2 Samuel (2 Shmuel) Chapter 2

‎1 ‏וַיְהִ֣י אַֽחֲרֵי־כֵ֗ן וַיִּשְׁאַל֩ דָּוִ֨ד בַּֽיהוָ֤ה׀ לֵאמֹר֙ הַאֶעֱלֶ֗ה בְּאַחַת֙ עָרֵ֣י יְהוּדָ֔ה וַיֹּ֧אמֶר יְהוָ֛ה אֵלָ֖יו עֲלֵ֑ה וַיֹּ֧אמֶר דָּוִ֛ד אָ֥נָה אֶעֱלֶ֖ה וַיֹּ֥אמֶר חֶבְרֹֽנָה׃

‎2 ‏וַיַּ֤עַל שָׁם֙ דָּוִ֔ד וְגַ֖ם שְׁתֵּ֣י נָשָׁ֑יו אֲחִינֹ֙עַם֙ הַיִּזְרְעֵלִ֔ית וַאֲבִיגַ֕יִל אֵ֖שֶׁת נָבָ֥ל הַֽכַּרְמְלִֽי׃

‎3 ‏וַאֲנָשָׁ֧יו אֲשֶׁר־עִמּ֛וֹ הֶעֱלָ֥ה דָוִ֖ד אִ֣ישׁ וּבֵית֑וֹ וַיֵּשְׁב֖וּ בְּעָרֵ֥י חֶבְרֽוֹן׃

‎4 ‏וַיָּבֹ֙אוּ֙ אַנְשֵׁ֣י יְהוּדָ֔ה וַיִּמְשְׁחוּ־שָׁ֧ם אֶת־דָּוִ֛ד לְמֶ֖לֶךְ עַל־בֵּ֣ית יְהוּדָ֑ה וַיַּגִּ֤דוּ לְדָוִד֙ לֵאמֹ֔ר אַנְשֵׁי֙ יָבֵ֣ישׁ גִּלְעָ֔ד אֲשֶׁ֥ר קָבְר֖וּ אֶת־שָׁאֽוּל׃ ס

‎5 ‏וַיִּשְׁלַ֤ח דָּוִד֙ מַלְאָכִ֔ים אֶל־אַנְשֵׁ֖י יָבֵ֣ישׁ גִּלְעָ֑ד וַיֹּ֣אמֶר אֲלֵיהֶ֗ם בְּרֻכִ֤ים אַתֶּם֙ לַֽיהוָ֔ה אֲשֶׁ֨ר עֲשִׂיתֶ֜ם הַחֶ֣סֶד הַזֶּ֗ה עִם־אֲדֹֽנֵיכֶם֙ עִם־שָׁא֔וּל וַֽתִּקְבְּר֖וּ אֹתֽוֹ׃

‎6 ‏וְעַתָּ֕ה יַֽעַשׂ־יְהוָ֥ה עִמָּכֶ֖ם חֶ֣סֶד וֶאֱמֶ֑ת וְגַ֣ם אָנֹכִ֗י אֶעֱשֶׂ֤ה אִתְּכֶם֙ הַטּוֹבָ֣ה הַזֹּ֔את אֲשֶׁ֥ר עֲשִׂיתֶ֖ם הַדָּבָ֥ר הַזֶּֽה׃

‎7 ‏וְעַתָּ֣ה׀ תֶּחֱזַ֣קְנָה יְדֵיכֶ֗ם וִֽהְיוּ֙ לִבְנֵי־חַ֔יִל כִּי־מֵ֖ת אֲדֹנֵיכֶ֣ם שָׁא֑וּל וְגַם־אֹתִ֗י מָשְׁח֧וּ בֵית־יְהוּדָ֛ה לְמֶ֖לֶךְ עֲלֵיהֶֽם׃ פ

‎8 ‏וְאַבְנֵ֣ר בֶּן־נֵ֔ר שַׂר־צָבָ֖א אֲשֶׁ֣ר לְשָׁא֑וּל לָקַ֗ח אֶת־אִ֥ישׁ בֹּ֙שֶׁת֙ בֶּן־שָׁא֔וּל וַיַּעֲבִרֵ֖הוּ מַחֲנָֽיִם׃

