Numbers (Bemidbar) Chapter 35

‎1 ‏וַיְדַבֵּ֧ר יְהוָ֛ה אֶל־מֹשֶׁ֖ה בְּעַֽרְבֹ֣ת מוֹאָ֑ב עַל־יַרְדֵּ֥ן יְרֵח֖וֹ לֵאמֹֽר׃

‎2 ‏צַו֮ אֶת־בְּנֵ֣י יִשְׂרָאֵל֒ וְנָתְנ֣וּ לַלְוִיִּ֗ם מִֽנַּחֲלַ֛ת אֲחֻזָּתָ֖ם עָרִ֣ים לָשָׁ֑בֶת וּמִגְרָ֗שׁ לֶֽעָרִים֙ סְבִיבֹ֣תֵיהֶ֔ם תִּתְּנ֖וּ לַלְוִיִּֽם׃

‎3 ‏וְהָי֧וּ הֶֽעָרִ֛ים לָהֶ֖ם לָשָׁ֑בֶת וּמִגְרְשֵׁיהֶ֗ם יִהְי֤וּ לִבְהֶמְתָּם֙ וְלִרְכֻשָׁ֔ם וּלְכֹ֖ל חַיָּתָֽם׃

‎4 ‏וּמִגְרְשֵׁי֙ הֶֽעָרִ֔ים אֲשֶׁ֥ר תִּתְּנ֖וּ לַלְוִיִּ֑ם מִקִּ֤יר הָעִיר֙ וָח֔וּצָה אֶ֥לֶף אַמָּ֖ה סָבִֽיב׃

‎5 ‏וּמַדֹּתֶ֞ם מִח֣וּץ לָעִ֗יר אֶת־פְּאַת־קֵ֣דְמָה אַלְפַּ֪יִם בָּֽאַמָּ֟ה וְאֶת־פְּאַת־נֶגֶב֩ אַלְפַּ֨יִם בָּאַמָּ֜ה וְאֶת־פְּאַת־יָ֣ם׀ אַלְפַּ֣יִם בָּֽאַמָּ֗ה וְאֵ֨ת פְּאַ֥ת צָפ֛וֹן אַלְפַּ֥יִם בָּאַמָּ֖ה וְהָעִ֣יר בַּתָּ֑וֶךְ זֶ֚ה יִהְיֶ֣ה לָהֶ֔ם מִגְרְשֵׁ֖י הֶעָרִֽים׃

‎6 ‏וְאֵ֣ת הֶֽעָרִ֗ים אֲשֶׁ֤ר תִּתְּנוּ֙ לַלְוִיִּ֔ם אֵ֚ת שֵׁשׁ־עָרֵ֣י הַמִּקְלָ֔ט אֲשֶׁ֣ר תִּתְּנ֔וּ לָנֻ֥ס שָׁ֖מָּה הָרֹצֵ֑חַ וַעֲלֵיהֶ֣ם תִּתְּנ֔וּ אַרְבָּעִ֥ים וּשְׁתַּ֖יִם עִֽיר׃

‎7 ‏כָּל־הֶעָרִ֗ים אֲשֶׁ֤ר תִּתְּנוּ֙ לַלְוִיִּ֔ם אַרְבָּעִ֥ים וּשְׁמֹנֶ֖ה עִ֑יר אֶתְהֶ֖ן וְאֶת־מִגְרְשֵׁיהֶֽן׃

‎8 ‏וְהֶֽעָרִ֗ים אֲשֶׁ֤ר תִּתְּנוּ֙ מֵאֲחֻזַּ֣ת בְּנֵי־יִשְׂרָאֵ֔ל מֵאֵ֤ת הָרַב֙ תַּרְבּ֔וּ וּמֵאֵ֥ת הַמְעַ֖ט תַּמְעִ֑יטוּ אִ֗ישׁ כְּפִ֤י נַחֲלָתוֹ֙ אֲשֶׁ֣ר יִנְחָ֔לוּ יִתֵּ֥ן מֵעָרָ֖יו לַלְוִיִּֽם׃ פ

‎9 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎10 ‏דַּבֵּר֙ אֶל־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם כִּ֥י אַתֶּ֛ם עֹבְרִ֥ים אֶת־הַיַּרְדֵּ֖ן אַ֥רְצָה כְּנָֽעַן׃

