Job (Iyov) Chapter 34

‎1 ‏וַיַּ֥עַן אֱלִיה֗וּא וַיֹּאמַֽר׃

‎2 ‏שִׁמְע֣וּ חֲכָמִ֣ים מִלָּ֑י וְ֝יֹדְעִ֗ים הַאֲזִ֥ינוּ לִֽי׃

‎3 ‏כִּי־אֹ֭זֶן³ מִלִּ֣ין תִּבְחָ֑ן וְ֝חֵ֗ךְ יִטְעַ֥ם לֶאֱכֹֽל׃

‎4 ‏מִשְׁפָּ֥ט נִבְחֲרָה־לָּ֑נוּ נֵדְעָ֖ה בֵינֵ֣ינוּ מַה־טּֽוֹב׃

‎5 ‏כִּֽי־אָ֭מַר אִיּ֣וֹב צָדַ֑קְתִּי וְ֝אֵ֗ל הֵסִ֥יר מִשְׁפָּטִֽי׃

‎6 ‏עַל־מִשְׁפָּטִ֥י אֲכַזֵּ֑ב אָנ֖וּשׁ חִצִּ֣י בְלִי־פָֽשַׁע׃

‎7 ‏מִי־גֶ֥בֶר כְּאִיּ֑וֹב יִֽשְׁתֶּה־לַּ֥עַג כַּמָּֽיִם׃

‎8 ‏וְאָרַ֣ח לְ֭חֶבְרָה עִם־פֹּ֣עֲלֵי אָ֑וֶן וְ֝לָלֶ֗כֶת עִם־אַנְשֵׁי־רֶֽשַׁע׃

‎9 ‏כִּֽי־אָ֭מַר לֹ֣א יִסְכָּן־גָּ֑בֶר בִּ֝רְצֹת֗וֹ עִם־אֱלֹהִֽים׃

‎10 ‏לָכֵ֤ן׀ אַ֥נֲשֵׁ֥י³ לֵבָ֗ב שִׁמְע֫וּ לִ֥י חָלִ֖לָה לָאֵ֥ל מֵרֶ֗שַׁע וְשַׁדַּ֥י מֵעָֽוֶל׃

‎11 ‏כִּ֤י פֹ֣עַל אָ֭דָם יְשַׁלֶּם־ל֑וֹ וּֽכְאֹ֥רַח אִ֝֗ישׁ יַמְצִאֶֽנּוּ׃

‎12 ‏אַף־אָמְנָ֗ם אֵ֥ל לֹֽא־יַרְשִׁ֑יעַ וְ֝שַׁדַּ֗י לֹֽא־יְעַוֵּ֥ת מִשְׁפָּֽט׃

‎13 ‏מִֽי־פָקַ֣ד עָלָ֣יו אָ֑רְצָה וּמִ֥י שָׂ֝֗ם תֵּבֵ֥ל כֻּלָּֽהּ׃

‎14 ‏אִם־יָשִׂ֣ים אֵלָ֣יו לִבּ֑וֹ רוּח֥וֹ וְ֝נִשְׁמָת֗וֹ אֵלָ֥יו יֶאֱסֹֽף׃

‎15 ‏יִגְוַ֣ע כָּל־בָּשָׂ֣ר יָ֑חַד וְ֝אָדָ֗ם עַל־עָפָ֥ר יָשֽׁוּב׃

‎16 ‏וְאִם־בִּ֥ינָה שִׁמְעָה־זֹּ֑את הַ֝אֲזִ֗ינָה לְק֣וֹל מִלָּֽי׃

‎17 ‏הַאַ֬ף שׂוֹנֵ֣א מִשְׁפָּ֣ט יַחֲב֑וֹשׁ וְאִם־צַדִּ֖יק כַּבִּ֣יר תַּרְשִֽׁיעַ׃

‎18 ‏הַאֲמֹ֣ר לְמֶ֣לֶךְ בְּלִיָּ֑עַל רָ֝שָׁ֗ע אֶל־נְדִיבִֽים׃

‎19 ‏אֲשֶׁ֤ר לֹֽא־נָשָׂ֨א׀ פְּנֵ֥י שָׂרִ֗ים וְלֹ֣א נִכַּר־שׁ֖וֹעַ לִפְנֵי־דָ֑ל כִּֽי־מַעֲשֵׂ֖ה יָדָ֣יו כֻּלָּֽם׃

‎20 ‏רֶ֤גַע׀ יָמֻתוּ֮ וַחֲצ֪וֹת לָ֥יְלָה יְגֹעֲשׁ֣וּ עָ֣ם וְיַעֲבֹ֑רוּ וְיָסִ֥ירוּ אַ֝בִּ֗יר לֹ֣א בְיָֽד׃

