2 Samuel (2 Shmuel) Chapter 20

‎1 ‏וְשָׁ֨ם נִקְרָ֜א אִ֣ישׁ בְּלִיַּ֗עַל וּשְׁמ֛וֹ שֶׁ֥בַע בֶּן־בִּכְרִ֖י אִ֣ישׁ יְמִינִ֑י וַיִּתְקַ֣ע בַּשֹּׁפָ֗ר וַ֠יֹּאמֶר אֵֽין־לָ֨נוּ חֵ֜לֶק בְּדָוִ֗ד וְלֹ֤א נַֽחֲלָה־לָ֙נוּ֙ בְּבֶן־יִשַׁ֔י אִ֥ישׁ לְאֹהָלָ֖יו יִשְׂרָאֵֽל׃

‎2 ‏וַיַּ֜עַל כָּל־אִ֤ישׁ יִשְׂרָאֵל֙ מֵאַחֲרֵ֣י דָוִ֔ד אַחֲרֵ֖י שֶׁ֣בַע בֶּן־בִּכְרִ֑י וְאִ֤ישׁ יְהוּדָה֙ דָּבְק֣וּ בְמַלְכָּ֔ם מִן־הַיַּרְדֵּ֖ן וְעַד־יְרוּשָׁלִָֽם׃

‎3 ‏וַיָּבֹ֨א דָוִ֣ד אֶל־בֵּיתוֹ֮ יְרֽוּשָׁלִַם֒ וַיִּקַּ֣ח הַמֶּ֡לֶךְ אֵ֣ת עֶֽשֶׂר־נָשִׁ֣ים׀ פִּלַגְשִׁ֡ים אֲשֶׁ֣ר הִנִּיחַ֩ לִשְׁמֹ֨ר הַבַּ֜יִת וַֽיִּתְּנֵ֤ם בֵּית־מִשְׁמֶ֙רֶת֙ וַֽיְכַלְכְּלֵ֔ם וַאֲלֵיהֶ֖ם לֹא־בָ֑א וַתִּהְיֶ֧ינָה צְרֻר֛וֹת עַד־י֥וֹם מֻתָ֖ן אַלְמְנ֥וּת חַיּֽוּת׃ ס

‎4 ‏וַיֹּ֤אמֶר הַמֶּ֙לֶךְ֙ אֶל־עֲמָשָׂ֔א הַזְעֶק־לִ֥י אֶת־אִישׁ־יְהוּדָ֖ה שְׁלֹ֣שֶׁת יָמִ֑ים וְאַתָּ֖ה פֹּ֥ה עֲמֹֽד׃

‎5 ‏וַיֵּ֥לֶךְ עֲמָשָׂ֖א לְהַזְעִ֣יק אֶת־יְהוּדָ֑ה וייחר וַיּ֕וֹחֶר מִן־הַמּוֹעֵ֖ד אֲשֶׁ֥ר יְעָדֽוֹ׃ ס

‎6 ‏וַיֹּ֤אמֶר דָּוִד֙ אֶל־אֲבִישַׁ֔י עַתָּ֗ה יֵ֧רַֽע לָ֛נוּ שֶׁ֥בַע בֶּן־בִּכְרִ֖י מִן־אַבְשָׁל֑וֹם אַ֠תָּה קַ֞ח אֶת־עַבְדֵ֤י אֲדֹנֶ֙יךָ֙ וּרְדֹ֣ף אַחֲרָ֔יו פֶּן־מָ֥צָא ל֛וֹ עָרִ֥ים בְּצֻר֖וֹת וְהִצִּ֥יל עֵינֵֽנוּ׃

‎7 ‏וַיֵּצְא֤וּ אַֽחֲרָיו֙ אַנְשֵׁ֣י יוֹאָ֔ב וְהַכְּרֵתִ֥י וְהַפְּלֵתִ֖י וְכָל־הַגִּבֹּרִ֑ים וַיֵּֽצְאוּ֙ מִיר֣וּשָׁלִַ֔ם לִרְדֹּ֕ף אַחֲרֵ֖י שֶׁ֥בַע בֶּן־בִּכְרִֽי׃

‎8 ‏הֵ֗ם עִם־הָאֶ֤בֶן הַגְּדוֹלָה֙ אֲשֶׁ֣ר בְּגִבְע֔וֹן וַעֲמָשָׂ֖א בָּ֣א לִפְנֵיהֶ֑ם וְיוֹאָ֞ב חָג֣וּר׀ מִדּ֣וֹ לְבֻשׁ֗וּ ועלו וְעָלָ֞יו חֲג֥וֹר חֶ֙רֶב֙ מְצֻמֶּ֤דֶת עַל־מָתְנָיו֙ בְּתַעְרָ֔הּ וְה֥וּא יָצָ֖א וַתִּפֹּֽל׃ ס

‎9 ‏וַיֹּ֤אמֶר יוֹאָב֙ לַעֲמָשָׂ֔א הֲשָׁל֥וֹם אַתָּ֖ה אָחִ֑י וַתֹּ֜חֶז יַד־יְמִ֥ין יוֹאָ֛ב בִּזְקַ֥ן עֲמָשָׂ֖א לִנְשָׁק־לֽוֹ׃

‎10 ‏וַעֲמָשָׂ֨א לֹֽא־נִשְׁמַ֜ר בַּחֶ֣רֶב׀ אֲשֶׁ֣ר בְּיַד־יוֹאָ֗ב וַיַּכֵּהוּ֩ בָ֨הּ אֶל־הַחֹ֜מֶשׁ וַיִּשְׁפֹּ֨ךְ מֵעָ֥יו אַ֛רְצָה וְלֹא־שָׁ֥נָה ל֖וֹ וַיָּמֹ֑ת סוְיוֹאָב֙ וַאֲבִישַׁ֣י אָחִ֔יו רָדַ֕ף אַחֲרֵ֖י שֶׁ֥בַע בֶּן־בִּכְרִֽי׃

‎11 ‏וְאִישׁ֙ עָמַ֣ד עָלָ֔יו מִֽנַּעֲרֵ֖י יוֹאָ֑ב וַיֹּ֗אמֶר מִי֩ אֲשֶׁ֨ר חָפֵ֧ץ בְּיוֹאָ֛ב וּמִ֥י אֲשֶׁר־לְדָוִ֖ד אַחֲרֵ֥י יוֹאָֽב׃

‎12 ‏וַעֲמָשָׂ֛א מִתְגֹּלֵ֥ל בַּדָּ֖ם בְּת֣וֹךְ הַֽמְּסִלָּ֑ה וַיַּ֨רְא הָאִ֜ישׁ כִּֽי־עָמַ֣ד כָּל־הָעָ֗ם וַיַּסֵּב֩ אֶת־עֲמָשָׂ֨א מִן־הַֽמְסִלָּ֤ה הַשָּׂדֶה֙ וַיַּשְׁלֵ֤ךְ עָלָיו֙ בֶּ֔גֶד כַּאֲשֶׁ֣ר רָאָ֔ה כָּל־הַבָּ֥א עָלָ֖יו וְעָמָֽד׃

‎13 ‏כַּאֲשֶׁ֥ר הֹגָ֖ה מִן־הַֽמְסִלָּ֑ה עָבַ֤ר כָּל־אִישׁ֙ אַחֲרֵ֣י יוֹאָ֔ב לִרְדֹּ֕ף אַחֲרֵ֖י שֶׁ֥בַע בֶּן־בִּכְרִֽי׃

‎14 ‏וַֽיַּעֲבֹ֞ר בְּכָל־שִׁבְטֵ֣י יִשְׂרָאֵ֗ל אָבֵ֛לָה וּבֵ֥ית מַעֲכָ֖ה וְכָל־הַבֵּרִ֑ים סויקלהו וַיִּקָּ֣הֲל֔וּ וַיָּבֹ֖אוּ אַף־אַחֲרָֽיו׃

‎15 ‏וַיָּבֹ֜אוּ וַיָּצֻ֣רוּ עָלָ֗יו בְּאָבֵ֙לָה֙ בֵּ֣ית הַֽמַּעֲכָ֔ה וַיִּשְׁפְּכ֤וּ סֹֽלְלָה֙ אֶל־הָעִ֔יר וַֽתַּעֲמֹ֖ד בַּחֵ֑ל וְכָל־הָעָם֙ אֲשֶׁ֣ר אֶת־יוֹאָ֔ב מַשְׁחִיתִ֖ם לְהַפִּ֥יל הַחוֹמָֽה׃

