Numbers (Bemidbar) Chapter 28

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏צַ֚ו אֶת־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם אֶת־קָרְבָּנִ֨י לַחְמִ֜י לְאִשַּׁ֗י רֵ֚יחַ נִֽיחֹחִ֔י תִּשְׁמְר֕וּ לְהַקְרִ֥יב לִ֖י בְּמוֹעֲדֽוֹ׃

‎3 ‏וְאָמַרְתָּ֣ לָהֶ֔ם זֶ֚ה הָֽאִשֶּׁ֔ה אֲשֶׁ֥ר תַּקְרִ֖יבוּ לַיהוָ֑ה כְּבָשִׂ֨ים בְּנֵֽי־שָׁנָ֧ה תְמִימִ֛ם שְׁנַ֥יִם לַיּ֖וֹם עֹלָ֥ה תָמִֽיד׃

‎4 ‏אֶת־הַכֶּ֥בֶשׂ אֶחָ֖ד תַּעֲשֶׂ֣ה בַבֹּ֑קֶר וְאֵת֙ הַכֶּ֣בֶשׂ הַשֵּׁנִ֔י תַּעֲשֶׂ֖ה בֵּ֥ין הָֽעַרְבָּֽיִם׃

‎5 ‏וַעֲשִׂירִ֧ית הָאֵיפָ֛ה סֹ֖לֶת לְמִנְחָ֑ה בְּלוּלָ֛ה בְּשֶׁ֥מֶן כָּתִ֖ית רְבִיעִ֥ת הַהִֽין׃

‎6 ‏עֹלַ֖ת תָּמִ֑יד הָעֲשֻׂיָה֙ בְּהַ֣ר סִינַ֔י לְרֵ֣יחַ נִיחֹ֔חַ אִשֶּׁ֖ה לַֽיהוָֽה׃

‎7 ‏וְנִסְכּוֹ֙ רְבִיעִ֣ת הַהִ֔ין לַכֶּ֖בֶשׂ הָאֶחָ֑ד בַּקֹּ֗דֶשׁ הַסֵּ֛ךְ נֶ֥סֶךְ שֵׁכָ֖ר לַיהוָֽה׃

‎8 ‏וְאֵת֙ הַכֶּ֣בֶשׂ הַשֵּׁנִ֔י תַּעֲשֶׂ֖ה בֵּ֣ין הָֽעַרְבָּ֑יִם כְּמִנְחַ֨ת הַבֹּ֤קֶר וּכְנִסְכּוֹ֙ תַּעֲשֶׂ֔ה אִשֵּׁ֛ה רֵ֥יחַ נִיחֹ֖חַ לַיהוָֽה׃ פ

‎9 ‏וּבְיוֹם֙ הַשַּׁבָּ֔ת שְׁנֵֽי־כְבָשִׂ֥ים בְּנֵֽי־שָׁנָ֖ה תְּמִימִ֑ם וּשְׁנֵ֣י עֶשְׂרֹנִ֗ים סֹ֧לֶת מִנְחָ֛ה בְּלוּלָ֥ה בַשֶּׁ֖מֶן וְנִסְכּֽוֹ׃

‎10 ‏עֹלַ֥ת שַׁבַּ֖ת בְּשַׁבַּתּ֑וֹ עַל־עֹלַ֥ת הַתָּמִ֖יד וְנִסְכָּֽהּ׃ ס

‎11 ‏וּבְרָאשֵׁי֙ חָדְשֵׁיכֶ֔ם תַּקְרִ֥יבוּ עֹלָ֖ה לַיהוָ֑ה פָּרִ֨ים בְּנֵֽי־בָקָ֤ר שְׁנַ֙יִם֙ וְאַ֣יִל אֶחָ֔ד כְּבָשִׂ֧ים בְּנֵי־שָׁנָ֛ה שִׁבְעָ֖ה תְּמִימִֽם׃

‎12 ‏וּשְׁלֹשָׁ֣ה עֶשְׂרֹנִ֗ים סֹ֤לֶת מִנְחָה֙ בְּלוּלָ֣ה בַשֶּׁ֔מֶן לַפָּ֖ר הָאֶחָ֑ד וּשְׁנֵ֣י עֶשְׂרֹנִ֗ים סֹ֤לֶת מִנְחָה֙ בְּלוּלָ֣ה בַשֶּׁ֔מֶן לָאַ֖יִל הָֽאֶחָֽד׃