‎11 ‏וְהִקְרִיתֶ֤ם לָכֶם֙ עָרִ֔ים עָרֵ֥י מִקְלָ֖ט תִּהְיֶ֣ינָה לָכֶ֑ם וְנָ֥ס שָׁ֙מָּה֙ רֹצֵ֔חַ מַכֵּה־נֶ֖פֶשׁ בִּשְׁגָגָֽה׃

‎12 ‏וְהָי֨וּ לָכֶ֧ם הֶעָרִ֛ים לְמִקְלָ֖ט מִגֹּאֵ֑ל וְלֹ֤א יָמוּת֙ הָרֹצֵ֔חַ עַד־עָמְד֛וֹ לִפְנֵ֥י הָעֵדָ֖ה לַמִּשְׁפָּֽט׃

‎13 ‏וְהֶעָרִ֖ים אֲשֶׁ֣ר תִּתֵּ֑נוּ שֵׁשׁ־עָרֵ֥י מִקְלָ֖ט תִּהְיֶ֥ינָה לָכֶֽם׃

‎14 ‏אֵ֣ת׀ שְׁלֹ֣שׁ הֶעָרִ֗ים תִּתְּנוּ֙ מֵעֵ֣בֶר לַיַּרְדֵּ֔ן וְאֵת֙ שְׁלֹ֣שׁ הֶֽעָרִ֔ים תִּתְּנ֖וּ בְּאֶ֣רֶץ כְּנָ֑עַן עָרֵ֥י מִקְלָ֖ט תִּהְיֶֽינָה׃

‎15 ‏לִבְנֵ֣י יִשְׂרָאֵ֗ל וְלַגֵּ֤ר וְלַתּוֹשָׁב֙ בְּתוֹכָ֔ם תִּהְיֶ֛ינָה שֵׁשׁ־הֶעָרִ֥ים הָאֵ֖לֶּה לְמִקְלָ֑ט לָנ֣וּס שָׁ֔מָּה כָּל־מַכֵּה־נֶ֖פֶשׁ בִּשְׁגָגָֽה׃

‎16 ‏וְאִם־בִּכְלִ֨י בַרְזֶ֧ל׀ הִכָּ֛הוּ וַיָּמֹ֖ת רֹצֵ֣חַֽ ה֑וּא מ֥וֹת יוּמַ֖ת הָרֹצֵֽחַ׃

‎17 ‏וְאִ֡ם בְּאֶ֣בֶן יָד֩ אֲשֶׁר־יָמ֨וּת בָּ֥הּ הִכָּ֛הוּ וַיָּמֹ֖ת רֹצֵ֣חַֽ ה֑וּא מ֥וֹת יוּמַ֖ת הָרֹצֵֽחַ׃

‎18 ‏א֡וֹ בִּכְלִ֣י עֵֽץ־יָד֩ אֲשֶׁר־יָמ֨וּת בּ֥וֹ הִכָּ֛הוּ וַיָּמֹ֖ת רֹצֵ֣חַֽ ה֑וּא מ֥וֹת יוּמַ֖ת הָרֹצֵֽחַ׃

‎19 ‏גֹּאֵ֣ל הַדָּ֔ם ה֥וּא יָמִ֖ית אֶת־הָרֹצֵ֑חַ בְּפִגְעוֹ־ב֖וֹ ה֥וּא יְמִיתֶֽנּוּ׃

‎20 ‏וְאִם־בְּשִׂנְאָ֖ה יֶהְדָּפֶ֑נּוּ אֽוֹ־הִשְׁלִ֥יךְ עָלָ֛יו בִּצְדִיָּ֖ה וַיָּמֹֽת׃

‎21 ‏א֣וֹ בְאֵיבָ֞ה הִכָּ֤הוּ בְיָדוֹ֙ וַיָּמֹ֔ת מֽוֹת־יוּמַ֥ת הַמַּכֶּ֖ה רֹצֵ֣חַֽ ה֑וּא גֹּאֵ֣ל הַדָּ֗ם יָמִ֛ית אֶת־הָרֹצֵ֖חַ בְּפִגְעוֹ־בֽוֹ׃

‎22 ‏וְאִם־בְּפֶ֥תַע בְּלֹא־אֵיבָ֖ה הֲדָפ֑וֹ אוֹ־הִשְׁלִ֥יךְ עָלָ֛יו כָּל־כְּלִ֖י בְּלֹ֥א צְדִיָּֽה׃

‎23 ‏א֣וֹ בְכָל־אֶ֜בֶן אֲשֶׁר־יָמ֥וּת בָּהּ֙ בְּלֹ֣א רְא֔וֹת וַיַּפֵּ֥ל עָלָ֖יו וַיָּמֹ֑ת וְהוּא֙ לֹא־אוֹיֵ֣ב ל֔וֹ וְלֹ֥א מְבַקֵּ֖שׁ רָעָתֽוֹ׃

