Numbers (Bemidbar) Chapter 15

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏דַּבֵּר֙ אֶל־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם כִּ֣י תָבֹ֗אוּ אֶל־אֶ֙רֶץ֙ מוֹשְׁבֹ֣תֵיכֶ֔ם אֲשֶׁ֥ר אֲנִ֖י נֹתֵ֥ן לָכֶֽם׃

‎3 ‏וַעֲשִׂיתֶ֨ם אִשֶּׁ֤ה לַֽיהוָה֙ עֹלָ֣ה אוֹ־זֶ֔בַח לְפַלֵּא־נֶ֙דֶר֙ א֣וֹ בִנְדָבָ֔ה א֖וֹ בְּמֹעֲדֵיכֶ֑ם לַעֲשׂ֞וֹת רֵ֤יחַ נִיחֹ֙חַ֙ לַֽיהוָ֔ה מִן־הַבָּקָ֖ר א֥וֹ מִן־הַצֹּֽאן׃

‎4 ‏וְהִקְרִ֛יב הַמַּקְרִ֥יב קָרְבָּנ֖וֹ לַֽיהוָ֑ה מִנְחָה֙ סֹ֣לֶת עִשָּׂר֔וֹן בָּל֕וּל בִּרְבִעִ֥ית הַהִ֖ין שָֽׁמֶן׃

‎5 ‏וְיַ֤יִן לַנֶּ֙סֶךְ֙ רְבִיעִ֣ית הַהִ֔ין תַּעֲשֶׂ֥ה עַל־הָעֹלָ֖ה א֣וֹ לַזָּ֑בַח לַכֶּ֖בֶשׂ הָאֶחָֽד׃

‎6 ‏א֤וֹ לָאַ֙יִל֙ תַּעֲשֶׂ֣ה מִנְחָ֔ה סֹ֖לֶת שְׁנֵ֣י עֶשְׂרֹנִ֑ים בְּלוּלָ֥ה בַשֶּׁ֖מֶן שְׁלִשִׁ֥ית הַהִֽין׃

‎7 ‏וְיַ֥יִן לַנֶּ֖סֶךְ שְׁלִשִׁ֣ית הַהִ֑ין תַּקְרִ֥יב רֵֽיחַ־נִיחֹ֖חַ לַיהוָֽה׃

‎8 ‏וְכִֽי־תַעֲשֶׂ֥ה בֶן־בָּקָ֖ר עֹלָ֣ה אוֹ־זָ֑בַח לְפַלֵּא־נֶ֥דֶר אֽוֹ־שְׁלָמִ֖ים לַֽיהוָֽה׃

‎9 ‏וְהִקְרִ֤יב עַל־בֶּן־הַבָּקָר֙ מִנְחָ֔ה סֹ֖לֶת שְׁלֹשָׁ֣ה עֶשְׂרֹנִ֑ים בָּל֥וּל בַּשֶּׁ֖מֶן חֲצִ֥י הַהִֽין׃

‎10 ‏וְיַ֛יִן תַּקְרִ֥יב לַנֶּ֖סֶךְ חֲצִ֣י הַהִ֑ין אִשֵּׁ֥ה רֵֽיחַ־נִיחֹ֖חַ לַיהוָֽה׃

‎11 ‏כָּ֣כָה יֵעָשֶׂ֗ה לַשּׁוֹר֙ הָֽאֶחָ֔ד א֖וֹ לָאַ֣יִל הָאֶחָ֑ד אֽוֹ־לַשֶּׂ֥ה בַכְּבָשִׂ֖ים א֥וֹ בָעִזִּֽים׃

‎12 ‏כַּמִּסְפָּ֖ר אֲשֶׁ֣ר תַּעֲשׂ֑וּ כָּ֛כָה תַּעֲשׂ֥וּ לָאֶחָ֖ד כְּמִסְפָּרָֽם׃

‎13 ‏כָּל־הָאֶזְרָ֥ח יַעֲשֶׂה־כָּ֖כָה אֶת־אֵ֑לֶּה לְהַקְרִ֛יב אִשֵּׁ֥ה רֵֽיחַ־נִיחֹ֖חַ לַֽיהוָֽה׃

