1 Samuel (1 Shmuel) Chapter 29

‎1 ‏וַיִּקְבְּצ֧וּ פְלִשְׁתִּ֛ים אֶת־כָּל־מַחֲנֵיהֶ֖ם אֲפֵ֑קָה וְיִשְׂרָאֵ֣ל חֹנִ֔ים בַּעַ֖יִן אֲשֶׁ֥ר בְּיִזְרְעֶֽאל׃

‎2 ‏וְסַרְנֵ֤י פְלִשְׁתִּים֙ עֹֽבְרִ֔ים לְמֵא֖וֹת וְלַאֲלָפִ֑ים וְדָוִ֣ד וַאֲנָשָׁ֗יו עֹֽבְרִ֛ים בָּאַחֲרֹנָ֖ה עִם־אָכִֽישׁ׃

‎3 ‏וַיֹּֽאמְרוּ֙ שָׂרֵ֣י פְלִשְׁתִּ֔ים מָ֖ה הָעִבְרִ֣ים הָאֵ֑לֶּה וַיֹּ֨אמֶר אָכִ֜ישׁ אֶל־שָׂרֵ֣י פְלִשְׁתִּ֗ים הֲלֽוֹא־זֶ֨ה דָוִ֜ד עֶ֣בֶד׀ שָׁא֣וּל מֶֽלֶךְ־יִשְׂרָאֵ֗ל אֲשֶׁ֨ר הָיָ֤ה אִתִּי֙ זֶ֤ה יָמִים֙ אוֹ־זֶ֣ה שָׁנִ֔ים וְלֹֽא־מָצָ֤אתִי בוֹ֙ מְא֔וּמָה מִיּ֥וֹם נָפְל֖וֹ עַד־הַיּ֥וֹם הַזֶּֽה׃ פ

‎4 ‏וַיִּקְצְפ֨וּ עָלָ֜יו שָׂרֵ֣י פְלִשְׁתִּ֗ים וַיֹּ֣אמְרוּ לוֹ֩ שָׂרֵ֨י פְלִשְׁתִּ֜ים הָשֵׁ֣ב אֶת־הָאִ֗ישׁ וְיָשֹׁב֙ אֶל־מְקוֹמוֹ֙ אֲשֶׁ֣ר הִפְקַדְתּ֣וֹ שָׁ֔ם וְלֹֽא־יֵרֵ֤ד עִמָּ֙נוּ֙ בַּמִּלְחָמָ֔ה וְלֹא־יִֽהְיֶה־לָּ֥נוּ לְשָׂטָ֖ן בַּמִּלְחָמָ֑ה וּבַמֶּ֗ה יִתְרַצֶּ֥ה זֶה֙ אֶל־אֲדֹנָ֔יו הֲל֕וֹא בְּרָאשֵׁ֖י הָאֲנָשִׁ֥ים הָהֵֽם׃

‎5 ‏הֲלוֹא־זֶ֣ה דָוִ֔ד אֲשֶׁ֧ר יַעֲנוּ־ל֛וֹ בַּמְּחֹל֖וֹת לֵאמֹ֑ר הִכָּ֤ה שָׁאוּל֙ בַּֽאֲלָפָ֔יו וְדָוִ֖ד ברבבתו בְּרִבְבֹתָֽיו׃ ס

‎6 ‏וַיִּקְרָ֨א אָכִ֜ישׁ אֶל־דָּוִ֗ד וַיֹּ֣אמֶר אֵ֠לָיו חַי־יְהוָ֞ה כִּי־יָשָׁ֣ר אַתָּ֗ה וְט֣וֹב בְּ֠עֵינַי צֵאתְךָ֙ וּבֹאֲךָ֤ אִתִּי֙ בַּֽמַּחֲנֶ֔ה כִּ֠י לֹֽא־מָצָ֤אתִֽי בְךָ֙ רָעָ֔ה מִיּ֛וֹם בֹּאֲךָ֥ אֵלַ֖י עַד־הַיּ֣וֹם הַזֶּ֑ה וּבְעֵינֵ֥י הַסְּרָנִ֖ים לֹֽא־ט֥וֹב אָֽתָּה׃

‎7 ‏וְעַתָּ֥ה שׁ֖וּב וְלֵ֣ךְ בְּשָׁל֑וֹם וְלֹֽא־תַעֲשֶׂ֣ה רָ֔ע בְּעֵינֵ֖י סַרְנֵ֥י פְלִשְׁתִּֽים׃ ס

‎8 ‏וַיֹּ֨אמֶר דָּוִ֜ד אֶל־אָכִ֗ישׁ כִּ֣י מֶ֤ה עָשִׂ֙יתִי֙ וּמַה־מָּצָ֣אתָ בְעַבְדְּךָ֔ מִיּוֹם֙ אֲשֶׁ֣ר הָיִ֣יתִי לְפָנֶ֔יךָ עַ֖ד הַיּ֣וֹם הַזֶּ֑ה כִּ֣י לֹ֤א אָבוֹא֙ וְנִלְחַ֔מְתִּי בְּאֹיְבֵ֖י אֲדֹנִ֥י הַמֶּֽלֶךְ׃

‎9 ‏וַיַּ֣עַן אָכִישׁ֮ וַיֹּ֣אמֶר אֶל־דָּוִד֒ יָדַ֕עְתִּי כִּ֣י ט֥וֹב אַתָּ֛ה בְּעֵינַ֖י כְּמַלְאַ֣ךְ אֱלֹהִ֑ים אַ֣ךְ שָׂרֵ֤י פְלִשְׁתִּים֙ אָֽמְר֔וּ לֹֽא־יַעֲלֶ֥ה עִמָּ֖נוּ בַּמִּלְחָמָֽה׃

‎10 ‏וְעַתָּה֙ הַשְׁכֵּ֣ם בַּבֹּ֔קֶר וְעַבְדֵ֥י אֲדֹנֶ֖יךָ אֲשֶׁר־בָּ֣אוּ אִתָּ֑ךְ וְהִשְׁכַּמְתֶּ֣ם בַּבֹּ֔קֶר וְא֥וֹר לָכֶ֖ם וָלֵֽכוּ׃

‎11 ‏וַיַּשְׁכֵּ֨ם דָּוִ֜ד ה֤וּא וַֽאֲנָשָׁיו֙ לָלֶ֣כֶת בַּבֹּ֔קֶר לָשׁ֖וּב אֶל־אֶ֣רֶץ פְּלִשְׁתִּ֑ים וּפְלִשְׁתִּ֖ים עָל֥וּ יִזְרְעֶֽאל׃ ס

1 wayyiqəbəṣû fəlišətîm ’eṯ-kāl-m^aḥănêhem ’ăfēqâ wəyiśərā’ēl ḥōnîm b^a‘ayin ’ăšer bəyizərə‘e’l:

2 wəsarənê fəlišətîm ‘ōḇərîm ləmē’wōṯ wəla’ălāfîm wəḏāwiḏ wa’ănāšāyw ‘ōḇərîm bā’^aḥărōnâ ‘im-’āḵîš:

3 wayyō’mərû śārê fəlišətîm mâ hā‘iḇərîm hā’ēlleh wayyō’mer ’āḵîš ’el-śārê fəlišətîm hălwō’-zeh ḏāwiḏ ‘eḇeḏ| šā’ûl meleḵə-yiśərā’ēl ’ăšer hāyâ ’itî zeh yāmîm ’wō-zeh šānîm wəlō’-māṣā’ṯî ḇwō mə’ûmâ mîywōm nāfəlwō ‘aḏ-hayywōm hazzeh: f

4 wayyiqəṣəfû ‘ālāyw śārê fəlišətîm wayyō’mərû lwō śārê fəlišətîm hāšēḇ ’eṯ-hā’îš wəyāšōḇ ’el-məqwōmwō ’ăšer hifəqaḏətwō šām wəlō’-yērēḏ ‘immānû bammiləḥāmâ wəlō’-yihəyeh-llānû ləśāṭān bammiləḥāmâ ûḇammeh yiṯəraṣṣeh zeh ’el-’ăḏōnāyw hălwō’ bərā’šê hā’ănāšîm hâēm:

5 hălwō’-zeh ḏāwiḏ ’ăšer y^a‘ănû-lwō bamməḥōlwōṯ lē’mōr hikâ šā’ûl ba’ălāfāyw wəḏāwiḏ bəriḇəḇōṯāw bəriḇəḇōṯāyw: s

6 wayyiqərā’ ’āḵîš ’el-dāwiḏ wayyō’mer ’ēlāyw ḥay-yəhwâ kî-yāšār ’atâ wəṭwōḇ bə‘ênay ṣē’ṯəḵā ûḇō’ăḵā ’itî bamm^aḥăneh kî lō’-māṣā’ṯî ḇəḵā rā‘â mîywōm bō’ăḵā ’ēlay ‘aḏ-hayywōm hazzeh ûḇə‘ênê hassərānîm lō’-ṭwōḇ ’ātâ:

7 wə‘atâ šûḇ wəlēḵə bəšālwōm wəlō’-ṯ^a‘ăśeh rā‘ bə‘ênê sarənê fəlišətîm: s

8 wayyō’mer dāwiḏ ’el-’āḵîš kî meh ‘āśîṯî ûmah-mmāṣā’ṯā ḇə‘aḇədəḵā mîywōm ’ăšer hāyîṯî ləfāneyḵā ‘aḏ hayywōm hazzeh kî lō’ ’āḇwō’ wəniləḥamətî bə’ōyəḇê ’ăḏōnî hammeleḵə:

9 wayy^a‘an ’āḵîš wayyō’mer ’el-dāwiḏ yāḏ^a‘ətî kî ṭwōḇ ’atâ bə‘ênay kəmalə’aḵə ’ĕlōhîm ’aḵə śārê fəlišətîm ’āmərû lō’-y^a‘ăleh ‘immānû bammiləḥāmâ:

10 wə‘atâ hašəkēm babōqer wə‘aḇəḏê ’ăḏōneyḵā ’ăšer-bā’û ’itāḵə wəhišəkamətem babōqer wə’wōr lāḵem wālēḵû:

11 wayyašəkēm dāwiḏ hû’ wa’ănāšāyw lāleḵeṯ babōqer lāšûḇ ’el-’ereṣ pəlišətîm ûfəlišətîm ‘ālû yizərə‘e’l: s