‎9 ‏וַיַּמְלִכֵ֙הוּ֙ אֶל־הַגִּלְעָ֔ד וְאֶל־הָאֲשׁוּרִ֖י וְאֶֽל־יִזְרְעֶ֑אל וְעַל־אֶפְרַ֙יִם֙ וְעַל־בִּנְיָמִ֔ן וְעַל־יִשְׂרָאֵ֖ל כֻּלֹּֽה׃ פ

‎10 ‏בֶּן־אַרְבָּעִ֨ים שָׁנָ֜ה אִֽישׁ־בֹּ֣שֶׁת בֶּן־שָׁא֗וּל בְּמָלְכוֹ֙ עַל־יִשְׂרָאֵ֔ל וּשְׁתַּ֥יִם שָׁנִ֖ים מָלָ֑ךְ אַ֚ךְ בֵּ֣ית יְהוּדָ֔ה הָי֖וּ אַחֲרֵ֥י דָוִֽד׃

‎11 ‏וַֽיְהִי֙ מִסְפַּ֣ר הַיָּמִ֔ים אֲשֶׁר֩ הָיָ֨ה דָוִ֥ד מֶ֛לֶךְ בְּחֶבְר֖וֹן עַל־בֵּ֣ית יְהוּדָ֑ה שֶׁ֥בַע שָׁנִ֖ים וְשִׁשָּׁ֥ה חֳדָשִֽׁים׃ ס

‎12 ‏וַיֵּצֵא֙ אַבְנֵ֣ר בֶּן־נֵ֔ר וְעַבְדֵ֖י אִֽישׁ־בֹּ֣שֶׁת בֶּן־שָׁא֑וּל מִֽמַּחֲנַ֖יִם גִּבְעֽוֹנָה׃

‎13 ‏וְיוֹאָ֨ב בֶּן־צְרוּיָ֜ה וְעַבְדֵ֤י דָוִד֙ יָֽצְא֔וּ וַֽיִּפְגְּשׁ֛וּם עַל־בְּרֵכַ֥ת גִּבְע֖וֹן יַחְדָּ֑ו וַיֵּ֨שְׁב֜וּ אֵ֤לֶּה עַל־הַבְּרֵכָה֙ מִזֶּ֔ה וְאֵ֥לֶּה עַל־הַבְּרֵכָ֖ה מִזֶּֽה׃

‎14 ‏וַיֹּ֤אמֶר אַבְנֵר֙ אֶל־יוֹאָ֔ב יָק֤וּמוּ נָא֙ הַנְּעָרִ֔ים וִֽישַׂחֲק֖וּ לְפָנֵ֑ינוּ וַיֹּ֥אמֶר יוֹאָ֖ב יָקֻֽמוּ׃

‎15 ‏וַיָּקֻ֖מוּ וַיַּעַבְר֣וּ בְמִסְפָּ֑ר שְׁנֵ֧ים עָשָׂ֣ר לְבִנְיָמִ֗ן וּלְאִ֥ישׁ בֹּ֙שֶׁת֙ בֶּן־שָׁא֔וּל וּשְׁנֵ֥ים עָשָׂ֖ר מֵעַבְדֵ֥י דָוִֽד׃

‎16 ‏וַֽיַּחֲזִ֜קוּ אִ֣ישׁ׀ בְּרֹ֣אשׁ רֵעֵ֗הוּ וְחַרְבּוֹ֙ בְּצַ֣ד רֵעֵ֔הוּ וַֽיִּפְּל֖וּ יַחְדָּ֑ו וַיִּקְרָא֙ לַמָּק֣וֹם הַה֔וּא חֶלְקַ֥ת הַצֻּרִ֖ים אֲשֶׁ֥ר בְּגִבְעֽוֹן׃

‎17 ‏וַתְּהִ֧י הַמִּלְחָמָ֛ה קָשָׁ֥ה עַד־מְאֹ֖ד בַּיּ֣וֹם הַה֑וּא וַיִּנָּ֤גֶף אַבְנֵר֙ וְאַנְשֵׁ֣י יִשְׂרָאֵ֔ל לִפְנֵ֖י עַבְדֵ֥י דָוִֽד׃

