1 Samuel (1 Shmuel) Chapter 15

‎1 ‏וַיֹּ֤אמֶר שְׁמוּאֵל֙ אֶל־שָׁא֔וּל אֹתִ֨י שָׁלַ֤ח יְהוָה֙ לִמְשָׁחֳךָ֣ לְמֶ֔לֶךְ עַל־עַמּ֖וֹ עַל־יִשְׂרָאֵ֑ל וְעַתָּ֣ה שְׁמַ֔ע לְק֖וֹל דִּבְרֵ֥י יְהוָֽה׃ ס

‎2 ‏כֹּ֤ה אָמַר֙ יְהוָ֣ה צְבָא֔וֹת פָּקַ֕דְתִּי אֵ֛ת אֲשֶׁר־עָשָׂ֥ה עֲמָלֵ֖ק לְיִשְׂרָאֵ֑ל אֲשֶׁר־שָׂ֥ם לוֹ֙ בַּדֶּ֔רֶךְ בַּעֲלֹת֖וֹ מִמִּצְרָֽיִם׃

‎3 ‏עַתָּה֩ לֵ֨ךְ וְהִכִּֽיתָ֜ה אֶת־עֲמָלֵ֗ק וְהַֽחֲרַמְתֶּם֙ אֶת־כָּל־אֲשֶׁר־ל֔וֹ וְלֹ֥א תַחְמֹ֖ל עָלָ֑יו וְהֵמַתָּ֞ה מֵאִ֣ישׁ עַד־אִשָּׁ֗ה מֵֽעֹלֵל֙ וְעַד־יוֹנֵ֔ק מִשּׁ֣וֹר וְעַד־שֶׂ֔ה מִגָּמָ֖ל וְעַד־חֲמֽוֹר׃ ס

‎4 ‏וַיְשַׁמַּ֤ע שָׁאוּל֙ אֶת־הָעָ֔ם וַֽיִּפְקְדֵם֙ בַּטְּלָאִ֔ים מָאתַ֥יִם אֶ֖לֶף רַגְלִ֑י וַעֲשֶׂ֥רֶת אֲלָפִ֖ים אֶת־אִ֥ישׁ יְהוּדָֽה׃

‎5 ‏וַיָּבֹ֥א שָׁא֖וּל עַד־עִ֣יר עֲמָלֵ֑ק וַיָּ֖רֶב בַּנָּֽחַל׃

‎6 ‏וַיֹּ֣אמֶר שָׁא֣וּל אֶֽל־הַקֵּינִ֡י לְכוּ֩ סֻּ֨רוּ³ רְד֜וּ מִתּ֣וֹךְ עֲמָלֵקִ֗י פֶּן־אֹֽסִפְךָ֙ עִמּ֔וֹ וְאַתָּ֞ה עָשִׂ֤יתָה חֶ֙סֶד֙ עִם־כָּל־בְּנֵ֣י יִשְׂרָאֵ֔ל בַּעֲלוֹתָ֖ם מִמִּצְרָ֑יִם וַיָּ֥סַר קֵינִ֖י מִתּ֥וֹךְ עֲמָלֵֽק׃

‎7 ‏וַיַּ֥ךְ שָׁא֖וּל אֶת־עֲמָלֵ֑ק מֵֽחֲוִילָה֙ בּוֹאֲךָ֣ שׁ֔וּר אֲשֶׁ֖ר עַל־פְּנֵ֥י מִצְרָֽיִם׃

‎8 ‏וַיִּתְפֹּ֛שׂ אֶת־אֲגַ֥ג מֶֽלֶךְ־עֲמָלֵ֖ק חָ֑י וְאֶת־כָּל־הָעָ֖ם הֶחֱרִ֥ים לְפִי־חָֽרֶב׃

‎9 ‏וַיַּחְמֹל֩ שָׁא֨וּל וְהָעָ֜ם עַל־אֲגָ֗ג וְעַל־מֵיטַ֣ב הַצֹּאן֩ וְהַבָּקָ֨ר וְהַמִּשְׁנִ֤ים וְעַל־הַכָּרִים֙ וְעַל־כָּל־הַטּ֔וֹב וְלֹ֥א אָב֖וּ הַחֲרִימָ֑ם וְכָל־הַמְּלָאכָ֛ה נְמִבְזָ֥ה וְנָמֵ֖ס אֹתָ֥הּ הֶחֱרִֽימוּ׃ פ

‎10 ‏וַֽיְהִי֙ דְּבַר־יְהוָ֔ה אֶל־שְׁמוּאֵ֖ל לֵאמֹֽר׃

‎11 ‏נִחַ֗מְתִּי כִּֽי־הִמְלַ֤כְתִּי אֶת־שָׁאוּל֙ לְמֶ֔לֶךְ כִּֽי־שָׁב֙ מֵאַֽחֲרַ֔י וְאֶת־דְּבָרַ֖י לֹ֣א הֵקִ֑ים וַיִּ֙חַר֙ לִשְׁמוּאֵ֔ל וַיִּזְעַ֥ק אֶל־יְהוָ֖ה כָּל־הַלָּֽיְלָה׃

‎12 ‏וַיַּשְׁכֵּ֧ם שְׁמוּאֵ֛ל לִקְרַ֥את שָׁא֖וּל בַּבֹּ֑קֶר וַיֻּגַּ֨ד לִשְׁמוּאֵ֜ל לֵאמֹ֗ר בָּֽא־שָׁא֤וּל הַכַּרְמֶ֙לָה֙ וְהִנֵּ֨ה מַצִּ֥יב לוֹ֙ יָ֔ד וַיִּסֹּב֙ וַֽיַּעֲבֹ֔ר וַיֵּ֖רֶד הַגִּלְגָּֽל׃

‎13 ‏וַיָּבֹ֥א שְׁמוּאֵ֖ל אֶל־שָׁא֑וּל וַיֹּ֧אמֶר ל֣וֹ שָׁא֗וּל בָּר֤וּךְ אַתָּה֙ לַֽיהוָ֔ה הֲקִימֹ֖תִי אֶת־דְּבַ֥ר יְהוָֽה׃

‎14 ‏וַיֹּ֣אמֶר שְׁמוּאֵ֔ל וּמֶ֛ה קֽוֹל־הַצֹּ֥אן הַזֶּ֖ה בְּאָזְנָ֑י וְק֣וֹל הַבָּקָ֔ר אֲשֶׁ֥ר אָנֹכִ֖י שֹׁמֵֽעַ׃

‎15 ‏וַיֹּ֨אמֶר שָׁא֜וּל מֵעֲמָלֵקִ֣י הֱבִיא֗וּם אֲשֶׁ֨ר חָמַ֤ל הָעָם֙ עַל־מֵיטַ֤ב הַצֹּאן֙ וְהַבָּקָ֔ר לְמַ֥עַן זְבֹ֖חַ לַיהוָ֣ה אֱלֹהֶ֑יךָ וְאֶת־הַיּוֹתֵ֖ר הֶחֱרַֽמְנוּ׃ ס

‎16 ‏וַיֹּ֤אמֶר שְׁמוּאֵל֙ אֶל־שָׁא֔וּל הֶ֚רֶף וְאַגִּ֣ידָה לְּךָ֔ אֵת֩ אֲשֶׁ֨ר דִּבֶּ֧ר יְהוָ֛ה אֵלַ֖י הַלָּ֑יְלָה ויאמרו וַיֹּ֥אמֶר ל֖וֹ דַּבֵּֽר׃ ס

‎17 ‏וַיֹּ֣אמֶר שְׁמוּאֵ֔ל הֲל֗וֹא אִם־קָטֹ֤ן אַתָּה֙ בְּעֵינֶ֔יךָ רֹ֛אשׁ שִׁבְטֵ֥י יִשְׂרָאֵ֖ל אָ֑תָּה וַיִּמְשָׁחֲךָ֧ יְהוָ֛ה לְמֶ֖לֶךְ עַל־יִשְׂרָאֵֽל׃

‎18 ‏וַיִּשְׁלָחֲךָ֥ יְהוָ֖ה בְּדָ֑רֶךְ וַיֹּ֗אמֶר לֵ֣ךְ וְהַחֲרַמְתָּ֞ה אֶת־הַֽחַטָּאִים֙ אֶת־עֲמָלֵ֔ק וְנִלְחַמְתָּ֣ ב֔וֹ עַ֥ד כַּלּוֹתָ֖ם אֹתָֽם׃

‎19 ‏וְלָ֥מָּה לֹא־שָׁמַ֖עְתָּ בְּק֣וֹל יְהוָ֑ה וַתַּ֙עַט֙ אֶל־הַשָּׁלָ֔ל וַתַּ֥עַשׂ הָרַ֖ע בְּעֵינֵ֥י יְהוָֽה׃ ס

‎20 ‏וַיֹּ֨אמֶר שָׁא֜וּל אֶל־שְׁמוּאֵ֗ל אֲשֶׁ֤ר שָׁמַ֙עְתִּי֙ בְּק֣וֹל יְהוָ֔ה וָאֵלֵ֕ךְ בַּדֶּ֖רֶךְ אֲשֶׁר־שְׁלָחַ֣נִי יְהוָ֑ה וָאָבִ֗יא אֶת־אֲגַג֙ מֶ֣לֶךְ עֲמָלֵ֔ק וְאֶת־עֲמָלֵ֖ק הֶחֱרַֽמְתִּי׃

‎21 ‏וַיִּקַּ֨ח הָעָ֧ם מֵהַשָּׁלָ֛ל צֹ֥אן וּבָקָ֖ר רֵאשִׁ֣ית הַחֵ֑רֶם לִזְבֹּ֛חַ לַֽיהוָ֥ה אֱלֹהֶ֖יךָ בַּגִּלְגָּֽל׃

‎22 ‏וַיֹּ֣אמֶר שְׁמוּאֵ֗ל הַחֵ֤פֶץ לַֽיהוָה֙ בְּעֹל֣וֹת וּזְבָחִ֔ים כִּשְׁמֹ֖עַ בְּק֣וֹל יְהוָ֑ה הִנֵּ֤ה שְׁמֹ֙עַ֙ מִזֶּ֣בַח ט֔וֹב לְהַקְשִׁ֖יב מֵחֵ֥לֶב אֵילִֽים׃

‎23 ‏כִּ֤י חַטַּאת־קֶ֙סֶם֙ מֶ֔רִי וְאָ֥וֶן וּתְרָפִ֖ים הַפְצַ֑ר יַ֗עַן מָאַ֙סְתָּ֙ אֶת־דְּבַ֣ר יְהוָ֔ה וַיִּמְאָסְךָ֖ מִמֶּֽלֶךְ׃ ס

‎24 ‏וַיֹּ֨אמֶר שָׁא֤וּל אֶל־שְׁמוּאֵל֙ חָטָ֔אתִי כִּֽי־עָבַ֥רְתִּי אֶת־פִּֽי־יְהוָ֖ה וְאֶת־דְּבָרֶ֑יךָ כִּ֤י יָרֵ֙אתִי֙ אֶת־הָעָ֔ם וָאֶשְׁמַ֖ע בְּקוֹלָֽם׃

‎25 ‏וְעַתָּ֕ה שָׂ֥א נָ֖א אֶת־חַטָּאתִ֑י וְשׁ֣וּב עִמִּ֔י וְאֶֽשְׁתַּחֲוֶ֖ה לַֽיהוָֽה׃

‎26 ‏וַיֹּ֤אמֶר שְׁמוּאֵל֙ אֶל־שָׁא֔וּל לֹ֥א אָשׁ֖וּב עִמָּ֑ךְ כִּ֤י מָאַ֙סְתָּה֙ אֶת־דְּבַ֣ר יְהוָ֔ה וַיִּמְאָסְךָ֣ יְהוָ֔ה מִהְי֥וֹת מֶ֖לֶךְ עַל־יִשְׂרָאֵֽל׃ ס

‎27 ‏וַיִּסֹּ֥ב שְׁמוּאֵ֖ל לָלֶ֑כֶת וַיַּחֲזֵ֥ק בִּכְנַף־מְעִיל֖וֹ וַיִּקָּרַֽע׃

‎28 ‏וַיֹּ֤אמֶר אֵלָיו֙ שְׁמוּאֵ֔ל קָרַ֨ע יְהוָ֜ה אֶֽת־מַמְלְכ֧וּת יִשְׂרָאֵ֛ל מֵעָלֶ֖יךָ הַיּ֑וֹם וּנְתָנָ֕הּ לְרֵעֲךָ֖ הַטּ֥וֹב מִמֶּֽךָּ׃

‎29 ‏וְגַם֙ נֵ֣צַח יִשְׂרָאֵ֔ל לֹ֥א יְשַׁקֵּ֖ר וְלֹ֣א יִנָּחֵ֑ם כִּ֣י לֹ֥א אָדָ֛ם ה֖וּא לְהִנָּחֵֽם׃

‎30 ‏וַיֹּ֣אמֶר חָטָ֔אתִי עַתָּ֗ה כַּבְּדֵ֥נִי נָ֛א נֶ֥גֶד זִקְנֵֽי־עַמִּ֖י וְנֶ֣גֶד יִשְׂרָאֵ֑ל וְשׁ֣וּב עִמִּ֔י וְהִֽשְׁתַּחֲוֵ֖יתִי לַֽיהוָ֥ה אֱלֹהֶֽיךָ׃

‎31 ‏וַיָּ֥שָׁב שְׁמוּאֵ֖ל אַחֲרֵ֣י שָׁא֑וּל וַיִּשְׁתַּ֥חוּ שָׁא֖וּל לַֽיהוָֽה׃ ס

‎32 ‏וַיֹּ֣אמֶר שְׁמוּאֵ֗ל הַגִּ֤ישׁוּ אֵלַי֙ אֶת־אֲגַג֙ מֶ֣לֶךְ עֲמָלֵ֔ק וַיֵּ֣לֶךְ אֵלָ֔יו אֲגַ֖ג מַעֲדַנֹּ֑ת וַיֹּ֣אמֶר אֲגָ֔ג אָכֵ֖ן סָ֥ר מַר־הַמָּֽוֶת׃ ס

‎33 ‏וַיֹּ֣אמֶר שְׁמוּאֵ֔ל כַּאֲשֶׁ֨ר שִׁכְּלָ֤ה נָשִׁים֙ חַרְבֶּ֔ךָ כֵּן־תִּשְׁכַּ֥ל מִנָּשִׁ֖ים אִמֶּ֑ךָ וַיְשַׁסֵּ֨ף שְׁמוּאֵ֧ל אֶת־אֲגָ֛ג לִפְנֵ֥י יְהוָ֖ה בַּגִּלְגָּֽל׃ ס

‎34 ‏וַיֵּ֥לֶךְ שְׁמוּאֵ֖ל הָרָמָ֑תָה וְשָׁא֛וּל עָלָ֥ה אֶל־בֵּית֖וֹ גִּבְעַ֥ת שָׁאֽוּל׃

‎35 ‏וְלֹא־יָסַ֨ף שְׁמוּאֵ֜ל לִרְא֤וֹת אֶת־שָׁאוּל֙ עַד־י֣וֹם מוֹת֔וֹ כִּֽי־הִתְאַבֵּ֥ל שְׁמוּאֵ֖ל אֶל־שָׁא֑וּל וַיהוָ֣ה נִחָ֔ם כִּֽי־הִמְלִ֥יךְ אֶת־שָׁא֖וּל עַל־יִשְׂרָאֵֽל׃ פ

1 wayyō’mer šəmû’ēl ’el-šā’ûl ’ōṯî šāl^aḥ yəhwâ liməšāḥŏḵā ləmeleḵə ‘al-‘ammwō ‘al-yiśərā’ēl wə‘atâ šəm^a‘ ləqwōl diḇərê yəhwâ: s

2 kōh ’āmar yəhwâ ṣəḇā’wōṯ pāqaḏətî ’ēṯ ’ăšer-‘āśâ ‘ămālēq ləyiśərā’ēl ’ăšer-śām lwō badereḵə b^a‘ălōṯwō mimmiṣərāyim:

3 ‘atâ lēḵə wəhikîṯâ ’eṯ-‘ămālēq wəh^aḥăramətem ’eṯ-kāl-’ăšer-lwō wəlō’ ṯ^aḥəmōl ‘ālāyw wəhēmatâ mē’îš ‘aḏ-’iššâ mē‘ōlēl wə‘aḏ-ywōnēq miššwōr wə‘aḏ-śeh migāmāl wə‘aḏ-ḥămwōr: s

4 wayəšamm^a‘ šā’ûl ’eṯ-hā‘ām wayyifəqəḏēm baṭṭəlā’îm mā’ṯayim ’elef raḡəlî w^a‘ăśereṯ ’ălāfîm ’eṯ-’îš yəhûḏâ:

5 wayyāḇō’ šā’ûl ‘aḏ-‘îr ‘ămālēq wayyāreḇ bannāḥal:

6 wayyō’mer šā’ûl ’el-haqqênî ləḵû ssurû³ rəḏû mitwōḵə ‘ămālēqî pen-’ōsifəḵā ‘immwō wə’atâ ‘āśîṯâ ḥeseḏ ‘im-kāl-bənê yiśərā’ēl b^a‘ălwōṯām mimmiṣərāyim wayyāsar qênî mitwōḵə ‘ămālēq:

7 wayyaḵə šā’ûl ’eṯ-‘ămālēq mēḥăwîlâ bwō’ăḵā šûr ’ăšer ‘al-pənê miṣərāyim:

8 wayyiṯəpōś ’eṯ-’ăḡaḡ meleḵə-‘ămālēq ḥāy wə’eṯ-kāl-hā‘ām heḥĕrîm ləfî-ḥāreḇ:

9 wayy^aḥəmōl šā’ûl wəhā‘ām ‘al-’ăḡāḡ wə‘al-mêṭaḇ haṣṣō’n wəhabāqār wəhammišənîm wə‘al-hakārîm wə‘al-kāl-haṭṭwōḇ wəlō’ ’āḇû h^aḥărîmām wəḵāl-hamməlā’ḵâ nəmiḇəzâ wənāmēs ’ōṯāh heḥĕrîmû: f

10 wayəhî dəḇar-yəhwâ ’el-šəmû’ēl lē’mōr:

11 niḥamətî kî-himəlaḵətî ’eṯ-šā’ûl ləmeleḵə kî-šāḇ mē’^aḥăray wə’eṯ-dəḇāray lō’ hēqîm wayyiḥar lišəmû’ēl wayyizə‘aq ’el-yəhwâ kāl-hallāyəlâ:

12 wayyašəkēm šəmû’ēl liqəra’ṯ šā’ûl babōqer wayyugaḏ lišəmû’ēl lē’mōr bā’-šā’ûl hakarəmelâ wəhinnēh maṣṣîḇ lwō yāḏ wayyissōḇ wayy^a‘ăḇōr wayyēreḏ hagiləgāl:

13 wayyāḇō’ šəmû’ēl ’el-šā’ûl wayyō’mer lwō šā’ûl bārûḵə ’atâ layhwâ hăqîmōṯî ’eṯ-dəḇar yəhwâ:

14 wayyō’mer šəmû’ēl ûmeh qwōl-haṣṣō’n hazzeh bə’āzənāy wəqwōl habāqār ’ăšer ’ānōḵî šōmē‘a:

15 wayyō’mer šā’ûl mē‘ămālēqî hĕḇî’ûm ’ăšer ḥāmal hā‘ām ‘al-mêṭaḇ haṣṣō’n wəhabāqār ləm^a‘an zəḇōḥa layhwâ ’ĕlōheyḵā wə’eṯ-hayywōṯēr heḥĕramənû: s

16 wayyō’mer šəmû’ēl ’el-šā’ûl heref wə’agîḏâ lləḵā ’ēṯ ’ăšer diber yəhwâ ’ēlay hallāyəlâ wayyō’mərû wayyō’mer lwō dabēr: s

17 wayyō’mer šəmû’ēl hălwō’ ’im-qāṭōn ’atâ bə‘êneyḵā rō’š šiḇəṭê yiśərā’ēl ’ātâ wayyiməšāḥăḵā yəhwâ ləmeleḵə ‘al-yiśərā’ēl:

18 wayyišəlāḥăḵā yəhwâ bəḏāreḵə wayyō’mer lēḵə wəh^aḥăramətâ ’eṯ-h^aḥaṭṭā’îm ’eṯ-‘ămālēq wəniləḥamətā ḇwō ‘aḏ kallwōṯām ’ōṯām:

19 wəlāmmâ lō’-šām^a‘ətā bəqwōl yəhwâ wat^a‘aṭ ’el-haššālāl wat^a‘aś hār^a‘ bə‘ênê yəhwâ: s

20 wayyō’mer šā’ûl ’el-šəmû’ēl ’ăšer šām^a‘ətî bəqwōl yəhwâ wā’ēlēḵə badereḵə ’ăšer-šəlāḥanî yəhwâ wā’āḇî’ ’eṯ-’ăḡaḡ meleḵə ‘ămālēq wə’eṯ-‘ămālēq heḥĕramətî:

21 wayyiqq^aḥ hā‘ām mēhaššālāl ṣō’n ûḇāqār rē’šîṯ h^aḥērem lizəbōḥa layhwâ ’ĕlōheyḵā bagiləgāl:

22 wayyō’mer šəmû’ēl h^aḥēfeṣ layhwâ bə‘ōlwōṯ ûzəḇāḥîm kišəmō‘a bəqwōl yəhwâ hinnēh šəmō‘a mizzeḇ^aḥ ṭwōḇ ləhaqəšîḇ mēḥēleḇ ’êlîm:

23 kî ḥaṭṭa’ṯ-qesem merî wə’āwen ûṯərāfîm hafəṣar y^a‘an mā’asətā ’eṯ-dəḇar yəhwâ wayyimə’āsəḵā mimmeleḵə: s

24 wayyō’mer šā’ûl ’el-šəmû’ēl ḥāṭā’ṯî kî-‘āḇarətî ’eṯ-pî-yəhwâ wə’eṯ-dəḇāreyḵā kî yārē’ṯî ’eṯ-hā‘ām wā’ešəm^a‘ bəqwōlām:

25 wə‘atâ śā’ nā’ ’eṯ-ḥaṭṭā’ṯî wəšûḇ ‘immî wə’ešət^aḥăweh layhwâ:

26 wayyō’mer šəmû’ēl ’el-šā’ûl lō’ ’āšûḇ ‘immāḵə kî mā’asətâ ’eṯ-dəḇar yəhwâ wayyimə’āsəḵā yəhwâ mihəywōṯ meleḵə ‘al-yiśərā’ēl: s

27 wayyissōḇ šəmû’ēl lāleḵeṯ wayy^aḥăzēq biḵənaf-mə‘îlwō wayyiqqār^a‘:

28 wayyō’mer ’ēlāyw šəmû’ēl qār^a‘ yəhwâ ’eṯ-mamələḵûṯ yiśərā’ēl mē‘āleyḵā hayywōm ûnəṯānāh lərē‘ăḵā haṭṭwōḇ mimmeḵḵā:

29 wəḡam nēṣ^aḥ yiśərā’ēl lō’ yəšaqqēr wəlō’ yinnāḥēm kî lō’ ’āḏām hû’ ləhinnāḥēm:

30 wayyō’mer ḥāṭā’ṯî ‘atâ kabəḏēnî nā’ neḡeḏ ziqənê-‘ammî wəneḡeḏ yiśərā’ēl wəšûḇ ‘immî wəhišət^aḥăwêṯî layhwâ ’ĕlōheyḵā:

31 wayyāšāḇ šəmû’ēl ’^aḥărê šā’ûl wayyišət^aḥû šā’ûl layhwâ: s

32 wayyō’mer šəmû’ēl hagîšû ’ēlay ’eṯ-’ăḡaḡ meleḵə ‘ămālēq wayyēleḵə ’ēlāyw ’ăḡaḡ m^a‘ăḏannōṯ wayyō’mer ’ăḡāḡ ’āḵēn sār mar-hammāweṯ: s

33 wayyō’mer šəmû’ēl ka’ăšer šikəlâ nāšîm ḥarəbeḵā kēn-tišəkal minnāšîm ’immeḵā wayəšassēf šəmû’ēl ’eṯ-’ăḡāḡ lifənê yəhwâ bagiləgāl: s

34 wayyēleḵə šəmû’ēl hārāmāṯâ wəšā’ûl ‘ālâ ’el-bêṯwō giḇə‘aṯ šā’ûl:

35 wəlō’-yāsaf šəmû’ēl lirə’wōṯ ’eṯ-šā’ûl ‘aḏ-ywōm mwōṯwō kî-hiṯə’abēl šəmû’ēl ’el-šā’ûl wayhwâ niḥām kî-himəlîḵə ’eṯ-šā’ûl ‘al-yiśərā’ēl: f