm^aḥăneh wə’^aḥar tē’āsēf:

15 watissāḡēr mirəyām miḥûṣ lamm^aḥăneh šiḇə‘aṯ yāmîm wəhā‘ām lō’ nās^a‘ ‘aḏ-hē’āsēf mirəyām:

16 wə’^aḥar nāsə‘û hā‘ām mēḥăṣērwōṯ wayy^aḥănû bəmiḏəbar pā’rān: f