‎14 ‏וְכִֽי־יָגוּר֩ אִתְּכֶ֨ם גֵּ֜ר א֤וֹ אֲשֶֽׁר־בְּתֽוֹכְכֶם֙ לְדֹרֹ֣תֵיכֶ֔ם וְעָשָׂ֛ה אִשֵּׁ֥ה רֵֽיחַ־נִיחֹ֖חַ לַיהוָ֑ה כַּאֲשֶׁ֥ר תַּעֲשׂ֖וּ כֵּ֥ן יַעֲשֶֽׂה׃

‎15 ‏הַקָּהָ֕ל חֻקָּ֥ה אַחַ֛ת לָכֶ֖ם וְלַגֵּ֣ר הַגָּ֑ר חֻקַּ֤ת עוֹלָם֙ לְדֹרֹ֣תֵיכֶ֔ם כָּכֶ֛ם כַּגֵּ֥ר יִהְיֶ֖ה לִפְנֵ֥י יְהוָֽה׃

‎16 ‏תּוֹרָ֥ה אַחַ֛ת וּמִשְׁפָּ֥ט אֶחָ֖ד יִהְיֶ֣ה לָכֶ֑ם וְלַגֵּ֖ר הַגָּ֥ר אִתְּכֶֽם׃ פ

‎17 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎18 ‏דַּבֵּר֙ אֶל־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם בְּבֹֽאֲכֶם֙ אֶל־הָאָ֔רֶץ אֲשֶׁ֥ר אֲנִ֛י מֵבִ֥יא אֶתְכֶ֖ם שָֽׁמָּה׃

‎19 ‏וְהָיָ֕ה בַּאֲכָלְכֶ֖ם מִלֶּ֣חֶם הָאָ֑רֶץ תָּרִ֥ימוּ תְרוּמָ֖ה לַיהוָֽה׃

‎20 ‏רֵאשִׁית֙ עֲרִסֹ֣תֵכֶ֔ם חַלָּ֖ה תָּרִ֣ימוּ תְרוּמָ֑ה כִּתְרוּמַ֣ת גֹּ֔רֶן כֵּ֖ן תָּרִ֥ימוּ אֹתָֽהּ׃

‎21 ‏מֵרֵאשִׁית֙ עֲרִסֹ֣תֵיכֶ֔ם תִּתְּנ֥וּ לַיהוָ֖ה תְּרוּמָ֑ה לְדֹרֹ֖תֵיכֶֽם׃ ס

‎22 ‏וְכִ֣י תִשְׁגּ֔וּ וְלֹ֣א תַעֲשׂ֔וּ אֵ֥ת כָּל־הַמִּצְוֹ֖ת הָאֵ֑לֶּה אֲשֶׁר־דִּבֶּ֥ר יְהוָ֖ה אֶל־מֹשֶֽׁה׃

‎23 ‏אֵת֩ כָּל־אֲשֶׁ֨ר צִוָּ֧ה יְהוָ֛ה אֲלֵיכֶ֖ם בְּיַד־מֹשֶׁ֑ה מִן־הַיּ֞וֹם אֲשֶׁ֨ר צִוָּ֧ה יְהוָ֛ה וָהָ֖לְאָה לְדֹרֹתֵיכֶֽם׃

‎24 ‏וְהָיָ֗ה אִ֣ם מֵעֵינֵ֣י הָעֵדָה֮ נֶעֶשְׂתָ֣ה לִשְׁגָגָה֒ וְעָשׂ֣וּ כָל־הָעֵדָ֡ה פַּ֣ר בֶּן־בָּקָר֩ אֶחָ֨ד לְעֹלָ֜ה לְרֵ֤יחַ נִיחֹ֙חַ֙ לַֽיהוָ֔ה וּמִנְחָת֥וֹ וְנִסְכּ֖וֹ כַּמִּשְׁפָּ֑ט וּשְׂעִיר־עִזִּ֥ים אֶחָ֖ד לְחַטָּֽת׃