‎16 ‏וַתִּקְרָ֛א אִשָּׁ֥ה חֲכָמָ֖ה מִן־הָעִ֑יר שִׁמְע֤וּ שִׁמְעוּ֙ אִמְרוּ־נָ֣א אֶל־יוֹאָ֔ב קְרַ֣ב עַד־הֵ֔נָּה וַאֲדַבְּרָ֖ה אֵלֶֽיךָ׃

‎17 ‏וַיִּקְרַ֣ב אֵלֶ֔יהָ וַתֹּ֧אמֶר הָאִשָּׁ֛ה הַאַתָּ֥ה יוֹאָ֖ב וַיֹּ֣אמֶר אָ֑נִי וַתֹּ֣אמֶר ל֗וֹ שְׁמַע֙ דִּבְרֵ֣י אֲמָתֶ֔ךָ וַיֹּ֖אמֶר שֹׁמֵ֥עַ אָנֹֽכִי׃

‎18 ‏וַתֹּ֖אמֶר לֵאמֹ֑ר דַּבֵּ֨ר יְדַבְּר֤וּ בָרִֽאשֹׁנָה֙ לֵאמֹ֔ר שָׁאֹ֧ל יְשָׁאֲל֛וּ בְּאָבֵ֖ל וְכֵ֥ן הֵתַֽמּוּ׃

‎19 ‏אָנֹכִ֕י שְׁלֻמֵ֖י אֱמוּנֵ֣י יִשְׂרָאֵ֑ל אַתָּ֣ה מְבַקֵּ֗שׁ לְהָמִ֨ית עִ֤יר וְאֵם֙ בְּיִשְׂרָאֵ֔ל לָ֥מָּה תְבַלַּ֖ע נַחֲלַ֥ת יְהוָֽה׃ פ

‎20 ‏וַיַּ֥עַן יוֹאָ֖ב וַיֹּאמַ֑ר חָלִ֤ילָה חָלִ֙ילָה֙ לִ֔י אִם־אֲבַלַּ֖ע וְאִם־אַשְׁחִֽית׃

‎21 ‏לֹא־כֵ֣ן הַדָּבָ֗ר כִּ֡י אִישׁ֩ מֵהַ֨ר אֶפְרַ֜יִם שֶׁ֧בַע בֶּן־בִּכְרִ֣י שְׁמ֗וֹ נָשָׂ֤א יָדוֹ֙ בַּמֶּ֣לֶךְ בְּדָוִ֔ד תְּנֽוּ־אֹת֣וֹ לְבַדּ֔וֹ וְאֵלְכָ֖ה מֵעַ֣ל הָעִ֑יר וַתֹּ֤אמֶר הָֽאִשָּׁה֙ אֶל־יוֹאָ֔ב הִנֵּ֥ה רֹאשׁ֛וֹ מֻשְׁלָ֥ךְ אֵלֶ֖יךָ בְּעַ֥ד הַחוֹמָֽה׃

‎22 ‏וַתָּבוֹא֩ הָאִשָּׁ֨ה אֶל־כָּל־הָעָ֜ם בְּחָכְמָתָ֗הּ וַֽיִּכְרְת֞וּ אֶת־רֹ֨אשׁ שֶׁ֤בַע בֶּן־בִּכְרִי֙ וַיַּשְׁלִ֣כוּ אֶל־יוֹאָ֔ב וַיִּתְקַע֙ בַּשּׁוֹפָ֔ר וַיָּפֻ֥צוּ מֵֽעַל־הָעִ֖יר אִ֣ישׁ לְאֹהָלָ֑יו וְיוֹאָ֛ב שָׁ֥ב יְרוּשָׁלִַ֖ם אֶל־הַמֶּֽלֶךְ׃ ס

‎23 ‏וְיוֹאָ֕ב אֶ֥ל כָּל־הַצָּבָ֖א יִשְׂרָאֵ֑ל וּבְנָיָה֙ בֶּן־יְה֣וֹיָדָ֔ע עַל־הכרי הַכְּרֵתִ֖י וְעַל־הַפְּלֵתִֽי׃

‎24 ‏וַאֲדֹרָ֖ם עַל־הַמַּ֑ס וִיהוֹשָׁפָ֥ט בֶּן־אֲחִיל֖וּד הַמַּזְכִּֽיר׃

‎25 ‏ושיא וּשְׁוָ֖א סֹפֵ֑ר וְצָד֥וֹק וְאֶבְיָתָ֖ר כֹּהֲנִֽים׃

‎26 ‏וְגַ֗ם עִירָא֙ הַיָּ֣אִרִ֔י הָיָ֥ה כֹהֵ֖ן לְדָוִֽד׃ ס

1 wəšām niqərā’ ’îš bəlîy^a‘al ûšəmwō šeḇ^a‘ ben-biḵərî ’îš yəmînî wayyiṯəq^a‘ baššōfār wayyō’mer ’ên-lānû ḥēleq bəḏāwiḏ wəlō’ n^aḥălâ-lānû bəḇen-yišay ’îš lə’ōhālāyw yiśərā’ēl:

2 wayy^a‘al kāl-’îš yiśərā’ēl mē’^aḥărê ḏāwiḏ ’^aḥărê šeḇ^a‘ ben-biḵərî wə’îš yəhûḏâ dāḇəqû ḇəmaləkām min-hayyarədēn wə‘aḏ-yərûšālāim:

3 wayyāḇō’ ḏāwiḏ ’el-bêṯwō yərûšālaim wayyiqq^aḥ hammeleḵə ’ēṯ ‘eśer-nāšîm| pilaḡəšîm ’ăšer hinnîḥa lišəmōr habayiṯ wayyitənēm bêṯ-mišəmereṯ wayəḵaləkəlēm wa’ălêhem lō’-ḇā’ watihəyeynâ ṣərurwōṯ ‘aḏ-ywōm muṯān ’aləmənûṯ ḥayyûṯ: s

4 wayyō’mer hammeleḵə ’el-‘ămāśā’ hazə‘eq-lî ’eṯ-’îš-yəhûḏâ šəlōšeṯ yāmîm wə’atâ pōh ‘ămōḏ:

5 wayyēleḵə ‘ămāśā’ ləhazə‘îq ’eṯ-yəhûḏâ wayyêḥar wayywōḥer min-hammwō‘ēḏ ’ăšer yə‘āḏwō: s

6 wayyō’mer dāwiḏ ’el-’ăḇîšay ‘atâ yēr^a‘ lānû šeḇ^a‘ ben-biḵərî min-’aḇəšālwōm ’atâ q^aḥ ’eṯ-‘aḇəḏê ’ăḏōneyḵā ûrəḏōf ’^aḥărāyw pen-māṣā’ lwō ‘ārîm bəṣurwōṯ wəhiṣṣîl ‘ênēnû:

7 wayyēṣə’û ’^aḥărāyw ’anəšê ywō’āḇ wəhakərēṯî wəhapəlēṯî wəḵāl-hagibōrîm wayyēṣə’û mîrûšālaim lirədōf ’^aḥărê šeḇ^a‘ ben-biḵərî:

8 hēm ‘im-hā’eḇen hagəḏwōlâ ’ăšer bəḡiḇə‘wōn w^a‘ămāśā’ bā’ lifənêhem wəywō’āḇ ḥāḡûr| midwō ləḇušû wə‘ālwō wə‘ālāyw ḥăḡwōr ḥereḇ məṣummeḏeṯ ‘al-māṯənāyw bəṯ^a‘ərāh wəhû’ yāṣā’ watipōl: s

9 wayyō’mer ywō’āḇ l^a‘ămāśā’ hăšālwōm ’atâ ’āḥî watōḥez yaḏ-yəmîn ywō’āḇ bizəqan ‘ămāśā’ linəšāq-lwō:

10 w^a‘ămāśā’ lō’-nišəmar b^aḥereḇ| ’ăšer bəyaḏ-ywō’āḇ wayyakēhû ḇāh ’el-h^aḥōmeš wayyišəpōḵə mē‘āyw ’arəṣâ wəlō’-šānâ lwō wayyāmōṯ swəywō’āḇ wa’ăḇîšay ’āḥîw rāḏaf ’^aḥărê šeḇ^a‘ ben-biḵərî:

11 wə’îš ‘āmaḏ ‘ālāyw minn^a‘ărê ywō’āḇ wayyō’mer mî ’ăšer ḥāfēṣ bəywō’āḇ ûmî ’ăšer-ləḏāwiḏ ’^aḥărê ywō’āḇ:

12 w^a‘ămāśā’ miṯəgōlēl badām bəṯwōḵə hamməsillâ wayyarə’ hā’îš kî-‘āmaḏ kāl-hā‘ām wayyassēḇ ’eṯ-‘ămāśā’ min-haməsillâ haśśāḏeh wayyašəlēḵə ‘ālāyw beḡeḏ ka’ăšer rā’â kāl-habā’ ‘ālāyw wə‘āmāḏ:

13 ka’ăšer hōḡâ min-haməsillâ ‘āḇar kāl-’îš ’^aḥărê ywō’āḇ lirədōf ’^aḥărê šeḇ^a‘ ben-biḵərî:

14 wayy^a‘ăḇōr bəḵāl-šiḇəṭê yiśərā’ēl ’āḇēlâ ûḇêṯ m^a‘ăḵâ wəḵāl-habērîm swayyiqqāləhû wayyiqqâălû wayyāḇō’û ’af-’^aḥărāyw:

15 wayyāḇō’û wayyāṣurû ‘ālāyw bə’āḇēlâ bêṯ hamm^a‘ăḵâ wayyišəpəḵû sōləlâ ’el-hā‘îr wat^a‘ămōḏ b^aḥēl wəḵāl-hā‘ām ’ăšer ’eṯ-ywō’āḇ mašəḥîṯim ləhapîl h^aḥwōmâ:

16 watiqərā’ ’iššâ ḥăḵāmâ min-hā‘îr šimə‘û šimə‘û ’imərû-nā’ ’el-ywō’āḇ qəraḇ ‘aḏ-hēnnâ wa’ăḏabərâ ’ēleyḵā:

17 wayyiqəraḇ ’ēleyhā watō’mer hā’iššâ ha’atâ ywō’āḇ wayyō’mer ’ānî watō’mer lwō šəm^a‘ diḇərê ’ămāṯeḵā wayyō’mer šōmē‘a ’ānōḵî:

18 watō’mer lē’mōr dabēr yəḏabərû ḇāri’šōnâ lē’mōr šā’ōl yəšā’ălû bə’āḇēl wəḵēn hēṯammû:

19 ’ānōḵî šəlumê ’ĕmûnê yiśərā’ēl ’atâ məḇaqqēš ləhāmîṯ ‘îr wə’ēm bəyiśərā’ēl lāmmâ ṯəḇall^a‘ n^aḥălaṯ yəhwâ: f

20 wayy^a‘an ywō’āḇ wayyō’mar ḥālîlâ ḥālîlâ lî ’im-’ăḇall^a‘ wə’im-’ašəḥîṯ:

21 lō’-ḵēn hadāḇār kî ’îš mēhar ’efərayim šeḇ^a‘ ben-biḵərî šəmwō nāśā’ yāḏwō bammeleḵə bəḏāwiḏ tənû-’ōṯwō ləḇadwō wə’ēləḵâ mē‘al hā‘îr watō’mer hā’iššâ ’el-ywō’āḇ hinnēh rō’šwō mušəlāḵə ’ēleyḵā bə‘aḏ h^aḥwōmâ:

22 watāḇwō’ hā’iššâ ’el-kāl-hā‘ām bəḥāḵəmāṯāh wayyiḵərəṯû ’eṯ-rō’š šeḇ^a‘ ben-biḵərî wayyašəliḵû ’el-ywō’āḇ wayyiṯəq^a‘ baššwōfār wayyāfuṣû mē‘al-hā‘îr ’îš lə’ōhālāyw wəywō’āḇ šāḇ yərûšālaim ’el-hammeleḵə: s

23 wəywō’āḇ ’el kāl-haṣṣāḇā’ yiśərā’ēl ûḇənāyâ ben-yəhwōyāḏā‘ ‘al-hakərî hakərēṯî wə‘al-hapəlēṯî:

24 wa’ăḏōrām ‘al-hammas wîhwōšāfāṭ ben-’ăḥîlûḏ hammazəkîr:

25 wəšêā’ ûšəwā’ sōfēr wəṣāḏwōq wə’eḇəyāṯār kōhănîm:

26 wəḡam ‘îrā’ hayyā’irî hāyâ ḵōhēn ləḏāwiḏ: s