1 Samuel (1 Shmuel) Chapter 12

‎1 ‏וַיֹּ֤אמֶר שְׁמוּאֵל֙ אֶל־כָּל־יִשְׂרָאֵ֔ל הִנֵּה֙ שָׁמַ֣עְתִּי בְקֹֽלְכֶ֔ם לְכֹ֥ל אֲשֶׁר־אֲמַרְתֶּ֖ם לִ֑י וָאַמְלִ֥יךְ עֲלֵיכֶ֖ם מֶֽלֶךְ׃

‎2 ‏וְעַתָּ֞ה הִנֵּ֥ה הַמֶּ֣לֶךְ׀ מִתְהַלֵּ֣ךְ לִפְנֵיכֶ֗ם וַאֲנִי֙ זָקַ֣נְתִּי וָשַׂ֔בְתִּי וּבָנַ֖י הִנָּ֣ם אִתְּכֶ֑ם וַאֲנִי֙ הִתְהַלַּ֣כְתִּי לִפְנֵיכֶ֔ם מִנְּעֻרַ֖י עַד־הַיּ֥וֹם הַזֶּֽה׃

‎3 ‏הִנְנִ֣י עֲנ֣וּ בִי֩ נֶ֨גֶד יְהוָ֜ה וְנֶ֣גֶד מְשִׁיח֗וֹ אֶת־שׁוֹר֩׀ מִ֨י לָקַ֜חְתִּי וַחֲמ֧וֹר מִ֣י לָקַ֗חְתִּי וְאֶת־מִ֤י עָשַׁ֙קְתִּי֙ אֶת־מִ֣י רַצּ֔וֹתִי וּמִיַּד־מִי֙ לָקַ֣חְתִּי כֹ֔פֶר וְאַעְלִ֥ים עֵינַ֖י בּ֑וֹ וְאָשִׁ֖יב לָכֶֽם׃

‎4 ‏וַיֹּ֣אמְר֔וּ לֹ֥א עֲשַׁקְתָּ֖נוּ וְלֹ֣א רַצּוֹתָ֑נוּ וְלֹֽא־לָקַ֥חְתָּ מִיַּד־אִ֖ישׁ מְאֽוּמָה׃

‎5 ‏וַיֹּ֨אמֶר אֲלֵיהֶ֜ם עֵ֧ד יְהוָ֣ה בָּכֶ֗ם וְעֵ֤ד מְשִׁיחוֹ֙ הַיּ֣וֹם הַזֶּ֔ה כִּ֣י לֹ֧א מְצָאתֶ֛ם בְּיָדִ֖י מְא֑וּמָה וַיֹּ֖אמֶר עֵֽד׃ פ

‎6 ‏וַיֹּ֥אמֶר שְׁמוּאֵ֖ל אֶל־הָעָ֑ם יְהוָ֗ה אֲשֶׁ֤ר עָשָׂה֙ אֶת־מֹשֶׁ֣ה וְאֶֽת־אַהֲרֹ֔ן וַאֲשֶׁ֧ר הֶעֱלָ֛ה אֶת־אֲבֹתֵיכֶ֖ם מֵאֶ֥רֶץ מִצְרָֽיִם׃

‎7 ‏וְעַתָּ֗ה הִֽתְיַצְּב֛וּ וְאִשָּׁפְטָ֥ה אִתְּכֶ֖ם לִפְנֵ֣י יְהוָ֑ה אֵ֚ת כָּל־צִדְק֣וֹת יְהוָ֔ה אֲשֶׁר־עָשָׂ֥ה אִתְּכֶ֖ם וְאֶת־אֲבוֹתֵיכֶֽם׃

‎8 ‏כַּֽאֲשֶׁר־בָּ֥א יַעֲקֹ֖ב מִצְרָ֑יִם וַיִּזְעֲק֤וּ אֲבֽוֹתֵיכֶם֙ אֶל־יְהוָ֔ה וַיִּשְׁלַ֨ח יְהוָ֜ה אֶת־מֹשֶׁ֣ה וְאֶֽת־אַהֲרֹ֗ן וַיּוֹצִ֤יאוּ אֶת־אֲבֹֽתֵיכֶם֙ מִמִּצְרַ֔יִם וַיֹּשִׁב֖וּם בַּמָּק֥וֹם הַזֶּֽה׃

