1 Samuel (1 Shmuel) Chapter 26

‎1 ‏וַיָּבֹ֤אוּ הַזִּפִים֙ אֶל־שָׁא֔וּל הַגִּבְעָ֖תָה לֵאמֹ֑ר הֲל֨וֹא דָוִ֤ד מִסְתַּתֵּר֙ בְּגִבְעַ֣ת הַחֲכִילָ֔ה עַ֖ל פְּנֵ֥י הַיְשִׁימֹֽן׃

‎2 ‏וַיָּ֣קָם שָׁא֗וּל וַיֵּ֙רֶד֙ אֶל־מִדְבַּר־זִ֔יף וְאִתּ֛וֹ שְׁלֹֽשֶׁת־אֲלָפִ֥ים אִ֖ישׁ בְּחוּרֵ֣י יִשְׂרָאֵ֑ל לְבַקֵּ֥שׁ אֶת־דָּוִ֖ד בְּמִדְבַּר־זִֽיף׃

‎3 ‏וַיִּ֨חַן שָׁא֜וּל בְּגִבְעַ֣ת הַחֲכִילָ֗ה אֲשֶׁ֛ר עַל־פְּנֵ֥י הַיְשִׁימֹ֖ן עַל־הַדָּ֑רֶךְ וְדָוִד֙ יֹשֵׁ֣ב בַּמִּדְבָּ֔ר וַיַּ֕רְא כִּ֣י בָ֥א שָׁא֛וּל אַחֲרָ֖יו הַמִּדְבָּֽרָה׃

‎4 ‏וַיִּשְׁלַ֥ח דָּוִ֖ד מְרַגְּלִ֑ים וַיֵּ֕דַע כִּֽי־בָ֥א שָׁא֖וּל אֶל־נָכֽוֹן׃

‎5 ‏וַיָּ֣קָם דָּוִ֗ד וַיָּבֹא֮ אֶֽל־הַמָּקוֹם֮ אֲשֶׁ֣ר חָנָה־שָׁ֣ם שָׁאוּל֒ וַיַּ֣רְא דָּוִ֗ד אֶת־הַמָּקוֹם֙ אֲשֶׁ֣ר שָֽׁכַב־שָׁ֣ם שָׁא֔וּל וְאַבְנֵ֥ר בֶּן־נֵ֖ר שַׂר־צְבָא֑וֹ וְשָׁאוּל֙ שֹׁכֵ֣ב בַּמַּעְגָּ֔ל וְהָעָ֖ם חֹנִ֥ים סביבתו סְבִיבֹתָֽיו׃

‎6 ‏וַיַּ֨עַן דָּוִ֜ד וַיֹּ֣אמֶר׀ אֶל־אֲחִימֶ֣לֶךְ הַחִתִּ֗י וְאֶל־אֲבִישַׁ֨י בֶּן־צְרוּיָ֜ה אֲחִ֤י יוֹאָב֙ לֵאמֹ֔ר מִֽי־יֵרֵ֥ד אִתִּ֛י אֶל־שָׁא֖וּל אֶל־הַֽמַּחֲנֶ֑ה וַיֹּ֣אמֶר אֲבִישַׁ֔י אֲנִ֖י אֵרֵ֥ד עִמָּֽךְ׃

‎7 ‏וַיָּבֹא֩ דָוִ֨ד וַאֲבִישַׁ֥י׀ אֶל־הָעָם֮ לַיְלָה֒ וְהִנֵּ֣ה שָׁא֗וּל שֹׁכֵ֤ב יָשֵׁן֙ בַּמַּעְגָּ֔ל וַחֲנִית֥וֹ מְעוּכָֽה־בָאָ֖רֶץ מראשתו מְרַאֲשֹׁתָ֑יו וְאַבְנֵ֣ר וְהָעָ֔ם שֹׁכְבִ֖ים סביבתו סְבִיבֹתָֽיו׃ ס

‎8 ‏וַיֹּ֤אמֶר אֲבִישַׁי֙ אֶל־דָּוִ֔ד סִגַּ֨ר אֱלֹהִ֥ים הַיּ֛וֹם אֶת־אוֹיִבְךָ֖ בְּיָדֶ֑ךָ וְעַתָּה֩ אַכֶּ֨נּוּ נָ֜א בַּחֲנִ֤ית וּבָאָ֙רֶץ֙ פַּ֣עַם אַחַ֔ת וְלֹ֥א אֶשְׁנֶ֖ה לֽוֹ׃

