Numbers (Bemidbar) Chapter 27

‎1 ‏וַתִּקְרַ֜בְנָה בְּנ֣וֹת צְלָפְחָ֗ד בֶּן־חֵ֤פֶר בֶּן־גִּלְעָד֙ בֶּן־מָכִ֣יר בֶּן־מְנַשֶּׁ֔ה לְמִשְׁפְּחֹ֖ת מְנַשֶּׁ֣ה בֶן־יוֹסֵ֑ף וְאֵ֙לֶּה֙ שְׁמ֣וֹת בְּנֹתָ֔יו מַחְלָ֣ה נֹעָ֔ה וְחָגְלָ֥ה וּמִלְכָּ֖ה וְתִרְצָֽה׃

‎2 ‏וַֽתַּעֲמֹ֜דְנָה לִפְנֵ֣י מֹשֶׁ֗ה וְלִפְנֵי֙ אֶלְעָזָ֣ר הַכֹּהֵ֔ן וְלִפְנֵ֥י הַנְּשִׂיאִ֖ם וְכָל־הָעֵדָ֑ה פֶּ֥תַח אֹֽהֶל־מוֹעֵ֖ד לֵאמֹֽר׃

‎3 ‏אָבִינוּ֮ מֵ֣ת בַּמִּדְבָּר֒ וְה֨וּא לֹא־הָיָ֜ה בְּת֣וֹךְ הָעֵדָ֗ה הַנּוֹעָדִ֛ים עַל־יְהוָ֖ה בַּעֲדַת־קֹ֑רַח כִּֽי־בְחֶטְא֣וֹ מֵ֔ת וּבָנִ֖ים לֹא־הָ֥יוּ לֽוֹ׃

‎4 ‏לָ֣מָּה יִגָּרַ֤ע שֵׁם־אָבִ֙ינוּ֙ מִתּ֣וֹךְ מִשְׁפַּחְתּ֔וֹ כִּ֛י אֵ֥ין ל֖וֹ בֵּ֑ן תְּנָה־לָּ֣נוּ אֲחֻזָּ֔ה בְּת֖וֹךְ אֲחֵ֥י אָבִֽינוּ׃

‎5 ‏וַיַּקְרֵ֥ב מֹשֶׁ֛ה אֶת־מִשְׁפָּטָ֖ן⁵ לִפְנֵ֥י יְהוָֽה׃ ס

‎6 ‏וַיֹּ֥אמֶר יְהוָ֖ה אֶל־מֹשֶׁ֥ה לֵּאמֹֽר׃

‎7 ‏כֵּ֗ן בְּנ֣וֹת צְלָפְחָד֮ דֹּבְרֹת֒ נָתֹ֨ן תִּתֵּ֤ן לָהֶם֙ אֲחֻזַּ֣ת נַחֲלָ֔ה בְּת֖וֹךְ אֲחֵ֣י אֲבִיהֶ֑ם וְהַֽעֲבַרְתָּ֛ אֶת־נַחֲלַ֥ת אֲבִיהֶ֖ן לָהֶֽן׃

‎8 ‏וְאֶל־בְּנֵ֥י יִשְׂרָאֵ֖ל תְּדַבֵּ֣ר לֵאמֹ֑ר אִ֣ישׁ כִּֽי־יָמ֗וּת וּבֵן֙ אֵ֣ין ל֔וֹ וְהַֽעֲבַרְתֶּ֥ם אֶת־נַחֲלָת֖וֹ לְבִתּֽוֹ׃

‎9 ‏וְאִם־אֵ֥ין ל֖וֹ בַּ֑ת וּנְתַתֶּ֥ם אֶת־נַחֲלָת֖וֹ לְאֶחָיו׃¹

‎10 ‏וְאִם־אֵ֥ין ל֖וֹ אַחִ֑ים וּנְתַתֶּ֥ם אֶת־נַחֲלָת֖וֹ לַאֲחֵ֥י אָבִֽיו׃

‎11 ‏וְאִם־אֵ֣ין אַחִים֮ לְאָבִיו֒ וּנְתַתֶּ֣ם אֶת־נַחֲלָת֗וֹ לִשְׁאֵר֞וֹ הַקָּרֹ֥ב אֵלָ֛יו מִמִּשְׁפַּחְתּ֖וֹ וְיָרַ֣שׁ אֹתָ֑הּ וְֽהָ֨יְתָ֜ה לִבְנֵ֤י יִשְׂרָאֵל֙ לְחֻקַּ֣ת מִשְׁפָּ֔ט כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

‎12 ‏וַיֹּ֤אמֶר יְהוָה֙ אֶל־מֹשֶׁ֔ה עֲלֵ֛ה אֶל־הַ֥ר הָעֲבָרִ֖ים הַזֶּ֑ה וּרְאֵה֙ אֶת־הָאָ֔רֶץ אֲשֶׁ֥ר נָתַ֖תִּי לִבְנֵ֥י יִשְׂרָאֵֽל׃