‎9 ‏וַֽיִּשְׁכְּח֖וּ אֶת־יְהוָ֣ה אֱלֹהֵיהֶ֑ם וַיִּמְכֹּ֣ר אֹתָ֡ם בְּיַ֣ד סִֽיסְרָא֩ שַׂר־צְבָ֨א חָצ֜וֹר וּבְיַד־פְּלִשְׁתִּ֗ים וּבְיַד֙ מֶ֣לֶךְ מוֹאָ֔ב וַיִּֽלָּחֲמ֖וּ בָּֽם׃

‎10 ‏וַיִּזְעֲק֤וּ אֶל־יְהוָה֙ ויאמר וַיֹּאמְר֣וּ חָטָ֔אנוּ כִּ֤י עָזַ֙בְנוּ֙ אֶת־יְהוָ֔ה וַנַּעֲבֹ֥ד אֶת־הַבְּעָלִ֖ים וְאֶת־הָעַשְׁתָּר֑וֹת וְעַתָּ֗ה הַצִּילֵ֛נוּ מִיַּ֥ד אֹיְבֵ֖ינוּ וְנַעַבְדֶֽךָּ׃

‎11 ‏וַיִּשְׁלַ֤ח יְהוָה֙ אֶת־יְרֻבַּ֣עַל וְאֶת־בְּדָ֔ן וְאֶת־יִפְתָּ֖ח וְאֶת־שְׁמוּאֵ֑ל וַיַּצֵּ֨ל אֶתְכֶ֜ם מִיַּ֤ד אֹֽיְבֵיכֶם֙ מִסָּבִ֔יב וַתֵּשְׁב֖וּ בֶּֽטַח׃

‎12 ‏וַתִּרְא֗וּ כִּֽי־נָחָ֞שׁ מֶ֣לֶךְ בְּנֵֽי־עַמּוֹן֮ בָּ֣א עֲלֵיכֶם֒ וַתֹּ֣אמְרוּ לִ֔י לֹ֕א כִּי־מֶ֖לֶךְ יִמְלֹ֣ךְ עָלֵ֑ינוּ וַיהוָ֥ה אֱלֹהֵיכֶ֖ם מַלְכְּכֶֽם׃

‎13 ‏וְעַתָּ֗ה הִנֵּ֥ה הַמֶּ֛לֶךְ אֲשֶׁ֥ר בְּחַרְתֶּ֖ם אֲשֶׁ֣ר שְׁאֶלְתֶּ֑ם וְהִנֵּ֨ה נָתַ֧ן יְהוָ֛ה עֲלֵיכֶ֖ם מֶֽלֶךְ׃

‎14 ‏אִם־תִּֽירְא֣וּ אֶת־יְהוָ֗ה וַעֲבַדְתֶּ֤ם אֹתוֹ֙ וּשְׁמַעְתֶּ֣ם בְּקֹל֔וֹ וְלֹ֥א תַמְר֖וּ אֶת־פִּ֣י יְהוָ֑ה וִהְיִתֶ֣ם גַּם־אַתֶּ֗ם וְגַם־הַמֶּ֙לֶךְ֙ אֲשֶׁ֣ר מָלַ֣ךְ עֲלֵיכֶ֔ם אַחַ֖ר יְהוָ֥ה אֱלֹהֵיכֶֽם׃

‎15 ‏וְאִם־לֹ֤א תִשְׁמְעוּ֙ בְּק֣וֹל יְהוָ֔ה וּמְרִיתֶ֖ם אֶת־פִּ֣י יְהוָ֑ה וְהָיְתָ֧ה יַד־יְהוָ֛ה בָּכֶ֖ם וּבַאֲבֹתֵיכֶֽם׃

