1 Samuel (1 Shmuel) Chapter 4

‎1 ‏וַיְהִ֥י דְבַר־שְׁמוּאֵ֖ל לְכָל־יִשְׂרָאֵ֑ל וַיֵּצֵ֣א יִשְׂרָאֵל֩ לִקְרַ֨את פְּלִשְׁתִּ֜ים לַמִּלְחָמָ֗ה וַֽיַּחֲנוּ֙ עַל־הָאֶ֣בֶן הָעֵ֔זֶר וּפְלִשְׁתִּ֖ים חָנ֥וּ בַאֲפֵֽק׃

‎2 ‏וַיַּעַרְכ֨וּ פְלִשְׁתִּ֜ים לִקְרַ֣את יִשְׂרָאֵ֗ל וַתִּטֹּשׁ֙ הַמִּלְחָמָ֔ה וַיִּנָּ֥גֶף יִשְׂרָאֵ֖ל לִפְנֵ֣י פְלִשְׁתִּ֑ים וַיַּכּ֤וּ בַמַּֽעֲרָכָה֙ בַּשָּׂדֶ֔ה כְּאַרְבַּ֥עַת אֲלָפִ֖ים אִֽישׁ׃

‎3 ‏וַיָּבֹ֣א הָעָם֮ אֶל־הַֽמַּחֲנֶה֒ וַיֹּֽאמְרוּ֙ זִקְנֵ֣י יִשְׂרָאֵ֔ל לָ֣מָּה נְגָפָ֧נוּ יְהוָ֛ה הַיּ֖וֹם לִפְנֵ֣י פְלִשְׁתִּ֑ים נִקְחָ֧ה אֵלֵ֣ינוּ מִשִּׁלֹ֗ה אֶת־אֲרוֹן֙ בְּרִ֣ית יְהוָ֔ה וְיָבֹ֣א בְקִרְבֵּ֔נוּ וְיֹשִׁעֵ֖נוּ מִכַּ֥ף אֹיְבֵֽינוּ׃

‎4 ‏וַיִּשְׁלַ֤ח הָעָם֙ שִׁלֹ֔ה וַיִּשְׂא֣וּ מִשָּׁ֗ם אֵ֣ת אֲר֧וֹן בְּרִית־יְהוָ֛ה צְבָא֖וֹת יֹשֵׁ֣ב הַכְּרֻבִ֑ים וְשָׁ֞ם שְׁנֵ֣י בְנֵֽי־עֵלִ֗י עִם־אֲרוֹן֙ בְּרִ֣ית הָאֱלֹהִ֔ים חָפְנִ֖י וּפִֽינְחָֽס׃

‎5 ‏וַיְהִ֗י כְּב֨וֹא אֲר֤וֹן בְּרִית־יְהוָה֙ אֶל־הַֽמַּחֲנֶ֔ה וַיָּרִ֥עוּ כָל־יִשְׂרָאֵ֖ל תְּרוּעָ֣ה גְדוֹלָ֑ה וַתֵּהֹ֖ם הָאָֽרֶץ׃

‎6 ‏וַיִּשְׁמְע֤וּ פְלִשְׁתִּים֙ אֶת־ק֣וֹל הַתְּרוּעָ֔ה וַיֹּ֣אמְר֔וּ מֶ֠ה ק֣וֹל הַתְּרוּעָ֧ה הַגְּדוֹלָ֛ה הַזֹּ֖את בְּמַחֲנֵ֣ה הָעִבְרִ֑ים וַיֵּ֣דְע֔וּ כִּ֚י אֲר֣וֹן יְהוָ֔ה בָּ֖א אֶל־הַֽמַּחֲנֶֽה׃

‎7 ‏וַיִּֽרְאוּ֙ הַפְּלִשְׁתִּ֔ים כִּ֣י אָמְר֔וּ בָּ֥א אֱלֹהִ֖ים אֶל־הַֽמַּחֲנֶ֑ה וַיֹּאמְרוּ֙ א֣וֹי לָ֔נוּ כִּ֣י לֹ֥א הָיְתָ֛ה כָּזֹ֖את אֶתְמ֥וֹל שִׁלְשֹֽׁם׃

‎8 ‏א֣וֹי לָ֔נוּ מִ֣י יַצִּילֵ֔נוּ מִיַּ֛ד הָאֱלֹהִ֥ים הָאַדִּירִ֖ים הָאֵ֑לֶּה אֵ֧לֶּה הֵ֣ם הָאֱלֹהִ֗ים הַמַּכִּ֧ים אֶת־מִצְרַ֛יִם בְּכָל־מַכָּ֖ה בַּמִּדְבָּֽר׃