‎25 ‏וְכִפֶּ֣ר הַכֹּהֵ֗ן עַֽל־כָּל־עֲדַ֛ת בְּנֵ֥י יִשְׂרָאֵ֖ל וְנִסְלַ֣ח לָהֶ֑ם כִּֽי־שְׁגָגָ֣ה הִ֔וא וְהֵם֩ הֵבִ֨יאוּ אֶת־קָרְבָּנָ֜ם אִשֶּׁ֣ה לַֽיהוָ֗ה וְחַטָּאתָ֛ם לִפְנֵ֥י יְהוָ֖ה עַל־שִׁגְגָתָֽם׃

‎26 ‏וְנִסְלַ֗ח לְכָל־עֲדַת֙ בְּנֵ֣י יִשְׂרָאֵ֔ל וְלַגֵּ֖ר הַגָּ֣ר בְּתוֹכָ֑ם כִּ֥י לְכָל־הָעָ֖ם בִּשְׁגָגָֽה׃ ס

‎27 ‏וְאִם־נֶ֥פֶשׁ אַחַ֖ת תֶּחֱטָ֣א בִשְׁגָגָ֑ה וְהִקְרִ֛יבָה עֵ֥ז בַּת־שְׁנָתָ֖הּ לְחַטָּֽאת׃

‎28 ‏וְכִפֶּ֣ר הַכֹּהֵ֗ן עַל־הַנֶּ֧פֶשׁ הַשֹּׁגֶ֛גֶת בְּחֶטְאָ֥ה בִשְׁגָגָ֖ה לִפְנֵ֣י יְהוָ֑ה לְכַפֵּ֥ר עָלָ֖יו וְנִסְלַ֥ח לֽוֹ׃

‎29 ‏הָֽאֶזְרָח֙ בִּבְנֵ֣י יִשְׂרָאֵ֔ל וְלַגֵּ֖ר הַגָּ֣ר בְּתוֹכָ֑ם תּוֹרָ֤ה אַחַת֙ יִהְיֶ֣ה לָכֶ֔ם לָעֹשֶׂ֖ה בִּשְׁגָגָֽה׃

‎30 ‏וְהַנֶּ֜פֶשׁ אֲשֶֽׁר־תַּעֲשֶׂ֣ה׀ בְּיָ֣ד רָמָ֗ה מִן־הָֽאֶזְרָח֙ וּמִן־הַגֵּ֔ר אֶת־יְהוָ֖ה ה֣וּא מְגַדֵּ֑ף וְנִכְרְתָ֛ה הַנֶּ֥פֶשׁ הַהִ֖וא מִקֶּ֥רֶב עַמָּֽהּ׃

‎31 ‏כִּ֤י דְבַר־יְהוָה֙ בָּזָ֔ה וְאֶת־מִצְוָת֖וֹ הֵפַ֑ר הִכָּרֵ֧ת׀ תִּכָּרֵ֛ת הַנֶּ֥פֶשׁ הַהִ֖וא עֲוֹנָ֥ה בָֽהּ׃ פ

‎32 ‏וַיִּהְי֥וּ בְנֵֽי־יִשְׂרָאֵ֖ל בַּמִּדְבָּ֑ר וַֽיִּמְצְא֗וּ אִ֛ישׁ מְקֹשֵׁ֥שׁ עֵצִ֖ים בְּי֥וֹם הַשַּׁבָּֽת׃

‎33 ‏וַיַּקְרִ֣יבוּ אֹת֔וֹ הַמֹּצְאִ֥ים אֹת֖וֹ מְקֹשֵׁ֣שׁ עֵצִ֑ים אֶל־מֹשֶׁה֙ וְאֶֽל־אַהֲרֹ֔ן וְאֶ֖ל כָּל־הָעֵדָֽה׃

‎34 ‏וַיַּנִּ֥יחוּ אֹת֖וֹ בַּמִּשְׁמָ֑ר כִּ֚י לֹ֣א פֹרַ֔שׁ מַה־יֵּעָשֶׂ֖ה לֽוֹ׃ ס

