Ezekiel (Yechezqel) Chapter 13

‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֕ם הִנָּבֵ֛א אֶל־נְבִיאֵ֥י יִשְׂרָאֵ֖ל הַנִּבָּאִ֑ים וְאָֽמַרְתָּ֙ לִנְבִיאֵ֣י מִלִּבָּ֔ם שִׁמְע֖וּ דְּבַר־יְהוָֽה׃

‎3 ‏כֹּ֤ה אָמַר֙ אֲדֹנָ֣י יְהוִ֔ה ה֖וֹי עַל־הַנְּבִיאִ֣ים הַנְּבָלִ֑ים אֲשֶׁ֥ר הֹלְכִ֛ים אַחַ֥ר רוּחָ֖ם וּלְבִלְתִּ֥י רָאֽוּ׃

‎4 ‏כְּשֻׁעָלִ֖ים בָּחֳרָב֑וֹת נְבִיאֶ֥יךָ יִשְׂרָאֵ֖ל הָיֽוּ׃

‎5 ‏לֹ֤א עֲלִיתֶם֙ בַּפְּרָצ֔וֹת וַתִּגְדְּר֥וּ גָדֵ֖ר עַל־בֵּ֣ית יִשְׂרָאֵ֑ל לַעֲמֹ֥ד בַּמִּלְחָמָ֖ה בְּי֥וֹם יְהוָֽה׃

‎6 ‏חָ֤זוּ שָׁוְא֙ וְקֶ֣סֶם כָּזָ֔ב הָאֹֽמְרִים֙ נְאֻם־יְהוָ֔ה וַֽיהוָ֖ה לֹ֣א שְׁלָחָ֑ם וְיִֽחֲל֖וּ לְקַיֵּ֥ם דָּבָֽר׃

‎7 ‏הֲל֤וֹא מַֽחֲזֵה־שָׁוְא֙ חֲזִיתֶ֔ם וּמִקְסַ֥ם כָּזָ֖ב אֲמַרְתֶּ֑ם וְאֹֽמְרִים֙ נְאֻם־יְהוָ֔ה וַאֲנִ֖י לֹ֥א דִבַּֽרְתִּי׃ ס

‎8 ‏לָכֵ֗ן כֹּ֤ה אָמַר֙ אֲדֹנָ֣י יְהוִ֔ה יַ֚עַן דַּבֶּרְכֶ֣ם שָׁ֔וְא וַחֲזִיתֶ֖ם כָּזָ֑ב לָכֵן֙ הִנְנִ֣י אֲלֵיכֶ֔ם נְאֻ֖ם אֲדֹנָ֥י יְהוִֽה׃

‎9 ‏וְהָיְתָ֣ה יָדִ֗י אֶֽל־הַנְּבִיאִ֞ים הַחֹזִ֣ים שָׁוְא֮ וְהַקֹּסְמִ֣ים כָּזָב֒ בְּס֧וֹד עַמִּ֣י לֹֽא־יִהְי֗וּ וּבִכְתָ֤ב בֵּֽית־יִשְׂרָאֵל֙ לֹ֣א יִכָּתֵ֔בוּ וְאֶל־אַדְמַ֥ת יִשְׂרָאֵ֖ל לֹ֣א יָבֹ֑אוּ וִידַעְתֶּ֕ם כִּ֥י אֲנִ֖י אֲדֹנָ֥י יְהוִֽה׃

‎10 ‏יַ֣עַן וּבְיַ֜עַן הִטְע֧וּ אֶת־עַמִּ֛י לֵאמֹ֥ר שָׁל֖וֹם וְאֵ֣ין שָׁל֑וֹם וְהוּא֙ בֹּ֣נֶה חַ֔יִץ וְהִנָּ֛ם טָחִ֥ים אֹת֖וֹ תָּפֵֽל׃

‎11 ‏אֱמֹ֛ר אֶל־טָחֵ֥י תָפֵ֖ל וְיִפֹּ֑ל הָיָ֣ה׀ גֶּ֣שֶׁם שׁוֹטֵ֗ף וְאַתֵּ֜נָה אַבְנֵ֤י אֶלְגָּבִישׁ֙ תִּפֹּ֔לְנָה וְר֥וּחַ סְעָר֖וֹת תְּבַקֵּֽעַ׃