‎16 ‏גַּם־עַתָּה֙ הִתְיַצְּב֣וּ וּרְא֔וּ אֶת־הַדָּבָ֥ר הַגָּד֖וֹל הַזֶּ֑ה אֲשֶׁ֣ר יְהוָ֔ה עֹשֶׂ֖ה לְעֵינֵיכֶֽם׃

‎17 ‏הֲל֤וֹא קְצִיר־חִטִּים֙ הַיּ֔וֹם אֶקְרָא֙ אֶל־יְהוָ֔ה וְיִתֵּ֥ן קֹל֖וֹת וּמָטָ֑ר וּדְע֣וּ וּרְא֗וּ כִּֽי־רָעַתְכֶ֤ם רַבָּה֙ אֲשֶׁ֤ר עֲשִׂיתֶם֙ בְּעֵינֵ֣י יְהוָ֔ה לִשְׁא֥וֹל לָכֶ֖ם מֶֽלֶךְ׃ ס

‎18 ‏וַיִּקְרָ֤א שְׁמוּאֵל֙ אֶל־יְהוָ֔ה וַיִּתֵּ֧ן יְהוָ֛ה קֹלֹ֥ת וּמָטָ֖ר בַּיּ֣וֹם הַה֑וּא וַיִּירָ֨א כָל־הָעָ֥ם מְאֹ֛ד אֶת־יְהוָ֖ה וְאֶת־שְׁמוּאֵֽל׃

‎19 ‏וַיֹּאמְר֨וּ כָל־הָעָ֜ם אֶל־שְׁמוּאֵ֗ל הִתְפַּלֵּ֧ל בְּעַד־עֲבָדֶ֛יךָ אֶל־יְהוָ֥ה אֱלֹהֶ֖יךָ וְאַל־נָמ֑וּת כִּֽי־יָסַ֤פְנוּ עַל־כָּל־חַטֹּאתֵ֙ינוּ֙ רָעָ֔ה לִשְׁאֹ֥ל לָ֖נוּ מֶֽלֶךְ׃ ס

‎20 ‏וַיֹּ֨אמֶר שְׁמוּאֵ֤ל אֶל־הָעָם֙ אַל־תִּירָ֔אוּ אַתֶּ֣ם עֲשִׂיתֶ֔ם אֵ֥ת כָּל־הָרָעָ֖ה הַזֹּ֑את אַ֗ךְ אַל־תָּס֙וּרוּ֙ מֵאַחֲרֵ֣י יְהוָ֔ה וַעֲבַדְתֶּ֥ם אֶת־יְהוָ֖ה בְּכָל־לְבַבְכֶֽם׃

‎21 ‏וְלֹ֖א תָּס֑וּרוּ כִּ֣י׀ אַחֲרֵ֣י הַתֹּ֗הוּ אֲשֶׁ֧ר לֹֽא־יוֹעִ֛ילוּ וְלֹ֥א יַצִּ֖ילוּ כִּי־תֹ֥הוּ הֵֽמָּה׃

‎22 ‏כִּ֠י לֹֽא־יִטֹּ֤שׁ יְהוָה֙ אֶת־עַמּ֔וֹ בַּעֲב֖וּר שְׁמ֣וֹ הַגָּד֑וֹל כִּ֚י הוֹאִ֣יל יְהוָ֔ה לַעֲשׂ֥וֹת אֶתְכֶ֛ם ל֖וֹ לְעָֽם׃

‎23 ‏גַּ֣ם אָנֹכִ֗י חָלִ֤ילָה לִּי֙ מֵחֲטֹ֣א לַֽיהוָ֔ה מֵחֲדֹ֖ל לְהִתְפַּלֵּ֣ל בַּעַדְכֶ֑ם וְהוֹרֵיתִ֣י אֶתְכֶ֔ם בְּדֶ֥רֶךְ הַטּוֹבָ֖ה וְהַיְשָׁרָֽה׃

‎24 ‏אַ֣ךְ׀ יְר֣אוּ אֶת־יְהוָ֗ה וַעֲבַדְתֶּ֥ם אֹת֛וֹ בֶּאֱמֶ֖ת בְּכָל־לְבַבְכֶ֑ם כִּ֣י רְא֔וּ אֵ֥ת אֲשֶׁר־הִגְדִּ֖ל עִמָּכֶֽם׃