‎35 ‏וַיֹּ֤אמֶר יְהוָה֙ אֶל־מֹשֶׁ֔ה מ֥וֹת יוּמַ֖ת הָאִ֑ישׁ רָג֨וֹם אֹת֤וֹ בָֽאֲבָנִים֙ כָּל־הָ֣עֵדָ֔ה מִח֖וּץ לַֽמַּחֲנֶֽה׃

‎36 ‏וַיֹּצִ֨יאוּ אֹת֜וֹ כָּל־הָעֵדָ֗ה אֶל־מִחוּץ֙ לַֽמַּחֲנֶ֔ה וַיִּרְגְּמ֥וּ אֹת֛וֹ בָּאֲבָנִ֖ים וַיָּמֹ֑ת כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ פ

‎37 ‏וַיֹּ֥אמֶר יְהוָ֖ה אֶל־מֹשֶׁ֥ה לֵּאמֹֽר׃

‎38 ‏דַּבֵּ֞ר אֶל־בְּנֵ֤י יִשְׂרָאֵל֙ וְאָמַרְתָּ֣ אֲלֵהֶ֔ם וְעָשׂ֨וּ לָהֶ֥ם צִיצִ֛ת עַל־כַּנְפֵ֥י בִגְדֵיהֶ֖ם לְדֹרֹתָ֑ם וְנָ֥תְנ֛וּ³ עַל־צִיצִ֥ת הַכָּנָ֖ף פְּתִ֥יל תְּכֵֽלֶת׃

‎39 ‏וְהָיָ֣ה לָכֶם֮ לְצִיצִת֒ וּרְאִיתֶ֣ם אֹת֗וֹ וּזְכַרְתֶּם֙ אֶת־כָּל־מִצְוֹ֣ת יְהוָ֔ה וַעֲשִׂיתֶ֖ם אֹתָ֑ם וְלֹֽא־תָתֻ֜רוּ אַחֲרֵ֤י לְבַבְכֶם֙ וְאַחֲרֵ֣י עֵֽינֵיכֶ֔ם אֲשֶׁר־אַתֶּ֥ם זֹנִ֖ים אַחֲרֵיהֶֽם׃

‎40 ‏לְמַ֣עַן תִּזְכְּר֔וּ וַעֲשִׂיתֶ֖ם אֶת־כָּל־מִצְוֹתָ֑י וִהְיִיתֶ֥ם קְדֹשִׁ֖ים לֵֽאלֹהֵיכֶֽם׃

‎41 ‏אֲנִ֞י יְהוָ֣ה אֱלֹֽהֵיכֶ֗ם אֲשֶׁ֨ר הוֹצֵ֤אתִי אֶתְכֶם֙ מֵאֶ֣רֶץ מִצְרַ֔יִם לִהְי֥וֹת לָכֶ֖ם לֵאלֹהִ֑ים אֲנִ֖י יְהוָ֥ה אֱלֹהֵיכֶֽם׃ פ

1 wayəḏabēr yəhwâ ’el-mōšeh llē’mōr:

2 dabēr ’el-bənê yiśərā’ēl wə’āmarətā ’ălēhem kî ṯāḇō’û ’el-’ereṣ mwōšəḇōṯêḵem ’ăšer ’ănî nōṯēn lāḵem:

3 w^a‘ăśîṯem ’iššeh layhwâ ‘ōlâ ’wō-zeḇ^aḥ ləfallē’-neḏer ’wō ḇinəḏāḇâ ’wō bəmō‘ăḏêḵem l^a‘ăśwōṯ rêḥa nîḥōḥa layhwâ min-habāqār ’wō min-haṣṣō’n:

4 wəhiqərîḇ hammaqərîḇ qārəbānwō layhwâ minəḥâ sōleṯ ‘iśśārwōn bālûl birəḇi‘îṯ hahîn šāmen:

5 wəyayin lanneseḵə rəḇî‘îṯ hahîn t^a‘ăśeh ‘al-hā‘ōlâ ’wō lazzāḇ^aḥ lakeḇeś hā’eḥāḏ:

6 ’wō lā’ayil t^a‘ăśeh minəḥâ sōleṯ šənê ‘eśərōnîm bəlûlâ ḇaššemen šəlišîṯ hahîn:

7 wəyayin lanneseḵə šəlišîṯ hahîn taqərîḇ rêḥa-nîḥōḥa layhwâ:

8 wəḵî-ṯ^a‘ăśeh ḇen-bāqār ‘ōlâ ’wō-zāḇ^aḥ ləfallē’-neḏer ’wō-šəlāmîm layhwâ:

9 wəhiqərîḇ ‘al-ben-habāqār minəḥâ sōleṯ šəlōšâ ‘eśərōnîm bālûl baššemen ḥăṣî hahîn:

10 wəyayin taqərîḇ lanneseḵə ḥăṣî hahîn ’iššēh rêḥa-nîḥōḥa layhwâ:

11 kāḵâ yē‘āśeh laššwōr hā’eḥāḏ ’wō lā’ayil hā’eḥāḏ ’wō-laśśeh ḇakəḇāśîm ’wō ḇā‘izzîm:

12 kammisəpār ’ăšer t^a‘ăśû kāḵâ t^a‘ăśû lā’eḥāḏ kəmisəpārām:

13 kāl-hā’ezərāḥ y^a‘ăśeh-kāḵâ ’eṯ-’ēlleh ləhaqərîḇ ’iššēh rêḥa-nîḥōḥa layhwâ:

14 wəḵî-yāḡûr ’itəḵem gēr ’wō ’ăšer-bəṯwōḵəḵem ləḏōrōṯêḵem wə‘āśâ ’iššēh rêḥa-nîḥōḥa layhwâ ka’ăšer t^a‘ăśû kēn y^a‘ăśeh:

15 haqqâāl ḥuqqâ ’^aḥaṯ lāḵem wəlagēr hagār ḥuqqaṯ ‘wōlām ləḏōrōṯêḵem kāḵem kagēr yihəyeh lifənê yəhwâ:

16 twōrâ ’^aḥaṯ ûmišəpāṭ ’eḥāḏ yihəyeh lāḵem wəlagēr hagār ’itəḵem: f

17 wayəḏabēr yəhwâ ’el-mōšeh llē’mōr:

18 dabēr ’el-bənê yiśərā’ēl wə’āmarətā ’ălēhem bəḇō’ăḵem ’el-hā’āreṣ ’ăšer ’ănî mēḇî’ ’eṯəḵem šāmmâ:

19 wəhāyâ ba’ăḵāləḵem milleḥem hā’āreṣ tārîmû ṯərûmâ layhwâ:

20 rē’šîṯ ‘ărisōṯēḵem ḥallâ tārîmû ṯərûmâ kiṯərûmaṯ gōren kēn tārîmû ’ōṯāh:

21 mērē’šîṯ ‘ărisōṯêḵem titənû layhwâ tərûmâ ləḏōrōṯêḵem: s

22 wəḵî ṯišəgû wəlō’ ṯ^a‘ăśû ’ēṯ kāl-hammiṣəwōṯ hā’ēlleh ’ăšer-diber yəhwâ ’el-mōšeh:

23 ’ēṯ kāl-’ăšer ṣiûâ yəhwâ ’ălêḵem bəyaḏ-mōšeh min-hayywōm ’ăšer ṣiûâ yəhwâ wâālə’â ləḏōrōṯêḵem:

24 wəhāyâ ’im mē‘ênê hā‘ēḏâ ne‘eśəṯâ lišəḡāḡâ wə‘āśû ḵāl-hā‘ēḏâ par ben-bāqār ’eḥāḏ lə‘ōlâ lərêḥa nîḥōḥa layhwâ ûminəḥāṯwō wənisəkwō kammišəpāṭ ûśə‘îr-‘izzîm ’eḥāḏ ləḥaṭṭāṯ:

25 wəḵiper hakōhēn ‘al-kāl-‘ăḏaṯ bənê yiśərā’ēl wənisəl^aḥ lâem kî-šəḡāḡâ hiw’ wəhēm hēḇî’û ’eṯ-qārəbānām ’iššeh layhwâ wəḥaṭṭā’ṯām lifənê yəhwâ ‘al-šiḡəḡāṯām:

26 wənisəl^aḥ ləḵāl-‘ăḏaṯ bənê yiśərā’ēl wəlagēr hagār bəṯwōḵām kî ləḵāl-hā‘ām bišəḡāḡâ: s

27 wə’im-nefeš ’^aḥaṯ teḥĕṭā’ ḇišəḡāḡâ wəhiqərîḇâ ‘ēz baṯ-šənāṯāh ləḥaṭṭā’ṯ:

28 wəḵiper hakōhēn ‘al-hannefeš haššōḡeḡeṯ bəḥeṭə’â ḇišəḡāḡâ lifənê yəhwâ ləḵapēr ‘ālāyw wənisəl^aḥ lwō:

29 hā’ezərāḥ biḇənê yiśərā’ēl wəlagēr hagār bəṯwōḵām twōrâ ’^aḥaṯ yihəyeh lāḵem lā‘ōśeh bišəḡāḡâ:

30 wəhannefeš ’ăšer-t^a‘ăśeh| bəyāḏ rāmâ min-hā’ezərāḥ ûmin-hagēr ’eṯ-yəhwâ hû’ məḡadēf wəniḵərəṯâ hannefeš hahiw’ miqqereḇ ‘ammāh:

31 kî ḏəḇar-yəhwâ bāzâ wə’eṯ-miṣəwāṯwō hēfar hikārēṯ| tikārēṯ hannefeš hahiw’ ‘ăwōnâ ḇāh: f

32 wayyihəyû ḇənê-yiśərā’ēl bammiḏəbār wayyiməṣə’û ’îš məqōšēš ‘ēṣîm bəywōm haššabāṯ:

33 wayyaqərîḇû ’ōṯwō hammōṣə’îm ’ōṯwō məqōšēš ‘ēṣîm ’el-mōšeh wə’el-’ahărōn wə’el kāl-hā‘ēḏâ:

34 wayyannîḥû ’ōṯwō bammišəmār kî lō’ fōraš mah-yyē‘āśeh lwō: s

35 wayyō’mer yəhwâ ’el-mōšeh mwōṯ yûmaṯ hā’îš rāḡwōm ’ōṯwō ḇā’ăḇānîm kāl-hā‘ēḏâ miḥûṣ lamm^aḥăneh:

36 wayyōṣî’û ’ōṯwō kāl-hā‘ēḏâ ’el-miḥûṣ lamm^aḥăneh wayyirəgəmû ’ōṯwō bā’ăḇānîm wayyāmōṯ ka’ăšer ṣiûâ yəhwâ ’eṯ-mōšeh: f

37 wayyō’mer yəhwâ ’el-mōšeh llē’mōr:

38 dabēr ’el-bənê yiśərā’ēl wə’āmarətā ’ălēhem wə‘āśû lâem ṣîṣiṯ ‘al-kanəfê ḇiḡəḏêhem ləḏōrōṯām wənāṯənû³ ‘al-ṣîṣiṯ hakānāf pəṯîl təḵēleṯ:

39 wəhāyâ lāḵem ləṣîṣiṯ ûrə’îṯem ’ōṯwō ûzəḵarətem ’eṯ-kāl-miṣəwōṯ yəhwâ w^a‘ăśîṯem ’ōṯām wəlō’-ṯāṯurû ’^aḥărê ləḇaḇəḵem wə’^aḥărê ‘ênêḵem ’ăšer-’atem zōnîm ’^aḥărêhem:

40 ləm^a‘an tizəkərû w^a‘ăśîṯem ’eṯ-kāl-miṣəwōṯāy wihəyîṯem qəḏōšîm lē’lōhêḵem:

41 ’ănî yəhwâ ’ĕlōhêḵem ’ăšer hwōṣē’ṯî ’eṯəḵem mē’ereṣ miṣərayim lihəywōṯ lāḵem lē’lōhîm ’ănî yəhwâ ’ĕlōhêḵem: f