‎9 ‏וַיֹּ֧אמֶר דָּוִ֛ד אֶל־אֲבִישַׁ֖י אַל־תַּשְׁחִיתֵ֑הוּ כִּ֠י מִ֣י שָׁלַ֥ח יָד֛וֹ בִּמְשִׁ֥יחַ יְהוָ֖ה וְנִקָּֽה׃ פ

‎10 ‏וַיֹּ֤אמֶר דָּוִד֙ חַי־יְהוָ֔ה כִּ֥י אִם־יְהוָ֖ה יִגָּפֶ֑נּוּ אֽוֹ־יוֹמ֤וֹ יָבוֹא֙ וָמֵ֔ת א֧וֹ בַמִּלְחָמָ֛ה יֵרֵ֖ד וְנִסְפָּֽה׃

‎11 ‏חָלִ֤ילָה לִּי֙ מֵֽיהוָ֔ה מִשְּׁלֹ֥חַ יָדִ֖י בִּמְשִׁ֣יחַ יְהוָ֑ה וְ֠עַתָּה קַח־נָ֨א אֶֽת־הַחֲנִ֜ית אֲשֶׁ֧ר מראשתו מְרַאֲשֹׁתָ֛יו וְאֶת־צַפַּ֥חַת הַמַּ֖יִם וְנֵ֥לֲכָה לָּֽנוּ׃

‎12 ‏וַיִּקַּח֩ דָּוִ֨ד אֶֽת־הַחֲנִ֜ית וְאֶת־צַפַּ֤חַת הַמַּ֙יִם֙ מֵרַאֲשֹׁתֵ֣י שָׁא֔וּל וַיֵּלְכ֖וּ לָהֶ֑ם וְאֵ֣ין רֹאֶה֩ וְאֵ֨ין יוֹדֵ֜עַ וְאֵ֣ין מֵקִ֗יץ כִּ֤י כֻלָּם֙ יְשֵׁנִ֔ים כִּ֚י תַּרְדֵּמַ֣ת יְהוָ֔ה נָפְלָ֖ה עֲלֵיהֶֽם׃

‎13 ‏וַיַּעֲבֹ֤ר דָּוִד֙ הָעֵ֔בֶר וַיַּעֲמֹ֥ד עַל־רֹאשׁ־הָהָ֖ר מֵֽרָחֹ֑ק רַ֥ב הַמָּק֖וֹם בֵּינֵיהֶֽם׃

‎14 ‏וַיִּקְרָ֨א דָוִ֜ד אֶל־הָעָ֗ם וְאֶל־אַבְנֵ֤ר בֶּן־נֵר֙ לֵאמֹ֔ר הֲל֥וֹא תַעֲנֶ֖ה אַבְנֵ֑ר וַיַּ֤עַן אַבְנֵר֙ וַיֹּ֔אמֶר מִ֥י אַתָּ֖ה קָרָ֥אתָ אֶל־הַמֶּֽלֶךְ׃ פ

‎15 ‏וַיֹּאמֶר֩ דָּוִ֨ד אֶל־אַבְנֵ֜ר הֲלוֹא־אִ֣ישׁ אַתָּ֗ה וּמִ֤י כָמ֙וֹךָ֙ בְּיִשְׂרָאֵ֔ל וְלָ֙מָּה֙ לֹ֣א שָׁמַ֔רְתָּ אֶל־אֲדֹנֶ֖יךָ הַמֶּ֑לֶךְ כִּי־בָא֙ אַחַ֣ד הָעָ֔ם לְהַשְׁחִ֖ית אֶת־הַמֶּ֥לֶךְ אֲדֹנֶֽיךָ׃

‎16 ‏לֹא־ט֞וֹב הַדָּבָ֣ר הַזֶּה֮ אֲשֶׁ֣ר עָשִׂיתָ֒ חַי־יְהוָ֗ה כִּ֤י בְנֵי־מָ֙וֶת֙ אַתֶּ֔ם אֲשֶׁ֧ר לֹֽא־שְׁמַרְתֶּ֛ם עַל־אֲדֹנֵיכֶ֖ם עַל־מְשִׁ֣יחַ יְהוָ֑ה וְעַתָּ֣ה׀ רְאֵ֗ה אֵֽי־חֲנִ֥ית הַמֶּ֛לֶךְ וְאֶת־צַפַּ֥חַת הַמַּ֖יִם אֲשֶׁ֥ר מראשתו מְרַאֲשֹׁתָֽיו׃

‎17 ‏וַיַּכֵּ֤ר שָׁאוּל֙ אֶת־ק֣וֹל דָּוִ֔ד וַיֹּ֕אמֶר הֲקוֹלְךָ֥ זֶ֖ה בְּנִ֣י דָוִ֑ד וַיֹּ֣אמֶר דָּוִ֔ד קוֹלִ֖י אֲדֹנִ֥י הַמֶּֽלֶךְ׃

‎18 ‏וַיֹּ֕אמֶר לָ֥מָּה זֶּ֛ה אֲדֹנִ֥י רֹדֵ֖ף אַחֲרֵ֣י עַבְדּ֑וֹ כִּ֚י מֶ֣ה עָשִׂ֔יתִי וּמַה־בְּיָדִ֖י רָעָֽה׃

‎19 ‏וְעַתָּ֗ה יִֽשְׁמַֽע־נָא֙ אֲדֹנִ֣י הַמֶּ֔לֶךְ אֵ֖ת דִּבְרֵ֣י עַבְדּ֑וֹ אִם־יְהוָ֞ה הֱסִֽיתְךָ֥ בִי֙ יָרַ֣ח מִנְחָ֔ה וְאִ֣ם׀ בְּנֵ֣י הָאָדָ֗ם אֲרוּרִ֥ים הֵם֙ לִפְנֵ֣י יְהוָ֔ה כִּֽי־גֵרְשׁ֣וּנִי הַיּ֗וֹם מֵהִסְתַּפֵּ֜חַ בְּנַחֲלַ֤ת יְהוָה֙ לֵאמֹ֔ר לֵ֥ךְ עֲבֹ֖ד אֱלֹהִ֥ים אֲחֵרִֽים׃

‎20 ‏וְעַתָּ֗ה אַל־יִפֹּ֤ל דָּֽמִי֙ אַ֔רְצָה מִנֶּ֖גֶד פְּנֵ֣י יְהוָ֑ה כִּֽי־יָצָ֞א מֶ֣לֶךְ יִשְׂרָאֵ֗ל לְבַקֵּשׁ֙ אֶת־פַּרְעֹ֣שׁ אֶחָ֔ד כַּאֲשֶׁ֛ר יִרְדֹּ֥ף הַקֹּרֵ֖א בֶּהָרִֽים׃

‎21 ‏וַיֹּאמֶר֩ שָׁא֨וּל חָטָ֜אתִי שׁ֣וּב בְּנִֽי־דָוִ֗ד כִּ֠י לֹֽא־אָרַ֤ע לְךָ֙ ע֔וֹד תַּ֠חַת אֲשֶׁ֨ר יָקְרָ֥ה נַפְשִׁ֛י בְּעֵינֶ֖יךָ הַיּ֣וֹם הַזֶּ֑ה הִנֵּ֥ה הִסְכַּ֛לְתִּי וָאֶשְׁגֶּ֖ה הַרְבֵּ֥ה מְאֹֽד׃

‎22 ‏וַיַּ֤עַן דָּוִד֙ וַיֹּ֔אמֶר הִנֵּ֖ה החנית חֲנִ֣ית הַמֶּ֑לֶךְ וְיַעֲבֹ֛ר אֶחָ֥ד מֵֽהַנְּעָרִ֖ים וְיִקָּחֶֽהָ׃

‎23 ‏וַֽיהוָה֙ יָשִׁ֣יב לָאִ֔ישׁ אֶת־צִדְקָת֖וֹ וְאֶת־אֱמֻנָת֑וֹ אֲשֶׁר֩ נְתָנְךָ֙ יְהוָ֤ה׀ הַיּוֹם֙ בְּיָ֔ד וְלֹ֣א אָבִ֔יתִי לִשְׁלֹ֥חַ יָדִ֖י בִּמְשִׁ֥יחַ יְהוָֽה׃

‎24 ‏וְהִנֵּ֗ה כַּאֲשֶׁ֨ר גָּדְלָ֧ה נַפְשְׁךָ֛ הַיּ֥וֹם הַזֶּ֖ה בְּעֵינָ֑י כֵּ֣ן תִּגְדַּ֤ל נַפְשִׁי֙ בְּעֵינֵ֣י יְהוָ֔ה וְיַצִּלֵ֖נִי מִכָּל־צָרָֽה׃ פ

‎25 ‏וַיֹּ֨אמֶר שָׁא֜וּל אֶל־דָּוִ֗ד בָּר֤וּךְ אַתָּה֙ בְּנִ֣י דָוִ֔ד גַּ֚ם עָשֹׂ֣ה תַעֲשֶׂ֔ה וְגַ֖ם יָכֹ֣ל תּוּכָ֑ל וַיֵּ֤לֶךְ דָּוִד֙ לְדַרְכּ֔וֹ וְשָׁא֖וּל שָׁ֥ב לִמְקוֹמֽוֹ׃ פ

1 wayyāḇō’û hazzifîm ’el-šā’ûl hagiḇə‘āṯâ lē’mōr hălwō’ ḏāwiḏ misətatēr bəḡiḇə‘aṯ h^aḥăḵîlâ ‘al pənê hayəšîmōn:

2 wayyāqām šā’ûl wayyēreḏ ’el-miḏəbar-zîf wə’itwō šəlōšeṯ-’ălāfîm ’îš bəḥûrê yiśərā’ēl ləḇaqqēš ’eṯ-dāwiḏ bəmiḏəbar-zîf:

3 wayyiḥan šā’ûl bəḡiḇə‘aṯ h^aḥăḵîlâ ’ăšer ‘al-pənê hayəšîmōn ‘al-hadāreḵə wəḏāwiḏ yōšēḇ bammiḏəbār wayyarə’ kî ḇā’ šā’ûl ’^aḥărāyw hammiḏəbārâ:

4 wayyišəl^aḥ dāwiḏ məragəlîm wayyēḏ^a‘ kî-ḇā’ šā’ûl ’el-nāḵwōn:

5 wayyāqām dāwiḏ wayyāḇō’ ’el-hammāqwōm ’ăšer ḥānâ-šām šā’ûl wayyarə’ dāwiḏ ’eṯ-hammāqwōm ’ăšer šāḵaḇ-šām šā’ûl wə’aḇənēr ben-nēr śar-ṣəḇā’wō wəšā’ûl šōḵēḇ bamm^a‘əgāl wəhā‘ām ḥōnîm səḇîḇōṯāw səḇîḇōṯāyw:

6 wayy^a‘an dāwiḏ wayyō’mer| ’el-’ăḥîmeleḵə h^aḥitî wə’el-’ăḇîšay ben-ṣərûyâ ’ăḥî ywō’āḇ lē’mōr mî-yērēḏ ’itî ’el-šā’ûl ’el-hamm^aḥăneh wayyō’mer ’ăḇîšay ’ănî ’ērēḏ ‘immāḵə:

7 wayyāḇō’ ḏāwiḏ wa’ăḇîšay| ’el-hā‘ām layəlâ wəhinnēh šā’ûl šōḵēḇ yāšēn bamm^a‘əgāl w^aḥănîṯwō mə‘ûḵâ-ḇā’āreṣ məra’ăšōṯāw məra’ăšōṯāyw wə’aḇənēr wəhā‘ām šōḵəḇîm səḇîḇōṯāw səḇîḇōṯāyw: s

8 wayyō’mer ’ăḇîšay ’el-dāwiḏ sigar ’ĕlōhîm hayywōm ’eṯ-’wōyiḇəḵā bəyāḏeḵā wə‘atâ ’akennû nā’ b^aḥănîṯ ûḇā’āreṣ p^a‘am ’^aḥaṯ wəlō’ ’ešəneh lwō:

9 wayyō’mer dāwiḏ ’el-’ăḇîšay ’al-tašəḥîṯēhû kî mî šāl^aḥ yāḏwō biməšîḥa yəhwâ wəniqqâ: f

10 wayyō’mer dāwiḏ ḥay-yəhwâ kî ’im-yəhwâ yigāfennû ’wō-ywōmwō yāḇwō’ wāmēṯ ’wō ḇammiləḥāmâ yērēḏ wənisəpâ:

11 ḥālîlâ llî mêhwâ miššəlōḥa yāḏî biməšîḥa yəhwâ wə‘atâ q^aḥ-nā’ ’eṯ-h^aḥănîṯ ’ăšer məra’ăšōṯāw məra’ăšōṯāyw wə’eṯ-ṣap^aḥaṯ hammayim wənēlăḵâ llānû:

12 wayyiqq^aḥ dāwiḏ ’eṯ-h^aḥănîṯ wə’eṯ-ṣap^aḥaṯ hammayim mēra’ăšōṯê šā’ûl wayyēləḵû lâem wə’ên rō’eh wə’ên ywōḏē‘a wə’ên mēqîṣ kî ḵullām yəšēnîm kî tarədēmaṯ yəhwâ nāfəlâ ‘ălêhem:

13 wayy^a‘ăḇōr dāwiḏ hā‘ēḇer wayy^a‘ămōḏ ‘al-rō’š-hâār mērāḥōq raḇ hammāqwōm bênêhem:

14 wayyiqərā’ ḏāwiḏ ’el-hā‘ām wə’el-’aḇənēr ben-nēr lē’mōr hălwō’ ṯ^a‘ăneh ’aḇənēr wayy^a‘an ’aḇənēr wayyō’mer mî ’atâ qārā’ṯā ’el-hammeleḵə: f

15 wayyō’mer dāwiḏ ’el-’aḇənēr hălwō’-’îš ’atâ ûmî ḵāmwōḵā bəyiśərā’ēl wəlāmmâ lō’ šāmarətā ’el-’ăḏōneyḵā hammeleḵə kî-ḇā’ ’^aḥaḏ hā‘ām ləhašəḥîṯ ’eṯ-hammeleḵə ’ăḏōneyḵā:

16 lō’-ṭwōḇ hadāḇār hazzeh ’ăšer ‘āśîṯā ḥay-yəhwâ kî ḇənê-māweṯ ’atem ’ăšer lō’-šəmarətem ‘al-’ăḏōnêḵem ‘al-məšîḥa yəhwâ wə‘atâ| rə’ēh ’ê-ḥănîṯ hammeleḵə wə’eṯ-ṣap^aḥaṯ hammayim ’ăšer məra’ăšōṯāw məra’ăšōṯāyw:

17 wayyakēr šā’ûl ’eṯ-qwōl dāwiḏ wayyō’mer hăqwōləḵā zeh bənî ḏāwiḏ wayyō’mer dāwiḏ qwōlî ’ăḏōnî hammeleḵə:

18 wayyō’mer lāmmâ zzeh ’ăḏōnî rōḏēf ’^aḥărê ‘aḇədwō kî meh ‘āśîṯî ûmah-bəyāḏî rā‘â:

19 wə‘atâ yišəm^a‘-nā’ ’ăḏōnî hammeleḵə ’ēṯ diḇərê ‘aḇədwō ’im-yəhwâ hĕsîṯəḵā ḇî yār^aḥ minəḥâ wə’im| bənê hā’āḏām ’ărûrîm hēm lifənê yəhwâ kî-ḡērəšûnî hayywōm mēhisətapēḥa bən^aḥălaṯ yəhwâ lē’mōr lēḵə ‘ăḇōḏ ’ĕlōhîm ’ăḥērîm:

20 wə‘atâ ’al-yipōl dāmî ’arəṣâ minneḡeḏ pənê yəhwâ kî-yāṣā’ meleḵə yiśərā’ēl ləḇaqqēš ’eṯ-parə‘ōš ’eḥāḏ ka’ăšer yirədōf haqqōrē’ behārîm:

21 wayyō’mer šā’ûl ḥāṭā’ṯî šûḇ bənî-ḏāwiḏ kî lō’-’ār^a‘ ləḵā ‘wōḏ t^aḥaṯ ’ăšer yāqərâ nafəšî bə‘êneyḵā hayywōm hazzeh hinnēh hisəkalətî wā’ešəgeh harəbēh mə’ōḏ:

22 wayy^a‘an dāwiḏ wayyō’mer hinnēh h^aḥănîṯ ḥănîṯ hammeleḵə wəy^a‘ăḇōr ’eḥāḏ mēhannə‘ārîm wəyiqqāḥehā:

23 wayhwâ yāšîḇ lā’îš ’eṯ-ṣiḏəqāṯwō wə’eṯ-’ĕmunāṯwō ’ăšer nəṯānəḵā yəhwâ| hayywōm bəyāḏ wəlō’ ’āḇîṯî lišəlōḥa yāḏî biməšîḥa yəhwâ:

24 wəhinnēh ka’ăšer gāḏəlâ nafəšəḵā hayywōm hazzeh bə‘ênāy kēn tiḡədal nafəšî bə‘ênê yəhwâ wəyaṣṣilēnî mikāl-ṣārâ: f

25 wayyō’mer šā’ûl ’el-dāwiḏ bārûḵə ’atâ bənî ḏāwiḏ gam ‘āśōh ṯ^a‘ăśeh wəḡam yāḵōl tûḵāl wayyēleḵə dāwiḏ ləḏarəkwō wəšā’ûl šāḇ liməqwōmwō: f