‎25 ‏וְאִם־הָרֵ֖עַ תָּרֵ֑עוּ גַּם־אַתֶּ֥ם גַּֽם־מַלְכְּכֶ֖ם תִּסָּפֽוּ׃ פ

1 wayyō’mer šəmû’ēl ’el-kāl-yiśərā’ēl hinnēh šām^a‘ətî ḇəqōləḵem ləḵōl ’ăšer-’ămarətem lî wā’aməlîḵə ‘ălêḵem meleḵə:

2 wə‘atâ hinnēh hammeleḵə| miṯəhallēḵə lifənêḵem wa’ănî zāqanətî wāśaḇətî ûḇānay hinnām ’itəḵem wa’ănî hiṯəhallaḵətî lifənêḵem minnə‘uray ‘aḏ-hayywōm hazzeh:

3 hinənî ‘ănû ḇî neḡeḏ yəhwâ wəneḡeḏ məšîḥwō ’eṯ-šwōr| mî lāq^aḥətî w^aḥămwōr mî lāq^aḥətî wə’eṯ-mî ‘āšaqətî ’eṯ-mî raṣṣwōṯî ûmîyaḏ-mî lāq^aḥətî ḵōfer wə’^a‘əlîm ‘ênay bwō wə’āšîḇ lāḵem:

4 wayyō’mərû lō’ ‘ăšaqətānû wəlō’ raṣṣwōṯānû wəlō’-lāq^aḥətā mîyaḏ-’îš mə’ûmâ:

5 wayyō’mer ’ălêhem ‘ēḏ yəhwâ bāḵem wə‘ēḏ məšîḥwō hayywōm hazzeh kî lō’ məṣā’ṯem bəyāḏî mə’ûmâ wayyō’mer ‘ēḏ: f

6 wayyō’mer šəmû’ēl ’el-hā‘ām yəhwâ ’ăšer ‘āśâ ’eṯ-mōšeh wə’eṯ-’ahărōn wa’ăšer he‘ĕlâ ’eṯ-’ăḇōṯêḵem mē’ereṣ miṣərāyim:

7 wə‘atâ hiṯəyaṣṣəḇû wə’iššāfəṭâ ’itəḵem lifənê yəhwâ ’ēṯ kāl-ṣiḏəqwōṯ yəhwâ ’ăšer-‘āśâ ’itəḵem wə’eṯ-’ăḇwōṯêḵem:

8 ka’ăšer-bā’ y^a‘ăqōḇ miṣərāyim wayyizə‘ăqû ’ăḇwōṯêḵem ’el-yəhwâ wayyišəl^aḥ yəhwâ ’eṯ-mōšeh wə’eṯ-’ahărōn wayywōṣî’û ’eṯ-’ăḇōṯêḵem mimmiṣərayim wayyōšiḇûm bammāqwōm hazzeh:

9 wayyišəkəḥû ’eṯ-yəhwâ ’ĕlōhêhem wayyiməkōr ’ōṯām bəyaḏ sîsərā’ śar-ṣəḇā’ ḥāṣwōr ûḇəyaḏ-pəlišətîm ûḇəyaḏ meleḵə mwō’āḇ wayyillāḥămû bām:

10 wayyizə‘ăqû ’el-yəhwâ wayyō’mer wayyō’mərû ḥāṭā’nû kî ‘āzaḇənû ’eṯ-yəhwâ wann^a‘ăḇōḏ ’eṯ-habə‘ālîm wə’eṯ-hā‘ašətārwōṯ wə‘atâ haṣṣîlēnû mîyaḏ ’ōyəḇênû wən^a‘aḇəḏeḵḵā:

11 wayyišəl^aḥ yəhwâ ’eṯ-yərub^a‘al wə’eṯ-bəḏān wə’eṯ-yifətāḥ wə’eṯ-šəmû’ēl wayyaṣṣēl ’eṯəḵem mîyaḏ ’ōyəḇêḵem missāḇîḇ watēšəḇû beṭ^aḥ:

12 watirə’û kî-nāḥāš meleḵə bənê-‘ammwōn bā’ ‘ălêḵem watō’mərû lî lō’ kî-meleḵə yiməlōḵə ‘ālênû wayhwâ ’ĕlōhêḵem maləkəḵem:

13 wə‘atâ hinnēh hammeleḵə ’ăšer bəḥarətem ’ăšer šə’elətem wəhinnēh nāṯan yəhwâ ‘ălêḵem meleḵə:

14 ’im-tîrə’û ’eṯ-yəhwâ w^a‘ăḇaḏətem ’ōṯwō ûšəm^a‘ətem bəqōlwō wəlō’ ṯamərû ’eṯ-pî yəhwâ wihəyiṯem gam-’atem wəḡam-hammeleḵə ’ăšer mālaḵə ‘ălêḵem ’^aḥar yəhwâ ’ĕlōhêḵem:

15 wə’im-lō’ ṯišəmə‘û bəqwōl yəhwâ ûmərîṯem ’eṯ-pî yəhwâ wəhāyəṯâ yaḏ-yəhwâ bāḵem ûḇa’ăḇōṯêḵem:

16 gam-‘atâ hiṯəyaṣṣəḇû ûrə’û ’eṯ-hadāḇār hagāḏwōl hazzeh ’ăšer yəhwâ ‘ōśeh lə‘ênêḵem:

17 hălwō’ qəṣîr-ḥiṭṭîm hayywōm ’eqərā’ ’el-yəhwâ wəyitēn qōlwōṯ ûmāṭār ûḏə‘û ûrə’û kî-rā‘aṯəḵem rabâ ’ăšer ‘ăśîṯem bə‘ênê yəhwâ lišə’wōl lāḵem meleḵə: s

18 wayyiqərā’ šəmû’ēl ’el-yəhwâ wayyitēn yəhwâ qōlōṯ ûmāṭār bayywōm hahû’ wayyîrā’ ḵāl-hā‘ām mə’ōḏ ’eṯ-yəhwâ wə’eṯ-šəmû’ēl:

19 wayyō’mərû ḵāl-hā‘ām ’el-šəmû’ēl hiṯəpallēl bə‘aḏ-‘ăḇāḏeyḵā ’el-yəhwâ ’ĕlōheyḵā wə’al-nāmûṯ kî-yāsafənû ‘al-kāl-ḥaṭṭō’ṯênû rā‘â lišə’ōl lānû meleḵə: s

20 wayyō’mer šəmû’ēl ’el-hā‘ām ’al-tîrā’û ’atem ‘ăśîṯem ’ēṯ kāl-hārā‘â hazzō’ṯ ’aḵə ’al-tāsûrû mē’^aḥărê yəhwâ w^a‘ăḇaḏətem ’eṯ-yəhwâ bəḵāl-ləḇaḇəḵem:

21 wəlō’ tāsûrû kî| ’^aḥărê hatōhû ’ăšer lō’-ywō‘îlû wəlō’ yaṣṣîlû kî-ṯōhû hēmmâ:

22 kî lō’-yiṭṭōš yəhwâ ’eṯ-‘ammwō b^a‘ăḇûr šəmwō hagāḏwōl kî hwō’îl yəhwâ l^a‘ăśwōṯ ’eṯəḵem lwō lə‘ām:

23 gam ’ānōḵî ḥālîlâ llî mēḥăṭō’ layhwâ mēḥăḏōl ləhiṯəpallēl b^a‘aḏəḵem wəhwōrêṯî ’eṯəḵem bəḏereḵə haṭṭwōḇâ wəhayəšārâ:

24 ’aḵə| yər’û ’eṯ-yəhwâ w^a‘ăḇaḏətem ’ōṯwō be’ĕmeṯ bəḵāl-ləḇaḇəḵem kî rə’û ’ēṯ ’ăšer-hiḡədil ‘immāḵem:

25 wə’im-hārē‘a tārē‘û gam-’atem gam-maləkəḵem tissāfû: f