‎13 ‏וְעִשָּׂרֹ֣ן עִשָּׂר֗וֹן סֹ֤לֶת מִנְחָה֙ בְּלוּלָ֣ה בַשֶּׁ֔מֶן לַכֶּ֖בֶשׂ הָאֶחָ֑ד עֹלָה֙ רֵ֣יחַ נִיחֹ֔חַ אִשֶּׁ֖ה לַיהוָֽה׃

‎14 ‏וְנִסְכֵּיהֶ֗ם חֲצִ֣י הַהִין֩ יִהְיֶ֨ה לַפָּ֜ר וּשְׁלִישִׁ֧ת הַהִ֣ין לָאַ֗יִל וּרְבִיעִ֥ת הַהִ֛ין לַכֶּ֖בֶשׂ יָ֑יִן זֹ֣את עֹלַ֥ת חֹ֙דֶשׁ֙ בְּחָדְשׁ֔וֹ לְחָדְשֵׁ֖י הַשָּׁנָֽה׃

‎15 ‏וּשְׂעִ֨יר עִזִּ֥ים אֶחָ֛ד לְחַטָּ֖את לַיהוָ֑ה עַל־עֹלַ֧ת הַתָּמִ֛יד יֵעָשֶׂ֖ה וְנִסְכּֽוֹ׃ ס

‎16 ‏וּבַחֹ֣דֶשׁ הָרִאשׁ֗וֹן בְּאַרְבָּעָ֥ה עָשָׂ֛ר י֖וֹם לַחֹ֑דֶשׁ פֶּ֖סַח לַיהוָֽה׃

‎17 ‏וּבַחֲמִשָּׁ֨ה עָשָׂ֥ר י֛וֹם לַחֹ֥דֶשׁ הַזֶּ֖ה חָ֑ג שִׁבְעַ֣ת יָמִ֔ים מַצּ֖וֹת יֵאָכֵֽל׃

‎18 ‏בַּיּ֥וֹם הָרִאשׁ֖וֹן מִקְרָא־קֹ֑דֶשׁ כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃

‎19 ‏וְהִקְרַבְתֶּ֨ם אִשֶּׁ֤ה עֹלָה֙ לַֽיהוָ֔ה פָּרִ֧ים בְּנֵי־בָקָ֛ר שְׁנַ֖יִם וְאַ֣יִל אֶחָ֑ד וְשִׁבְעָ֤ה כְבָשִׂים֙ בְּנֵ֣י שָׁנָ֔ה תְּמִימִ֖ם יִהְי֥וּ לָכֶֽם׃

‎20 ‏וּמִ֨נְחָתָ֔ם סֹ֖לֶת בְּלוּלָ֣ה בַשָּׁ֑מֶן שְׁלֹשָׁ֨ה עֶשְׂרֹנִ֜ים לַפָּ֗ר וּשְׁנֵ֧י עֶשְׂרֹנִ֛ים לָאַ֖יִל תַּעֲשֽׂוּ׃

‎21 ‏עִשָּׂר֤וֹן עִשָּׂרוֹן֙ תַּעֲשֶׂ֔ה לַכֶּ֖בֶשׂ הָאֶחָ֑ד לְשִׁבְעַ֖ת הַכְּבָשִֽׂים׃

‎22 ‏וּשְׂעִ֥יר חַטָּ֖את אֶחָ֑ד לְכַפֵּ֖ר עֲלֵיכֶֽם׃

‎23 ‏מִלְּבַד֙ עֹלַ֣ת הַבֹּ֔קֶר אֲשֶׁ֖ר לְעֹלַ֣ת הַתָּמִ֑יד תַּעֲשׂ֖וּ אֶת־אֵֽלֶּה׃

‎24 ‏כָּאֵ֜לֶּה תַּעֲשׂ֤וּ לַיּוֹם֙ שִׁבְעַ֣ת יָמִ֔ים לֶ֛חֶם אִשֵּׁ֥ה רֵֽיחַ־נִיחֹ֖חַ לַיהוָ֑ה עַל־עוֹלַ֧ת הַתָּמִ֛יד יֵעָשֶׂ֖ה וְנִסְכּֽוֹ׃

‎25 ‏וּבַיּוֹם֙ הַשְּׁבִיעִ֔י מִקְרָא־קֹ֖דֶשׁ יִהְיֶ֣ה לָכֶ֑ם כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃ ס

‎26 ‏וּבְי֣וֹם הַבִּכּוּרִ֗ים בְּהַקְרִ֨יבְכֶ֜ם מִנְחָ֤ה חֲדָשָׁה֙ לַֽיהוָ֔ה בְּשָׁבֻעֹ֖תֵיכֶ֑ם מִֽקְרָא־קֹ֙דֶשׁ֙ יִהְיֶ֣ה לָכֶ֔ם כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃

‎27 ‏וְהִקְרַבְתֶּ֨ם עוֹלָ֜ה לְרֵ֤יחַ נִיחֹ֙חַ֙ לַֽיהוָ֔ה פָּרִ֧ים בְּנֵי־בָקָ֛ר שְׁנַ֖יִם אַ֣יִל אֶחָ֑ד שִׁבְעָ֥ה כְבָשִׂ֖ים בְּנֵ֥י שָׁנָֽה׃

‎28 ‏וּמִנְחָתָ֔ם סֹ֖לֶת בְּלוּלָ֣ה בַשָּׁ֑מֶן שְׁלֹשָׁ֤ה עֶשְׂרֹנִים֙ לַפָּ֣ר הָֽאֶחָ֔ד שְׁנֵי֙ עֶשְׂרֹנִ֔ים לָאַ֖יִל הָאֶחָֽד׃

‎29 ‏עִשָּׂרוֹן֙ עִשָּׂר֔וֹן לַכֶּ֖בֶשׂ הָאֶחָ֑ד לְשִׁבְעַ֖ת הַכְּבָשִֽׂים׃

‎30 ‏שְׂעִ֥יר עִזִּ֖ים אֶחָ֑ד לְכַפֵּ֖ר עֲלֵיכֶֽם׃

‎31 ‏מִלְּבַ֞ד עֹלַ֧ת הַתָּמִ֛יד וּמִנְחָת֖וֹ תַּעֲשׂ֑וּ תְּמִימִ֥ם יִהְיוּ־לָכֶ֖ם וְנִסְכֵּיהֶֽם׃ פ

1 wayəḏabēr yəhwâ ’el-mōšeh llē’mōr:

2 ṣaw ’eṯ-bənê yiśərā’ēl wə’āmarətā ’ălēhem ’eṯ-qārəbānî l^aḥəmî lə’iššay rêḥa nîḥōḥî tišəmərû ləhaqərîḇ lî bəmwō‘ăḏwō:

3 wə’āmarətā lâem zeh hā’iššeh ’ăšer taqərîḇû layhwâ kəḇāśîm bənê-šānâ ṯəmîmim šənayim layywōm ‘ōlâ ṯāmîḏ:

4 ’eṯ-hakeḇeś ’eḥāḏ t^a‘ăśeh ḇabōqer wə’ēṯ hakeḇeś haššēnî t^a‘ăśeh bên hā‘arəbāyim:

5 w^a‘ăśîrîṯ hā’êfâ sōleṯ ləminəḥâ bəlûlâ bəšemen kāṯîṯ rəḇî‘iṯ hahîn:

6 ‘ōlaṯ tāmîḏ hā‘ăśuyâ bəhar sînay lərêḥa nîḥōḥa ’iššeh layhwâ:

7 wənisəkwō rəḇî‘iṯ hahîn lakeḇeś hā’eḥāḏ baqqōḏeš hassēḵə neseḵə šēḵār layhwâ:

8 wə’ēṯ hakeḇeś haššēnî t^a‘ăśeh bên hā‘arəbāyim kəminəḥaṯ habōqer ûḵənisəkwō t^a‘ăśeh ’iššēh rêḥa nîḥōḥa layhwâ: f

9 ûḇəywōm haššabāṯ šənê-ḵəḇāśîm bənê-šānâ təmîmim ûšənê ‘eśərōnîm sōleṯ minəḥâ bəlûlâ ḇaššemen wənisəkwō:

10 ‘ōlaṯ šabaṯ bəšabatwō ‘al-‘ōlaṯ hatāmîḏ wənisəkāh: s

11 ûḇərā’šê ḥāḏəšêḵem taqərîḇû ‘ōlâ layhwâ pārîm bənê-ḇāqār šənayim wə’ayil ’eḥāḏ kəḇāśîm bənê-šānâ šiḇə‘â təmîmim:

12 ûšəlōšâ ‘eśərōnîm sōleṯ minəḥâ bəlûlâ ḇaššemen lapār hā’eḥāḏ ûšənê ‘eśərōnîm sōleṯ minəḥâ bəlûlâ ḇaššemen lā’ayil hā’eḥāḏ:

13 wə‘iśśārōn ‘iśśārwōn sōleṯ minəḥâ bəlûlâ ḇaššemen lakeḇeś hā’eḥāḏ ‘ōlâ rêḥa nîḥōḥa ’iššeh layhwâ:

14 wənisəkêhem ḥăṣî hahîn yihəyeh lapār ûšəlîšiṯ hahîn lā’ayil ûrəḇî‘iṯ hahîn lakeḇeś yāyin zō’ṯ ‘ōlaṯ ḥōḏeš bəḥāḏəšwō ləḥāḏəšê haššānâ:

15 ûśə‘îr ‘izzîm ’eḥāḏ ləḥaṭṭā’ṯ layhwâ ‘al-‘ōlaṯ hatāmîḏ yē‘āśeh wənisəkwō: s

16 ûḇ^aḥōḏeš hāri’šwōn bə’arəbā‘â ‘āśār ywōm l^aḥōḏeš pes^aḥ layhwâ:

17 ûḇ^aḥămiššâ ‘āśār ywōm l^aḥōḏeš hazzeh ḥāḡ šiḇə‘aṯ yāmîm maṣṣwōṯ yē’āḵēl:

18 bayywōm hāri’šwōn miqərā’-qōḏeš kāl-məle’ḵeṯ ‘ăḇōḏâ lō’ ṯ^a‘ăśû:

19 wəhiqəraḇətem ’iššeh ‘ōlâ layhwâ pārîm bənê-ḇāqār šənayim wə’ayil ’eḥāḏ wəšiḇə‘â ḵəḇāśîm bənê šānâ təmîmim yihəyû lāḵem:

20 ûminəḥāṯām sōleṯ bəlûlâ ḇaššāmen šəlōšâ ‘eśərōnîm lapār ûšənê ‘eśərōnîm lā’ayil t^a‘ăśû:

21 ‘iśśārwōn ‘iśśārwōn t^a‘ăśeh lakeḇeś hā’eḥāḏ ləšiḇə‘aṯ hakəḇāśîm:

22 ûśə‘îr ḥaṭṭā’ṯ ’eḥāḏ ləḵapēr ‘ălêḵem:

23 milləḇaḏ ‘ōlaṯ habōqer ’ăšer lə‘ōlaṯ hatāmîḏ t^a‘ăśû ’eṯ-’ēlleh:

24 kā’ēlleh t^a‘ăśû layywōm šiḇə‘aṯ yāmîm leḥem ’iššēh rêḥa-nîḥōḥa layhwâ ‘al-‘wōlaṯ hatāmîḏ yē‘āśeh wənisəkwō:

25 ûḇayywōm haššəḇî‘î miqərā’-qōḏeš yihəyeh lāḵem kāl-məle’ḵeṯ ‘ăḇōḏâ lō’ ṯ^a‘ăśû: s

26 ûḇəywōm habikûrîm bəhaqərîḇəḵem minəḥâ ḥăḏāšâ layhwâ bəšāḇu‘ōṯêḵem miqərā’-qōḏeš yihəyeh lāḵem kāl-məle’ḵeṯ ‘ăḇōḏâ lō’ ṯ^a‘ăśû:

27 wəhiqəraḇətem ‘wōlâ lərêḥa nîḥōḥa layhwâ pārîm bənê-ḇāqār šənayim ’ayil ’eḥāḏ šiḇə‘â ḵəḇāśîm bənê šānâ:

28 ûminəḥāṯām sōleṯ bəlûlâ ḇaššāmen šəlōšâ ‘eśərōnîm lapār hā’eḥāḏ šənê ‘eśərōnîm lā’ayil hā’eḥāḏ:

29 ‘iśśārwōn ‘iśśārwōn lakeḇeś hā’eḥāḏ ləšiḇə‘aṯ hakəḇāśîm:

30 śə‘îr ‘izzîm ’eḥāḏ ləḵapēr ‘ălêḵem:

31 milləḇaḏ ‘ōlaṯ hatāmîḏ ûminəḥāṯwō t^a‘ăśû təmîmim yihəyû-lāḵem wənisəkêhem: f