‎12 ‏וְהִנֵּ֖ה נָפַ֣ל הַקִּ֑יר הֲלוֹא֙ יֵאָמֵ֣ר אֲלֵיכֶ֔ם אַיֵּ֥ה הַטִּ֖יחַ אֲשֶׁ֥ר טַחְתֶּֽם׃ ס

‎13 ‏לָכֵ֗ן כֹּ֤ה אָמַר֙ אֲדֹנָ֣י יְהוִ֔ה וּבִקַּעְתִּ֥י רֽוּחַ־סְעָר֖וֹת בַּֽחֲמָתִ֑י וְגֶ֤שֶׁם שֹׁטֵף֙ בְּאַפִּ֣י יִֽהְיֶ֔ה וְאַבְנֵ֥י אֶלְגָּבִ֖ישׁ בְּחֵמָ֥ה לְכָלָֽה׃

‎14 ‏וְהָ֨רַסְתִּ֜י אֶת־הַקִּ֨יר אֲשֶׁר־טַחְתֶּ֥ם תָּפֵ֛ל וְהִגַּעְתִּ֥יהוּ אֶל־הָאָ֖רֶץ וְנִגְלָ֣ה יְסֹד֑וֹ וְנָֽפְלָה֙ וּכְלִיתֶ֣ם בְּתוֹכָ֔הּ וִֽידַעְתֶּ֖ם כִּֽי־אֲנִ֥י יְהוָֽה׃

‎15 ‏וְכִלֵּיתִ֤י אֶת־חֲמָתִי֙ בַּקִּ֔יר וּבַטָּחִ֥ים אֹת֖וֹ תָּפֵ֑ל וְאֹמַ֤ר לָכֶם֙ אֵ֣ין הַקִּ֔יר וְאֵ֖ין הַטָּחִ֥ים אֹתֽוֹ׃

‎16 ‏נְבִיאֵ֣י יִשְׂרָאֵ֗ל הַֽנִבְּאִים֙¹ אֶל־יְר֣וּשָׁלִַ֔ם וְהַחֹזִ֥ים לָ֖הּ חֲז֣וֹן שָׁלֹ֑ם וְאֵ֣ין שָׁלֹ֔ם נְאֻ֖ם אֲדֹנָ֥י יְהוִֹֽה׃ פ

‎17 ‏וְאַתָּ֣ה בֶן־אָדָ֗ם שִׂ֤ים פָּנֶ֙יךָ֙ אֶל־בְּנ֣וֹת עַמְּךָ֔ הַמִּֽתְנַבְּא֖וֹת מִֽלִּבְּהֶ֑ן וְהִנָּבֵ֖א עֲלֵיהֶֽן׃

‎18 ‏וְאָמַרְתָּ֞ כֹּה־אָמַ֣ר׀ אֲדֹנָ֣י יְהוִ֗ה הוֹי֩ לִֽמְתַפְּר֨וֹת כְּסָת֜וֹת עַ֣ל׀ כָּל־אַצִּילֵ֣י יָדַ֗י וְעֹשׂ֧וֹת הַמִּסְפָּח֛וֹת עַל־רֹ֥אשׁ כָּל־קוֹמָ֖ה לְצוֹדֵ֣ד נְפָשׁ֑וֹת הַנְּפָשׁוֹת֙ תְּצוֹדֵ֣דְנָה לְעַמִּ֔י וּנְפָשׁ֖וֹת לָכֶ֥נָה תְחַיֶּֽינָה׃

‎19 ‏וַתְּחַלֶּלְ֨נָה¹ אֹתִ֜י אֶל־עַמִּ֗י בְּשַׁעֲלֵ֣י שְׂעֹרִים֮ וּבִפְת֣וֹתֵי לֶחֶם֒ לְהָמִ֤ית נְפָשׁוֹת֙ אֲשֶׁ֣ר לֹֽא־תְמוּתֶ֔נָה וּלְחַיּ֥וֹת נְפָשׁ֖וֹת אֲשֶׁ֣ר לֹא־תִֽחְיֶ֑ינָה בְּכַ֨זֶּבְכֶ֔ם לְעַמִּ֖י שֹׁמְעֵ֥י כָזָֽב׃ ס