‎24 ‏וְשָֽׁפְטוּ֙ הָֽעֵדָ֔ה בֵּ֚ין הַמַּכֶּ֔ה וּבֵ֖ין גֹּאֵ֣ל הַדָּ֑ם עַ֥ל הַמִּשְׁפָּטִ֖ים הָאֵֽלֶּה׃

‎25 ‏וְהִצִּ֨ילוּ הָעֵדָ֜ה אֶת־הָרֹצֵ֗חַ מִיַּד֮ גֹּאֵ֣ל הַדָּם֒ וְהֵשִׁ֤יבוּ אֹתוֹ֙ הָֽעֵדָ֔ה אֶל־עִ֥יר מִקְלָט֖וֹ אֲשֶׁר־נָ֣ס שָׁ֑מָּה וְיָ֣שַׁב בָּ֗הּ עַד־מוֹת֙ הַכֹּהֵ֣ן הַגָּדֹ֔ל אֲשֶׁר־מָשַׁ֥ח אֹת֖וֹ בְּשֶׁ֥מֶן הַקֹּֽדֶשׁ׃

‎26 ‏וְאִם־יָצֹ֥א יֵצֵ֖א הָרֹצֵ֑חַ אֶת־גְּבוּל֙ עִ֣יר מִקְלָט֔וֹ אֲשֶׁ֥ר יָנ֖וּס שָֽׁמָּה׃

‎27 ‏וּמָצָ֤א אֹתוֹ֙ גֹּאֵ֣ל הַדָּ֔ם מִח֕וּץ לִגְב֖וּל עִ֣יר מִקְלָט֑וֹ וְרָצַ֞ח גֹּאֵ֤ל הַדָּם֙ אֶת־הָ֣רֹצֵ֔חַ אֵ֥ין ל֖וֹ דָּֽם׃

‎28 ‏כִּ֣י בְעִ֤יר מִקְלָטוֹ֙ יֵשֵׁ֔ב עַד־מ֖וֹת הַכֹּהֵ֣ן הַגָּדֹ֑ל וְאַחֲרֵ֥י מוֹת֙ הַכֹּהֵ֣ן הַגָּדֹ֔ל יָשׁוּב֙ הָרֹצֵ֔חַ אֶל־אֶ֖רֶץ אֲחֻזָּתֽוֹ׃

‎29 ‏וְהָי֨וּ אֵ֧לֶּה לָכֶ֛ם לְחֻקַּ֥ת מִשְׁפָּ֖ט לְדֹרֹתֵיכֶ֑ם בְּכֹ֖ל מוֹשְׁבֹתֵיכֶֽם׃

‎30 ‏כָּל־מַ֨כֵּה־נֶ֔פֶשׁ לְפִ֣י עֵדִ֔ים יִרְצַ֖ח אֶת־הָרֹצֵ֑חַ וְעֵ֣ד אֶחָ֔ד לֹא־יַעֲנֶ֥ה בְנֶ֖פֶשׁ לָמֽוּת׃

‎31 ‏וְלֹֽא־תִקְח֥וּ כֹ֙פֶר֙ לְנֶ֣פֶשׁ רֹצֵ֔חַ אֲשֶׁר־ה֥וּא רָשָׁ֖ע לָמ֑וּת כִּי־מ֖וֹת יוּמָֽת׃

‎32 ‏וְלֹא־תִקְח֣וּ כֹ֔פֶר לָנ֖וּס אֶל־עִ֣יר מִקְלָט֑וֹ לָשׁוּב֙ לָשֶׁ֣בֶת בָּאָ֔רֶץ עַד־מ֖וֹת הַכֹּהֵֽן׃

‎33 ‏וְלֹא־תַחֲנִ֣יפוּ³ אֶת־הָאָ֗רֶץ אֲשֶׁ֤ר אַתֶּם֙ בָּ֔הּ כִּ֣י הַדָּ֔ם ה֥וּא יַחֲנִ֖יף אֶת־הָאָ֑רֶץ וְלָאָ֣רֶץ לֹֽא־יְכֻפַּ֗ר לַדָּם֙ אֲשֶׁ֣ר שֻׁפַּךְ־בָּ֔הּ כִּי־אִ֖ם בְּדַ֥ם שֹׁפְכֽוֹ׃

‎34 ‏וְלֹ֧א תְטַמֵּ֣א אֶת־הָאָ֗רֶץ אֲשֶׁ֤ר אַתֶּם֙ יֹשְׁבִ֣ים בָּ֔הּ אֲשֶׁ֥ר אֲנִ֖י שֹׁכֵ֣ן בְּתוֹכָ֑הּ כִּ֚י אֲנִ֣י יְהוָ֔ה שֹׁכֵ֕ן בְּת֖וֹךְ בְּנֵ֥י יִשְׂרָאֵֽל׃ פ

1 wayəḏabēr yəhwâ ’el-mōšeh bə‘arəḇōṯ mwō’āḇ ‘al-yarədēn yərēḥwō lē’mōr:

2 ṣaw ’eṯ-bənê yiśərā’ēl wənāṯənû laləwîyim minn^aḥălaṯ ’ăḥuzzāṯām ‘ārîm lāšāḇeṯ ûmiḡərāš le‘ārîm səḇîḇōṯêhem titənû laləwîyim:

3 wəhāyû he‘ārîm lâem lāšāḇeṯ ûmiḡərəšêhem yihəyû liḇəhemətām wəlirəḵušām ûləḵōl ḥayyāṯām:

4 ûmiḡərəšê he‘ārîm ’ăšer titənû laləwîyim miqqîr hā‘îr wāḥûṣâ ’elef ’ammâ sāḇîḇ:

5 ûmadōṯem miḥûṣ lā‘îr ’eṯ-pə’aṯ-qēḏəmâ ’aləpayim bā’ammâ wə’eṯ-pə’aṯ-neḡeḇ ’aləpayim bā’ammâ wə’eṯ-pə’aṯ-yām| ’aləpayim bā’ammâ wə’ēṯ pə’aṯ ṣāfwōn ’aləpayim bā’ammâ wəhā‘îr batāweḵə zeh yihəyeh lâem miḡərəšê he‘ārîm:

6 wə’ēṯ he‘ārîm ’ăšer titənû laləwîyim ’ēṯ šēš-‘ārê hammiqəlāṭ ’ăšer titənû lānus šāmmâ hārōṣēḥa w^a‘ălêhem titənû ’arəbā‘îm ûšətayim ‘îr:

7 kāl-he‘ārîm ’ăšer titənû laləwîyim ’arəbā‘îm ûšəmōneh ‘îr ’eṯəhen wə’eṯ-miḡərəšêhen:

8 wəhe‘ārîm ’ăšer titənû mē’ăḥuzzaṯ bənê-yiśərā’ēl mē’ēṯ hāraḇ tarəbû ûmē’ēṯ hamə‘aṭ tamə‘îṭû ’îš kəfî n^aḥălāṯwō ’ăšer yinəḥālû yitēn mē‘ārāyw laləwîyim: f

9 wayəḏabēr yəhwâ ’el-mōšeh llē’mōr:

10 dabēr ’el-bənê yiśərā’ēl wə’āmarətā ’ălēhem kî ’atem ‘ōḇərîm ’eṯ-hayyarədēn ’arəṣâ kənā‘an:

11 wəhiqərîṯem lāḵem ‘ārîm ‘ārê miqəlāṭ tihəyeynâ lāḵem wənās šāmmâ rōṣēḥa makēh-nefeš bišəḡāḡâ:

12 wəhāyû lāḵem he‘ārîm ləmiqəlāṭ migō’ēl wəlō’ yāmûṯ hārōṣēḥa ‘aḏ-‘āməḏwō lifənê hā‘ēḏâ lammišəpāṭ:

13 wəhe‘ārîm ’ăšer titēnû šēš-‘ārê miqəlāṭ tihəyeynâ lāḵem:

14 ’ēṯ| šəlōš he‘ārîm titənû mē‘ēḇer layyarədēn wə’ēṯ šəlōš he‘ārîm titənû bə’ereṣ kənā‘an ‘ārê miqəlāṭ tihəyeynâ:

15 liḇənê yiśərā’ēl wəlagēr wəlatwōšāḇ bəṯwōḵām tihəyeynâ šēš-he‘ārîm hā’ēlleh ləmiqəlāṭ lānûs šāmmâ kāl-makēh-nefeš bišəḡāḡâ:

16 wə’im-biḵəlî ḇarəzel| hikâû wayyāmōṯ rōṣēḥa hû’ mwōṯ yûmaṯ hārōṣēḥa:

17 wə’im bə’eḇen yāḏ ’ăšer-yāmûṯ bāh hikâû wayyāmōṯ rōṣēḥa hû’ mwōṯ yûmaṯ hārōṣēḥa:

18 ’wō biḵəlî ‘ēṣ-yāḏ ’ăšer-yāmûṯ bwō hikâû wayyāmōṯ rōṣēḥa hû’ mwōṯ yûmaṯ hārōṣēḥa:

19 gō’ēl hadām hû’ yāmîṯ ’eṯ-hārōṣēḥa bəfiḡə‘wō-ḇwō hû’ yəmîṯennû:

20 wə’im-bəśinə’â yehədāfennû ’wō-hišəlîḵə ‘ālāyw biṣəḏîyâ wayyāmōṯ:

21 ’wō ḇə’êḇâ hikâû ḇəyāḏwō wayyāmōṯ mwōṯ-yûmaṯ hammakeh rōṣēḥa hû’ gō’ēl hadām yāmîṯ ’eṯ-hārōṣēḥa bəfiḡə‘wō-ḇwō:

22 wə’im-bəfeṯ^a‘ bəlō’-’êḇâ hăḏāfwō ’wō-hišəlîḵə ‘ālāyw kāl-kəlî bəlō’ ṣəḏîyâ:

23 ’wō ḇəḵāl-’eḇen ’ăšer-yāmûṯ bāh bəlō’ rə’wōṯ wayyapēl ‘ālāyw wayyāmōṯ wəhû’ lō’-’wōyēḇ lwō wəlō’ məḇaqqēš rā‘āṯwō:

24 wəšāfəṭû hā‘ēḏâ bên hammakeh ûḇên gō’ēl hadām ‘al hammišəpāṭîm hā’ēlleh:

25 wəhiṣṣîlû hā‘ēḏâ ’eṯ-hārōṣēḥa mîyaḏ gō’ēl hadām wəhēšîḇû ’ōṯwō hā‘ēḏâ ’el-‘îr miqəlāṭwō ’ăšer-nās šāmmâ wəyāšaḇ bāh ‘aḏ-mwōṯ hakōhēn hagāḏōl ’ăšer-māš^aḥ ’ōṯwō bəšemen haqqōḏeš:

26 wə’im-yāṣō’ yēṣē’ hārōṣēḥa ’eṯ-gəḇûl ‘îr miqəlāṭwō ’ăšer yānûs šāmmâ:

27 ûmāṣā’ ’ōṯwō gō’ēl hadām miḥûṣ liḡəḇûl ‘îr miqəlāṭwō wərāṣ^aḥ gō’ēl hadām ’eṯ-hārōṣēḥa ’ên lwō dām:

28 kî ḇə‘îr miqəlāṭwō yēšēḇ ‘aḏ-mwōṯ hakōhēn hagāḏōl wə’^aḥărê mwōṯ hakōhēn hagāḏōl yāšûḇ hārōṣēḥa ’el-’ereṣ ’ăḥuzzāṯwō:

29 wəhāyû ’ēlleh lāḵem ləḥuqqaṯ mišəpāṭ ləḏōrōṯêḵem bəḵōl mwōšəḇōṯêḵem:

30 kāl-makēh-nefeš ləfî ‘ēḏîm yirəṣ^aḥ ’eṯ-hārōṣēḥa wə‘ēḏ ’eḥāḏ lō’-y^a‘ăneh ḇənefeš lāmûṯ:

31 wəlō’-ṯiqəḥû ḵōfer lənefeš rōṣēḥa ’ăšer-hû’ rāšā‘ lāmûṯ kî-mwōṯ yûmāṯ:

32 wəlō’-ṯiqəḥû ḵōfer lānûs ’el-‘îr miqəlāṭwō lāšûḇ lāšeḇeṯ bā’āreṣ ‘aḏ-mwōṯ hakōhēn:

33 wəlō’-ṯ^aḥănîfû³ ’eṯ-hā’āreṣ ’ăšer ’atem bāh kî hadām hû’ y^aḥănîf ’eṯ-hā’āreṣ wəlā’āreṣ lō’-yəḵupar ladām ’ăšer šupaḵə-bāh kî-’im bəḏam šōfəḵwō:

34 wəlō’ ṯəṭammē’ ’eṯ-hā’āreṣ ’ăšer ’atem yōšəḇîm bāh ’ăšer ’ănî šōḵēn bəṯwōḵāh kî ’ănî yəhwâ šōḵēn bəṯwōḵə bənê yiśərā’ēl: f