‎13 ‏וְרָאִ֣יתָה אֹתָ֔הּ וְנֶאֱסַפְתָּ֥ אֶל־עַמֶּ֖יךָ גַּם־אָ֑תָּה כַּאֲשֶׁ֥ר נֶאֱסַ֖ף אַהֲרֹ֥ן אָחִֽיךָ׃

‎14 ‏כַּאֲשֶׁר֩ מְרִיתֶ֨ם פִּ֜י בְּמִדְבַּר־צִ֗ן בִּמְרִיבַת֙ הָֽעֵדָ֔ה לְהַקְדִּישֵׁ֥נִי בַמַּ֖יִם לְעֵינֵיהֶ֑ם הֵ֛ם מֵֽי־מְרִיבַ֥ת קָדֵ֖שׁ מִדְבַּר־צִֽן׃ פ

‎15 ‏וַיְדַבֵּ֣ר מֹשֶׁ֔ה אֶל־יְהוָ֖ה לֵאמֹֽר׃

‎16 ‏יִפְקֹ֣ד יְהוָ֔ה אֱלֹהֵ֥י הָרוּחֹ֖ת לְכָל־בָּשָׂ֑ר אִ֖ישׁ עַל־הָעֵדָֽה׃

‎17 ‏אֲשֶׁר־יֵצֵ֣א לִפְנֵיהֶ֗ם וַאֲשֶׁ֤ר יָבֹא֙ לִפְנֵיהֶ֔ם וַאֲשֶׁ֥ר יוֹצִיאֵ֖ם וַאֲשֶׁ֣ר יְבִיאֵ֑ם וְלֹ֤א תִהְיֶה֙ עֲדַ֣ת יְהוָ֔ה כַּצֹּ֕אן אֲשֶׁ֥ר אֵין־לָהֶ֖ם רֹעֶֽה׃

‎18 ‏וַיֹּ֨אמֶר יְהוָ֜ה אֶל־מֹשֶׁ֗ה קַח־לְךָ֙ אֶת־יְהוֹשֻׁ֣עַ בִּן־נ֔וּן אִ֖ישׁ אֲשֶׁר־ר֣וּחַ בּ֑וֹ וְסָמַכְתָּ֥ אֶת־יָדְךָ֖ עָלָֽיו׃

‎19 ‏וְהַֽעֲמַדְתָּ֣ אֹת֗וֹ לִפְנֵי֙ אֶלְעָזָ֣ר הַכֹּהֵ֔ן וְלִפְנֵ֖י כָּל־הָעֵדָ֑ה וְצִוִּיתָ֥ה אֹת֖וֹ לְעֵינֵיהֶֽם׃

‎20 ‏וְנָתַתָּ֥ה מֵהֽוֹדְךָ֖ עָלָ֑יו לְמַ֣עַן יִשְׁמְע֔וּ כָּל־עֲדַ֖ת בְּנֵ֥י יִשְׂרָאֵֽל׃

‎21 ‏וְלִפְנֵ֨י אֶלְעָזָ֤ר הַכֹּהֵן֙ יַעֲמֹ֔ד וְשָׁ֥אַל ל֛וֹ בְּמִשְׁפַּ֥ט הָאוּרִ֖ים לִפְנֵ֣י יְהוָ֑ה עַל־פִּ֨יו יֵצְא֜וּ וְעַל־פִּ֣יו יָבֹ֗אוּ ה֛וּא וְכָל־בְּנֵי־יִשְׂרָאֵ֥ל אִתּ֖וֹ וְכָל־הָעֵדָֽה׃

‎22 ‏וַיַּ֣עַשׂ מֹשֶׁ֔ה כַּאֲשֶׁ֛ר צִוָּ֥ה יְהוָ֖ה אֹת֑וֹ וַיִּקַּ֣ח אֶת־יְהוֹשֻׁ֗עַ וַיַּֽעֲמִדֵ֙הוּ֙ לִפְנֵי֙ אֶלְעָזָ֣ר הַכֹּהֵ֔ן וְלִפְנֵ֖י כָּל־הָעֵדָֽה׃

‎23 ‏וַיִּסְמֹ֧ךְ אֶת־יָדָ֛יו עָלָ֖יו וַיְצַוֵּ֑הוּ כַּאֲשֶׁ֛ר דִּבֶּ֥ר יְהוָ֖ה בְּיַד־מֹשֶֽׁה׃ פ

1 watiqəraḇənâ bənwōṯ ṣəlāfəḥāḏ ben-ḥēfer ben-gilə‘āḏ ben-māḵîr ben-mənaššeh ləmišəpəḥōṯ mənaššeh ḇen-ywōsēf wə’ēlleh šəmwōṯ bənōṯāyw m^aḥəlâ nō‘â wəḥāḡəlâ ûmiləkâ wəṯirəṣâ:

2 wat^a‘ămōḏənâ lifənê mōšeh wəlifənê ’elə‘āzār hakōhēn wəlifənê hannəśî’im wəḵāl-hā‘ēḏâ peṯ^aḥ ’ōhel-mwō‘ēḏ lē’mōr:

3 ’āḇînû mēṯ bammiḏəbār wəhû’ lō’-hāyâ bəṯwōḵə hā‘ēḏâ hannwō‘āḏîm ‘al-yəhwâ b^a‘ăḏaṯ-qōr^aḥ kî-ḇəḥeṭə’wō mēṯ ûḇānîm lō’-hāyû lwō:

4 lāmmâ yigār^a‘ šēm-’āḇînû mitwōḵə mišəp^aḥətwō kî ’ên lwō bēn tənâ-llānû ’ăḥuzzâ bəṯwōḵə ’ăḥê ’āḇînû:

5 wayyaqərēḇ mōšeh ’eṯ-mišəpāṭān⁵ lifənê yəhwâ: s

6 wayyō’mer yəhwâ ’el-mōšeh llē’mōr:

7 kēn bənwōṯ ṣəlāfəḥāḏ dōḇərōṯ nāṯōn titēn lâem ’ăḥuzzaṯ n^aḥălâ bəṯwōḵə ’ăḥê ’ăḇîhem wəh^a‘ăḇarətā ’eṯ-n^aḥălaṯ ’ăḇîhen lâen:

8 wə’el-bənê yiśərā’ēl təḏabēr lē’mōr ’îš kî-yāmûṯ ûḇēn ’ên lwō wəh^a‘ăḇarətem ’eṯ-n^aḥălāṯwō ləḇitwō:

9 wə’im-’ên lwō baṯ ûnəṯatem ’eṯ-n^aḥălāṯwō lə’eḥāyw:¹

10 wə’im-’ên lwō ’^aḥîm ûnəṯatem ’eṯ-n^aḥălāṯwō la’ăḥê ’āḇîw:

11 wə’im-’ên ’^aḥîm lə’āḇîw ûnəṯatem ’eṯ-n^aḥălāṯwō lišə’ērwō haqqārōḇ ’ēlāyw mimmišəp^aḥətwō wəyāraš ’ōṯāh wəhāyəṯâ liḇənê yiśərā’ēl ləḥuqqaṯ mišəpāṭ ka’ăšer ṣiûâ yəhwâ ’eṯ-mōšeh: s

12 wayyō’mer yəhwâ ’el-mōšeh ‘ălēh ’el-har hā‘ăḇārîm hazzeh ûrə’ēh ’eṯ-hā’āreṣ ’ăšer nāṯatî liḇənê yiśərā’ēl:

13 wərā’îṯâ ’ōṯāh wəne’ĕsafətā ’el-‘ammeyḵā gam-’ātâ ka’ăšer ne’ĕsaf ’ahărōn ’āḥîḵā:

14 ka’ăšer mərîṯem pî bəmiḏəbar-ṣin bimərîḇaṯ hā‘ēḏâ ləhaqədîšēnî ḇammayim lə‘ênêhem hēm mê-mərîḇaṯ qāḏēš miḏəbar-ṣin: f

15 wayəḏabēr mōšeh ’el-yəhwâ lē’mōr:

16 yifəqōḏ yəhwâ ’ĕlōhê hārûḥōṯ ləḵāl-bāśār ’îš ‘al-hā‘ēḏâ:

17 ’ăšer-yēṣē’ lifənêhem wa’ăšer yāḇō’ lifənêhem wa’ăšer ywōṣî’ēm wa’ăšer yəḇî’ēm wəlō’ ṯihəyeh ‘ăḏaṯ yəhwâ kaṣṣō’n ’ăšer ’ên-lâem rō‘eh:

18 wayyō’mer yəhwâ ’el-mōšeh q^aḥ-ləḵā ’eṯ-yəhwōšu‘a bin-nûn ’îš ’ăšer-rûḥa bwō wəsāmaḵətā ’eṯ-yāḏəḵā ‘ālāyw:

19 wəh^a‘ămaḏətā ’ōṯwō lifənê ’elə‘āzār hakōhēn wəlifənê kāl-hā‘ēḏâ wəṣiûîṯâ ’ōṯwō lə‘ênêhem:

20 wənāṯatâ mēhwōḏəḵā ‘ālāyw ləm^a‘an yišəmə‘û kāl-‘ăḏaṯ bənê yiśərā’ēl:

21 wəlifənê ’elə‘āzār hakōhēn y^a‘ămōḏ wəšā’al lwō bəmišəpaṭ hā’ûrîm lifənê yəhwâ ‘al-pîw yēṣə’û wə‘al-pîw yāḇō’û hû’ wəḵāl-bənê-yiśərā’ēl ’itwō wəḵāl-hā‘ēḏâ:

22 wayy^a‘aś mōšeh ka’ăšer ṣiûâ yəhwâ ’ōṯwō wayyiqq^aḥ ’eṯ-yəhwōšu‘a wayy^a‘ămiḏēhû lifənê ’elə‘āzār hakōhēn wəlifənê kāl-hā‘ēḏâ:

23 wayyisəmōḵə ’eṯ-yāḏāyw ‘ālāyw wayəṣaûēhû ka’ăšer diber yəhwâ bəyaḏ-mōšeh: f