‎20 ‏לָכֵ֞ן כֹּה־אָמַ֣ר׀ אֲדֹנָ֣י יְהוִ֗ה הִנְנִ֤י אֶל־כִּסְּתוֹתֵיכֶ֙נָה֙ אֲשֶׁ֣ר אַ֠תֵּנָה מְצֹדְד֨וֹת שָׁ֤ם אֶת־הַנְּפָשׁוֹת֙ לְפֹ֣רְח֔וֹת וְקָרַעְתִּ֣י אֹתָ֔ם מֵעַ֖ל זְרוֹעֹֽתֵיכֶ֑ם וְשִׁלַּחְתִּי֙ אֶת־הַנְּפָשׁ֔וֹת אֲשֶׁ֥ר אַתֶּ֛ם מְצֹדְד֥וֹת אֶת־נְפָשִׁ֖ים לְפֹרְחֹֽת׃

‎21 ‏וְקָרַעְתִּ֞י אֶת־מִסְפְּחֹֽתֵיכֶ֗ם וְהִצַּלְתִּ֤י אֶת־עַמִּי֙ מִיֶּדְכֶ֔ן וְלֹֽא־יִהְי֥וּ ע֛וֹד בְּיֶדְכֶ֖ן לִמְצוּדָ֑ה וִֽידַעְתֶּ֖ן כִּֽי־אֲנִ֥י יְהוָֽה׃

‎22 ‏יַ֣עַן הַכְא֤וֹת לֵב־צַדִּיק֙ שֶׁ֔קֶר וַאֲנִ֖י לֹ֣א הִכְאַבְתִּ֑יו וּלְחַזֵּק֙ יְדֵ֣י רָשָׁ֔ע לְבִלְתִּי־שׁ֛וּב מִדַּרְכּ֥וֹ הָרָ֖ע לְהַחֲיֹתֽוֹ׃

‎23 ‏לָכֵ֗ן שָׁ֚וְא לֹ֣א תֶחֱזֶ֔ינָה וְקֶ֖סֶם לֹא־תִקְסַ֣מְנָה ע֑וֹד וְהִצַּלְתִּ֤י אֶת־עַמִּי֙ מִיֶּדְכֶ֔ן וִֽידַעְתֶּ֖ן כִּֽי־אֲנִ֥י יְהוָֽה׃

1 wayəhî ḏəḇar-yəhwâ ’ēlay lē’mōr:

2 ben-’āḏām hinnāḇē’ ’el-nəḇî’ê yiśərā’ēl hannibā’îm wə’āmarətā linəḇî’ê millibām šimə‘û dəḇar-yəhwâ:

3 kōh ’āmar ’ăḏōnāy yəhwih hwōy ‘al-hannəḇî’îm hannəḇālîm ’ăšer hōləḵîm ’^aḥar rûḥām ûləḇilətî rā’û:

4 kəšu‘ālîm bāḥŏrāḇwōṯ nəḇî’eyḵā yiśərā’ēl hāyû:

5 lō’ ‘ălîṯem bapərāṣwōṯ watiḡədərû ḡāḏēr ‘al-bêṯ yiśərā’ēl l^a‘ămōḏ bammiləḥāmâ bəywōm yəhwâ:

6 ḥāzû šāwə’ wəqesem kāzāḇ hā’ōmərîm nə’um-yəhwâ wayhwâ lō’ šəlāḥām wəyiḥălû ləqayyēm dāḇār:

7 hălwō’ m^aḥăzēh-šāwə’ ḥăzîṯem ûmiqəsam kāzāḇ ’ămarətem wə’ōmərîm nə’um-yəhwâ wa’ănî lō’ ḏibarətî: s

8 lāḵēn kōh ’āmar ’ăḏōnāy yəhwih y^a‘an daberəḵem šāwə’ w^aḥăzîṯem kāzāḇ lāḵēn hinənî ’ălêḵem nə’um ’ăḏōnāy yəhwih:

9 wəhāyəṯâ yāḏî ’el-hannəḇî’îm h^aḥōzîm šāwə’ wəhaqqōsəmîm kāzāḇ bəswōḏ ‘ammî lō’-yihəyû ûḇiḵəṯāḇ bêṯ-yiśərā’ēl lō’ yikāṯēḇû wə’el-’aḏəmaṯ yiśərā’ēl lō’ yāḇō’û wîḏ^a‘ətem kî ’ănî ’ăḏōnāy yəhwih:

10 y^a‘an ûḇəy^a‘an hiṭə‘û ’eṯ-‘ammî lē’mōr šālwōm wə’ên šālwōm wəhû’ bōneh ḥayiṣ wəhinnām ṭāḥîm ’ōṯwō tāfēl:

11 ’ĕmōr ’el-ṭāḥê ṯāfēl wəyipōl hāyâ| gešem šwōṭēf wə’atēnâ ’aḇənê ’eləgāḇîš tipōlənâ wərûḥa sə‘ārwōṯ təḇaqqē‘a:

12 wəhinnēh nāfal haqqîr hălwō’ yē’āmēr ’ălêḵem ’ayyēh haṭṭîḥa ’ăšer ṭ^aḥətem: s

13 lāḵēn kōh ’āmar ’ăḏōnāy yəhwih ûḇiqq^a‘ətî rûḥa-sə‘ārwōṯ b^aḥămāṯî wəḡešem šōṭēf bə’apî yihəyeh wə’aḇənê ’eləgāḇîš bəḥēmâ ləḵālâ:

14 wəhārasətî ’eṯ-haqqîr ’ăšer-ṭ^aḥətem tāfēl wəhig^a‘ətîhû ’el-hā’āreṣ wəniḡəlâ yəsōḏwō wənāfəlâ ûḵəlîṯem bəṯwōḵāh wîḏ^a‘ətem kî-’ănî yəhwâ:

15 wəḵillêṯî ’eṯ-ḥămāṯî baqqîr ûḇaṭṭāḥîm ’ōṯwō tāfēl wə’ōmar lāḵem ’ên haqqîr wə’ên haṭṭāḥîm ’ōṯwō:

16 nəḇî’ê yiśərā’ēl hanibə’îm¹ ’el-yərûšālaim wəh^aḥōzîm lāh ḥăzwōn šālōm wə’ên šālōm nə’um ’ăḏōnāy yəhwōih: f

17 wə’atâ ḇen-’āḏām śîm pāneyḵā ’el-bənwōṯ ‘amməḵā hammiṯənabə’wōṯ millibəhen wəhinnāḇē’ ‘ălêhen:

18 wə’āmarətā kōh-’āmar| ’ăḏōnāy yəhwih hwōy liməṯapərwōṯ kəsāṯwōṯ ‘al| kāl-’aṣṣîlê yāḏay wə‘ōśwōṯ hammisəpāḥwōṯ ‘al-rō’š kāl-qwōmâ ləṣwōḏēḏ nəfāšwōṯ hannəfāšwōṯ təṣwōḏēḏənâ lə‘ammî ûnəfāšwōṯ lāḵenâ ṯəḥayyeynâ:

19 watəḥallelənâ¹ ’ōṯî ’el-‘ammî bəš^a‘ălê śə‘ōrîm ûḇifəṯwōṯê leḥem ləhāmîṯ nəfāšwōṯ ’ăšer lō’-ṯəmûṯenâ ûləḥayywōṯ nəfāšwōṯ ’ăšer lō’-ṯiḥəyeynâ bəḵazzeḇəḵem lə‘ammî šōmə‘ê ḵāzāḇ: s

20 lāḵēn kōh-’āmar| ’ăḏōnāy yəhwih hinənî ’el-kissəṯwōṯêḵenâ ’ăšer ’atēnâ məṣōḏəḏwōṯ šām ’eṯ-hannəfāšwōṯ ləfōrəḥwōṯ wəqār^a‘ətî ’ōṯām mē‘al zərwō‘ōṯêḵem wəšill^aḥətî ’eṯ-hannəfāšwōṯ ’ăšer ’atem məṣōḏəḏwōṯ ’eṯ-nəfāšîm ləfōrəḥōṯ:

21 wəqār^a‘ətî ’eṯ-misəpəḥōṯêḵem wəhiṣṣalətî ’eṯ-‘ammî mîyeḏəḵen wəlō’-yihəyû ‘wōḏ bəyeḏəḵen liməṣûḏâ wîḏ^a‘əten kî-’ănî yəhwâ:

22 y^a‘an haḵə’wōṯ lēḇ-ṣadîq šeqer wa’ănî lō’ hiḵə’aḇətîw ûləḥazzēq yəḏê rāšā‘ ləḇilətî-šûḇ midarəkwō hārā‘ ləh^aḥăyōṯwō:

23 lāḵēn šāwə’ lō’ ṯeḥĕzeynâ wəqesem lō’-ṯiqəsamənâ ‘wōḏ wəhiṣṣalətî ’eṯ-‘ammî mîyeḏəḵen wîḏ^a‘əten kî-’ănî yəhwâ: