Ezekiel (Yechezqel) Chapter 14

‎1 ‏וַיָּב֤וֹא אֵלַי֙ אֲנָשִׁ֔ים מִזִּקְנֵ֖י יִשְׂרָאֵ֑ל וַיֵּשְׁב֖וּ לְפָנָֽי׃ פ

‎2 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎3 ‏בֶּן־אָדָ֗ם הָאֲנָשִׁ֤ים הָאֵ֙לֶּה֙ הֶעֱל֤וּ גִלּֽוּלֵיהֶם֙ עַל־לִבָּ֔ם וּמִכְשׁ֣וֹל עֲוֹנָ֔ם נָתְנ֖וּ נֹ֣כַח פְּנֵיהֶ֑ם הַאִדָּרֹ֥שׁ אִדָּרֵ֖שׁ לָהֶֽם׃ ס

‎4 ‏לָכֵ֣ן דַּבֵּר־א֠וֹתָם וְאָמַרְתָּ֨ אֲלֵיהֶ֜ם כֹּה־אָמַ֣ר׀ אֲדֹנָ֣י יְהוִ֗ה אִ֣ישׁ אִ֣ישׁ מִבֵּ֣ית יִשְׂרָאֵ֡ל אֲשֶׁר֩ יַעֲלֶ֨ה אֶת־גִּלּוּלָ֜יו אֶל־לִבּ֗וֹ וּמִכְשׁ֤וֹל עֲוֹנוֹ֙ יָשִׂים֙ נֹ֣כַח פָּנָ֔יו וּבָ֖א אֶל־הַנָּבִ֑יא אֲנִ֣י יְהוָ֗ה נַעֲנֵ֧יתִי ל֦וֹ בה בָ֖א בְּרֹ֥ב גִּלּוּלָֽיו׃

‎5 ‏לְמַ֛עַן תְּפֹ֥שׂ אֶת־בֵּֽית־יִשְׂרָאֵ֖ל בְּלִבָּ֑ם אֲשֶׁ֤ר נָזֹ֙רוּ֙ מֵֽעָלַ֔י בְּגִלּֽוּלֵיהֶ֖ם כֻּלָּֽם׃ ס

‎6 ‏לָכֵ֞ן אֱמֹ֣ר׀ אֶל־בֵּ֣ית יִשְׂרָאֵ֗ל כֹּ֤ה אָמַר֙ אֲדֹנָ֣י יְהוִ֔ה שׁ֣וּבוּ וְהָשִׁ֔יבוּ מֵעַ֖ל גִּלּֽוּלֵיכֶ֑ם וּמֵעַ֥ל כָּל־תּוֹעֲבֹתֵיכֶ֖ם הָשִׁ֥יבוּ פְנֵיכֶֽם׃

‎7 ‏כִּי֩ אִ֨ישׁ אִ֜ישׁ מִבֵּ֣ית יִשְׂרָאֵ֗ל וּמֵהַגֵּר֮ אֲשֶׁר־יָג֣וּר בְּיִשְׂרָאֵל֒ וְיִנָּזֵ֣ר מֵֽאַחֲרַ֗י וְיַ֤עַל גִּלּוּלָיו֙ אֶל־לִבּ֔וֹ וּמִכְשׁ֣וֹל עֲוֹנ֔וֹ יָשִׂ֖ים נֹ֣כַח פָּנָ֑יו וּבָ֤א אֶל־הַנָּבִיא֙ לִדְרָשׁ־ל֣וֹ בִ֔י אֲנִ֣י יְהוָ֔ה נַֽעֲנֶה־לּ֖וֹ בִּֽי׃

‎8 ‏וְנָתַתִּ֨י פָנַ֜י בָּאִ֣ישׁ הַה֗וּא וַהֲשִֽׂמֹתִ֙יהוּ֙ לְא֣וֹת וְלִמְשָׁלִ֔ים וְהִכְרַתִּ֖יו מִתּ֣וֹךְ עַמִּ֑י וִֽידַעְתֶּ֖ם כִּֽי־אֲנִ֥י יְהוָֽה׃³ ס

‎9 ‏וְהַנָּבִ֤יא כִֽי־יְפֻתֶּה֙ וְדִבֶּ֣ר דָּבָ֔ר אֲנִ֤י יְהוָה֙ פִּתֵּ֔יתִי אֵ֖ת הַנָּבִ֣יא הַה֑וּא וְנָטִ֤יתִי אֶת־יָדִי֙ עָלָ֔יו וְהִ֨שְׁמַדְתִּ֔יו מִתּ֖וֹךְ עַמִּ֥י יִשְׂרָאֵֽל׃

‎10 ‏וְנָשְׂא֖וּ עֲוֹנָ֑ם כַּֽעֲוֹן֙ הַדֹּרֵ֔שׁ כַּעֲוֹ֥ן הַנָּבִ֖יא יִֽהְיֶֽה׃

‎11 ‏לְ֠מַעַן לֹֽא־יִתְע֨וּ ע֤וֹד בֵּֽית־יִשְׂרָאֵל֙ מֵאַֽחֲרַ֔י וְלֹֽא־יִטַּמְּא֥וּ ע֖וֹד בְּכָל־פִּשְׁעֵיהֶ֑ם וְהָ֥יוּ לִ֣י לְעָ֗ם וַֽאֲנִי֙ אֶהְיֶ֤ה לָהֶם֙ לֵֽאלֹהִ֔ים נְאֻ֖ם אֲדֹנָ֥י יְהוִֽה׃ פ

‎12 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎13 ‏בֶּן־אָדָ֗ם אֶ֚רֶץ כִּ֤י תֶחֱטָא־לִי֙ לִמְעָל־מַ֔עַל וְנָטִ֤יתִי יָדִי֙ עָלֶ֔יהָ וְשָׁבַ֥רְתִּי לָ֖הּ מַטֵּה־לָ֑חֶם וְהִשְׁלַחְתִּי־בָ֣הּ רָעָ֔ב וְהִכְרַתִּ֥י מִמֶּ֖נָּה אָדָ֥ם וּבְהֵמָֽה׃

‎14 ‏וְ֠הָיוּ שְׁלֹ֨שֶׁת הָאֲנָשִׁ֤ים הָאֵ֙לֶּה֙ בְּתוֹכָ֔הּ נֹ֖חַ דנאל דָּנִיאֵ֣ל וְאִיּ֑וֹב הֵ֤מָּה בְצִדְקָתָם֙ יְנַצְּל֣וּ נַפְשָׁ֔ם נְאֻ֖ם אֲדֹנָ֥י יְהוִֽה׃

‎15 ‏לֽוּ־חַיָּ֥ה רָעָ֛ה אַעֲבִ֥יר בָּאָ֖רֶץ וְשִׁכְּלָ֑תָּה וְהָיְתָ֤ה שְׁמָמָה֙ מִבְּלִ֣י עוֹבֵ֔ר מִפְּנֵ֖י הַחַיָּֽה׃

‎16 ‏שְׁלֹ֨שֶׁת הָאֲנָשִׁ֣ים הָאֵלֶּה֮ בְּתוֹכָהּ֒ חַי־אָ֗נִי נְאֻם֙ אֲדֹנָ֣י יְהוִ֔ה אִם־בָּנִ֥ים וְאִם־בָּנ֖וֹת יַצִּ֑ילוּ הֵ֤מָּה לְבַדָּם֙ יִנָּצֵ֔לוּ וְהָאָ֖רֶץ תִּהְיֶ֥ה שְׁמָמָֽה׃

‎17 ‏א֛וֹ חֶ֥רֶב אָבִ֖יא עַל־הָאָ֣רֶץ הַהִ֑יא וְאָמַרְתִּ֗י חֶ֚רֶב תַּעֲבֹ֣ר בָּאָ֔רֶץ וְהִכְרַתִּ֥י מִמֶּ֖נָּה אָדָ֥ם וּבְהֵמָֽה׃

‎18 ‏וּשְׁלֹ֨שֶׁת הָאֲנָשִׁ֣ים הָאֵלֶּה֮ בְּתוֹכָהּ֒ חַי־אָ֗נִי נְאֻם֙ אֲדֹנָ֣י יְהוִ֔ה לֹ֥א יַצִּ֖ילוּ בָּנִ֣ים וּבָנ֑וֹת כִּ֛י הֵ֥ם לְבַדָּ֖ם יִנָּצֵֽלוּ׃

‎19 ‏א֛וֹ דֶּ֥בֶר אֲשַׁלַּ֖ח אֶל־הָאָ֣רֶץ הַהִ֑יא וְשָׁפַכְתִּ֨י חֲמָתִ֤י עָלֶ֙יהָ֙ בְּדָ֔ם לְהַכְרִ֥ית מִמֶּ֖נָּה אָדָ֥ם וּבְהֵמָֽה׃

‎20 ‏וְנֹ֨חַ דנאל דָּנִיאֵ֣ל וְאִיּוֹב֮ בְּתוֹכָהּ֒ חַי־אָ֗נִי נְאֻם֙ אֲדֹנָ֣י יְהוִ֔ה אִם־בֵּ֥ן אִם־בַּ֖ת יַצִּ֑ילוּ הֵ֥מָּה בְצִדְקָתָ֖ם יַצִּ֥ילוּ נַפְשָֽׁם׃ פ

‎21 ‏כִּי֩ כֹ֨ה אָמַ֜ר אֲדֹנָ֣י יְהוִֹ֗ה אַ֣ף כִּֽי־אַרְבַּ֣עַת שְׁפָטַ֣י׀ הָרָעִ֡ים חֶ֠רֶב וְרָעָ֞ב וְחַיָּ֤ה רָעָה֙ וָדֶ֔בֶר שִׁלַּ֖חְתִּי אֶל־יְרוּשָׁלִָ֑ם לְהַכְרִ֥ית מִמֶּ֖נָּה אָדָ֥ם וּבְהֵמָֽה׃

‎22 ‏וְהִנֵּ֨ה נֽוֹתְרָה־בָּ֜הּ פְּלֵטָ֗ה הַֽמּוּצָאִים֮ בָּנִ֣ים וּבָנוֹת֒ הִנָּם֙ יוֹצְאִ֣ים אֲלֵיכֶ֔ם וּרְאִיתֶ֥ם אֶת־דַּרְכָּ֖ם וְאֶת־עֲלִֽילוֹתָ֑ם וְנִחַמְתֶּ֗ם עַל־הָֽרָעָה֙ אֲשֶׁ֤ר הֵבֵ֙אתִי֙ עַל־יְר֣וּשָׁלִַ֔ם אֵ֛ת כָּל־אֲשֶׁ֥ר הֵבֵ֖אתִי עָלֶֽיהָ׃

‎23 ‏וְנִחֲמ֣וּ אֶתְכֶ֔ם כִּֽי־תִרְא֥וּ אֶת־דַּרְכָּ֖ם וְאֶת־עֲלִֽילוֹתָ֑ם וִֽידַעְתֶּ֗ם כִּי֩ לֹ֨א חִנָּ֤ם עָשִׂ֙יתִי֙ אֵ֣ת כָּל־אֲשֶׁר־עָשִׂ֣יתִי בָ֔הּ נְאֻ֖ם אֲדֹנָ֥י יְהוִֹֽה׃ פ

1 wayyāḇwō’ ’ēlay ’ănāšîm mizziqənê yiśərā’ēl wayyēšəḇû ləfānāy: f

2 wayəhî ḏəḇar-yəhwâ ’ēlay lē’mōr:

3 ben-’āḏām hā’ănāšîm hā’ēlleh he‘ĕlû ḡillûlêhem ‘al-libām ûmiḵəšwōl ‘ăwōnām nāṯənû nōḵ^aḥ pənêhem ha’idārōš ’idārēš lâem: s

4 lāḵēn dabēr-’wōṯām wə’āmarətā ’ălêhem kōh-’āmar| ’ăḏōnāy yəhwih ’îš ’îš mibêṯ yiśərā’ēl ’ăšer y^a‘ăleh ’eṯ-gillûlāyw ’el-libwō ûmiḵəšwōl ‘ăwōnwō yāśîm nōḵ^aḥ pānāyw ûḇā’ ’el-hannāḇî’ ’ănî yəhwâ n^a‘ănêṯî lwō ḇāh ḇā’ bərōḇ gillûlāyw:

5 ləm^a‘an təfōś ’eṯ-bêṯ-yiśərā’ēl bəlibām ’ăšer nāzōrû mē‘ālay bəḡillûlêhem kullām: s

6 lāḵēn ’ĕmōr| ’el-bêṯ yiśərā’ēl kōh ’āmar ’ăḏōnāy yəhwih šûḇû wəhāšîḇû mē‘al gillûlêḵem ûmē‘al kāl-twō‘ăḇōṯêḵem hāšîḇû fənêḵem:

7 kî ’îš ’îš mibêṯ yiśərā’ēl ûmēhagēr ’ăšer-yāḡûr bəyiśərā’ēl wəyinnāzēr mē’^aḥăray wəy^a‘al gillûlāyw ’el-libwō ûmiḵəšwōl ‘ăwōnwō yāśîm nōḵ^aḥ pānāyw ûḇā’ ’el-hannāḇî’ liḏərāš-lwō ḇî ’ănî yəhwâ n^a‘ăneh-llwō bî:

8 wənāṯatî fānay bā’îš hahû’ wahăśimōṯîhû lə’wōṯ wəliməšālîm wəhiḵəratîw mitwōḵə ‘ammî wîḏ^a‘ətem kî-’ănî yəhwâ:³ s

9 wəhannāḇî’ ḵî-yəfuteh wəḏiber dāḇār ’ănî yəhwâ pitêṯî ’ēṯ hannāḇî’ hahû’ wənāṭîṯî ’eṯ-yāḏî ‘ālāyw wəhišəmaḏətîw mitwōḵə ‘ammî yiśərā’ēl:

10 wənāśə’û ‘ăwōnām k^a‘ăwōn hadōrēš k^a‘ăwōn hannāḇî’ yihəyeh:

11 ləm^a‘an lō’-yiṯə‘û ‘wōḏ bêṯ-yiśərā’ēl mē’^aḥăray wəlō’-yiṭṭammə’û ‘wōḏ bəḵāl-pišə‘êhem wəhāyû lî lə‘ām wa’ănî ’ehəyeh lâem lē’lōhîm nə’um ’ăḏōnāy yəhwih: f

12 wayəhî ḏəḇar-yəhwâ ’ēlay lē’mōr:

13 ben-’āḏām ’ereṣ kî ṯeḥĕṭā’-lî limə‘āl-m^a‘al wənāṭîṯî yāḏî ‘āleyhā wəšāḇarətî lāh maṭṭēh-lāḥem wəhišəl^aḥətî-ḇāh rā‘āḇ wəhiḵəratî mimmennâ ’āḏām ûḇəhēmâ:

14 wəhāyû šəlōšeṯ hā’ănāšîm hā’ēlleh bəṯwōḵāh nōḥa dāni’ēl dānî’ēl wə’îywōḇ hēmmâ ḇəṣiḏəqāṯām yənaṣṣəlû nafəšām nə’um ’ăḏōnāy yəhwih:

15 lû-ḥayyâ rā‘â ’^a‘ăḇîr bā’āreṣ wəšikəlātâ wəhāyəṯâ šəmāmâ mibəlî ‘wōḇēr mipənê h^aḥayyâ:

16 šəlōšeṯ hā’ănāšîm hā’ēlleh bəṯwōḵāh ḥay-’ānî nə’um ’ăḏōnāy yəhwih ’im-bānîm wə’im-bānwōṯ yaṣṣîlû hēmmâ ləḇadām yinnāṣēlû wəhā’āreṣ tihəyeh šəmāmâ:

17 ’wō ḥereḇ ’āḇî’ ‘al-hā’āreṣ hahî’ wə’āmarətî ḥereḇ t^a‘ăḇōr bā’āreṣ wəhiḵəratî mimmennâ ’āḏām ûḇəhēmâ:

18 ûšəlōšeṯ hā’ănāšîm hā’ēlleh bəṯwōḵāh ḥay-’ānî nə’um ’ăḏōnāy yəhwih lō’ yaṣṣîlû bānîm ûḇānwōṯ kî hēm ləḇadām yinnāṣēlû:

19 ’wō deḇer ’ăšall^aḥ ’el-hā’āreṣ hahî’ wəšāfaḵətî ḥămāṯî ‘āleyhā bəḏām ləhaḵərîṯ mimmennâ ’āḏām ûḇəhēmâ:

20 wənōḥa dāni’ēl dānî’ēl wə’îywōḇ bəṯwōḵāh ḥay-’ānî nə’um ’ăḏōnāy yəhwih ’im-bēn ’im-baṯ yaṣṣîlû hēmmâ ḇəṣiḏəqāṯām yaṣṣîlû nafəšām: f

21 kî ḵōh ’āmar ’ăḏōnāy yəhwōih ’af kî-’arəb^a‘aṯ šəfāṭay| hārā‘îm ḥereḇ wərā‘āḇ wəḥayyâ rā‘â wāḏeḇer šill^aḥətî ’el-yərûšālāim ləhaḵərîṯ mimmennâ ’āḏām ûḇəhēmâ:

22 wəhinnēh nwōṯərâ-bāh pəlēṭâ hammûṣā’îm bānîm ûḇānwōṯ hinnām ywōṣə’îm ’ălêḵem ûrə’îṯem ’eṯ-darəkām wə’eṯ-‘ălîlwōṯām wəniḥamətem ‘al-hārā‘â ’ăšer hēḇē’ṯî ‘al-yərûšālaim ’ēṯ kāl-’ăšer hēḇē’ṯî ‘āleyhā:

23 wəniḥămû ’eṯəḵem kî-ṯirə’û ’eṯ-darəkām wə’eṯ-‘ălîlwōṯām wîḏ^a‘ətem kî lō’ ḥinnām ‘āśîṯî ’ēṯ kāl-’ăšer-‘āśîṯî ḇāh nə’um ’ăḏōnāy yəhwōih: f