‎21 ‏כִּי־עֵ֭ינָיו עַל־דַּרְכֵי־אִ֑ישׁ וְֽכָל־צְעָדָ֥יו³ יִרְאֶֽה׃

‎22 ‏אֵֽין־חֹ֖שֶׁךְ וְאֵ֣ין צַלְמָ֑וֶת לְהִסָּ֥תֶר שָׁ֝֗ם פֹּ֣עֲלֵי אָֽוֶן׃

‎23 ‏כִּ֤י לֹ֣א עַל־אִ֭ישׁ יָשִׂ֣ים ע֑וֹד לַהֲלֹ֥ךְ אֶל־אֵ֝֗ל בַּמִּשְׁפָּֽט׃

‎24 ‏יָרֹ֣עַ כַּבִּירִ֣ים לֹא־חֵ֑קֶר וַיַּעֲמֵ֖ד אֲחֵרִ֣ים תַּחְתָּֽם׃

‎25 ‏לָכֵ֗ן יַ֭כִּיר מַעְבָּֽדֵיהֶ֑ם וְהָ֥פַךְ לַ֝֗יְלָה וְיִדַּכָּֽאוּ׃

‎26 ‏תַּֽחַת־רְשָׁעִ֥ים סְפָקָ֗ם בִּמְק֥וֹם רֹאִֽים׃

‎27 ‏אֲשֶׁ֣ר עַל־כֵּ֭ן סָ֣רוּ מֵֽאַחֲרָ֑יו וְכָל־דְּ֝רָכָ֗יו לֹ֣א הִשְׂכִּֽילוּ׃

‎28 ‏לְהָבִ֣יא עָ֭לָיו צַֽעֲקַת־דָּ֑ל וְצַעֲקַ֖ת עֲנִיִּ֣ים יִשְׁמָֽע׃

‎29 ‏וְה֤וּא יַשְׁקִ֨ט׀ וּמִ֥י יַרְשִׁ֗עַ וְיַסְתֵּ֣ר פָּ֭נִים וּמִ֣י יְשׁוּרֶ֑נּוּ וְעַל־גּ֖וֹי וְעַל־אָדָ֣ם יָֽחַד׃

‎30 ‏מִ֭מְּלֹךְ אָדָ֥ם חָנֵ֗ף מִמֹּ֥קְשֵׁי עָֽם׃

‎31 ‏כִּֽי־אֶל־אֵ֭ל הֶאָמַ֥ר נָשָׂ֗אתִי לֹ֣א אֶחְבֹּֽל׃

‎32 ‏בִּלְעֲדֵ֣י אֶ֭חֱזֶה אַתָּ֣ה הֹרֵ֑נִי אִֽם־עָ֥וֶל פָּ֝עַ֗לְתִּי לֹ֣א אֹסִֽיף׃

‎33 ‏הַֽמֵעִמְּךָ֬ יְשַׁלְמֶ֨נָּה כִּֽי־מָאַ֗סְתָּ כִּי־אַתָּ֣ה תִבְחַ֣ר וְלֹא־אָ֑נִי וּֽמַה־יָדַ֥עְתָּ דַבֵּֽר׃

‎34 ‏אַנְשֵׁ֣י לֵ֭בָב יֹ֣אמְרוּ לִ֑י וְגֶ֥בֶר חָ֝כָ֗ם שֹׁמֵ֥עַֽ לִֽי׃

‎35 ‏אִ֭יּוֹב לֹא־בְדַ֣עַת יְדַבֵּ֑ר וּ֝דְבָרָ֗יו לֹ֣א בְהַשְׂכֵּֽיל׃

‎36 ‏אָבִ֗י יִבָּחֵ֣ן אִיּ֣וֹב עַד־נֶ֑צַח עַל־תְּ֝שֻׁבֹ֗ת בְּאַנְשֵׁי־אָֽוֶן׃

‎37 ‏כִּ֥י יֹ֘סִ֤יף עַֽל־חַטָּאת֣וֹ פֶ֭שַׁע בֵּינֵ֣ינוּ יִסְפּ֑וֹק וְיֶ֖רֶב אֲמָרָ֣יו לָאֵֽל׃ ס

1 wayy^a‘an ’ĕlîhû’ wayyō’mar:

2 šimə‘û ḥăḵāmîm millāy wəyōḏə‘îm ha’ăzînû lî:

3 kî-’ōzen³ millîn tiḇəḥān wəḥēḵə yiṭə‘am le’ĕḵōl:

4 mišəpāṭ niḇəḥărâ-llānû nēḏə‘â ḇênênû mah-ṭṭwōḇ:

5 kî-’āmar ’îywōḇ ṣāḏaqətî wə’ēl hēsîr mišəpāṭî:

6 ‘al-mišəpāṭî ’ăḵazzēḇ ’ānûš ḥiṣṣî ḇəlî-fāš^a‘:

7 mî-ḡeḇer kə’îywōḇ yišəteh-ll^a‘aḡ kammāyim:

8 wə’ār^aḥ ləḥeḇərâ ‘im-pō‘ălê ’āwen wəlāleḵeṯ ‘im-’anəšê-reš^a‘:

9 kî-’āmar lō’ yisəkān-gāḇer birəṣōṯwō ‘im-’ĕlōhîm:

10 lāḵēn| ’anăšê³ lēḇāḇ šimə‘û lî ḥālilâ lā’ēl mēreš^a‘ wəšaday mē‘āwel:

11 kî fō‘al ’āḏām yəšallem-lwō ûḵə’ōr^aḥ ’îš yaməṣi’ennû:

12 ’af-’āmənām ’ēl lō’-yarəšî‘a wəšaday lō’-yə‘aûēṯ mišəpāṭ:

13 mî-fāqaḏ ‘ālāyw ’ārəṣâ ûmî śām tēḇēl kullāh:

14 ’im-yāśîm ’ēlāyw libwō rûḥwō wənišəmāṯwō ’ēlāyw ye’ĕsōf:

15 yiḡəw^a‘ kāl-bāśār yāḥaḏ wə’āḏām ‘al-‘āfār yāšûḇ:

16 wə’im-bînâ šimə‘â-zzō’ṯ ha’ăzînâ ləqwōl millāy:

17 ha’af śwōnē’ mišəpāṭ y^aḥăḇwōš wə’im-ṣadîq kabîr tarəšî‘a:

18 ha’ămōr ləmeleḵə bəlîyā‘al rāšā‘ ’el-nəḏîḇîm:

19 ’ăšer lō’-nāśā’| pənê śārîm wəlō’ nikar-šwō‘a lifənê-ḏāl kî-m^a‘ăśēh yāḏāyw kullām:

20 reḡ^a‘| yāmuṯû w^aḥăṣwōṯ lāyəlâ yəḡō‘ăšû ‘ām wəy^a‘ăḇōrû wəyāsîrû ’abîr lō’ ḇəyāḏ:

21 kî-‘ênāyw ‘al-darəḵê-’îš wəḵāl-ṣə‘āḏāyw³ yirə’eh:

22 ’ên-ḥōšeḵə wə’ên ṣaləmāweṯ ləhissāṯer šām pō‘ălê ’āwen:

23 kî lō’ ‘al-’îš yāśîm ‘wōḏ lahălōḵə ’el-’ēl bammišəpāṭ:

24 yārō‘a kabîrîm lō’-ḥēqer wayy^a‘ămēḏ ’ăḥērîm t^aḥətām:

25 lāḵēn yakîr m^a‘əbāḏêhem wəhāfaḵə layəlâ wəyidakā’û:

26 t^aḥaṯ-rəšā‘îm səfāqām biməqwōm rō’îm:

27 ’ăšer ‘al-kēn sārû mē’^aḥărāyw wəḵāl-dərāḵāyw lō’ hiśəkîlû:

28 ləhāḇî’ ‘ālāyw ṣ^a‘ăqaṯ-dāl wəṣ^a‘ăqaṯ ‘ănîyîm yišəmā‘:

29 wəhû’ yašəqiṭ| ûmî yarəši‘a wəyasətēr pānîm ûmî yəšûrennû wə‘al-gwōy wə‘al-’āḏām yāḥaḏ:

30 mimməlōḵə ’āḏām ḥānēf mimmōqəšê ‘ām:

31 kî-’el-’ēl he’āmar nāśā’ṯî lō’ ’eḥəbōl:

32 bilə‘ăḏê ’eḥĕzeh ’atâ hōrēnî ’im-‘āwel pā‘alətî lō’ ’ōsîf:

33 hamē‘imməḵā yəšaləmennâ kî-mā’asətā kî-’atâ ṯiḇəḥar wəlō’-’ānî ûmah-yāḏ^a‘ətā ḏabēr:

34 ’anəšê lēḇāḇ yō’mərû lî wəḡeḇer ḥāḵām šōmē‘a lî:

35 ’îywōḇ lō’-ḇəḏ^a‘aṯ yəḏabēr ûḏəḇārāyw lō’ ḇəhaśəkêl:

36 ’āḇî yibāḥēn ’îywōḇ ‘aḏ-neṣ^aḥ ‘al-təšuḇōṯ bə’anəšê-’āwen:

37 kî yōsîf ‘al-ḥaṭṭā’ṯwō feš^a‘ bênênû yisəpwōq wəyereḇ ’ămārāyw lā’ēl: s