1 Samuel (1 Shmuel) Chapter 30

‎1 ‏וַיְהִ֞י בְּבֹ֨א דָוִ֧ד וַאֲנָשָׁ֛יו צִֽקְלַ֖ג בַּיּ֣וֹם הַשְּׁלִישִׁ֑י וַעֲמָלֵקִ֣י פָֽשְׁט֗וּ אֶל־נֶ֙גֶב֙ וְאֶל־צִ֣קְלַ֔ג וַיַּכּוּ֙ אֶת־צִ֣קְלַ֔ג וַיִּשְׂרְפ֥וּ אֹתָ֖הּ בָּאֵֽשׁ׃

‎2 ‏וַיִּשְׁבּ֨וּ אֶת־הַנָּשִׁ֤ים אֲשֶׁר־בָּהּ֙ מִקָּטֹ֣ן וְעַד־גָּד֔וֹל לֹ֥א הֵמִ֖יתוּ אִ֑ישׁ וַיִּֽנְהֲג֔וּ וַיֵּלְכ֖וּ לְדַרְכָּֽם׃

‎3 ‏וַיָּבֹ֨א דָוִ֤ד וַֽאֲנָשָׁיו֙ אֶל־הָעִ֔יר וְהִנֵּ֥ה שְׂרוּפָ֖ה בָּאֵ֑שׁ וּנְשֵׁיהֶ֛ם וּבְנֵיהֶ֥ם וּבְנֹתֵיהֶ֖ם נִשְׁבּֽוּ׃

‎4 ‏וַיִּשָּׂ֨א דָוִ֜ד וְהָעָ֧ם אֲשֶׁר־אִתּ֛וֹ אֶת־קוֹלָ֖ם וַיִּבְכּ֑וּ עַ֣ד אֲשֶׁ֧ר אֵין־בָּהֶ֛ם כֹּ֖חַ לִבְכּֽוֹת׃

‎5 ‏וּשְׁתֵּ֥י נְשֵֽׁי־דָוִ֖ד נִשְׁבּ֑וּ אֲחִינֹ֙עַם֙ הַיִּזְרְעֵלִ֔ית וַאֲבִיגַ֕יִל אֵ֖שֶׁת נָבָ֥ל הַֽכַּרְמְלִֽי׃

‎6 ‏וַתֵּ֨צֶר לְדָוִ֜ד מְאֹ֗ד כִּֽי־אָמְר֤וּ הָעָם֙ לְסָקְל֔וֹ כִּֽי־מָ֙רָה֙ נֶ֣פֶשׁ כָּל־הָעָ֔ם אִ֖ישׁ עַל־בנו בָּנָ֣יו וְעַל־בְּנֹתָ֑יו וַיִּתְחַזֵּ֣ק דָּוִ֔ד בַּיהוָ֖ה אֱלֹהָֽיו׃ ס

‎7 ‏וַיֹּ֣אמֶר דָּוִ֗ד אֶל־אֶבְיָתָ֤ר הַכֹּהֵן֙ בֶּן־אֲחִימֶ֔לֶךְ הַגִּֽישָׁה־נָּ֥א לִ֖י הָאֵפֹ֑ד וַיַּגֵּ֧שׁ אֶבְיָתָ֛ר אֶת־הָאֵפֹ֖ד אֶל־דָּוִֽד׃

‎8 ‏וַיִּשְׁאַ֨ל דָּוִ֤ד בַּֽיהוָה֙ לֵאמֹ֔ר אֶרְדֹּ֛ף אַחֲרֵ֥י הַגְּדוּד־הַזֶּ֖ה הַֽאַשִּׂגֶ֑נּוּ וַיֹּ֤אמֶר לוֹ֙ רְדֹ֔ף כִּֽי־הַשֵּׂ֥ג תַּשִּׂ֖יג וְהַצֵּ֥ל תַּצִּֽיל׃

‎9 ‏וַיֵּ֣לֶךְ דָּוִ֗ד ה֤וּא וְשֵׁשׁ־מֵא֥וֹת אִישׁ֙ אֲשֶׁ֣ר אִתּ֔וֹ וַיָּבֹ֖אוּ עַד־נַ֣חַל הַבְּשׂ֑וֹר וְהַנּֽוֹתָרִ֖ים עָמָֽדוּ׃

‎10 ‏וַיִּרְדֹּ֣ף דָּוִ֔ד ה֖וּא וְאַרְבַּע־מֵא֣וֹת אִ֑ישׁ וַיַּֽעַמְדוּ֙ מָאתַ֣יִם אִ֔ישׁ אֲשֶׁ֣ר פִּגְּר֔וּ מֵעֲבֹ֖ר אֶת־נַ֥חַל הַבְּשֽׂוֹר׃

‎11 ‏וַֽיִּמְצְא֤וּ אִישׁ־מִצְרִי֙ בַּשָּׂדֶ֔ה וַיִּקְח֥וּ אֹת֖וֹ אֶל־דָּוִ֑ד וַיִּתְּנוּ־ל֥וֹ לֶ֙חֶם֙ וַיֹּ֔אכַל וַיַּשְׁקֻ֖הוּ מָֽיִם׃

‎12 ‏וַיִּתְּנוּ־לוֹ֩ פֶ֨לַח דְּבֵלָ֜ה וּשְׁנֵ֤י צִמֻּקִים֙ וַיֹּ֔אכַל וַתָּ֥שָׁב רוּח֖וֹ אֵלָ֑יו כִּ֠י לֹֽא־אָ֤כַל לֶ֙חֶם֙ וְלֹא־שָׁ֣תָה מַ֔יִם שְׁלֹשָׁ֥ה יָמִ֖ים וּשְׁלֹשָׁ֥ה לֵילֽוֹת׃ ס

‎13 ‏וַיֹּ֨אמֶר ל֤וֹ דָוִד֙ לְֽמִי־אַ֔תָּה וְאֵ֥י מִזֶּ֖ה אָ֑תָּה וַיֹּ֜אמֶר נַ֧עַר מִצְרִ֣י אָנֹ֗כִי עֶ֚בֶד לְאִ֣ישׁ עֲמָֽלֵקִ֔י וַיַּעַזְבֵ֧נִי אֲדֹנִ֛י כִּ֥י חָלִ֖יתִי הַיּ֥וֹם שְׁלֹשָֽׁה׃

‎14 ‏אֲנַ֡חְנוּ פָּשַׁ֜טְנוּ נֶ֧גֶב הַכְּרֵתִ֛י וְעַל־אֲשֶׁ֥ר לִֽיהוּדָ֖ה וְעַל־נֶ֣גֶב כָּלֵ֑ב וְאֶת־צִקְלַ֖ג שָׂרַ֥פְנוּ בָאֵֽשׁ׃

‎15 ‏וַיֹּ֤אמֶר אֵלָיו֙ דָּוִ֔ד הֲתוֹרִדֵ֖נִי אֶל־הַגְּד֣וּד הַזֶּ֑ה וַיֹּ֡אמֶר הִשָּׁבְעָה֩ לִּ֨י בֵֽאלֹהִ֜ים אִם־תְּמִיתֵ֗נִי וְאִם־תַּסְגִּרֵ֙נִי֙ בְּיַד־אֲדֹנִ֔י וְאוֹרִֽדְךָ֖ אֶל־הַגְּד֥וּד הַזֶּֽה׃

‎16 ‏וַיֹּ֣רִדֵ֔הוּ וְהִנֵּ֥ה נְטֻשִׁ֖ים עַל־פְּנֵ֣י כָל־הָאָ֑רֶץ אֹכְלִ֤ים וְשֹׁתִים֙ וְחֹ֣גְגִ֔ים בְּכֹל֙ הַשָּׁלָ֣ל הַגָּד֔וֹל אֲשֶׁ֥ר לָקְח֛וּ מֵאֶ֥רֶץ פְּלִשְׁתִּ֖ים וּמֵאֶ֥רֶץ יְהוּדָֽה׃

‎17 ‏וַיַּכֵּ֥ם דָּוִ֛ד מֵהַנֶּ֥שֶׁף וְעַד־הָעֶ֖רֶב לְמָֽחֳרָתָ֑ם וְלֹֽא־נִמְלַ֤ט מֵהֶם֙ אִ֔ישׁ כִּי֩ אִם־אַרְבַּ֨ע מֵא֧וֹת אִֽישׁ־נַ֛עַר אֲשֶׁר־רָכְב֥וּ עַל־הַגְּמַלִּ֖ים וַיָּנֻֽסוּ׃

‎18 ‏וַיַּצֵּ֣ל דָּוִ֔ד אֵ֛ת כָּל־אֲשֶׁ֥ר לָקְח֖וּ עֲמָלֵ֑ק וְאֶת־שְׁתֵּ֥י נָשָׁ֖יו הִצִּ֥יל דָּוִֽד׃

‎19 ‏וְלֹ֣א נֶעְדַּר־לָ֠הֶם מִן־הַקָּטֹ֨ן וְעַד־הַגָּד֜וֹל וְעַד־בָּנִ֤ים וּבָנוֹת֙ וּמִשָּׁלָ֔ל וְעַ֛ד כָּל־אֲשֶׁ֥ר לָקְח֖וּ לָהֶ֑ם הַכֹּ֖ל הֵשִׁ֥יב דָּוִֽד׃

‎20 ‏וַיִּקַּ֣ח דָּוִ֔ד אֶת־כָּל־הַצֹּ֖אן וְהַבָּקָ֑ר נָהֲג֗וּ לִפְנֵי֙ הַמִּקְנֶ֣ה הַה֔וּא וַיֹּ֣אמְר֔וּ זֶ֖ה שְׁלַ֥ל דָּוִֽד׃

‎21 ‏וַיָּבֹ֣א דָוִ֗ד אֶל־מָאתַ֨יִם הָאֲנָשִׁ֜ים אֲשֶֽׁר־פִּגְּר֣וּ׀ מִלֶּ֣כֶת׀ אַחֲרֵ֣י דָוִ֗ד וַיֹּֽשִׁיבֻם֙ בְּנַ֣חַל הַבְּשׂ֔וֹר וַיֵּֽצְאוּ֙ לִקְרַ֣את דָּוִ֔ד וְלִקְרַ֖את הָעָ֣ם אֲשֶׁר־אִתּ֑וֹ וַיִּגַּ֤שׁ דָּוִד֙ אֶת־הָעָ֔ם וַיִּשְׁאַ֥ל לָהֶ֖ם לְשָׁלֽוֹם׃ ס

‎22 ‏וַיַּ֜עַן כָּל־אִֽישׁ־רָ֣ע וּבְלִיַּ֗עַל מֵֽהָאֲנָשִׁים֮ אֲשֶׁ֣ר הָלְכ֣וּ עִם־דָּוִד֒ וַיֹּאמְר֗וּ יַ֚עַן אֲשֶׁ֣ר לֹֽא־הָלְכ֣וּ עִמִּ֔י לֹֽא־נִתֵּ֣ן לָהֶ֔ם מֵהַשָּׁלָ֖ל אֲשֶׁ֣ר הִצַּ֑לְנוּ כִּֽי־אִם־אִ֤ישׁ אֶת־אִשְׁתּוֹ֙ וְאֶת־בָּנָ֔יו וְיִנְהֲג֖וּ וְיֵלֵֽכוּ׃ ס

‎23 ‏וַיֹּ֣אמֶר דָּוִ֔ד לֹֽא־תַעֲשׂ֥וּ כֵ֖ן אֶחָ֑י אֵ֠ת אֲשֶׁר־נָתַ֨ן יְהוָ֥ה לָ֙נוּ֙ וַיִּשְׁמֹ֣ר אֹתָ֔נוּ וַיִּתֵּ֗ן אֶֽת־הַגְּד֛וּד הַבָּ֥א עָלֵ֖ינוּ בְּיָדֵֽנוּ׃

‎24 ‏וּמִי֙ יִשְׁמַ֣ע לָכֶ֔ם לַדָּבָ֖ר הַזֶּ֑ה כִּ֞י כְּחֵ֣לֶק׀ הַיֹּרֵ֣ד בַּמִּלְחָמָ֗ה וּֽכְחֵ֛לֶק הַיֹּשֵׁ֥ב עַל־הַכֵּלִ֖ים יַחְדָּ֥ו יַחֲלֹֽקוּ׃ ס

‎25 ‏וַיְהִ֕י מֵֽהַיּ֥וֹם הַה֖וּא וָמָ֑עְלָה וַיְשִׂמֶ֜הָ לְחֹ֤ק וּלְמִשְׁפָּט֙ לְיִשְׂרָאֵ֔ל עַ֖ד הַיּ֥וֹם הַזֶּֽה׃ פ

‎26 ‏וַיָּבֹ֤א דָוִד֙ אֶל־צִ֣קְלַ֔ג וַיְשַׁלַּ֧ח מֵֽהַשָּׁלָ֛ל לְזִקְנֵ֥י יְהוּדָ֖ה לְרֵעֵ֣הוּ לֵאמֹ֑ר הִנֵּ֤ה לָכֶם֙ בְּרָכָ֔ה מִשְּׁלַ֖ל אֹיְבֵ֥י יְהוָֽה׃

‎27 ‏לַאֲשֶׁ֧ר בְּבֵֽית־אֵ֛ל וְלַאֲשֶׁ֥ר בְּרָמֽוֹת־נֶ֖גֶב וְלַאֲשֶׁ֥ר בְּיַתִּֽר׃

‎28 ‏וְלַאֲשֶׁ֧ר בַּעֲרֹעֵ֛ר וְלַאֲשֶׁ֥ר בְּשִֽׂפְמ֖וֹת וְלַאֲשֶׁ֥ר בְּאֶשְׁתְּמֹֽעַ׃ ס

‎29 ‏וְלַאֲשֶׁ֣ר בְּרָכָ֗ל וְלַֽאֲשֶׁר֙ בְּעָרֵ֣י הַיְּרַחְמְאֵלִ֔י³ וְלַאֲשֶׁ֖ר בְּעָרֵ֥י הַקֵּינִֽי׃

‎30 ‏וְלַאֲשֶׁ֧ר בְּחָרְמָ֛ה וְלַאֲשֶׁ֥ר בְּבוֹר־עָשָׁ֖ן וְלַאֲשֶׁ֥ר בַּעֲתָֽךְ׃

‎31 ‏וְלַאֲשֶׁ֖ר בְּחֶבְר֑וֹן וּֽלְכָל־הַמְּקֹמ֛וֹת אֲשֶֽׁר־הִתְהַלֶּךְ־שָׁ֥ם דָּוִ֖ד ה֥וּא וַאֲנָשָֽׁיו׃ פ

1 wayəhî bəḇō’ ḏāwiḏ wa’ănāšāyw ṣiqəlaḡ bayywōm haššəlîšî w^a‘ămālēqî fāšəṭû ’el-neḡeḇ wə’el-ṣiqəlaḡ wayyakû ’eṯ-ṣiqəlaḡ wayyiśərəfû ’ōṯāh bā’ēš:

2 wayyišəbû ’eṯ-hannāšîm ’ăšer-bāh miqqāṭōn wə‘aḏ-gāḏwōl lō’ hēmîṯû ’îš wayyinəhăḡû wayyēləḵû ləḏarəkām:

3 wayyāḇō’ ḏāwiḏ wa’ănāšāyw ’el-hā‘îr wəhinnēh śərûfâ bā’ēš ûnəšêhem ûḇənêhem ûḇənōṯêhem nišəbû:

4 wayyiśśā’ ḏāwiḏ wəhā‘ām ’ăšer-’itwō ’eṯ-qwōlām wayyiḇəkû ‘aḏ ’ăšer ’ên-bâem kōḥa liḇəkwōṯ:

5 ûšətê nəšê-ḏāwiḏ nišəbû ’ăḥînō‘am hayyizərə‘ēlîṯ wa’ăḇîḡayil ’ēšeṯ nāḇāl hakarəməlî:

6 watēṣer ləḏāwiḏ mə’ōḏ kî-’āmərû hā‘ām ləsāqəlwō kî-mārâ nefeš kāl-hā‘ām ’îš ‘al-bənwō bānāyw wə‘al-bənōṯāyw wayyiṯəḥazzēq dāwiḏ bayhwâ ’ĕlōhāyw: s

7 wayyō’mer dāwiḏ ’el-’eḇəyāṯār hakōhēn ben-’ăḥîmeleḵə hagîšâ-nnā’ lî hā’ēfōḏ wayyagēš ’eḇəyāṯār ’eṯ-hā’ēfōḏ ’el-dāwiḏ:

8 wayyišə’al dāwiḏ bayhwâ lē’mōr ’erədōf ’^aḥărê hagəḏûḏ-hazzeh ha’aśśiḡennû wayyō’mer lwō rəḏōf kî-haśśēḡ taśśîḡ wəhaṣṣēl taṣṣîl:

9 wayyēleḵə dāwiḏ hû’ wəšēš-mē’wōṯ ’îš ’ăšer ’itwō wayyāḇō’û ‘aḏ-n^aḥal habəśwōr wəhannwōṯārîm ‘āmāḏû:

10 wayyirədōf dāwiḏ hû’ wə’arəb^a‘-mē’wōṯ ’îš wayy^a‘aməḏû mā’ṯayim ’îš ’ăšer pigərû mē‘ăḇōr ’eṯ-n^aḥal habəśwōr:

11 wayyiməṣə’û ’îš-miṣərî baśśāḏeh wayyiqəḥû ’ōṯwō ’el-dāwiḏ wayyitənû-lwō leḥem wayyō’ḵal wayyašəquhû māyim:

12 wayyitənû-lwō fel^aḥ dəḇēlâ ûšənê ṣimmuqîm wayyō’ḵal watāšāḇ rûḥwō ’ēlāyw kî lō’-’āḵal leḥem wəlō’-šāṯâ mayim šəlōšâ yāmîm ûšəlōšâ lêlwōṯ: s

13 wayyō’mer lwō ḏāwiḏ ləmî-’atâ wə’ê mizzeh ’ātâ wayyō’mer n^a‘ar miṣərî ’ānōḵî ‘eḇeḏ lə’îš ‘ămālēqî wayy^a‘azəḇēnî ’ăḏōnî kî ḥālîṯî hayywōm šəlōšâ:

14 ’ăn^aḥənû pāšaṭənû neḡeḇ hakərēṯî wə‘al-’ăšer lîhûḏâ wə‘al-neḡeḇ kālēḇ wə’eṯ-ṣiqəlaḡ śārafənû ḇā’ēš:

15 wayyō’mer ’ēlāyw dāwiḏ hăṯwōriḏēnî ’el-hagəḏûḏ hazzeh wayyō’mer hiššāḇə‘â llî ḇē’lōhîm ’im-təmîṯēnî wə’im-tasəgirēnî bəyaḏ-’ăḏōnî wə’wōriḏəḵā ’el-hagəḏûḏ hazzeh:

16 wayyōriḏēhû wəhinnēh nəṭušîm ‘al-pənê ḵāl-hā’āreṣ ’ōḵəlîm wəšōṯîm wəḥōḡəḡîm bəḵōl haššālāl hagāḏwōl ’ăšer lāqəḥû mē’ereṣ pəlišətîm ûmē’ereṣ yəhûḏâ:

17 wayyakēm dāwiḏ mēhannešef wə‘aḏ-hā‘ereḇ ləmāḥŏrāṯām wəlō’-niməlaṭ mēhem ’îš kî ’im-’arəb^a‘ mē’wōṯ ’îš-n^a‘ar ’ăšer-rāḵəḇû ‘al-hagəmallîm wayyānusû:

18 wayyaṣṣēl dāwiḏ ’ēṯ kāl-’ăšer lāqəḥû ‘ămālēq wə’eṯ-šətê nāšāyw hiṣṣîl dāwiḏ:

19 wəlō’ ne‘ədar-lâem min-haqqāṭōn wə‘aḏ-hagāḏwōl wə‘aḏ-bānîm ûḇānwōṯ ûmiššālāl wə‘aḏ kāl-’ăšer lāqəḥû lâem hakōl hēšîḇ dāwiḏ:

20 wayyiqq^aḥ dāwiḏ ’eṯ-kāl-haṣṣō’n wəhabāqār nâăḡû lifənê hammiqəneh hahû’ wayyō’mərû zeh šəlal dāwiḏ:

21 wayyāḇō’ ḏāwiḏ ’el-mā’ṯayim hā’ănāšîm ’ăšer-pigərû| milleḵeṯ| ’^aḥărê ḏāwiḏ wayyōšîḇum bən^aḥal habəśwōr wayyēṣə’û liqəra’ṯ dāwiḏ wəliqəra’ṯ hā‘ām ’ăšer-’itwō wayyigaš dāwiḏ ’eṯ-hā‘ām wayyišə’al lâem ləšālwōm: s

22 wayy^a‘an kāl-’îš-rā‘ ûḇəlîy^a‘al mēhā’ănāšîm ’ăšer hāləḵû ‘im-dāwiḏ wayyō’mərû y^a‘an ’ăšer lō’-hāləḵû ‘immî lō’-nitēn lâem mēhaššālāl ’ăšer hiṣṣalənû kî-’im-’îš ’eṯ-’išətwō wə’eṯ-bānāyw wəyinəhăḡû wəyēlēḵû: s

23 wayyō’mer dāwiḏ lō’-ṯ^a‘ăśû ḵēn ’eḥāy ’ēṯ ’ăšer-nāṯan yəhwâ lānû wayyišəmōr ’ōṯānû wayyitēn ’eṯ-hagəḏûḏ habā’ ‘ālênû bəyāḏēnû:

24 ûmî yišəm^a‘ lāḵem ladāḇār hazzeh kî kəḥēleq| hayyōrēḏ bammiləḥāmâ ûḵəḥēleq hayyōšēḇ ‘al-hakēlîm y^aḥədāw y^aḥălōqû: s

25 wayəhî mēhayywōm hahû’ wāmā‘əlâ wayəśimehā ləḥōq ûləmišəpāṭ ləyiśərā’ēl ‘aḏ hayywōm hazzeh: f

26 wayyāḇō’ ḏāwiḏ ’el-ṣiqəlaḡ wayəšall^aḥ mēhaššālāl ləziqənê yəhûḏâ lərē‘ēhû lē’mōr hinnēh lāḵem bərāḵâ miššəlal ’ōyəḇê yəhwâ:

27 la’ăšer bəḇêṯ-’ēl wəla’ăšer bərāmwōṯ-neḡeḇ wəla’ăšer bəyatir:

28 wəla’ăšer b^a‘ărō‘ēr wəla’ăšer bəśifəmwōṯ wəla’ăšer bə’ešətəmō‘a: s

29 wəla’ăšer bərāḵāl wəla’ăšer bə‘ārê hayyər^aḥəmə’ēlî³ wəla’ăšer bə‘ārê haqqênî:

30 wəla’ăšer bəḥārəmâ wəla’ăšer bəḇwōr-‘āšān wəla’ăšer b^a‘ăṯāḵə:

31 wəla’ăšer bəḥeḇərwōn ûləḵāl-hamməqōmwōṯ ’ăšer-hiṯəhalleḵə-šām dāwiḏ hû’ wa’ănāšāyw: f