‎18 ‏וַיִּֽהְיוּ־שָׁ֗ם שְׁלֹשָׁה֙ בְּנֵ֣י צְרוּיָ֔ה יוֹאָ֥ב וַאֲבִישַׁ֖י וַעֲשָׂהאֵ֑ל וַעֲשָׂהאֵל֙ קַ֣ל בְּרַגְלָ֔יו כְּאַחַ֥ד הַצְּבָיִ֖ם אֲשֶׁ֥ר בַּשָּׂדֶֽה׃

‎19 ‏וַיִּרְדֹּ֥ף עֲשָׂהאֵ֖ל אַחֲרֵ֣י אַבְנֵ֑ר וְלֹֽא־נָטָ֣ה לָלֶ֗כֶת עַל־הַיָּמִין֙ וְעַֽל־הַשְּׂמֹ֔אול מֵאַחֲרֵ֖י אַבְנֵֽר׃

‎20 ‏וַיִּ֤פֶן אַבְנֵר֙ אַֽחֲרָ֔יו וַיֹּ֕אמֶר הַאַתָּ֥ה זֶ֖ה עֲשָׂהאֵ֑ל וַיֹּ֖אמֶר אָנֹֽכִי׃

‎21 ‏וַיֹּ֧אמֶר ל֣וֹ אַבְנֵ֗ר נְטֵ֤ה לְךָ֙ עַל־יְמִֽינְךָ֙ א֣וֹ עַל־שְׂמֹאלֶ֔ךָ וֶאֱחֹ֣ז לְךָ֗ אֶחָד֙ מֵֽהַנְּעָרִ֔ים וְקַח־לְךָ֖ אֶת־חֲלִצָת֑וֹ וְלֹֽא־אָבָ֣ה עֲשָׂהאֵ֔ל לָס֖וּר מֵאַחֲרָֽיו׃

‎22 ‏וַיֹּ֧סֶף ע֣וֹד אַבְנֵ֗ר לֵאמֹר֙ אֶל־עֲשָׂהאֵ֔ל ס֥וּר לְךָ֖ מֵאַֽחֲרָ֑י לָ֤מָּה אַכֶּ֙כָּה֙ אַ֔רְצָה וְאֵיךְ֙ אֶשָּׂ֣א פָנַ֔י אֶל־יוֹאָ֖ב אָחִֽיךָ׃

‎23 ‏וַיְמָאֵ֣ן לָס֗וּר וַיַּכֵּ֣הוּ אַבְנֵר֩ בְּאַחֲרֵ֨י הַחֲנִ֜ית אֶל־הַחֹ֗מֶשׁ וַתֵּצֵ֤א הַֽחֲנִית֙ מֵאַחֲרָ֔יו וַיִּפָּל־שָׁ֖ם וַיָּ֣מָת תחתו תַּחְתָּ֑יו וַיְהִ֡י כָּל־הַבָּ֣א אֶֽל־הַמָּקוֹם֩ אֲשֶׁר־נָ֨פַל שָׁ֧ם עֲשָׂהאֵ֛ל וַיָּמֹ֖ת וַֽיַּעֲמֹֽדוּ׃

‎24 ‏וַֽיִּרְדְּפ֛וּ יוֹאָ֥ב וַאֲבִישַׁ֖י אַחֲרֵ֣י אַבְנֵ֑ר וְהַשֶּׁ֣מֶשׁ בָּ֔אָה וְהֵ֗מָּה בָּ֚אוּ עַד־גִּבְעַ֣ת אַמָּ֔ה אֲשֶׁר֙ עַל־פְּנֵי־גִ֔יחַ דֶּ֖רֶךְ מִדְבַּ֥ר גִּבְעֽוֹן׃

‎25 ‏וַיִּֽתְקַבְּצ֤וּ בְנֵֽי־בִנְיָמִן֙ אַחֲרֵ֣י אַבְנֵ֔ר וַיִּהְי֖וּ לַאֲגֻדָּ֣ה אֶחָ֑ת וַיַּ֣עַמְד֔וּ עַ֥ל רֹאשׁ־גִּבְעָ֖ה אֶחָֽת׃

‎26 ‏וַיִּקְרָ֨א אַבְנֵ֜ר אֶל־יוֹאָ֗ב וַיֹּ֙אמֶר֙ הֲלָנֶ֙צַח֙ תֹּ֣אכַל חֶ֔רֶב הֲל֣וֹא יָדַ֔עְתָּה כִּֽי־מָרָ֥ה תִהְיֶ֖ה בָּאַחֲרוֹנָ֑ה וְעַד־מָתַי֙ לֹֽא־תֹאמַ֣ר לָעָ֔ם לָשׁ֖וּב מֵאַחֲרֵ֥י אֲחֵיהֶֽם׃

‎27 ‏וַיֹּ֣אמֶר יוֹאָ֔ב חַ֚י הָֽאֱלֹהִ֔ים כִּ֥י לוּלֵ֖א דִּבַּ֑רְתָּ כִּ֣י אָ֤ז מֵֽהַבֹּ֙קֶר֙ נַעֲלָ֣ה הָעָ֔ם אִ֖ישׁ מֵאַחֲרֵ֥י אָחִֽיו׃

‎28 ‏וַיִּתְקַ֤ע יוֹאָב֙ בַּשּׁוֹפָ֔ר וַיַּֽעַמְדוּ֙ כָּל־הָעָ֔ם וְלֹֽא־יִרְדְּפ֥וּ ע֖וֹד אַחֲרֵ֣י יִשְׂרָאֵ֑ל וְלֹֽא־יָסְפ֥וּ ע֖וֹד לְהִלָּחֵֽם׃

‎29 ‏וְאַבְנֵ֣ר וַֽאֲנָשָׁ֗יו הָֽלְכוּ֙ בָּֽעֲרָבָ֔ה כֹּ֖ל הַלַּ֣יְלָה הַה֑וּא וַיַּעַבְר֣וּ אֶת־הַיַּרְדֵּ֗ן וַיֵּֽלְכוּ֙ כָּל־הַבִּתְר֔וֹן וַיָּבֹ֖אוּ מַחֲנָֽיִם׃

‎30 ‏וְיוֹאָ֗ב שָׁ֚ב מֵאַחֲרֵ֣י אַבְנֵ֔ר וַיִּקְבֹּ֖ץ אֶת־כָּל־הָעָ֑ם וַיִּפָּ֨קְד֜וּ מֵעַבְדֵ֥י דָוִ֛ד תִּשְׁעָֽה־עָשָׂ֥ר אִ֖ישׁ וַעֲשָׂה־אֵֽל׃³

‎31 ‏וְעַבְדֵ֣י דָוִ֗ד הִכּוּ֙ מִבִּנְיָמִ֔ן וּבְאַנְשֵׁ֖י אַבְנֵ֑ר שְׁלֹשׁ־מֵא֧וֹת וְשִׁשִּׁ֛ים אִ֖ישׁ מֵֽתוּ׃

‎32 ‏וַיִּשְׂאוּ֙ אֶת־עֲשָׂהאֵ֔ל וַֽיִּקְבְּרֻ֙הוּ֙ בְּקֶ֣בֶר אָבִ֔יו אֲשֶׁ֖ר בֵּ֣ית לָ֑חֶם וַיֵּלְכ֣וּ כָל־הַלַּ֗יְלָה יוֹאָב֙ וַֽאֲנָשָׁ֔יו וַיֵּאֹ֥ר לָהֶ֖ם בְּחֶבְרֽוֹן׃

1 wayəhî ’^aḥărê-ḵēn wayyišə’al dāwiḏ bayhwâ| lē’mōr ha’e‘ĕleh bə’^aḥaṯ ‘ārê yəhûḏâ wayyō’mer yəhwâ ’ēlāyw ‘ălēh wayyō’mer dāwiḏ ’ānâ ’e‘ĕleh wayyō’mer ḥeḇərōnâ:

2 wayy^a‘al šām dāwiḏ wəḡam šətê nāšāyw ’ăḥînō‘am hayyizərə‘ēlîṯ wa’ăḇîḡayil ’ēšeṯ nāḇāl hakarəməlî:

3 wa’ănāšāyw ’ăšer-‘immwō he‘ĕlâ ḏāwiḏ ’îš ûḇêṯwō wayyēšəḇû bə‘ārê ḥeḇərwōn:

4 wayyāḇō’û ’anəšê yəhûḏâ wayyiməšəḥû-šām ’eṯ-dāwiḏ ləmeleḵə ‘al-bêṯ yəhûḏâ wayyagiḏû ləḏāwiḏ lē’mōr ’anəšê yāḇêš gilə‘āḏ ’ăšer qāḇərû ’eṯ-šā’ûl: s