‎9 ‏הִֽתְחַזְּק֞וּ וִֽהְי֤וּ לַֽאֲנָשִׁים֙ פְּלִשְׁתִּ֔ים פֶּ֚ן תַּעַבְד֣וּ לָעִבְרִ֔ים כַּאֲשֶׁ֥ר עָבְד֖וּ לָכֶ֑ם וִהְיִיתֶ֥ם לַאֲנָשִׁ֖ים וְנִלְחַמְתֶּֽם׃

‎10 ‏וַיִּלָּחֲמ֣וּ פְלִשְׁתִּ֗ים וַיִּנָּ֤גֶף יִשְׂרָאֵל֙ וַיָּנֻ֙סוּ֙ אִ֣ישׁ לְאֹהָלָ֔יו וַתְּהִ֥י הַמַּכָּ֖ה גְּדוֹלָ֣ה מְאֹ֑ד וַיִּפֹּל֙ מִיִּשְׂרָאֵ֔ל שְׁלֹשִׁ֥ים אֶ֖לֶף רַגְלִֽי׃

‎11 ‏וַאֲר֥וֹן אֱלֹהִ֖ים נִלְקָ֑ח וּשְׁנֵ֤י בְנֵֽי־עֵלִי֙ מֵ֔תוּ חָפְנִ֖י וּפִֽינְחָֽס׃

‎12 ‏וַיָּ֤רָץ אִישׁ־בִּנְיָמִן֙ מֵהַמַּ֣עֲרָכָ֔ה וַיָּבֹ֥א שִׁלֹ֖ה בַּיּ֣וֹם הַה֑וּא וּמַדָּ֣יו קְרֻעִ֔ים וַאֲדָמָ֖ה עַל־רֹאשֽׁוֹ׃

‎13 ‏וַיָּב֗וֹא וְהִנֵּ֣ה עֵ֠לִי יֹשֵׁ֨ב עַֽל־הַכִּסֵּ֜א יך יַ֥ד דֶּ֙רֶךְ֙ מְצַפֶּ֔ה כִּֽי־הָיָ֤ה לִבּוֹ֙ חָרֵ֔ד עַ֖ל אֲר֣וֹן הָאֱלֹהִ֑ים וְהָאִ֗ישׁ בָּ֚א לְהַגִּ֣יד בָּעִ֔יר וַתִּזְעַ֖ק כָּל־הָעִֽיר׃

‎14 ‏וַיִּשְׁמַ֤ע עֵלִי֙ אֶת־ק֣וֹל הַצְּעָקָ֔ה וַיֹּ֕אמֶר מֶ֛ה ק֥וֹל הֶהָמ֖וֹן הַזֶּ֑ה וְהָאִ֣ישׁ מִהַ֔ר וַיָּבֹ֖א וַיַּגֵּ֥ד לְעֵלִֽי׃

‎15 ‏וְעֵלִ֕י בֶּן־תִּשְׁעִ֥ים וּשְׁמֹנֶ֖ה שָׁנָ֑ה וְעֵינָ֣יו קָ֔מָה וְלֹ֥א יָכ֖וֹל לִרְאֽוֹת׃

‎16 ‏וַיֹּ֨אמֶר הָאִ֜ישׁ אֶל־עֵלִ֗י אָֽנֹכִי֙ הַבָּ֣א מִן־הַמַּעֲרָכָ֔ה וַאֲנִ֕י מִן־הַמַּעֲרָכָ֖ה נַ֣סְתִּי הַיּ֑וֹם וַיֹּ֛אמֶר מֶֽה־הָיָ֥ה הַדָּבָ֖ר בְּנִֽי׃

‎17 ‏וַיַּ֨עַן הַֽמְבַשֵּׂ֜ר וַיֹּ֗אמֶר נָ֤ס יִשְׂרָאֵל֙ לִפְנֵ֣י פְלִשְׁתִּ֔ים וְגַ֛ם מַגֵּפָ֥ה גְדוֹלָ֖ה הָיְתָ֣ה בָעָ֑ם וְגַם־שְׁנֵ֨י בָנֶ֜יךָ מֵ֗תוּ חָפְנִי֙ וּפִ֣ינְחָ֔ס וַאֲר֥וֹן הָאֱלֹהִ֖ים נִלְקָֽחָה׃ פ

‎18 ‏וַיְהִ֞י כְּהַזְכִּיר֣וֹ׀ אֶת־אֲר֣וֹן הָאֱלֹהִ֗ים וַיִּפֹּ֣ל מֵֽעַל־הַ֠כִּסֵּא אֲחֹ֨רַנִּ֜ית בְּעַ֣ד׀ יַ֣ד הַשַּׁ֗עַר וַתִּשָּׁבֵ֤ר מַפְרַקְתּוֹ֙ וַיָּמֹ֔ת כִּֽי־זָקֵ֥ן הָאִ֖ישׁ וְכָבֵ֑ד וְה֛וּא שָׁפַ֥ט אֶת־יִשְׂרָאֵ֖ל אַרְבָּעִ֥ים שָׁנָֽה׃

‎19 ‏וְכַלָּת֣וֹ אֵֽשֶׁת־פִּינְחָס֮ הָרָ֣ה לָלַת֒ וַתִּשְׁמַ֣ע אֶת־הַשְּׁמֻעָ֔ה אֶל־הִלָּקַח֙ אֲר֣וֹן הָאֱלֹהִ֔ים וּמֵ֥ת חָמִ֖יהָ וְאִישָׁ֑הּ וַתִּכְרַ֣ע וַתֵּ֔לֶד כִּֽי־נֶהֶפְכ֥וּ עָלֶ֖יהָ צִרֶֽיהָ׃

‎20 ‏וּכְעֵ֣ת מוּתָ֗הּ וַתְּדַבֵּ֙רְנָה֙ הַנִּצָּב֣וֹת עָלֶ֔יהָ אַל־תִּֽירְאִ֖י כִּ֣י בֵ֣ן יָלָ֑דְתְּ וְלֹ֥א עָנְתָ֖ה וְלֹא־שָׁ֥תָה לִבָּֽהּ׃

‎21 ‏וַתִּקְרָ֣א לַנַּ֗עַר אִֽי־כָבוֹד֙ לֵאמֹ֔ר גָּלָ֥ה כָב֖וֹד מִיִּשְׂרָאֵ֑ל אֶל־הִלָּקַח֙ אֲר֣וֹן הָאֱלֹהִ֔ים וְאֶל־חָמִ֖יהָ וְאִישָֽׁהּ׃

‎22 ‏וַתֹּ֕אמֶר גָּלָ֥ה כָב֖וֹד מִיִּשְׂרָאֵ֑ל כִּ֥י נִלְקַ֖ח אֲר֥וֹן הָאֱלֹהִֽים׃ פ

1 wayəhî ḏəḇar-šəmû’ēl ləḵāl-yiśərā’ēl wayyēṣē’ yiśərā’ēl liqəra’ṯ pəlišətîm lammiləḥāmâ wayy^aḥănû ‘al-hā’eḇen hā‘ēzer ûfəlišətîm ḥānû ḇa’ăfēq:

2 wayy^a‘arəḵû fəlišətîm liqəra’ṯ yiśərā’ēl watiṭṭōš hammiləḥāmâ wayyinnāḡef yiśərā’ēl lifənê fəlišətîm wayyakû ḇamm^a‘ărāḵâ baśśāḏeh kə’arəb^a‘aṯ ’ălāfîm ’îš:

3 wayyāḇō’ hā‘ām ’el-hamm^aḥăneh wayyō’mərû ziqənê yiśərā’ēl lāmmâ nəḡāfānû yəhwâ hayywōm lifənê fəlišətîm niqəḥâ ’ēlênû miššilōh ’eṯ-’ărwōn bərîṯ yəhwâ wəyāḇō’ ḇəqirəbēnû wəyōši‘ēnû mikaf ’ōyəḇênû:

4 wayyišəl^aḥ hā‘ām šilōh wayyiśə’û miššām ’ēṯ ’ărwōn bərîṯ-yəhwâ ṣəḇā’wōṯ yōšēḇ hakəruḇîm wəšām šənê ḇənê-‘ēlî ‘im-’ărwōn bərîṯ hā’ĕlōhîm ḥāfənî ûfînəḥās:

5 wayəhî kəḇwō’ ’ărwōn bərîṯ-yəhwâ ’el-hamm^aḥăneh wayyāri‘û ḵāl-yiśərā’ēl tərû‘â ḡəḏwōlâ watēhōm hā’āreṣ:

6 wayyišəmə‘û fəlišətîm ’eṯ-qwōl hatərû‘â wayyō’mərû meh qwōl hatərû‘â hagəḏwōlâ hazzō’ṯ bəm^aḥănēh hā‘iḇərîm wayyēḏə‘û kî ’ărwōn yəhwâ bā’ ’el-hamm^aḥăneh:

7 wayyirə’û hapəlišətîm kî ’āmərû bā’ ’ĕlōhîm ’el-hamm^aḥăneh wayyō’mərû ’wōy lānû kî lō’ hāyəṯâ kāzō’ṯ ’eṯəmwōl šiləšōm:

8 ’wōy lānû mî yaṣṣîlēnû mîyaḏ hā’ĕlōhîm hā’adîrîm hā’ēlleh ’ēlleh hēm hā’ĕlōhîm hammakîm ’eṯ-miṣərayim bəḵāl-makâ bammiḏəbār:

9 hiṯəḥazzəqû wihəyû la’ănāšîm pəlišətîm pen t^a‘aḇəḏû lā‘iḇərîm ka’ăšer ‘āḇəḏû lāḵem wihəyîṯem la’ănāšîm wəniləḥamətem:

10 wayyillāḥămû fəlišətîm wayyinnāḡef yiśərā’ēl wayyānusû ’îš lə’ōhālāyw watəhî hammakâ gəḏwōlâ mə’ōḏ wayyipōl mîyiśərā’ēl šəlōšîm ’elef raḡəlî:

11 wa’ărwōn ’ĕlōhîm niləqāḥ ûšənê ḇənê-‘ēlî mēṯû ḥāfənî ûfînəḥās:

12 wayyārāṣ ’îš-binəyāmin mēhamm^a‘ărāḵâ wayyāḇō’ šilōh bayywōm hahû’ ûmadāyw qəru‘îm wa’ăḏāmâ ‘al-rō’šwō:

13 wayyāḇwō’ wəhinnēh ‘ēlî yōšēḇ ‘al-hakissē’ yaḵə yaḏ dereḵə məṣapeh kî-hāyâ libwō ḥārēḏ ‘al ’ărwōn hā’ĕlōhîm wəhā’îš bā’ ləhagîḏ bā‘îr watizə‘aq kāl-hā‘îr:

14 wayyišəm^a‘ ‘ēlî ’eṯ-qwōl haṣṣə‘āqâ wayyō’mer meh qwōl hehāmwōn hazzeh wəhā’îš mihar wayyāḇō’ wayyagēḏ lə‘ēlî:

15 wə‘ēlî ben-tišə‘îm ûšəmōneh šānâ wə‘ênāyw qāmâ wəlō’ yāḵwōl lirə’wōṯ:

16 wayyō’mer hā’îš ’el-‘ēlî ’ānōḵî habā’ min-hamm^a‘ărāḵâ wa’ănî min-hamm^a‘ărāḵâ nasətî hayywōm wayyō’mer meh-hāyâ hadāḇār bənî:

17 wayy^a‘an haməḇaśśēr wayyō’mer nās yiśərā’ēl lifənê fəlišətîm wəḡam magēfâ ḡəḏwōlâ hāyəṯâ ḇā‘ām wəḡam-šənê ḇāneyḵā mēṯû ḥāfənî ûfînəḥās wa’ărwōn hā’ĕlōhîm niləqāḥâ: f

18 wayəhî kəhazəkîrwō| ’eṯ-’ărwōn hā’ĕlōhîm wayyipōl mē‘al-hakissē’ ’ăḥōrannîṯ bə‘aḏ| yaḏ hašš^a‘ar watiššāḇēr mafəraqətwō wayyāmōṯ kî-zāqēn hā’îš wəḵāḇēḏ wəhû’ šāfaṭ ’eṯ-yiśərā’ēl ’arəbā‘îm šānâ:

19 wəḵallāṯwō ’ēšeṯ-pînəḥās hārâ lālaṯ watišəm^a‘ ’eṯ-haššəmu‘â ’el-hillāq^aḥ ’ărwōn hā’ĕlōhîm ûmēṯ ḥāmîhā wə’îšāh watiḵər^a‘ watēleḏ kî-nehefəḵû ‘āleyhā ṣireyhā:

20 ûḵə‘ēṯ mûṯāh watəḏabērənâ hanniṣṣāḇwōṯ ‘āleyhā ’al-tîrə’î kî ḇēn yālāḏətə wəlō’ ‘ānəṯâ wəlō’-šāṯâ libāh:

21 watiqərā’ lann^a‘ar ’î-ḵāḇwōḏ lē’mōr gālâ ḵāḇwōḏ mîyiśərā’ēl ’el-hillāq^aḥ ’ărwōn hā’ĕlōhîm wə’el-ḥāmîhā wə’îšāh:

22 watō’mer gālâ ḵāḇwōḏ mîyiśərā’ēl kî niləq^aḥ ’ărwōn hā’ĕlōhîm: f