5 wayyišəl^aḥ dāwiḏ malə’āḵîm ’el-’anəšê yāḇêš gilə‘āḏ wayyō’mer ’ălêhem bəruḵîm ’atem layhwâ ’ăšer ‘ăśîṯem h^aḥeseḏ hazzeh ‘im-’ăḏōnêḵem ‘im-šā’ûl watiqəbərû ’ōṯwō:

6 wə‘atâ y^a‘aś-yəhwâ ‘immāḵem ḥeseḏ we’ĕmeṯ wəḡam ’ānōḵî ’e‘ĕśeh ’itəḵem haṭṭwōḇâ hazzō’ṯ ’ăšer ‘ăśîṯem hadāḇār hazzeh:

7 wə‘atâ| teḥĕzaqənâ yəḏêḵem wihəyû liḇənê-ḥayil kî-mēṯ ’ăḏōnêḵem šā’ûl wəḡam-’ōṯî māšəḥû ḇêṯ-yəhûḏâ ləmeleḵə ‘ălêhem: f

8 wə’aḇənēr ben-nēr śar-ṣāḇā’ ’ăšer ləšā’ûl lāq^aḥ ’eṯ-’îš bōšeṯ ben-šā’ûl wayy^a‘ăḇirēhû m^aḥănāyim:

9 wayyaməliḵēhû ’el-hagilə‘āḏ wə’el-hā’ăšûrî wə’el-yizərə‘e’l wə‘al-’efərayim wə‘al-binəyāmin wə‘al-yiśərā’ēl kullōh: f

10 ben-’arəbā‘îm šānâ ’îš-bōšeṯ ben-šā’ûl bəmāləḵwō ‘al-yiśərā’ēl ûšətayim šānîm mālāḵə ’aḵə bêṯ yəhûḏâ hāyû ’^aḥărê ḏāwiḏ:

11 wayəhî misəpar hayyāmîm ’ăšer hāyâ ḏāwiḏ meleḵə bəḥeḇərwōn ‘al-bêṯ yəhûḏâ šeḇ^a‘ šānîm wəšiššâ ḥŏḏāšîm: s

12 wayyēṣē’ ’aḇənēr ben-nēr wə‘aḇəḏê ’îš-bōšeṯ ben-šā’ûl mimm^aḥănayim giḇə‘wōnâ:

13 wəywō’āḇ ben-ṣərûyâ wə‘aḇəḏê ḏāwiḏ yāṣə’û wayyifəgəšûm ‘al-bərēḵaṯ giḇə‘wōn y^aḥədāw wayyēšəḇû ’ēlleh ‘al-habərēḵâ mizzeh wə’ēlleh ‘al-habərēḵâ mizzeh:

14 wayyō’mer ’aḇənēr ’el-ywō’āḇ yāqûmû nā’ hannə‘ārîm wîś^aḥăqû ləfānênû wayyō’mer ywō’āḇ yāqumû:

15 wayyāqumû wayy^a‘aḇərû ḇəmisəpār šənêm ‘āśār ləḇinəyāmin ûlə’îš bōšeṯ ben-šā’ûl ûšənêm ‘āśār mē‘aḇəḏê ḏāwiḏ:

16 wayy^aḥăziqû ’îš| bərō’š rē‘ēhû wəḥarəbwō bəṣaḏ rē‘ēhû wayyipəlû y^aḥədāw wayyiqərā’ lammāqwōm hahû’ ḥeləqaṯ haṣṣurîm ’ăšer bəḡiḇə‘wōn:

17 watəhî hammiləḥāmâ qāšâ ‘aḏ-mə’ōḏ bayywōm hahû’ wayyinnāḡef ’aḇənēr wə’anəšê yiśərā’ēl lifənê ‘aḇəḏê ḏāwiḏ:

18 wayyihəyû-šām šəlōšâ bənê ṣərûyâ ywō’āḇ wa’ăḇîšay w^a‘ăśâ’ēl w^a‘ăśâ’ēl qal bəraḡəlāyw kə’^aḥaḏ haṣṣəḇāyim ’ăšer baśśāḏeh:

19 wayyirədōf ‘ăśâ’ēl ’^aḥărê ’aḇənēr wəlō’-nāṭâ lāleḵeṯ ‘al-hayyāmîn wə‘al-haśśəmō’wl mē’^aḥărê ’aḇənēr:

20 wayyifen ’aḇənēr ’^aḥărāyw wayyō’mer ha’atâ zeh ‘ăśâ’ēl wayyō’mer ’ānōḵî:

21 wayyō’mer lwō ’aḇənēr nəṭēh ləḵā ‘al-yəmînəḵā ’wō ‘al-śəmō’leḵā we’ĕḥōz ləḵā ’eḥāḏ mēhannə‘ārîm wəq^aḥ-ləḵā ’eṯ-ḥăliṣāṯwō wəlō’-’āḇâ ‘ăśâ’ēl lāsûr mē’^aḥărāyw:

22 wayyōsef ‘wōḏ ’aḇənēr lē’mōr ’el-‘ăśâ’ēl sûr ləḵā mē’^aḥărāy lāmmâ ’akekâ ’arəṣâ wə’êḵə ’eśśā’ fānay ’el-ywō’āḇ ’āḥîḵā:

23 wayəmā’ēn lāsûr wayyakēhû ’aḇənēr bə’^aḥărê h^aḥănîṯ ’el-h^aḥōmeš watēṣē’ h^aḥănîṯ mē’^aḥărāyw wayyipāl-šām wayyāmāṯ t^aḥətwō t^aḥətāyw wayəhî kāl-habā’ ’el-hammāqwōm ’ăšer-nāfal šām ‘ăśâ’ēl wayyāmōṯ wayy^a‘ămōḏû:

24 wayyirədəfû ywō’āḇ wa’ăḇîšay ’^aḥărê ’aḇənēr wəhaššemeš bā’â wəhēmmâ bā’û ‘aḏ-giḇə‘aṯ ’ammâ ’ăšer ‘al-pənê-ḡîḥa dereḵə miḏəbar giḇə‘wōn:

25 wayyiṯəqabəṣû ḇənê-ḇinəyāmin ’^aḥărê ’aḇənēr wayyihəyû la’ăḡudâ ’eḥāṯ wayy^a‘aməḏû ‘al rō’š-giḇə‘â ’eḥāṯ:

26 wayyiqərā’ ’aḇənēr ’el-ywō’āḇ wayyō’mer hălāneṣ^aḥ tō’ḵal ḥereḇ hălwō’ yāḏ^a‘ətâ kî-mārâ ṯihəyeh bā’^aḥărwōnâ wə‘aḏ-māṯay lō’-ṯō’mar lā‘ām lāšûḇ mē’^aḥărê ’ăḥêhem:

27 wayyō’mer ywō’āḇ ḥay hā’ĕlōhîm kî lûlē’ dibarətā kî ’āz mēhabōqer n^a‘ălâ hā‘ām ’îš mē’^aḥărê ’āḥîw:

28 wayyiṯəq^a‘ ywō’āḇ baššwōfār wayy^a‘aməḏû kāl-hā‘ām wəlō’-yirədəfû ‘wōḏ ’^aḥărê yiśərā’ēl wəlō’-yāsəfû ‘wōḏ ləhillāḥēm:

29 wə’aḇənēr wa’ănāšāyw hāləḵû bā‘ărāḇâ kōl hallayəlâ hahû’ wayy^a‘aḇərû ’eṯ-hayyarədēn wayyēləḵû kāl-habiṯərwōn wayyāḇō’û m^aḥănāyim:

30 wəywō’āḇ šāḇ mē’^aḥărê ’aḇənēr wayyiqəbōṣ ’eṯ-kāl-hā‘ām wayyipāqəḏû mē‘aḇəḏê ḏāwiḏ tišə‘â-‘āśār ’îš w^a‘ăśâ-’ēl:³

31 wə‘aḇəḏê ḏāwiḏ hikû mibinəyāmin ûḇə’anəšê ’aḇənēr šəlōš-mē’wōṯ wəšiššîm ’îš mēṯû:

32 wayyiśə’û ’eṯ-‘ăśâ’ēl wayyiqəbəruhû bəqeḇer ’āḇîw ’ăšer bêṯ lāḥem wayyēləḵû ḵāl-hallayəlâ ywō’āḇ wa’ănāšāyw wayyē’ōr lâem bəḥeḇərwōn: